Text Box: بسم الله الرحمن الرحيم Khutba Jummah HAZRAT AMIR’UL MUMINEEN MUHYI-UD-DIN Munir Ahmad Azim 05 Octobre 2012 ~ (18 Dhul-Qaddah 1433 Hijri) (Résumé Khutba) Jalsa Salana 2012 Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire: Mo Khutba Jummah azordi ena ene profond connexion avec sacrifice financier. Par la grâce d’Allah le Jamaat Sahih Ul Islam pé faire boucou progrès dans domaine de Dawa et le message pé répande dans quatre coins du monde. Alhamdolillah. Message pé répanne Oui, mais péna bane Dai-Illallah ou bane Missionnaires là-bas pou occupe sa bane chercheurs de vérité là. Pié là fine pousser, Alhamdolillah, mais bane mauvais l’herbe pé approcher kot zot capave attaque pié là et pié là capave vine sec, parceki pas ena ene jardinier ki pou occupe sa bane piés ki pou fleuri et rapporte zot so fruit dans l’avenir. Quand ena jardinier, mauvais l’herbe pas gagne lé temps pou attaquer, et remarquer ki mauvais l’herbe pousse pli vite ki pié fruit là. Pié fruit là prend so lé temps pou li pousser, mais quand li fine vine bien solide, personne pas pou capave déracine li et li rapporte boucou fruit. Donc, actuellement nous besoin boucou de missionnaires ou bane Waqfé-Arzi, pou alle travail dans différent pays, pou prêche l’unicité d’Allah, prêche le SAHIH AL ISLAM, l’Islam dans so l’authentique, pou casse tous bane idoles ki fine rentre dans le cœur, faire tarbiyyat de nous bane nouveau membres et rassembler zot tous ensemble lors le Tawheed et Manifestation Divine kot Allah (swt) fine envoye So humble serviteur pou retire zot tous de l’obscurité et amène zot vers la lumière. Donc, dans sa travail là, définitivement zot tous pas pou capave alle faire sa et surtout dans sa l’époque kot ena ene Messager d’Allah parmi zot, alors dans ene façon ou d’une autre, nous bane membres du Jamaat Sahih Al Islam participer kot zot faire bane sacrifices financier. Quand Allah (swt) envoye So messager, tous les temps très peu dimounes ki accepter li, et sa bane dimounes là zot pauvre, et aussi passe par bane épreuves, mais seulement zot le cœur pas pauvre. Nous conner même dans l’époque du Saint Prophète (saws) ti ena Sahaba ti alle travail dans bazar et amène sa l’argent là pou donne dans le chemin d’Allah pou faire passe le message d’Allah, So prophète (saws) et l’Islam comme religion. Dans tous l’époque de bane prophète, à chaque fois ki ene Messager vini, péna bane ressources mondain et l’argent pou prêche le message divine, mais Allah (swt) envoye So bane croyant sincère, pou accepter le message divine et travail dur pou prêche le message divine et aussi pou faire bane sacrifices financier dans le chemin d’Allah. Donc, par la grâce d’Allah façon ki le Jamaat Sahih Al Islam pé progressé à travers le monde entier, nous besoin boucou de l’argent, ce pourquoi ki parmi bane baze principale de l’Islam après le Kalima, Namaz, Roza, vine Zakaat. Zakaat cet ene pilier très important dans Islam et Allah (swt) fine mentionne Zakaat plusieurs place dans Quran et plusieurs place aussi Allah (swt) fine mentionne Salaat et Zakaat ensemble. Donc, pou le Jamaat Sahih Al Islam le Zakaat ki pli important ki tous bane lézot fond et li obligatoire (Farz). Si Farz ou pas faire, nek ou faire boucou Nafil, ki utilité sa Nafil là ena ? Absolument li couma ene z’orange flétri, ki bagasse, péna aucun jus. Farz c’est ene kitchose ki Allah (swt) ki imposé Li-même et ki pli obligatoire. Donc, avec l’argent du Zakaat boucou travail de Deen faire avec sa, mais malheureusement, azordi jour boucou fine piétine Zakaat en bas zot li pié et donne plisse l’importance lors bane lézot fond ki fine établi par l’homme. Séki Allah (swt) fine faire dessane à travers So prophète (saws) et ki trouve dans So Livre Sacré (le Quran Shareef), l’homme pas pé prend compte et zot pé prend compte séki créature pé faire, par million pé rentrer, sa même péna barakat d’Allah là-dans, kot ena pé coquin, boucou fraude, corruption. Donc, nous le Jamaat Sahih Al Islam, comme le Khalifatullah de sa l’époque la, mo dire tous mo bane disciples, contribuer généreusement dans fond Zakaat ki le 4ème pilier de l’Islam pou nous capave faire sa grand travail ki Allah (swt) fine choisir nous pou faire là. Alors chaque dimoune ki trouve dans Jamaat Sahih Al Islam bizin assume so propre responsabilité. Quand mo pé dire, assume zot responsabilité, c’est parceki jusqu’à l’heure ena boucou d’entre nous ki pas encore comprend sa vraie l’importance de sacrifice financier. Ena encore boucou d’autre ki gagne bane nouveau moyen de provision, bane travail etc., bane ki avant ki ti pé dépanne lors zot parents mais maintenant zot gagne bane nouveau moyen de provisions. Mais zot maman, papa pas donne importance pou ki faire zot faire bane sacrifice financiers, dépense dans le chemin d’Allah, pou la cause d’Allah seulement. Bane parents là penser, ki li féque commence travail, bé kot nous pou alle mette ene fardeau sacrifice financier lors so lé dos. Si ou garde en vue tout sa bane zaffaire là et éna aussi boucou nouveau venue comme sa, ki par la grâce d’Allah ena bane capacité mais jusqu’à l’heure pas fine porte l’attention lors zot. Et zot pas encore intégré dans le system sacrifice financier. Le Jamaat Sahih Al Islam ena boucou travail à faire, boucou dimoune ki pé rentre dans Jamaat Sahih Al Islam ki nous bizin occupe zot, envoye missionnaire là-bas, trouve ene place pou rassembler zot pou Namaz, Jummah, travail Deen, Tarbiyyat et Tarbiyyat zot zenfant aussi. Ene Jamaat ena boucou dépense à faire, ene Jamaat Allah pas là pou alle demande aide avec le gouvernement ou les autres dimoune ki pas dans le Jamaat d’Allah, et nous même, nous besoin faire boucou de sacrifice financier, Allah (swt) même fine mette sa la baze principale dans So religion (l’Islam), Allah (swt) conne mieux ki qualité travail ena et tous bane ki pou dépense dans So chemin, c’est Allah (swt) ki pou donne zot dix fois plisse ki zot dépense dans So chemin. Séki zot pou semer, sa même zot pou récolter et so fruit pou pli doux dans Aakhérat encore. Bane nouveau venue ki par la grâce d’Allah ena bane capacités mais jusqu’à l’heure zot pas pé porte l’attention lors sa travail ki bien noble là, c’est dépense ene partie de séki Allah (swt) fine donne zot pou ki retire l’homme de l’obscurité et amène zot vers la lumière d’Allah. Si le Jamaat Sahih Al Islam porte attention à tout sa bane manquement là, et nous dépense dans le chemin d’Allah, alors li pas impossible ditou pou faire sa grand travail ki Allah (swt) fine choisir nous pou faire là. Donc quand l’intention pure et propre, bé ene dimoune ki trouve li dans le Jamaat d’Allah et li dans Manifestation Divine, par li même li rode ene chemin ou ene moyen pou dépense dans le chemin d’Allah, dans le Jamaat d’Allah et kot le Choisi d’Allah li là et présent parmi zot et sa pou reste dans l’histoire du Jamaat Sahih Al Islam jusqu’à Qiyamat et séki ou pou semer ici, ou génération, so génération pou bénéficier sa fruit spirituel là, Insha-Allah et ou pou récolter sa dans Akherat, Insha-Allah. Comme le Khalifatullah de sa l’époque là, mo attende ki mo bane disciples ki trouve dans plusieurs pays dans le monde entier, par la grâce d’Allah, alors mo attane Jamaat Sahih Al Islam International, pas juste à Maurice, mais international pou porte attention spéciale lors là et faire ene très bon l’intention ki zot dépenser un peu plisse dans le chemin d’Allah, pas moins et pas tictiké pou dépenser ou pou guetter couma Allah (swt) pou mette boucou barakat dans zot l’argent et dans zot dibien. Insha-Allah. Ou dépense dans chemin d’Allah pou faire Allah So travail, ou pas pou vine ni pauvre, ni ou manger boire pou diminuer, et ni ou pou endetter et ou pou trouver couma Allah (swt) pou récompense ou autant ki Li ouler. Quand ou dépense plisse dans chemin d’Allah pou aide le Messager d’Allah pou faire le travail la religion d’Allah avancer bocou, bé sa c’est ene zaffaire de Mohabbat, d’amour pou Allah et So serviteur Choisi et quand ou pou trouve récompense d’Allah vini, li vraiment pou ene zaffaire extraordinaire. Dans ou di bien pou ena barakat, dans ou la santé aussi pou ena bénédiction d’Allah, dans ou contentement aussi pou ena grâce et bénédiction d’Allah et tout le system de ou l’organisation même pou vine en bonne santé, pou ena ene la paix, ene tranquillité Insha-Allah. N’importe ki condition ene pays dans le monde entier ki ena connexion avec le Jamaat Sahih Al Islam et fine reconnaitre et accepter sa humble serviteur d’Allah là, zot bizin pas faire sourde d’oreille, ou tourne le dos avec sa l’appel ki mo pé faire avec zot là, sinon zot situation, zot conséquence pou bien grave, parceki pas avec moi ki zot pou faire sourde d’oreille, ni tourne le dos mais avec Allah (swt), zot Créateur, avec ki ena zot la vie, la santé, manger, boire, l’honneur etc. etc. ki trouve dans So la main. Alors réfléchi boucou lors là avant zot faire bane action négative, bane action ki Allah (swt) en colère avec ou. Au moins avant quitte sa le monde là et ou pou bizin présente devant ou Rab, alors faire bane bonne action ki Allah content avec ou et quand ou pou présente devant Allah (swt), ou présente devant Li avec ou bane bonne action, Insha-Allah. Alors comme le Khalifatullah de sa l’époque là, mo faire ene l’appel à tous mo bane disciples ki trouve à travers le monde entier sans exception, nous ena boucou, boucou, boucou travail de deen pou faire à travers le monde entier. 1er – Premièrement nous ena plisse ki 65 livres ki nous fine écrire ki bien bizin publier et dans différent langues, 2ème – Nous ena en plusieurs volume nous Al-Azim-Tafsir-Ul-Quran pou publier, en plusieurs langues aussi. 3ème – Nous ena plusieurs dimounes ki fine rentre dans le Jamaat Sahih Al Islam à travers le monde entier ki nous pou bizin boucou missionnaires pou alle travail dans sa bane pays là avec ene bon connaissance de Quran Shariff, Hadices, livres écrire par Hazrat Mirza Ghulam Ahmad (as) et bane lézot Mujaddid et conne bien la langue Arabe, Urdu, Persan, Anglais, Français et bane les autres langues, Insha-Allah. 4ème – Nous pou bizin faire ene bon formation missionnaires dans nous bane dimounes ki pou dédier zot pou le travail de Deen et propage le Sahih Al Islam et nous pas bizin la quantité dimounes pou rentre dans Jamaat Sahih Al Islam mais nous bizin la qualité et saki Muttaqi, Insha-Allah. 5ème – Quand pou envoye nous bane missionnaires travail dans bane lé zot pays bizin paye zot bien, pou ki zot faire seulement travail de Deen et envoye zot avec zot famille aussi. 6ème – Dans tous sa bane pays ki le Jamaat Sahih Al Islam fine établie, fine arrive l’heure pou acheter ene portion terrain pou faire ene Masjid, avec so Madrassa, Bureau Office-Bearers et Mission House (la case missionnaire). 7ème – Le Jamaat Sahih Al Islam, Insha-Allah pou bizin ena ene Jammia et ene Daroul-Ul-Uloom pou enseigne nous bane jeunes ki pou dédier zot pou le service de l’Islam et pou alle travail dans plusieurs pays du monde. Insha-Allah alors nous bizin ena ene Jammia (collège missionnaire) dans pays Anglophone, Francophone etc. Alors bizin trouve ene Jammia dans l’Inde, Mayotte, l’île de la Réunion, Maurice, Japon etc. etc. et aussi pou bizin plusieurs administrateur et enseignants ki pou bizin l’argent pou construire et paye sa bane dimounes ki pou travail là. 8ème – Insha-Allah au début dans certains pays nous pou ena nous Radio Privé uniquement lors la spiritualité et aussi Insha-Allah doucement, doucement nous pou ena nous propre la presse. 9ème – A Maurice même à la demande ene grand terrain ki pou ena tous so complète, avec grand Masjid, Guest House, Jammia, Conference Room avec so l’équipement, centre médicale et li pou servi pou tous l’humanité sans exception avec bane Médecins et Dentistes, et bane la case pou bane ki pou vine travail ici et acheter bane transport aussi pou facilite le travail et aussi ene l’école académique pou l’éducation nous bane zenfant et jeunes et aussi kot nous pou capave faire ene Eid et Jalsa Gah. Mo fine fini commence recherche sa grand terrain là de 15 à 20 Arpent, par la grâce d’Allah ; le prix li cher, mais nannié pas impossible avec l’aide d’Allah, kitchose impossible vine possible. 10ème – Dans Mayotte ena ene terrain ki ene frère fine donne le Jamaat ; bien vite, nous besoin alle construire ene Masjid, la case Imaam, Madrassa et pou envoye ene missionnaire là-bas, et à Mayotte c’est l’argent Euro ki utiliser parceki li ene territoire français, tout comme l’ile Rodrigues aussi pou la construction et très bientôt nous pé finalise tous nous bane papiers quand ena ene dernier trance à payer jusqu’à la fin mois de Novembre 2012 et l’heure là nous pou capave alle vers construction et aussi dans les autres pays. 11ème – Le Jamaat Sahih Al Islam ena le privilège pou traduire tous bane livres de Hazrat Mirza Ghulam Ahmad (as) en plusieurs langue. Parceki ena boucou livre ki le Jamaat Ahmadiyya pas fine traduire, malgré ki zot ena boucou plisse finance ki nous par billion et des billions, mais là aussi zot pas fine faire li, Insha-Allah le Jamaat Sahih Al Islam pou réussi faire li. Comme le Khalifatullah de sa l’époque là, fond ki fine lancé c’est Muqaddam Fund à travers tous pays kot ena le Jamaat Sahih Al Islam pou acheter terrain, construction Masjid, Madrassa, Mission House etc. etc., et aussi acheter terrain pou nous cimitière. Sa c’est ene tel bonheur ki le Jamaat Sahih Al Islam pé gagner dans sa siècle là kot ene Messager d’Allah même pé lance sa l’appel là sous l’instruction divine, péna personne d’autre ki pé gagne sa bonheur divine ki pé déssane du ciel là, alors pou sa le Imaan li très nécessaire et pou tout bane demande de sacrifice financier, Allah (swt) fine lié li avec Imaan, et au contraire fine mette Imaan avant ensuite fine mette le sacrifice financier. Et la vérité c’est ki le sacrifice financier vini de Imaan même. Alors mo faire ene l’appel spécial à tous bane Amirs et Secrétaires Finance pou travail d’arrache-pied pou faire tous bane dimoune prend compte de sa l’appel parfait pou dépense dans le chemin d’Allah là et envoye zot rapport le plus vite possible et faire conné dans ki situation sa travail là pé dérouler, et ki contribution de nous bane membres, ki sanlà pé corporé avec le Jamaat et ki sanlà pé faire sourde oreille. Si jamais zot ena bane questions, ou bane suggestions pou faire, pas hésiter et envoye zot lettre ou e-mail. Chaque Jamaat dans le monde entier, ena ene grand travail à faire dans sa domaine là et surtout bane Amirs et Secrétaire Finances. Dans le monde entier dans nous bane Jamaat kot Imaan pé progresser, c’est avec bénéfice de sa augmentation de Imaan là même ki le sacrifice financier pou progresser. Donc, sa c’est ene bonheur unique ki nous fine gagner. Ki Allah garde toujours sa bonheur là et pou ki sa rester, li nécessaire ki nous protège nous Imaan et ki Allah faire toujours sa bonheur là et pou ki sa rester, li nécessaire ki nous protège nous Imaan et ki Allah faire toujours nous Imaan pli progresser ki avant. Insha-Allah. Ameen. Mo pé bizin arrête mo Khutba Jummah là même azordi. Insha-Allah, talère mo pou fer le discours d’ouverture du Jalsa Salana 2012, et kot nous pou ena pou recevoir nous bane invités.

Écoute le Khutba Jummah du Khalifatullah Munir A. Azim en intégralité (Audio)