بسم الله الرحمن الرحيم

Khutba Eid-ul-Adha

 

HAZRAT AMIR’UL MOMENEEN MUHYI-UD-DIN

AL KHALIFATULLAH

 

Munir Ahmad Azim

 

06 Novembre 2011

(10 Dhul Hijjah 1432 Hijri)

 

EID MUBARAK

 

(Résumé Khutba Eid)

 

 

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça bane versets Quran suivant là:

 

 

AL-HAJJ CH.22 V.35-37

وَلِكُلِّ أُمَّةٍ جَعَلْنَا مَنسَكًا لِيَذْكُرُوا اسْمَ اللَّهِ عَلَى مَا رَزَقَهُم مِّن بَهِيمَةِ الْأَنْعَامِ فَإِلَهُكُمْ إِلَهٌ وَاحِدٌ فَلَهُ أَسْلِمُوا وَبَشِّرِ الْمُخْبِتِينَ ۝ الَّذِينَ إِذَا ذُكِرَ اللَّهُ وَجِلَتْ قُلُوبُهُمْ وَالصَّابِرِينَ عَلَى مَا أَصَابَهُمْ وَالْمُقِيمِي الصَّلَاةِ وَمِمَّا رَزَقْنَاهُمْ يُنفِقُونَ ۝ وَالْبُدْنَ جَعَلْنَاهَا لَكُم مِّن شَعَائِرِ اللَّهِ لَكُمْ فِيهَا خَيْرٌ فَاذْكُرُوا اسْمَ اللَّهِ عَلَيْهَا صَوَافَّ فَإِذَا وَجَبَتْ جُنُوبُهَا فَكُلُوا مِنْهَا وَأَطْعِمُوا الْقَانِعَ وَالْمُعْتَرَّ كَذَلِكَ سَخَّرْنَاهَا لَكُمْ لَعَلَّكُمْ تَشْكُرُونَ ۝

Wali-kulli ‘ummatin ja-’alnaa man sakal-liyazkurus-mallaahi ‘alaa maa razaqahum-mim-bahiimatil-’an ‘aam. Fa ‘Ilaahukum ‘Ilaahunw-Waahidun falahuuu ‘aslimuu: wa bash-shiril-Mukhbitiin. ‘Allaziina ‘izaa zukirallaahu wajilat quluubuhum wal-muqiimis-Salaati wa mimmaa razaqnaahum yunfiquun. Wal-budna ja-’alnaaha a lakum-min Sha-’aaa ‘irillaahi lakum fiihaa khayr: fazkurus-mallaahi ‘alayhaa sawaaff: fa ‘izaa wajabat junuubuhaa fakuluu minhaa wa ‘at-’imluqaani-’a wal-mu’-tarr: kazaalika sakh-kharnaahaa lakum la-’allakum tashkuruun.

 

Pour sak communauté Nous fine prescrire des rites sacrifices, pou ki zot rappel nom Allah lors bane bétail ki Li fine fourni zot. Ou bon Dieu, Li le Dieu unique. Alors soumette à Li, et donne bon nouvelle à bane ki humilié zot divant li. Bane ki kan nom Allah mentionner, senti ene frisson dans zot le cœur, bane ki supporte ce ki arrive zot, bane ki pratique la prière régulièrement et bane ki dépense (en charité) ene partie de ce ki nous fourni zot. Nous fine désigne bane chameaux bien portants pour certaines rites sacres pou Allah, et dans zot ena ene bienfait pou ou. Alors prononce nom Allah lors zot, kan fine attache zot la patte, prêt pou sacrifié. Ensuite kan zot en bas lors zot flanc, mange ene partie et donne à manger bane mendiants  et bane ki misère (mais pas dimane charité) comme sa, nous fine mette zot à ou service, afin ki ou montrer reconnaissance.

 

Donc sakaine parmi nous capave constater d’après sa bane versets là, ki Allah pé rode faire nous comprend. Allah pé dire ki à sak communauté, sak nation, Nous (Allah, So bane anges et So bane prophètes) fine enseigne ene rite, ene façon de sacrifice afin ki tout séki Allah fine donne zot, bane bétail etc., zot invoque le nom d’Allah au moment du sacrifice et aussi kan pou mange zot. Ou Allah, Li en vérité ene Allah unique. Alors soumette à Li tout seul et annonce à bane ki soumette, bane ki adopter l’humilité, bane ki zot le cœur trembler dès ki zot tanne le nom d’Allah et zot endure avec patience si ene malheur frappe zot et zot établi le Namaz et de séki Nous donne zot, zot dépenser. Sa c’est l’état et condition de bane dimounes d’Allah. Et sur le plan humain tout sa bane conditions là réuni zot tout sous ene seul la main et faire zot établi zot connection avec Allah l’unique, c’est-à-dire, bane dimounes, kan zot tanne le nom d’Allah, zot frissonner. Sa pas veut dire ki sak moment zot frissonner, mais ena certain moments de zot la vie, zot l’amour et attachement pour Allah faire zot trembler dès ki zot tanne So nom. Fine dire ki sa c’est bane dimounes ki prend Sabr, alors c’est à travers le Sabr ki ou capave reconnaitre zot.

 

Ensuite c’est bane dimounes ki établi le Namaz. Et ici li pas veut dire le Namaz de l’Islam même, parski ici pé mentionne tout bane peuples du monde entier. Ensuite Allah dire zot dépensé de ce ki Nous donne zot. Sa c’est trois qualités fondamentale ki connecté zot avec Allah l’Unique. Et kan ou guette ene coup l’histoire de bane peuple du monde, dans n’importe quel époque, ou pou trouver ki sa applique lors zot tous indistinctement. En mentionnant le Hajj pé mentionne bane affaires ki ena connection avec l’humanité tout entier. D’ailleurs le premier verset même indiquer ki pou sak peuple Allah fine enseigne bane rites de sacrifices. C’est pas ene sujet ki connecté avec bane musulmans seulement, mais avec toute l’humanité. Et le sujet de Hajj aussi connecter avec tous bane dimounes. A cause sa même kan Quran faire mention de premier maison d’adoration ki ti construire à Makkah, là-bas même fine mentionner ki c’est ene maison ki fine construire pou l’humanité tout entier.

 

Donc, Hajj li pas ene signe de l’unité de musulman seulement et li pas ene signe de regroupement de bane musulmans en ene Ummat seulement, mais li ene signe de regroupement de toute l’humanité en ene seul Ummat. Et dans sa contexte là, dans sak nation religieux ena le sujet de Hajj. Couma dire dès le commencement ti ena la préparation pou faire toute l’humanité vine ene seul.

 

Kan ou guette le christianisme, ou trouver ki zot ena le concept de pèlerinage. Au contraire zot ena tellement de places de pèlerinages ki peut être personne péna autant ki sa. Surtout le Catholique Romain, ena bane place kot zot voyagé zot allé. Ena d’autres places zot marcher zot aller en accomplissant toute sortes de rites. Ena des milliers de places coumsa kot bane catholique aller sois ene fois par l’année pou le pèlerinage.

 

Bane Juifs zot pèlerinage connecté avec Jérusalem. Et tout dimoune conné ki zot alle là-bas pou faire Ziarat, ensuite tappe zot la tête contre muraille, zot faire la prière pour la venue du Messie; sa c’est ene sorte de pèlerinage pou zot. De la même façon ena certain les autres places kot zot alle faire Ziarat, donc bane Juifs aussi ena ene sorte de Hajj. En ce ki concerne bane Hindou, dans l’Inde c’est zot même le pli grand nation, sur le point de vue religieux, zot aussi zot ena différent place kot régulièrement zot alle faire le Yattra pèlerinage. Ena 68 places sacrée coumsa pou zot. Et là-dans le pli grand place saint c’est « Banaras » sak l’année ena à peu près 1 millions des Hindou ki rassembler dans sa place là pou pèlerinage, ena encore plusieurs bane places coumsa. Mais zot deux places pli important pou le « Tilat Yattra » c’est Banaras et Jagnath Poori, et li ene zaffaire étrange ki pou sak pèlerinage ena presque les même rites, c'est-à-dire avec sak pèlerinage ena ene conception de sacrifice, et dans boucou des pèlerinages ene conception de rase la tête.

 

Kan ou guette Yattra de bane Hindou, bé ena le rasage de tête et zot aussi faire le tour de zot bane places sacrées et chante tout qualités Bhajans, zot diminuer zot bane linges. Pou le Tilat Yatra zot mette ene linge simple, ena rase la tête aussi. Ena aussi sa zaffaire de l’eau béni là, de l’eau de Banaras ki considérer comme sacrée. Zot prend sa de l’eau là zot amène la caze, pareil couma bane musulmans prend de l’eau zam-zam amène la caze.

 

Donc li paraitre ene sujet étrange mais c’est Quran ki fine mentionne sa avant. Dans aucun autre livre péna mention de sa. Ou capave analyse tout bane religions ou pou trouvé ki en fait fine faire mention de Hajj. Kan même fine mentionne le nom de Hajj ou pas, mais ena mention d’ene tel Ibaadat kot ena ene place sacrée kot bane dimoune raze zot la tête allé. Et sa aussi c’est ene signe de sincérité comme-ci ou livrer ou nette. Ensuite ena simplicité linge, reste dans ene seul Chaadar, prend bain, puis prend ene zaffaire sacrée de là-bas amener et aussi alle faire sacrifice là-bas, faire boucou de charité, servi l’humanité pou la cause d’Allah, tout sa là zot bane sujets ki connecter avec Hajj.

 

Donc sa c’est ene system international ki Allah fine faire, afin ki finalement tout l’humanité rassembler sous ene seul la main. Mais c’est ene zaffaire bien étrange et triste pou bane musulmans, ki bane pèlerinages ki ti spécifiquement juste pou certain peuple et nation ou groupe, bane pèlerinage ki pas ti universelle, mais dans sa bane places de pèlerinage là ena invitation ouvert pou tout bane dimounes ki zot capave vini et faire pèlerinage pareil couma zot.

 

Tandis ki le Hajj ki ti le sommet de tout bane Hajj, ene Hajj pou laquelle ti pé prépare tout bane dimounes, mais là-bas même fine ena cadenas et ena bane gardiens, bane portiers pou veiller ki à part bane musulmans personne péna la permission de Hajj, et sa inclure bane Musulmans ki fine croire dans le Messie Promis, kot la porte Hajj fine fermer pour nous, parski zot croire ki l’autorité de la Mecque et du Hajj trouve dans zot la main, kot zot barre l’humanité dans so l’ensam pou vine vers la Caze de l’humanité. Ki conné sa moment ki zot (bane les autres religions) vine dans sa lieu sacré là, zot alle gagne Iman (la foi) dans ene sel Dieu?

 

Li bien étonnant et ene dimoune attrister kan li guette sa, li sans position, li bien étrange, ki le seul Hajj pou laquelle Quran dire ki c’était la première maison d’adoration d’Allah ki ti faire pou l’humanité toute entier, mais là-bas même pas tout ki ena la permission pou aller. Tandis ki bane maisons, bane places ki ti exclusivement pou certaine peuples, certaines nations, bane là zot le cœur sitant grand ki zot invite le monde entier pou vini et faire pèlerinage couma zot. Et sa c’est ene condition naturel et automatique. Si par exemple ou alle dans Tilat Yattra de bane Hindou, bé li très naturel ki zot pas pou content ki ou alle là-bas et commence faire Nara-e-Takbir et faire bane rites et Ibaadat couma bane musulmans.

 

Si ou envie participe dans pèlerinage de bane chrétiens, bé li ene zaffaire naturel ki zot pas pou content ki ou faire ou rites islamique. Mais si ou adopter zot façon Ibaadat, bé à ce moment là zot pas pou ena aucaine objection. Kan même de ki religion ou appartenir, sa pas dire zot nannié. Si ou faire couma zot, bé tout dimoune ena la permission pou vini et faire le Hajj couma zot. Mais Hajj ki moi mo pé mentionner là, là-bas péna sa débat là si pas quelqu’un faire Hajj couma musulman ou non. Là-bas zot guette ki so religion ? Et si dimoune là appartenir à ene lotte religion, si l’enquête de la police démontrer ki en fait so religion c’est chrétien ou soi ene lotte religion, bé bane là donne li punition bien sévère.

 

Donc guette couma sa sujet là fine tourne en bas là-haut. Sa seul place de Hajj ki ti monter pou l’humanité toute entier, sa même place népli ouvert pou tout bane dimounes. Tandis ki bane place de pèlerinage ki ti juste pou certaine peuple, là-bas ena invitation ouvert pou tout bane dimounes vini et faire pèlerinage couma zot. Au contraire zot ena ene fierté, ene plaisir kan quelqu’un vini.

 

Donc magine sa point centrale de Hajj là bien. Et tout les temps les membres du Jamaat Ul Sahih Al Islam bizin magine sa bien. Parski nous ena pou ré-amène les valeurs perdu de l’Islam et ena pou appelle toute l’humanité vers l’enseignement du Quran ki bane dimounes fine gâter, pareil couma dire la rouille fine prend lors bane bartan, nous ena pou ré-nettoye sa propre. Nous ena pou donne Khana Ka’aba sa bain spirituel là, de sorte ki après sa bain là, c’est le Khana Ka’aba ki ti manifester lors le cœur de Hazrat Muhammad (saws) ki émerger. Le Khana Ka’aba ki Hazrat Ibrahim (as) et Ismail (as) ti rebâtir et bane dimounes ki zot noms pas mentionner dans Quran mais ki associer à la construction de Khana Ka’aba. Quran dire ki ti ena certain dimounes. Ki sa bane dimounes là, et dans ki l’époque zot ti vini, sa nous pas conné ! Mais sa premier maison d’adoration là, li bizin ene zaffaire ki date de l’époque kot toute l’humanité ti comme ene seul famille. C’est le commencement de Insaaniyat. Kan fine ena sa l’évolution extraordinaire de l’état d’animal à l’état de Insaan.

 

Kan l’homme fine vine dans ene état kot li capave tender et causer aussi, mo penser ki c’est sa l’époque là ki Quran pé faire référence. C’est pourquoi ene nom de sa maison là c’est ‘Baitul Aqiq’ c'est-à-dire ene maison bien ancien, ena ene lotte zaffaire étrange c’est ki bane les autres religions aussi zot place saint et sacrée ena ene connection avec ancienneté. En séki concerne bane hindous, zot considérer ki zot livre sacrée, le Veda li tellement ancien ki li date avant même ki le temps commencer. Zot penser ki zot civilisation aussi et zot bane places sacrée aussi bien ancien. Pourtant en ce qu’il s’agit de Banaras, d’après l’histoire connu, nous conner ki Banaras date de 600 ans avant Jésus. Veut dire ki l’histoire de so sainteté commencer 600 ans avant le Messie et 100 ans avant Hazrat Bouddha (as) mais de toute façon, zot revendiquer sa ancienneté là.

 

Mo penser ki c’est de bane anciens nations ki bane dimounes fine hérite sa ancienneté là et ancien veut dire sa même sa la caze ki fine appelle Baitul Aqiq. Bane messages ki attaché are sa maison là zot bane messages très ancien. Et en fait c’est la religion de Ibrahim (as) même sa. Ene religion ki ti déjà là, avant même l’arrivée de Hazrat Ibrahim (as). Kan nous tender ki le Veda date d’avant même la création, li apparament étrange. Bane dimounes dans zot innocence penser ki c’est ene mauvais pensée et zot rejette li. Mais la vérité c’est ki tout bane paroles divines kan même couma ou appelle zot, zot là depuis tout le temps, avant même la création de l’univers.

 

C’est pourquoi fine ena boucou de débat, si pas le Quran li ene création ou pas. Bane débat là ti prend ene tel ampleur ki bane dimoune ki ti dire ki Quran c’est ene création, kan zot ti au pouvoir zot fine persécute sévèrement bane dimounes ki pas ti d’accord avec zot l’idée. Ti pé bâter, persécuter, fouetter, torturer et pendi bane dimounes là, juste parski bane dimounes là ti ena ene Aqeeda contraire are zot. Maintenant bane dimounes ki ti croire ki bane paroles d’Allah ti là tous le temps, zot ti penser ki c’est ene offense pou dire ki Quran c’est ene création. Kan zot fine vine au pouvoir, bé zot fine persécute bane ki ti pé dire ki Quran ene création. Dans l’histoire de l’Islam ena sitant des anecdotes douloureux lors sa sujet là ki ou étonner terrible. Hazrat Imam Ahmad bin Hanbal ki ti ene de sa quatre grand Fokahala, li ti ene grand Imam. Azordi jour nous pas penser ki n’importe ki sanlà capave donne fatwa de Kufr contre li. Li ti ena sa croyance là ki bane paroles d’Allah li très ancien, zot date dès le commencement. Pou sa offense là zot fine attrape li, enchaine li et fine présente li devant Qaza, et Qaza fine donne décision ki sa dimoune là li ene Murtad de premier degré et li égare bane dimounes; punition ki ti fine prescrire pou li, fine mette li dans soleil et fine enchaine li et fine continuer fouette li. Kan ene bourreau ti fatiguer ene lotte ti pé remplace li et fouetter là li continuer. Mais sous la pluie de sa bane fouettes là, li ti pé continuer dire ki Allah So paroles pas ene création mais li ene affaire ki toute temps avec Allah même.

 

Donc dans comprend signification bane paroles Allah (ancienneté) aussi bane dimounes fine faire bane grand erreurs. Et zot fine prend la loi dans zot la main et fine donne bane punition bien, bien sévère à bane Banda Allah. Couma dire zot même Allah.

 

Donc tout bane enseignements ki vrai, li bizin nécessairement cadrer avec la nature humaines. Pas prend so signification comme ene résultat de bane raisonnements intellectuel. En fait li connecté avec ene profond nature humaine. Dans sa sense là kan nous guette Khana Ka’aba comme ene ancien maison d’adoration et ensuite guette nous revendication de bane les autres religions ki dire ki zot centre de pèlerinage li ancien, bé li pas ene affaire ki incite à la violence. Péna nannié là-dans ki faire vexer ou soi ki faire gagne colère. Péna nannié si bane Hindou dire ki zot place sacrée li ancienne. Quran fine apporte solution à sa problème là kan li fine mentionne bane choses ancien sans cite des noms, et bane affaire ki ena seulement lien avec Allah et l’humanité.

 

Quran dire ki la premier maison d’adoration pou l’humanité, et le mot humanité englobe tout, que ce soi musulmans, chrétiens, hindous etc., tout inclus. Donc Allah pé dire ki c’est ici ki sa premier maison là fine construire. Allah même conne pli bien ki sa bane premier dimounes là. Ni fine mentionne zot noms et ni li nécessaire nous pense lors là. Parski dans bane versets là fine mentionner ki en fait c’était bane dimounes ki fine appranne faire des sacrifices avec Allah même. Sa c’est bane dimounes ki tout le temps fine faire Sabr kan fine cause zot difficulté lors Duniya, jamais zot pas fine plaigner, ensuite zot établi Ibaadat, et zot dépenser lors bane dimounes pou la cause d’Allah. Sa bane tel dimounes patient là, ki à cause zot l’amour pou Allah, zot trouve tout bane difficulté, comme ene zaffaire facile. Patience ena ene connection profond aussi avec Hajj. C’est en résultat de la patience même ki ou gagne Hajj et gagne l’occasion pou accompli bane rites de Hajj.

 

Kan ti reconstruire le Khana Ka’aba bé c’est la patience même ki ti pli en vue. L’exemple de Hazrat Hajra et so garçon Hazrat Ismail (as) fine montré, ki c’est en fait ene l’exemple de patience même. Couma sa zenfant là, ti pé cherche quelque chose à boire, li ti pé tappe so lipié par terre et couma la maman fine faire le va-et-vient entre Safa et Marwa pou trouve quelque chose à boire pou sa zenfant là. Sa l’heure là li ti bien béchayn, li ti couma dire ene folle. Mais là aussi pou la cause d’Allah li fine prend patience et sa zenfant là aussi fine prend patience et le papa (Hazrat Ibrahim (as)) aussi fine prend patience, et en résultat de sa nous fine gagne sa la source là ; Sabr ena ene lien avec l’amour d’Allah.

 

Dans sa le monde là, aucun problème pas capave résoudre sans amour. Kan en référence are sa bane dimoune là Allah pé dire ki zot trembler kan zot tanne le nom d’Allah, bé en fait c’est zot l’amour pou Allah ki faire zot le cœur trembler, et lerlà pou la cause d’Allah sa bane dimounes là trouve tout problème facile.

 

Donc kan Allah donne ou ene kitchose ensuite Li reprend li ou sois kan Allah so décret permette (certaine dimoune ki ena pouvoir) cause ou du tort, bé puisque ene Momin (croyant) li bizin supporte sa de toute façon et li supporte toujours pour le plaisir d’Allah.

 

Ensuite pou gagne le plaisir d’Allah zot dépenser aussi bane affaires lors laquelle zot ena full contrôle. Donc sa c’est excellent qualités ki bane ki alle faire Hajj bizin adopter. Ena ene Hajj ki visible, ki tradition et c’est en résultat de sa Hajj la ki bane dimoune faire le Tawaaf de Baitullah et bane les autres places saint.

 

Mais séki invisible là, li trouve dans l’esprit de sa dimoune ki pé alle faire Hajj là, c’est li pé faire sa, pou faire Allah plaisir. Donc dans n’importe ki religion, ki secte, ki communauté si zot alle faire Ziarat ene place saint pou la cause d’Allah, bé li nécessaire ki zot adopter sa bane excellents qualités là pou alle là-bas.

 

Lerlà ou voyage pou vine facile si ou péna sa bane excellent qualités là avec ou, bé ou capave alle faire pèlerinage de bane place saint, kan même ou appelle li Makkah ou soi Kaaba ou soi Banaras ou Matra, de toute façon li pas pou acceptable kot Allah.

 

Donc Allah fine donne Hajj comme ene exercice, ene zeffort, ene la lutte pou ki rassembler tout bane dimounes et sak dimounes ki envie ki so Hajj accepter bé li bizin faire tout bane actions ki faire Allah plaisir, bane action ki pou rassembler l’humanité.

 

Donc plonger dans l’amour d’Allah d’ene façon ki bane places kot bane amoureux d’Allah ti été, content sa bane places là aussi. Guette sa bane Montagne, bane la plaine, bane places kot bane dimounes fine montré zot l’amour pou Allah, kan ou guette sa, bé ou aussi de par l’amour pou Allah larmes pou couler de ou lizié.

 

Donc respire sa bane l’air là et tanne sa bane Takbir ‘Allah O Akbar, Allah O Akbar’ là et sa pou crée ene révolution dans ou le cœur. Et tout sa vini en résultat de l’amour même, si ou ena sa l’amour là bé jamais ou pas pou ena aucun la haine pou sa bane dimoune ki pé faire Hajj là, ou pas pou développe l’arrogance.

 

Ou pas pou considère zot comme bas, Non. Parski zot aussi d’après zot pensée, d’après zot compréhension, kan même zot en raison ou pas, zot pé prépare pou sa Hajj universelle là. Fine enseigne zot sa façon de Hajj là et fine enseigne tout bane Ummat du monde entier. Parski finalement ler pou ena ene seul Ummah, kan le monde entier pou rassembler lors la main de Hazrat Mohammad (saws) lerlà li pou sa jour de Hajj-e-Akbar là.

 

Et c’est pou sa, le Jamaat Ul Sahih Al Islam, c’est lors ou ki fine confier sa travail là, fine faire ou vine serviteur de sa haut objectif là, et mo péna le moindre doute, mo ena full certitude et mo mette Allah comme témoins, mo dire ou ki dans l’avenir sa Hajj ki pou vini à travers le service de Jamaat Ul Sahih Al Islam, li pou ene Hajj universelle ki tout bane dimounes pou faire vraiment pou la cause de Hazrat Muhammad (saws). Pou la cause de Hazrat Muhammad (saws) dans sa sense là ki tout bane dimounes pou réuni là-bas et pou suivre exactement façon l’amour ki li fine démontrer. Parski c’est li ki ti ena pli boucou l’amour pou Allah.

 

Donc c’est sa Hajj à ki nous bizin établi dans l’avenir. Sa même Hajj kot tout bane dimounes du monde entier pou rassembler et après Hazrat Mohammad (saws) c’est sa Hajj là ki pou appelle Hajj-e-Akbar. Donc ou bizin appranne couma pou rassembler le monde entier. C’est ou ki bizin donne sa Tarbiyyat là, et c’est à travers sa bane excellent qualités ki fine mentionner dans sa bane versets là ki ou capave faire sa. Ou bizin adopter et être bane serviteurs de sa bane qualités là et propage sa bane excellent qualités là partout. C’est à ce moment là ki tout bane dimounes pou capave rassembler sous ene seul la main, dans ene seul place. Sa Khana Ka’aba ki ti le pli ancien là li pou le premier aussi et le dernier aussi et de sa façon là sa sujet là pou arrive à so pli haute stage. Ki Allah donne nous sa Tawfiq là pou faire sa travail là. C’est ene travail bien difficile et nous bien faible mais avec Barakat de duah et tout en préservant nous bane valeurs, nous capave continuer dans sa voyage là et continuer avec amour. Ki Allah aide nous pou accomplir nous bane objectifs. Insha-Allah. Ameen.