Text Box: بسم الله الرحمن الرحيم Au Nom d’Allah, Le Gracieux, Le Miséricordieux Khutba Eid HAZRAT AMIR’UL MOMENEEN MUHYI-UD-DIN AL KHALIFATULLAH Munir Ahmad Azim 31 August 2011 EID MUBARAK (Résumé Khutba Eid) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine dire: Eid-ul-fitr li ene fête ki marque la fin mois Ramzane, le mois de carême (Roza) et sacrifices, kot dans sa mois là fine mette l’emphase lors cultive bane telles vertus couma la patience, la tolérance et le pardon. Sa bane bons qualités ki nous fine gagner au cours de Ramzane, sa bane bons qualités là Astaire là bizin forme partie de nous conduite pour tout les temps, toute au long de nous la vie. Nous bizin profite au maximum opportunité de sa célébration là pou renforci nous bane liens avec nous bane familles proche et camarades et voisins. Bane telles opportunités couma sa bizin permette nous pou alle au-delà de bane bords culturels. En sa l’occasion béni là, li approprié pou ki nous fer nous-même rappel nous bane devoirs envers Allah (swt) et nous bane responsabilités envers nous bane frères et sœurs, en mettant en pratique bane valeurs fondamentales ki exister dans tous bane la religions couma la solidarité, la justice, la fraternité et plisse ki tous, le respect envers les autres. Ici à Maurice, nous bizin considère nous-même bien chanceux pou ena dans nous société multi-culturelle, plusieurs kalités valeurs, croyances et bane normes ki permette nous pou gagne ene vision et compréhension de bane aspects philosophique de la vie. Mo félicite tout bane ki fine garde Roza durant le mois sacré de Ramzane et pou la façon pieuse ki zot fine abstenir zot-même de bane interdits en sa mois là. Pendant Ramzane, l’âme humain li en fait élevé à bane haute niveau de générosité et d’empathie. L’intérêt d’ene croyant pou bane défavorisé li prend l’ampleur, parski Roza oulé encourage bane tels actes de charité pou promouvoir la justice et l’harmonie sociale. Mo prié ki l’esprit de Ramadan guide la foi de nous bane frères, sœurs et zenfants tout au long de l’année et ki zot l’attitude et comportements vine ene source d’inspiration pour la nation entière. Durant mois Ramzane, le 9ème mois du calendrier Islamique, tous nous bane frères, sœurs et zenfants Musulmans entier le monde observe le 3ème pilier de l’Islam ki bane Musulmans bizin absolument mette en pratique, c’est-à-dire, Sawm (Roza) ki fine prescrire par le Quran Shareef. Zot (bane Musulmans) aussi participe dans ene séries de bane Namaz Nafils sak soir et zot distribuer à bane pauvres le Zakat ki en ene façon li ene charité obligatoire (ou ene taxe) ki zot bizin payer dans le chemin d’Allah, pour faire bane travails Deen et pou aide bane pauvres). Ramzane li ene mois de purification spirituel, de discipline de soi et kot nous contrôle nous-mêmes ; ene telle mois kot bane Musulmans subir volontairement ene séries de sacrifices, dans l’obéissance du Créateur (Allah Tabaarak Wa Ta’ala). Sak Momin (croyant) bizin ena sa 6 bons qualités là : 1. Al-Sabr (Patience) 2. Al-Ihsan (Fer bons actions) 3. Al-Taqwa (La Piété) 4. Al-Tawakul (Confiance) 5. Al-Tauba (Répentir) 6. Al-Tahara (Pureté) Kan ene Momin (croyant) li attacher et connecter avec sa 6 qualités là, Allah (twa) pou fer li vine encore pli cher à Li (Allah), et sa pou représente ene grand stage et grade pou sa croyant là. 1. Al-Sabr (Patience): Allah (swt) dire: “Et Allah content bane qui ena patience.” (3: 147) 2. Al-Ihsan (Fer bons actions): “Et Allah content bane qui fer du bien.” (3: 149) 3. Al-Taqwa (La Piété): “Et en vérité, Allah content banne qui ena Taqwa (ki pieux), ki ena la crainte d’Allah dans zot le cœur).” (3: 77) 4. Al-Tawakul (Confiance): “En vérité, Allah content banne qui mette zot confiance dans Li.” (3: 160) 5. Al-Tauba (Répentir) and 6. 6. Al-Tahara (Pureté): “En vérité, Allah content banne qui tourne vers Li et banne qui garde zotte propre.” (2: 223) Ki Allah (twa) accorde nous tout sa bane 6 bons qualities là, Insha-Allah. La spiritualité li telle attaché avec nous responsabilité sociale et nous inquiétude pour tous dimounes. Fine rende sa bien claire dans Verset 178 de Surah Al-Baqara ki dire: “La dévotion, c’est pas si ou tourne ou figure vers soleil levé ou vers soleil couché mais vrai dévotion, c’est croire dans Allah, le dernier jour, bane anges, le Livre et bane Prophètes. Dépense ou dibien par amour pou Allah avec parents, bane orphelins, bane pauvres, bane voyageurs ki dans le besoin, bane mendiants et (pou libère bane) esclaves (et bane prisoniers). Bizin aussi pratique Salat (Namaz), donne Zakat...” Bane croyances, bane actes Ibaadat et bane obligations sociales ki Allah fine commande nous dans verset Quran ki mo fine fek réciter zot bane fondations de confiance en quoi nous bizin repose nous spiritualité. En plisse de sa, Surah Al-Ma’oune dans so l’ensemble li fer appelle et li renforci sa lien fondamentale ki ena entre spiritualité et solidarité sociale : “Au nom d’Allah le Gracieux Le Miséricordieux. Eski to fine trouve celui qui renier la religion ? Ene telle dimoune li celui ki repousse l’orphelin, et pas encourage donne manger à bane pauvres. Malheur à bane qui prier, sans faire bien attention à zot Salat, qui prier pou lizié dimounes, et refuse à zot voisins mêmes des choses ki servi couramment.” Mais le fait ki sa dimoune ki repousse l’orphelin là et ki pas prêt pou encourage donne mange à bane pauvres li en vrai dire ene dimoune ki renonce la religion, et le fait ki l’homme dès ki li fine rempli so ventre, et alors li oublier so voisins ki pé mort de faim, alors sa kalité dimoune là en fait pé en réalité rénié Allah et le Dernier Jour, ki en li-même constitué la justice divine. Nous capave affirmer ki tous bane Jamaat ou bane institutions ki dire ki zot Islam, mais ki pas réalise sa la justice là, zot na péna nannié pou faire avec l’Islam, et même encore moinse ki sa, zot na péna nannié pou faire avec la foi ; excepté de nom seulement. Zis lors la lèvres ki zot islamique ; sinon non ! Si nous étudier de près bane cinq piliers de l’Islam : croyance en ene sel Bondié, bane cinq Namaz (Salat) obligatoire de tous les jours, Roza, Zakaat et Hajj, nous pou trouver ki zot pas zis connecter l’homme à so Créateur, mais zot aussi promouvoir solidarité entre bane dimounes et zot frères et compatriotes, que ce soit de même religion (l’Islam) ou de d’autres religions et cultures. Li pas pou possible ici pou analyse l’implication sociale de sakaine de sa bane piliers là mais li surement pas ene coïncidence ki dans plisse ki 80 versets du Quran Shareef, tandis ki Allah pé ordonne nous pou établir Salat, c’est-à-dire, fer Namaz, dans sa bane mêmes versets là Li (Allah) pé ordonne nous pou paye Zakat. Nous bizin garde à l’esprit ki Zakat li pas seulement ene acte de donne quelque chose en charité ; ene telle charité ou taxe ki obligatoire – parski tous sa là li collecter seulement pour le progrès de l’Islam, de bane Musulmans mais aussi de la société en générale, l’humanité dans so l’ensemble – alors Zakat pas seulement sa, mais aussi li ene forme de purification spirituelle. En fait, li ene l’exercice spirituelle ki oblige tous bane ki posséder (bane dibiens) pou prend soin de bane frères et sœurs dans la société ki zot, zot pas posséder. La raison derrière sa, c’est pour ki tous dimounes vivre dans la dignité et nous pas gagne ene situation kot ena ki pé patouye dans ene richesse extrême tandis ki les autres pé souffert dans ene pauvreté extrême. Sa c’est ene loi ki fine établir pou tous les temps, li appliquer dans tous l’époque, dans la vie de tous les jours, afin ki sa gap entre riche et pauvres diminuer et tous bane dimounes, ki li Musulmans et autres, zot vivre en harmonie, et zot pas subie aucaine souffrance extrême à cause la pauvreté. Tous bane prophètes et messagers ki Allah (swt) fine envoye vers l’humanité à travers le temps pou guide dimounes lors le droit chemin, pou ki zot gagne le succès dans sa le monde là et dans Aakhirat, tous sa bane prophètes là fine montrer l’humanité, par zot bane l’enseignements et zot l’exemples ki nous pas capave dissocié la spiritualité de bane l’engagements sociales, afin ki nous rassure le bien-être de tout un chacun. En fait, sa bane prophètes là fine vini pou fer l’humanité rappelle nous Créateur, pour tourne vers Li (Allah) seul – pas d’autres dieux ki zot fine fabriquer dans zot les cœurs et ki zot fine fabriquer par zot la mains – et aussi pou applique bane principes de la justice sociale couma le Quran Shareef et bane les autres Livres sacrés fine spécifié. Zot (sa bane prophètes là) fine vini pou libère bane dimounes de l’ignorance, de la tyrannie, de l’injustice et de l’impiété (et la décadence morale et spirituelle). Ene l’exemple flagrant c’est Hazrat Moosa (as). So la lutte ti d’établir croyance en ene sel Allah et pou libère so peuple de la tyrannie. Dans li fer sa, li en fait fine retourne à so peuple zot dignité en tant ki travailleurs, parski so peuple ti pé atrocement souffert à cause Pharaon ki pé tellement exploite zot lors base de préjudice raciale et ti pé domine complètement à cause zot kalité dimounes et zot rang sociales ki zot ti ena. Mais sa en fait li ene la lutte continuelle. Nous tous conner ki dans beaucoup partie de le monde azordi jours, bane travailleurs, particulièrement bane immigrants zot exploiter et humilié à cause zot race, par sa bane nouvo « pharaons » ki habiller dans bane linges modernes. Hazrat Isa (as), le prophète d’Allah, li, li ti dédié li pou atténuer la souffrance de bane pauvres, malades, bane démunis de la société dans sak pas de la vie ; et so parcours comme prophète ki fine vini pou diminuer bane telles souffrances pareil couma mo fine fek cité, fine vine légendaire. Hazrat Muhammad (saws), tout au long de so la vie fine travaille pour ene société meilleur. So bane actions et l’enseignements ki base lors bane principes Quranic fine exprime dans ene bien joli façon so bane tracas ki li ti ena pou rétablir la justice sociale. Li-même li (saws) fine dire : “Allah pas ena pitié pou bane ki pas ena pitié envers bane dimounes.” Li fine fer toutes sortes kalités zéffort possible pou libère bane exclaves et pou libère bane madames de zot statut d’infériorité (et de servante et objet). Li ti connu comme “papa de bane pauvres” parski li ti rempli de compassion pou bane ki dans le besoin, bane orphelins, et bane membres de la société ki ti bien faibles, bien impuissants (et pauvres). En fait, ti ena ene groupe dimoune ki ti trouve zot en permanence devant la caze du Saint Prophète Muhammad (saws) et zot ti connu comme bane Ashab-e-Suffa, bane dimounes ki assize lors bane bancs. Zot ti totalement pauvres et le Saint Prophète (saws) ti habitué occupe zot personnellement; li ti pé guetter ki ki zaffaire zot tip é bizin, et si li ti ena, li ti pé donne zot. L’équivalent moderne de sa groupe dimounes là (bane Ashab-e-Suffa) appelle zot azordi jour bane « exclus » de la société. Afin ki nous capave aide bane dimounes ki groupes dimounes marginalisé de la société, nous bizin cherche inspiration de bane actions du Saint Prophète (saws) ki fine réussi aide bane Ashab-e-Suffa pou intégrer la société. Le Quran Shareef li bien dire zot : “Zot ena en vérité dans le Messager d’Allah ene joli l’exemple (de conduit) pou n’importe ki sanlà ki ena l’espoir dans Allah et dans le Dernier Jour.” (Al-Ahzaab 33: 22) Dans ene Hadith Qudsi du Saint Prophète (saws) ki fer référence à grand tracas ki Allah ena pou le bien-être de bane dimounes, fine mentionner ki Allah pou demander: “O garçon Adam, Mo ti demande toi pou donne moi manger, mais to fine refuse Moi.” Sa dimoune là pou réponde, “Couma eski Mo ti capave nourri Toi? To-même To le Maitre de tous bane les mondes.” Mais réponse d’Allah pou coumsa: “Eski to pas ti conné ki ene de MO Bane serviteurs ti demande toi manger? Eski to pas ti conné ki si to ti donne li manger, to ti pou trouve Moi avec (ou près) li (et to ti pou trouve to manger aussi avec Moi)?” L’exemple noble du Saint Prophète (saws), c’est so bane compagnons proche (bane Sahaba) ki fine suive so l’exemple, ainsi ki bane dimounes pieux et bane (vrai) savants à travers l’Histoire. C’est nous responsabilité sociale pou assure nous ki tous dimounes gagne ene bon manger ki balancer, pas seulement dans nous l’entourage immédiate (c’est-à-dire, nous la famille, camarades et voisins) mais aussi dans ene l’aspect mondiale. Le Saint Prophète (saws) fine dire: “Non, li pas croire en Allah, ni dans le Jugement Dernier, celui ki mange plein ventre le soir tandis ki so voisin pé mort de faim.” En fait, pou ki li réussi fer la société atteindre la paix et l’harmonie, le Saint Prophète (saws) ti pé constamment encourage bane croyants pou pas ramasse zot l’argent couma avares, mais pou partage sa l’argent là avec les autres, et pou agir d’après bane principes de la justice sociale. Sa c’est seul façon pou arrête ou empêche toute forme de malaise sociale. Nous bizin recommande bane principes de la justice sociale, pas seulement dans l’Oummah Musulmane même, mais aussi suive l’exemple du Saint Prophète (saws) kot li ti pé garantie préservations de bane droits de bane minorités religieux (de bane les autres communautés) dans constitution de Madina, ki ti le premier constitution en écrit du monde. En plisse de sa, pas capave ena la paix sociale dans la société moderne à moins nous efface toutes formes de discrimination raciale. Ene tel action li ene marque indéniable (ki nous pas capave rénié) de spiritualité parski bane Livres sacrés fine souvent fer nous rappelle ki tous bane croyants zot égales dans lizié Allah. Dans so dernier Khutba, Hazrat Muhammad (saws) fine dire : “Ene Arabe li pas pli supérieur ki ene non-Arabe ni ene blanc li supérieur ki ene noir. Ene dimoune li distingue li-même seulement dans la piété (taqwa).” Tous bane ki envie marche (ou travaille) pour ene meilleur société, bizin opéré (travail) dans ene cadre spirituel ki toujours promouvoir ene service aux autres kot na pas ena l’égoïsme. Bien souvent nous fine trouver ki ena dimounes et bane associations zot fer bane plans, zot fer le but pou atteindre à bane l’objectifs noble afin pou travail pour le bien-être sociale, mais à la fin, zot fini par tenté par guette et travail pour zot propre l’intérêt, et zot prend pou zot-mêmes, zot mette dans zot poche bane tels ressources ki ti pou autrement servi pou améliore la vie de bane ki dans le besoin. Sa c’est parski zot marque l’entrainement spirituel nécessaire pou arrête zot bane tendances égoïstes. L’homme spirituel li celui ki faire zeffort dans faire le Jihad Al-Akbar (pli grand la guerre sainte). Sa veut dire li faire zeffort pou tous les temps combatte so nafs, c’est-à-dire, so passion, couma gourmandise, l’envie, l’avarice et sa besoin ki dans li là pou domine les autres. C’est seulement kan li fine réussi combatte so nafs ki li pou capave développe ene dévotion sans égoïsme envers Allah et li pou travail dans ene façon extraordinaire, sans planifier pou gagne kitchose en retour, pou servi l’humanité. Kan li faire sa action pou servi les autres sans égoïsme, alors sa permette li pou retire tous bane voiles ki ti sépare li de so Créateur et de so bane les autres frères et sœurs, ki li de l’Islam, ou de bane les autres communautés religieuses, en d’autres mots, l’humanité dans so l’ensemble. Sa concepte de servir l’humanité, le Khidmat, li ene élément centrale de la spiritualité Islamique. Li repose lors sa Hadith du Saint Prophète (saws) là ki dire : “Personne d’entre zot pou vine ene vrai croyant dans l’Islam tanque ki li pas content pou so frère saki li ti pou content pou li-même.” (Mishkat) Sa aussi li présent dans la spiritualité de bane les autres religions. Par exemple, dans la Bible, nous lire: “Protège bane ki opprimé, fer la justice à l’orphelin, prend défense de bane veuves.” (Isaïe: Verset 17) A sa, Jésus – Hazrat Isa (as) ajouté : “N’importe ki zaffaire ou ti à content ki dimounes fer pou ou, fer sa aux autres; parski sa c’est la loi…” Dans l’Hindouisme, l’équivalent de khidma (service) li connu comme ‘sewa’ ki sa ene concepte ki englobe service à tous niveau, ki li envers nous-mêmes, nous la familles, nous bane proches, nous pays et l’humanité dans so l’ensemble. Le Ramayana dire: “Servi dimounes c’est servi Bondié.” En forme de conclusion de sa Khutba là, mo envie fer ressortir ki l’humanité représente ene sel famille ki aspire à bane même buts ultime. Comme formant partie de sa la famille là, alors nous bizin prend compte de sakaine d’entre nous et nous bizin dédier pou prend compte so bien-être. Le Saint Prophète (saws) fine dire: “L’Humanité li ene sel grand famille d’Allah. Et le plus bien-aimé à Allah c’est celui ki traite so famille avec grand considération.” Comme nous, bane Musulmans nous pé célébrer Eid-ul-Fitr azordi, anou ena ene pensée spéciale pou nous bane frères, sœurs et zenfants dans Somalie (par millions pé souffert, pé mort, pas ena manger et boire), et bane les autres places dans bane pays Africain (ki pé passe par toutes sortes de calamités et la sècheresse) et bane inondations récents dans bane pays du monde, kot zot privé de même bane besoins de base et ki zot pé bizin fié l’aide la communauté internationale et de bane les autres aides spéciale de solidarité pou capave survivre. Le Jamaat Ul Sahih Al Islam, avec participation de toute la nation, nous pé fer nous mieux pou donne nous l’aide à sa bane nations là, Insha-Allah. Nous prié aussi pour tous nous bane frères, sœurs et zenfants dans bane pays Musulmans ki pé souffert et morts dans bane pays musulmans et même dans l’Inde, dans Pakistan - Kashmir. Ena bane policiers ki prend zot uniforme comme ene grand paravent pou zot capave fer toutes sortes atrocités lors bane musulmans, kot zot pas hésité pou maltraite bane vieux, bane malades, bane madames ki sans défenses et mêmes bane jeunes et bane journalistes ki envie fer éclate la vérité de la misère de sa bane peuples là. D’ene côté, ena bane peuples musulmans ki fine plein pou subir bane martire dans la main de bane tyrants ki musulmans seulement de nom. Zot réaliser ki zot la misère pas pou arrêter tanque ki zot pas prend zot destin dans zot la main, mais li malheureux ki malgré ki zot pé fer duah pou gagne l’aide d’Allah, pou ki Allah envoye So dimoune promis vers zot, mais malgré sa, zot ferme lizié et zot aveugler dans zot combat pou gagne liberté zis lors sa la terre là. Pou zot, liberté de zot l’âme pas intéresse zot. Si zot ti donne priorité à zot l’âme, abé azordi jours, même dans bane mois sacré pareil couma Allah fine condamner pou pas la guerre, abé zot pas ti pou la guerre. Mo fine dire, au début de la Manifestation Divine kot Allah fine fer moi comprend ki pou ena la rivière di sang ki pou couler, pou trouve le monde comme ene la scène de Qayamat. C’est sa ki nous pé trouver partout. Péna la paix, sakaine pé protège so kalités, mais seulement bane musulmans pas pé réaliser ki zot même zot perdant parski nous pas uni ; ena beaucoup divisions entre nous ? Kifer sa ? Eski azordi, eski nous capave dire avec le cœur content ki azordi ene Eid pour nous, kan nous bane frères, sœurs et zenfants pé morts tous les jours à cause zot la foi, et aussi à cause zot fine plein avec l’injustice ki fine ena lors zot ? Tout l’injustice ena ene limite. Bane mois sacrés pareil couma mo fine mentionner dans ene mo Khutba dans mois Ramzane, bizin respecter, parski si viole bane mois sacré d’Allah, Allah même en colère. Li pé envoyé même bane signes de Qayamat pou fer dimounes prend conscience ki ferme la porte prophète li pas la solution, ki Allah Li pas ene Allah ki fine arrête causer, ki au contraire Allah causer et Li fine envoye So Khalifa promis (le Khalifatullah) à bane peuples du monde pou fer zot retourne à l’enseignement du Quran Shareef. Alors, O mo bane frères, sœurs et zenfants du monde entier, ki zot de l’Islam et de bane les autres communautés, zot pas pou capave atteindre le salut si zot pas retire toutes sortes d’idoles ki fine encré dans zot le cœur. Alors, anous prié ki tous l’humanité ensam vine ene sel communauté, couma ene vrai famille d’Allah, kot la paix et la justice sociale régné, kot bane souffrances de bane pauvres et de bane démunis diminuer dans ene premier temps et ki doucement doucement li effacer complètement. Sa ti ene travail ki Hazrat Muhammad (saws) fine fer dans so l’époque, parski en tant ki prophète universelle, li ti so devoir pou aide l’humanité, pas seulement bane musulmans, pou atteindre Allah en toute tranquillité d’esprit. Du moment ki zot croire dans Allah, ene sel Allah, alors automatiquement sa bane dimounes là vine bane MUSULMANS kot zot soumette zot à ene sel Dieu, zot Créateur en paix et harmonie, et ensuite zot apprane couma pou implémente bane la lois divines dans zot la vie de tous les jours, pour ki zot être connu comme bane vrais croyants devant lizié Allah, pas pou lizié dimounes. Zot fer ene manière pou pas excite colère Allah contre zot. Zot vine bane tels dimoune ki fer tout zot possibles pou améliore bane conditions de vivre de bane les autres dimounes, et c’est en même temps ki zot servi les autres ki zot gagne ene la paix et tranquillité intérieure, ki zot senti la satisfaction d’Allah lors zot. Alors, anou prier ki la paix, ene la paix globale et juste répande entier le monde, Insha-Allah. Mo souhaite tous mo bane frères, sœurs et zenfants musulmans ene EID MUBARAK. Ki Allah béni zot tous, et fer zot réalise l’importance et la situation critique ki nous pé vivre. La lumière (d’Allah) fine vini dans sa le monde là. Alors faire ene manière ki zot pas reste dans noirté de l’ignorance. Vine vers la lumière d’Allah à travers l’unité, l’amour, l’harmonie, mais saki pli important c’est ki ou fer Allah vine ou seul vrai Dieu ; pas zis lors la lèvres ki ou dire ki ou croire dans Allah, mais ou bizin mette en pratique tous So bane commandements et suivre So Messager Choisi dans sa siècle là. Insha-Allah. Ameen.