|
بسم الله الرحمن الرحيم
Khutba Jummah
HAZRAT KHALIFATULLAH AL-MASSIH AL-MA’OUD
Munir Ahmad Azim
(28 Rajab 1432 Hijri)
(Résumé Khutba de 1hrs 15 minutes)
Après Salam, Hazrat Khalifatullah fine commence so Khutba avec Tashahhud, Ta’uz, Surah Al Fatiha, et ensuite li fine dire:
Azordi c’est ene grand faveur dans l’Oummah de Hazrat Muhammad (saws) ki sak Vendredi nous tous réunis couma ene seul famille pou nous fer Jummah. C’est malheureux ki commié dimounes pas dans Masjid pour faire le Jummah, commié madames pas alle Masjid pou faire le Jummah. Ena ene Chapitre du Quran Shareef ki cause lors là (Surah Al-Jumu’ah).
Hazrat Muhammad (saws) fine vine comme le libérateur de la femme. Commié bane madames, avec ene l’habillement non Islamique pé virer partout, mais Jummah zot pas aller. Bane jeunes aussi pareil.
Chanceux bane ki rentre dans Jummah premiers. Kan zot rentrer, sois zot fer le Zikr-ullah ou faire Namaz Nafil. Pou sa bane là, kan zot rentrer le premier, bane anges inscrire zot récompense ene chameau, tandique ki bane ki vini après gagne récompense ene bœuf, et bane ki rentre dans Jummah dernier, zot gagne récompense ene dizef, mais après ki le Imam fine fini deboute pou fer le Khutba, alors même bane anges zot ferme zot livres kot la porte et zot aussi zot vine assister le Jummah. Sa bane kalités dimounes là zot perdi sa bane récompenses là.
Ena beaucoup dimounes, bane musulmans ki perdi zot létemps pou vine Jummah. Zot perdi zot létemps dans bane zaffaires mondaines, au lieu ki zot ti bizin rentre de bonheur, faire le Zikr d’Allah, et Namaz Nafil. C’est ene Eid pour bane Musulmans, pas prend sa sans l’importance. Ena beaucoup rentrer kan Jummah près pou fini. Ena pé assizer dans la caze, zot pas vine Jummah même. Ki parole mo capave causer, couma pou casse sa la cire là dans zot z’oreilles pou faire zot comprend. Mais par compte ena pé sacrifier zot la vie, zot travail pé vine Jummah; zot gagne bane épreuves kot bane les autres fer désordres pou empêche bane croyants pou vine Jummah. Séki malheureux, c’est bane Musulmans même ki mette baton dans la roue de sa bane ki sincères là. Pas penser ki ou pou marche lors tapis velours kan ou fine prend chemin d’Allah. Li pas pareil couma mette tapis velours kan ene chef d’état pé vini dépi lotte pays. Ou pou gagne ene pli joli et pli grand l’accueil ki sa, mais seulement ou pou gagne li dans Aakhirat.
Si ou conne l’importance de Jummah, sens de l’humanité dans ou lécorps, à aucaine moment ou pas ti pou faire désordre, créer difficulté pou ou camarade ki pé vine Jummah ! Si dimoune pé sorti pé alle faire lotte kitchose autre ki vine Jummah, là oui ou objecter. Le Messie Promis (as) li, li fine donne l’importance du Jummah, ki Jummah pas seulement pou bane hommes mais aussi pou bane madames, parski zot aussi zot compris dans l’appellation « O croyants ! » Ki pays ou aller ou trouve bane madames et bane filles (Ahmadis) pé alle Jummah mais seulement li inutile ki ou vine Jummah, ou appuye are muraille, allonge lipié, ou dormi. Pas vini pour faire la sieste. Jummah c’est ene acte Ibaadat. Si ene croyant li pas alle Jummah 3 Vendredis à suivre, li pas ene musulman. Couma ou pou réponne sa au Jour du Jugement ki le Jour du Jummah, ena ki ferme madames dans la caze, empêche li vine fer Jummah ? Kan tandique ki pou Hourous, Khatam, Dargah ou sois pou fer Ribat bane Ahmadis, ou sois pou cause lors « Dernier Prophète », sa zot divant divant pou fer place pou madames pou vine assister – « disposition pou bane sœurs fine fer ! ». Ki zot réfléchi lors l’importance du Jummah ! Azordi madames musulmans fine perdi zot Imaan, zot haya, façon habillé...
Ensuite le Khalifatullah fine rentre dans le vif de so sujet pour le Khutba Jummah :
رَّبِّ أَدْخِلْنِي مُدْخَلَ صِدْقٍ وَأَخْرِجْنِي مُخْرَجَ صِدْقٍ وَاجْعَل لِّي مِن لَّدُنكَ سُلْطَانًا نَّصِيرًا Rabbi 'adkhilnii Mukhala Sidqiww-wa akhij-nii Mukharaja Sidqiww-waj-'al-lii milladunka Sultaanan-Na-siiraa.
« O mo maitre, faire moi entre par la porte de la vérité et faire moi sorti par la porte de la vérité, et donne moi ene l’autorité ki vine de Toi-même, pou aide moi. » (Bani Israël 17:81)
Si azordi ene dimoune pas vote ene Amir, alors li pas gagne aucaine l’autorité. Ene Messager d’Allah li pas coumsa li. Li rentre par la porte de la vérité et sorti par la porte de la vérité, et so l’autorité vine de côté d’Allah seul, pou aide li...
Tous bane commentateurs d’accord ki sa duah là ti révélé avant Hijrat, c.à.d, émigration. Et sa verset là aussi ti révélé avant Hijrat. En fait dans sa duah là aussi ena la prophétie de Hijrat et encore les autres choses. Après so l’apostolat, Hazrat Muhammad (saws) fine reste pendant 13 ans dans Makka supportant beaucoup de persécution avant ki li fine alle Madina. Allah fine oulé dire le prophète Muhammad (saws) : O Muhammad, to sorti de sa place là pou ene sorti de vérité et to pou ré-rentre encore dans sa place là la tête haute et to rentrer aussi pou ene rentrée de vérité.
Ici nous remarquer ki fine cause la rentrée avant et après fine cause la sortie. Ki faire fine mette sa d’après sa séquence là, quand tandis ti bizin sorti de Makka avant. Sagesse derrière sa c’est ki le Saint Prophète (saws) oulé montré Allah ki li pas concerné par so sortie. D’ailleurs la nuit avant, Allah fine dire li ki li pou retourne encore dans sa place là.
2ème sagesse, c‘est ki façon ki le Saint Prophète (saws) ti pé bizin quitte Makka. Li ti sous persécution bien sévère et tout dimounes ti pé considère li comme ene menteur, ene kikaine ki malade et ki boire médecine, ki fou et ki copier. Mais seulement c’est Allah ki élève so l’Homme (choisi) et c’est Allah ki donne li l’autorité. C’est pour sa ki Allah pas laisse l’homme choisir So dimoune, parski demain li pou tape so l’estomac, zot pou dire : « Moi ki ti vote li, moi ki ti propose li, moi mo ti seconder (so nomination). » Sa même ki Allah pas oulé! L’autorité vine de Li coumsa dimounes pas pou capave lève so ti lédoigt avec li. Azordi dimounes pé lève lédoigt (pé pointe) contre Hazrat Muhammad (saws). Nous le cœur faire mal kan nous entende tous sortes blâmes, toutes sortes bétises, toutes sortes caricatures ki zot fer lors nous Aka Hazrat Muhammad (saws). Personnellement ene dimoune capave attaque moi personnellement, zoure moi, maltraite moi, pense du mal de moi, pas fer moi salaam, vire figure are moi, vire lédos et malgré tout sa mo capave reste tranquille – sa pas fer moi nannié – mais pas alle lève ou la voix pou ou vine dire kitchoses contre mo Aka Hazrat Muhammad (saws). Sa mo pas pou toléré. Du moment ki zot touche mo Aka, alors mo pou diboute couma ene lion pou mo fight (la guerre) – ene lion d’Allah – pas ene lion ki mange l’herbe ! Tous bane dimounes ki ti prend li couma ene menteur, kot finalement ti arriver ki zot ti prend li là-haut là-haut et prend Bai’at dans so la main. Insha-Allah pou mo aussi pareil ; pou ena ene rentrer de vérité car la vérité bizin triompher lors le mensonge. Kan mo ti sorti mo fine sorti avec ene sorti de vérité, mais bane là ti transforme sa vérité là en mensonge.
Alors pour Hazrat Muhammad (saws) dans ene premier temps, l’entrée là ti réfère quand li pé rentre dans Madina kot bane dimounes pé accueille li. Et témoignage so vérité et so sorti de Madina aussi pou ene vérité et quand li pou rentre dans Makka avec ene grand victoire, cette fois-ci l’entrée là pou ene l’entrée de vérité. A ce moment là, sa prophétie là réaliser. En séki concerne dernier parti de sa duah là, c.à.d « accorde ene aide puissant » sa aussi fine réaliser par bane Ansars de Madina ki ti vraiment aide le Saint Prophète (saws) beaucoup. Mais zot aide ti vine à travers guide d’Allah. C’est pourquoi fine servi le mot « Milladounka Sultaanan-Na-siiraa », c.à.d, aide de coté d’Allah. De lotte cote, sa duah là li servi dans la vie de tous les jours aussi. Quran so bane verset li pas limité, mais li applicable dans différents circonstances aussi.
Donc, c’est ene duah ki capave servi dans la vie de tous les jours. Ene lot l’aspé de sa duah là, li concerne changement de l’état bane humains. En effet, bane dimounes souvent change d’état, parfois de bon en mauvais et parfois de mauvais en bon. Allah même fine montrer sa duah là. « O Allah, quand nous ena pou change l’état, faire sa changement là ene changement de vérité. » Avant sa verset là, ti pé cause lors stage élevé de Hazrat Muhammad (saws). En effet, Allah pé dire au prophète (saws) récite Quran dans Namaz Tahajjud et en résultat de sa Allah pou élève toi à ene rang digne d’éloge. Alors toute de suite Hazrat Muhammad (saws) fine faire sa duah là : « O Allah, faire mo élévation de rang dans vérité et après continuer élève mo rang dans vérité, pas laisse moi alle dans la perte. »
Parfois arrivé aussi ene humain après ki li fine élevé dans ene haute position, li arriver ki li dégrader aussi. Allah fine montrer Hazrat Muhammad (saws) sa duah là pou ki ena progrès dans chaque stage. Quand nous faire sa duah là, nous dire « O Allah retire nous bane mauvais l’intention dans nous bane désire pou faire progrès. »
Sa duah là li très complet et applicable partout – ki dans domaine spirituelle ou dans domaine mondaine. Bane ki oulé faire progrès dans zot travail zot aussi bizin faire sa duah là même. Ena ene duah de Hazrat Ayoob (as) et li trouve dans Al-Anbiya Chapitre 21 Verset 84. Li fine supplier Allah et li fine dire : « Malheur fine frappe moi, Toi to pli miséricordieux de bane ki faire miséricorde. »
Puisse ki mo pé cause lors Hazrat Ayoob (as) so duah, li ti pou bon ki mo introduire la vie de Hazrat Ayoob (as) ki beaucoup pas conner lors li. Hazrat Ayoob (as) ti née quelque 1550 ans avant Hazrat Issa (as) et 200 ans avant Hazrat Moosa (as). Lors là ena ene certaine désaccord ; ena dire li ene prophète Bani Israël et ena dire ki li ene prophète pou ene lotte peuple.
La Bible pas mentionne place de so naissance, tandis ki bane commentateurs musulman mentionne so naissance quelque part en Syrie. En résumé, séki la Bible mentionner lors Hazrat Ayoob (as), la Bible faire mention ki li ti ene dimoune bien, ki ti possède beaucoup des richesses que ce soit en terme de bijoux, argent ou z’animaux. Li ti ena madame et zenfant tout, li ti faire beaucoup travail pou la religion. Satan ti ena grand jalousie pou Hazrat Ayoob (as). Alors satan fine dire : « Allah, To ena tellement confiance lors Ayoob, To dire ki li bien Ibaadati même ki li ena beaucoup de richesses. Nek tester li To pou trouver ki li pas sincère ». Satan dire Allah, « Laisse mo tester li par so dibien to pou trouvé. » Allah dire li ok, tester li. Et ene coup, Hazrat Ayoob (as) so dibien fine fini. Après satan fine demande pou tester li par so zenfant. Effectivement fine tester li par so zenfant. Ena zenfants fine séparer et ena fine éloigner. Là aussi, Hazrat Ayoob (as) fine tini ferme avec Allah.
Après sa satan fine demande pou tester li avec so le corps. Vraiment, li fine commence gagne ene malade terrible ki ti transforme so le corps complètement, couma dire microbe partout. Bane dimoune ti éloigné de li et ti même retire li depuis dans la ville. Là aussi Hazrat Ayoob (as) fine tini ferme et fine continué reste fidèle avec Allah. En séki concerne so madame, satan fine penser ki li détourne so madame de la même façon ki li ti faire avec Hawa. Satan fine faire so madame faire Shirk, faire sacrifice ene zanimo lors nom satan.
Après madame là fine dire Hazrat Ayoob, « Combien de temps encore to pou prend patience avec Allah ? Plutôt demande to la mort. » Hazrat Ayoob (as) fine bien en colère et li fine dire so madame : « Même si mo bien, to pou bizin gagne 100 coups de fouet à cause sa Shirk là. » So madame aussi fine quitte li et fine allé. Mais là aussi Hazrat Ayoob (as) fine reste ferme lors so la foi. C’est après sa ki Allah fine enlève tout so bane afflictions (malheurs) ki li ti pé souffert et fine retourne li so famille et fine faire encore beaucoup de miséricorde lors li.
Ena commentateurs dire ki satan ti rentre parmi bane anges pou conne exactement lors statut de Hazrat Ayoob (as), mais ena pas d’accord lors là, zot plutôt penser ki satan ti pé écoute conversation entre Allah et So prophète. Après ki zot fine conner ki quantité estime Allah ena pou Hazrat Ayoob (as), zot fine jaloux et à ce moment là zot fine concevoir sa plan là pou testé Hazrat Ayoob (as).
Mo revine lors duah ki Hazrat Ayoob ti faire : « Malheur fine frappe moi et To pli miséricordieux de bane ki faire miséricorde ».
Ki faire fine termine lors le mot « Ar-hamoul Rahemine », c.à.d, « pli miséricordieux de bane ki faire miséricorde ». En effet, koi ki Quran pas donne beaucoup détails lors Hazrat Ayoob (as), par peu de détail ki ena, nous conclure ki sa bane anecdote là fine passe lors li plisse ou moins.
Li fine souffert beaucoup, alors, li ti faire sa duah là : « O Allah, zot tout fine tourne lé dos are moi ; madame et zenfants fine aller. Bane dans la ville népli oulé moi. Bane ki ti croire dans moi fine tourne lé dos, mais quand même tout sa là fine arriver, mo conner ki Toi to pli miséricordieux (ki tout), Toi to pas pou quitte moi ».
En séki concerne sa duah là, Allah réponde : « Nous fine entendre so la prière, et fine enlève so bane malheurs ki li ti pé souffert. Nous fine donne li so famille et bane lézot dimounes comme bane miséricordes de nous part. Comme ene rappel pou bane adorateur.» (Al-Anbiya 21:85)
Sa c’est ene grand leçon pou bane ki faire Ibaadat ki pas bizin décourager, et avec patience et Namaz tout problème pou résoudre.
Duah de Hazrat Yunus (as) ; Li ti crier Allah dans profondeur de l’obscurité en disant ; « Péna lotte Dieu ki Toi, To saint et mo fine vraiment au nombre des injustes » (Al-Anbiya 21:88)
Allah fine réponde : « Mo fine entendre so la prière et mo fine sauve li de so détresse. Et c’est ainsi ki Mo délivré bane croyants. » La Bible appelle li Jonah et ena même ene chapitre lors so nom. La Bible dire ki Allah ti dire Hazrat Yunus alle averti bane peuple de Nineveh ki « Si zot pas écouter, Mo pou détruire zot. » Mais au lieu ki Hazrat Yunus (as) alle vers Nineveh, li fine alle vers Jaffa. C’est là-bas ki li fine prend bateau et ensuite fine ena incident poisson etc.
Pou moi li étrange, parce qui n’importe ki dimoune ki lire Quran et ki comprend statut ene prophète, li pou fini trouver ki li impossible ki Allah dire ene prophète alle à l’Est et prophète là li décide pou alle vers l’Ouest. Li totalement en dehors ene qualité ene prophète pou désobéir Allah. 2ème sa ti l’époque kot bane Assyriens ti pé domine Bani Israël et ti enlève tout zot droit. Donc, li impossible ki Allah dire quelqu’un de la Palestine pou faire la distance de plis de 500 miles à Nineveh.
Version la Bible pas acceptable et li mentionne aussi ki Hazrat Yunus (as) prend bateau à Jaffa pou ene lotte destination. En mer ene tempête fine lever et quand bateau là ti pé alle coulé, bane dimoune là-dans fine dire ki « Surement bizin ena ene ki maufine parmi nous et à cause li tout sa là pé arriver. » A ce moment là, Jonah fine dire ki c’est li-même sa et li fine dire bane là jette li dans la mer. Effectivement zot fine jette li et la baleine fine prend li et fine garde li vivant dans so vente pendant 3 jours et 3 nuits. Apres poisson là fine rejette li et li fine alle Nineveh et li fine accompli parole Allah.
Quran donne ene lotte version et li pas mention Nineveh et li pas faire mention 3 jours et 3 nuits. Ki Quran fine faire mention c’est poisson fine prend li et fine faire mention de duah dans sa période difficile là, et fine mentionne aussi ki poisson là fine rejette li, mais pas fine mentionne 3 jours et 3 nuits. Li très probable ki li fine reste dans vente là ene ti moment même avant ki poisson là rejette li.
Dans Quran li coumsa, ki Hazrat Yunus (as) fine alle à Nineveh ou soi n’importe ki place ki fine prêche le message et bane dimoune pas fine accepter. Lerlà Allah fine dire li averti bane là ki « Si zot pas demande pardon et si zot pas faire Istighfâr, alors dans quelque jours, Mo pou détruire zot. »
Après ki li fine averti zot, Hazrat Yunus (as) fine faire Hijrat, fine alle dans ene lotte place et bane dimoune fine vine kot li été et li ti pé demande nouvelle bane peuple là. En fait li pas ti réaliser ki après so départ, bane peuple là fine décide pou demande pardon et zot fine demande pardon dans ene façon extraordinaire ; zot fine réuni dans la plaine et bane mamans pas ti pé allaite zot bébé ni bane cabri aussi ti pé donne zot petits boire. Partout ti ena pleure, ti ena image de Qiyamat. Dans sa situation là, zot cherche pardon Allah, et Allah fine pardonne zot.
Dans Quran Allah mentionne ki si bane peuple de bane les autres prophètes ti faire couma peuple de Hazrat Yunus (as), bé Mo – Allah – ti pou pardonne zot aussi. (C’est l’histoire de Hazrat Yunus (as))
Duah de Hazrat Zakaria ki trouve dans Chapitre 21 Al-Anbiya Verset 90. Zakaria ti supplier so Rab en disant : « Mo seigneur, pas laisse moi sans zenfant et To meilleur des héritiers. » Lotte place li dire : « O Allah, mo fine vine vieux, mo madame stérile et mo péna aucaine successeur. »
Ena dimoune capave penser ki Hazrat Zakaria ti pé demande en fait ene successeur mondaine, ene héritier ki pou capave guette so madame etc., mais sa duah là ti fine vine dissipe tout bane doute et montrer ki en fait Hazrat Zakaria ti pé intéresser spécialement pou gagne pas seulement ene héritier biologique, mais ene tel héritier ki pou aussi spirituelle et non pas mondaine.
Sa montrer clairement ki li ti intéresser avec ene zenfant ki pou continué so bane bon action. Après Allah dire : « Nous fine écoute so duah et nous fine accorde li Yahya et Nous fine guéri so madame. Zot ti pé faire compétition entre zot pou faire bane bon action et zot ti pé invoque Nous dans l’espoir et la crainte. Et zot ti humble devant Nous. »
Là-dans fine montrer bane secrets de l’acceptation de bane duahs. 1er zot ti pé faire bon action et 2ème zot ti pé pense Allah dans n’importe ki situation et zot ti humble. Nous bizin nous aussi faire pareil ki Allah faire nous vine parmi sa qualité dimoune là et faire nous faire duah dans n’importe ki situation (difficile ou pas difficile). « O Allah, ki li To bénédiction ou ki li dans ene difficulté, nous content avec seulement bane chose ki ena To plaisir. » Ameen. Thumma Ameen.
Sak prophète fine passe dans bane épreuves sakaine dans so façon. Pli zot fer face bane persécutions et difficultés, zot faire duahs avec Allah. Mais nous (l’homme) ki arriver ? Kan nous tombe dans difficulté, nous la bouche pas ouvert pou faire duah avec Allah. Nous éloigner avec Allah. Non ! Au contraire nous bizin attache nous plisse avec Allah.
Ou fine vine Jummah pou ou propre l’éducation, tarbiyyat, pou renforci ou propre Iman. Ki ou aussi ou vine ene messager par ou actions, bons paroles et passe le message aux autres. Non plus ou vine de bonheur dans Jummah mais après ou faire méchant, ou alle guette programme lécourse, jouer loteries, cause menti dans business. Ene même bane avocats ki dans la cour zot pas même hésiter pou cause menti kan zot conne très bien ki zot clients en tort, coupable. Zot fer innocent vine coupable, et coupable vine innocent zis pou gagne l’argent. Ena pas faire Sunnat, zot sorti zot alle fumer dehors. Ki alors ou fine profiter dans Jummah ? Ena même si zot fine vine de bonheur, mais ki serti kan après pose zot questions ki zot fine assimiler du Khutba, zot pas capave réponne nannié, parski zot penser ki voilà zot fine vine Jummah, bé correcte, zot capave fer la sieste pendant duré du Khutba, ki li 30 minutes, 1 heure ou 1 heure temps demi.
Alors pou bizin fer ou rentrer dans Jummah ene rentrer de vérité, et ki li vine aussi ene sorti de vérité ; c’est-à-dire, kot ou gagne Allah, Allah So plaisir et So satisfaction, kot ou fine rempli à bien ou devoir kan Allah ti ordonne donne pou quitte tous kitchoses pou vine assister Jummah, parski sa So commandement sa.
Jummah c’est pas ki ou vine relax, ou dormi. Sa c’est pas philosophie de Jummah sa. Bane madames et filles ki zot pé profiter kan dans l’heure Jummah zot devant la télévision, ene de bane plus grand Dajjal encore! Dans côté mondaines, zot lève la voix, zot pas lève la voix avec sa bane Mullahs ki fine bloque zot droits ki Allah fine donne zot? Ou la vie, la mort, manger, boire, l’honneur etc. – tous sa trouve dans la main d’Allah. Faudé Jummah bien important même ki Li (Allah) fine révèle ene Chapitre dans Quran Shareef. Eski bane Mullahs gagne droit dire ki droit nous, bane humains ena ? Malheureusement, Jamaat Ahmadiyya aussi fine vine pareil.
Alors ki Allah donne nous le Tawfeeq pou comprend bien sa Khutba Jummah là et fer en sorte ki nous donne nous Jummah priorité et ki nous trouve la vérité d’Allah là-dans, pareil couma pou sak étape de la vie et la victoire ki ensuite Hazrat Muhammad (saws) fine gagner dans so l’époque. Insha-Allah. Ameen. |
