|
بسم الله الرحمن الرحيم
Khutba Jummah
HAZRAT KHALIFATULLAH AL-MASSIH AL-MA’OUD MUNIR AHMAD AZIM
Munir Ahmad Azim
(30 Safar 1432 Hijri)
(Résumé du Khutba Jummah)
Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine dire:
يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِندَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ
Yaaa-‘ayyuhan-naasu ‘innaa khalaqnaakum-min-zakariww-wa ‘unsaa wa ja-‘alnaakum shu-‘uu-baww-wa qabaaa-‘ila lita-‘aarafuu. ‘Inna akramakum ‘indallaahi ‘atqaakum. ‘Innallaaha ‘Aliimum Khabiir.
« O dimounes, Nous fine créer ou à partir ene male et ene femelle, et Nous fine faire de ou bane nation et bane tribu, afin ki ou faire connaissance entre ou. Celui qui plus noble dans lizié Allah, c’est celui qui suive plus près So chemin droite. Allah conne tout et Li bien informé. » (49 : 14)
Ene de bane attributs d’Allah ki mentionné dans le Saint Livre de l’Islam, c’est-à-dire, le Quran Shareef, c’est «As-Salaam» ki veut dire ‘Source de la paix’.
L’Islam enseigne nous ki la paix li vine d’Allah, et zis Li tousel ki conne tout, ki au courant de tout, ki extra qualifié et compétent afin pou mette en place bane telles la lois ki pou amène dimounes vers la paix.
En tant ki Musulman, mo oblizé reconnaite la véracité de bane la religions ki fine inspiré par Allah tels couma l’Hindouisme, le Christianisme, le Judaisme et bane les autres mais seulement zis à zot l’origine kan zot ti pure (Kan Allah fine envoye So bane Messagers etc. mais aller aller, avec le temps sa bane la religions là fine gâter) et aussi mo bizin croire et ena respé pour bane fondateurs de bane tels la religions. Sa fer partie de mo la foi ki c’est à travers sa bane Messagers noble (et saint) là ki Allah fine envoye et établir So bane règlements, so bane la lois, pour assurer ki l’humanité vivre en paix et harmonie. En fait, pena aucaine kitchose ki justifier le fait ki dimoune vivre dans ene l’état d’hostilité, ki li au niveau d’ene individuel, d’ene groupe ethnique, d’ene nation, d’ene race ou même de la religion.
En vérité. Kan nous guette sa d’ene point de vue logique, ena ene sentiment naturelle ki traverse dans le cœurs de tous bane humains kot zot ressenti ene sympathie pour sakaine so camarade et alors sa permette pou créer ene société ki la paix et sécurité dominé.
Pareil couma mo fine dire au début (dans sa verset Quran là), Allah fine donne bane ancêtres commun à tous bane dimounes, et le Saint Prophète de l’Islam fine même dire : « Nous tous nous appartenir à la famille d’Allah ». Pareil couma sa verset là faire ressorti, l’importance de l’existence de bane liens entre bane dimounes, ou philosophie derrière la diversité de bane races c’est pou ki dimoune conne sakaine so camarade, et non pas pou créer la guerre et division.
C’est vrai ki ena moment ena bane obstacles ki rentre dans nous chemin, pou empêche nous « conne nous camarade ». Mais sa faudé pas faire nous oublier la sagesse ki ena dans sa phrase essentiel ki appelle « conne sakaine so camarade ». Tous bane chemins ki conduire vers ene renforcement de sa facteur essentiel (de conne nous camarade, tous bane humains), alors sa facteur là faudé pas nous néglige sa, pour ki nous capave récolte so bane fruits ki en forme de la paix et l’harmonie.
La religion pas bizin vine ene instrument ki connecter seulement ene partie limité de bane humains, mais li bizin ene concepte universel ki prend en considération tous bane réalités et ki établir bane vrais relations, premièrement en bane dimounes et Allah, et deuxièmement, entre bane dimounes zot-mêmes. Ene de bane pli pire l’ennemies de la paix ki répandue lors la terre c’est l’égoïsme, kot dimounes zot guette seulement zot propre l’intérêt, ki kitchose pou profite zot (et non pas ki profite les autres dimounes). Kan sa rentre dans dimounes zot les cœurs et domine zot, alors tous bane biens, tout bonté disparaîte ; dimoune là li conne zis li, et li pas ressenti nannié pou so camarade, li pas prend compte ditout bane les autres dimounes couma li. Li pas prend compte souffrance ou difficulté ou séki pé passer à bane dimounes ki vivre autout de li. Li conne zot pour zis séki li capave retire de zot, pour séki li capave cokain de zot, pour so propre l’intérêt.
La religion bizin la guerre contre l’égoisme et ene moyen pou capave fer sa c’est kan tous dimounes vine ensam avec ene vrai sentiment de fraternité. La religion enseigne à bane dimounes ki la vie couma li été li pas appartenir à li tousel, mais ki la vie li améliorer zis kan ena ene contribution ki vine de li (sak dimoune). Dimoune bizin conné ki li pas seul par li-même : li bizin rappler ki bane les autres (dimounes) aussi ena ene droit lors li. Et alors ici ena la question de respé de bane droits de bane les autres dimounes ki vine ene facteur très important ki amène vers la paix. Sa indique la nécéssité pour la religion pou fabrique bane tels bon qualité dans l’homme, pareil couma la noblesse, la générosité et ene conduite honorable comme ene source de respé envers bane les autres dimounes. Le respé implique pour travail dure pour quelque chose ou quelqu’un ki ena plisse l’importance ki nous-mêmes – Kan l’égoïsme disparaite, alors ena sa sentiment de respé pour bane les autres dimounes couma nous-mêmes.
Le Saint prophète de l’Islam (saws) fine enseigner ki « Allah (swt) pas arrête occupe Li de bane besoins d’ene dimoune aussi longtemps ki sa dimoune là li pé prend compte besoin de so frère (so prochain). »
En d’autres mots, la religion li bizin enseigne secours à bane les dimounes, ene tels secours ki spirituel ou li bizin enseigne ene noblesse spirituel – tous sa là en d’autres mots impliquer ki ene dimoune : li bizin pardonne bane fautes de so bane frères (so prochain), et faudé pas li prend li pli supérieur ki bane les autres dimounes, et faudé pas li ena l’ennemi, faudé li combatte pour la cause d’Allah même si li bizin contre li-même (kan li en tort), faudé pas li l’ennemi de dimoune, et faudé li place so confiance dans Allah tousel, et li casse so propre égoïsme, et li contre so bane propres désires égoïstes, et faudé li deal avec bane les autres dimounes avec justice et faudé pas ki li exiger - faudé pas ki li attane nannié en retour, faudé li ena ene bon caractère, faudé pas li évite (pou aide) ene dimoune pauvres, et faudé pas li imite ene dimoune riche. Faudé ki li aussi accepter pou recevoir, pour accueillir en même temps so frère de so propre pays et celui d’ene l’autre pays (faudé pas li fer différence entre zot ; faudé li traite so bane invités pareil). Faudé ki li aussi accepter pou renonce ene kitchose à cause ene peur quelque conque (ici, séki primordiale, c’est ki li accepter renonce ene kitchose attention (de peur) la colère d’Allah tombe lors li). Et aussi faudé pas li fer ene différence, même si ene Saint ou ene non-croyant pé manger ensam avec li (Sa li dépende de circonstance ki li fer face : li bizin traite tous les deux pareil avec gentillesse si les deux montrer zot gentil envers li et pas contre Allah et So bane commandement ouvertement devant li).
Laisse nous guette l’exemple de sa, dans sa anecdote ki mo pou raconte zot là : Fine rapporté dans bane traditions ki ene jour ene Mage (ki fer magique et ki idolâtre) fine demande Hazrat Ibrahim (as) hospitalité et Allah So camarade (Khalil) fine dire li : « A condition ki to soumette toi à Allah ». Alors Mage là fine aller. Alors Allah (swt) fine donne sa révélation là à Hazrat Ibrahim (as) : « Pendant 50 ans, Mo fine nourri li dans so non-croyance. Eski li ene fardeau pou toi pou to donne li ene boute manger sans ki to demande li pou change so religion ? »
Alors Hazrat Ibrahim (as) fine suive Mage là ziska li fine réussi joine li et fine demande li pardon. Kan Mage là fine demande li kifaire ? Alors li fine raconte li sa révélation ki Allah fine donne li là. Kan Mage là fine entende sa, li fine soumette li à Allah.
Ene mobilité spirituel li demandé ki zot restreindre zot-mêmes pou pas cause problèmes en même ki zot pé donne dimounes (sans demande en retour). Sa li inclure:
1. La loyauté et pou préserve séki précieux. 2. Ene vertu ki ou atteindre sans ki ou trouve li ou-mêmes. 3. Pas sauvé kan ene mendiant vine vers ou. 4. Pas cassiette ou de bane ki vine vers ou pou ene besoin quelqu’conque. 5. Pas ramasser et fer avare et pas fer bane excuses (pou pas donne dimounes et pou pas aide zot). 6. Manifester bane bénédictions et pou pas cause bane problèmes. 7. Invite 10 dimounes et ou pas en colère si pas 9 ou même 11 dimounes vini. 8. Ou arrête l’habitude pou fer distinction (surtout entre bane dimounes). 9. Pou pas fer ene profit lors la tête ou camarade.
Li bien facile pou comprend ki mobilité spirituel ou secours spirituel (ki ou donne ou prochain) li bien important pour ki ou gagne le respé, particulièrement le respé de bane droits ki nous ena envers Allah et envers les autres dimounes, et respé en li-même li bien important pou gagne la paix.
Respé commence dans la caze – ene l’exemple de sa c’est respé envers bane parents. Parmi bane traditions (Hadiths & Sunnah) du Saint Prophète (saws), ena détrois l’exemple ki pou suffit pou illumine nous (lors sa sujet là):
Ene jour ene dimoune fine vine vers le Saint Prophète (saws) et fine plaigner ki sak fois ki so papa ti envie, li ti pé vini et prend so l’argent. Le prophète (saws) fine fer appelle papa là. Alors le Saint Prophète (saws) trouve ene vié missié, ki faible et infirme vini et li ti pé marché avec l’appui d’ene bâton. Kan li (saws) demande vié missié séki fine passer, alors missié là dire : « O Prophète d’Allah (saws), ti ena ene l’époque kot mo garçon ti faible et sans défense et jamais mo pas fine interdit li pou prend mo bane kitchose. Astaire mo faible et li, li en bonne santé et fort. Mo pauvre et li, li riche. Et astaire li pé cassiette so l’argent pou mo pas prend. » Kan le prophète (saws) fine entende sa, larmes fine rempli dans so lizié et li fine tourne vers garçon là et dire li : « Toi et to l’argent, tous les deux pou to papa. » (Bizin bien méditer lors sa incident là – là-dans ena beaucoup leçon à retirer)
Abu Hurairah (ra) fine rapporter ki ene missié fine demander : « O Messager d’Allah (saws), ki sanlà mérite plisse mo respé ? » Li (saws) fine réponde : « To mama ». Missié là fine ensuite demander, « Ki sanlà vine après ? » Li (saws) fine dire : « To mama ». Après missié là fine ré-faire so demande « Ki sanlà vine après ? » et le prophète (saws) fine dire : « To papa ». (Bukhari and Muslim)
Abdullah ibn Umar (ra) fine rapporté ki le Saint Prophète (saws) fine dire : « Le plaisir d’Allah li trouve dans le plaisir d’ene papa et mécontentement d’Allah li trouve dans mécontentement d’ene papa. »
Ene l’autre Hadith ki bien connu : « Paradis trouve enbas lipié mama. »
Dans Quran Shareef nous lire :
« To Maitre fine déclaré: “adore Li seul et traite papa, mama bien. Si ene parmi zot ou les deux arrive à ene l’âge avancé kot toi, pas cause avec zot avec fierté, pas répousse zot mais cause avec zot avec respect. Couvert zot avec to les ailes, avec humilité et par pitié, et dire:
“O mo Maitre, donne zot To grâce, couma zot ti soigne moi kan mo ti petit”. »
Li aussi recommander ki nous ena respé pour nous bane frères, sœurs, bane familles, camarades, compagnons, voisins et aussi bane étrangers. Li pou trop longue pou donne tous bane versets Quran et bane Hadiths du Saint Prophète (saws) pou illustrer séki mo envie dire.
Mo terminer avec sa duah là : Ki Allah, le Source de la paix « As-Salaam » aide nous tous pou conne nous camarades pareil couma Li fine enseigne nous, et inculquer ene respé et la paix renforcé dans nous la caze, nous l’entourage, nous tipti l’île et de là nous répanne li (sa message là) à le monde en entier. Ameen. |
