بسم الله الرحمن الرحيم

 

Khutba Jummah

 

HAZRAT KHALIFATULLAH AL-MASSIH AL-MA’OUD

 

Munir Ahmad Azim

 

05 Août 2011  ~

 

(04 Ramadhan 1432 de l’Hégire)

 

RAMADHAN MUBARAK

 

(Résumé Khutba)

 

Après Salam, Hazrat Khalifatullah fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

Ramadhan c’est ene très grand N’iamat ki Allah Ta’ala fine accorde bane musulmans. Nous pou reconnaitre sa faveur là seulement quand nous pou donne li tout so valeur, sinon Ramadhan pou aller vini sans ki nous profiter. Fine rapporté dans ene Hadith : « Si mo Ummah réaliser vraiment valeur Ramadhan, zot pou désirer ki l’année entier passé dans Ramadhan. »

 

Ena tellement valeur dans sa mois béni là, nous tout connait couma li difficile pou garde Roza pendant toute longue l’année, mais ena sa qualité récompenses dans sa mois là ki bane musulmans ti pou content ki Ramadhan continuer pendant toute longue l’année.

 

Dans ene l’autre Hadith fine rapporter : « Garde Roza pendant mois Ramadhan et trois jours tous les mois éloigne mauvais pensées dépi le cœur. »

 

Bane Sahaba (ra) ti habituer garde Roza même dans Jihâd, pendant bane longues voyages fatigants malgré ki Rassoûlullâh (saws) ti donne zot permission pour arrête zot Roza. Finalement Rassoûlullâh (saws) fine bizin empêche zot garde Roza dans bane circonstances pareil. 

 

Dans ene Hadith ki trouve dans Muslim fine rapporter ki ene fois kan bane Sahaba (ra) ti pé voyager pou alle faire Jihâd, zot fine arrêter ene ti moment pou reposer, ti pé faire bien chaud et parce ki zot ti pauvre, zot pas ti ena assez linges lors zot pou protège zot contre rayons soleil. Boucou parmi zot ti pé servi zot la main pou gagne ene ti protection contre soleil, et dans sa condition là aussi, boucou Sahaba (ra) ti pé garde Roza. Zot ti tellement faibles et pas ti pé capave supporte chaleur, ki zot ti pé tomber.

 

Nous bien-aimé prophète (saws) fine recommande nous dans sa bane Hadiths là pou recherche bane grand vertus et bénédictions sa mois là afin ki nous capave corrige et reforme nous. Mais azordi jour nous fine vine tellement négligents ki nous pas pé agir lors so conseil ni nous pé prend précaution lors là, à tel point ki bien tiguitte parmi nous au courant même bane grand bénéfices ki nous capave tirer dans sa mois là.

 

Mo pou cite ene Hadith ki tous les l’année quand Ramadhan commencer, sa Hadith là mentionner pou faire comprend l’importance et bénéfice du Ramadhan.

 

Salman (ra) rapporter : « Dernier jour Shabaan, Hazrat Muhammad (saws) fine faire ene causerie ; li fine dire : O bane musulmans, ene grand mois pé vini, ene mois rempli avec bénédictions, dans sa mois là ena ene la nuit ki so valeur plisse ki mille mois. 

 

C’est ene mois kot Allah Ta’ala fine faire Roza Farz (obligatoire) pendant la journée et li fine faire Tarawih (c’est-à-dire, le Tahajjud couma mentionné dans Quran) Sunnah pendant la nuit. Celui ki essaye pou rapprocher avec Allah à travers bane actions Nafil dans sa mois là pou gagne même récompenses bane action Farz de bane les zot mois.

 

Et celui ki faire ene action Farz dans sa mois là pou gagne récompense, soixante-dix Farz de bane les zot mois.  Certainement, c’est ene mois Sabr (patience) et récompenses vrai Sabr c’est Jannat. C’est ene mois de fraternité, c’est ene mois kot Rizaq (provision) ene musulman augmenter. Celui ki donne Iftaar ene Rozadaar, li pou gagne pardon pour so bane péchés, li pou libérer avec di feu Jahanam et li pou gagne autant récompenses ki sa Rozadaar là, sans ki récompense Rozadaar là diminuer du tout. »

 

Aussitôt nous fine dire : « O Messager d’Allah, nous tout, nous péna moyens pou donne Iftaar ene Rozadaar ».

 

Hazrat Muhammad (saws) fine réponde : « Allah accorde même récompense pou celui ki donne ene Rozadaar ene tam, un peu de l’eau ou ene gorger du lait pou Iftaar. »

 

« Dans premier partie, Allah accorde So pardon et dans dernier partie Li libère nous dépi di feu Jahanam. Celui ki diminuer fardeau so travailleur dans sa mois là, Allah pou pardonne li et pou protège li dépi Jahanam. »

 

« Dans sa mois là, pratique en abondance quatre kitchoses ; deux là-dans pou plaisir Allah, deux les zot nécessaires pou zot-même. Deux kitchoses pou plaisir Allah, c’est récite boucou « Laa Ilâha Illallâh » et faire boucou Istighfâr. Et deux kitchoses nécessaire pou zot-même, c’est dimane Janaat et rode protection contre di feu Jahanam ».

 

« Celui ki donne ene Rozedar un peu de l’eau pou Iftaar Allah Ta’ala pou faire li boire dépi mo la fontaine (Hauz). Apres quoi jamais li  pas  pou  gagne soif jusqu'à ki i rentre dans Jannat ». (Ibné Khuzaimah, Baihaqi, Ibné Hibbaan)

 

Ou pou remarquer ki Hazrat Muhammad (saws) fine prononce sa bane parole là vers la fin Shabaan. Li bien clair ki Hazrat Muhammad (saws) pé attire l’attention bane musulmans lors valeur exceptionnel ki ena dans sa mois Ramadhan là, afin ki nous réfléchi et nous pas laisse ene seul moment passer sans ki nous donne sa mois là tout so l’importance.

 

Hazrat Muhammad (saws) fine attire nous l’attention lors plusieurs point important. En premier « Laylatul Qadr » ki vraiment ene la nuit ki so valeur pas capave estimer. Et aussi Hazrat Muhammad (saws) fine informe nous ki n’importe ki action Nafil ki nous pou faire pendant Ramadhan, nous pou gagne même récompense ki ene Farz et pou ene Farz dans sa mois là nous gagne récompense soixante dix Farz de bane les zot mois.

 

Li nécessaire ki sakaine parmi nous réfléchi lors nous bane Ibaadat, combien l’importance nous accorde pou bane actions Farz pendant Ramadhan et combien Nafil nous pé faire ? Quand nous guette en premier Namaz Farz, nous trouver ki boucou dimoune alle dormi quand zot fine fini prend Sehri avec comme résultat ki zot marque Namaz Fajr. Boucou faire Namaz Fajr mais pas avec Jamaat. L’impression ki nous gagner, c’est ki vraiment nous pas pé remercier Allah Ta’ala du tout pou Sehri ki nous fine prend quand nous pas pé accomplir ene pli grand Farz (Namaz) ou encore nous pas pé faire li avec Jamaat. Et pourtant Hazrat Muhammad (saws) fine dire concernant Namaz avec Jamaat. « Pou bane dimounes ki reste près avec Masjid, péna Namaz pou zot, excepter dans Masjid. »

 

Le Tilawat Quran ena ene connexion directe entre Quran et Ramadhan. Le Quran Shariff fine désanne dans sa mois là et li fine révéler tiguitte par tiguitte lors bien-aimé prophète (saws) pendant ene période de vingt-trois ans. C’est ene raison bien valable, ki chaque musulman bizin faire le maximum Tilawat Quran dans sa mois béni là, avec so traduction et aussi so commentaire. Dans Hadiths même nous fine apprane ki Hazrat Jibrail (as) ti pé récite Quran complet à Rassoûlullâh (saws) pendant Ramadhan.

 

Dans sa même Hadith là, Hazrat Muhammad (saws) fine dire plusieurs les zot kitchoses, ki Ramadhan c’est ene mois Sabr (patience). Même si nous pé gagne boucou difficultés pou garde Roza, nous bizin content pou faire Sabr, faudrait pas nous plaigner, couma certain dimounes faire dans chaleur l’été. Si nous pas fine réussi prend nous Sehri bien, là aussi faudrait pas nous plaigner et si nous fatiguer dans l’heure Tarawih nous faire Sabr et nous tini ferme. Faudrait pas ki nous considère sa bane A’mal (bon actions) là couma ene fardeau ou ene contrainte sinon zot capave perdit zot valeur devant Allah et nous pou faire ene grand la perte. Souvent nous trouve nous obliger quitte nous confort matériel, sacrifice nous manger, boire à cause nous travail, eski nous pas capave supporte quelque difficultés pou rode plaisir d’Allah ? Nous apprane aussi dans sa Hadith là ki Ramadhan, c’est ene mois de partage et de fraternité surtout avec bane pauvres et bane dimounes ki dans difficultés. L’esprit partage c‘est ene qualité ki nous bizin vivre dans la pratique.

 

Dans ene l’autre Hadith fine rapporter ki celui ki donne manger ene affamé, li donne linge ene malheureux, et li donne refuge ene voyageur, Allah Ta’ala pou protège li contre tout bane frayeurs Jour Jugement Dernier. Hazrat Muhammad (saws) fine aussi mentionne récompense quand nous donne Iftaar ene Rozadaar. Dans ene Hadith fine rapporter ki dans la nuit Ramadhan, Malaika (anges) envoye bénédiction lors celui ki dépense so revenus Halal pou donne Iftaar ene Rozadaar et dans la nuit « Laylatul Qadr » Jibrail (as) faire mussafah avec li et li pou reconnaitre sa par bane signes ki pou faire li reconnaitre sa bénédiction là ; so le cœur pou vine mou et larmes pou couler en abondance dépi les yeux, vers la fin.

 

Sa Hadith là, Hazrat Muhammad (saws) fine faire référence à premier partie Ramadhan couma ene période de Rahmat (bénédiction). Allah Ta’ala verse en abondance So Rahmat lors tout bane croyants. Naturellement, bane dimounes ki montrer plisse remerciement (et reconnaissance) envers Allah Ta’ala pou tout So bane bienfaits pou gagne boucou plisse encore. Allah Ta’ala dire dans Quran-e-paak : « Si zot remercier Moi, Mo pou augmente Mo bienfaits lors zot. » (Ibrahim 14: 8)

 

Dans deuxième partie Ramadhan, Allah Ta’ala accorde So pardon à bane Mu’mineen (croyants) comme ene récompense pou Roza Ki zot fine garder dans premier partie Ramadhan.

 

Dans troisième partie Ramadhan Allah Ta’ala sauve nous dépi Jahanam. Boucou les zot Hadiths confirme sa point là. Bane dimounes ki recevoir Rahmat Allah Ta’ala dépi commencement Ramadhan bien chanceux parski Allah Ta’ala pou combler zot avec bane bienfaits infini (Allah Ta’ala conne mieux).

 

Ene l’autre point mentionner dans sa Hadith là, c’est ki bane patrons bizin faire zot mieux pou donne facilité bane travailleurs pendant Ramadhan parce ki zot pé garde Roza. Si nous donne zot ene quantité travail dur pou faire, nous pou mettre ene fardeau lourd lors zot. Bien sûr sa appliquer pou bane travailleurs ki pé garde Roza, sinon péna aucaine différence pou zot entre Ramadhan et ene l’autre mois. Mais ena aussi certains patrons ki pas garde Roza mais zot oblige zot bane travailleurs ki pé garde Roza faire tout qualité travail dur et si jamais ena quitte retard ou manquement dans travail à cause Roza et Namaz, zot en colère et crier avec sa bane travailleurs ; vraiment, zot (sa bane patrons là) péna pitié dans zot le cœur.

 

Concernant sa bane dimounes là même Quran dire : « Bientôt bane ki faire dominère pou connait kot zot place été (dans Jahanam) ». (Ash-Shu’ara 26: 228)

 

Pou terminer mo pou cite ene Hadith Hazrat Muhammad (saws) fine dire « Celui ki récite en abondance Istighfâr, Allah Ta’ala toujours pou ouvert ene la porte pou li dans tout difficulté et retire so bane chagrins. En plus de sa, li pou gagne so provisions dépi bane sources ki jamais li pas ti pé penser ».

 

Alors mo pou dire tous bane musulmans faire sa zikr (et duah) là, dans n’importe ki moment libre zot ena (Insha-Allah) : « Laa Ilaaha Illallahou, Astaghfiroullah, Allahumma inni asalukal jannah wa audhu bika minan-naar » - Péna aucaine les autres bondié à adorer aparte Allah ; Pardonne-moi O Allah ; O Allah, mo demande Toi paradis et ki To protège moi contre difé l’enfer. Ameen.

 

Ki Allah Ta’ala par So grâce accorde nous Jannat et protège nous contre Jahanam, et ki Allah fer nous plonger dans So Ibaadat dans sa mois Ramadhan là et les reste jours à tel point ki Li satisfait de nous, Insha-Allah. Ameen.