|
بسم الله الرحمن الرحيم
Khutba Jummah
HAZRAT KHALIFATULLAH AL-MASSIH AL-MA’OUD
Munir Ahmad Azim
(02 Jamadul Aakhir 1432 Hijri)
(Résumé Khutba)
Après Salam, Hazrat Khalifatullah Al-Massih Al-Maoud fine commence so Khutba avec Tashahhud, Ta’uz, Surah Al Fatiha, et ensuite li fine dire:
لِيُحِقَّ الْحَقَّ وَيُبْطِلَ الْبَاطِلَ وَلَوْ كَرِهَ الْمُجْرِمُونَ
« Li yuhiqqal-Haqqa wa yubtilal Baatila wa law karihal-mujrimuun. » (8 :9) Ki la vérité sorti vainqueur et ki fausseté perdi tout so valeur, même si sa pas faire plaisir à bane ki faire péchés.
Dire et faire, c’est deux zaffaires différent. La justice li ene telle établissement ki bizin placer avec beaucoup precaution et ki bizin faire sans double-visage ou doute.
Ena bane Ahmadis pé couvert zot soi-disant-Amir, ex-Amir, kan ene grand dimoune, ki pas Ahmadi fine demande so bane famille Ahmadis, avec beaucoup de respect et humilité, ki fine arrive zot Amir. Alors quelques-uns d’entre zot fine insulter sa grand dimoune là à cause zot ex-soi-disant Amir, couma dire zot Baba ça. Pour zot couvert zot ex-soi-disant Amir, zot cause grand menti, ki c’est bane rebelle ki pé mette désordre, pé mette blâme lors zot ex-soi-disant Amir et même zot dire : « Nous Jamaat péna l’argent même, ki fraude pour ena alors ? Quel mensonge ! Zot couvert la vérité avec fausseté pour honore zot ex-soi-disant Amir.
Mo demande sa bane soi-disant Ahmadis là, ki pé défanne zot ex-idole :
1. Si péna fraude ki fine passer, ki faire le 5ème Calife ti bizin envoye ene quelqu’un dépi Londres pour faire l’enquête. 2. Si Jamaat de Maurice péna l’argent, couma ene cashier Jamaat fine fer ene fraude de Rs.400,000 dans la caisse Jamaat et puis so papa fine bizin remboursé ? 3. Si zot ex-soi-disant Amir pas fine faire aucaine fraude, kifer, Chaudry dans Jamaat fine bizin vite vite rembourse séki li fine prend sans dimander ? 4. Si li pas fine prend nannié dans la caisse et pas fine faire aucaine fraude, comment se fait-il ki li fine bizin dégrader, tomber de so chaise Amir, surtout kan so Amarat comme Amir pas ti encore terminer, et ki la clé, portable et l’auto tous rasser avec li et donne sa ene l’autre ?
Zot trouve pou kimer kan dimoune fine conner ki fine arrive zot idole (baba), zot dire ki pé blâme lors li et li kan li ti faire so plan satanique, et créer la haine dans lékaire dimounes et li et so bane Mullahs ki kimer lors mimbar Hazrat Muhammad (saws), zot ti pé prend sa bane blâme là, bane menti ki li ti pé causer comme parole l’évangile, comme véridique. Alors à sa moment là, pas ti ena nannié. Pendant 10 ans li fine pillé lors nous, complot lors complot, menti lors menti – pas ti ena nannié (contre li pour arrête li dans so bane campagne mensonges). Zot ti croire li. Tout sa kimer li fine kimer là, à cause révélation divine et bane ki fine croire ti pé dire bizin boycotter, pas frékanter. Li et so alentours envoye bane fausse rapport kot le Khalifa pour mette désordre, et pour mette zot dehors.
Guetter commié zot pou cachiette, couvert so malpropreté, commié zot content. Kan Allah attraper péna sapé là-dans, faire séki zot content. Gagne peur sa calamité ki pas pou affecter seulement bane parmi ou ki faire du tort, et rappler ki Allah sévère en punition. Pense bien, bane ki révolté contre Allah et So messager choisi, sans aucaine doute Allah sévère dans donne punition. Protège Allah So Deen (Islam), pas protège bane faussaire, magoullière et fraudeur. Pas mal de signe Allah (swt) pé montrer bane musulmans et particulièrement bane Ahmadis mais Allah fine dire dans Quran Shariff :
« Wallaziina kazzabuu bi Aayaatinaa sanas-tadrijuhum-min haysu laa yalamuun. » Mais bane ki rejette Nous signes, Nous pou laisse zot alle vers zot destruction doucement doucement, dans ene façon ki zot pas réaliser,
Et Allah (swt) continuer dire :
« Wa ‘umliilahum : inna kaydii matiin. » Mo pou donne zot ene délai ; Vraiment Mo plan solide.
Gagne la crainte d’Allah ; pas gagne la crainte créature dans ou lékaire. Pas couvert la vérité avec mensonge kan ou conne li très bien ; pense so consékances pli devant avant ki li trop tard. Eski ou pas réfléchi avant ou causer ? Moi, mo là seulement pou donne ene avertissement clair ki vine de côté mo Créateur.
« Fabi-ayyi Hadiisim ba-dahuu yuminuun ? » Ki parole zot pou accepter, si zot pas accepter sa?
Pense bien celui ki Allah laisse égarer, personne pas capave guider. Allah (swt) laisse zot tourner virer dans zot confusion, dans zot extravagance.
Alors pas faire vantard et pas montrer ou l’arrogance et kan ou tende bane avertissements ou bane paroles d’Allah, pas tourne ou lédos avec l’arrogance. Allah (swt) dire dans Quran :
« Inna sharradda-waaabbi indallaahis summul-buk-mullaziina la ya’qiluun. » Dans lizié d’Allah, bane plus mauvais zanimo c’est bane ki faire sourdes et muet, ki pas servi zot l’intélligence.
Couma zot tous conné ki le Saï Baba fine décéder Dimanche le 24 Avril 2011 à l’âge de 84 ans et beaucoup dimounes ti pé prend li comme Dieu lors la terre et même mo conné à Maurice beaucoup so bane adhérents ti pé prier li. Ena ene parole ki dire kan ou pas croire dans ene seul Dieu, ou croire dans milliers de dieux. Par la grâce d’Allah, ici à Maurice, bane dévôts de Saï Baba habituer invite moi dans zot bane conférences pour prend la parole, pour causer et surtout mo ti pé cause lors l’unicité d’Allah.
En 2005, mo ti invité à Puttaparthy en Inde pour participer dans ene conférence Inter-religieux kot différent chefs religieux de tous bane communautés ti présent et ti prend la parole. Moi et mo famille nous ti aller dans le mois Juillet (le 11 Juillet) 2005. Ti ena beaucoup de so bane dévots à travers le monde ti présent dans sa place de conférence là. Le lendemain nous arrive à Puttaparthy, ti ena ene programme kot le Sai Baba ti présent pour adresse so bane dévôts. Sa jour là, tous invité, bane chefs religieux et moi ti présent par devant. Mo ti vis-à-vis avec li ; zot tous fine attane li prend la parole mais malheureusement Baba sa jour là et bane les autres jours ziska conférence terminer, li pas fine prend la parole. Le Jour conférence kot plusieurs de bane chefs religieux présents pour adresse zot message, moi, mo ti vis-à-vis avec li, et ti ena ene conversation « heart-to-heart ». Sa ti passer ene Vendredi 22 Juillet 2005 après ki mo ti alle faire mo Jummah dans Mecca Masjid et sa jour là même Imam Abdur Rahman Sahib et 23 dimounes prend le Bai’at dans mo la main et kan mo fine retourne dans conférence room kot le Sai Baba, ene pasteur Chrétien ti pé causer et après li, ene prêtre Juif (Rabbin) ti causer, et après ti ena mo-même ki ti bizin prend la parole ; mais à mo grand surprise, mo fine trouve ki ene Mawlana Sunnat-é-Jamaat de Delhi fine vini et li fine prend la parole, et après kan li fine fini, li fine tombe dans lipié Baba et Baba fine donne li ene bague. Mo bizin préciser bien ici ki tous bane dévots de Baba ti pé attane li debouter et causer et joine zot tous, mais tout les contraire, Baba lors ene chaise roulante, kot tous so bane dévots fine choqué fine trouve li et so nom ti lors programme et li pas fine prend la parole du tout et programme fine continuer, après ki Mawlana de Delhi fine causer, l’heure là prêtre Juif avec so la guitare dans so la main fine faire so la prière accompagner de so la guitare et li fine fer louanges Baba – toute suite dans la salle de conférence, Allah (swt) donne moi ene message, ki lever aller, pas participer, parski Sai Baba pour rode piège toi, pour fer toi tombe dans so lipié et mo fine lever toute suite devant plisse ki 20,000 dimounes ki ti présent et kan mo fine sortie dehors, bane journalistes de journal « Enadu », « Vaartha » et d’autres fine commence pose moi ene série de question et mo fine réponne zot et mo fine expliquer à la fin ki mo fine vine ici pour cause lors l’unicité de Dieu, et non pas pou tombe dans lipié Baba et ni pou prier li. Allah fine envoye moi pour faire dimounes prier Li (Allah), pas pour prier bane créatures, ni prier Baba. Sa fer moi rappelle ene rêve ki mo fine fer avant mo alle dans conférence à Puttaparthy. Mo ti rêver ki mo pé monte lors lédos Baba. Après saki fine passer dans mo voyage dans le sud de l’Inde, mo fine alle compran signification mo rêve, kot c’est à travers sa conférence Baba là (comme ene Bahana) ki mo fine réussi alle fer mo Dawah, prêche l’unicité d’Allah, répanne sa message là dans le sud de l’Inde et par la grâce d’Allah, beaucoup dimounes fine écoute et accepter le message d’Allah.
Après sa entretien avec la presse là, le soir Allah (swt) donne moi ene message ki moi et mo famille, nous bizin quitte Puttaparthy : « Aller parski fine vine dangereux pour toi et to famille, kot Sai Baba et so bane dévots pas fine apprécier ditout et pé fer complot pour attaque zot. » Alors mo ti bizin déguiser, envelopper avec ene large molton et mo bane famille aussi avec ene large drap et sa jour Samedi là, Allah faire la pluie torrentiel tombé, pour ki personne pas capave circuler dans la cours et ti ena ziss 4 gardien kot Gate central et nous fine enveloppe nous bien et nous valise avec nous, nous guette ene dimoune lors bicyclette, et nous paye li. Li mette valises lors so bicyclette et ensuite li quitte nous dans ene place kot nous pou facile gagne ene transport et par la grâce d’Allah, nous fine gagne ene transport toute suite pour vine la gare train.
Mo fine raconte zot en bref couma Allah (swt) fine protège moi et mo famille et fine sauve nous. Sa moment là, Allah (swt) ti jette la peur dans le cœur bane ki ti pé faire sécurité.
Le Sai Baba ti ene dimoune couma nous ; Li pas Dieu. Ena ene sel Dieu et c’est Allah. Kan mo fine écoute l’information le jour ki li fine décédé (23 Avril 2011), bane dévots de Sai Baba fine dire ki zot Bondié, l’Eternel fine mort – zot associé Baba comme Dieu, kan li pas possède aucaine pouvoir. Li pas capave sape li-même avec la mort ! Alors couma li capave sape ou de ou bane difficultés, de ou bane maladies ? Sa bane kalité dimouns là (surtout so bane dévôts) ti pé dire kan mo ti dans conférence ki Baba ti fer ene prophécie ki li pou vivre ziska l’âge 96 ans et après li pour ré-incarner dans ene femme comme dieu même, et zot croire dans bane tels fausseté pareil ! Et séki fine pli choque moi dans tout sa, c’est ki beaucoup de bane musulmans fine converti, fine quitte l’Islam et fine vine bane dévots de Baba. Mo fine gagne l’occasion cause avec quelques musulmans ki fine converti, et mo fine dire zot : « Eski zot donne comme associer à Allah bane choses ki pas capave créer nannié, tandis ki li-même fine créer par Allah ? Le Sai Baba pas capave donne zot aucaine aide. Si ene malheur arrive zot et li pas pou capave fer nannié pour zot et si ene malheur arrive li, li pas pou capave aide li-même de sa malheur là. Ou pé prier ene dimoune pareil couma ou même et prend li comme dieu. Ou fine vine là pour prier li, guetter si li réponne ou la prière, ou li tire ou dans problème ? Ou quitte Allah, ki fine créer ou et ene jour ou ena pou retourne vers Li et ena ene compte pour render. Ou quitte Allah, et ou alle prier Sai Baba ? »
Ici même à Maurice dans mo Dawa, mo fine joine quelques famille musulmans ki fine quitte Islam et fine alle converti dans Sai Baba et dans Mission Salut et Guérison. Mo fine alle joine zot en 3 l’occasion et mo fine dire zot ki c’est ene kitchose grave ki zot fine faire, kot zot fine quitte Allah et alle tourne vers créature comme dieu. Si zot suive chemin Allah et tourne vers Allah, Allah (swt) pou montrer zot couma différencier entre bon et mauvais, Allah (swt) pou empêche zot faire tout mauvais action, et Li pou accorde zot So pardon. C’est Allah ki possède bane grand faveurs ki Li donne à bane dimounes. La vérité c’est ki Allah jamais change faveurs ki Li accorde dimounes, à moins ki dimoune même oulé change zot-même.
Maintenant mo pou cause impé lors saki fine arrive Usama bin Laden. Tous l’informations pé cause à propos de so la mort et dimoune penser ki li le seul commanditaire et seul chef à la tête de bane l’attaques lors World Trade Center et le Pentagon (dans l’Etats-Unis). Bien avant bane l’attaque ki fine arriver le 11 Septembre 2001, Allah ti fini donne moi ene message en bane termes claires ki pou arrive l’Amérique et couma li pou subir ene dégradation, et Allah ti informe moi lors bane plans machiavellique ki Bush et so bane chefs ena dans zot la tête (pou fini l’Islam). Usama bin Laden li pas le seul responsable de la mort de quelques 3000 Américains innocents. Mais malheureusement li fine ena ene la main là-dans et à travers li l’Islam fine être connu comme ene Religion Terroriste, et bane dimounes guette bane Musulmans dans ene tel façon ki zot prend bane Musulmans comme bane térrorists et tous bane attaques suicide ki fer au nom de l’islam aussi fine donne ene mauvais l’image lors l’Islam, tandis ki l’Islam zamais fine prêche la violence. Li fine vine bien claire et visible à tous bane ki ena zoreilles pou tender et lizié pou guetter, ki Usama bin Laden - à travers so campagne pou dire haut et fort ki li-même li responsable bane l’attaque 11 Septembre 2001 – li en bane termes précis fine proclame li Imam Mehdi de sa siècle là, et ! travers « so » bane l’attaques lors l’Amérique, li pé en fait fer la guerre contre le Dajjal, pareil couma fine détayé dans plusieurs de bane Hadiths du Saint Prophète Muhammad (saws). Et sa fine renforci encore plisse avec l’apparition de deux l’éclipse dans le même mois de Ramadhan en Octobre 2005 (malgré ki l’éclipse ti partiel et pas totale couma bane l’éclipses de Novembre 2003), et dans so bane vidéos (en 2003), li apparent ki li fine proclame li le Mahdi, et li ti même commence servi so nom complète : Usama bin Muhammad bin Laden.
Par so bane actions, Usama bin Laden pas fine honore so nom de « Muhammad » (ki en fait le nom de so papa). En plisse de sa, li fine insinuer ki li le Mahdi avec bane écrits « Le Mahdi zot tous pé attane », mais définitivement fausseté bizin disparaite et la vérité vine clair. Mais sa c’est pas ene raison pou l’Amérique, ki, après ki fine touye li, jette so cadavre dans la mer, sans bane rites islamiques ki bizin. Bane Américains fine gagne zot vengeance avec so la mort (malgré ki li pas le seul responsable dans sa bane crimes là) et au moins, zot ti bizin remette so lécorps à so famille pou ki bane rites islamiques capave observer. So jugement fer seulement par Allah, pas par dimounes. L’Amérique pé criyer amèrement lors la mort de 3000 dimounes dans l’attaque de 11 Septembre 2001, mais eski zot fine oublier des milliers de Musulmans innocents ki zot fine touyé dans le passé ? Zot priver d’ene lékaire ! Eski la mort de 3000 Américains capave rachète la vie de sa bane miliers de Musulmans innocents de Palestine et bane les autres ki fine mort dans la main bane Américains, le soi-disant superpuissance (du monde) ? Non ! La vengeance dans sa sens là li jamais bon, parski sa difé là li ene difé ki pou bruler tous les temps. Eski bane Américains penser ki avec la mort de Usama bin Laden et fer so cadavre vine « manger poisson » li ene moyen d’établir la justice ? Ou birn eski sa incident là pou fer paraite encore plisse bane bin Laden kot plus tard zot pou manifester zot vengeance ?
Islam li ene religion de paix. Saki bane extremists pé montrer le monde c’est pas l’Islam. Bane térroristes zot pas l’identité de bane Musulmans, mais c’est l’identité de bane dimounes sans conscience et sans ene baggage spirituel, malgré le fait ki zot capave penser ki zot pé fer tous sa là pou gagne bane faveurs d’Allah, mais ki faveur ena dans fanne disang de bane lézot et ou propre disang à travers bane l’attaque-suicide ? Le Saint Prophète Muhammad (saws) zamais pas fine prend zarmes par li-même pou alle la guerre contre l’enemies à moins ki bane l’ennemies là attaques bane Musulmans en premier, et bane la guerre ki li ti pé entreprendre ti ena lieu seulement après ki li fine recevoir bane révélations claires de côté d’Allah pou défanne li et bane Musulmans (sinon ene par ene bane l’ennemies ti pou touye so bane adhérents). C’est pourquoi Allah fine donne bane l’instructions ki fine arrive l’heure pou defanne zot, avant ki plisse Musulmans alle mort (et ki l’Islam disparaite – Nawzobillah) parski sa, ti le souhait de bane l’ennemies de l’Islam.
En temps voulu, sak vérité pou vine manifeste. Dans même mois Avril et au commencement de Mai, nous fine trouve la dégradation et la mort de trois dimounes dangereux ki ti prend zot ki zot dieux (ou manifestation de Dieu) sur terre, kan zamais Allah pas fine envoye zot. Ena le soi-disant Amir de Maurice (so dégradation), le Sai Baba (so la mort) et le 02 Mai 2011 (gramatin bonheur dans Pakistan) la mort de Usama bin Laden.
Ki Allah fer manifesté encore bane la vérité couma Li fine promette sa humble serviteur là depi l’époque de mo expulsion de Nizam-e-Jamaat Ahmadiyya. Petit à petit, sak la vérité pou vine manifeste et fausseté pou dispaitre (en séki concerne mo siècle de manifestation divine). Tous bane ki fine aide le soi-disant Amir de Maurice pas pou sapé (avec la colère d’Allah). 10 ans fine passer et Allah, pareil couma Li fine promette sa humble serviteur ki présent devant zot azordi, Li fine fer la vérité éclater, et bientô, très bientôt, ene par ene, bane complices du soi-disant Amir, avec so soi-disant Amir li-même (pou ena encore plisse dégradation pou li) et bane tous bane ki fine faussement déclarer ki zot Dieu ou ki zot vine de Dieu, ki zot recevoir la revelation divine (tandis ki zot pas recevoir), dans n’importe ki coin dans le monde (depuis tous bane la religions), alors tous sa bane dimounes là zot pou trouve zot dégradation. Allah zamais presser, parski Li donne le temps pou ene kikaine repentir et révine lors le droit chemin. Rappelle bien, ene pacte avec Allah, c’est ene kitchose ki zot ena pou alle rende compte. Obéir Allah et So Messager et pas laisse zot bane bons actions perdi zot valeur. Le pharaon de sa lépok là (dans Maurice) li encore pé honoré malgré so bane actions dégradants. Ki li pé attane ? Pou ki la main d’Allah écrase li en poussière ? Li na pena haya et li pas ena ene sense de l’honneur et d’intégrité. Malgré tous bane fraudes ki li fine faire, li pé toujours marche la tête haute, couma dire li fine fer ene extra joli action ki mérite grand applaudissement. Très bientôt bane visages de bane hypocrites, de bane infidèles, bane ki commette le mal dans toutes sortes façons et ki fine mette blâmes lors moi, alors tous sa bane visages là pou vine manifeste. Tous bane ki fine rejette le Messie et Messager d’Allah de sa l’époque là zot pou goûte consékances de zot propres mauvais actions. Kan Allah fine dire : « Obéir Allah et So Messager », ki fine prend zot comme supérieur à Allah et à So Messager et zot fine agir d’après zot propre la tête. Zot fine envoye zot la main de l’avant et fine commette le mal, malgré ki zot penser ki zot lors le droit chemin, et en vérité Allah pou amène zot vers zot destruction, excepter bane ki repentir et reforme zot et embrasse la vérité avec humilité et zot marche d’après bane commandements divines (pas séki zot la tête dire zot – pas penser ki zot pou capave commande Allah et So Messager !)
En vérité, Allah fine dire moi, pareil couma Li ti dire mo noble et bien-aimé prophète (saws), ki malgré ki Li pas fer moi témoigne personellement sa bane dimounes là zot destruction et ki Li prend moi avant sa, mais ene jour na pas ene jour, sa bane « criminels » de la religion là pou goûte mauvais consékances de zot bane actions et le monde, et spécialement bane dimounes de mo Jamaat pou témoigne de la vérité (et de bane prophécies) ki sa humble dimoune là fine fer sous commandement d’Allah.
Ki Allah guide nous tous pou compran pli bien sa Khutba là et pou fer la distinction entre la vérité et fausseté et ki nous être vrai envers Allah et envers So bane instructions, et So Messager, arrive séki arrive, en soumission à Allah, dans ene l’humilité complète. Insha-Allah. Ameen. |
