بسم الله الرحمن الرحيم

 

Khutba Jummah

 

HAZRAT KHALIFATULLAH AL-MASSIH AL-MA’OUD

 

Munir Ahmad Azim

 

A Rodrigues

(Dans Rivière Cocos)

 

07 Octobre 2011  ~

(09 Dhul-Qaddah 1432 Hijri)

 

(Résumé Khutba)

 

Après Salam, Hazrat Khalifatullah fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

Na pas ena aucaine salut zis dans Tawhid tousel. Bane l’ennemies de nous la foi ki pas agir d’après bane essentiels de la foi, zot fer tout zot mieux pou pas gagne l’étiquette d’incroyants kan zot ridiculise l’Islam, le Quran, Allah (swt), Nabi Kareem (saws) et nous la foi (dans ene sel Bondié). Zot aussi raconte bane tel zistoires pareil couma Ibliss ti fer pou ki dimounes penser ki na pas ena aucaine besoin pou ki zot (bane dimounes) agir lors bane essentiels de nous la foi. Zot ena sa désir là dans zot pou réduire l’Islam couma ene la religion mort, pou ki bane Musulmans vine bane Musulmans que de nom, kot zis lors la lèvres ki zot Musulmans, mais actions couma zot (c’est-à-dire, bane l’ennemies de vrai la foi). Zot envie ki Musulmans vine dans ene tel situation ki zot récite Shahada (Kalima) zis lors zot la lèvres couma ene perroquet.

 

Pour zot, ene dimoune bizin récite le Kalima et après sa, sa pas fer li aucaine différence si pas li appelle Allah (swt) menteur ou sois li servi bane propos humiliant et bane langages insultant pour le Saint Prophète (saws). Sa kalité dimoune là, sa soi-disant Musulman là pou contigner prétendre ki li ene Musulman.

 

« Zot dire : ‘Nous lécoeur fermer lors nous la foi.’ Mais Allah fine maudit zot parski zot rejette la vérité. Bien faible sa la foi ki zot ena là ! » (Al-Baqara 2 : 89)

 

Sa bane l’ennemies de bane Musulmans là et bane anti-Islam présente bane arguments sataniques et rempli de fraudes et de mensonges avec l’intention pou dévier bane dimounes, embête zot et dévier zot de zot la foi en ene Allah ki Unique et Absolu. Li pas servi nannié ki bane hypocrites rénouer zot baiat (serment) ou bien ki zot récite Shahada (Kalima) – tous sa là na pas ena aucaine valeur parski Allah (swt) fine déclare zot menteurs. A la lumière de sa bane versets là, nous capave lire :

 

« Bane Bédouins dire : « Nous ena la foi. » Dire zot : « Ou pas encore ena la foi. Mais dire pluto : « Nous fine accepter l’Islam. » La foi pas fine encore rentre dans ou lécoeur. Si ou obéir Allah et So Prophète, Li pas pou diminuer nannié de ou bon actions. » Allah vraiment pardonner et gracier. » (Al-Hujuurat 49: 15) ; Et ena sa verset là aussi :

 

« Kan bane hypocrites vine kot toi, zot dire : « Nous témoigner ki to-même Messager d’Allah. » Allah conner ki c’est toi-même So Messager, et Allah témoigner ki bane hypocrites là pé cause menti. » (Al-Munaafiqun 63: 2)

 

Li claire ki récitation de premier partie (la moitié) de Kalima (Shahada) faudé pas prend li comme mot finale ki fer nous vine Musulman. En fait, ene dimoune ki récite Kalima li ene Musulman, ziska ki li dire, ou bien fer kitchose ki anti-Islamique. Aussitôt ki li fer ene acte anti-Islamique, so récitation de Shahada arrête vine utile pou li. 

 

Allah (swt) dire: « Zot fer serment lors nom Allah ki zot pas fine prononce (bane paroles infidèles), kan vraiment zot fine dire sa bane paroles là; et en plus, zot fine rejette la foi après ki zot ti fine accepter. Zot ti pense faire kitchose ki zot pas fine réussi. Seul reproche ki zot capave faire, c’est ki Allah, et So Prophète, fine enrichi zot par So faveur. Si zot répenti, li pou meilleur pou zot. Mais si zot tourne lé dos, Allah pou puni zot avec ene punition douloureux lors la terre et dans la vie future. Et zot pas pou gagne personne lors la terre pou protège zot, ni pou aide zot. » (At-Tauba 9: 75)

 

Ene Hadith ki rapporter par Abdullah Ibn Abbas (ra) dire ki ene fois Hazrat Muhammad (saws) le Messager d’Allah ti pé assizer enba l’ombrage ene pié. Ibn Abbas (ra) dire ki ene dimoune ki fine vini et fine guette so bane compagnons (bane Sahaba) avec lizié Shaytane. Hazrat Muhammad (saws) fine conseille so bane Sahaba pou pas cause avec li. Après quelques moments, ene dimoune fine passe kot zot, et so lizié ti couma lizié chatte. Hazrat Muhammad (saws) fine appelle li et alors bane compagnons fine commence demande li kifer li et so bane camarades ti pé servi bane langages arrogants pou le prophète (saws). Dimoune là fine allé et fine amène avec li so bane camarades. Zot tous fer ene serment ki zot pas fine dire même ene sel parole contre le Saint Prophète (saws).

 

Kan fine arrive sa, à ce moment là Allah fine révèle ene verset ki zot pas fine montrer ene respé pou le prophète (saws) malgré ki zot fine fer serment lors Allah (swt). Sa révélation là fine clarifier ki zot fine vine bane non-croyants (infidèles) lors le fait ki zot fine dire bane mauvais paroles contre dignité de (Allah) So bien-aimé prophète (saws).

 

Nous bizin remarquer ki ici Allah (swt) Li-même Li témoigner ki ene parole de non-respé contre personnalité digne de So prophète (saws) li condamne celui ki dire sa parole là et sa parole là fer li dégringoler au plus bas dans l’incroyance, malgré ki li capave proclamer ene millions de fois ki li ene Musulman ou bien ki li fine récite Shahada ene million de fois. Allah (swt) dire :

 

« Si to questionne zot, zot pou dire surement : ‘Nous ti apé blaguer, nous ti apé badiner!’ Dire zot : ‘Eski c’est Allah, So versets et So prophète ki ou ti apé moquer?’ Pas fer excuses. Ou fine rejette la foi, après ki ou fine déjà accepter li. Si Nous pardonne ene partie parmi ou, ena ene partie ki Nous pou puni, parski zot persister faire péchés. Bane hypocrites, hommes et femmes, zot camarades ene à l’autre. Zot ordonne séki empêcher et empêche séki permette, et zot ena la main serré. Zot oublier Allah et Allah aussi oublier zot. C’est bane hypocrites ki prend chemin travers. » (9: 66-68)

 

Dans sa situation là, Allah (swt) fine révèle sa verset là, kot pé demander si pas zot pé moque Allah et So Prophète (saws). Bane versets là en plisse de sa déclarer ki faudé pas zot fer aucaine excuses et verset aussi fer comprend ki zot fine vine bane infidèles après ki zot ti bane Musulmans, zis à cause de bane paroles ki zot fine prononcer (contre le Messager d’Allah).

 

O bane frères et sœurs ! Prend note ki Allah (swt) fine puni sa dimoune là pou saki li fine dire, kot li ti dire ki Hazrat Muhammad (saws) na pas ena connaissance du Ghayb (le monde invisible) – kan li fine gagne sa révélation là lors sa hypocrite là. C’est vrai ki ene prophète d’Allah pas conne l’invisible ziska ki Allah révèle li So bane secrets à travers la révélation divine. Alors, sa dimoune là so récitation de Shahada pas fine servi li nannié, kan li pas fine croire dans le fait ki Allah capave dévoile secrets ki trouve au plus profond de so lécoeur, et révèle sa à So bien-aimé prophète (saws).

 

Ki Allah (swt) ouvert zot l’esprit et illumine zot lécoeur afin ki zot bien comprend sa Khutba là. Insha-Allah, Ameen.