بسم الله الرحمن الرحيم

 

Khutba Jummah

 

HAZRAT KHALIFATULLAH AL-MASSIH AL-MA’OUD

MUNIR AHMAD AZIM

 

Munir Ahmad Azim

08 Avril 2011 ~

 

(04 Jamadal Awwal 1432 Hijri)

 

 

(Résumé du Khutba Jummah)

 

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine dire:

 

يَا أَيَّتُهَا النَّفْسُ الْمُطْمَئِنَّةُ ۝ ارْجِعِي إِلَى رَبِّكِ رَاضِيَةً مَّرْضِيَّةً ۝ فَادْخُلِي فِي عِبَادِي ۝ وَادْخُلِي جَنَّتِي ۝

 

Yaaa-'ayyatuhan-Nafsul-mutma-'innah! 'Irji-'iii 'ilaa Rabbiki raadiyatam-mardiyyah! Fadkhulii fii-'Ibaadii! Wadkhulii Jannatii!

 

“O toi, l’âme (apaisée) dans to bien-être! Retourne vers to Maître, satisfait, et Li aussi satisfait (avec toi), entre parmi Mo serviteurs, entre dans Mo paradis.” (89: 28-31)

 

Aujourdhui mo pou cause lors bane l’état de l’âme et séki faire l’âme arrive à sa l’état extraordinaire ki nous appelle : « al-nafs al-mutmai’na » (l’âme apaisée). Séki zot bizin conné c’est ki l’âme humain li de l’essence d’Allah. Li passe par plusieurs étapes avant ki li atteindre so but, kot li arriver purifier li d’ene façon extraordinaire. Avant ki li arrive à so sommet de perfection, l’âme li partager par plusieurs désires ki empêche li gagne satisfaction d’Allah.

 

Ki li missié ou madame, sakaine de sa deux là zot passe par plusieurs étapes dans la vie. Prend dépi zot l’état de bébé ziska zot fine adultes, zot ena pou amène ene la lutte avec zot-mêmes dans l’espoir ki zot arrive gagne ene la paix (ki nous appelle, la paix intérieur) et zot bizin faire bane tels zefforts pour fer bane transformation dans zot-même ki plaire à Allah, le Créateur et Celui ki le vrai propriétaire de tous l’âme. L’âme humain passe par trois l’étapes principales : (1) L’âme instigateur de mal (al-nafs al-ammara bis-su’), l’âme ki faire bane reproches à li-même (al-nafs al-lawwama), et finalement l’âme apaisée (al-nafs al-mutmai’na) ki bien pli supérieur à sa deux lézot là.

 

Zot bizin comprends ki l’âme instigateur de mal (al-nafs al-ammara bis-su’) li là pou détruire li-même. Li familier avec zis sa la terre là et avec séki li contenir. Li ena toutes sortes kalités désires ki rélier avec sa la terre là et li envie arriver (gagne succès) mondainement parlant, et li oublier ki li vine d’Allah et ki c’est lors Allah ki li bizin concentrer. Sa l’âme là, plus connu comme l’égo et le désir charnelle de l’homme li trouve dans li dès so jeune âge (dans l’enfance), kot li oulé gagne tous saki li trouver parski c’est so propre volonté ki dirige li et li laisse li diriger par sa volonté là. Ene zenfant pas ena la connaissance nécéssaire de la beauté de l’existence d’Allah et li pas oulé aussi vine près are Li (Allah). Tout saki li faire, li faire li pou li-même, kot li rode satisfaire so propre besoin et sa continuer pendant ene longue létemps ziska ki li comprend ki Allah exister et ki tout kitchoses bizin faire d’après la volonté d’Allah et non par so propre volonté. Mais bien souvent, li arriver ki ene dimoune (missié ou madame) zot pas saisi la spiritualité et alors zot laisse zot envahir sa l’état là, par so bane propre désires charnels. Dans sa l’état là, li (dimoune) détruire tout l’espoir pou li vine pli près avec Allah, et li alle même fer Allah encolère contre li kan li associé li-même avec so bane pulsions sataniques, sa bane même pulsions là ki d’accord avec so bane exploits ki li fer pou satisfaire so propre volonté, au lieu ki li réforme li-même pou ki li capave atteindre l’Amour et la Satisfaction Divine. Sa l’âme là alors vine ene l’âme voilée, kot li pas capave reconnaite l’essence pure de so création, et alors li continuer pou satisfaire so propre désires au lieu ki li prend conscience de ki so égoïsme pou zis capave amène vers so propre destruction, et fer li égarer du chemin d’Allah pareil couma Ibliss ti banni de la présence d’Allah.

 

Ene l’âme gagne beaucoup épreuve ziska ki li réussi gagne permission pou accède dans présence d’Allah, et li réussi fer sa pas là kan li réussi fer tout pou ki Allah satisfait avec li. Pareil couma Adam ti manifester so égo kot li ti rode vine éternel et gagne bane même attributs de bane anges afin ki li réussi reste dans présence de so Bien-Aimé Allah pou toujours, malgré le fait ki décision pou mange fruit sa pié là vine de li, et ki so propre volonté fine manifester, mais malgré tout sa, nous pas capave dire complètement ki so décision ti vine d’ene l’égoïsme totale ; sa c’est parski Allah fine trouver ki li lors le droit chemin, dans Li fine conne au plus profond de Adam à propos de so désire pou rentre parmi bane serviteurs bien-aimés d’Allah. Mais nous bizin comprends aussi ki sa propre volonté ki manifester là li destructive et c’est sa ki sa fine fer Adam ensam avec so madame fine perdi zot place dans sa paradis là, et alors zot fine bizin alle lors la terre de bane épreuves afin ki zot accède à la proximité d’Allah ki ene temps ti donne zot lors plateau.

 

Alors, l’âme ki incite vers le mal (al-nafs al-ammara bis-su’) li prend compte zis so propre besoins et li pas fer attention à bane lézot créatures. Li désire primitif vine de l’avant. Sa c’est souvent l’état de bane infidèles dans l’époque de bane prophètes d’Allah, bane tels dimounes ki zamais fine capave accède à ene l’état meilleur ki l’état dans ki zot trouve zot. Pou zot, c’est pouvoir mondaine ki ena valeur et alors zot fer la tête lipié pou réussi dans zot désire pou prend pouvoir, malgré le fait ki zot capave être bane Imams, prêtres, savants, bane dimounes d’ene descendance noble et bane intellectuelles. Zot capave possède toute la connaissance de sa le monde là, mais malgré sa, n’importe kan ene Messager vine à zot de parmi zot-mêmes, alors c’est bien souvent ki l’histoire de Adam et de Ibliss répéter, kot sa bane dimounes là zot jalousie manifester et zot ressenti ene besoin pou reste au contrôle au lieu ki zot tourne en repentir vers Allah et zot admette zot bane fautes, et zot pas réaliser ki ene jour na pas ene jour, zot pou bizin retourne vers Allah. Pareil couma mo fine mentioner semaine dernière dans mo Khutba Jummah, même zaffaire fine passer dans mo cas kan sa Adam là, comme le Khalifatullah fine vini, alors Ibliss (en forme de sa soi-disant Amir de l’Association Ahmadiyya de Maurice) fine bizin oppose moi dans sa siècle là. 

 

Ensuite vine l’état de al-nafs al-lawwama (l’âme ki faire bane reproche à li-même) kot sa l’âme là alle réalise so bane erreurs. Après ki li fine succombe à so bane inspirations sataniques, sa l’âme là li regrette so bane actions et li tourne vers Allah en repentance. Kan li tourne vers Allah, li pé envie invite lors li-même ene consolation spirituelle, ki, li espérer, pou libère li de so premier l’état de al-nafs al-ammara (ki incite le mal). En vérité le Saint Prophète Muhammad (saws) fine dire : « Tous bane humains zot attirer vers le péché et le meilleur pécheur c’est celui ki repentir. » C’est sa ki fine attire Adam en premier lieu pou demande Allah pardon kan li fine récite bane mots de prières ki Allah (twa) fine enseigne li. Kan Allah fine enseigne li bane tels paroles pou cherche So pardon, alors par sa, Allah fine ouvert pour li la porte ki permette li pou vine pli près avec Li (Allah). Effectivement, pareil couma mo fine mentionner la semaine dernière, Allah content ki So bane serviteurs, après ki zot fine commette ene faute ou ene péché, zot tourne vers li en repentance. Sa repentance ki zot nourri zot là permette zot pou rentre dans royaume d’ene nouvo monde, ki loin avec lémonde de bane ignorant. En vérité, c’est bane ignorant ki persister pou vine bane cible de zot l’égoïsme. Sa lémonde de repentance là li bien pli meilleur ki zot bane l’états d’avant, et li donne zot en même temps l’espoir pou zot arrive à bane pli meilleur l’état et rang spirituelle. Le stage de “al-nafs al-lawwama” (l’âme ki accuse li-même) lie ne l’état kot zot fer bane l’exercises, kot ena fois zot réussi dans arrive à ene la paix, mais ki ensuite zot ré-commette ene faute, et zot re-demande pardon. Alors sa l’étape là ki ene l’étape essayage et fer erreur kot ensuite finalement zot alle accède à la satisfaction complète d’Allah. L’âme ki reproche li-même so bane fautes li essaye plaire à Allah avec tout so lékaire, kot li arriver tomber et fer faire bane fautes, mais ensuite li redoubler so bane zefforts pou répare so bane erreurs. Adam fine essaye bien dure pou rode le pardon d’Allah, kan li fine admette dès le début de so faute : (sa faute là c’est – li fine oublier et li fine écoute ene deuxième la voix au lieu de la voix d’Allah, et li fine prend causer Ibliss (sa 2^ème la voix là) compte plisse ki Allah. Malgré ki Allah fine prédestine li à sa, mais c’est en fait pou tester so résistance aussi comme le future Khalifatullah ki Li fine laisse li pou débrouille par li-même kan Satan fine vine vers li pou dévier li. Mais Allah pas fine trouve dans Adam aucaine résolution pou désobéir Li et alors Li fine réprimande li légèrement et Li (Allah) fine fer zot tous conné ki Li content So représentant (c.à.d, Adam, ki li de souffle d’Allah), et Li fine enseigne li bane paroles de repentance et en même temps fine fini accepter so répentir. Pareillement, kan l’homme li fer face plusieurs kalité épreuves – pou ena plusieurs bane kalités satans coumsa ki pou vini pou dévier (Allah) So bane serviteurs, mais après ki zot fine reconnaite zot bane erreurs, Allah pou accepter zot repentir et tourne vers zot avec So Miséricorde.

 

Astaire là zot bizin conner aussi ki malgré ki li paraite facile pou accède à l’état  de « l’âme apaisée », mais li vraiment difficile pou arrive à sa niveau là. Pas tous dimounes ki capave dire ki zot en paix avec zot-mêmes et avec Allah. Si nous étudier bien le Quran, nous pou remarqué ki comparé avec sa deux lézot l’états là, c’est zis avec l’âme apaisée ki Allah causé. Arrive à sa l’état là pou veut dire : ki ou en trankilité, ki li avec ou-mêmes et avec Allah ; ou ressenti la sérénité, la paix et le confort, ene tel sentiment de paix ki vine d’Allah seul. Kan ou arrive à sa l’état là, c’est en vrai dire ou fine arrive au sommet de la spiritualité et de la désirabilité d’Allah. C’est pas ene sentiment ki vine de ou tousél, mais ki vine de ou et d’Allah ensam, comme ene sel être, ki pas séparer de zot camarades. Sa l’état d’union là li nourri li-même de sentiment de la paix de sa « l’âme apaisée » là, parski c’est pas seulement le « nafs » ki en paix et satisfait, mais Allah aussi en paix et satisfait. Ene tel l’état, c’est l’état de bane amoureux, bane vrais bien-aimés – et sa l’amour là c’est entre ene serviteur et so Créateur. Sa l’étape là li appelle pou fer ene célébration de plus en plus intime (par la communion/communication divine). Sa satisfaction ki sa l’âme là gagner li vine de Allah parski tout particule dépi endans li-même criyer : « Allah Li dans moi, et moi mo en Li », mais plus tard sa effacer pou laisse conner à tout dimoune : « Allah et seulement Allah exister, pas l’âme, ni lézot kitchose ! » Ene tel l’état li ene l’état d’oubli, kot l’âme, après ki li fine gagne accès avec Allah à travers bane inspirations divine, li alle comprend ki le but de so création et le but derrière envoye Adam lors la terre après ki li fine mange le fruit défendu. L’âme dans sa l’état d’oubli et de sécurité dans l’oubli là, li envie être complètement soumis à Allah, et soumette à tous So bane volontés, même si sa bane volonté divine là zot contre la compréhension de l’esprit humain. Et sa c’est vrai connaissance li gagner et ki fer li prospérer, ki li intellectuellement et spirituellement.

 

Zot bizin comprends aussi ki c’est lors la terre même ki réussi atteindre le al-nafs al-mutmai’na (l’âme apaisée). Sa l’état là li pou les deux lémondes, mais plisse pou sa lémonde ici-bas là, parski c’est par sa l’état là ki le serviteur bien-aimé d’Allah gagne la sécurité, kot li ressenti ki Allah fine prend li dans so godi pour aussi longtemps ki li réussi maintenir sa l’état là ziska ki li trouve la mort. La soumission à la volonté d’Allah zamais li facile. Mais ene tel dimoune ki réussi accède à sa secret là li vraiment ena la chance, parski le plaisir d’Allah li trouve dans l’obéissance à Allah dans tous So bane décision, et So colère pou tombe lors celui ki haïr décision d’Allah et garde ene distance avec Li.

 

Bane prophètes d’Allah zot bane premiers pou gagne accès à sa stage là lors la terre même. Sa li coumsa parski kan zot fine soumette zot à la volonté d’Allah, pou faire tout couma Allah fine donne l’instruction, alors sa c’est ene forme de « l’âme apaisée », parski li conné intérieurement ki c’est Allah ki fine choisir zot et c’est Li tousel ki pou content et guide zot, ki li dans zot missions comme réunificateur de bane l’âmes perdu (kot zot réamène sa bane dimounes là pou adore ene sel Allah) et aussi kot sa bane prophètes là vine bane premiers candidats pou rentre dans la Cour d’Allah avec distinctions et bane pli grand dégré de mérite, malgré le fait ki zot bane humains et en tant ki humain, zot capave fer bane erreurs. Mais comme Allah li zot guide, zot pou gagne le dessus arrive séki arrive, et zot pou rentre dans jardin de plaisir d’Allah, ki li dans sa lémonde là et aussi dans Aakhérat. En plisse de sa, li ene fait ki ena parmi zot bane suivants ki arrive aussi à sa l’état extraordinaire (de l’âme apaisée) là kot zot satisfait avec Allah après ki zot fine obéir Allah et So bane prophètes et après ki zot fine vivre zot la vie d’après bane préceptes divine. Sa l’état là li l’état de la confiance ki exister entre Allah et So serviteur. Quran li rempli avec sa kot li fer appelle au Prophète (saws) et à zot bane suivants pou mette zot confiance en Li. « Mette to confiance en Allah... Allah Li suffit pou toi » - « Eski Allah pas suffit pou So serviteur ? » Alors, c’est sa bane Ulul-al-Baab (bane dimounes ki possède vrai connaissance Allah) ki réponne Allah So bane questions et zot commence par reconnaite la base de l’enseignement : ki zot nannié ditout sans Allah. Allah ena tout contrôle lors zot, et zot nek bane serviteurs soumis d’Allah.

 

De ce fait, bane tels serviteurs soumis d’Allah zot vine bane serviteurs bien-aimés d’Allah, pas zis à cause zot reconnaite la suprémacie (toute puissance) d’Allah, mais zamais zot pas oulé être séparer avec Allah. Zot vivre en Allah, et Allah Li dans zot, et quoi ki zot fer, l’amour fer zot lékaire revivre, et avec sa l’amour là, zot ena la confiance et ene la foi complète en Allah ki faire zot attane le moment kot zot pou quitte sa le monde là et accède à l’éternité. Zot trouver seulement à travers lizié Allah et zot pas garde aucaine rancune pou bane les autres dimounes ki fine recevoir bane faveurs divine. Au lieu ki zot gagne ene satan pou dévié zot, zot ena bane anges ki Allah désigner pou zot pou protège zot contre sorte de difficultés. Zot soumette zot complètement à Allah parski zot bien conner ki pli Allah satisfait avec zot, pli Li pou content zot et vine pli près avec zot. En gros somodo. Zot nourri zot-mêmes de l’amour d’Allah et zamais zot pas montrer zot pas-satisfait avec séki tombe lors zot (comme épreuves). Zot content, ki li kan zot passe par ene épreuve, ki kan zot recevoir ene faveur divine. Zot l’état is dépasse de loin l’état angélique, à cause zot possède en plusse de bane attributs angéliques, zot ena bane attributs divine ki manifester dans zot, et c’est sa ki fer zot supérieur à bane anges en statut (rang).

 

En vérité le jardin du paradis ki mentionner dans verset 31 de Surah 89 (Al-Fajr) li fer référence à paradis de l’union ki ena entre Allah et So serviteur choisi, ene tel l’union ki béni et pure. Sa jardin là li pou sa deux lémonde là, ki li lors la terre et dans Aakhérat, kot sa bane l’âme apaisée là (bane prophètes, bane vrais suivants de bane prophètes et bane UIul-al-Baab en générale) zot accède à ene satisfaction complet dans Allah et celui de Allah en zot ; et kan bane anges pou accueillir zot dans le paradis éternel (dans Aakhérat), sa bane anges là pou dire zot :

 

« Entre là-dans en paix et sécurité. » (Al-Hijr 15:47)

 

Alors séki nous bizin comprend c’est ki malgré ki Allah fine donne l’homme libre-arbitre, mais sa libre-arbitre ou volonté propre là li en vérité ene épreuve pou li. Si li servi li pour so bane propre passions, alors li pou goûte à so propre la mort spirituel, mais si li réussi percevoir bane faveurs d’Allah et servi sa pou vine pli près avec Allah en abandonnant so volonté propre pour ki li façonne li-même dans la volonté d’Allah, alors li fine effectivement arriver perce secret de la volonté d’Allah kan Allah fine décider pou donne l’homme en premier lieu libre-arbitre. Allah Li jaloux. Li jaloux ki bane dans ki Li fine insufflé So souffle pas prend Li compte et alle suive zot bane passions bien déplorable. L’âme apaisée li celui ki surpasse so propre volonté, et li fer volonté Allah vine so propre volonté, et c’est pourquoi li gagne ene place spéciale dans lizié d’Allah, et c’est pourquoi Allah adresse li directement kot Li dire li : « O toi, l’âme (apaisée) dans to bien-être! » et c’est Allah Li-même ki rassure li (sa l’âme là) de So satisfaction avec li et donne li bon nouvelle d’ene bonté ki pou durer pou toujours.

 

En vérité Allah fine révèle moi plusieurs fois sa bane versets ki mo fine expose devant zot azordi et ki mo fine fer so commantaire (89 : 28-31), et c’est mo duahs ki tous bane vrai l’âme ki capave arrête prend compte zot propre volonté, ki zot vine alors de l’avant pou embrasse la volonté d’Allah et zot soumette zot entièrement à Li tousel et zot conforme zot la vie à So désir. Souvent Mo adresse Allah coumsa : « O Mo Allah, entre nous deux, pena ni Moi ni « Saki pou moi » (et ni moi ni Toi), et malgré sa mo To serviteur, ki rempli de manquements ; Mo fer appelle à Toi pou vine pou moi dans ene tel façon ki en même temps Mo vine pou Toi, dans ene tel façon ki tous les deux, ki li paradis, ki li l’enfer vine ene nannié ditout et ki Toi tousel To reste mo Concentration et mo But. O Allah, en vérité To Le Premier et Le Dernier, To pena ni commencement ni la fin ; O Allah, content moi pou aussi longtemps ki To exister, ene tel l’existence d’amour ki pena la fin pareil couma To l’existence éternel ; laisse moi nourri moi de To l’amour et soumission à To volonté. Pécheur couma mo été, mais malgré sa To fine fer moi touche léciel de To rapprochement kot finalement To fine fer moi embrasse To Bonté. O Allah, gagne pitié lors To humble Munir Azim et le Jamaat (congrégation) de To bane serviteurs pieux mais fragile. Renforci zot par To la force et enseigne zot à travers la foi l’essence de l’amour et fer zot ressenti sa sentiment d’amour ki zis Toi capave donne zot. O Allah, laisse sa humble personne là (To Munir Azim) toujours retourne vers Toi, à To service et en soumission à Toi. » Insha-Allah. Ameen.

 

Annonce: 1. Ene lotte grand tremblement de terre de Magnitude 7.4 fine frappe Japon encore ene fois hier le 07 Avril 2011.

 

2. Ene lotte maladie, causé par bane bactérie ki résistants à toutes sortes kalité antibiotiques fine fer surface. Sa bactéries là, ki bane scientifiques appelle sa « CRKP » li résistant à tout bane antibiotiques, même antibiotique ki pli fort et ki bane docteurs donne à bane patients en dernier ressources (kan pas ena aucaine lézot solutions). Alors sa bactérie là li résister même sa antibiotique ki pli fort là. Sa nouvo maladie là ti fer surface en 2008 et li ti fatale pour 35% de tous bane patients ki ena sa bactérie là. — L’année dernière sa bactérie là fine cause la mort d’environ 25,000 dimounes entier l’Europe, et azordi jour la situation pé vine pli alarmant encore parski bane antibiotiques pas pé fonctionner pou détruire sa bane bactérie là. Sa bactérie là fine rapporté pour être présent dans 36 l’états de bane l’États Unies (en Amérique).