Text Box: بسم الله الرحمن الرحيم Khutba Jummah HAZRAT KHALIFATULLAH AL-MASSIH AL-MA’OUD Munir Ahmad Azim 08 Juillet 2011 ~ (06 Shabaan 1432 Hijri) (Résumé Khutba) Après Salam, Hazrat Khalifatullah fine commence so Khutba avec Tashahhud, Ta’uz, Surah Al Fatiha, et ensuite li fine dire: Le mot Al-Fatiha vine du verbe ‘Fatiha’ ki veut dire, dans le contexte actuelle, « Ouvert ». ‘Al’ li ene l’article défini et ‘Fatiha’ (ki ici li au féminin parski li pé réfère à Surah ki féminin dans la langue Arabe) ; alors sa l’article là pé rode dire, Sa Surah ki ouvert là, ki commence le Quran parski li le Surah ki vine en premier dans le Quran. En plisse de sa, c’est le premier Surah ki nous obliger lire dans sak Rakah (cycle) de nous Salaat (Namaz). Fatiha pas veut dire lève nous deux la mains, malgré ki li recommander ki nous lève nous deux la mains pou invoque Allah (dans Du’a) pou sakaine de nous bane besoins, problèmes ou même contentement, et li recommander pou commence bane du’as par la récitation du Surah Al-Fatiha. Surah Al-Fatiha ena plusieurs bane les autres noms couma « La maman du Quran », « La louange », « Sa ki suffit », « La Racine du Quran », et bane les autres noms. Ena guérison dans sa Surah là. Ene fois, bane Sahaba du Saint Prophète (saws) fine arrive dans ene place et fine demande so bane habitants la permission pou rester, mais zot fine refuse pou recevoir bane Sahaba là. Alors bane Sahaba fine obliger reste endehors de sa l’endroit là. Mais fine arriver ki le chef de sa bane habitants là fine tombe bien malade, et zot fine essaye fer tous pou guéri li mais zot pas fine réussi. Alors finalement zot fine approche bane Musulmans et demande zot pou donne ene traitement pour ki zot chef guéri. Bane Musulmans là fine vine vers sa dimoune malade là et fine récite le Surah Al-Fatiha lors li et missié là fine guéri par l’aide d’Allah. Bane habitants là fine alors donne ene mouton (ou plisse ki ene mouton) à bane Musulmans (bane Sahaba). Zot fine accepter sa mouton, mais avant ki zot mange li, zot fine penser ki li ti pou meilleur pou zot si zot demande le Prophète (saws) si pas li permette pou zot pou mange sa mouton là. Le Saint Prophète (saws) fine dire zot ki li permette et li fine même demande zot ki si possible garde ene boute pou li. Bien sûr, par sa requête de Nabi Kareem (saws), nous comprend ki li pas fine dire sa parski li vraiment ti envie mange sa mais pou montrer à so bane Sahaba ki li ti permette pou mange sa la viande là. (Bukhari, Muslim, et Abu Dawood) Le Saint Prophète (saws) fine dire dans ene Hadith authentique: “Le (Surah Al-Fatiha) li la maman du Quran. Li represente sept versets ki souvent répété (ki recite dans Namaz dans sak Rakah) et li le Coeur du Quran Shareef.” (Ahmad) Ena ene l’autre Hadith kot Hazrat Muhammad (saws) fine dire: “Pena aucaine Namaz pou celui ki pas recite Surah Al-Fatiha, le premier chapitre du Quran.” (Bukhari, Muslim) La signification de Al-Hamdu veut dire louange; louange li ene mot ki vaut plisse ki remerciement. Kan dire « Tout remerciements pou Allah » li bon mais kan dire « Toutes louanges pou Allah » li meilleure. Lillaahi veut dire ‘pou Allah; pou Allah tousel’ parski Allah li l’Origine de tout kitchose. Rabbil veut dire (Seigneur ou) Maître (de); Celui ki créer, Ki donne la vie, Ki donne nourriture, Ki donne la mort, Ki donne la vie après la mort, Ki retourne nous (vers Li) pou ki nous rende nous compte, et Ki donne récompense ou punition. Aalamin veut dire bane les mondes. Al-Aalamin ou Al-Alamun vine du mot Al-Alam ki veut dire bane les mondes (le mot Al-Alam li en li-même ene mot au pluriel, kot li pena ene forme singulier) et Rabbil-Aalamin veut dire Maître de tous bane les mondes: le monde de bane humains, de bane anges, et le monde de bane Jinns, le monde de bane zanimo, bane plantes et le monde minérale. Allah Li le Maître de tous dimounes, tous kitchoses, Li possède tous, absolument tout, ki li hier, au commencement, et le future, partout, et pour tous les temps. La création en entier ena seulement Allah comme Maître; pena les autres bondiés ki contrôle l’univers ou tout saki ena là-dans. Allah Li le Maître de bane créatures vivants et aussi Celui de bane morts. Li (Allah) ena pouvoir lors tout kitchose. Ar-Rahman-ir-Rahim veut dire ‘Le Très Gracieux, Le Très Miséricordieux’. Allah Ta’ala Li Le Très Gracieux, Le Très Miséricordieux. Mais faudé nous garde à l’esprit aussi ki Li vite pou fer compte et Li sévère dans donne punition. Ena ene Hadith authentique kot Hazrat Muhammad (saws) fine dire : « Si ene croyant ti conne ki kalité punition Allah fine reserver, li pas ti pou gagne aucaine l’espoir pou rentre dans Paradis. Et si ene non-croyant ti conné commié miséricorde (pitié) Allah ena, personne pas ti pou désespérer pou recevoir miséricorde Allah. » (Muslim) Maalik veut dire ‘Maître’. Yawmid-Deen veut dire ‘du Jour du Jugement’. Allah Li le Maître du Jour du Jugement. Allah Li pardonne celui ki Li oulé, Li récompense celui ki Li oulé. So statut li pli grand grand ki ene juge parski Li ena le pouvoir pou pardonne ene dimoune ki fine commette péché, mais sa li sous condition – li dépanne si sa pécheur là pas fine commette le Shirk (associé bane les autres bondiés avec Allah) – parski Shirk c’est ene péché ki Allah pas pardonner (si ene dimoune li mort dans sa l’état là). Le Jour du Jugement li ene Jour kot nous pou bizin paraite devant Allah pou réponne pou sakaine de nous bane actions ki nous ti fer lors la terre. Iyyaka naghbudu wa iyyaaka nasta-iin veut dire ‘To tousel (Allah) nous adorer et avec To tousel (Allah) nous demande l’aide’. Allah, à travers So sagesse infini fine envoye beaucoup prophètes de tous temps. Ena prophètes Allah fine envoyer avec bane Livres Sacrés couma: Hazrat Ibrahim (as) kot li ti vini avec As-Suhuf, Hazrat Dawood (as) ti recevoir Az-Zabour Hazrat Moosa (as) ti recevoir at-Taurat, Hazrat Isa (as) ti vini avec Injil and finalement le Sceau de tous bane prophètes d’Allah, Hazrat Muhammad (saws) fine recevoir le Quran. Bane messages de tous bane prophètes ti renfermer dans bane Livres Révélés. Bane messages de tous sa bane Livres Révélés zot trouve dans le Quran. Le message du Quran li trouve dans Surah Al-Baqara. Le message de Surah Al-Baqara li renfermer dans Surah Al-Fatiha, et le message du Surah Al-Fatiha li trouve dans le verset Iyyaka naghbudu wa iyyaaka nasta-iin. Sa verset là renferme l’essence de l’unicité d’Allah. Allah Li unique dans So nom et So bane attributs. Li unique dans So capacité de Maître et Li unique dans So Divinité. Pena aucaine les autres divinités excepter Allah. Le fait ki ene kikaine li croire dans l’unicité d’Allah, dans So bane noms et So bane attributs li pas suffit pou fer li vine ene Musulman. Le fait ki li croire aussi dans l’unicité d’Allah, dans So pouvoir de Maître li pas suffisant pou fer li vine ene Musulman. Li bizin absolument croire dans l’unicité d’Allah comme Divinité (c’est-à-dire, ki li absolument croire ki c’est zis Allah tousel ki mérite nous adoration), kot li ena confiance dans Allah tousel, et li tous les temps demande Allah tous kitchoses saki li bizin. Sa aussi li bien essentiel kan adore Allah. Ena beaucoup dimounes ki croire ki Allah li unique dans So bane noms et attributs et ki Li unique dans So pouvoir de Maître mais malgré sa zot donne Allah bane partenaires, zot adore les autres kitchoses ensam avec Allah. Alors zot pas qualifier comme bane Musulmans et zot tombe dans catégorie de bane ki commette Shirk et Shirk amène vers l’enfer si pas ena aucaine repentance (de sa dimoune dimoune là) et si pas ena pardon d’Allah (lors sa dimoune là). Ihdinas Siraatwal Mustaqim veut dire ‘Guide nous dans le droit chemin’ – le Chemin de l’Islam (soumission totale à la volonté d’Allah), le chemin de Iman, le chemin de Ihsan (kot nous adore Allah comme si nous pé trouve Li et si nous pas capave arrive à sa stage là, au moin, nous réaliser ki Li, Allah pé trouve nous), le chemin de la piété – At-Taqwa (kot nous bizin présent dans saki Allah fine ordonne nous pou fer et absent dans saki Allah fine empêche nous pou fer, ki li avec nous l’esprit, nous lizié, nous la bouche, la mains, lipié et partie privé.) Allah enseigne nous pou demande Li ene tel cehmin afin ki nous capave trouve le success dans sa le monde ici-bas là et aussi dans Aakhérat. Siraatwal-lazinaa an am’ta alayhim veut dire ‘Le chemin de bane lors ki To (Allah) fine envoye To faveurs.’ Sa c’est le chemin de bane prophètes et de bane serviteurs sincères d’Allah, bane ki jouir de la protection d’Allah, bane lors ki pena ni frayeur ni chagrin. Ghayril Magzuubi alayhim veut dire ‘pas le chemin de bane lors ki To colère fine tomber.’ Sa li pé fer référence à bane ki ti recevoir le Tauraat mais ki pas fine suive li mais ki fine commette bane injustices, immoralités et bane atrocités. La colère d’Allah li lors zot à cause zot fine touye beaucoup de bane prophètes d’Allah. Walaz zwaliin veut dire ‘ni de bane ki fine perdi le droit chemin et ki fine égarer’. Sa c’est bane dimoune ki ti recevoir Injeel mais zot pas fine suive li et zot ti pé approuve directement ou indirectement bane injustice, bane immoralities et bane atrocities. C’est aussi bane ki fine crié Hazrat Issa (as) comme ‘garçon Bondié’, kan en fait Issa garcon Maryam ti seulement ene prophète d’Allah. Zamais li ti dire dimoune adore li mais li ti toujours enseigne zot pou adore Allah tousel sans zamais donne Li bane partenaires et pas adore bane fausses bondiés – adore seulement Allah. Dans ene Hadith authentique par Muslim, Abu Huraira fine rapporter ki Hazrat Muhammad (saws) fine dire: “Allah (swt) fine dire :“Mo fine divise la prière entre Moi et Mo serviteur en deux parties – la moitié pou Moi et la moitié pour Mo serviteur et Mo serviteur pou recevoir saki li demander : Kan mo serviteur dire Al-Hamdu lillahi Rabbil ‘Aalameen – Tous louanges pou Allah, le Maître de tous bane lémondes, Allah dire : “Mo serviteur fine fer Mo louanges”. Kan li dire Ar-Rahman-ir-Rahim – Le Très Gracieux, Le Très Miséricordieux, Allah dire : “Mo serviteur fine glorifié Moi” et kan le serviteur dire Malik-i-Yawmid-Deen –Maître du Jour du Jugement, Allah dire : “Mo serviteur fine fer Mo louanges” et kan li dire Iyyaka naghbudu wa iyyaaka nasta-iin – ‘To tousel (Allah) nous adorer et avec To tousel (Allah) nous demande l’aide’, Allah dire : ‘Sa c’est entre Moi et Mo serviteur et Mo serviteur pou recevoir saki li fine demander’; Kan li dire Ihdinas Siraatwal Mustaqim Siraatwal-lazinaa an am’ta alayhim Ghayril Magzuubi alayhim Walaz zwaliin) – ‘Guide nous dans le droit chemin, Le chemin de bane lors ki To (Allah) fine envoye To faveurs, pas le chemin de bane lors ki To colère fine tomber ni de bane ki fine perdi le droit chemin et ki fine égarer.’ Allah dire: ‘Sa li pou Mo serviteur et Mo serviteur pou recevoir saki li fine demander’.” (Muslim) Dans ene l’autre Hadith authentique, le prophete dire: “Kan Imam (dans Salat) dire: “Ameen”, zot aussi (wki derriere li) dire “Ameen” à cause celui ki so “Ameen” coincide avec “Ameen” de bane anges li pou être pardonner pou so bane péchés.” Sa veut dire ki Allah pardonne celui ki so “Ameen” coincide with the “Ameen” de bane anges kan le Imam fini recitation du Surah Al-Fatiha dans Namaz. Sa c’est en fait bane premiers rayons de lumières ki Surah Al-Fatiha donne nous. Bien sur, ena encore bane explications pli profonds encore, pou different niveaux d’études – couma mo fine détaillé dans mo Tafisr-ul-Quran – prend dépi l’étude pli simple à celui ki impé pli profond, mais ici mo fine limite moi à sa quelques explications là afin ki nous bane frères, soeurs et zenfants capave comprend bel importance du Surah Al-Fatiha et ki zot lire Surah Al-Fatiha pas seulement dans Namaz, mais kot sa sa zot été, ki li kan zot diboute, assizé, pé marcher, avant dormi etc. Alors ki Allah (swt) accepter nous bane du’as et recompense nous dans sa le monde ici-bas là et dans Aakhérat. Ameen. “The perfect mind comprehends not imperfection. It derives pleasure from Source Divine It shelters faith in the furthest compartment, Willing the heart to be pleased with love anew; From the start of the Swell of submission The mind comprehends not the Purpose Divine. Of the world it knows no other, Except the one whom God makes him see through the wonders of his capabilities; Islam is his ideal Islam is his focus Perfection over perfection!” Traduction : L’Esprit parfait pas comprend imperfection, Li gagne so plaisir de Source Divine, Li préserve la foi dans pli profond de li-même, Kot li encourage le cœur encore ene fois pou satisfait avec l’amour (pou apprécier l’amour) ; Prend dépi commencement kot la soumission commence développer dans li, L’esprit (simple) pas comprend le But Divine, De sa le monde là li pas conne nannié d’autres (li conne zis sa le monde là), Excepter celui ki Bondié fer li trouve à travers bane merveilles de so bane capacités ; L’Islam c’est so idéal, L’Islam c’est so objectif Perfection lors perfection ! (Munir Azim ~ Reçu en anglais le 22 Juin 2011)