بسم الله الرحمن الرحيم

 

Khutba Jummah

 

HAZRAT KHALIFATULLAH AL-MASSIH AL-MA’OUD

 

Munir Ahmad Azim

 

09 Décembre 2011 ~

(13 Muharram 1433 Hijri)

 

(Résumé Khutba – 3^ème Partie lor la Polygamie)

 

Après Salam, Hazrat Khalifatullah fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

فَانكِحُواْ مَا طَابَ لَكُم مِّنَ النِّسَاء مَثْنَى وَثُلاَثَ وَرُبَاعَ

 

...Fan-kihuu maa taaba lakum-minan-nisaaa-‘imasnaa wa sulaasa wa rubaa

 

« ...Mariez avec séki faire zot plaisir, bane madames, deux, ou trois ou quatres. » (An-Nisa 4: 4)

 

Depuis bien longtemps, surtout dépi l’Islam fine apparaite lors la scène comme ene alternative crédible, comme ene bien meilleur choix comparer avec le Judaïsme et le Christianisme, la polygamie fine être ene sujet de bane plusieurs débats entre bane adhérents de l’Islam et le Christianisme. Bane savants Chrétiens fine bien souvent critique l’Islam à cause li permette sa pratique là (la polygamie) dans limites commandement divine ki trouver dans le Quran Shariff, mais li regrettable pou constater ki bane savants Musulmans pas fine capave prend défense sa injonction divine là ; zot fine pluto présente zot excuses ki ena ene tel la loi dans Quran, au lieu ki zot prend défense sa pratique de la polygamie là.

 

Dans sa Khutba là, mo pou fer par l’aide d’Allah ene étude comparative lors le concept de la polygamie du point de vue de Judaïsme, Christianisme, l’Hindouisme et l’Islam. Mo fer ressortir toutefois ki tous sa bane références ki mo pou mette devant zot concernant bane prophètes ki mentionner dans la bible et bane prophètes dans l’Hindouisme, alors sa bane référence ki ena dans la bible et dans bane écrits Hindou pas nécessairement réflecter ou ena ressemblance à bane la vie de sa bane prophètes là, surtout kan nous compare sa avec séki Quran dire.

 

Plusieurs madames pour ene missiés fine pratiquer par bane dimounes depuis bien bien longtemps, avant même l’avènement de l’Islam. Dans plusieurs cas, li pas ti zis permis, mais li ti ena so l’importance, kot sa pratique ti justifier. D’après version la bible, madame de (Abraham) Hazrat Ibrahim (as), Sarah (ra) ti ene madame stérile et alors Ibrahim (as) fine prend (Hagar) Hajra (ra) comme deuxième épouse et c’est sa madame là même ki par la suite fine enfante Ismaïl (as). Sa référence là li trouve dans la bible (Genèse 16: 3) et Hazrat Ibrahim (as) fine prend sa deuxième épouse là afin ki le Seigneur capave accorde li l’enfant promis de so propre semence. Plus tard (toujours d’après la bible), Ibrahim (as) fine prend ene l’autre madame Ketura (Genèse 25: 1) et possiblement li fine prend d’autres madames encore (Genèse 25: 6).

 

Si nous guette toujours d’après la bible, nous trouver ki bane Chrétiens considère Jacob (Yacoob) comme, « garçon sacré de Issac », alors zot (bane Chrétiens) penser ki c’est à travers so semence ki « le salut de la race de l’homme pou réaliser ». Mais malgré ki zot pense sa, mais zot présente bane excuses pou défendre Jacob kot zot dire ki Jacob « fine trické pou pratique la polygamie par so beau-père, Laban. » Mais seulement sa excuse là li pas paraite valide. Jacob (Yacoob) fine demande la main de Rachel (deuxième fille) en mariage de Laban seulement quelques heures après ki li fine marié avec Léa (fille aîné). Et Jacob fine marié avec Rachel comme deuxième épouse dans l’espace d’ene semaine de so premier mariage (Genèse 29: 25/28). Li fine ensuite alle marié avec bane servantes de so deux madames, Bilha et Zilpa. (Genèse 30: 4/9)

 

C’est par en consékances de so arrangement avec so beau-père Laban, ki ti croire ki Jacob fine cokain so bane bondiés ki Laban fine fer Jacob promette pou pas prend bane les autres madames en dehors de saki li fine fini ena (Léa, Rachel, Bilha, Zilpa) – (Genèse 31: 50). Dans ene l’autre place dans la bible nous trouver ki David (Da’oud) fine marier bane madames, ene derrière l’autre pendant ki li ti pé reste dans Hébron Jérusalem, et d’après bane estimations prudents (pas sure), li (David) connu pou ena ene harem de 99 madames. (2 Samuel 3: 2/5, 2 Samuel 5: 13 and 1 Chroniques 16: 3). Salomon quant à li fine casse tout records kot li fine ena (d’après la bible) 700 madames et 300 concubines. (1 Rois 11: 4)

 

Moïse (Moosa), le grand prophète biblique fine amène la Loi, et le Christ (Jésus) kan li fine vini, fine confirmer ki li pas fine vini pou abolir la loi de Moïse , mais pou accompli li (Matthieu 5: 17). Dans cadre de sa bane la lois là, alors Jésus fine dire ki ziska si les ciels et la terre passer, ni ene boute mot ou ene seul trait de lettre pas pou disparaite (Matthieu 5: 18) Alors li claire dans sa morceau la bible là ki Moïse pas fine mette aucaine interdiction contre la polygamie. Au contraire, ena bane preuves ki exister ki Moïse fine donne bane instructions pou régularise la polygamie dans ene bon façon.

 

« To pas pou prend sœur de to madame, pou excite ene rivalité, en découvrant so nudité à côté de to madame pendant so la vie. » (Lévitique 18: 18). 

 

Ena bane commentateurs de la bible ki penser ki sa verset là contenir ene interdiction à la polygamie, kot zot avance sa argument là ki « sœur » veut dire seulement « ene épouse » ki ene dimoune fine déjà marier. Péna toutefois aucaine passages dans bane écrits en favours de bane l’opinions ki bane dimounes ki contre la polygamie.

 

Commandement dans Éxodes (21: 10) fer li obligatoire pou ene z’homme ki pratique la polygamie pou traite so bane madames avec égalité et pou donne zot zot nécessité de la vie : si li prend ene l’autre madame ; alors faudé pas li (missié là) diminuer (madame là) so manger, so l’habillement et so bane devoirs de mariage. Moïse pas fine zis protège bane privilèges de bane épouses (madames légales) mais li fine aussi garanti droits de bane zenfants ki prend naissance dans bane ménages polygamique (Deutéronome 21: 15).

 

Si la polygamie ti limité par bane la lois morales, alors bane zenfants de bane secondes épouses ti pou défini comme bane zenfants illégitimes ; parski zot fine né en dehors de l’institution permis du mariage. Dans sa cas là, sa bane zenfants là pas ti pou capave exerce zot droit à l’héritage de dibiens de zot papa couma li permis par la loi. La bible pas prive bane zenfants de bane deuxième madames à zot droits pou hériter de bane dibiens de zot papa (Deutéronome 21: 15/17) et sa li ene preuve kot nous capave tire la conclusion ki bane la lois morales ki fine institué pou le bienfait de zenfant (descendance) béni de Isaac (Ishaq) pas interdit la polygamie mais au contraire sa bane la lois là fine fer provision pour la polygamie.

 

L’histoire de bane prophètes et lérois Israelites ki fine vine après aussi li suggère ki la polygamie ti permis par bane la lois divines ki fine enseigner à bane zenfants d’Israel. David (Daoud) ti pé pratique la polygamie et so bane garçon Nathan et Salomon zot ti sorti tous les deux de deuxième madame de David ki ti appelle Bethsabée. Et c’est à travers descendances de David à travers zenfants de so deuxième madames ki fine retrace lignée de bane parents de Jésus, Marie et Joseph.

 

Salomon, ti gagne la charge divine légué par so papa pou garde bane commandement de « Jéhovah », so Seigneur, en marchant d’après So bane l’instructions, kot li ti bizin préserve So bane règlements et So bane commandements. Alors de ce fait li (Salomon) pas ti pou capave multiplier bane madames si bane telles règlements et commandements ti interdit la polygamie. C’est en fait à cause Salomon ti ena ene l’obéissance extraordinaire envers so Seigneur ki so Seigneur ti bien content li et fine appelle li « Jedidiah » (c’est-à-dire, bien-aimé de Dieu). Jephthah, le fils de Salomon d’ene deuxième épouse, fine déclarer dans la bible ki li ti vine de Jéhovah (Bondié) comme ene libérateur (1 Samuel 12:11).

 

En fait, la plupart de bane prophètes et bane les rois de la bible zot ti bane dimounes ki ti pé pratique la polygamie en grand nombres. Si la polygamie pas ti permis dans limites de bane la lois ki fine prescrire par le Seigneur, alors sa bane prophètes ou lérois bibliques là pas ti pou capave réclame zot droit ki zot bane membres de la congrégation (l’appartenance) de Dieu.

 

Si nous guette ene coup d’œil dans l’histoire de l’Hindouisme, nous trouver ki Rukmini (ene Princesse) ti premier madame principale de Krishna. Comme Krishna ti aussi ene léroi, sa madame là ti so la reine et sa madame là ti ena beaucoup l’influence. Rukmini ti considéré comme ene manifestation de Lakshmi, ki bane Hindous prend comme « déesse » de la fortune. C’est après ki sa princesse là fine supplier Krishna pou sauve li d’ene mariage ki li pas content ki Krishna fine alle sauve li et marier avec li. Sa zistoire là li décrire dans Bhagavata Purana.

 

« O Héro de parmi bane Kurou... Govinda (Krishna) fine marrier avec léroi Bhishmaka so tifille, Vaidarbhi, ki ti ene expansion directe de (Lakshmi) déesse de la fortune (Sriyo maatraam). » (Bhagavata Purana 10.52.16)

 

Li aussi rapporter ki en plus de Rukmini, Krishna fine aussi marier encore madames couma Satyabhama et Jamvanti. L’Hindouisme aussi accepter relation d’amour ki ti exister entre Krishna et Radha, ene de bane gopis avant so mariage avec Rukmini. Bane les autres dimounes zot, zot de l’opinion ki avant Rukmini, Krishna ti fine fini marier avec Radha dans ene mariage secret. Et d’après ene l’histoire exagérer de l’Hindouisme, sa fine répanne ki Krishna ki marier plisse ki 16,000 madames.

 

La polygamie en fait zamais pas fine spécifiquement interdit dans aucaine religion par commandement divine. Bane Chrétiens zot pousse sa argument là devant ki le fait ki Bondié fine originalement créer ene homme et ene femme comme mari et femme afin ki zot fine ene sel la chair, alors li pas ti dans l’intention Bondié pou instituer la polygamie, mais sa argument là li pas soutenu par bane évangiles – et même dans bane écrits de Paul ki paraite fine change dans ene grande mesure bane l’enseignement de Jésus.

 

Voilà la loi ki Jésus Christ fine explique dans so Sermon lors montagne : « Et mo dire zot, celui ki mette de côté so madame, excepté pou alle vers fornication, et alle marier ene l’autre ; et celui ki marier li (madame) ki fine mette de côté, commette l’adultère ». Sa parole là li pas donne aucaine indication ki fine place ene interdiction ou restriction lors pratique de la polygamie.

 

Sa bane paroles de Jésus là, couma li établi dans l’Évangile de Matthieu (Chapitre 19), dans Mark (Chapitre 10) et Luc (Chapitre 16) zot fine être prononcé en consékance d’ene dialogue ki li fine ena avec bane Pharisiens arrogants de so l’époque. Nous bizin garde à l’esprit (toujours en référence à la bible) ki Jésus ki particulièrement insistant dans so bane paroles au cours de so Sermon lors montagne, kot li dire ki li fine vini pou accompli la loi de Moïse et non pas pou aboli li. Li dire : « Pas penser ki mo fine vine détruire (ou abolir) la loi ou bane prophètes. Mo fine vini non pas pou détruire mais pou accomplir. Parski en vérité, mo dire zot, ziska ki léciels et la terre pas passer, ni ene parole ou ene trait de lettre pas pou disparaite. » (Matthieu 5: 17/18). La loi ki li ti fer référence c’est la loi de Moïse. En passant, aucaine de bane prophètes ou lérois avant Jésus pas ti paraite fine interdit ou mette ene restriction lors la polygamie. Au contraire, couma nous fine trouver depuis le début de sa Khutba là, ena assez preuves dans Ancien Testament ki indique ki polygamie ti permette dans bane limites de bane la lois ki bane prophètes d’avant fine amener.

 

Si capave donne crédit à Jésus dans saki li fine dire dans so déclaration dans Matthieu 5 : 17/18, alors la possibilité ki li fine interdire la polygamie pas ti pou non seulement tiguitte mais impossible ! Parski dans le Sermon de Jésus lors montagne li fine dire (toujours d’après la bible): « N’importe ki sanlà pou casse même ene de sa bane commandements là, et li alle montrer dimounes sa (c’est-à-dire, couma pou casse commandements Bondié), alors li pou ene connu comme ene moins que rien dans le royaume de bane léciels. » (Matthieu 5 :19)

 

Comme ene règle générale, sak religion fine reconnaite l’union d’ene missié et d’ene madame comme ene forme valide de mariage, mais dans bane circonstances exceptionnelle, tous bane la religions fine permette ki ene missié marier avec plisse ki ene madame. L’Islam li pas ene exception à sa règle là. Multiplication de l’espèce humain ti ene plan divine : Et Bondié fine dire l’homme : « Vine fertile et multiplier (to l’espèce) » (Genèse 1: 28)

 

Le mariage fine alors ordonner comme ene bon l’arrangement pou réalise et accomplir sa but divine là. Mais malgré sa, ena certains conditions imprévisible ki arriver dans ene mariage kot le but de sa l’union divine là li capave pas réaliser par bane circonstances ki au-delà de contrôle de l’homme.

 

Dans plusieurs situations, capave découvert ki ene madame li pas capave gagne zenfants. Dans sa cas là, réalisation de sa but divine là (Genèse 1: 28) li vine impossible pou atteindre à moins ki polygamie permette. Bane restrictions banales ki imposer lors l’humanité (par dimounes même) li capave frustrer le désire naturelle et légitime de l’homme pou gagne ene zenfant ki pou succède li et pou perpétuer so nom ; à moins ki missié là choisir pou divorce so madame stérile ou malade pou ene faute ki pas vine de li (madame là). Sa encore pou ene brèche (ene manquement) dans la loi parski ene résultat de cause, parski tout le but de la loi, pou considérer comme illégitime et alors sa pou réduire en poussière le but même du mariage.  Dans bane les autres circonstances, capave ena bane tel conditions ki arriver kot ene madame capave souffert d’ene malade permanent ki fer li incapable pou accompli so bane devoirs physique dans le mariage. Alors l’incapabilité d’ene missié pou réussi combatte so bane passions charnelle capave amène li vers ene la vie immorale. L’adultère li non seulement ronge ene société civilizé mais en fait li fine décrire comme ene péché contre Bondié (Genèse 39: 9) Sa péché là li connu comme responsable pou risse l’âme d’ene dimoune vers so propre la ruine (Proverbes 6: 32/35)

 

A moins ki la polygamie li permette dans bane tels circonstances, alors ene dimoune infortuné pou soit forcer pou ena recours à ene option des plus détestable, le divorce ou sois li gagne recours à l’adultère. L’Islam détesté tous les deux options. Le divorce fine détesté dans l’Islam couma li fine être détester dans le Judaïsme et le Christianisme. L’Islam envie établir ene excellent forme et système de société dans sak tournant de la vie, et alors kan polygamie vine ene pratique permissible, sa li en effet fer et donne l’espoir pou fer la société vine ene tel société morale ki concerner par l’état de l’homme (pou empêche li tombe dans péché. Alors kan la polygamie li permette, ene tel système de société vine possible. En plus de fonction pou empêche pratique detester du divorce et pou rentre dans bane crimes morales, la polygamie li pas seulement consolide le manque d’hommes d’ene communauté, mais li aussi fer provisions de bane bons missiés pou bane veuves ki envie remarier et li donne aussi protection à bane orphelines (ki dans la peine) ki zot bane gardiens « Qawwam » envie marier zot. 

 

Bane l’effets de bane la guerre et violence lors la société de l’homme fine toujours vine ene poids lors l’humanité. L’Institution de la polygamie dans l’Islam ena le but pou régler sa bane situations bien sérieux là surtout avec saki capave arriver après ene la guerre kot bane missiés d’ene nation capave réduire en nombre kot sa capave menace colonne vertébrale même d’ene société, kot sa capave appelle vers ene destruction naturelle. Pli grand nombre de bane madames comparer avec bane missiés zot ene résultats de bane pertes de vie ki expériencer dans bane champs de batailles, kot sa bane tel bataille là zot laisse derrière zot ene grand nombre de bane veuves et d’orphelin/orphelines. Dans la majeure partie des cas, sa bane tels situations là amène la nation vers ene dégradation sociale et morale. Bane madames ki privé d’ene l’occasion pou trouve ene missié pou occupe de zot, de zot manger et boire, alors sa bane madames là forcer pou alle rode zot propre la vie, et dans beaucoup des cas, zot bizin travaille pou nourri zot bane familles au lieu de reste la caze et occupe zot foyer. Alors kan sa bane madames là forcer pou alle dehors pou gagne zot la vie, alors zot force pou abandonne d’ene certaine manière et pour quelques heures temps zot bane jeunes enfants et souvent aussi zot bane parents âgés afin ki zot (bane madames là et aussi bane jeunes filles) capave arrive à l’heure dans zot bane places de travails kot zot ena pou roule ene moulin pou ki zot capave survivre dans sa la vie là.

 

De ce fait permission pou ena plusieurs madames ena dans l’Islam pou ki bane missiés capave réponde l’appel à sa bane challenges et exigences imprévisible là, ki li dans zot propre la vie et dans la vie de bane madames et filles ki fer face ene mauvais situation. Plus grand caractéristique intéressant dans le Quran Shareef ki deal avec polygamie c’est ki l’Islam paraite au courant et fer provisions de tous sa bane possibilités (de problèmes) là ki pou apparaite dans le future. Et c’est pou réduire bane tels souffrance de bane madames et filles ki la polygamie pas fine non seulement vine permis (dans l’Islam) mais aussi li vine ene commandement.  L’Islam li sans aucaine doute ene tel religion ki fer provisions pou ki l’homme et la femme pas tombe dans bane situations difficiles. C’est en consékances de sa nature pratique et pragmatique de la philosophie islamique ki la polygamie fine vine permis et acceptable.

 

Kan nous analyse tout sa ki mo fine dire dans sa Khutba là, l’Islam paraite le seul religion de parmi le 4 : l’Hindouisme, Judaïsme, Christianisme, et l’Islam, ki pas bizin présente bane excuses à bane les autres religions pour bane excellents l’enseignements ki entoure la polygamie. La polygamie dans l’Hindouisme ti pé pratiquer par bane lérois et bane les autre indiens ki ti ena le moyen pou prend soins de plusieurs madames. Tandis ki polygamie dans le Judaïsme ti sans limite, bane dimounes ki explique bane enseignements de Jésus fine force zot société pou fer le contraire – dans les deux cas, c’est deux extrême ; ene trop beaucoup, et l’autres pas assez ! L’Islam en fait offert ene compromis entre sa deux l’extrêmes là et li (Islam) amène la civilité (bon manière et respectabilité) dans l’institution du mariage et de la polygamie. Tandis ki l’Islam décourage prend ene trop grand nombres de bane madames couma li ti permette dans l’Hindouisme et  le Judaïsme, li aussi offert bane solutions pratique à bane problèmes ki bane société Chrétiens pé fer face.

 

Mo arrête lors sa sujet de polygamie là là-même. Mo espérer ki tous sa bane raisons essentiels, permissions et commandement là pas zis fer bane missiés accueillir la polygamie, mais aussi bane madames ki bien souvent zot ena bane pensée négatifs lors sa sujet là. Ki Allah aide tous les deux, missiés et madames afin ki zot accueillir bane commandements de Dieu et ki zot pas répulsé par So bane la lois divines ki fine instituer pou zot propre bien. Insha-Allah, Ameen.