Text Box: بسم الله الرحمن الرحيم Khutba Jummah HAZRAT KHALIFATULLAH AL-MASSIH AL-MA’OUD MUNIR AHMAD AZIM Munir Ahmad Azim 11 Février 2011 ~ (07 Rabi’ul Awwal 1432 Hijri) (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine dire: ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُم بَعْضَ الَّذِي عَمِلُوا لَعَلَّهُمْ يَرْجِعُونَ ۝ Zaharal-fasaadu fil-barri wal-bahri bimaa kasabat ‘aydin-naasi liyuziiqahum ba’-zallazii amiluu la-‘allahum yarji-‘uun.   “Corruption fine vine lor la terre et dans la mer ; bane actions dimounes même fine mérite sa, et Allah fine faire zot goûte (conséquences) en partie zot propre actions.” (30 : 42) Mo Khutba Jummah pou basé exclusivement lors saki pé passé dans Jamaat Ahmadiyya de l’Ile Maurice. Dépi certain temps, pé tende bane causer ki pé circuler dans l’air, bane magouilles financier dans Jamaat Ahmadiyya Maurice. Mais kan mo fine apprane ki ene quelqu’un dépi Londres fine vini pour enquêter lors séki fine passer, à ce moment-là mo penser définitivement bizin ena quelque chose fine passé aussi grave pour le Jamaat. Tous les temps ti dans mo pensé sa, ki bizin « put the right man in the right place”. Dépi ki sa soi-disant Amir là fine nomme li comme Amir Jamaat Ahmadiyya de Maurice, capave faire ene bilan lors so administration négative, beaucoup de magouille, fraude, mensonge, abus de pouvoir, tabligh lors bane l’Iles floppe, abus lors l’argent Jamaat pour voyager dans tous pays, kot Monsieur bizin assister tous Jalsa Salana, Jalsa Salana de Maurice pé bizin faire dans bane grand, grand la salle ki coûte bien cher pour faire sa trois jours, amuser avec l’argent Jamaat et li gagne protection de so bane alentours et aussi de bane ki trouve à Londres (Angleterre). En l’an 2000 même li ti commence faire bane complots contre moi, kan so beau-père et ene missionnaire pakistanais ki fine faire Jamia 25 ans de l’expérience alle Seychelles, kot par la grâce d’Allah mo ti le premier pour alle établi Jamaat dans Seychelles et zot jalousie fine manifester, couma ene dimoune couma moi fine alle faire ene travail pareil. Voilà kan mo fine retourné, li envoye sa missionnaire Pakistanais, et so beau-père alle là-bas vire tout en-bas là-haut et dire ki péna Jamaat là, li et sa deux là aussi faire rapport contre moi avec le 4ème Khalifa à l’époque, pou prend bane sanctions contre moi. Insha-Allah, mo pou écrire ene livre lors tous so magouille ki li fine faire contre moi et aussi contre Zafrullah Domun Saheb ki pendant 1988 à 1998 ti Amir Jamaat. A cause Zafrullah Domun Saheb ti à l’écoute de mo bane révélations ki mo ti pé recevoir d’Allah à l’époque, et kot li même li ti le premier dimoune ki ti pé note mo bane révélations. Et voilà ki la fin Décembre 2000, sa soi-disant Amir de Maurice là envoye ene rapport contre moi et Zafrullah Domun Saheb et le 01 Janvier 2001, nous tous les deux endehors Jamaat – tous Ahmadis conné, mais nous deux pas conné – Insha-Allah, si Allah donne moi le Tawfiq, mo pou explique sa bien en détail. Et voilà prend le 01 Janvier 2001 li amène so campagne de haine, li et so bane Mullahs contre moi et Zafrullah Domun Saheb, et sa ziska zordi ! L’autre zaffaire ki sa fine bien chagrine moi c’est kan mo fine tender ki ene tifille invite so maman pour marriage so tifille (ki tifille là trouve dans l’Association Ahmadiyya) et maman là trouve dans Jamaat Ahmadiyya Al Mouslemeen. Kan sa soi-disant Amir là fine entende ki fine donne ene invitation à sa vieux maman là, li fine donne bane directives bien dure pou aller rasse sa invitation de la main de sa maman là. Ki kalité sa maman là fine souffère sa moment là, dans ki désespoir et souffrance sa léroi imbécile là fine mette sa maman là. Paz zis li ene léroi imbécile, mais li ene hypocrite et infidèle ! Sa soi-disant Amir là fine menacer ki li pas pou vine assister mariage et pas pou faire mariage. Mo demande moi-même sipa sa même ki Hazrat Massih Maoud (as) so l’enseignement sa ! Ene dimoune coumsa eski li mérité d’être ene Amir du Jamaat Ahmadiyya de Maurice ? Et lors là li faire tous dimounes peur li, kot li-même li nek ene créature et Allah ena pouvoir dévire li enbas là-haut ! Mais laisse moi dire zot mo bane frères, sœurs et zenfants, ki à la lumière de verset Quran ki mo fine lire au commencement de mo Khutba, létemps ki nous pé vivre, c’est létemps de grand tracas, de désespoir, de grand panique, pour qui sanlà ? Pour le pharaon de sa siècle là, et bien sûr pour so bane alentours aussi, so bane yes-men, et supporteurs ! Effectivement couma sa verset Quran spécifié, la CORRUPTION – Corruption fine rentre en éruption couma ene grand volcan au milieu d’ene version mondaine de mo maître Hazrat Massih Maoud Mirza Ghulam Ahmad (as). Jamaat là fine vine couma marionnette. Péna aucaine sentiment de spiritualité de dégager de sa Jamaat là excepter pour quelques dimounes, parski mo pas capave blâme tous Ahmadis dans l’Association Ahmadiyya parski là-dans ena dimoune ki servi zot l’esprit pou analyse bane magouilles d’ene soi-disant Amir Jamaat, et zot ena le courage pou dénonce li. Mais eski sa li suffisant ? Zis condamne li et pas faire nannié ? Mo espérer ki sa dimoune ki fine vine faire l’enquête là, mo espérer ki li ena Taqwa dans so lécoeur et ki Ie 5ème Khalifatul Massih prend décision couma Allah et So prophète (saws) fine enseigner. Mo espérer ki sa pas touffé et ki pas jette dans poubelle, sinon zot conséquences pou bien grave dans lizié d’Allah. Bane abus de pouvoir fine pendant lontan faire le bonheur de quelques chefs mais en résultat de sa, zot conséquences c’est vraiment ki zot récolter la misère et le désespoir, surtout kan zot bane actions fer zot commette bane pli pires crimes, kot zot pas écoute zot conscience et zot pas fer zot devoir envers zot peuple, mais ici dans sa cas là, ene soi-disant Amir d’ene Mouvement spirituel ki concerné, kot so devoir principale ti bizin en premier lieu envers Allah et pou bien administrer le Jamaat du Messie ki fine vini avant moi. Alors corruption fine répande dans Jamaat Ahmadiyya à cause de séki la mains de Ameen Jowahir fine envoyer de l’avant, et Allah pou fer li et so bane yes-men (so alentours) goûte conséquences de zot bane actions, mais eski ene jour zot pou repenti et défaire zot bane mauvais actions ? Eski zot pou change zot la peau crocodile ki zot fine enfile lors zot pou cokain Jamaat de so l’argent ? Même l’argent ki représente bane sacrifices de bane Ahmadis ki pauvres et ki pena beaucoup moyens ? Kan zot guette so l’apparence ange, bane Ahmadis fine prend zot soi-disant Amir de Maurice couma bondieu lors la terre, malgré ki zot conne très bien so bane magouilles, et alors, avec zot propre conscience, zot reste ferme lors zot point de view et zot conditions – zot servitude ki ressembler esclavage dans l’époque de Hazrat Moussa (as). Pareil couma bane Bani Israïl, bane Musulmans Ahmadi azordi jour, malgré ki zot conne bane cruautés, double langages, bane magouilles, hypocrisie and soi-disant attributs divines d’ene soi-disant pharaon tout-puissant de sa l’époque là, malgré zot conne tous sa là, zot accepter soumette zot à so bane inventions et bane l’instructions non-islamique et pour obéir li au lieu de suivre le Moussa de sa l’époque là. Bane Bani Israël, malgré ki zot sous servitude (esclavage) de Pharaon, malgré zot condition déplorable, kan Moussa (as) fine vine vers zot pou libère zot de zot esclavage, zot fine prend l’appel de Moussa (as) avec méfiance et rempli de doutes (excepter ene poigné dimounes) et zot fine mette lors li ene tas blâmes, mais seulement Allah fine efface tous sa bane blâmes là et fine montrer so supériorité comme l’Envoyé d’Allah lors ene simple dimoune ki mortelle et imbécile ki fine prend li pli supérieur ki Allah et So prophète. Pareillement, le pharaon de sa siècle là, malgré ki li sous l’autorité d’ene Khalifa, li pé prend li-même comme pli supérieur et li fer so soi-disant bien-aimé Khalifa vine ene marionnette dans so la mains. En vérité Allah fine décrire sa bane kalité dimounes là dans Quran : “Zot prend zot grands prêtres et zot moines comme zot maîtres, au lieu d’Allah.” (9 : 31) “O ou ki ena la foi! Parmi bane prêtres et moines ena beaucoup ki mange du bien les autres, par injustice, et ki barre dimounes dans chemin Allah. Ena aussi ene bane ki amasse l’or et l’argent, et pas dépense li dans chemin Allah. Annonce zot ki pou ena ene punition douloureux pou zot.” (9 : 34) Par so grâce infinie, Allah fine envoye So propre Khalifa (ene Khalifatullah) avec ene guide et ene Jamaat de la vérité, pour faire li briller lors tous les autres Jamaat ki exister dans le Oummat-é-Muhammadiyya (saws) et du Jamaat de Hazrat Massih Maoud (as), même si sa pas faire plaisir bane hypocrites, bane l’ennemies et bane malfaiteurs. Dépi lontan, fine ena beaucoup magouilles (au niveau finance) dans l’Association Ahmadiyya dans Maurice. Fine ena beaucoup cas kot bane l’argent par grande kantité fine prend dépi fond Jamaat pou bane tels dépenses ki capave acheter dans moinse l’argent de séki fine réclamer officiellement. Dans l’histoire de l’Association Ahmadiyya de Maurice, fine ena bane fraudes ki fine fer par bane ki en charges de sa bane fonds là, bane tels l’argent ki manqué de bane reçus et bane tels l’argent ki manifesté nek ene sel coup dans la vie de bane dimounes ki avant ti pé vivre ene la vie modeste. La gourmandise li en vérité ene de bane attributs de satan kan dépasse tous limites là-dans, parski eski c’est pas gourmandise pour gagne l’honneur et distinction de Allah ki fine fer Ibliss revolté contre Allah. C’est sa même gourmandise pour gagne pouvoir, ensam avec l’arrogance ki fine fer li alle vers so l’égarement. Mais malheureusement dans l’Association Ahmadiyya, malgré bane grands fraudes ki fine ena, pas fine ena bane sanctions sévères contre sa bane dimounes ki fine fer main basse lors l’argent zot propre Jamaat, ene tel l’argent ki sakaine fine contribuer pour le progrès du Jamaat. Ou eski zot pé penser : “Ki fer mo pas cokain dans mo propre Jamaat parski li ena trop beaucoup l’argent. Le Khalifa pé fer létour du monde, kifer pas moi? Kifer mo pas jouir l’argent ki bane membres du Jamaat fine contribuer et enrichi moi et mo bane familles avec sa ? Kifer mo pas fer couma bane politiciens ki cokain l’argent pou profite grandissement so dynastie? Au lieu prend bane sanctions sévères contre sa bane imbeciles là, ki zot fine fer plûtot? Zot fine condamne ene kikaine ki dire ki lip é recevoir bane revelations de côté d’Allah et zot fine mette li endehors Nizam-é-Jamaat et zot fine mette boycotte lors li et so bane suivants. Fine ena magouilles concernant Nusrat Mosque dans Quatre-Bornes (ene fait ki mo ti mentionner dans mo Lettre Ouvert à Mons. Amine Jowahir le 27 Janvier 2006), kot zot fine fer requête plisse l’argent ki bizin pou fer 2 gates pou Jalsa Gah. Montant initiale ki fine demander ti Rs.70000, tandis ki valeur sa 2 gates là moinse ki Rs.40000. En plisse de sa, ena encore mensonges à propos l’argent Jamaat, même dans bane déroulement de Amila. Dans ene meeting le 4 Septembre 1999, le Amila fine être informé dans Item 4.20 de minutes of meeting (en anglais) ki : “Nous fine envoye Rs.400000 à Madagascar pour la construction de nous l’école, parski beaucoup l’argent perdi dans l’argent location de bâtiment ki fine prend pou fer nous l’école là-bas.” Ene point intéressant à noter c’est ki premièrement le Majlis-e-Shurah jamais pas ti prend ene tel décision et deuxièmement, dans ene fax ki fine envoyer à Maurice par Mawlana Siddique (dépi Madagascar) le 01 Décembre 1999 (3 mois après sa meeting là), Mawlana là fine dire : « Zot pou content pou apprane ki après beaucoup zefforts et patience, nous fine azordi gagne papier de propriété de nous la terre à Andavamamba, Tananarive. Alhamdulillah. Nous pé fer ene humble requête à ou pou transfère le montant Rs. Quatre cent mille roupies (Rs 400,000) dans nous compte dans Madagascar.” Astaire là, kifaire dans minutes fine dire : “Nous fine envoye Rs.400000” kan tandis ki 3 mois après Mawlana Siddique fine fer zot requête pou envoye sa montant là ? Ki fer bane tels mensonges fine sorti ? De plusse, ena bane cas kot l’argent Jamaat fine rentre dans poche de bane officiers en charge finances au lieu de compte Jamaat. Azordi jours nous fine alle conné ki sa bane kalités magouilles là fine rester dans l’Association Ahmadiyya, et cet fois-ci c’est le soi-disant Amir ki coupable, en tant ki chef and so bane alentours comme so bane complices. Récemment mo fine fer deux rêves concernant sa zaffaire là : 1. Le 04 Février 2011 avant Namaz Tahajjud : Mo fine rêve mo papa Mahroom Solim Azim (ki fine intékal en l’an 1990) et mo pé dire li : « Papa, ou conné ki fine passer dans Darus Salaam Jamaat Ahmadiyya », li dire « Oui, mo conne très bien », mais moi mo dire li ki mo pas conne vraiment séki fine passer et mo fine demande li pou explique moi sa parski li très important pour moi. A plusieurs reprises mo fine pose li sa question là et li dire moi ki c’est ene grand fraude ki fine passé. Mo demande li ki sanlà fine fer sa, et li confirme avec moi séki mo ti penser déjà, et li dire moi sa sois-disant Amir Jamaat Maurice ki pé prend li l’homme véridique ki pé faire tous dimounes peur pour mette zot dehors dans Jamaat. 2. 06 Février 2011 avant Namaz Tahajjud : Mo rêve mo frère Azize Azim ki li aussi fine intékal en l’an 2006. Mo rêver li pé conduire ene bus kot ena passagers là-dans et mo trouve Sécrétaire Maal National de Jamaat Ahmadiyya Maurice (Mons. Shams Varsally) dans bus là pé assizé devant. Bus là ti arrêter lors bus stop et mo fine rentrer et mo frère Azize ti chauffeur de sa bus là, et kan li fine trouve moi, li fine donne moi ene bon quantité bonbons et bane gâteaux et Sécrétaire Maal National ti croire ki mo pou assize costé avec li dans bus. Alors li lever dépi devant avec colère et li fine à l’arrière (pou mo pas assize kot li). Kan mo passe kot li et li ti pé croire mo pou vine assize kot li, mo donne ene bon coup dans sa siège là et lève li (siège là) et mo alle prend place dans ene lotte siège. Li fine déconcerté et kan ena pou dessane dépi dans bus, mo fine dessane et Sécrétaire Maal National de Jamaat Ahmadiyya Maurice aussi fine dessane, mais kan li fine dessane, li péna savattes dans so lipié et so lipié bien malpropre et vilain. (Sommeil cassé et mo lever pour Namaz Tahajjud). Alors mo fine comprend de sa bane rêves là ki tous les deux, ki sa soi-disant Amir là et so Sécrétaire Maal ena ene la main dans sa situation grave là ki concerne finance de l’Association Ahmadiyya de Maurice. Malgré bane l’enquêtes de bane officiers de Londres, même si arriver zot calife pardonne zot et réarrange bane zaffaires dans zot faveurs, mais pas pou trop tardé maintenant avant ki la mains d’Allah attrape zot, spécialement pou le chef de bane hypocrites et le meilleur parmi bane comploteurs ki sa siècle là fine conné. “Hypocrites c’est bane ki laisse zot attiré par zot passion pou bane choses ki zot envie ki zot vine ene autoritaire. Kan lézot dimounes guette zot pé vini, si zot (ça bane dimounes là) pé assizé, bizin lévé, saluer Monsieur l’Hypocrite, et toujours zot content ki pouvoir reste dans zot la main et zot bane travail ki zot faire pas pour profite zot nannié, ni lors la terre, ni dans la vie future. Malgré ki bane hypocrites, Allah (swt) fine donne zot toute sorte kalité signes et preuves, zot continuer cause division et disputer comme-ci c’est zot ki bane grand savant ki conne tous, c’est zot ki ena raison tous les temps. Ça bane kalité dimounes là, déshonneur tombe lor zot partout kot zot été. Zot fine appelle colère Allah lors zot même, et la misère aussi frappe zot. Tout ça là parceki zot rejette bane signes Allah et ridiculise le prophète d’Allah et par zot mauvais comportement, ni zot l’argent, ni zot zenfant pas pou profite zot et c’est zot même ki faire du tort à zot propre lécorps.” (Extrait de mo livre “Le Vrai visage de bane hypocrites”) Attende, Mons. le soi-disant Amir, moi aussi mo pé attende avec toi. Allah tardé mais zamais Li pas manque So cible. To fine gagne répit mais pou commié létemps eski to expecte ki to reste à la tête et vole bane membres du Jamaat de l’argent ki zot fine contribué ? Zot fine contribuer li pou bane activités religieux du Jamaat et bane les autres développements important ou bien pou to propre gain personelle ? Pou commié létemps encore sa bane dimounes là pou reste aveuglé et pas démasqué to vrai visage, visage d’ene hypocrite, double-langage, ene comploteur, ene menteur, et celui ki en vérité pé créer fitna (désordre) – spécialement concernant mo expulsion du Nizam-e-Jamaat ensam avec Zafrullah Domun Saheb. Pou commié létemps to penser ki to pou capave fer séki to content? Dimounes couma toi pena la crainte d’Allah dans zot lécoeur. Taqwa na pas ena ! Personnellement mo pas trouver ki to peur to propre calife. Mais, pauvre calife ! li pé manœuvré par to bane actions rusé, par la main d’ene comploteur et ene idiot ki asoiffé de pouvoir. Eski to pas conne zistoire de « IZNOGOOD ». Pauvre li ! Li ti envie vine calife à la place du calife ! Ene kantité complot li fine fer pou ki li capave réussi dans so plan pou gagne sa place calife là. Mais dans to cas, le calife li ene marionnette dans to la main, et toi, dans to propre façon to pé égare bane dimounes, et to pé embête zot pou fer zot croire ki to bane paroles c’est paroles du calife, kan au lieu de sa, to bane paroles ti bizin bane paroles du Quran et de bane Hadiths. Mais pas tracasser, pareil couma plusieurs fois dans le passé mo fine recevoir, kot Allah ordonne moi pou dire : « I am coming very soon ! » - Mo pé vini bientôt ! “Le fait ki zot pé alle contre bane l’enseignement du Quran Shareef, en tant ki ene Khalifatullah de sa l’époque là, mo bizin la guerre contre zot, parski si pouvoir de sa bane dimounes double-langage (hypocrites) là pas retiré, alors zot pou créer encore plisse désordre dans le Jamaat Ahmadiyya et dans le Ummaté Muhammadiyya (saws) et zot pou casse tous bane liens familiales et piétine tous bane droits et l’enseignements. Si mo laisse li et so bane alentours coumsa même ou bien refuse pou la guerre contre sa bane hypocrites là maintenant, Jamaat Ahmadiyya pou contigner souffert de bane perturbations et dézintégration et bane forces du mal ti pou rentre en force dans le Jamaat Ahmadiyya. Li et so bane alentours zot pas réfléchi lors le Quran et zot pas essaye pou comprend et réalise le but réel de bane l’enseignements de l’Islam ; zot fine perdi zot la vue spirituelle et capacité spirituel pou tendé et zot commence trouve fautes avec bane les autres dimounes ki suive bane l’enseignements du Quran. Sa bane kalités dimounes couma zot là zamais envie ki ene bien de côté d’Allah arrive lors bane croyants. Ene hypocrite li ene dimoune tellement rusé pou ki li alle brule so bane bateaux. Li divisé en deux personnalités. Zamais li cause droite et li toujours plongé dans bane discours bien compliquer pou mette confusion dans l’esprit dimounes, dans ene telle façon ki message ki li donné li paraite ene kalité pour ene dimoune, et li paraite ene l’autre kalité pour ene l’autre dimoune. Sa c’est façon de parler zig-zag ki bane hypocrites content adapté et adopté. Insha-Allah, Allah Tabarak Wa Ta’ala pou dans ene proche future expose zot double-visage.” (Extrait de Lettre Ouvert à Mons. Amin Jowahir le 04 Avril 2010 – écrit sous inspiration divine) “Alors, la fin bane ki ti faire le mal ti tourne bien mal aussi, parski zot ti rejette signes Allah et ti moque de zot.” (Révélation en anglais)