Text Box: بسم الله الرحمن الرحيم Khutba Jummah HAZRAT KHALIFATULLAH AL-MASSIH AL-MA’OUD MUNIR AHMAD AZIM Munir Ahmad Azim 11 Mars 2011 ~ (05 Rabi’ul Aakhir 1432 Hijri) (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et cause un peu lors l’indépendance de l’Ile Maurice (demain le 12 Mars 2011) ensuite li fine dire: Depuis quelques temps, nous pé trouve toutes sortes kalités médias pé lévé ki vise pou connecter bane dimounes entier le monde avec bane collègues, camarades, famille etc. Appelle sa dans so mot technique, Network Social, et ena bane tels sites coumsa, et Facebook li ene parmi sa bane compagnie là lors internet ki ena ene pli bel part pou attire dimounes pou servi so réseau social pou connecter avec toutes sortes kalités dimounes entier lémonde. Facebook ena plisse ki 500 millions dimounes ki connecter avec li, et li fine créer en 2004, et à travers le temps li fine vine tellement populaire ki astaire tous dimounes gagne accès avec li. Mais au lieu servi bane tels moyen de communication ki gagner à travers internet astaire dans ene bon façon, bane dimounes prend sa comme ene moyen pou partage zot bane informations confidentiel et bane photos personnelle, et même saki intime et indécent kot sa fer ene fracas dans la société, kot na pli ena moralité et la décence et sa bane tels sites là li fer nous pose nous-mêmes la questions, ki rôle la religion et responsabilités de bane chefs religieux pou mette ene stoppe à sa décadence en masse là. Li bien chagrinant ki bane jeunes Ahmadi fine tombe dans le piège de bane tels attractions, et li encore pli dommage ki zot calife pas pé capave fer zot abandonne bane tels sites et pou concentrer plisse lors bane zaffaires religieux. Au contraire pou sa bane dimounes ki fine rentre dans le piège de bane tels sites, bane zaffaires de la religion fine vine secondaire, tandis ki bane zaffaire mondaine couma CHATTE, webcam et relations illicites avec bane madames et missiés Non-Mahram (à travers sa bane tels sites là) fine vine ene kitchose fréquent. Et malheureusement sa c’est ene vérité ki fine saisi le Jamaat du Messie Promis (as) ki ene fois ti pure, mais à cause bane actions de l’homme, sa Jamaat là fine vine azordi jour seulement ene Jamaat de nom seulement. Et pas zis le Jamaat Ahmadiyya ki concerner par sa situation grave là, mais aussi tous bane musulmans entier le monde aussi. La décadence de bane Ahmadi pé continuer fer ravage. Sa Jamaat ki ene fois ti pure et pas ti ena aucaine manquements là, alors astaire là, bane dimounes ki trouve zot là-dans, zot fine prend tout saki li représenter en moquerie, c.à.d, bane Ahmadis fine bafouer bane l’enseignements vitale de l’Islam. Bane parents Ahmadis népli bane guides de zot zenfants. Au contraire, sa bane parents là zot laisse zot bane zenfants fer tous saki zot content et astaire kan trop tard (après la mort, la tissane), zot pas capave fer nannié pou ré-amène zot bane zenfants dans le droit chemin, et retire zot de bane tels fléaux et mauvais chemins couma la drogue, la musique, l’alcool, business pornographique et zougadère. Ziska azordi, bane parents Ahmadi pé continuer soutire zot bane zenfants et donne zot saki zot content, malgré ki sa bane zaffaire là zot contre bane l’enseignements de l’Islam. Zot laisse zot zenfants libre lors internet, et laisse zot rentre en contacte avec bane littératures et informations non-islamiques. C’est ene fait ki Facebook, et aussi Netlog et Hi5 et bane lézot network social zot bane tels réseaux ki encourages toutes sortes kalités communications et partage d’informations ki contre bane l’enseignements de l’islam, et aller aller, sa situation là pé vine de plus en plus grave, ki pour bane Ahmadis et bane les autres Musulmans aussi. Hazrat Muhammad (saws) fine dire : « Le meilleur de zot bane jeunes c’est bane ki ressembler zot bane vieux (dimounes âgés) ; et bane pli pire de zot bane vieux dimounes c’est bane ki ressembler zot bane jeunes. » (Kanzul ‘Ummal, Hadith 43058) Astaire là kan nous étudier sa Hadith là, si nous guette bien, la jeunesse c’est ene période d’ignorance et d’obsession, et alors, si ene jeune li réussi combatte so bane passions et li pas prend compte bane attractions de bane lémonde ici-bas là et li rode tous moyens possible pou attire le plaisir d’Allah lors li, alors ene tel jeune pas fine non seulement fer ene grand Jihad (kot li fine control so égo et passion), mais li fine aussi accompli ene tel exploit kli encourage li pou fer encore plisse bon travail et montrer bane bons l’exemple ziska ki finalement li rentre dans full maturité, kot sois jeune là vine ene vrai homme ou ene femme. C’est sa ki le Saint Prophète Muhammad (saws) fine rode dire kan li fine dire : « « Le meilleur de zot bane jeunes c’est bane ki ressembler zot bane vieux (dimounes âgés) », parski d’habitude ane vieux dimounes zot bane dimounes sages, ki fine traverse toutes sortes kalités épreuves de la vie et ki conne pli bien combien ene dimoune li bizin à tout prix rapproche li avec Allah au lieu ki li perdi so létemps dans bane zaffaire inutile de sa le monde ici-bas là, ki bien temporaire. Lotte partie Hadith toutefois li ouvert nous lizié dans saki pé passer avec non seulement bane jeunes de nos jours mais aussi bane dimounes ki fine rentre dans l’âge. Azordi jour, ena ene tendance pou bane dimounes dans ene l’âge moyen (40 ans ou plus) et même bane vieux dimounes pou cachiette zot bane l’apparence physique et passe zot couma bane jeunes, et zot senti zot jeunes et pou arrive à zot but, zot rentre dans bane tels sites couma Facebook pou expose zot à saki interdit pou zot, pareil couma Rassoollullah (saws) fine dire : « et bane pli pire de zot bane vieux dimounes c’est bane ki ressembler zot bane jeunes. » Sak dimoune bizin respecter zot groupe d’âge. Saki bien condamnable dans l’Islam, au lieu ki bane dimounes âgés (dépassant la quarantaine) zot donne bon l’exemple à bane jeunes, ki zot fer zot ? Zot copiye bane indécences et folie de bane jeunes, et sa fer zot enfonce dans bane mals bien dégoûtant ! Mais si au lieu sa bane dimounes là ti donne ene bon l’exemple à bane jeunes et en plus de sa, si bane dimounes âgés là ti prend l’exemple lors bane bon jeunes (ki ena bon comportement), alors là li ti pou ene cas différent, kot bane bons jeunes ti pou donne bon l’exemple à bane dimounes moins jeunes (et ki lors mauvais chemin), et bane bon dimounes âgés ti pou donne bon l’exemple à bane jeunes ki rebelle et ignorant (de la religion). C’est sa en d’autres mots saki sa hadith là pé fer comprend. Bane jeunes musulmans zot encourager pou suive le Sunnah du Saint Prophète (saws) et pou suive à la lettre la sagesse ki ena dans le Quran Shareef. FACEBOOK : Nom là-même dire tout, kot ene kikaine faudé présente so photo (couma li ressembler), ou photo so partie lécorps au monde entier, bane tels photos ki décrire couma li été, coumsa sa ki intéresser capave connecter avec li et vine so « camarade ». La plupart du temps, c’est bane étrangers ki connecter, bane dimounes ki inconnu, et dimoune lors Facebook ena option pou sois accepter intel comme camarade ou non. Malheureusement beaucoup dimounes, surtout bane musulmans (et aussi bane Ahmadis) zot fer camarade lors bane tels sites, avec bane étrangers ki indécent, et sa fine vine ene kitchose naturel, ki passer tous les jours. Sa site là attire beaucoup dimounes, ki li missié, madames, garçons et tifilles de toute âge, et fer zot tellement attirer avec bane tels moyens de connection ki zot pas capave passe sans Facebook et zot pas capave sans passe connecter avec zot bane camarade, même dans bane les autres network social. Même bane Ahmadis, ki li vié, ki li jeune, zot connecter dans bane tels sites, et zot mette sans hésitation différent de zot bane photos pou ki zot « camarades » capave trouve zot et mo bizin préciser ki bien souvent sa bane camarades là : (1) Pas tout ki Ahmadi ou musulmans (en générale), (2) Dans sa bane sites là (surtout Facebook) zot capave mette combien photos zot envie pou montrer le monde. Et alors, si ene kikaine, disons ene Chrétien (ou n’importe ki religion) ki ena bane pensées libérale, et ki montrer li lors Facebook (ou les autres sites) comme moitié nu, alors si sa dimoune là li alle connecter li avec ene l’autre utilisateur ki centrer lors bane zaffaires religieux (par exemple, l’Association Ahmadiyya), alors n’importe ki sanlà, ki li Ahmadi ou bane les autres capave gagne accès avec sa bane tels photos degradant là ki dimoune là choisir pou metter pou dimounes trouve li lors Facebook etc. – et sa malgré le fait ki peut-être avec ene bon l’intention sa dimoune libérale (Chrétien etc.) rentre dans compte Facebook de bane l’Association Ahmadiyya pou gagne renseignements lors bane zaffaires religieux, mais le fait ki li libérale et sans pudeur (d’après so photo), alors sa li reflecter lors compte de bane tels sites religieux couma l’Association Ahmadiyya fine ouvert dans Facebook. Surtout si bane utilisateurs mette choisir comme option pou fer zot bane contenu vine public et sa alors attire toutes sortes kalités dimounes (et toutes sortes kalités photos indécent) pou afficher ; (3) En plisse de sa, kan ene kiakine click lors ene utilisateur Facebook (même si zot photos respectable – Islamique), mais si alle click lors sa dimoune « respectable » là so bane camarades, alors ou pou trouver ki sa dimoune là so bane camarades, ki li tifille ki li garçons pas respectable ditout (indécent), et coumsa, Facebook invite dimounes pou rentre dans ene tel cercle vicieux, et même si bane communauté religieux connecter dans Facebook, alors zot fer face bane tels problèmes coumsa, et sa aussi c’est ene problème avec bane utilisateurs ki fine connecter zot avec le Movement Ahmadiyya (kot même bane Ahmadis ki connecter are li, si click lors zot propre profile, alors alle trouver commié camarades indécent zot ena). Alors eski le Movement Ahmadiyya tolère bane tels évolutions technologiques ki endans endans pas aussi islamique. Eski sa séki l’Islam prêcher et eski sa explications additionnels ki Hazrat Massih Maoud (as) fine donne bane Ahmadi (lors l’Islam) ? Li bien triste ki trouver couma bane Ahmadi zot présent dans Facebook, kot zot montrer zot bane photos, tandis ki dans la société, zot fer croire ki zot bane bons Ahmadis, mais si alle guette zot bane activités lors bane tels sites social networking, alors ou pou choquer par sa mentalité non-islamique ki zot démontrer, et sa li applique pou bane jeunes et moins jeunes aussi, et sa Hazrat Muhammad (saws) fine fini décrire dans so bane dires kot pou arriver ene létemps kot bane moins jeunes, bane dimounes âgés pou rode imite bane jeunes (ki dans l’ignorance de l’âge) afin ki capave considère zot-aussi comme jeunes, avec ene l’esprit jeune. Au lieu ki zot alle sauve sa bane jeunes tifille et garçons ignorants là de bane tels dangers ki social networking représenter (ki beaucoup mauvais ki bon), alors sa bane dimounes plus âgés là et bane parents avec connaissance de cause, zot pé jette zot bane zenfants, sa bane jeunes là, dans le feu de l’enfer, ki li lors sa la terre là, et dans la vie future. Bane Ahmadi pé attache zot avec l’institution « eternelle » de Khilafat-e-Ahmadiyya ; zot ena à peu près même croyance ki bane Chrétiens ki dire ki zot capave fer tous saki zot content, même bane plus mauvais actions, parski Jésus fils de Marie (le Christ) fine vini et souffert et fine rachète tous zot bane péchés, et ki astaire là zot fine vine pure et tout est permis pou zot, parski n’importe ki zaffaire zot fer, zot nek ena pou confesser et ensuite tout corek, zot pardonner ! Pareillement bane Ahmadis fine gagne à peu près même mentalité, et zot pé embête zot-même et croire ki zot calife li zot intercésseur vers Allah, ki zot calife li zot visa pou Paradis. Alors, d’après zot, tout saki zot fer, tout est permis, parski zot ena ene calife ki pou là d’après zot pou charrier fardeau de zot bane mauvais actions, et alors zot servi sa comme excuse pou sorti de n’importe ki situations ki zot été. Mais zot calife, couma li dire li-même, li dénoncer ki li pas capave être blâmer pou zot (so bane suivants) bane actions et li dire (en réponse d’ene lettre ki daté le 16 Mai 2010). Lettre là en anglais mais mo pou lire so traduction en créole ki comme suite : « Cher Abdul Aleem Sahib, mo fine recevoir ou lettre kot ou fine montrer ou inquiétude à propos bane différent sites social lors internet ki pé encourage bane jeunes pou enagge zot dans bane camaraderie immorale. Bane site couma Facebook, twitter et les autres zot tout à faits mauvais et inapproprié. Mo pé continuellement adresse lors sa sujet là et pé mette le Jamaat en garde pou pas rentre dans bane tels sites coumsa, mais bane dimounes pas prend sa en considération et par zot-même zot envie détruire zot intégrité, alors ki ene kikaine capave fer ? Avec Sincérité, Mirza Masroor Ahmad, Khalifatul Masih V. » Li clairement évident ki le 5ème calife du Mouvement Ahmadiyya pas capave être responsable de bane actes bien dégradant de so bane suivants, mais malgré sa, bane Ahmadis zot têtu pou continuer prend bane paroles de zot calife (bane mauvais l’instructions ki li donner) comme bane paroles de l’évangile, mais kan li donne bon conseils, sa zot pas ecouter, zot tourne le dos, et zot préfère prend zot calife comme zot « excuse » pou fer saki zot content (de mal). Mais le fait li là, ki le 5ème calife du Mouvement Ahmadiyya fine dire : « ki ene kikaine capave fer ? » - Mais laisse-moi dire li ki ene tas kitchose capave fer ! Kan so soi-disant Amir de Maurice fine informe so prédécesseur et li-même à mo propos, ki mo recevoir la révélation de coté d’Allah, ki tous les deux califes fine fer ? Ene fine expulser moi du Jamaat, et l’autre là fine trouver ki so prédécesseur ti ena raison et li considère li ki c’est li-même (le Khalifatul Massih) comme celui ki bien-guidé et ki vine de côté d’Allah. Et li dire : « ki ene kikaine capave fer ? » - Ki fer sa calife là (en tant ki chef d’ene communauté divine – couma li dire), ki fer li pas prend bane actions sévères contre sa bane kalités « faces » dans sa zistoire Facebook là ? Kan ene dimoune dire li vine de côté Allah, li ignore li et le message d’Allah et li prend li-même comme supérieur, et astaire li admette ki li impuissant kan de l’autre côté, bane Ahmadis prend li comme tout-puissant et zot fer bane les autres Ahmadis peur li attention li prend bane tels sanctions contre zot et expulser zot du Jamaat. Et astaire-là, li dire ki li pas capave fer nannié si sa bane dimounes là oulé dirige zot-mêmes vers zot propre destruction ! Humainement parlant, sakaine ena pou rendre compte pou so propre actions, mais en tant ki chef d’ene Jamaat par vote de l’homme, au lieu ki li assizer et pas fer nannié pou amène ene reforme dans le Jamaat du Messie Promis (as), kifer li pas alle fer bane recherches approfondi de tous sa bane Ahmadi Facebook Wala là et ki présent aussi dans bane les autres sites sociales ? Kifer li pas expulsé zot ? Pour révélations ki vine de côté d’Allah, li prêt pou alle contre Allah et So Messager, mais pou « bane camaraderie immorale » li prêt pou cachiette bane péchés de bane soi-disant Ahmadi et li réagir comme-ci l’Association Ahmadiyya et tous so bane membres zot pure et pas bizin réforme ! Kan Allah fine envoye moi en tant ki So humble serviteur comme ene Avertisseur et Messager dans sa le monde là, ki li fer li ? Li tourne le dos complètement à Allah et à So prophète et li préfère tini ferme à so chaise Khalifa mondaine, ene soi-disant chaise de pouvoir et d’honneur, mais eski li pas conner ki Allah honore celui ki Li oulé et Li humilié et reduire en poussière celui ki Li oulé ? Alors gagne la crainte d’Allah O Hazrat Mirza Masroor Ahmad, gagne la crainte d’Allah et lever depi ou longue sommeil de l’ignorance avant ki li trop tard pou ou ! Li malheureux pour trouve bane responsables de bane auxiliaire, et membres comité centrale dans l’Association Ahmadiyya pas pé fer nannié pou change la situation. Ki travail zot pé faire avec ça bane jeunes Khuddam et Lajna là et aussi bane Atfal et Nasirat. Emplace zot pé veille zaffaires zot camarade et ki pas concerne zot, alle faire l’éducation de ça bane jeunes là. Ena tifilles pé prend leçon violon, violon lor z’épaule, ena tifille mo conné, Deen pas conne du tout, mais pé prend leçon danser et karaté. Si ou alle lors internet, lors bane site couma Facebook et Hi5, ou guette zot ça, ena mette zot nom pas mette photo, mais dire ki li content tel acteur ou actrice préféré. Ena même bane madames-Lajna pé mette zot nom et mette bane photo ti comic indécent. Eski ou penser ki Allah pour laisse ça situation là coumsa ? Eski ou penser ki Allah aveugle devant tous sa bane degradation là kot dimounes pé fer bouffon de bane l’enseignements de l’Islam ? Mo fine déjà dire sa avant et mo pé rédire encore. Faudé pas le Jamaat Ul Sahih Al Islam vine pareil couma les autres Jamaat et surtout Jamaat Ahmadiyya. Kan ou guette ki ça bane jeunes garçons et filles pé faire lors bane tel site internet couma Facebook, Hi5 etc. et zot parent, bane sois-disant ténor dans Amila Jamaat là-bas et zot pé prend zot même bane grand intellectuel et Muttaki dans Jamaat Ahmadiyya, mais si ou conne zot-même zot zistoire personelles et zot zenfants séki pé faire lors internet, alors sa fer ou chagrin et dégouter de saki zot fine réduire le Jamaat Massih Maoud (as); c’est ene la honte ça pour l’Islam en générale et en particulier la honte ça bane kalité dimounes là encore prétendre zot ki zot bane Ahmadis et zot déclare ki zot dans Jamaat Massih Ma’oud (as). Alors, ou tous, si zot ti dans bane tels sites, alors ferme zot compte et tourne en repentance à Allah, parski ou la vie, ou l’honneur, ou la mort, tout trouve dans la main d’Allah ! Si tous bane Musulmans (dans n’importe ki Jamaat zot été) et l’humanité écoute et mette en pratique bane messages d’Allah et en même temps cultive la crainte d’Allah dans zot lékaire, et développe l’amour pour Allah, alors Allah Li rempli de miséricorde et en vérité Li tourne avec pardon vers celui ki Li content, si sa dimoune là li sincère dans so quête pou gagne Allah et ki assoiffé pou reforme li et gagne l’amour d’Allah. Astaire mo pou cause lors bane blâmes ki fine faner lors mo compte (dans Kerala – en Inde) concernant fraude financier. Mo fine réussi conné ki c’est ene dénommé Molvi Muhammad Ismail H.A, ene Muballigh de bane Ahmadi dans Kerala. Li même dimoune principale ki fine fane sa bane fausse rumeur là et bientôt li pou goûte mauvais conséquences de so bane actions. Li non seulement fine repanne bane tels faussetés lors mo compte mais li pé aussi prend li couma Bondié pou dire ki la mort d’ene dimoune c’est à cause so papa so désobéissance envers le Khilafat-e-Ahmadiyya et le fait ki papa là fine accepter le nouveau Messager d’Allah de sa l’époque là. D’après sa soi-disant Mawlana là, papa commette ene péché Nawzobillah et garçon pé payé ? Astaire là, li pé fanne partout ki fer attention ki kan vine joine moi en tant ki l’humble Messager d’Allah et le Jamaat Ul Sahih Al Islam (surtout pour mo bane disciples), attention ki mo bane suivants alle perdi zot bane garçons (par la mort). Fouse Jamal, le garçon du Amir Jamaat Ul Sahih Al Islam de Kerala fine mort en Novembre 2007 sans ki li fine réussi entende parler de la venue d’ene Messager d’Allah lors sa la terre là. Li ti ene Ahmadi sincere et li ti même élu Secrétaire Générale du Majlis Khuddamul Ahmadiyya dans Kerala à l’âge de 25 ans. Kan li fine mort, so Janaza ti lever par bane Ahmadi et même le 5ème Khalifatul Massih fine au courant et chagrin pou so la mort. Astaire là, sa soi-disant Mawlana là pé fanne sa causer là partout ki sa jeune homme là fine mort à cause Allah ti envie puni le Amir Jamaat pou so soi-disant mauvais comportement ? Sa même Mawlana là fine averti ene l’autre de nous bane membre, ki ene Dai-Illallah bien dynamique, ki fer attention, si li continuer suive moi, alors li aussi so garçon ki fine joine nous, li aussi pou mort. Astaire, ene reflection c’est ki Namaz Janaza ti fer par l’association Ahmadiyya à sa l’époque là en 2007. A sa moment là, eski sa la mort là ti ene la mort naturelle ou ene la mort maudit ? Si li ti ene la mort maudit (Nawzobillah), alors kifer l’Association Ahmadiyya enam avec so calife fine dirige so Namaz Janaza ? Et mo aussi envie attire l’attention de sa soi-disant Mawlana là ki dépi 2007 ziska Septembre 2010, sa bane dimounes là pas ti encore accepter ou reconnaite moi comme l’humble serviteur d’Allah dans sa siècle là, alors couma eski to capave dire ki sa la mort là ene la mort maudit ? Eski to ti alle kot Allah pou conner ki jugement Allah fine passé concernant la mort de sa jeune homme là ou bien eski to pé fer to idiot kan to pé fanne bane tels commentaire n’importe ? Si d’après toi li fine gagne ene la mort maudit en 2007, kan li fine mort dans le Mouvement Ahmadiyya, alors explication logique c’est ki en d’autres mots to-même to pé considère le 5ème calife du Mouvement Ahmadiyya comme étant ene simple calife élu par l’homme, et non pas ene calife ki guidé et choisi par Allah ! Dand mo l’opinion, to pé contredire to calife, et to pé montrer toi pli supérieur ki ene calife élu par l’homme ! Séki mo envie demande sa soi-disant Mawlana là encore, c’est ki eski Hazrat Jibreel fine amène li ziska Sidrat-ul-Muntaha, et dépi là-bas après li fine alle kot Allah, pou ki li capave dire bane tels sottises et fer bane les autres Ahmadi peur li et bane mots ki li pé circuler partout à propos la mort de bane dimounes zot zenfants si arriver zot croire dans sa nouveau Messager d’Allah là ? Eski li-même li conner kan li pou mort ? Commié létemps li reste pou vivre lors sa la terre là, ou si pas li pou monte au ciel pareil couma bane les autres croire ki Hazrat Issa (as) fine monte au ciel avec so lécorps physique ? Eski li ena confirmation dépi kot Allah ki li pou gagne ene visa spéciale pou le paradis ? Malgré le fait ki bane Ahmadis dans Kerala pena aucaine problème pou écoute le message d’Allah dans nous l’époque actuel, sa Mawlana là pé servi tout tactiques possible pou infiltrer la peur dans zot lékaire, ki si jamais zot pense pou vine joine zot avec moi en tant ki l’humble Messager d’Allah, alors attention ki zot aussi zot bane garçons alle mort à cause de zot désobéissance à présent système de Khilafat ki fine élu par l’homme. Sa raisonnement satanique là li pas daté d’aujourd’hui sa. Bane prophètes dans le passé et zot bane disciples aussi fine fer face bane tels l’attaques satanique lors zot propre personne et bane l’enemies de la vérité fine toujours vine de l’avant pou dire ki la mort ene kikaine li ene punition à cause intel so parent fine accepter le Messager d’Allah. Sa ti le cas en 2003 dans Maurice kan ene de mo bane premier disciple sincère (et ki fine présser pou fer Allah plaisir par so bane actions) Seïd Ahmad fine intécal. Li ti ene jeune homme ki ti représente ene modèle pour bane jeunes du moment ki li fine reconnaite mo véracité et ki ti toujours rode bane bénédictions divines – en trouvant bane l’occasion pou accompagne moi dans plusieurs place afin ki li gagne bane bénédictions d’Allah sak fois ki révélations dessane lors moi. Li ti ena 22 ans. Du moment ki li fine gagne bane signes clairs, alors li pas fine hésiter pou quitte tout, même so bane létemps loisirs avec so bane camarades pou ki li capave dévouer sa létemps là pour la cause d’Allah. Kan li fine mort, bane mauvais la langues de bane soi-disant Ahmadi, ensam avec so bane relations de sang pas fine hésiter pou dire ki sa la mort là li ene la mauvais la mort, et li ene mauvais la fin pou so maman respecté parski li fine alle croire dans moi. Zot fine tappe zot la main et fine dire ki sa garçon là pas ti pou mort si li et so famille pas ti croire dans moi (l’humble serviteur d’Allah). Sa soi-disant Mullah dans Kerala là pé prend li-même comme Dieu sur terre pareil couma pharaon dans le temps de Moosa (as), ki fine donne l’ordre pour ki touye tous bane nouveau-né male, et astaire là sa Mawlana là pé prédire la morts de bane croyants du nouveau Messager de sa l’époque là. Mais eski li pas conne la vie de mama de Sir Zafrullah Khan kot ene Da’ïne fine vine guette li à sak fois ki li accouche ene zenfant et menace li pou touye sa zenfant là si li pas donne Daï’ne là so zenfant ? Mais à sak fois mama Sir Zafrullah Khan fine refuse sa Daï’ne là, malgré ki li fine menace li ki li pou fer so bébé mort. Et effectivement à sak fois ki li fine gagne zenfant, ene derrière lotte sa bane zenfants là fine mort, mais malgré sa, la foi ki mama Sir Zafrullah Khan ti ena dans Allah, sa la foi là fine toujours reste solide et li fine toujours garde so confiance en Allah malgré bane cyclones fine passe lors li. Daï’ne là fine à tout coup réussi dans so plan ziska ki le Messager d’Allah (le Messie Promis (as)) fine fer duah avec Allah pou protège sa madame pieuse là et kan bane duahs de Massih Maoud fine arrive dans présence Allah, alors tous bane plans de sa Daï’ne là fine alle dans dilo, et c’est coumsa ki Sir Zafrullah Khan fine né. Li fine vine ene tel garçon et plus tard ene tel grand dimoune ki représente la promesse de l’honneur de l’Islam. Pareillement, sa soi-disant Mullah de Kerala là pé réprend rôle de sa Daï’ne là (dans l’époque du Messie). Mais li pas conner ki malgré tout plans ki li capave imaginer pou mette la peur de créature dans lékaire de mo bane disciples, zamais li pou capave dévier mo bane disciples séki vraiment sincères, parski sa bane là (ki li partout dans le monde, maintenant et dans le future) zot represente la promesse de demain, ene telle promesse ki pou fer trouve la victoire de l’Islam. Bane vrais soldats d’Allah zamais pas gagne peur de bane tels menaces et zot pas reculer, et zot ensam avec Allah et So Messager, c’est nous ki pou remporte la victoire, Insha-Allah. Mo pé alors invite sa soi-disant Mawlana là, Molvi Muhammad Ismail H.A (le Muballigh de bane Ahmadi dans Kerala) pou vine de l’avant dans ene Mubahila concernant tous saki li fine dire lors moi, et mo bane disciples dans Kerala (Inde). Laisse li vine de l’avant officiellement et fer ene l’annonce officielle (publique) ki li fine accepter mo challenge de Mubahila afin ki le monde, bane Ahmadi et so calife capave conner ki sanlà vraiment menteur. Et mo pé attane so réponse à sa Mubahila là afin ki le monde capave témoigne claire défaite et la mort de sa menteur là dans ene période d’un an ! Li bizin vini officiellement et signe sa partie de sa Mubahila officielle ki mo fine inclure dans mo Khutba Jummah d’aujourd’hui le 11 mars 2011, et sa Mubahila là pou prend effet aussitôt ki li accepter et mette officiellement so signature, et li date sa challenge de Mubahila et li mette so l’heure aussi. Aussitôt ki li pou signe sa Mubahila là, moi aussi pou prêt pou signer et date sa document (de Mubahila) là. Insha-Allah. Couma Allah dire dans le Quran Shareef Ch.3 (Al-Imran) V.61: « Si n’importe ki sanlà contredire toi, malgré connaissance ki to fine recevoir, alors dire : « Vini, anou appelle nous bane zenfants et ou bane zenfants, nous bane madames et ou bane madames, nous-mêmes (nous bane dimounes) et ou-mêmes (ou bane dimounes), et anou invoke la malédiction d’Allah lors bane menteurs. » Alors vini et implore Allah et dire : « O mo Créateur ! Dessane To malédiction dans l’espace d’ene an lors celui d’entre nous ki menteurs et ki ene fraudeur dans To lizié et couvert li avec la honte et humilier li et montrer li manifestation de To colère et To punition. Puni li, batte li et éprouve li dans ene tel façon ki dimounes alle conner ki tous zot bane malheurs pas vine de bane dimounes, mais ki sa vine de To toute puissance et afin ki tous sa bane manifestations (signes) là zot vine de To jalousie, To l’amour-propre. » Mo personnellement fer sa duah là : « O Allah, alors puni celui ki menteur (dans To lizié), sa soi-disant Mawlana Muhammad Ismail H.A (le Muballigh de bane Ahmadi dans Kerala) ki pé fanne bane fausse rumeurs lors To humble Messager de sa siècle là, To Munir Ahmad Azim. O Allah, montrer le monde la véracité de To humble Messager à travers défaite de sa soi-disant Mawlana ki persisté pou dévier To bane serviteurs dépi le droit chemin. O Allah, c’est en Toi mo place mo confiance, et c’est à travers Toi ki la vérité pou vine manifeste. Ameen. »