Text Box: بسم الله الرحمن الرحيم Khutba Jummah HAZRAT KHALIFATULLAH AL-MASSIH AL-MA’OUD Munir Ahmad Azim 17 Juin 2011 ~ (15 Rajab 1432 Hijri) (Résumé Khutba) Après Salam, Hazrat Khalifatullah Al-Massih Al-Maoud fine commence so Khutba avec Tashahhud, Ta’uz, Surah Al Fatiha, et ensuite li fine dire: وَأَطِيعُواْ اللّهَ وَالرَّسُولَ لَعَلَّكُمْ تُرْحَمُونَ ۝ وَسَارِعُواْ إِلَى مَغْفِرَةٍ مِّن رَّبِّكُمْ وَجَنَّةٍ عَرْضُهَا السَّمَاوَاتُ وَالأَرْضُ أُعِدَّتْ لِلْمُتَّقِينَ ۝ الَّذِينَ يُنفِقُونَ فِي السَّرَّاء وَالضَّرَّاء وَالْكَاظِمِينَ الْغَيْظَ وَالْعَافِينَ عَنِ النَّاسِ وَاللّهُ يُحِبُّ الْمُحْسِنِينَ ۝ Wa ‘atii-‘ullaaha war-Rusuula la-‘allakum turhamuun. Wa saari-‘uuu ‘ilaa maghfiratim-mir-Rabbikum wa Jannatin ‘arduhas samaawaatu wal-‘ardu ‘u-‘iddat lil-Muttaqiin. ‘Allaziina yunfiquuna fissarraaa-i waddarraaa-‘i wal-kaazimiinal-ghayza wal-‘afiina ‘aninnaas: wallaahu yuhib-bul-Muhsiniin. « Obéir Allah et le prophète afin ki ou recevoir grâce d’Allah. Dépêcher pou cherche pardon ou maitre et alle vers paradis, ki aussi large ki bane le ciel et la terre ensemble, et ki fine préparer pou bane ki suivre chemin Allah. Pou bane ki dépenser (en charité) soi ki zot dans prospérité ou en difficulté, pou bane ki retenir zot colère et ki pardonne les autres dimounes. Allah content bane ki faire du bien. » (Surah Al-Imran 3 :133-135) Mo pou attire l’attention lors le sujet de Tarbiyyat, et nous Tarbiyyat li étroitement lier avec l’époque actuelle, parski si bane générations actuelles pas gagne ene bon Tarbiyyat, bé bane générations à venir aussi pas capave gagne ene bon l’entrainement, et si ou pas fine capave faire Tarbiyyat de ou bane propres générations, bé ou pas pou capave faire Tarbiyyat de bane de ou l’environnement et bane les autres encore. Et bane dimounes ki dans la caze zot ena ene mauvais traitement avec zot madames et zot bane enfants et zot agir injustement are zot et pas accompli zot droit. Et si en ce ki concerne zot Tarbiyyat ou adopter la sévérité, bé c’est bane dimounes ki ni pou capave faire Tarbiyyat de zot la caze et ni Tarbiyyat de zot l’environnement. Et avec sa capave ena bane réactions très dangereuse – C’est-à-dire ki non seulement zot pou priver de bane l’aspé positif de Tarbiyyat, mais zot pou développe bane l’aspé négatif. Le travail du Jamaat Ul Sahih Al Islam, li pas seulement pou faire Tarbiyyat de nous bane madames et zenfants et li pas zis ki nous bizin ena bon traitement avec nous bane madames et zenfants. Au contraire c’est bane affaires ki nous pou commencer dans la caze, nous pou apprane dans la caze. Mais ensuite nous bizin propage sa dans nous l’environnement et dans le monde en entier. C’est dans sa façon là ki la base de Tarbiyyat de bane futures générations posé. Mais faudré ki bane base là poser aujourd’hui afin ki demain capave construire bane bâtiments lors là demain! Le sujet de Tarbiyyat avec laquelle fine lier sa, c’est l’obéissance Allah et l’obéissance du Messager. Allah dire obéir Allah et So Messager afin ki ou gagne bane miséricordes. La majorité des fois fine lier le sujet d’obéissance d’Allah et du Messager avec le Taqwa ou soi avec le succès. Alors puisque ti ena pou donne l’enseignement de miséricordes, alors Allah fine dire obéir Allah et So Messager afin ki ou capave recevoir la miséricorde lors ou. Et en résultat d’obéissance d’Allah et de So Messager, bé quel type, quel grandeur de miséricorde ki ou pou gagner? Dans le prochain verset, Allah pé dire ‘Rivaliser entre ou pou galope vers le pardon d’Allah et gagne le Jannat ki péna aucaine limite.’ – Le prix de sa paradis là, li pareil couma le ciel et la terre. Et sa Jannat là li lier avec sa Allah et sa Messager là ki dans zot ena le sujet de miséricorde pou l’univers. C’est Allah So Rahmat ki étaler lors tout l’univers kot Li fine crée Hazrat Muhammad (saws), et Muhammad (saws) fine vine ene miséricorde pou l’univers en entier. Maintenant kan ou obéir Hazrat Muhammad (saws), bé certainement ou pou attire bane miséricordes d’Allah lors ou. Donc, si ou pou obéir Allah et So Messager, bé ou pou capave participe dans le Rahmaniyyat d’Allah. Mais si ou tourne ou figure avec obéissance, bé autant même ou pou reste priver de miséricorde, ou pou aussi priver de bane grâces d’Allah. Donc, l’image ki fine tirer dans sa 2ème verset là, c’est-à-dire ene Jannat ki équivalent à le ciel et la terre, bé c’est ene miséricorde ki bocou pli grand ki bane miséricordes ki ou faire lors ou madames et ou bane zenfants. Et ene connexion profonde ki ena entre sa deux versets là c’est ki, nous fine faire nous vine responsables pou soigne nous madames et nous bane enfants, mais pou Hazrat Muhammad (saws), fine faire li vine responsable pou soigne l’univers en entier. Et pou li (saws), Allah fine fini décider et fine dire ki li pas fine ena aucaine manquement dans accomplissement de so responsabilité. Nous kan fine faire nous vine bane responsables de bane tipti cercles, si nous pas réussi dans nous responsabilités de tipti, bé ki quantité grand péchés li pou été ? Li pou ene grand privation parski fine donne nous bane responsabilités d’après nous bane capacités, d’après nous statut. Hazrat Muhammad (saws) so miséricorde ti étaler pou l’univers tout entier, bé c’est pourquoi so compte pou prend en référence avec l’univers en entier, et dans sa connexion là, à travers sa verset là, Allah pé lave li totalement de tout blâme. Si sa pas ti pou coumsa, bé Allah pas ti pou mentionne le sujet d’obéir Allah et So Messager afin ki ou gagne bane miséricordes. Si Hazrat Muhammad (saws) pas ti accompli tout bane miséricordes, bé couma Allah ti pou capave dire ki, si ou obéir le Messager, bé ou pou gagne tout bane miséricordes d’Allah ki ou en droit de gagner? Donc, c’est ene verset ki témoigne l’apostolat parfait et complètement réussi de Hazrat Muhammad (saws) kot fine montrer ki vraiment li fine accompli bane droit de Rahmat. Si ou obéir li (saws), bé ou bizin conner ki so miséricorde péna aucaine limite. Li équivalent grandeur le ciel et la terre. Donc, si dans sa duniya là nous servi bane miséricordes de Hazrat Muhammad (saws) comme ene moyen pou sa lotte duniya là, comme ene moyen pou continuer étendre sa bane miséricordes là, c’est sa la signification d’obéissance à Allah dans plusieurs façon. Mais nous pou gagne sa Rahmat là directement de Hazrat Muhammad (saws) kan seulement nous propage sa pli devant et kan nous pou faire bane dimounes boire sa bane miséricordes là. Et c’est sa bane dimounes ki continuer propage sa là ki zot vraiment bane ki montrer l’obéissance, zot accompli droit d’obéissance. Donc le sujet d’obéissance, li étalé en plusieurs types, en plusieurs formes. Kan Allah fine servi le mot Muttaqi ici, li veut dire ki en fait c’est lors bane Muttaqi même ki pou faire des miséricordes et c’est seulement bane Muttaqi même ki pou capave prend part dans Rahmat. Tout sa sujet là fine enveloppe ensemble et fine présenter comme ene seul bouquet. Maintenant quel est le détail de sa ? Parski connexion d’obéissance ti avec le Rahmat, c’est pourquoi maintenant dans sa 3ème verset là pé donne bane détails. Allah pé dire bane ki dépense quoique ce soit dans prospérité ou dans adversité – Donc sa Rahmat là, li matériel aussi. Et bane miséricordes matériel là aussi li pareil couma bane miséricorde matériel de Hazrat Muhammad (saws). Allah pé dire ki bane ki dépense dans période de prospérité aussi et bane période difficile aussi, alors Hazrat Muhammad (saws) fine vivre deux qualités périodes, et là aussi jamais fine ena quique manquement ou soi quique diminution dans so bane dépenses. Bane dimounes penser ki pou dépense dans bane période de facilité li bien facile. En fait c’est zot simplicité sa. C’est seulement bane dimounes ki comprend bien la nature humaines ki capave comprend sa bien. Dans la nature humaines ena la gourmandise, et en résultat de sa gourmandise là, boucou des fois kan du bien augmenter, ou avarice aussi augmenter. Et lerlà ou vine négligent lors bane tipti dépense de bane pauvres ki ou ti capave faire. Couma dire li entoure li de so égoïsme et reste séparer des autres mondes. Donc li fausse pou pensé ki dans période de prospérité li bien facile pou dépenser. Mais pou ene Momin li, que ce soit dans période de prospérité ou si dans période de adversité, sa pas faire aucaine différence lors li. Li dépensé pareil. Bane ki accompli droit d’obéissance d’Allah et So Messager, bé dans le monde matériel aussi zot faire zot vine digne pou gagne bane miséricorde de Hazrat Muhammad (saws) dans sa sens là, ki kan même zot gagne moins, là aussi zot faire efforts pou soulage la peine de zot bane frères ki dans problème. C’est ki veut dire, pareil couma de l’eau, prend depuis là-haut déssane en bas ; de la même façon ene dimoune ki en difficulté, si li guette en bas li, li pou trouver ki ena bane les autres dimounes ki pli dans problèmes ki li. Et si li ene vrai esclave de Hazrat Muhammad (saws), bé li bizin ena ene regard lors sa bane (pauvres) là, et ou bizin rode bane ki pli dans problème ki ou, bane ki pli nécessiteux ki ou, rode zot et dépenser lors zot. Kan nous dire ki Hazrat Muhammad (saws), même dans période d’adversité, li ti pé dépenser, bé sa veut pas dire ki li ti pé dépenser seulement lors bane ki pli en difficulté ki li, mais li veut dire aussi ki même ki li ti dans difficulté, là aussi li ti bien dépenser (malgré so difficulté). Ene quelqu’un ki vraiment riche c’est quelqu’un ki so nafs (ego) riche. Hazrat Muhammad (saws) ti pé accompli bane nécessité de bane ki dans pli bien ki li kan pourtant li-même li ti en difficulté. Sa c’est grand qualité de Hazrat Muhammad (saws) ki faire li gagne ene grandeur pou l’univers en entier. Hazrat Muhammad (saws) ti d’ene lotte nature même sa et nous trouver ki non seulement li ti pé aide bane ki pli bas ki li, mais aussi li ti pé aide bane ki pli haute ki li. C’est sa bane excellent qualités de Hazrat Muhammad (saws) ki pé mentionner dans sa bane versets là et li nécessaire comprend sa bien parski c’est li qui ti pé dépenser dans période de prospérité et aussi dans difficulté. Sinon ki faire Allah ti pou donne sa référence là, ki obéir Allah et So Messager afin ki ou recevoir la miséricorde lors ou ? En fait c’est l’image de Seerat de Hazrat Muhammad (saws) même ki fine tirer dans sa bane versets là. Et c’est vers sa même Seerat ki pé appelle tout l’humanité en entier. Donc, Jamaat Ul Sahih Al Islam ki sous bane instructions d’Allah fine prend la responsabilité pou redresse morales de bane dimounes ; li (le Jamaat) péna aucaine autre chemin à prendre pou faire sa, excepter ki ou adopter l’esclavage de Seerat de Hazrat Muhammad (saws), lerlà par la grâce d’Allah ou pou gagne sa l’occasion de faire Tarbiyyat de bane ki pli haut ki ou et aussi de bane ki pli bas ki ou. Parski kan ou dans bane périodes de facilite, bé naturellement ou pou aide bane ki pli bas. Mais avec sa bane Seerat là, pas pou ena aucaine obstacles et ou pou aide bane ki pli là-haut aussi ; couma dire de l’eau pou vine de la haut jusqu’à en bas mais de en-bas li pou alle aussi en haut. Sa c’est donc l’image de Seerat de Hazrat Muhammad (saws) ki fine tirer bien clairement dans sa bane versets là. Ensuite Allah continuer sa sujet là pli devant et dire : bane ki contrôle zot colère et ki pardonne les autres ; en fait colère et sévérité pas capave marche ensemble avec affection et l’amour, et sa ena connexion avec le problème. En fait Hazrat Muhammad (saws) ti pé faire miséricorde même lors bane dimounes ki ti pé faire dominaire avec li et bane ki ti pé incite so colère. Maintenant sa sujet là fine étendre dans ene nouveau cercle. Maintenant li népli le sujet de bane ki faire sacrifice financier mais maintenant li fine vine ene sujet d’excellent qualités morales. Allah pé dire ki c’est bane dimounes ki kan les autres cause zot ditort, kan les zot pé faire dominaire et injustice avec zot et zot en droit d’être en colère à cause de sa. Mais seulement zot maitrise zot colère par la grâce d’Allah, et zot pas arrête faire bon traitement are sa bane dimounes là, et sa bane bon traitement ki zot faire là, faire zot vine digne pou gagne miséricorde. Bane dimounes ki pas habituer pardonne les autres bé zot pas capave vine bane dimounes ki maîtrise zot colère. Dans la vie de tous les jours ena même bane erreurs ki arriver. Si ene dimoune pas capave tourne so regard et laisse passe sa bane erreurs là, bé li pou ene dimoune ki le contraire de sa, c’est-à-dire, li pou ene dimoune ki ena l’habitude de rode bane tipti erreur de bane dimounes, li continuer cherche bane fautes les autres. Sa qualité dimounes là tout le temps zot détruire zot la vie, au lieu ki zot vine ene source de miséricorde pou bane dimounes. Zot vine plutôt ene l’enfer pou zot. Et kan zot faire coumsa, zot croire zot pé faire reforme. Mais personne pas capave faire aucaine reforme en éloignant du Seerat de Hazrat Muhammad (saws). Si ou éloigne ou de sa Seerat la, ou pas pou gagne l’occasion même pou faire sa reforme là. Donc, ou bizin comprend sa situation bien ; tanque ki ou pas ena ene connaissance profonde de sa bane excellents qualité morales là, li pas facile pou ou mette sa en pratique. Hazrat Muhammad (saws) ti ena ene qualité naturel lors sa sujet de pardonne les autres là. C’est bane qualité ki émergé naturellement dans li. Mais pou contrôle colère là, sa li ene affaire ki demande zeffort, li demande ene la lutte. Et c’est seulement bane dimounes ki habituer laisse passer ki capave gagne sa qualité de contrôle lors la colère la. Bizin laisse passer bane erreurs, bane fautes de la vie de tout les jours. Bane erreurs ki tous bane dimounes commette, personne pas indépendant de sa. Sa bane qualité dimounes là, zot pas intéresse zot pou cherche bane tipti défaut de bane les autres, même si sa bane fautes grave là vine devant zot, là aussi zot tourne zot regard et zot faire comme-ci nannié pas fine arriver. Mais si avec ou contrôle de colère, ou encourage l’injustice et rébellion, li ene grand destruction. Allah dire dans ene lotte verset ki bane croyants zot dure envers bane mécréants et zot tendre envers zot-même. En fait Allah pé dire ki kan bane Momin là dure envers bane mécréants, sa pas veut dire ki zot bane sans manières, zot bane dimounes bien sévère et bien dure, non ! C’est ki à cause de zot Rahmat ki zot ena ki zot dure envers bane mécréants. Parski si zot pas sévère, bé pas pou ena aucaine reforme. Bane mauvais pou augmenter. Si pas adopter la dureté, bé ni li pou ene miséricorde pou sa bane dimounes ki pé crée bane problème là et ni li pou ene miséricorde lors bane victimes de sa bane dimounes ki pé crée désordres là. Donc, c’est sa le sujet de contrôle colère et pardonne aux autres ki ouvert devant nous en référence avec les autres versets. Hazrat Muhammad (saws) aussi ti coumsa personnellement et li fine faire so bane compagnons aussi vine coumsa. Bane compagnons là ti dure envers bane mécréants et tendre entre zot-même. Donc n’importe ki partie dans Quran ki ou rentrer, bé ou en fait rentre dans bane Jannat ki so grandeur étendre grandeur du ciel et de la terre. Ena tout sa bane zaffaires là, dans Quran, et sak verset là li alle sous ene base fondamentale. Péna aucaine contradiction entre bane versets. Au contraire ene verset aide ou pou comprend lotte. Donc, comprend bien ki sa zaffaire pardonne au autres dans sa sens là, et lerlà bane l’occasion de Tarbiyyat ki ou gagner, par la grâce d’Allah li pou bane Tarbiyyat ki ena la capacité de enseigne le monde en entier. Pour enseigne le monde aussi, ou bizin ena ene caractère universelle, et sans ki ou vine sous sa prophète universelle là, et sans ki ou apprane Tarbiyyat universelle avec li, bé ou pas pour digne pour faire Tarbiyyat universelle. Donc, pour Tarbiyyat ou bizin ena ene référence universelle et sa référence universelle là n’est autre ki Hazrat Muhammad (saws). Après Allah, c’est bien Hazrat Muhammad (saws) ki fine manifester tout sa bane attributs d’Allah là lors sa la terre là. Li ti vine comme-ci ene personnification de sa bane attributs là, et li ti ene quelqu’un ki dirige vers Allah. Li pas ti Allah mais kan ou guette li, bé couma dire ou pé trouve Allah. A cause sa, donc li obligatoire obéir li, sinon si ti ena pour obéir Allah directement, bé li ti pour ene affaire bien bien difficile. Si nek ti dire obéir Allah, bé couma nous ti pour conné couma obéir Allah? Sakaine ti pou obéir Allah d’après so propre caractère. Mais Quran fine faire bien attention lors là et fine tout les temps exhorte bane dimounes lors là. C’est-à-dire, kot kot fine mentionne le sujet de Obéissance, bé tous les temps, avec Allah fine mette aussi Hazrat Muhammad (saws) et sans ki ou réfléchi lors so bane qualités, sans so références, bé ou pas pou capave même comprend le sujet de Obéissance à Allah. Alors, nous bizin apprane avec Hazrat Muhammad (saws) et suive li, lerlà tous bane sujets pour vine bien claire. Que ce soi le sujet de Taqwa ou soi le Rahmat ou sois bane relations entre bane dimounes – Dans n’importe ki cercle ou pou guetter, que ce soi le sujet de sévérité, ou sois le sujet de l’amour et affection. Tous bane sujets pour vine bien claire si ou guette sa en référence avec Hazrat Muhammad (saws). Le plaisir de nous bane néki li trouve dans le fait ki nous pé faire sa pour le plaisir d’Allah. Si ene fois ou gagne goût de l’amour d’Allah, bé ou ti pour prêt pour accepter n’importe quoi pour ou gagne sa l’amour là. C’est pourquoi à propos bane Momin le Quran dire ki kan zot faire Ehsaan lors quelqu’un et si li remercier zot, bé zot dire à sa quelqu’un là ki pas bizin ou remercier nous, parski nous pas fine faire sa Ehsaan là lors ou pour nous gagne récompense et ni remerciement. Nous fine faire sa que pour l’amour et le plaisir d’Allah. Si ou l’objectif li le plaisir d’Allah, bé remerciement là, ou pas pour capave empêche li. Li ena pour vini même et personne pas pour capave arrête sa remerciements là, parski dans ene l’autre place dans Quran, Allah fine donne instructions à bane dimounes pour ki zot remercier. Donc, pas fine empêcher faire remerciements ; au contraire fine enseigner pour remercier, mais c’est pour accepter remerciements ki fine défanne, parski celui ki accepter remerciements, so nafs (ego), manifester – so lékaire vine gros. A ce moment là, sa créer bane ti tâche dans la pureté de so l’intention, et lerlà li intéresser avec remerciements même, li gagne goût et plaisir kan bane dimounes remercier li. Ena ene expression ki dire, faire Néki et mette li dans la rivière, faire Néki et oublier li, faire Néki ene tel façon ki kan ou fini, faire li noyer dans la mer et ou pas conner même kot li fine aller. Parfois ene bane cadavre kan zot noyer pas gagne zot. Maintenant, kot ou pour alle gagne bane Néki si ou noye zot ? Kan ou fer Ehsaan lors quelqu’un, pas avec l’intention pour gagne plisse en retour, ni ou bizin ena sa désire là ki Allah ranne ou plisse ki sa lors sa duniya là, ni ou bizin faire Ehsaan lors quelqu’un pour ki li remercier ou et ou gagne tranquillité du cœur avec sa. Faudré pas ki ou attane ki d’ene la main ou pé donne quelque chose et toute suite dans ou lotte la main ou pé gagne quelque chose. Donc, en vérité le sujet de remerciements, li péna connexion avec faire Néki pour le plaisir d’Allah. C’est pour sa raison là même ki dans l’humilité aussi Hazrat Muhammad (saws) ti gagne le stage le pli haut. Tous séki li fine faire, li fine faire sa pour l’amour d’Allah et en retour li fine gagne tellement des récompenses ki lerlà, tout séki li ti fine faire là, ti pé paraite comme-ci ene nannié ditout. Et à cause sa l’amour là même bane difficultés ki zot ti pé cause li, ti paraite bien simple et facile à supporter. C’est pourquoi kan parfois toute la nuit Hazrat Muhammad (saws) ti pé faire duahs, faire Namaz et ti pé demande pardon à Allah, bé bane dimounes ki pas comprend sa sujet de l’amour et de l’humilité là, zot pas pour comprend sa. Tout séki li ti fine faire, li ti fine faire pour l’amour d’Allah et li ti tellement récompenser pour sa, comme si toute longue so la vie li fine grandi dans le Godi d’Allah. Hazrat Massih Maoud (as) aussi fine mentionne sa sujet là dans sa sens là : O Allah ! Li couma dire jamais mo fine sorti de To Godi. Bane misères ki bane Khayr (bane ki pas ena la foi) cause moi, li couma dire pas fine arrive moi nannié. Et si li arriver aussi li pas cause moi nannié, c’est parski mo dans To Godi. Zot ti pé continuer cause moi la peine mais O Allah, To l’amour change sa bane la peine là en Rahmat. Donc, si sakaine parmi nous comprend sa bane sujets ki fine traité aujourd’hui là bien, li pour avancer dans sa chemin là et tout so bane difficultés pour vine facile et li pour continuer gagne récompense de sak difficultés. Nous bizin continuer marche lors le droit chemin, le chemin de Hazrat Muhammad (saws) et nous bizin apprane ene par ene pour adopter sa bane qualités morales de Hazrat Muhammad (saws). Et le Quran et Hadiths fine mentionne tous sa là en détails. Ki Allah aide sakaine parmi nous, pour comprend et aussi pour mette sa en pratique, Insha-Allah. Ameen.