Text Box: بسم الله الرحمن الرحيم Khutba Jummah HAZRAT KHALIFATULLAH AL-MASSIH AL-MA’OUD MUNIR AHMAD AZIM Munir Ahmad Azim 18 Mars 2011 ~ (12 Rabi’ul Aakhir 1432 de l’Hégire) (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine dire: رَبُّكُمَا عَنْ هَذِهِ الشَّجَرَةِ إِلاَّ أَن تَكُونَا مَلَكَيْنِ أَوْ تَكُونَا مِنَ الْخَالِدِينَ Rabbu-kumaa ‘anhaazihish shajarati ‘illaaa ‘an-takuunaa malakayni ‘aw takuunaa minal khaa-lidiin. « Ou Maître fine empêche ou approche sa pié là, pou ki ou pas vine deux anges et ki ou pas capave vivre éternellement. » (7 :21) Zot bizin connaît ki désire ki l’homme ena pou li dirige li par li-même et aussi so égo ki li ena (pour li ena so propre volonté), tous les deux ena bane mauvais consékances et zot représente bane grands danger. C’est par exemple la volonté pour fer séki li envie (par so propre volonté) ki fine pousse Adam pou mange fruit de sa pié là. Satan ti dire Adam et Eve : « Ou Maître fine empêche ou approche sa pié là, pou ki ou pas vine deux anges et ki ou pas capave vivre éternellement. » Satan ti ena ene plan mais le plan d’Allah ti pli grand et supérieur et alors bane complots et mauvais l’intentions de Satan pas fine capave abouti. Satan ti jaloux Adam et ti pé rode gagne l’amour exclusif d’Allah, mais dans li alle fer séki li fine fer, alors, au lieu de l’amour d’Allah, c’est la colère d’Allah ki li fine attire lors li. Le plan d’Allah ti trouve dans le bien-être de l’homme (bane humains), ici en l’occurrence pé fer référence à Adam, et Allah ti envie élever au plus haut niveau de So estime, et de ce fait faire li vine So Khalifa lors la Terre. Kan Adam fine entende bane paroles de Satan, ki ti pé invite li pou mange fruit sa pié là, alors Adam innocent, et sans conne bane mauvais l’intentions et mauvais guidances de Satan fine commence réfléchi et alors li fine fini par conclure ki li envie reste toujours (sans limite) à côté de So Bien-Aimé (Allah) et sa ti so but, pour gagne l’amour d’Allah, et pou vine aussi pure ki bane anges été, parski si nous guette bien, li (Adam) fine penser ki l’état angélique (de bane anges) li beaucoup pli meilleur et supérieur ki l’état humain. C’est zis après ki li fine faire sa reflexion là (dabbara) ki Adam fine accepter pou alle mange fruit sa pié là, et so comportement fine vine coumsa, à cause li fine prend la situation en main (par so propre volonté). Li ti ena ene désire, et sa ti l’amour suprême d’Allah, et kan li fine observe bane l’états pures de bane anges du ciel, et le fait ki pareil coumsa li ti envie vivre éternellement kot so Bien-Aimé (Allah), alors Adam fine décider ki li bien plus meilleure pour li pou vivre dans l’Amour éternelle d’Allah et pou atteindre ene haut niveau de l’état de bane anges au lieu pou reste dans l’ignorance de so bane origines (si arriver ki li alle fini – disparaite - avant même ki li goûte le bien-être complète dans l’amour d’Allah). Mais alors, c’est sa précisément ki Allah ti oulé ki li faire afin ki Li envoye li lors la terre et pou faire li vine so Khalifa dans so nouveau la caze, so nouvo l’environnement. Saki paraite couma ene descente lors la terre li en réalité ene élévation spirituelle. C’est pas pour humilier ou diminuer rang Adam ki Allah fine envoye li lors la terre, mais c’est pou amène li à la perfection. En effet, Adam à partir de sa moment ki li fine vine lors la terre là, li fine commence doucement doucement so élévation vers Allah, kot li commence grimpe ene tel l’échelle spirituelle ki faire li vine pli près avec Allah, et kot Allah fine béni li avec So élection personnellement, kot c’est Allah Li-même ki élire li et faire li vine So Khalifa. Et de l’autre côté, Adam non seulement fine gagne proximité avec Allah, mais aussi li fine alle conner ki été l’humilité et ki sa veut dire pou pas ena nannié (kot li bizin alle débrouyer pou gagne so la vie – manger, boire etc.) – et alors Adam alle réaliser ki sa l’état de pauvreté, de misière et d’humilité ki pli parfait (kot c’est là-dans ki li retrouve So Rab). Tout bane croyants bizin ena sa conviction là ki ene Prophète ou ene Envoyé so condition pas changer, mais si li changer, alors c’est zis pou ki so condition améliorer kot li éléver à ene condition beaucoup pli supérieur. Et c’est sa ki nous comprend par signification de sa verset Quran là : « Et la vie future pou certainement meilleur pou toi ki cène la vie là. », parski en vérité condition ki Allah pou accorde toi O prophète après sa (la vie là) pou pli bon, pou pli meilleure ki la vie ki to pé vivre lors sa la terre là. Et sa vérité là, nous fine reconnaite li en la personne du Prophète de l’Islam Muhammad (saws), ki en empruntant bane pas de so ancêtre, li fine réussi là kot personne pas fine capave réussi avant. Azordi encore, l’occasion fine présenter à sa humble dimoune ki présent devant zot, parski Allah fine choisir So nouveau Adam afin ki Li créer ene nouvo lémonde. Malgré ki mo bien faible et impuissant, Allah fine élève moi au niveau de So Khalifa, et fine fer moi gagne en même temps mission pou fer revivre l’Islam, pou continuer le travail de Hazrat Muhammad (saws), ene telle mission kot Allah fine bizin fer revivre le Saint Prophète (saws) – so second venue – pour sa nouveau le monde là. Adam et Muhammad (ki la paix lors zot deux), malgré ki zot deux dimounes différents, mais de point de vue d’Allah, Li fine fer zot vivant en moi-même (en tant ki le Khalifatullah & Rassoollullah) afin pour faire revivre l’Islam, pou guide l’humanité pou ki li reconnaite so bane erreurs et so élève li de dégré de pécheurs et fer bane dimounes vine bane bien-aimés d’Allah. Kan zot alle réussi comprend sa, alors zot bizin aussi comprend ki le plan d’Allah – parski c’est Allah ki gouverner (tadbir) et c’est Allah ki fer séki Li envie (C’est So propre volonté ki marché – pas la volonté de l’homme) (Mashi’a) – alors le plan d’Allah c’est pour peupler la terre avec bane zenfants Adam (as), et ki de par So (Allah) propre volonté, fine ena et pou continuer ena parmi zot bane dimounes vertueux et aussi pou ena bane dimounes ki pou fer zot-mêmes ditort. Allah So sagesse fine depuis longtemps concevoir et manifester tous sa là dans le monde du Témoignage (‘alam al-Shahada) – c’est-à-dire, sa la vie ici-bas là avec tous so bane attractions temporaires. C’est pourquoi sa fruit là fine vine la cause de la descente d’Adam lors la terre, et en même temps sa apparition d’Adam lors la terre fine vine ene moyen pou Allah pou montrer degré supérieur de Khilafat ki Allah fine accorde li. Alors ki pli noble ki sa, ki ene péché fer nous gagne le Khilafat (d’Allah) lors la terre, et kot de sa même péché là fine ena la manifestation de la repentance ki fine vine ene Sunna (tradition) pour tous bane zenfants Adam ziska le jour du jugement ! Kan Adam fine vine lors la terre, alors sa ti en effet ene décret d’Allah, ene tel décret ki li fine décider bien avant ki Li fine créer léciel et la terre. Avant même ki Li fine créé Adam, Allah fine fini créer li pour li vine lors la terre. Alors sa li ene plan bien calculer ki Allah – Maître bane léciel et la terre – fine fer, et sa li en conformité avec séki Quran-e-Kareem dire kot Allah le Tout-Puissant dire : « Mo pou place ene Mo représentant (Khalifa) lors la terre. » Alors ki kalité sa décision là li ene décision rempli de bienveillance pou Adam kot li alle mange sa fruit de sa pié là à travers l’épreuve de Satan, et ensuite Allah envoye li lors la terre comme So Khalifa et comme ene guide (Imam) pour bane générations ki pou vini ensuite ! Après ki nous arrive à sa conclusion là, nous bizin astaire énumère bane faveurs ki Allah fine bénéficier au cours de sa l’évènement là ; nous alle trouver ki l’Élu ena avec Allah bane tels l’états ki li pas partage avec personne, et ki c’est à travers sa bane l’états là, à l’exclusion de bane dimounes ordinaires, ki Allah exécute So plan. Le fait ki li fine mange sa fruit là et Allah fine envoye li lors la terre après sa, tous sa fine fer gagne bane bons conclusions. Dans le paradis, Adam et Eve ti conne Allah seulement sous So bane attributs de Pourvoyeur (Al-Razzaq), Donateur (Al-Mu’ti), et Bienfaiteur (Al-Muhsin). Mais dans So Bienveillance secrète (Lutfihi Al-Khafi) ki préside au plan d’Allah, alors Allah fine content pou manifester Li-même à zot comme étant le Clément (Al-Halim), Celui ki cachiette (bane défauts) (As-Sattar), le Pardonneur (Al-Ghaffour), l’Indulgent (At-Tawwab), Celui ki choisir (So bane élus) (Al-Mujtabi). So clémence fine permette ki Li (Allah) pas fine présser pou puni zot pou zot action, et c’est sa-même caractéristique de sa attribut là, ki permette à ene pécheur (ki li pour pardonne li après et accorde li So grâce, ou pou mieux exerce lors li So puissance kot Allah fer li subir ene vengeance (punition) ki fer bien di mal). Mais Allah fine de plus en plus révèle Li-même à zot comme étant ene Étre ki cachiette (zot bane défauts). Parski après ki zot fine mange sa fruit là, zot nudité fine vine apparent parski zot fine perdi zot l’habillement du paradis. Adam fine commence cachiette zot bane nudité avec bane feuilles du paradis pareil couma fine mentionner dans Quran Shareef : « Zot fine recouvert zot avec bane feuilles du jardin du paradis. » C’est sa voile avec l’aide de quoi Allah fine recouvert zot. Mais Allah ti envie donne bane tels connaissances à Adam parski c’est li (Adam) ki Li fine choisir (élu), et de sa élection là, li ti bizin atteindre deux niveau spirituelles : ene c’est le Retour vers Allah – le répentir (al-Tawba ilayhi) et l’autre c’est niveau de la guidance divine (al-Hadaya indahu). Alors le fait ki Allah ti envie informe li (Adam) ki Li (Allah) fine choisir (élire) li et pou montrer li commié l’attention Li (Allah) capave démontrer après la création, alors Allah fine prédestine li pou mange fruit de sa pié là, mais sans ki sa acte là li vine ene raison pour détourne Li d’Adam ou pou prive li de So soutien. Au contraire, sa ti pour Allah ene l’occasion pour manifester So l’affection à Adam. Allah content ki So bane serviteurs – bane humains – zot tourne vers Li avec repentance après ki zot fine commette ene mal. Adam fine fer ene bien malgré ki sa bien là ti masqué en mal, parski c’est après ki li fine dessane lors la terre ki li fine capave enfin trouve so vrai place (position) en tant ki l’élu d’Allah, et c’est à travers so l’arrivée lors la terre ki li fine capave pli ki sa dépasse le stage de bane anges afin pour li gagne le titre de bien-aimé d’Allah. En tant ki humains, eski nous pas reconnaite ki l’amour, si li sincère, capave transcende bane péchés au point ki nous accorde le pardon à celui ki nous content ? De même, ou bien mo préciser, même plisse sa, l’amour ki Allah ena pour nous li bien pli grand ki l’amour ki nous accorde à nous bane madames ou zenfants ou nous bane proches parents ou camarades. L’amour d’Allah li bien pli grand et li au-delà de la capacité de l’homme, parski Allah pardonne tous bane fautes et péchés graves, sauf bien entendu le Shirk (kot associer bane les autres kitchoses avec Allah). La suite de sa verset (ki conclure le récit de l’arrivée de Adam lors la terre) : « alors So Maître fine choisir li » pas bizin prend comme-ci sa pé indique ene moment précis de l’election ki Allah fine fer, parski sa décision d’Allah là li daté avant même l’existence d’Adam. Li veut dire simplement ki c’est après la transgression seulement que bane l’effets de sa élection là fine vine claire et c’est pourquoi Allah fine précise sa fait là, kot Li dire: « alors So Maître fine choisir li, fine accepter so repentir et fine guide li », c’est-à-dire : alors, bane l’effets de sa élection là fine apparaite lors li, ainsi ki l’effet de la l’attention ki Li (Allah) fine donne li (puisseki Li fine permette Adam pou demande le pardon, pour repentir et nous bizin garde à l’esprit ki c’est Allah Le Bien-Aimé Li-même ki fine enseigne li (Adam) sa duah de repentance là), et aussi Allah fine fer reflecter lors li So guidance (la guidance divine). Sa verset là li contenir donc trois indications : celui de l’élection, celui du repentir ki représente so conséquence, et celui de la guidance ki représente la conséquence de repentance. Kan Li fine envoye Adam lors la terre, Allah fine révèle Li-même à Adam par So Sagesse, pareil couma Li ti révèle Li-même à li par So puissance extraordinaire dans paradis ; et sa, c’est parski sa lémonde (lors la terre) là li apparaite comme ene lémonde de bane causes et de bane intermédiaires. Kan Adam fine vine lors la terre, li fine apprane l’agriculture et couma pou laboure la terre, et li fine aprane aussi tout saki bizin afin ki li vivre lors la terre, afin ki Allah réalise séki Li fine déjà avant annoncer : « Pourvu ki Li pas faire zot sorti du paardis, parski sinon zot pou malheureux. » Sa malheur ki Allah pé indiqué ici là li pas le contraire de la félicité éternelle, mais simplement fatigue ki Adam (et bane dimounes) pou ressenti kan zot pou ena pou travail ; ene meilleure preuve de sa c’est ki Allah pas fine dire « parski zot pou malheureux », parski c’est l’homme ki bizin gagne tous fatigues et pou prend charge so ménage, et non pas la femme, parski ene l’autre verset dire, « bane z’hommes ena l’autorité los bane femmes en raison de bane vertus par quoi Li (Allah) fine élève ene partie lors l’autre partie. » C’est ene missié ki bizin responsable de so la caze (tous bane tracas ki sa inclure) parski li réussi travail so spiritualité et réussi arrive à ene stage haute, alors sa pou permette li rentre dans bane grâces divine, et kot sa pou fer li surpasse l’état spirituel d’ene madame, parski nous bizin reconnaite ki quoi ki la femme li la servante d’Allah et ki li aussi li capave accède à l’amour divine, mais jamais li pou capave supasse stage ki fine réserver zis pou bane missiés, car l’homme li représente l’espoir de Khilafat d’Allah lors la terre, et la femme, so madame li représente l’espoir pour la continuation de l’humanité, de sa Khilafat (d’Allah) là avec la collaboration de so missié. De ce fait, le malheur ki sa verset là pé causer pas signifier ici la rupture ou l’éloignement. Et même si sa ti le cas, nous ti pou bizin donne li ene interprétation acceptable et faire li vine synonyme de bane la peines et d’endurance et sa ti pou ene interprétation parfaitement acceptable, afin ki nous gagne la satisfaction d’Allah, ki li dans sa le monde là, et pour tous les temps aussi. Ki Allah accorde à nous tous, missiés et madames bane capacités ki bizin dans la spiritualité afin ki Allah combler nous bane faiblesses et faire de sa nous la forces ; afin ki So l’aide vine le symbole de So l’amour pour nous, et afin ki demain bane Khalifa d’Allah capave prend naissance pour le renouveau de la religion, de la guidance et l’approche vers le pardon ki ene signe de rapprochement avec Allah pour bane générations à venir. Insha-Allah, Ameen.