بسم الله الرحمن الرحيم

 

Khutba Jummah

 

HAZRAT KHALIFATULLAH AL-MASSIH AL-MA’OUD

 

Munir Ahmad Azim

 

19 Août 2011  ~

 

(18 Ramadhan 1432 de l’Hégire)

 

RAMADHAN MUBARAK

 

(Résumé Khutba)

 

Après Salam, Hazrat Khalifatullah fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

Ramadhan li ene mois d’excitation pour la plupart de bane musulmans entier lémonde. C’est le mois ki Quran fine révélé la première fois, c’est ene mois kot nous garde Roza, ene mois kot nous faire beaucoup la récitation du Quran et nous essaye fini Quran, ene mois kot nous fer le Namaz Tahajjud et Qiyaam Al-Lail, ene mois kot nous concentrer nous dans Salaatul Tarawih, ene mois de Sadaqua et Zakaat. Li aussi ene mois de bane activités sociale entre bane Musulmans. Avec sa mois là, la style de vie de bane Musulmans changer, la nuite vine couma lizour tandis ki lizour – avant midi – vine couma la nuit.

 

Dans bane pays Musulmans surtout, bane bazaar fermé. Bane programmes d’éducation dans bane l’école et bane l’université changer. Bane employés de Gouvernement et bane les autres secteurs de la société pas travail de bonheur mais à soir après Iftaar, zot alle dans zot bane travails, zot bane bureaux et zot travail pour quelques l’heures temps ziska minuit.

 

L’excitation spirituelle de Ramadhan li dépasse tous bane les autres activités les reste l’années. Personne pas capave explique, pas capave décrire la joie de Ramadhan à moins ki li vivre sa et li pratique li dans ene telle façon ki li gagne bane bénédictions de so bane jours et so bane nuits. Pour sa bane raisons là et beaucoup d’autres, mo pou mette devant zot ene liste de recommandations pou bane ki envie tire le maximum de sa mois là, si zot envie jouir le Ramadhan pleinement.

 

Pour ki ene dimoune recevoir bane benedictions de Ramadhan, li bizin prepare li bien en avance, au moins dans le mois de Rajab, le 7ème mois du calendrier lunaire. Tandis ki Ramadhan li le 9ème mois, Rajab li le 7ème mois du calendrier lunaire. Alors nous pou ena ene bon boute létemps pou forme nous pou recevoir sa mois là couma bizin.

 

Allah (swt) fine révèle ene Ayaté Quran dans Surah At-Tawbah concernant bane quatre mois ki sacré. Allah (swt) dire : « Pou Allah, quantité mois dans ène l’année qui Li fine prescrire jour qui Li ti créer banne léciel et la terre, c’est douze mois, parmi là-dans, quatre sacré. » (9 : 37)

 

Astaire kan nous guette bane Hadiths, fine rapporter par Hazrat Abu Bakr (ra) et aussi fine préserver dans Sahih Bukhari ki le Saint Prophète (saws) fine dire : « Oui, le temps fine fer évoluer et fine retourne à so l’état kan Allah fine créer bane les ciels et la terre ; l’année li composé de douze mois ; quatre là-dans sacré ; trois là-dans vine ene derrière l’autre, Dhul-Qadah, Dhul-Hijjah et Muharram ; et ensuite ena Rajab ki entre Joumada et Shabaan. »

 

Alors, li recommander ki bane Musulmans augmente zot bane Roza dans sa bane mois là afin ki zot rapproche zot avec Allah. En plisse de sa, sa pou ene l’entrainement pou zot pou le Ramadhan avant ki li vini.

 

Mo donne ene exemple pareil couma ene l’équipe football, li pas vine jouer comme sa même ; des mois et des mois, li bizin faire bane l’entrainements, pou ki li capave vine jouer dans bane matches compétition ou avec ene grand l’équipe international, pou ki li capave faire face, remporte la victoire, ou li faire ene nul par tous pourvu li pas gagne ene batter-bœuf. Si li nek vine lors le terrain football comme sa même sans l’entrainement, eski li pou capave jouer 90 mins football et si pou ene final, si zot faire nul par tous (les 2 cotés) eski li pou capave jouer prolongation. Ici, dans le monde spirituel, là mo pé cause 6 Nafils après 29 ou 30 jours Roza de Ramadhan.

 

Nous bien-aimé prophète (saws) ti habitué reste Roza la plupart jours dans mois Shabaan. Fine rapporté par Hazrat Aisha (ra) et sa fine mentionner dans bane livres Hadiths de Bukhari et Muslim ki li fine dire : « Mo pas fine trouve le Messager d’Allah complète Roza dans aucaine les autres mois excepter Ramadhan, et mo pas fine trouve li garde autant jours Roza excepté dans mois Shabaan. »

 

Aussi, fine rapporter par Oussama bin Zaid (ra) ki : Oussama (ra) fine dire : « O Messager d’Allah, mo pas fine trouve ou garde Roza autant jour excepter dans Shabaan. » Le Saint Prophète (saws) fine réponde li : « Beaucoup dimounes pas conne signification de sa mois là ; li trouve entre Rajab et Ramadhan. Dans sa mois là, bane actions de bane dimounes monte vers le Maitre de tous bane lémonde (c.à.d, Allah). Mo content ki mo bane actions zot éléver kan mo dans ene l’état Roza. » (Nasa’ï, Abu Dawood)

 

Ramadhan li mois kot nous garde Roza (2: 184). C’est le mois kan Quran fine révélé comme ene guide pour l’humanité en entier (2: 186). C’est le mois kot bane anges et Hazrat Jibreel dessane pou béni nous et donne nous bane bons nouvelles.

 

Pou garde Roza ene sel coup, li bien difficile, à moins ki nous prépare nous-mêmes pou sa, sinon, dans bane premiers mêmes nous pou gagne mal de têtes, vertiges, senti nous gagne faim, soif et nous pou gagne encore bane les autres complications au niveau nous la santé physique. Le foi, pancréas, la rate, l’estomac, lé cœur, cerveau et bane les autres organes travail ensam (dans période Roza) pou ajuster le corps à sa nouvo situation physiologique là, et en même temps, zot essaye nettoye le corps de tous bane toxines et bane poisons ki ena endans (nous les corps). Tous bane organes lécorps alle retire tous sa bane toxines et poisons là et pou purifier nous les corps de tous bane matières initiles. Li pas facile pou tous sa bane organes là pou faire zot travails facilement, et li pas facile pou nous aussi (pou garde Roza). Pour sa raison là, nous ressenti bane mal de têtes, et bane les autres débalancement biologique et mentale. Alors, li meilleur ki nous prépare nous en partie et étape par étape avant ki Ramadhan vine couma ene choque pour nous.  

 

Alors, mo donne zot ene séries de bane recommandations pou bane kitchoses ki bizin éviter. Vaut mieux prévenir ki guérir. En évitant certains activités, nous bizin combler sa vide là par kitchose meilleur, sinon, kan mois Ramadhan vini, et ki ene dimoune pas conner couma profite li, alors li pou capave perdi so bane bénédictions. Sa bane recommandations là zot destinées pou éviter avant ki Ramadhan vini et sa bane recommandations là nous capave mette li en pratique astaire là aussi, au cours de Ramadhan.

 

1. Essaye réduire le nombre l’heure temps ki ou passer devant télévision, et au lieu de sa, lire le Quran Shareef, bane Hadiths, Malfoozat (écrits) de Hazrat Massih Maoud (as), faire Zikr (mazine Allah) et lire tous bane les autres documentation ki ena lors l’Islam.


2. Évite guette bane photos Haraam.


3. Évite aller théâtre ou cinéma ; essaye plutôt alle Masjid et faire sa vine ene l’habitude au moins ene fois par jour.


4. Évite trop manger, et essaye réduire zot bane façons ou l’habitude manger. Pas manger, sauf si zot faim, et essaye pas trop rempli zot l’estomac. 


5. Pour bane ki ena l’habitude boire café, di thé ou jus etc., faites zot mieux pou réduire zot consommation.


6. Pour bane ki ena l’habitude fume cigarettes, essaye arrête sa l’habitude là avant ki Ramadhan vini, sinon Ramadhan vine difficile pou ou ; sinon zot pou continuer reste fumer même, même si zot pé reste Roza ; zot pou fumer pendant Sehri et zis couma ou fini fer Iftaar, ou pou alle fume beaucoup cigarettes. Mette bien dans zot l’esprit ki Ramadhan li ene l’occasion en or pour bane fumeurs musulmans pou arrête fumer, pou zot propre bénéfice (spirituelle, et de côté zot la santé aussi).


7. Pou bane ki ena l’habitude écouter la musique, la musique rap et bane chantés de bane pays de l’ouest, réduire les temps ki zot passe là-dans. Au lieu de sa, remplace sa létemps là avec récitation ou écoute Quran.


8. Pou bane ki content jouer cartes, dominos et bane les autres jouer (même bane jeux de hasards), essaye évite tous sa là autant ki possible et rempli zot lé temps par Zikr et aide bane dimounes pauvres.


9. Pou bane ki content alle faire bane pique-nique ensam avec camarades pour profite la vie sociale, essaye éviter rencontre sa bane camarades là et faire bane kitchoses initiles ensam ; faire en sorte au lieu de sa ki ou réguliers dans ou cinq fois Namaz, et bane Nafil et faire beaucoup duas (dans Masjid si possible).


10. Si ou ena bane camardes musulmans qui pas pratique l’enseignement de l’Islam, faire de zot mieux pour faire Dawa avec zot.


11. Si ou habituer voyager souvent pour business, essaye faire ou business dans pays même, afin ki ou reste près avec ou famille, et Jamaat locale.


12. Si ou ena l’habitude reste lever jusqu’à minuit, essaye alle dormi bonne heure, de sorte ki ou capave lève bonne heure pour Namaz Fajr et aussi pour Tahajjud.


Personne pas capave alle n’importe kot sa sans prépare li. Et personne pas capave invite ene dimoune sans faire préparation pou recevoir sa invité là. Pareillement, pour accueillir Ramadhan, mois kot nous garde Roza, nous bizin prépare nous pou accueillir sa mois béni là, Insha-Allah pour l’autre Ramadhan qui ki pou vini. Pou prépare nous avant ki Ramadhan vini li beaucoup mieux ki attane li vini. Astaire ki la moitié de sa mois là fine aller, alors nous bizin faire le maximum pou profite les reste jours dans sa mois de Roza pariel couma Quran et Sunnah fine recommande nous et nous bizin prépare nous moralement  aussi afin pou accueillir Ramadhan, mois Roza à tout moment au cours de nous la vie lors la terre. Kan nous bien préparer pour ene kitchose dans nous la vie li ene signe de sagesse et de maturité. L’entrainement, étape par étape li ene bien bon l’idée, au lieu ki ene formation dernier minute ou pou faire face à ene choque totale, ene sel coup sans ki nous attane !


Mo espérer et mo faire duah ki bane Musulmans prépare zot même bien, ki zot faire bane tels l’entrainement bien avant ki Ramadhan vini, et même Hajj. En plisse de sa, bane ki ena la sagesse, zot zot pou entraine zot bien en avance ; pas zis sa, mais zot entraine zot, zot prépare zot pou ki zot quitte sa le monde temporaire là pou alle vers ene la vie éternelle. La mort li le plus grand de bane choque; alors nous bizin entraine nous couma nous pou pratique bane l’enseignement de l’Islam. Personne faudé pas tarder pou mette en pratique bane l’enseignement de l’Islam. Personne péna l’assurance ki li pou vivre ene jour en plisse. Demain capave pas vini, alors fer vite pou ki ou profite de bane bénédictions et récompenses ki vine de côté d’Allah. Ameen.