|
بسم الله الرحمن الرحيم
Khutba Jummah
HAZRAT KHALIFATULLAH AL-MASSIH AL-MA’OUD MUNIR AHMAD AZIM
Munir Ahmad Azim
(16 Safar 1432 Hijri)
(Résumé du Khutba Jummah)
Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine dire:
بَلْ كَذَّبُوا بِالْحَقِّ لَمَّا جَاءهُمْ فَهُمْ فِي أَمْرٍ مَّرِيجٍ ﴿6﴾ نَحْنُ أَعْلَمُ بِمَا يَقُولُونَ وَمَا أَنتَ عَلَيْهِم بِجَبَّارٍ فَذَكِّرْ بِالْقُرْآنِ مَن يَخَافُ وَعِيدِ ﴿46﴾ Bal kazzabuu bil-Haqq lammaa jaaa-‘ahum fahum fiii ‘amrin-mariij. - Nahnu ‘a'-lamu bimaa yaquuluuna wa maaa ‘anta ‘alayhim bi-jabbaar. Fa-zakkir bil-Qur-‘aani mayy-yakhaafu wa-‘iid!
“Zotte rejette la vérité, ki zot fine gagner. Zot reste alors dans ene l’état de confusion.” – “Nous conné séki zot dire. Cependant toi, to pas bizin force zot. Mais rappler, avec le Quran, celui ki craindre Mo menace.” (Chapitre 50 Qaf: 6 & 46)
Mo fine apprane ki ene dénommé Shaukat fine pose bane questions lors mo compte et ene l’autre dimoune de l’Association Ahmadiyya li, li fine informer à propos séki Abdur Ghaffar Janbah Saheb fine dire lors proclamation de Musleh Maoud ki Hazrat Mirza Bashiruddin Mahmood Ahmad (ra) fine fer et à propos mo proclamation comme le Messie et le Khalifatullah de sa l’époque là (et aussi celui de Musleh Maoud).
Mo cite séki Abdur Ghaffar Janbah Saheb fine dire :
« Prend note ki pareil couma dans Ummat-é-Muhammadiyya dans Ahmadiyyat, continuation de sa succession de sa reforme générale ki ti commencer d’après bane paroles béni de Rasool Allah, Insha-Allah li pou reste contigner ziska Qiyamat. Toutefois, d’après bane révélations et paroles de Mirza Sahib, ena zis ene sel bonne nouvelle de la venue d’ene sel Réformateur Promis, ki Allah Le Plus Grand fine appelle Zaki Ghulam dans So propre mots. Huzur fine donne le nom de Musleh Maud à so Zaki Ghulam (garçon pure). Après Mirza Sahib, dans Ahmadiyyat, sa Musleh Maud bizin paraître à la tête du 15ème siècle. D’après le respecté Shabeeb Haneef et aussi lors le website de Munir Ahmad Sahib (Jama’at Sahih Ul Islam) so proclamation ki li le Khalifatullah, Massih Maud, et Mujaddid bien présent. Maintenant la question c’est, eski Munir Ahmad Sahib proclamer ki li le Zaki Ghulam Promis (Musleh Maud) ? Si li proclamer ki li Musleh Maud dans Jama’at Ahmadiyya, alors avant li, ena déjà proclamation de Khalifa Sani dans Jama’at Ahmadiyya ki li le Musleh Maud. A propos Munir Ahmad Sahib, mo fine être informé ki li dire ki Mirza Bashir-ud-Din Mahmud Ahmad Sahib ti le premier Musleh Maud et ki li, li le 2ème Musleh Maud. Mais ene kitchose ki bizin claire c’est ki dans Ahmadiyyat pas capave ena deux Musleh Maoud ? Maintenant la question c’est à propos proclamation de Khalifa Sani et Munir Ahmad Sahib, laquelle proclamation (entre les deux) basé lors la vérité ? Pas oublier jamais, kan garde à l’esprit la différence entre “Musleh” (Réformateur) et “Musleh Maud” (Réformateur Promis), si Mirza Bashir-ud-Din Mahmud Ahmad ti le vrai Musleh Maud, alors dans Jama’at Ahmadiyya, pas capave ena ene l’autre Musleh Maud. Si Mirza Bashir-ud-Din Ahmad so proclamation de Musleh Maud ti basé lors fausseté, alors le vrai Musleh Maud bizin paraîte et aussi bane dimounes du Jama’at bizin attane so venue. Bizin rappler ki kan sa Musleh Maud paraite, li non seulement pou présente proclamation sans preuves ou proclamation Ilhaami (basé lors revelation), mais au contraire, en plus de so proclamation, li pou ena preuves basé lors Ilhaam, science et bane tels preuves ki pou prouve so véracité complet. Voilà mo l’appel ki si Munir Ahmad Sahib de Maurice ki li pé proclame li-même « deuxième Musleh Maoud » ou bien bane les autres Ahmadi de groupe Qadiani, d’après Prophécie Musleh Maoud prouver ki Mirza Bashir-ud-Din Mahmud Ahmad li ti le Musleh Maud, alors pas seulement mo pou admette défaite lors so la main, mais aussi mo pou paye li ene dédommagement d’après mo capacité. Mais si Munir Ahmad Sahib ou n’importe ki les autres Ahmadi pas capave prove Mirza Bashir-ud-Din Mahmud comme Musleh Maud, alors, après fausse proclamation “Premier Musleh Maud ” Mirza Bashir-ud-Din Mahmud Ahmad, pas zis Munir Ahmad Sahib so proclamation comme “Deuxième Musleh Maud ” vine fausse, mais au contraire, so bane les autres proclamations aussi vine fausse. Rappelle, n’importe ki sanlà capave fer ene proclamation sans preuve ou proclamation par Ilhaam sans preuve, et li pena l’importance. N’importe ki proclamation pou pran en considération dans ce cas kan ene dimoune ki proclamer li vine avec bane preuves basé lors Ilhaam ou signe de veracité. Bane révélations, malgré so kantité zot pas ene preuve. Mo espérer ki mo bref réponse li assez pou le respecté Shabeeb Haneef.”
L’essence très important et fondamentale de bane l’enseignements de l’Islam et d’après le Sunnat Allah c’est ki tous bane Messagers ki fine vini dans le passé zot fine confirme zot camarade (bane prophètes) sans exceptions. Zot sans aucaine doute couma bane maillons d’ene la chaine, ene confirmant l’autre. Pareillement, mo proclamation comme le Messie Promis, Khalifatullah et Mujaddid li pas séparer de bane proclamations de bane prophètes, réformateurs et Califes d’Allah ki fine vini dans le passé et li pas séparer de même proclamation du Messie Promis Hazrat Mirza Ghulam Ahmad (as) et de so garçon pieux ki li biologique et spirituel Hazrat Mirza Bashiruddin Mahmood Ahmad (ra).
Si zot lire interview lors internet ki mo ti donne à Mahroom Janaab Mubashar Dar Sahib (Ki Allah pardonne li), zot pou remarquer ki mo fine déjà quote ene commentaire très important ki le premier Musleh Maoud (biologique) du Messie Promis Hazrat Mirza Ghulam Ahmad (as) fine fer, kot li fine dire (dans ene rassemblement à Hoshiārpur le 20 Février 1944: « Mo pas dire ki mo le seul Promis et ki pena les autres promis pou paraite ziska le Jour du Jugement. Li paraite de bane prophéties du Messie Promis ki ena bane les autres promis ki pou vini et détrois d’entre zot pou paraite après des siècles. En vérité, Allah fine dire moi ki pou arrive ene l’époque kot Li pou envoye moi ene deuxième fois dans le monde et ki mo pou vini pour la réforme du monde dans ene l’époque kot le Shirk pou répanne partout. Sa veut dire ki mo l’âme pou descende lors kikaine ki possède bane facultés et bane capacités couma moi, et ki li, en suivant mo pas, li pou amène ene réforme du monde. De ce fait, bane promis pou fer zot l’apparition dans sakaine so l’époque d’après la promesse d’Allah Ta’ala. » (Ref: Ahmadiyyat Renaissance of Islam par Sir Zafrullah Khan p.293-294)
Alors, séki bizarre (étrange) ki pé passé dans proclamation de Janbah Saheb c’est ki (1) li pas quote bane révélations actuelles ki Allah fine donne li – li cite zis bane prophécies de Hazrat Mirza Ghulam Ahmad (as) et li précise le fait ki sa garçon ki le Messie Promis fine causer là c’est li, ene fils spirituel, et (2) li mentionne le fait ki d’après bane prophécies du Messie Promis, Allah fine donne li (Hazrat Mirza Ghulam Ahmad) la bonne nouvelle d’ene fils pieux après la naissance de Hazrat Mirza Bashiruddin Mahmood Ahmad (ra).
Mo bane très chers frères et sœurs, kan ene kikaine deboute et prend le nom sacré d’Allah ki li vine de côté d’Allah, alors so zaffaire (so sort) li avec Allah, entre li et Allah tousel. Pareillement, Janbah Sahib fine prend le nom d’Allah et pé proclamé séki li pé proclamé (pareil couma bane les autres dimounes ki zot pé recevoir la révélations), et li penser ki zis li ki sa garçon pure ki promis au Messie Promis. Li bizin lire au plus profond le Quran Shareef et bane Hadiths et aussi bane livres essentiel du Messie Promis couma « The need of the Imam » (Zarooratul Imam) kot le Messie Promis fine expose bane situations et conditions kot sa Imam de l’heure là li vini. Mo gagne peur pou Janbah Sahib ki li faire exactement couma Balaam (ene israelite bien renommé parmi bane Israelites dans l’époque de Hazrat Moosa (as) ki ti pé recevoir la révélation) – alors attention li fer couma Balaam fine fer kan li fine confronte avec supériorité de Hazrat Moosa (as), le Prophète Choisi d’Allah de so l’époque. Balaam ki croire ki zis li tousel li supérieur à cause de so communion avec Allah, mais kan li fine zoine ene kakaine (Moosa (as)) ki ti gagne pli beaucoup faveurs divine ki li et ki Allah ti protéger contre tous bane l’ennemies, alors ene zaffaire ki pas ti capave barré, kot Balaam fine être détruit kan li fine entame ene « la guerre » contre le Prophète Choisi d’Allah, Hazrat Moosa (as). Pareillement, ena l’exemple de scribe du Saint Prophète Muhammad (saws) ki, kan le Prophète ti habituer dicter li bane mots de la révélations ki li ti pé recevoir, alors avant ki le prophète dire kitchose, scribe là ti pé fini recevoir bane paroles là et dire li à haute voix, et kan le Saint Prophète (saws) fine entende sa, li fine confirme sa bane mots là (comme étant mêmes mots ki li ti pé recevoir. Alors, kan scribe là fine entende sa, li fine penser ki li supérieur au Prophète d’Allah (saws), et alors li fine perdi la foi, et li fine tourne le dos avec le Prophète (saws) et à la Manifestation Divine.
Mo fine vini, en tant ki ene fils spirituel du Saint Prophète Muhammad (saws) et aussi comme ene fils spirituel du Messie Promis (as) et Allah fine bel et bien appelle moi ‘Musleh Maoud’ le 20 Février 2004. Allah fine promette moi aussi ki Li pou eleve mo l’honneur étape par étape et d’ene Qamaram Munira, Li fine élève moi comme Khawja Nooruddin, Amir’ul Momeneen, Muhyi-ud-Din, Musli-ud-Din, Khalifatullah, Rassoolullah (pareil couma fine publier lors le website du Jamaat Ul Sahih Al Islam) et Nabi’ullah – tous sa bane titres et l’honneur là ki indique ene travail fondamentale – pas pou la guerre avec bane les autres à propos l’honneur ki Allah fine déverser lors moi, So humble serviteur et pou justifier moi (lors là) – mais pou passe le message d’Allah, pou la réforme du monde et fer li rétourne vers l’adoration d’Allah tousel, kot zot délaisse tous zot bane idoles (en faveur d’Allah).
Mo travail c’est seulement couma mo fine recevoir plusieurs fois à travers sa 12 and là, comme ene Bashir, Nazir et Mubasshir. Mo fine vini pou averti. Mo pena le pouvoir pou change bane les cœurs. Change lécoeur li appartenir à Allah pou fer sa. Mo pas fine vini comme ene intellectual mais Pluto comme ene personification (la seconde venue) de mo bien-aimé maître Hazrat Muhammad (saws) couma fine prophétisé dans Surah Jumu’ah. Mo pena bane qualifications académique extraordinaires mais c’est Allah ki mo Professeur et mo Guide. C’est Li ki fine élève moi comme So humble Messager et sa proclamation là, mo fer li sans aucaine peur (la crainte) de l’homme parski c’est Mo Allah Li Celui ki fine élève moi et ki Li-même Li mo Protecteur (Qui veille lors moi).
Pou refute en bref séki Janbah Sahib fine dire à propos so proclamation comme le seul Musleh Maoud... Ki été la signification de ‘Musleh Maoud’ : Réformateur Promis ! Le Messie Promis Hazrat Mirza Ghulam Ahmad (as) ti li-même ene Musleh Maoud dans le fait ki li ti le fils spirituel de Nabi-Kareem Muhammad (saws), et sa li ene fait et ene la vérité ki personne pas capave rénier. La signification de bane mots li essentiel kan analyse ene prophécies. Ena prophécies (de source divine) zot partiellement litérale et bane les autres zot métaphorique.
Le Messie Promis (as) ti bel et bien recevoir so garçon biologique promis ki fine prouver plus tard ki c’est Hazrat Mirza Bashiruddin Mahmood Ahmad (ra), pas avec ene troisième épouse couma li ti penser mais avec so deuxième épouse même. La prophécie d’ene troisième épouse, le fait ki sa prophécie là fine annuler, mais Allah fine décider ki malgré sa annulation là, la prophécie en réponse de so duah pou gagne ene fils pieux pas capave annuler parski Allah conne très bien ki ene létemps pou vini bientôt kot ene réformateur pou bizin vini pour occupe l’Islam-Ahmadiyyat et le monde musulman dans so l’ensemble.
Pas zis le deuxième calife du Mouvement Ahmadiyya ti vini comme ene calife élu de l’homme, mais Allah fine plus tard élève so rang au rang de sa reformateur promis là en réponse à promesse ki Li fine fer à So Messie. Et sa fils là ti bien distinguer et ene coco (bien intelligent), mais pareille couma Janbah Sahib fine préciser, ti pou bizin ena ene l’autre garçon ki pou vini et ki sa garçon là li pou le fils spirituel de Messie Promis (et sa fine confirmer par bane paroles du Hazrat Mirza Bashiruddin Mahmood Ahmad (ra) kot li dire ki Allah fine aussi donne li sa révélation là ki pou ena bane les autres Musleh et pou ena même le Musleh Maoud so deuxième venue etc. – en d’autres mots, ene élu d’Allah confirmant l’autre élu d’Allah).
Beaucoup dimounes dans bane l’époques avant fine jouir de bane communication, bane relations spéciales avec Allah à cause de zot piété et zot connection profond (à travers Salaat et Zikr) avec Allah mais seulement, pas zot tous ki fine vine prophètes ou bien ene réformateur pour zot la religion. Beaucoup de bane dimounes ordinaires aussi, bane Musulmans pieux et sincères de nous l’époque (ki pas croire dans Hazrat Mirza Ghulam Ahmad) fine témoigne de bane grands visions et vrai rêves lors Hazrat Muhammad (saws), kot le Prophète d’Allah (saws) addresse zot la paroles et rassure zot. Alors, bane proclamations pas capave basé seulement lors bane rêves et bane visions tousel, mais révélations en extra grand nombres couma ene gros la pluie ki Allah déverser lors So Messager, sa li ene grand preuves, parski révélations ki li recevoir li d’ene l’autre nature plus profond ki révélations ki bane les autres dimounes recevoir et ki pou zot li pas en grand nombres, mais seulement ene fois létemps zot recevoir li. Mo dire sans hésitation ki Allah déverse lors moi bane révélations en grand nombres. Insha-Allah, tout kitchose ena so l’heure et sa bane révélations là pou être publier à travers bane instructions d’Allah Ta’ala, pas à travers le désire de l’homme !
En vérité Allah fer bane Messagers passe par beaucoup d’épreuves, et capave arrivé ki bane moments arrivé ki révélations arrête dessane de côté d’Allah pour ene létemps, à tel point ki le Prophète et bane croyants demander kan l’aide d’Allah, bane révélations et rassurance de la part d’Allah pou vini. En vérité, sa létemps ki fine décider pou vini et c’est à travers la Victoire d’Allah ki moi, le Messager d’Allah de ce siècle pou victorieux. Insha-Allah. Allah fine rassure lors sa sujet là dans l’époque de mo proclamation comme Khalifatullah en l’an 2008 (25 Mai avant Tahajjud), kot Li fine dire moi c’est moi seul ki vrai et ki bane les autres ki pé proclame zot le Messie zot fausse tandis ki moi seul (le Khalifatullah et Massih’ullah) ki vrai. Révélation là ti dessane en langue créole même dans ene vision kot mo entende Allah So la voix directement pé cause avec moi.
A propos révélation de ‘Garçon Pure – Zaki Ghulam’ en tant ki ‘Reformateur Promis’ (Musleh Maoud) ki Allah fine donne à Mirza Ghulam Ahmad (as) – 20 Février 1886 – Allah fine révélé:
« Mo envoye lors toi ene signe de Mo miséricorde d’après to bane supplications. Mo fine entende to bane l’appels et fine honore to bane la prières avec Mo l’acceptance à travers Mo miséricorde et fine béni to séjour ziska ici. Ene signe de pouvoir, miséricorde, et rapprochement avec Moi fine être déverser lors toi. Ene signe de grâce et de faveur fine être donner à toi et to fine recevoir la clé du succès et de la victoire. La paix lors toi, O le victorieux. C’est coumsa ki Allah causer pour ki bane ki désire la vie capave être sauvé dépi la mort et bane ki enterrer dans bane tombes capave resorti dépi sa (bane tombes là) et ki la supériorité de l’Islam et la dignité de la parole d’Allah capave vine manifest à bane dimounes et ki la vérité arriver avec tous so bénédictions et ki fausseté disparaître avec tous bane maladies, et ki bane dimounes capave comprend ki Mo le Maître du Pouvoir, Mo fer séki Mo content, et pour ki zot croire ki Mo avec toi, et pour ki bane ki pas croire dans Allah et renier et rejette So religion et So Livre et So Saint Messager Muhammad, le Choisi (saws) capave être confronter avec ene signe claire et afin ki bane façons de bane coupables capave vine manifeste.
Alors réjouir, ki to pou gagne ene joli garçon ki pou pure. To pou recevoir ene garçon pure (Zaki Ghulam) ki pou de to propre semance et ki pou de to descendance. Ene joli garçon ki pou pure pou vini couma to compagné. So nom pou Emmanuel et Bashir. Li fine investi du Saint Esprit et li pou pure de tout impureté. Li la lumière d’Allah. Béni est celui ki pou vine du ciel. Li pou accompagné avec la grâce (Fazl) ki pou vine avec li. Li pou caractérizé avec grandeur, supériorité et la richesse. Li pou vine au monde et li pou guéri beaucoup de zot bane désordre à travers bane qualités messianique et à travers bane bénédictions du Saint Esprit. Li la parole d’Allah parski la miséricorde et l’honneur d’Allah fine équipe li avec la Parole de la Majesté. Li pou extrêmement intelligent et li pou compréhensif et li pou humble (du cœur) et li pou rempli avec bane connaissance séculaire (du monde) et spirituelle. Li pou converti 3 en 4 (signification de sa pas claire). C’est ene Lundi, ene Lundi Béni. Garçon, délice du cœur, ki pou ena ene rang bien haute, li pou noble ; ene manifestation du Premier et du Dernier, ene manifestation du Vrai et Grand ; comme-ci Allah fine dessane du ciel. So l’avènement pou grandement béni et pou ene source de la manifestation de la Majesté Divine. Attention ! Ene la lumière béni par Allah de parfum de So plaisir. Nous pou insuffler Nous l’esprit dans li et li pou être protéger sous l’ombrage d’Allah. Li pou grandi physiquement rapidement et li pou ene moyen de libération pou bane ki emprisonner. So popularité pou arrive ziska au bout de la terre et bane peuples pou béni à travers li. Li pou ensuite être élever à so rang spirituel dans le ciel. Sa c’est ene zaffaire ki fine fini décréter. » (Compilation de bane revelations du Messie Promis – Tazkirah par Sir Zafrullah Khan)
Après sa révélation là, le Messie Promis (as), à la lumière de la révélation divine fine dire ki sa garçon là pou né dans l’espace de neuf ans et même si reste ene jour pou ki sa prophécie là réaliser, li pou réaliser. Dans le livre ‘Ahmadiyyat Renaissance de l’Islam » de p.289-300, Sir Zafrullah Khan fine détaille plusieurs de bane discours (de Proclamtion Officielle) ki Hazrat Mirza Bashiruddin Mahmood Ahmad (ra) fine fer après ki li fine raconte ene vrai rêve/vision ki Allah fine donne li kot fine indique li ki li-même ki le dimoune promis là, ki non seulement li le fils promis et réformateur promis couma fine indiquer dans prophécie du 20 Février 1886. Li fine proclamé clairement ki : « Mo pas dire ki mo le seul Promis et ki pena les autres promis pou paraite ziska le Jour du Jugement. Li paraite de bane prophéties du Messie Promis ki ena bane les autres promis ki pou vini et détrois d’entre zot pou paraite après des siècles. »
Li fine clairement dire (dans so vision) ki: « Mo le Messie Promis, so reflection et so Khalifa. » (et de ce fait sa li la confirmation de sa partie de prophécie ki dire ki « à travers bane qualités messianique et à travers bane bénédictions du Saint Esprit.») Li fine prend le nom d’Allah et Allah malgré toutes sortes de dangers, complots et attentats lors so la vie, Allah fine faire li vivre ene longue la vie, assez longue (avec beaucoup de travail de Deen) pou prouver ki li-même li sa Zaki Ghulam ki de propre semance du Messie Promis (garçon biologique) et ki li pou de so descendance (ki li biologique et spirituel) et ki pou né dans l’espace de 9 ans ki fine spécifier à travers la révélation.
Concernant explication du mot « compagné » (li pou vini couma to compagné), en plisse de l’explication de Hazrat Mirza Ghulam Ahmad (as), nous bizin garde à l’esprit ki sak messager, prophète ou réformateur zot ene compagné dans sa le monde là (couma tout bane dimounes d’ailleurs) mais plisse pou bane élus d’Allah kot kan zot mission terminer, Allah fer zot quitte sa le monde là pou alle vers zot place ki fine reserver pou zot dans Aakhérat. Ene point bien important à noter dans le cas du Premier fils et reformateur promis du Messie Promis c’est ki li fine subir ene dimal extra sévère kan ene l’enemie fine plonge dans so licou ene couteau pendant ki li ti pé lead Namaz en congrégation. Bane l’ennemies de l’Islam Ahmadiyyat fine prend sa fait là comme ene point en zot faveur pou dire ki Allah fine saisir li par « so gros la veine » couma sa verset Quran là spécifier (Al-Haqqah 69: 45-48), mais bizin garde à l’esprit (le verset Quran mentionne: Nous pou coupe so gros artère), ki si li ti mort sur le coup, bane l’ennemies de l’Islam ki pou gagne encore arguments en zot faveur pou répanne zot la haine contre sa noble personnalité de l’Islam là. Kan sa l’attaque là fine arriver en 1954, sa ti ene vrai miracle kot li fine survivre ene tel l’attaque bien grave là et ki li fine vivre encore pendant 11 banané. Astaire, si pas ti ena la main d’Allah là-dans pou maintenir so la vie, malgré bane attentats de meurtre contre li, alors ki été sa ? Li fine vivre pendant 76 ans lors la terre, kot li fine fer bane grand grand travail pour l’Islam, et li fine béni avec la révélation divine et bane inspirations divine, kot bane anges vine à li pour inspire li certains de bane excellent commentaires de Quran Shareef dans so l’époque. So Khilafat aussi exceptionelle – 52 ans en tout.
Par la grâce d’Allah, dans sa l’époque présent là, mo fine être béni avec capacité de côté d’Allah pour faire bane commentaire de bane versets du Quran Shareef et pou amène de l’avant ene Tafsir (Commentaire) ki pou Insha-Allah, étape par étape publier lors so website (al-azim-tafsir-ul-quran.org).
Sak Messager d’Allah li attacher avec bane prophètes et bane réformateurs d’avant. Dans l’Islam, zamais fine arrive ene moment kot le Messie Promis (pou prouve li-même comme ene Envoyé d’Allah) fine rejette bane Mujaddids de bane siècles passés (le contraire de Janbah Sahib ki téti pou rejette la proclamation du Premier Musleh Maoud du Messie Promis Hazrat Mirza Ghulam Ahmad (as) et alors kot li-même par so la main (so propre croyance) fine casse la chaîne de bane élus d’Allah.)
Contraire à bane proclamation de Janbah Sahib, mo travail li pas terminer avec bane Musulmans Ahmadi, mais pluto c’est ene travail universel ki mo ena, ene travail universel ki lourd de responsabilité ki repose lors mo zépaules afin ki mo guide dans le droit chemin le monde en entier (toute l’humanité), malgré ki so race, so couleur, so groupe ethnique etc. Pareil couma le travail de mo maître (saw) ti universel, alors Allah fine fer moi So humble serviteur comme le Khalifatullah pou prend le relai pour la revivification de l’Islam et de l’humanité en entier. En sa capacité là, mo non seulement le Répresentant d’Allah lors la terre mais mo aussi le representant de So noble prophète Hazrat Muhammad (saws) et mo aussi le serviteur obéissant du Messie dernier (du siècle passé) Hazrat Mirza Ghulam Ahmad (as) et mo venue comme Messie confirme so proclamation et li pas en contradiction avec li (Hazrat Mirza Ghulam Ahmad (as))
Ene fois (le 9 Avril 2003) Allah fine cause avec moi (en anglais) à propos bane ki croire dans moi et ki suive moi sincèrement :
“...O Munir Azim! Toujours rappelle ki li facile pou fer saki plaizant, mais li difficile pou engager dans saki bon.
Mo content ki Mo capave converser avec toi à n’importe ki moment. Zamais pas condamne zot-mêmes comme inférieur ou inutile. Zot bizin ena bane muscles de fer et bane nerfs de fer (courage et bravoure solid) parski la récolte de la vie, courage et confiance sa-même bane meilleure fumier. Vine bane lions dans bane filières de la spiritualité, reigne lors la forêt de bane sens et marcher sans crainte avec full confiance (la foi) dans la victoire. Vine bane Héros, pas bane Zéros. S’il te plaît Munir Azim, pas craindre dimounes, donne to bénédiction à sa bane dimounes ki to bien content, Mo pou béni zot. Si to content zot, Moi aussi Mo pou content zot. »
Mo mette mo confiance dans Allah, et mo remette tous mo bane zaffaires avec Li. Allah conne très bien ki Li fine envoye moi dans sa le monde là pour la réforme du monde et pou guide bane dimounes vers Li. Mo espérer et prier ki sa ti explication là li agir non seulement pou ouvert zot tous zot lizié mais aussi pou ouvert zot le cœurs à bane façons d’agir d’Allah (Sunnat Allah).
“O ye people! If it is truth thou seek, truth shall thou findest, but let it not be that when the light of truth cometh to your knowledge, thy heart closest to the perfection of it all!”
Traduction : « O bane dimounes ! Si c’est la vérité ki zot pé rodé, la vérité zot pou trouver, mais pas fer en sorte ki kan la lumière de la vérité vini et zot prend connaissance de sa, zot fer zot lécoeurs fermer à perfection ki sa la vérité là renfermer ! » (Révélation Divine en anglais le 11 Janvier 2011).
Mo souhaiter sincèrement et mo fer beaucoup duahs ki sak humain capave bénéficier de bane bénédictions ki Allah pé envoyer lors nous dans sa siècle là, mais (humblement) mo conné ki malheureusement li pas pou coumsa. Dimounes parfois agir dans l’ignorance et rejette la vérité ki Allah fine donne zot comme ene cadeau en forme de So bane révélations divines (ki Li déverser lors So Messager). Azordi, nous pé vivre dans ene tel siècle, kot Allah fine favorise nous bane humains avec ene telle bénédiction.
En tant ki ene papa spirituel, mo ena compassion (et tracasser) pou mo bane zenfants, et prier Allah pou ki zot capave prend compte le message d’Allah et pas tourne zot le dos à sa et pou (zot pas) prend en mockeries sa bane conseils divines ki pé dessane à travers la révélation là.
Allah Li plus compassionnant et rempli d’amour ki n’importe ki humain. So l’amour pour nous li bien grand, mais kan dimoune abaisse li à so bane désires pli bas et li alle tourne lédos avec Allah, alors pena personne ki pli affecter par sa ki Allah, le Créateur. Alors, avec même la force avec quoi Li fine envoye So l’amour et bénédictions, cette fois-ci Li manifester Li-même à travers So colère lors sa bane kalité dimounes là.
Pareil couma l’histoire de tous bane prophètes, en incluant l’histoire de la vie de nous bien-aimé maître Hazrat Muhammad (saws) et l’histoire de la vie de Hazrat Massih Ma’oud Mirza Ghulam Ahmad (as) fine montrer nous ; zot la vie zot bane preuves pour nous azordi ki Allah élève celui ki Li oulé et chosir li comme So Khalifa. Alhamdulillah, mo proclamation comme le Khalifatullah et Amir’ul Momeneen Muhyi-ud-Din li tenir deboute fermement azordi, plus fort que jamais par la Miséricorde de nous Rab, nous Bien-Aimé Allah.
Allah fine envoye moi comme ene instrument (couma stipulé dans le Quran) pour revivre vrai la Foi. Mo fine vini, non seulement pour bane Musulmans (inclus bane Musulmans Ahmadi) mais aussi pour le monde en entier comme ene Avertisseur et ene Porteur de Bonne Nouvelles.
C’est bien malheureux, ki malgré ki Allah fine béni le Jamaat de Hazrat Mirza Ghulam Ahmad avec bane Révélations (à travers bane dimounes ordinaires), maintenant ki Allah fine élever So propre serviteur comme So Muhyiuddin (Revivificateur de la foi), So Messager, sa même l’établissement du Jamaat Ahmadiyya fine rejette sa signe d’Allah là et c’est sa signe là-même ki prouve la véracité de la venue de Hazrat Muhammad (saws) et de Hazrat Massih Ma’oud Mirza Ghulam Ahmad (as) – Ki Allah content avec zot tous les deux et tous bane prophètes ki fine vini de côté d’Allah pou prêche So parole.
Kan Allah envoye ene Messager, si bane dimoune ki entende à propos so présence gagne la foi dans li pour l’amour d’Allah et zot pas tourne zot lé dos à so proclamation et zot attrape fermement à la véracité de so proclamation et zot parfaire zot la vie spiritual à travers zot dédication à Allah et envers So Rassool (saws) et le Rassool de zot l’époque, alors définitivement Allah pas pou tourne So lédos avec sa bane kalités dimounes là ki ena ene l’amour sincère pour Allah dans zot lécoeur. Zot aussi (pou confirme la véracité de So Élu) recevoir bane révélations divines (pareil couma dans l’époque de Hazrat Muhammad (saws) et dans l’époque de Hazrat Mirza Ghulam Ahmad (as)). Pareillement, beaucoup de mo bane disciples fine recevoir plusieurs de bane signes et témoins de bane manifestation divines, bane vrai rêves et même bane révélations ki vine de côté d’Allah, et plusieurs d’entre zot, malgré ki zot fine être témoins de tous sa, zot fine tourne zot lédos avec bane vérités d’Allah et la véracité de sa humble serviteur ki présent devant zot.
Ene d’entre zot en fois fine trouve ene rêve et dans rêve là li ti pé guette dans léciel et là-dans li fine trouve la lune fine fanne en deux et la moitié la lune fine transforme en ene plume (ancien style en plume d’oiseau) et plume là ti pé écrire bane révélations en Arabic dans le ciel à propos mo véracité, et à propos détrois prophécies ki concerne moi (ki dimoune là fine comprend de bane révélations Arabic dans so rêve). Bane révélations dans le ciel là ti concerne le fait ki Munir Ahmad Azim li vine bien d’Allah et ki dans mo descendance pour ena prophète/s (ki pou vini). Kan sa dimoune là fine trouve bane mots en Arabic pé apparaite dans le ciel (par zot-mêmes) alors li fine rode ene kitchose pou écrire séki li ti pé trouver. Pendant ki li ti pé écrire (ou après ki li fine fini écrire) sa bane révélations là, li dire : « Munir Azim vrai alors! »
Ti ena ene l’autre ki fine raconte moi et bane membres du Jamaat Ahmadiyya Al Mouslemeen (du passé) ki li fine trouve bane bouteilles pé floter lors la mer et ki dans ene de sa bane bouteilles là ti écrire en Français ki ‘Le Messie fine vini’. So madame kan à li fine rêver ki li et so sœur fine mort et zot fine alle devant Allah et Allah fine présente zot sakaine ene bol du lait (pas de ce monde) zis à cause zot fine croire dans Allah So Muhyiuddin Munir Azim. Maintenant madame missié tous les deux fine tourne zot lédos à bane signes ki zot fine témoigner personellement.
Pareillement sakaine de mo bane disciples, même bane à l’époque du Jamaat Ahmadiyya Al Mouslemeen pas capave dire ki zot pas fine gagne ene signe en faveur de mo véracité, mais kot zot été azordi ? Attention ! Zot ena pour alle rendre Allah compte ene jour lors là et kan le moment pou vini, zot pas pou capave dire ki Allah pas fine montrer zot nannié en faveur de mo véracité. Mais malgré tous sa, Allah fine continuer béni mo bane présent disciples et bien souvent zot recevoir bane tels rêves ki rempli de la lumière d’Allah, bane anges vine cause avec zot et zot percevoir et ressenti la présence d’Allah et de bane anges avec zot. Zot fine rêve aussi du Saint Prophète Muhammad (saws) et du Messie Promis (as) et zot aussi fine recevoir bane révélations dans zot visions ki « Munir Ahmad Azim li le Messie de sa siècle là ». plusieurs fois, zot recevoir bane rêves béni kot zot trouve le statut d’honneur ki Allah fine élève moi So humble serviteur et zot fine personellement gagne (en partie) bane bonne nouvelle de côté d’Allah à propos de zot propre future (bane bénédictions d’Allah lors zot etc.) C’est à préciser ki pas zis bane missiés ki recevoir bane révélations mais aussi bane madames et jeunes filles kot zot divinement inspirer et kot là-dans ena bane mots de révélations ki zot gagner. En plisse de sa, zot percevoir ene la pluie fine spéciale ki tombe lors zot et sa humble serviteur ki présent devant zot là et lors congrégation de bane pieux (ki invisible dans lizié de bane lézot dimounes – zis zot ki trouve sa), zot témoigne la manifestation de bane parfums extraordinaires (pas de ce monde) et zot trouve le nom d’Allah (en Arabe) manifester partout kot Allah envie montrer zot So nom béni (ki li lors moi-mêmes, dans le ciel, dans bane branches et dans bane feuilles de bane z’arbres, lors la table, lors rideaux, lors zot-mêmes, lors natte Namaz, dans Masjeed etc.) Zot bane rêves zot tellement rempli de la grâce et manifestation d’Allah en confirmation de mo proclamation comme le Messager et le Calife d’Allah ki sa pas laisse aucaine doute ki la main d’Allah pé opérer, kot Li manifester Li (Allah) lors moi So humble serviteur et lors zot comme bane disciples de Munir Ahmad Azim, le Musleh Maoud, Messie et Messager d’Allah. Ene d’entre zot quelques temps de cela (des mois de cela) fine rêver ki ti ena ena Mayyat et ti ena ene grand rassemblement de bane dimounes (par milliers et des milliers de dimounes) ti présent) et la plupart en blanc et parmi zot (dans ene bâtiment) ti ena le Saint Prophète Muhammad (saws) et le Saint Prophète (saws) ti mo-même et ki moi (la seconde venue du Saint Prophète (saws)) mo ti pé recevoir bane révélations divines et autour de moi ti ena mo bane Sahabas – missiés – (ki inconnu dans rêve là) et kan mo fine recevoir ene révélation de la part d’Allah, alors vite vite zot fine alle répanne sa message d’Allah à tous bane dimounes (par milliers) ki ti présent dans sa rassemblement là (en tant ki mo bane disciples).
Nous Hazrat Ummul Momeneen Sadr Sahiba aussi fine être témoin des milliers de signes si mo capave dire, en support de mo véracité. Li fine même être béni par la grâce d’Allah avec rapprochement avec Allah et Allah fine appelle li « So bien-aimé » parski li fine croire dans moi, l’humble serviteur d’Allah. Allah fine élève so rang à travers la révélations, bane visions et bane rêves kot li même fine entende bane la voix du Ghayb (le monde invisible) ki fine révèle certains kitchoses ki pou arriver. So garçon Mahroom Seid Ahmad li-même ti gagne beaucoup rêves (et visions), ene là-dans (rêve) kot li fine trouve li devant so computer et lors l’écran computer li fine trouve dans background fine type mo nom et mo nom ‘Munir Azim’ fine envahir background computer là et devant li fine ene la liste de bane révélations ki mo fine recevoir de la part d’Allah et à la fin de page électronique là, à la fin de bane révélations fine typé lors computer : « FOR PUBLICATION! » (POUR PUBLICATION!)
Récemment ene l’autre de mo bane disciples très proche de moi fine raconte moi ki en réponse à so bane duahs concernant mo véracité, Allah fine donne li trois rêves, et ene fois li trouve dans le Quran fine mette mo titre Muhyiuddin/Mujaddid et ene l’autre fois li rêve dans ene rêve rempli de présence divine, rempli de bien-être spirituel kot ena ene zoiseaux inconnu de sa le monde là ki ti très beau/joli, très spirituel. Alors kan li fine chek dans interprétation rêve, li fine trouver ki sa veut dire ene ange d’Allah, et Allah montrer li ene passage de Hazrat Massih Maoud (as) kot li écrire ban tels manifestation de anges arriver dans le temps d’ene Messager d’Allah. Comme sa ena beaucoup d’autres par la grâce d’Allah.
Aussi longtemps ki zot, mo bane disciples zot reste ferme avec moi (l’humble serviteur d’Allah), Allah pou continuer deverse So faveurs lors zot, kot Li capave même doubler et triblé sa bane benedictions là, mais fer attention kot pas laisse Satan l’ennemi juré d’Allah et celui de So Messager fer zot prend chemin travers ; alors reste ferme et prend précaution lors zot la foi contre rénier la foi, bane doutes et révoltes parski si zot alle prend bane pas de Satan, alors tous sa bane faveurs ki zot fine recevoir là pou être enlevé.
Façonne zot-même dans l’image de Hazrat Abu Bakr Siddique, le compagnon dévoué de nous bien-aimé prophète Muhammad (saws). Le moment ki li fine entende de la bouche du prophète ki effectivement li le Messager d’Allah, alors en place même li fine accepter li et promette Allah et So Rassool (saws) fidélité (à travers le Bai’at). Li pas ti bizin aucaine signe et pas fine pose question. L’example de la vie de so bien-aimé camarade Hazrat Muhammad (saws) ti suffit pour li pour li croire ki Allah fine effectivement élève li comme So Messager. Et ensuite après, à cause de so la foi bien ferme en Allah et So Rassool (saws) li fine être reconnu comme le « Siddique » (Celui ki attester à la vérité). Ici la vérité ti la proclamation d’Allah ki Li fine definitement envoye Muhammad (saws) comme So Messager et ki Allah Li AL-HAQQ (La Vérité), et de ce fait So Rassool li le représentant de la Al-Haqq et bane ki suive la vérité ki ena dans le chemin de Al-Haqq, alors définitivement li pou ene Siddique dans lizié d’Allah couma Allah mentionné dans Surah An-Nisah Verset 70. Allah metionne quatre degrés ki ene Momin (croyant) atteindre dans So lizié (Swaley, Shaheed, Siddique & Nabi).
Même si le monde entier rejette moi (excepter le peu ki sincère avec Allah), malgré tout sa, mo proclamation comme Serviteur d’Allah, So Muhyiuddin, Khalifatullah et Messager d’Allah li tini vrai. Ene jour, dans commencement de la Manifestation Divine lors sa humble serviteur là, Allah fine dire moi en créole : « Même si demain le monde quitte toi, mais Allah avec toi, tout avec toi ; mais si le monde avec toi, Allah pas avec toi, nannié pas avec toi. » C’est mo humble duah ki Allah continuer reste avec moi dans sak situation, ki li dans persécution, épreuves et même bane moments de joie, parski Allah pou définitivement reste avec celui ki Li fine élever et pou protège li (en l’occurrence moi comme So humble Messager) contre tous so bane l’ennemies et li pou fer l’Islam prospérer à travers So Messager, même si le monde renier ene tel Serviteur d’Allah.
C’est ene l’honneur pour le Ummah de Hazrat Muhammad (saws) et pour le Jamaat de Hazrat Massih Maoud (saws) ki Allah fine élève moi So humble serviteur comme ene Avertisseur parmi zot – Si zot tous suive guidance d’Allah, Alhamdulillah parski Allah pas bizin nous mais au contraire c’est nous ki BIZIN Allah beaucoup (tous les temps). Nous la vie, la mort, boire, manger, protection (abris), l’honneur etc. ... tous trouve dans So la main (la main d’Allah).
Si dimoune suive guidance ki vine de côté d’Allah, sa pou ene bien pou zot et Allah pou content zot pareil couma Li ti content bane ki ti vine avant zot dans le passé mais ensam avec bane bonne nouvelles de l’unicité d’Allah et bane faveurs d’Allah, ena aussi ene avertissement bien sévère ki vine d’Allah, ki si ene kikaine ridiculise le signe d’Allah et moque So bane Messagers, alors sa dimoune là (missié ou madame) so conséquence pou bien grave.
Ene kikaine ki vine de côté d’Allah pas fine fer ki li marche lors tapis velours ou marche lors la terre lors pétale rose, mais li bizin marche lors piquant et z’épines dans “Siratwal Mustaqeem” (le Droit Chemin). Mo la vie li ene témoignage du fait ki fine ena beaucoup blâmes ki dimounes fine porter lors moi, lors mo l’honneur et mo l’honneur ziska azordi li être Sali par bane soi-disant Musulmans (ki li parmi bane Ahmadis et bane Musulmans non-Ahmadi) ki prend plaisir pou invente toutes sortes blâmes pou attaque mo l’honneur pareil couma zot ti faire pour mo maître le Saint Prophète Muhammad (saws) et pareil couma li, mo conné ki bane mauvais parmi dimounes pou faire en sorte ki sa bane blames là persister ziska même après mo la mort, mais le moment pou vini kan Allah pou efface sa bane blâmes là et retourne zot zot bane moqueries et blâmes lors zot-mêmes et Allah Li-même pou vine mo l’Honneur, parski si lors Allah et So prophète parfait et noble (saws) dimounes pas fine hésiter pou mette bane blâmes lors li, alors couma eski moi, faible couma mo été, mo capave expecte pou recevoir ene traitement différent (de saki mo Aka (saws) fine recevoir) kan mo pé proclamer haut et fort ki mo vine de côté d’Allah et ki mo fine gagne l’instruction d’Allah pou dibouter et proclamer ki mo fine vini comme ene Avertisseur parmi zot, le monde en entier ?
« O dimounes ! Mo simplement ene Avertisseur clair pou zot. » (Révélation)
Si kikaine penser ki Allah pas pou aide li (So Messager) dans sa le monde là et dans la vie future, alors laisse li hisse ene la corde ziska léciel ou essaye coupe (sa l’aide là). Alors laisse li guetter sipas so plan pou capave enlève séki enrage li là ! (Al-Hajj 22 : 16)
Ki Allah illumine zot bane les coeurs et faire zot tous soumette à Li tousel, le Rabboul Aalameen (le Maître de tous bane les mondes). Ki Allah faire zot reste ferme dans la Manifestation Divine et ki bane chercheurs de vérité réussi percevoir la lumière d’Allah dans sa siècle présent là et embrasse (accepter) li. Ameen.
Insha-Allah, refutation complète (à bane plusieurs questions ki fine posé etc.) pou être publier en ene booklet. |
