|
بسم الله الرحمن الرحيم
Khutba Jummah
HAZRAT KHALIFATULLAH AL-MASSIH AL-MA’OUD
Munir Ahmad Azim
(20 Shabaan 1432 Hijri)
(Résumé Khutba)
Après Salam, Hazrat Khalifatullah fine commence so Khutba avec Tashahhud, Ta’uz, Surah Al Fatiha, et ensuite li fine dire:
إِنَّ الَّذِينَ يَتْلُونَ كِتَابَ اللَّهِ وَأَقَامُوا الصَّلَاةَ وَأَنفَقُوا مِمَّا رَزَقْنَاهُمْ سِرًّا وَعَلَانِيَةً يَرْجُونَ تِجَارَةً لَّن تَبُورَ
‘Innallaziina yatluuna kitaabal-laahi wa ‘aqaamus-Salaata wa ‘anfaquu mimmaa razaqnaahum sirraww-wa ‘alaa-niyatayy-yarjuuna Tijaaratal-lan-tabuur.
« Bane ki lire livre Allah, ki faire la prière (Namaz) régulièrement et ki dépense ene partie de séki Nous fine fourni zot, soit en secret ou ouvertement, espère faire ene transaction ki jamais pou détruire. » (Surah Fatir 35 :30)
Allah dire : Assurément bane ki récite le Quran et ki établi le Namaz et de tous séki Nous fine donne zot, zot dépensé. Ici de tout séki Nous fine donne zot là, pas veut dire seulement di biens. Non ! Mais li inclure aussi bane capacités, bane habilités et bane moyens, tout.
Donc, Allah pé dire bane ki dépensé de séki Nous fine donne zot. Zot dépensé en cachiette aussi, ouvertement aussi. Allah dire sa c’est bane dimounes ki fine faire ene commerce ki jamais pas ou péri (fini), ene commerce ki jamais pas pou tomber. Et so avantages pou continuer tous le temps. Nous conné ki dans le monde ena boucou bane commerce ki prospérer et fleuri et développer mais après quelques temps, si li pas dans la vie, de dimoune là même, mais dans la vie de so bane zenfants, business là, alle fini et détruire nette.
Mais ici Allah pé mentionne ene tel business ki jamais pas pou fini, jamais pas pou perdi. Mais en réalité kan dépensé dans le chemin d’Allah et pou le plaisir d’Allah bé péna sa bane qualité affaires là, là-dans. Sa c’est bane obstacle temporaire ki bane dimounes zot même zot metté, zot même crée.
Ici le pli honorable c’est celui ki ena plisse Taqwa. Et li normale ki celui ki ena plisse Taqwa ki ena plisse crainte pou Allah, bé c’est li même ki pou donne plisse et personne pas capave arrache sa l’honneur là de li. Kan même li riche ou soi li pauvre. Mais Allah pé mentionne certaine qualités de bane dimounes ki dépensé dans So chemin. Allah dire bane dimounes ki dépensé pou Moi ou soi zot dépensé d’ene tel façon ki Moi mo dire, bé Mo donne la garantie ki c’est ene affaire ki jamais pas pou fini. Tout le temps zot pou profité. Qualités de bane dimounes là, c’est ki zot lire le livre d’Allah, zot faire Telawat Quran et zot réfléchi lors là et ensuite zot faire zot Namaz vine Farz, kot zot pas rate zot Namaz ditout. Ensuite après sa deux affaires là zot dépenser dans le chemin d’Allah. Alors aux yeux d’Allah, sa bane dimounes là zot sacrifice accepter et Allah mette ene tel bénédiction dans zot l’argent ki jamais fini. Donc, kan Allah pé introduire bane ki faire sacrifice financier, bé dès le commencement même Li fine commence sa avec ene affaire de base.
C’est bane dimounes ki faire Telawat Quran et ki faire Namaz et lerlà en résultat de sa zot gagne ene passion de sacrifice, et pareil couma avant aussi mo ti mentionner ki ici aussi fine mentionne en cachiette avant, ensuite fine mentionne ouvertement. C'est-à-dire bane dimoune ki dépenser dans le chemin d’Allah, zot premier tendance, c’est ki zot dépenser en cachiette zot dépenser kot seulement Allah pé trouve zot et personne d’autre pas pé trouve zot. Et bane dimoune ki ena sa qualité l’esprit là dans zot dépense, bé péna personne ki capave mette ene blâme et accuse zot, ki zot, pé faire sa pou ene show, par hypocrisie. Parski ena seulement ene lizié ki pé guette zot, bien-sur c’est lizié d’Allah.
Donc, ene dimoune ki pé cachiette, pé dépensé bé certainement li pé bizin faire sa pou le plaisir d’Allah. Bane grande personnalité de côté d’Allah, spécialement bane prophète d’Allah ki zot en fait bane dimounes ki Allah content plisse, bé c’est zot même ki en fait fine récolter plisse, le prix de zot bane sacrifice ki zot faire. Parski, tout zot bane affaires zot dédié complètement à Allah même.
Bane l’homme d’Allah, tipti zaffaires ki zot faire vine ene Ibaadat dans lizié de zot Rab. C’est pourquoi zot récolter plisse les fruits de zot bane actions, de zot bane sacrifices. Bane dimounes ki subir bane perte, c’est bane dimounes ki quitte sa chemin là et zot dépense zot l’argent dans ene l’autre façon et kan ena pou donne dans le chemin d‘Allah, zot trouve sa lourd et pou zot couma dire zot l’argent pé diminuer et zot pas donne sa dans le chemin d’Allah et finalement ou trouver ki sa dimoune là so l’argent péna Barakat Allah là-dans, li même li pas conner couma so l’argent aller.
C’est Allah même ki fine donne li sa, mais li trouve sa lourd ou sois pas important pou donne dans So chemin. Ena ene l’autre bane catégorie dimounes, zot dépense ena ene mélange de deux – ene partie zot donne pou Allah et l’autre partie zot dépense lors bane kitchose inutile – et là Allah aussi Li mette ene ti peu bénédiction et l’autre parti là, zot pas réussi joindre deux boute. Parski zot fine tic-ticquer pou donne dans le chemin d’Allah.
Mais bane prophètes zot, c’est bane ki retourne tout à Allah. Tout séki zot ena zot dépense dans le chemin d’Allah, alors c’est pas ene affaire ki détruire zot propre égo ; non, mais au contraire avantages ki zot gagner avec sa, péna personne d’autre ki capave gagne bane tel avantages. Parski si ene quelqu’un so sentiment personnel mélanger ensemble avec sentiment d’Allah, en fait li veut dire ki mélange ou propre être dans Allah, plonge ou-même nette dans Allah, d’ene tel façon kot ou péna même ou propre la voix. Ene façon kot, chaque désire ki ou ena, li marche ensemble avec le désire d’Allah. Chaque moment de ou la vie passe sous le plaisir d’Allah. Sa c’est ene affaire, kot ou fini ou même nette dans Allah. C’est pourquoi dans Quran Allah fine ordonne Hazrat Mohammad (saw) pou annoncé :
« Qoul : Inna Salaati Wa nousouki Wa mahyahya Wa mamaati-lir-Rabil-Alameen.»
Guetter tout mo bane Ibaadat, mo la vie, mo la mort, mo lever, mo dormi tout pou Allah. Péna nannié ki pou moi. Donc sa ki appelle dépensé dans le chemin d’Allah et Quran tire ene image de sa, li dire ki bane dépense ki ou faire en cachiette ou ouvertement mais ki ou faire sa que pou la cause d’Allah veut dire bane les autres kitchoses pas plaire ou, ou l’intention c’est seulement pou Allah. Ena bane dimoune de par zot nature même, zot fine crée pou faire bane bon travail. Couma dire Allah fine crée zot même pou faire di biens pou l’humanité.
Sa bane qualité dimoune là, zot pas capave trouve ene dimoune dans difficulté, ni pé souffert ; zot vine de l’avant, sans ki les zot conné, zot vine aide sa bane dimounes ki pe souffert, ki dans difficulté là, zot servi l’humanité dans ene tel façon ki zot pas guetter ki li été. Sa dimoune ki zot pé aider là, et sa bane qualité dimoune là, zot pas bane dimoune riche, ki possède boucou l’argent ki zot pé faire sa, non ! Zot sacrifier zot même, zot madame, zot zenfant, zot faire sa seulement pou plaire zot Rab et zot faire sa dans ene tel façon ki personne na pas conné.
Allah faire ene tel traitement avec sa bane qualité dimoune là, ki jamais ou trouve zot dans difficulté, ou sois pé plaigner et zot illumine zot par So (Allah) la lumière et Allah mette ene tel Barakat dans zot l’argent et zot la caze ki ou pas capave penser même. Mais ena aussi bane dimounes ki dépenser pou la cause d’Allah, kan même zot pé faire face à bane situation difficile ; zot continuer dépenser, zot dépenser dans ene l’heure même zot en difficulté, ki malgré ki humainement parlant, zot ena ene l’amour naturel pour sa le monde là, mais là aussi zot dépenser dans le chemin d’Allah.
Donc, le mot ki Quran fine servi pou zot « yarjuuna Tijaaratal » pas diminuer zot ; au contraire Allah donne zot ene haut rang. Dans le monde ena bane dimounes ki dépenser boucou, mais en retour zot pas gagne nannié. D’ailleurs sa le monde là même ene affaire ki temporaire ki pou fini dans quelque jours. Mais bane ki dépenser dans le chemin d’Allah kan même zot donne ene sou, zot gagne autant de profits, ki sa vine bane avantages eternel. Donc sa c’est ene business ki Allah pé mentionné dans sa verset là. Et c’est pas ene business par coïncidence, non, mais c’est business intentionnel.
Et à cause li intentionnel même ki li rapporte autant de bénéfices. Si li ti ene Néki sans intention, bé maginer ki fleurs aussi donne des parfums, mais fleurs là pas gagne aucaine Sawab là-dans. De la même façon kan de l’eau teigne di feu, bé c’est sous la loi de la nature ki li faire sa. Li pas faire sa avec ene intention. Mais ene dimoune ki capave mette di feu aussi et li capave teigne di feu là aussi, kan avec intention li teigne ene di feu et li mette di feu là, kot Allah envie li metté, lors chaque action ki li faire sois allume di feu là, ou teigne di feu la, li vine ene Néki.
Dans ene lotte place dans Quran chapitre Al-Raad Verset 23, Allah fine mentionne sa sujet là.
Walla-ziina sabarub-tighaaa-‘a Wajhi-Rabbi-him wa ‘aqaamus-Salaata wa ‘an faquu mimmaa razaq-naahum sirraww wa ‘alani-yataww-wa yadra-‘uuna bil-ha-sanatis-sayyi-‘ata ‘ulaaa-‘ika lahum ‘uqbad-Daar.
« Dimoune ki montrer patience dans zot dési pou trouve figure Allah, ki pratique la prière (Salaat – Namaz), ki donne soit en secret ou ouvertement ene partie de séki Nous fine accorde zot, ki repousse le mal par le bien ; sa bane là pou gagne dernier (pli meilleur) la caze. »
Et là-dans avant ki fine mentionne établissement de Namaz, pas fine mentionne lire le livre, mais fine mentionne ene lotte sujet. Et tout sa sujet là en fait zot ressembler. Allah dire : bane dimounes ki adopter la patience en cherchant le plaisir d’Allah, ensuite zot établi le Namaz. Et de tout ce qui Nous accorde zot, zot dépensé là-dans, secrètement aussi et ouvertement aussi.
Guette ici aussi fine mentionne secrètement même avant pou sa bane qualité dimounes là, zot pou gagne ene demeure éternel comme récompense. Donc kan fine mentionne sa demeure finale là, bé fine signale en fait zot l’avenir, zot future. En fait kan pé mentionne bane ki adopter la patience, li veut dire ki dans sa le monde là, ena sa qualité dimounes là aussi ki péna aucun demeure (grand grand dibiens), ki péna bane kitchoses luxe de sa le monde là, mais malgré ki zot pas ena sa bane zaffaires là, là aussi zot pas coquin bane provisions d’Allah. Li veut dire ki zot priver de certain Nihmat (faveur) tel comme la caze, linges et bane les autres nécessités etc. mais malgré sa zot pas essaye accompli zot bane nécessités par bane mauvais moyens (couma kan coquin dans la caisse Jamaat et mette chèques sans provisions, kan dimounes pé donne cash dans so la main pou dépense dans le chemin d’Allah, li mette sa dans so poche ou sois dans ene l’année, li amuser avec l’argent Jamaat ki bane les autres dimounes pauvres et bons, pé fer sacrifices pé dépense dans le chemin d’Allah) et ainsi (sa bane kalité dimounes là) la colère d’Allah tombe lors zot.
Pou bane ki dépenser pour la cause d’Allah, malgré zot dans bane difficultés terribles, zot plutôt adopter la patience. Zot nek envie le plaisir d’Allah. Si zot gagne le plaisir d’Allah, bé pas faire nannié kan même zot pas gagne sa bane les autres affaires là (Kan même zot pas gagne l’auto neuf pou zot et zot famille, billets avion pou alle assister bane fonctions international etc.) Alors sa qualité dimounes là, zot récompense bizin bane demeure finale, kot Allah fer provisions pou tout zot bane nécessités, tout conforts ki Halal, kot zot pas manque nannié. Quran dire ki l’heure là zot bane désire pou accompli d’ene tel façon couma dire pas ena même aucun distance entre zot bane désires et accomplissement de zot bane désires. D’ene coté zot fine ena ene désire et de lotte coté bane désires là pé accompli. Sa c’est bane dimounes ki zot établissement de Salaat ena ene lien avec sujet de patience dans Quran kot Allah fine lier le Salaat avec patience, kot Li (Allah) fine dire « Wasta’-inu bis-sabri was-Salah ».
Donc zot pas servi seulement le patience, mais à travers Namaz aussi zot faire des efforts à accompli zot bane manquement et zot cherche le plaisir Allah (zot pas fer sa pour lizié dimounes). Maintenant en séki concerne zot dépense, zot dépenser dans le chemin d’Allah, c’est bane dimounes ki malgré zot pauvre, malgré ki zot dans bane situations difficiles, là aussi zot continuer dépenser dans le chemin d’Allah.
Ki Allah aide sakaine parmi nous pou comprend l’importance de sacrifice dans le chemin d’Allah et donne nous sa l’esprit de sacrifice là, et faudré pas ki nous prend sa comme ene Khutba ordinaire, nous bizin essaye comprend ki Allah pé envie faire nous comprend et dès aujourd’hui même nous établi nous lors le chemin de la prière, patience et donne nous Zakaat et Chanda dans le chemin d’Allah, et mo faire ene l’appelle à tous bane frères et sœurs, profite sa bénédiction là et donne ou Zakaat et Chanda avec le trésorier du Jamaat Ul Sahih Al Islam.
Malgré ene dimoune péna so bane nécessité (couma tous dimoune chercher dans sa le monde là), là aussi li pas rode gagne li par bane mauvais moyens, et séki li ena li dépense li dans chemin Allah. C’est pourquoi Allah fine faire deux promesses pou sa qualité dimoune là. Mais avant sa fine mentionne ene lotte de zot bane qualités, c’est ki zot envie remplace le mal par le bien ou soi zot envie éloigne le mal en faisant dibiens. Sa sujet là ena lien avec zot propre être aussi et avec zot environnement aussi. Li veut dire ki pou combler zot manquements, pou combler bane affaires ki zot pas fine gagner et donc pas capave dépenser dans le chemin d’Allah ; zot trouve ene lotte moyen, c’est ki zot propage le bien et éloigne le mal et dans sa façon là, zot cherche le plaisir d’Allah.
En mentionnant sa même sujet là Hazrat Mohammad (saw) fine dire ki si ou péna nannié pou dépenser dans le chemin d’Allah, bé ene bon parole aussi pou conte comme ene dépense. Dire au moins bane bon paroles si ou péna nannié, sa affaire de éloigne le mal et propage le biens la, c’est ene affaire naturel ki vini en raison de zot bane manquement. Ena boucou bane dimounes coumsa ki ti content dépensé dans chemin d’Allah, mais zot péna. Alors en revenge zot faire Khidmat ; zot servi la religion pou combler sa privation là. Et tout le temps zot en avant dans le service pour la cause d’Allah et zot faire des efforts pou cherche par n’importe ki moyen pou gagne le plaisir d’Allah.
Ensuite Allah dire ki pou sa bane dimoune là ena la demeure finale. Le mot « uqbad-Daar » ki fine servi ici là, veut dire, ki pas nécessairement ki sa bane dimounes là gagne sa récompense là, lors sa Duniya là même. Et la patience ena connexion avec sa sujet là doublement. Boucou de fois ene dimoune malgré ki li priver de tout bane faveurs, de tout bane nécessités, là aussi li vivre ene la vie tranquille, ene la vie paisible juste pou ki li gagne le plaisir d’Allah. Et sa li gagner, en raison de so patience. Si li péna patience, bé li, ni capave gagne sa tranquillité là et ni ena ene garantie pou so bane Néki. Maintenant si ene dimoune ki pas conner même ki appelle le plaisir d’Allah, li pas au courant de sa, bé kot li pou capave console li, lors tout sa bane manquement et privation là.
Si péna patience, bé tout le temps bane pauvres ti capave ene source de danger pou la société. Le niveau de so bane demandes, de so bane désirs, commence lors bane tipti affaires et li arrive jusqu'à bane haut et excellentes choses. Ene dimoune riche li pas pou ena même sa désire de coquin quelque chose si li trouve li par terre. Si vraiment li riche et ki li trouve ene l’objet de valeur, li pas pou intéresser même avec sa. Mais par contre ene pauvre li, parfois arriver li tenter avec sa et li coquin. Donc, parfois dans la pauvreté ena certaine obligations. C’est pourquoi Allah fine lier sa avec sa sujet là, ki ena certain bane dimoune ki ena certains bane demandes ki faire zot obliger parfois quitte certaines biens et zot plonger dans certaine mal. Ici dans sa sujet ki pé traiter la, sa bane dimoune là, zot tout à fait le contraire, zot éloigne le mal et propage le bien.
Donc, zot pauvreté faire zot vine encore pli jolie. Et c’est sa même bane di biens ki zot propagé dans la société. Kan même zot péna presque nannié, mais là aussi zot donne bane bon conseil et dire bane bon paroles pou essaye réformes bane dimounes et boucou des fois sa bane dimounes là zot conseil ena boucou plisse l’effet ki conseils de bane dimounes riches donner. En fait li veut dire ki li pas nécessairement et obligatoirement ki ou bizin gagne récompense lors tous ou bane Néki ki ou fine faire dans sa le monde là même et ou bizin être récompenser par Allah, et Li (Allah) tester ou patience aussi. En fait fine mentionne la qualité de patience avant pou dire ki en fait sa c’est ene longue période. C’est bane dimoune ki toute longue la vie pou prend patience et zot pou garde zot pas fermes lors la patience. C’est zot ki pou gagne sa récompense de demeure finale là – C'est-à-dire ki après zot la mort, tout zot bane désires zot pas ti encore ena, tout sa là pou accompli et Allah pou donne zot ene la vie de paix et de tranquillité. Nous pé vivre dans ene le monde, kot ena boucou malhonnête, coquin ene dimoune so l’argent, faire dominère.
En ce moment tout bane organisations, bane systèmes politiques, bane systèmes économiques et tout bane sociétés ki ena dans le monde, zot pé étudier et guetter couma pou prend l’argent des autres. Bane la cour aussi fine établi pou sa objectif là même. Département la police aussi pareil, ena bane policiers corrompue, malhonnêtes ki prend bribe avec dimoune. Ici pé faire comprend ki ena dimoune malgré zot dans bane difficulté, zot continuer faire bon travail, dépensé dans le chemin d’Allah pou gagne le plaisir d’Allah.
Ki Allah aide sakaine parmi nous pou accomplie nous devoir. Insha-Allah, la semaine prochaine mo pou continuer sa Khutba Jummah là lors le Sacrifice Financier. Ramadhan pé vini. Insha-Allah, ki nous bane frères et sœurs prend conscience ki dépenser dans le chemin d’Allah pou profite zot pas zis lors sa la terre là, mais aussi dans Aakhérat. Pli zot pou dépensé dans le chemin d’Allah, et surtout dans sa mois béni là, pli so récompense pou pli grand. Insha-Allah. |
