بسم الله الرحمن الرحيم

 

Khutba Jummah

 

HAZRAT KHALIFATULLAH AL-MASSIH AL-MA’OUD

 

Munir Ahmad Azim

 

23 Décembre 2011 ~

(27 Muharram 1433 Hijri)

 

(Résumé Khutba)

 

Après Salam, Hazrat Khalifatullah fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

Li parfaitement claire ki Jésus li personnage central et l’âme même de bane croyances chrétiens. Sans kit croyance dans so manifestation comme le Christ, dans n’importe ki façon ki bane les autres sectes et savants définir li, alors bane fondations même de la Chrétienneté ti pou changer. A travers bane derniers 2000 ans, ena des centaines de millions de Chrétiens ki fine garde zot croyance à travers ene la foi profond ki zot ena dans la vie de Jésus. Ki li de côté le miracle de so naissance, bane zistoires de bane miracles ki li fine fer, so bane rencontres avec bane Romains, Israelites et bane les autres dimounes de la haute société, et en dernier lieu, ki li concernant so crucifixion (so prétendu la mort lors la croix) ; tout sa là c’est bane ingrédients de bases ki fine continuer nourri sa grand religion de l’ouest là, pas zis azordi, mais aussi à travers bane siècles passés.

 

Mais selment li bien bien étrange, et li même ironique ki la plupart de bane l’évènement de so la vie fine reste toujours dans l’ombre, comme ene mystère. Eski li ti né vraiment d’ene maman vierge. Kan eski li ti né ? Kifer dimounes pas ena assez bane informations concernant so la vie depuis li ene bébé ziska kan li fine proclame so mission ? Pou commié lé temps so mission fine duré ? Ki bane ki ti vraiment responsable pou condamne li pou alle crucifier – eski c’était bane chefs juifs ou bane dirigeants Romains ? Eski li fine vraiment mort pendant sa quelques l’heure temps ki li ti lors la croix ou eski li ti inconscient kan bane là fine retire li dépi lors la croix dans ene empressement inhabituel ? Si ti ena ene résurrection (kot après la mort, li fine revine vivant) alors ki sanlà ti bane témoins oculaires, si ena ? Ki signifier bane traces de sang lors tissu dans ki ti enveloppe Jésus temporairement et ki maintenant préserver dans le Cathédral de Turin en Italie ? Eski li fine quitte la Palestine pour bane régions de l’Est pou accompli so mission ki li fine proclamé kot li ti dire ki li ti vine pou bane tribus égarer de la maison d’Israël ? Sa bane questions là et bane les zots encore à propos la vie de Jésus de Nazareth fine continuer challenge curiosité de bane Chrétiens aussi bien ki bane savants non-Chrétiens.

 

Comme illustration, anou commente brièvement lors ene sel l’aspé de so naissance. Dépi commencement deuxième siècle (Après Jésus Christ), le monde Chrétien fine célébrer so naissance le 25 Décembre. Le calendrier chrétien fine laisse nous croire ki li fine né sa date là, 2011 ans de cela. De l’autre côté, bane savants Chrétiens zamais pas fine arrive à ene l’accorité lors l’année ou date exacte de so naissance.

 

Mons. David E. Anderson, UPI écrivain de la Réligion fine fer sa commentaire, 28 ans de cela, en 1983 : « Bane savants na pas ena aucaine preuves solides pou conne date précis de la naissance de Jésus malgré ki la plupart de bane experts astaire place date de so naissance vers 6 ans avant Jésus Christ. » (Newsday – 22 Décembre 1983)

 

La plupart de bane savants de nous l’époque pas fine seulement conclure ki Jésus fine né 6 ans avant l’année ki zot tout fine prend comme l’année de so naissance, mais zot aussi pas accepter sa croyance populaire ki li fine né le 25 Décembre. Couma sa savant David Anderson là ti expliquer à sa l’époque là, sa pratique pou célébrer Noël sa date là fine en fait commencer « en réaction à Saturnales Romain, ene fête de la moisson ki marque solstice l’hiver – c’est-à-dire, le retour du soleil – et kot zot honore Saturne, le dieu de bane plantations (semences). » En d’autres mots, Noël fine vine « ene moyen pou remplace l’adoration soleil avec l’adoration du fils. » Li fine en plusse de sa dire : « Vers 529 Après Jésus-Christ, après ki la Chrétienneté fine vine l’état religieux de l’Empire Romain, l’Empéreur Justinien fine fer Noël vine ene congé civile (publique) et li fine défanne pou travail sa jour là. » Depuis ki sa, Noël fine vine tellement populaire ki même kan le Parlement Anglais ti retire sa congé là le 03 Juin 1647, mais selment à cause préssion de bane dimounes, à cause tellement sa fête là fine vine populaire, zot ti bizin ré-établir Noël comme ene congé publique.

 

Li très claire ki bane croyances populaires lors l’année et date naissance de Jésus zot totalement fausses et alle à l’encontre de bane découvertes de bane historiens, savants et bane experts dans la foi chrétienne. La question c’est : si ene bane bases non-réaliste li entoure zistoire de la ‘résurrection’, eski li pas porte ene coup fatale à bane piliers fondamentales de la théologie de bane chrétiens tel que l’expiation et la croyance dans Jésus comme le Sauveur ?

 

O zot mo bane frères et sœurs Musulmans, ki zot trouve dans Maurice, Rodrigues et dans tous coins le monde, si zot croyance li vraiment dans le Tauhid (unicité d’Allah) et dans bane cinq piliers de l’Islam, alors kifer zot célébrer Noël couma dire li zot fête. Rappelle bien ki nous, bane Musulmans ; Allah (swt) fine donne nous deux fêtes : (1) Eid-ul-Fitr, (2) Eid-ul-Adha. Noël c’est pas nous fête. Au contraire, c’est ene insulte à l’Islam, ene insulte à la foi musulmane.

 

Mo aussi adresse moi en particulier à tous bane frères et sœurs Ahmadi dans le monde, et spécialement bane ki trouve à Maurice, kifer zot  célébrer Noël ? Eski c’est sa vrai l’enseignement de l’islam et eski c’est sa saki le Messie Promis Hazrat Mirza Ghulam Ahmad (as) fine enseigne nous ? Li bien triste pou trouve bane Musulmans Ahmadi et bane les autres musulmans acheter et mette l’arbre Noël avec toutes sortes décorations dans zot la caze et zot dépense ene tas l’argent dans acheter zouzou pou zot bane zenfants et aussi toute sortes kalités feu d’artifices et bane pétards pou ki zot sonner à soir, et brile zot l’argent dans sa façon là. Et en plisse de sa, ena bane tels réunions de famille autour bane barbecues pou célébrer Noël. Eski c’est sa nous bane l’enseignements ? Eski le présent Khalifatul-Massih de la Communauté Ahmadiyya (Hazrat Mirza Masroor Ahmad Sahib) capave tolère tous sa bane kalités innovations là dans Jamaat Massih Maoud (as) ? Eski li tolère bane soi-disant grand défenseurs de l’Ahmadiyyat dans Maurice kan zot bane ki divant divant pou représente bane pli pires modèles à suivre pou bane Musulmans Ahmadi ? Eski pas ena aucaine boycott lors zot ? Zot, zot encore dans Jamaat tandis ki ene dimoune ki dire li gagne révélation de côté d’Allah, mette li dehors du Jamaat. N’importe kan dimounes vine cause avec nous, alors ena ene avertissement et ménace sévère contre sa bane dimounes là pou ki zot arrêter frékante nous et maintenir ene bon relation avec nous.

 

Li pé badiner avec la religion d’Allah et avec Allah et So Messager. Ena causer de la justice mais na pas ena mette en pratique la justice, mais selment bane bidats (innovations) zot bienvenues pou bane Ahmadis tandis ki li et so cercles prend en ridicule bane messages d’Allah. Bientôt très bientôt astaire, Allah pas présser pou puni dimounes tandis ki ena encore létemps et l’occasion pou zot pou repenti et pou réforme zot.

 

Astaire mo envie cause un peu lors question Mubahila ki mo ti lance à Janbah Sahib et Mansoor Ahmed Sahib. Mansoor Ahmed, li fine tellement coincé ki li pé rode traumatise mo disciple Fazil Jamal Sahib. To penser ki to pé traumatise mo disciple Fazil Jamal Sahib, mais en d’autre mots c’est toi-même kip é traumatise et pé gagne peur pour signe sa challenge Mubahila là, toi et to Guru Janbah Sahib.

 

Mo fine agir exactement couma le Quran Shariff fine dire dans Surah Al-Imraan. Comme le chef spirituel du Jamaat Ul Sahih Al Islam mo fine fini signer et aussi tous bane membres de mo Jamaat ensam avec moi dans le challenge de Mubahila, y compris mo disciple Fazil Jamal Sahib aussi.

 

Si toi Mansoor Ahmed to pé insisté ki Fazil Jamal Sahib bizin mette so signature, bé pas bizin jouer sauver kan to-même dans to email daté le 16 Décembre 2011 (adressé à Fazil Jamal Sahib), to ti dire ki si meme Fazil Jamal Sahib pas pour signer, mais toi et to Guru Janbah Sahib pour signe sa Mubahila Challenge là avec moi. Mais Fazil Jamal Sahib fine fini réponne toi, et li forme intégrale avec moi et mo Jamaat dans sa Mubahila là. To fine dire (16 Décembre 2011) :

 

“Si pour ene raison ou pas envie signe sa document là, alors informe nous immédiatement pou ki nous capave signe sa Challenge de Mubahila là avec Munir Ahmad Azim Sahib. Nous pé attane ou réponse immédiat...” (ALORS KOT ZOT SIGNATURES POU SA MUBAHILA LA AVEC MOI ?)

 

Astère ki fine arrive, to jouer sauver, toi avec to Guru, to pé rode faire nous “peur” avec to bane emails enfantin là, mais c’est toi et to Guru ki peur, ki pé sauver de Mubahila et dans to email le 19 Decembre 2011, to envoye ene email rempli de contradictions. Par la grace d’Allah, nous pas peur pour affronte zot.

 

Mansoor Ahmed fine dire moi ki mo ene menteur, dans l’angoisse de so la mort, ki pou arrive li si li signe Mubahila. Li fine faire vision la mort et li dire mo ene menteur. Vine de l’avant to meme avant tout; to pé cause plisse ki to Guru Janbah.

 

Guette ki sorte de réflexion zot fine faire lors toi. Eh bien, zot dans l’erreur et pas ena chemin possible pou zot. (Révélation)

 

Même to dire moi ene menteur, ene dimoune malade, sa pas affecter moi, mais bane menti ki zot fine causer lors Hazrat Mirza Bashiruddin Mahmud Ahmad (ra) comme Musleh Maoud et le garcon promis de Hazrat Massih Maoud (as) ki sa Mubahila là fine lancer à to Guru et à toi. Par la grace d’Allah, moi et mo Jamaat et Fazil Jamal Sahib ensam, nous mette nous confiance dans Allah. Si to insister par to imbécilité et ignorance pour ki Fazil Jamal Sahib signer, mo fine fini signer; mo donne toi ene parole sacré, ki toi et to Guru Janbah Sahib signé premier (parski pour signer mo fine fini signer) et en dernier lieu Insha-Allah, mo disciple Fazil Jamal Sahib pour signer. Signer zot avant, boule dans zot camp (pou signer, pou na pas signer, pou accept Mubahila là ou non) et laisse le monde conner ki sanlà vrai et ki sanlà fausse (entre nous deux (chefs) et groupes).

 

Laisse mo dire toi Mansoor Ahmed, to pas pour capave affaibli pouvoir Allah par to bane emails nonsense là et role ki to pé amener là-dans (dans sa challenge de Mubahila là), laisse mo dire toi, ni toi, ni to Imam pas pou sapé là-dans; pas ena personne pou protége zot contre Allah. Zot punition pour doubler; c’est zot meme kip é cause la perte de zot propre name et tout séki zot pé enventer pour réduire en poussière.

 

Mansoor Ahmed mo pou dire toi: “aaminuu bihii aw laa tuminuu” – Soit accepter li (Mubahila là) ou bien pas accepter. Alors si to accepter li (Mubahila là), faire li vite couma Quran Shareef dire: “Wa laa taquu-lanna lishay-in annii faa-ilun-zaalika gadaa” – Pas dire à propos kitchose: ‘Mo pou faire sa demain.’ Mansoor Ahmed pas prend sa Mubahila là en badinage kan toi et to Imam zot lekaire dans distraction; pas azir couma bane malfaiteurs. C’est bane malfaiteurs ki discute en secret.

 

Bane ki continuer disputer à propos d’Allah (So bane signes), après ki dimounes fine réponne à So l’appel, zot argument sans valeur, dans lizié zot Maître. Ene colère pou tombe lors zot et zot pou gagne ene punition sévère. (Révélation)

 

Pense bien, celui lor ki Allah (swt) So colère tomber, li sûr li pou écrasé.

 

Mansoor Ahmed to croire, to pas croire, pendant ki mo pé refute toi to email – Allah tout de suite révèle moi: “Laa takhaf innaka antal-a’alaa” – Pas peur, parski c’est toi ki pour gagne la victoire. Nous lance zot la vérité contre fausseté. La vérité démoli fausseté ki bizin disparaite. Malheur lors zot pour façon ki zot fine dire lors Hazrat Musleh Maoud (ra).

 

Pas sauver, tenir zot parole, faire Guru signer et toi aussi. Zot pé peur pareil couma bane bourrique, kan zot trouve le vrai Lion d’Allah. Tout pé attane, attende toi aussi, bientôt ou va conner ki sanlà ti lors chemin droite et ti suivre ene bon guide.

 

Ene ti conseil à mo bane disciples et surtout mo disciple Fazil Jamal Sahib: “Montrer patience et zot patience pou vine de Allah seul. Pas chagrin pour zot et pas serre zot lékaire à cause complot ki zot pé faire. Allah reste avec bane ki amène ene bon la vie et ki faire du bien.” Insha-Allah, Ameen.

 

Pour le moment mo arête là-même pour Mansoor Ahmed et so Imam. Plitard mo pou continuer si zot pas signer, Insha-Allah.

 

Ki Allah guide tous bane Musulmans Ahmadi et tous bane les autres Musulmans (en générale) et aussi l’humanité dans so l’ensemble pou ki zot bien comprend priorité de bane messages et messagers d’Allah et pou pas prend sa bane messagers là couma dieux ou garçons Bondié. Répercussions pou sa bane kalités Shirk là pou bien grave si dimounes persister dans zot mauvais conduite après ki zot fine gagne avertissement ki vine de côté d’Allah et de so Avertisseur Choisi de ce siècle. Insha-Allah, ki Allah ouvert lizié et lékaires de bane vrais dimounes ki envie réforme zot et bane chercheurs de vérités. Ameen.