بسم الله الرحمن الرحيم

 

Khutba Jummah

 

HAZRAT KHALIFATULLAH AL-MASSIH AL-MA’OUD

 

Munir Ahmad Azim

 

23 Septembre 2011  ~

(24 Shawwal 1432 Hijri)

 

(Résumé Khutba)

 

Après Salam, Hazrat Khalifatullah fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

وَلاَ تَقْتُلُواْ أَوْلادَكُمْ خَشْيَةَ إِمْلاقٍ نَّحْنُ نَرْزُقُهُمْ وَإِيَّاكُم إنَّ قَتْلَهُمْ كَانَ خِطْءًا كَبِيرًا ۝

Wa laa taqtuluuu ‘awlaadakum khashyata ‘imlaaq: Nahnu narzaquhum wa ‘iyyaakum. ‘Inna qatlahum kaana khit ‘an-kabiiraa.

 

« Pas touille zot zenfant par peur de la pauvreté. C’est Nous ki nourri bane là et zot. Certes touille bane là c’est ene grand péché. » (17: 32)

 

وَلاَ تَقْتُلُواْ النَّفْسَ الَّتِي حَرَّمَ اللّهُ إِلاَّ بِالحَقِّ

Wa laa taqtulun-nafsallatii harramal-laahu ‘illaa bil-haqq.

 

« Et pas tire la vie ki Allah fine rendre sacré excepté par la justice » (17: 34)

 

A la lumière de sa bane verset là, li claire ki l’avortement pas permettre. D’après bane l’informations et l’article dans la presse, ena boucou filles ki pas marier et bane madames pé alle faire l’avortement en cachiette et ena ene grand nombre pé alle faire l’avortement dans l’hôpital et aussi dans bane clinique (privée).

 

Le Gouvernement de Maurice et bane les autres institutions pé faire zot mieux pou faire passe la loi « l’égalise l’avortement » dans le parlement. Dans Maurice le gouvernement et même l’opposition pé mettre tous qualité la loi contre la criminalité (crime) pou empêche crime augmenter, kot pé mettre bane la loi bien sévère. Très bien, c’est ene bon initiative (pou empêche crime), kot dans bane dernières l’année et jusqu’à maintenant crime pé augmenter, pé touille dimoune couma zanimaux.

 

Boucou crime pé ena à cause plusieurs facteurs telle couma frère et frère pé tire sakaine so la vie à cause du bien, touille dimounes à cause l’argent, bane bon camarades à cause boire rhum et les autres boissons alcoolique, kot finalement sa fini en dispute et termine par crime. Bane couples dans la caze gagne bane discutions, la guerre et termine par crime. Ou sois à cause football et politique, ene groupe content ene match, surtout lors final, ene gagner et kot l’autre perdi et à cause sa ena la guerre et crime pareil couma politique aussi ene groupe avec telle parti politique kan ena élection, la guerre entre bane partisans politique kot parfois fini avec crime; ene série nous capave dire concernant crime.

 

Dans cas de l’avortement c’est ene crime, mais beaucoup dimounes et même le gouvernement pas pé comprend. Commettre ene crime en cachiette ou ouvertement c’est ene crime ; alors faudé pas rende crime légale. Pas capave dire ene dimoune kan ou ena pou faire ene crime, vine faire li ouvertement ! A ce moment là ou vote ene la loi kot crime permettre ouvertement. Ki qualité la loi sa ? Kot la logique dans sa qualité raisonnement là ? Pli au moins ti ena sa la frayeur là kan ene dimoune envie alle faire l’avortement. Astaire si ou invite dimounes pou vine faire sa sans aucaine la loi pou empêche faire sa, à ce moment là sa vine ene grand danger pou nous société.

 

Mo invite tous bane bane chef religieux de différent religions aussi et tous bane Imams, n’importe ki Jamaat li appartenir, nous mettre nous bane divergences ene coté, nous tous réuni sous ene seul plateforme pou lève contre bane ki pé dire bizin légalise l’avortement dans sa ti pays ki appelle l’île Maurice là, parski si ene telle la loi passer, alors Allah So punition pou tombe bien vite et personne pas pou sapé are sa punition divine là !

 

Kan ou lire journal même, ou alle conne commié tifilles l’école et bane ki travail dans l’usine et ki travail dans les zot place aussi, alle faire l’avortement en cachiette. Si ou ena ene la grain moutard la crainte de Dieu dans ou lé cœur, et si ou là pou amène dimounes vers Dieu, ou bizin suivre bane commandements divine et vine de l’avant contre sa la loi ki pé envie passer là concernant l’avortement. Zot pas fine hésiter pou légalise la prostitution, maintenant zot pé faire tout encore, pou ouvert la porte de la prostitution plisse ki sa avec zot la loi de l’avortement.

 

Eski sa ki appel libère la femme et considère bane femmes comme ena même droit ki bane zomme ? Et zot pé dire ki bizin augmente nombre bane madames dans parlement et dans d’autre secteur pou travail ? Eski zot pas penser ki pou arrive bane zommes ki péna travail, couma Allah dire dans Quran, dans Chapitre 4 Verset 35 :

 

« Bane zommes ena l’autorité lors bane femme, parski Allah fine donne zot ene supériorité et zot dépense zot dibien avec sa bane là. Alors bane bon femmes bizin être dévoué, surveille ce qui Allah dire zot surveiller même kan personne pas pé guette zot... »

 

Pou moi personnellement, légalise l’avortement ene la loi ki plito dénigrer bane femmes. Eski sa ki nous appelle liberté de la femme ? L’avortement plutôt amène vers liberté sexuelle. Et dans la société actuelle, nous conné ki ravage sa question sexe là pé faire. Et nous conne commié maladie sexuelle transmissible ena, sans oublier le SIDA. Le fait ki nous fine arrive lors sa sujet là, li ti bon pou informe zot ki bane scientistes et bane professionnels de bane jeux électroniques fine vine ensam pou essaye résoudre équation de saki SIDA li contenir et couma li opéré (marcher). Zot fine arrive à ene conclusion, zot fine réussi dans ene certaine mesure alle conné couma li opéré, mais si jamais reussi gagne ene remède pou SIDA, eski zot penser ki Allah pas pou envoye ene virus ki pli destructif ki le SIDA ? Le mystère du SIDA fine prend plisse ki ene dizaine d’années ki ene dimoune ti pou capave penser. Sa virus là li destructif, mais eski l’homme li ena la garantie ki bane les zot pli grands virus pas pou apparaite ki pou détruire li ? Si l’homme contigner dans so immoralité, c’est sa même ki pou arrive li.

 

Dans ene société kot dimoune ki ena à cœur le bien-être de so prochain, pas capave légalise l’avortement. Aucaine gouvernement ki ena ene sense de moralité pas capave légalise l’avortement. Pas à cause certains dimounes ki pé faire kitchose ki pas bon, alors bizin légalise l’avortement parski sa action là (légalise l’avortement) c’est ene moyen pou invite les autres vers sa kitchose ki pas bon là. A ce moment là, le nombre de l’avortement pou augmenter pou aller même; personne pas pou capave empêche sa. Seulement ene grand punition divine pou anéantie tous sa là. Kot ena raisonnement dans l’avortement ? Plutôt pé invite vers le mal!   Pé encourage le mal ! Eski sa c’est ene moyen pou control naissance ? Plutôt CRIME ! Eski kan gouvernement légalise l’avortement ki gouvernement pou donne la femme so dignité ? Parfois en voulant trop de liberté pou donne la femme, kot bane femme fini par être ene l’objet à la merci de sa société là.

 

Kan nous trouve bane mouvements libération pou bane madames, nous demande nous même, ki pou libéré ?   Libère li pou li alle vers le mal ? Libère li pou ki les autres exploite li ? Libère li pou ki li vine ene l’objet dans la main bane exploiteurs ? Libère li pou ki li délaisse le toit conjugal ? Ki pou libéré ? C’est sa libération pou bane femmes ?

 

Ena l’avortement capave faire seulement pou sauve ene la vie ki déjà existé. Par exemple :

 

(1) Ene l’avortement avant quatre mois capave ena, si ene zenfant ki pé boire du lait avec so maman, so la vie menacé. Comment ? Si ene maman so bébé pé boire du lait avec li et maman la fine tombe enceinte pendant sa période ki sa bébé là pé boire avec so maman et maman là pas trouve ene nourrice pou allaite zenfant ki déjà exister là. Si sa grossesse là capave vine ene danger pou sa zenfant ki déjà exister là, pou sauve so la vie, à ce moment la maman là capave, si li ouler cherche recours à l’avortement. Mo pé faire ressortir clairement si zenfant (déjà existant) là dépend zis lors sa du lait (maternelle) là.

 

(2) Si ene médecin consciencieux (ki ena ene conscience morale) fine trouver ki ene madame enceinte so la vie en danger et si so période de grossesse continué et avant quatre mois, alors dans sa circonstance là madame la capave ena recours à l’avortement.

 

(3) Si ene médecin fine trouver ki si la grossesse ene madame capave cause ene maladie ki pou mette en danger la vie de sa madame là et cela avant quatre mois, alors à ce moment là capave ena recours à l’avortement.

 

C’est zis dans sa bane situations critiques là et avant quatre mois ki ene madame capave ena recours à l’avortement, sinon l’avortement déconseiller et c’est ene crime ki attire la colère d’Allah bien vite.

 

Bizin conner aussi ki bane complications ena après ene l’avortement. L’avortement amène boucou complications dans la santé sa madame ki faire li là. Celui ki alle vers l’avortement c’est li pé alle jouer avec so la vie. Li pé alle mettre so la santé en danger. Si la santé péna, ki valeur la vie ena?

 

Ene parmi bane conseil ki le Saint Prophète (saws) fine donner à so Ummah, c’est profite ou la santé avant ki la maladie atteindre ou. Faire maximum Ibaadat tant ki ou en bonne santé; la santé li précieux.

 

Maintenant si ou même ou alle détruire ou la santé, ki sanlà responsable ? L’avortement capave cause problème le rein. Et ou conner ene problème le rein ki été sa. Et à Maurice ces dernier temps boucou dimounes souffert problème le rein. L’avortement capave cause bane problème kot ene madame pas gagne zenfant. Ki manière? Séki la personne concerner pas capave alle juska la fin so période de grossesse. Ti baba là pas rester, li allé, li faire perte. L’avortement cause boucou du tort dans ou le corps. Si seulement ou ti trouve ki quantité fracas sa l’avortement là faire !

 

Gouvernement bien au courant le nombre de mort à la suite de l’avortement à Maurice li très élevé. Bane complications ki développer après ene action de l’avortement dans boucou de cas c’est ene la mort certaine. Ena boucou bane docteurs ici et dans les autres pays aussi ki pratique l’avortement secrètement. Ene crime c’est ene crime ! Tous dimounes ki donne coup de main directement ou indirectement pou commettre ene crime ; li coupable. Pratique l’avortement en cachiette par certain docteurs li pas correcte. Nous bizin ena ene conscience. Pas tous moyens bons pou gagne l’argent. Ena l’argent nous gagne li honnêtement, mais ena malhonnête kot nous gagne li lors douleur les autres. Ki courage ene docteur ena pou prend l’argent lors CRIME, tire la vie ene innocent (ene ti baba innocent). Ou accomplir ene crime et ou prend l’argent lors ou victime. Juska ki niveau ou capave abaisse ou ! Pense so conséquences devant Allah (swt).

 

Comme le Khalifatullah, mo rappelle à tous bane frères musulmans ki pé exerce la médicine, ki pas jette zot dans sa business ki appelle l’avortement là. Pas oublier ki avant ki ou ene médecin ou ene musulman. Devoir ene croyant lors sa la terre là c’est ordonne le bien et empêche le mal. Comme ene musulman nous pas capave encourage dimoune pou faire le mal avec connaissance de cause kot nous conner nous pé jouer avec la vie sa dimoune là et nous pé faire li souffert. Tout sa là à cause quelques l’argent ki pou rentre dans ou poche et ene l’argent Haraam. Faudré pas nous laisse nous Iman (la foi) bouger à cause richesse de sa le monde ici-bas là. Sa le monde ici-bas là, temporaire sa; pense Akhérat ki permanant et couma ou pou présente ou devant Allah (swt).

 

Mo faire ene l’appelle à bane frères musulmans médecins, si jamais ena certains ki par l’ignorance (de Deen) ti pé pratique sa kitchose là, alors fine arrive l’heure pou faire Tawbah (repentir) à Allah et arrête sa kitchose ki appelle l’avortement là. 

 

Bane frères et sœurs musulmans, faudré pas nek suivre saki gouvernement, politicien et majorité dire, ou bien nous reste tranquille; nous bizin lever tous ensemble et dire ene grand NON à l’avortement et nous pas laisse zot bafouer l’enseignement divine.

 

Pou ene vrai croyant dans le Dieu Unique, c’est la parole de Dieu ki passe avant tous, pas bane parole de bane politiciens. Faire attention, pas rejette les commandements d’Allah et ou accepter parole politiciens. Gagne peur sa punition divine ki capave tombe lors nous et personne pas pou sapé are sa et aucaine politicien aussi pas pou capave sape ou. Ki Allah protège sakaine parmi nous. Insha-Allah