بسم الله الرحمن الرحيم

 

Khutba Jummah

 

HAZRAT KHALIFATULLAH AL-MASSIH AL-MA’OUD

 

Munir Ahmad Azim

 

25 Novembre 2011 ~

(29 Dhul Hijjah 1432 Hijri)

 

(Résumé Khutba)

 

Après Salam, Hazrat Khalifatullah fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

فَانكِحُواْ مَا طَابَ لَكُم مِّنَ النِّسَاء مَثْنَى وَثُلاَثَ وَرُبَاعَ

 

...Fan-kihuu maa taaba lakum-minan-nisaaa-‘imasnaa wa sulaasa wa rubaa

 

« ...Mariez avec séki faire zot plaisir, bane madames, deux, ou trois ou quatres. » (An-Nisa 4: 4)

 

Avant ki mo vine lors sa sujet du Khutba Jummah azordi, laisse mo dire zot en bref dans ki context sa Khutba Jummah lors polygamie là pé faire azordi. Normalement mo ti bizin faire ene l’autre Khutba Jummah, mais à la dernier minute Allah (swt) fine faire moi comprend ki mo bizin faire Khutba Jummah lors polygamie azordi et peut-être li pas pou terminer et pou bizin continuer dans bane prochains Khutba Jummah, Insha-Allah.

 

Séki fine passer réssament, quelques Non-Musulmans fine faire ene débat lors sa sujet avec quelques frères musulmans (Ayub Jhageer, Irsaad Rasmally, Imraan Joytee et Ibné Talib Emamdee) ki fine durée plusieurs semaines kot bane Non-Musulman lors ene plateau fine faire boucou critique lors l’Islam à sa sujet là et sa bane frères musulmans là à la dernière minute fine cherche aide de sa bane Mullahs là ki zot pas fine azir positivement mais plutôt fine sauver lors sa sujet là. Alors 2 frères musulmans fine téléphoné, pou explique moi sa bane situations là et ki qualité bane critiques bane non-croyants fine faire lors sa sujet polygamie là. Alors lors certain questions ki zot fine mettre devant moi pou répondre sa bane Non-Musulmans là et fine donne zot so réponse. Zot fine essaye donne sa bane réponse là à sa bane Non-Musulmans là, mais dommage, bane Non-Musulmans fine trouver ki en d’autre mots fine gagne victoire lors zot, lors bane critiques ki zot fine faire lors l’Islam et finalement, sa bane frères musulmans là fine demande moi pou vine de l’avant avec zot dans sa débat là et mo fine dire zot, ki donne moi quelques jours lé temps parceki mo bizin faire duah avec Allah (swt) et si Allah par la revelation divine donne moi ene réponse positif, alors définitivement mo pou vine de l’avant dans le débat kot tous les autres religions et tous bane les autres musulmans aussi présent et dans ene débat public.

 

Après quelques jours de bane duahs et finalement Allah (swt) avant Namaz Tahajjud, révèle-moi en Français ki « To Rab donne toi la permission pou défendre les critiques bien malpropres contre l’Islam ; alors O mon serviteur, aller defendre l’Islam la religion parfait ki fine parfaire par to Rab. »

 

Alors après le Salaat-Ul-Tahajjud et Fajr le matin mo téléphone sa bane frères musulman et  mo explique zot tous et ki Allah (swt) fine donne moi permission alors informe tous bane opposant de l’Islam et bane ki pé faire mauvais critique lors l’Islam lors sa sujet de polygamie là. Alors tous sa bane opposants Non-Musulmans là fine refuser complètement et cet fois-ci moi-même personnellement, mo fine gagne zot numéros portable et mo fine téléphone tous sa bane ki ti lors le plate-forme ki ti pé critiquer, kot sa ti capave déclenche ene grand bagarre, façon ki zot fine faire zot bane critiques et fine dire bane causer bien, bien malpropre ; mais kan mo fine téléphone zot tous ene par ene, et deux là-dans fine alle guette zot personnellement, zot fine azir bien négative et refuser complètement pou vine dans sa débat public lors polygamie là.

 

Alors après quelques jours mo ti pé faire duah couma pou réfute zot et pou faire l’humanité en entier et bane musulmans individuellement comprend sa sujet là, alors Mo Créateur fine révèle moi encore ene fois ki « O le Khalifatullah, to le Calife d’Allah, Allah avec toi ; faire to Khutba Jummah lors sa sujet là kot la plupart bane dimounes pou lire le Khutba et lors Audio en Créole la plupart Insha-Allah zot pou écouter. » C’est pou sa raison là azordi mo pé faire Khutba lors sa sujet là.

 

Et mo capave dire dans l’histoire de l’île Maurice de parmi tous bane Jamaats, c’est peut-être pou la première fois ki sa sujet là pé être traiter comme Khutba Jummah lors ene mimbar ene jour Jummah et li bien possible ki pou ena certain pas pou satisfait et peut-être pou faire bane critiques, mais ki faire mo bizin peur l’homme quand mo Créateur fine donne moi la permission pou défendre aussi l’attaque ki pé faire lors l’Islam et lors sa sujet polygamie là et tous séki mo pou dire li pou à la lumière du Quran Shariff et Hadices et pas pou cause narien à l’encontre de Shariah, pas ena aucaine mensonges ki mo pou prononcer ! Pas ena aucaine malpropreté ki mo pou invite vers sa et bane ki pé cause menti, pé critique séki Allah fine mentionner dans So livre (le Quran) c’est zot ki bizin gagne honteux. Quand à ene kitchose ki ena ki dans Al-Quran, ene kitchose ki Allah fine trouve li important pou cause concernant sa dans So livre (le Quran) ene kitchose ki fine pratique par les meilleurs (bane prophètes d’Allah) ki fine capave marche lors surface sa la terre là, ene kitchose pareil c’est pas avec la honte ou hésitation si Allah fine donne ou bane moyens et capacités pou mettre sa commandement là en pratique. Couma Allah fine faire bien comprend dans Quran Shareef, c’est avec ene obéissance totale ki bane musulmans hommes ki Allah fine donne zot sa moyen et capacité là pou mettre sa en pratique et ti bizin ena coopération tous la famille musulmane pou faire revivre sa Sunnah là.

 

Mais malheureusement, azordi jour sa kitchose là pé être rejeter par la majorité de bane ki fine amène Imaan. Et celui ki pé ouler mette li en pratique, li pé gagne peur so madame, ou so beau-père, ou bien so bane familles, ou bien li pé gagne peur ki dimoune et même so madame et so famille pou dire li ene vagabond li ena deux-trois madames. Sa c’est ene mauvais pensée ki zot pensé lors ene missié musulman et traite li vagabond si li faire Nikah avec plisse ki ene madame. Si missié musulman là ena deux, trois ou quatre madames toute sorte kalité causer zot pou dire lors li, bane vilain causer et causer malpropre, mais zot pas réfléchi, ki c’est ene l’instruction ki Allah fine donne à bane prophètes et aussi bane missiés croyants pieux. C’est pas ene kitchose ki fine inventer par l’homme sa ! Si ou musulman, ou croire dans Allah So bane paroles et Sunnah du Saint Prophète (saws), ou ti bizin accueillir sa favorablement, non plus ou accepter ene partie commandements Allah et l’autre partie ou rejette li et ou faire bane mauvais critique. Ene l’instruction ki Allah (swt) fine révéler dans So Livre Sacré (le Quran Shareef) et pratiquer par So Nabi (saws) et les autres Nabi (as), pas ti bizin même ena critique, ni guette sa avec ene mauvais l’œil. Ou fine faire ene péché bien grave et de l’autre coté ou pé encourage bane non-croyants pou faire bane critique bien malpropre lors Allah So religion (Islam) et c’est ou premier ki pou responsable devant Allah lors sa sujet là.

 

Surtout bane madames musulmanes, si zot missié pé alle faire Nikah avec ene l’autre madame ou sois missié là ena l’intention pou faire ene l’autre Nikah, bane madames guette sa avec ene lizié de critique et avec plusieurs mauvais pensée dans zot la tête contre zot mari. Capave mari là ti ene bon mari pendant plusieurs l’année de mariage mais à cause li mettre ene commandement d’Allah en pratique, et li alle faire Nikah, ki li pas pé commettre aucaine l’adultère dans lizié d’Allah, ki c’est ene kitchose propre dans lizié de so Créateur et aussi li pas pé faire sa Nikah là à cause so bane plaisir sexuelle ou comme ene vice, mais ki pli propre dans lizié de so Créateur kot li pé sauve ene madame ou ene fille so dignité, so l’honneur pou ki li pas tombe dans bane mauvais chemins, tentation de sa le monde ici-bas là.

 

Ou conne bien kan ene madame péna missié lors so le dos, li pas fine marier, ou li fine vine veuve ou divorcé ki qualité so situation bien difficile et compliquer. C’est sa ki Allah (swt) fine mettre sa commandement là dans Quran Shariff. L’adultère ene péché bien grave dans lizié d’Allah, et so punition bien douloureux. Si ene missié peur so madame ou so bane familles, et li alle commettre Zana dehors, sa li pli grave devant lizié d’Allah. Allah pas ouler ki bane zommes croyant faire Zana ; Allah donne bane missiés sa permission là pou faire Nikah avec 2 ou 3 ou 4 madames, « séki faire ou plaisir ». 

 

Allah (swt) fine condamne l’adultère, mais fine encourage So bane banda, faire Nikah ziska 4 madames d’après ou moyen et capacité ; si ou pas pou capave traite zot tous égale, alors marier ene seul. Donc, kan sa kitchose la c’est Allah ki fine rendre li Halal (légale) et ki c’est Allah même ki fine crée la race féminine avec tous so caprice et so jalousie, sa pas veut dire ki dans sa la loi là ena l’injustice ki fine faire lors bane madames, parceki sa droit là Allah fine donne seulement bane missiés, pas bane madames.

 

Au contraire, ene madame ki so le cœur fine rempli avec Imaan en Allah (swt), et conviction dans la justice d’Allah, sa madame là obliger accepter sa kitchose là avec ene l’amour et avec la certitude ki « Si mo Créateur fine légalise ene kitchose pareille, bizin ena du bien et bienfait là-dans pou la race humaine », faudrait pas ene madame guette juste pou li, ki li marier, li dans bien, li pas ouler conne douleur de les zot so bane sœurs musulmanes ki pé souffert. Au contraire ene bonne croyante ti bizin gagne tracas de so bane sœurs dans l’Islam et ou conner commié problèmes ti capave résoudre si juste bane zommes ti pé mettre sa Sunnah là en pratique, et sa pratique là ti pou empêche ou alle vers les autres péchés couma l’adultère même, gambling, fume cigarette, boire l’alcol etc., etc., et aussi commié bane femmes veuves, femmes divorcés et bane veille-filles ti capave gagne ene mariage et zot ti pou gagne ene tranquillité d’esprit et la paix sans entendre bane causer ki pas bizin avec bane belles-sœurs, frères et les autres membres de la famille, et sa aussi ti pou contrôle budget de sa missié là ki li pas ti pou alle dépense so l’argent et so le temps dans bane places et kitchoses unitile ki Allah (swt) pas pou content.

 

Bane les zot religions Non-Musulmans zot pé dire ou ki nous religion encourage marier ene seul fois, ene madame tout seul. Mo pas pé accuse zot tous, mais c’est ene chose réalité sa. Commié missié devant lizié  plusieurs dimoune ki pé commettre l’adultère en dehors, ki pé fini zot l’argent dans la boisson, cigarette, gambling kot madames, zenfants pé passe boucou misère et pé gagne batter avec missié kan li fine boire. Eski c’est sa la religion divine sa ? Eski sa bane l’enseignement de bane prophètes (as) ti vine enseigner dans bane religions avant l’Islam sa ? Et eski sa bane prophètes là ti ena juste ene madame avant l’Islam? Ou sois zot ti ena plisse ki ene madame. Sa bane prophètes là ki azordi ou pé prend zot-même comme dieux, eski zot pas bane ki fine donne bane grand, grand l’exemple kan kot fine marier plisse ki ene madames ?

 

Si ene madame musulmane croyante oppose la polygamie ki Allah (swt) faire descendre dans so Livre Sacré le Quran Shariff, alors définitivement, sa madame là li pé oppose Allah (swt) So paroles, ki sa bien grave, attention ki Allah ena tout le pouvoir pou arrache bane faveur ki Li (swt) fine faire lors li. Si ene madame montrer ene dégoût pou la polygamie, c’est li pé montrer ene dégoût pou l’Islam, et sa c’est Kufr (infidélité). Alors ene madame bizin réfléchi boucou avant li prononce ene mot lors commandement d’Allah, attention ki li trouve so place en dehors l’Islam. Dans certains cas, kan ene missié pé alle faire ene deuxième ou 3^ème Nikah, so madame plaigner avec les autres en donnant l’impression ki plus misérable ki li pas ena personne ! Li pas pé penser ki à travers sa Nikah là, ene ki vraiment dans la misère capave sorti depuis so détresse! Dans certains cas encore, madame là faire so bane frères menace so missié, ou bien même faire so bane grands garçons lève la main lors zot papa !

 

Par la grâce d’Allah ena bane sœurs pé faire boucou zeffort pou mettre en pratique bane l’enseignement de l’Islam ; zot ti bizin encourage zot missié pou faire Nikah avec bane madames ou filles ki dans détresse, problème, difficulté. Bane sœurs azordi ti bizin montrer la différence entre zot et bane madames ki jamais fine conne vraie l’enseignement de l’Islam dans zot la vie; alors ki serti ou fine apprendre vrai l’enseignement de l’Islam et ou fine conne valeur de la religion l’Islam dans tous so aspect ? Kifer alors kan missié faire ene deuxième Nikah, ou révolter pareille couma en dernière Jaahilah lors la rue ! Éne coté ou humilier ou mari et l’autre coté ou humilier l’Islam devant ou bane adversaires.

 

Ene madame bizin pas oublier ki l’amour pou la race féminine c’est ene kitchose ki Allah fine metté dans l’institut de l’homme. Si Allah (swt) pas ti mettre sa kot ti pou ena sa commandement là dans Quran kot ene missié capave marier 2, 3 ou 4 madames ? Alors, li normale pou ene zomme capave marier et pratique sa commandement divine là. Li (zomme là) bizin attirer avec ene madame ki pas ena so mari ou ene veille fille ki pas marier.

 

D’après l’enseignement d l’Islam, ene zomme ki déjà marier, si li arriver intéresser pou marier plisse ki ene, li ena sa droit là et li alle demande la main de sa madame ou ti fille là, pas ena narien blâmable là-dans, parceki l’amour madame c’est ene kitchose ki exister dans bane hommes.

 

« O dimoune, suive chemin ou Maitre qui fine créer ou à partir ene seul personne et fine créer ene compagne pou li à partir sa personne là-même, et Li fine répande (lors la terre) à partir sa deux personnes là boucou z’hommes avec femmes. Suive chemin Allah, car c’est par So grâce ki ou faire bane demandes l’un à l’autre. Respecter bane liens de sang (c-à-d, ou proche parent). Allah surveille ou tout létemps. » (4:2)

 

« Parmi (Allah) So signes : Li fine créer pou ou, bane femmes de ou kalité, pou ki ou vivre en tranquillité avec zot, et Li fine mette entre ou l’affection et la bonté. Ena vraiment là-dans bane signes pou dimounes ki réfléchi. » (30: 22)

 

A cause fautes de temps mo arrête premier partie Khutba Jummah lors la polygamie là même et Insha-Allah, Allah (swt) donne moi Tawfiq et Ilm (connaissance) pou continuer 2^ème partie là et mo bizin dire ki mo pas encore répondre nous bane adversaires de l’Islam zot question dans sa Khutba là, Allah (swt) conne très bien commié Khutba  lors sa sujet là pou aller. Ki Allah (swt) ouvert le cœur de chaque musulman hommes et femmes avec So la lumière pou comprend sa Khutba  là bien, dans ene l’esprit très positif, pas dans ene l’esprit négative, ni ene l’esprit révolutionnaire. Insha-Allah, Ameen.