Text Box: بسم الله الرحمن الرحيم Khutba Jummah HAZRAT KHALIFATULLAH AL-MASSIH AL-MA’OUD Munir Ahmad Azim 27 Mai 2011 ~ (23 Jamadul Aakhir 1432 Hijri) (Résumé Khutba) Après Salam, Hazrat Khalifatullah Al-Massih Al-Maoud fine commence so Khutba avec Tashahhud, Ta’uz, Surah Al Fatiha, et ensuite li fine dire: SURAH AL-ANAM CH.6 V.66 & 68  قُلْ هُوَ الْقَادِرُ عَلَى أَن يَبْعَثَ عَلَيْكُمْ عَذَابًا مِّن فَوْقِكُمْ أَوْ مِن تَحْتِ أَرْجُلِكُمْ أَوْ يَلْبِسَكُمْ شِيَعًا وَيُذِيقَ بَعْضَكُم بَأْسَ بَعْضٍ انظُرْ كَيْفَ نُصَرِّفُ الآيَاتِ لَعَلَّهُمْ يَفْقَهُونَ ﴿66﴾ لِّكُلِّ نَبَإٍ مُّسْتَقَرٌّ وَسَوْفَ تَعْلَمُونَ ﴿68﴾ Qul Huwal-Qaadiru ‘alaaa ‘ayy-yab ‘asa ‘alaykum ‘azaabum min-fawqikum ‘aw min tahti ‘arjuli-kum ‘aw yal-bisakum shiya-‘aww wa yuziiqa ba’-dakum ba’-sa ba’-d. ‘Unzur kayfa nusar-riful-‘Aayaati-la-‘al-lahum yafqahuun. ﴿66﴾ Likulli naba-‘im-mustaqar-ruww-wa sawfa ta’-lamuun. ﴿68﴾ “Dire: “C’est Li qui capave envoye punition lors ou depuis en haut ou depuis en bas ou lipié. Ou bien Li laisse ou embrouiller dans bane divisions et Li faire ou goûte violence l’ene à l’autre. Guette couma Nous explique Nous verset afin qui zot capave comprend… Sak message (d’Allah) vine pendant ene période limité. Bientôt ou pou conne la vérité.” Allah pé dire à Hazrat Muhammad (saws), dire à bane là ki Allah ena le pouvoir pour faire ene punition tombe lors zot de la haut et au-dessous de zot lipié… Ensuite Allah dire ki pour sak prophétie ena ene le temps fixé et zot pas pour tarder pour conne sa. Sa c’est bane versets de Surah Al-Anam ki azordi jour pé appliqué exactement lors tous religions à travers le monde entier aussi bien tous musulmans dans le monde entier et particulièrement bane Ahmadis dans Maurice et dans le monde entier. Les peuples entier faire sourde d’oreilles et aveugle, kot zot rejette le Khalifatullah de l’époque. Zot rejette le Khalifatullah, ene vrai représentant et Choisi d’Allah. Kan zot rejette le Khalifatullah, bé zot pas pé reconnaite et accepter bane signes ki vine de côté d’Allah, mais zot pas pé penser ki traitement ki Allah réserver à bane tels peuples en résultat de zot rejet; bé dans sa bane versets là, Allah pé mentionne sa traitement là, Allah pé dire à Hazrat Muhammad (saws) pour dire zot ki Allah ena le pouvoir pour envoye lors zot punitions de la haut aussi et au-dessous de zot lipié aussi. Et li ena aussi le pouvoir pour divise ou en plusieurs groupes, en plusieurs sectes. Et lerlà ena la guerre entre zot et ene groupe cause la peine à lotte. Allah dire guette couma Nous explique clairement Nous bane signes afin ki zot capave comprend. Ensuite Allah dire : To peuple fine rejette toi et le message : pourtant c’était la vérité. Alors dire zot ki to pas gardien lors zot. To pas responsable de zot. N’importe kan Allah So Taqdeer (destin) agir are zot, to pas responsable. Dire zot ki ni toi et ni personne capave faire Moi (Allah) responsable. Mais sa peuple là pareil couma bane peuples avant ; zot fine gagne sa l’habitude là attribuer zot bane mauvais à bane les autres dimounes. Au lieu ki zot accepter zot responsabilité, zot faire bane zéfforts pou faire bane les autres porte sa responsabilité là. Azordi le 27 Mai ; beaucoup Ahmadis dans tous pays pou célébrer Khilafat Day et surtout à Maurice et hier même sa (le 26 Mai) ti faire 3 ans mo fine proclame moi par ordre divine comme le Khalifatullah. Ki faire Khalifatullah ? Parski fine ena ene déclin dans l’époque du 4ème Khalifa-ul-Massih et fine continuer même dans sa l’époque kot ena ene l’autre calife, le 5ème Khalifatul-Massih. Kan ena sa kalité déclin là, définitivement Allah (swt) bizin élève So Khalifa Choisi (le Khalifatullah). Pareil couma Hazrat Muhammad (saws), après ki l’Islam ti gagne ene grandeur extraordinaire, ti arrive lors sommet mais guette ki fine arriver après. Azordi jour aussi ena bane tels soi-disant Amirs et bane tels Maulvis ki pé propage bane fitna partout. Donc, sak zaffaire kan li arrive à ene sommet, li décliner après. Kan soleil lever, li coucher après. Donc, bizin pas penser ki sa c’est Qayamat, li sa jour de la fin là. Mais kan pé dire Qayamat, li veut dire sa moment là (ki nous pé vivre), plus grand Qayamat kot ena Khalifa Ahmadiyya ki népli conne fer zot travail couma Allah et So Prophète (saws) fine enseigner et pour ena déclin, bé sa même pour comme si ene l’époque de Qayamat et ensemble pour ena bane mauvais dimounes dans sa l’époque de déclin là. The Quran fine en vérité dire: “Pareillement, Nous fine place pou sak prophète bane l’ennemies, bane méchants parmi dimounes et parmi Jinns, ki raconte l’un à l’autre bane jolis zistoires pou trompe zot. Si to Maître ti oulé, zot pas ti va capave faire sa. Alors laisse zot tranquille avec zot inventions.” (6:113) Alors dans sa l’époque de déclin là, Allah (swt) envoye So Khalifatullah – et ene Khalifatullah li ena la crainte d’Allah seulement et non pas de bane les autres créatures, parski c’est Allah (swt) ki fine élève li comme So Khalifa. Kan Allah (swt) envoye So Khalifatullah pou mette ou la main dans la main So Khalifatullah, et sa veut dire ki ou pour en sécurité, ou pou protéger ensam avec li. Et magine bien ki kan même ena bane faiblesses, là aussi c’est bane miracles même ki montrer ki malgré sa Allah So aide vini. Allah (swt) fine faire promesse avec bane croyants ki Li pou établi pou zot bane Khalifa pareil couma Li ti faire établi bane Khalifa avant bane même Khalifa ki ti établi après Hazrat Moosa (as) et Allah dire Li pour établir sa religion là, c’est-à-dire, l’Islam lors la terre. Et Li pour change situation de crainte en situation de paix et de sécurité mais faudré ki zot adore Moi (Allah) et personne d’autres ki Moi (Allah). Sa verset là fine clairement dire ki pour ena ene période de crainte et de frayeur et la paix pour enlever mais Allah pour change sa situation là et pour rétablir la paix. Sak situation de crainte kan l’amour pour Allah enlever dans bane le cœurs, kan l’ignorance fanné partout, kan bane dimounes vine seulement pour bane zaffaires mondaines, kan bane dimounes fine égarer de la Religion (l’Islam – soumission à ene sel Allah), bé à ce moment là, pas zis dans sa siècle là, mais pour tous les temps Allah pour envoye So Khalifa spirituel ; et lors zot la main ena aide et victoire de la Religion ki visible. Zot gagne aide pour maintenir véracité et durer de la Religion ; la Vérité triompher et le mensonge humilier. Tous les temps la Religion triomphé et le mensonge humilier. Tous les temps la Religion triompher avec bane ki amène Imaan (la foi), accepter ene Khalifatullah (Calife d’Allah), et alors zot vine sous la paix et sécurité divine. Comme ene Khalifatullah de sa siècle là, mo pas oulé ki le Ummaté Muhammadiyya (saws) diviser en plusieurs groupes et la guerre entre zot et aussi sa faire mo le cœur faire mal pour trouve le Jamaat de Hazrat Massih Maoud (as) fine arrive dans ene situation dégradant. Comme ene Khalifatullah, mais avant tous mo ene Musulman et mo trouve moi dans la Religion l’Islam ; mo croire dans mo maître Hazrat Muhammad (saws), mo lire même Quran ki zot aussi zot lire, et mo fine croire dans Hazrat Massih Maoud (as). Mo fine né dans l’Islam et dans Jamaat Ahmadiyya. Dépi mo l’enfance mo fine attacher avec Deen-é-Islam et comme ene Atfal dans Jamaat Ahmadiyya, mo le temps ti fini dans Darus-Salaam (Masjid) et alle faire tabligh partout ziska Allah (swt) fine donne moi sa Tawfiq là pour établir Jamaat Ahmadiyya dans l’île de la Réunion en 1990, dans Mayotte en 1997 et Seychelles en l’an 2000 et après à cause mo recevoir Révélation Divine (de côté Allah) le défunt 4ème Khalifatul-Massih fine baze li lors so soi-disant Amir, et mette moi endehors Nizam-é-Jamaat. Allah ti fine fini décrète sa comme sa, pour Li élève moi avec ene Jamaat Sahih Al Islam et élève moi comme So Khalifatullah. Comme Allah So Calife, mo oulé et c’est mo duah sa avec Allah ki zot tous, nous uni ensam avec accorité pour l’amour d’Allah, si vraiment nous ena l’amour d’Allah dans nous le cœur et pour So prophète (saws) et pour Hazrat Massih Maoud (as). Nous oublier nous bane divergences et nous bane l’opinions différent afin ki la paix révini dans l’Islam et aussi dans Jamaat Ahmadiyya. Allah fine créer la paix après la crainte, et contre désirs de bane l’ennemis, fine donne Deen (Religion) ene grand place. Li ti pareil dans l’époque de Hazrat Muhammad (saws) et de Hazrat Massih Maoud (as) et Insha-Allah li pour pareil dans sa l’époque là aussi. Insha-Allah, après sa tempête là, pour appelle bane dimounes vers l’amour d’Allah et kan pour ena beaucoup la lumières (l’obscurité pou disparaite), lerlà zot pou conné ki nous bane objections ti nannié ditout. Zot lizié pou ouvert. Zot pou conner ki nous bane objections pas fine amène nous nannié ; plito la haine pour nous bane frères et sœurs. Kan zot pou réalise sa vérité là et pour retire tous la haine de zot le cœur, à ce moment là, la lumière Divine pou pénétrer dans sakaine so lé cœur, Insha-Allah. Bane l’ennemis même pour trembler pour trouve sa accorité, coopération, uni dans l’Islam ensam là et aussi dans le Jamaat de Hazrat Massih Maoud (as). Si zot tous écoute mo conseils azordi dans sa Khutba Jummah là et obéir et mette en pratique saki Allah fine metter dans Quran Shareef et commandements ki Li révéler à travers moi pour zot propre bénéfices, alors c’est mo duah sa ki INSHA-ALLAH, pas pou ena déclin dans l’Islam, l’Ahmadiyyat jusqu’au Jour du Jugement. Sa-même ki Allah dans Quran Allah fine dire : Obéir Allah et Obéir So Prophète ! Rappelle bien, Allah (swt) début de sa siècle là-même (c’est-à-dire, en 2001) fine donne moi nouvelles de bane calamités. Ena aussi le fait ki ena bane Hadiths ki dire ki le Mahdi (c’est-à-dire, le Khalifatullah) pou fer so l’apparition 20 ou 30 ans après 1400 ans après Hijrat (de Hazrat Muhammad (saws)). “Dimoune pou réuni autour du Mahdi en 1400.” (Risalat al-Khuruj al-Mahdi, p. 108) Dans ene l’autre Hadith, Hazrat Muhammad (saws) fine dire: “Compte 20 ou 30 ans après 1400 Hijri. A sa moment là, le Mahdi pou apparaite…” (Asmal Masalik Lieyyam Mahdiyy Maliki Li Kull-id Dunya Biemrillah-il Malik, Qalda bin Zayd, p. 216) Si nous analyse bien sa bane Hadiths là, tous sa là pé pointe pou mo l’époque, mo venue. Mo ti expulser du Nizam-e-Jamaat Ahmadiyya le 01 Janvier 2001 (c.à.d, 1421 Hijri). Nous maintenant en 1432 Hijri et mo fine fer mo proclamation comme Amir’ul Momeneen le 19 Janvier 2003 (c.à.d, 1423 Hijri), Muhyi-ud-Din le 06 Décembre 2003 (c.à.d, 1423 Hijri), Khalifatullah le 26 May 2008 (c.à.d, 1429 Hijri) et Messie, Mujaddid et Prophète d’Allah officiellement (malgré ki mo fine déjà recevoir sa bane revelations là avant meme ziska ki Allah fine fer moi diboute pour proclamer officiellement) en 2010 (c.à.d, 1431 Hijri). En plisse de sa, Hazrat Muhammad (saws) fine qualifié sa Mahdi là, ki c’est li-même le Khalifatullah. Astaire mo envie partage avec zot ene analyse. Hazrat Massih Maoud (as) ti proclame li le MAHDI sans ki li préciser ki li le Khalifatullah de so l’époque (peut-être mo pé fer erreur, et li fine proclame li comme le Khalifatullah parski zamais mo pas fine lire so bane livres – seulement bane ti extraits ki ti habitué publier dans magazine “le Message” dans Jamaat Ahmadiyya). Mais d’après saki mo conné, zamais li fine proclamer officiellement ki li le Khalifatullah. Pareillement, dans mo l’époque, mo présente devant zot sa partie Hadith kot le Saint Prophète (saws) fine dire: “… Kan zot trouve sa (missié) là, prend Bai’at dans so la main même si ou ena pou rampé lors la neige parski li le Khalifatullah, le Mahdi.” (Ibné Maja, Ahmed bin Hanbal, Haakim, Delami, Ruyani, & Nayeem bin Hammad) --- Mo laisse zot médite lors sa Hadith là. En plisse de sa, Nabi-Kareem (saws) fine bien dire ki dans le temps du Khalifatullah pou ena beaucoup tremblement de terres (et les autres calamités). Alors, si nous réfléchi lors tous saki pé passer, azordi jour toutes sortes kalité calamités pé ravage sa le monde là, partout. Maintenant mo pou mette devant zot bane révélations saki Allah fine fer moi comprend dimanche 22 Mai 2011 à propos de bane calamités ki pou contigne frappe l’Amérique et l’Europe et bane les autres pays (et bane l’îles). Si nous bien guetter bane calamites azordi jour pé fer ravage partout. Donc, comprend bien ki d’après bane prophéties fine ena bane calamités en Amérique, de la même façon fine arrive dans l’Europe et aussi dans bane pays l’Asie. Prend dépi 2001-2011 jusqu’à azordi, commié inondations, tsunami, tremblements de terre, la guerre, vague de chaleur, difé (incendies) cyclones, tornades etc. etc., commié la vie fine fini dans sa 10 ans là, commié pays, la ville fine détruire, commié pays fine vine pauvres, crise économique fer fracas, soif pouvoir, touye bane innocents, la liste trop longue. Tous sa là fine fini arriver, et pé continuer arriver et pou continuer arriver. Pas penser ki sa pou fini là-même. Non ! Allah (swt) pé continuer révèle moi ki pour arrive l’Amérique, l’Europe, l’Asie et même nous bane l’îles et aussi Maurice , calamités lors calamités. Pour ena tellement bane morts ki couma dire l’image de Qayamat et pour ena bane la rivière du sang, bane zanimeaux aussi pas pour épargner de sa. Et pour ena tellement de destruction lors la terre ki depuis ki fine ena création de l’homme, jamais pas fine ena ene tel destruction avant. Et la majorité de bane batiments pour détruire complètement, pour ruiner et zot pour bane places couma dire jamais pas ti habitable. Et ensemble avec sa pour ena encore bane destruction dans le ciel et la terre ziska ki dans regard de sak dimounes ki intelligent zot pou conné ki sa zaffaire là li pas ene kitchose ordinaire et pas pour trouve sa dans aucaine livre ki fine écrire par la main de l’homme. Bane dimounes pour commence penser ki pour arriver maintenant ? Et beaucoup bane dimounes pour saper et beaucoup bane dimounes pour détruire encore et sa jour là bien proche ; au contraire mo trouver ki li derrière la porte. Le monde pour trouve ene scène de Qayamat. Et pas seulement tremblement de terre, pour ena encore bane destructions éffrayant, pour le ciel et pour la terre parski bane dimounes fine arrête adore zot Maître (Allah) et tous bane les cœurs, tout l’attention li vers le monde. Si moi mo pas ti vini, ti pou ena ene retard dans sa bane calamités là. Mais avec mo venue sa punition d’Allah ki ti cachiette là fine vine apparent. Allah conne mieux si pas mo fine bien retenir mo bane révélations ki mo fine gagner et mo pé mette sa devant zot azordi. Ena encore pour dire lors bane l’îles, Jamaat Ahmadiyya de Maurice et les pays et si le 5ème Khalifatul-Massih pas azir avec Taqwa et aussi si bane Musulmans pas réfléchi lors sa message là et zot pas change zot la haine en l’amour pour bane Ahmadis et pour bane Sahih Al Islam, penser ki zot consékances pour été. Pour ena aussi bane grands la guerre, et bane tel la guerre ki tout signe de vie pou effacer. Sa zaffaire kot tout signe de vie effacer là, li capave arriver avec la guerre atomique. Pakistan aussi pas pou sapé avec saki li fine fer avec nous bane frères et sœurs Ahmadis, et surtout demain le 28 Mai, sa faire un an kot zot ti mette 2 bombes dans 2 Masjids Ahmadis kot bane innocents fine trouve la mort. DESTRUCTION OF PAKISTAN IS COMING SOON, VERY SOON. Allah conne mieux kan sa l’heure là pour arriver, mais faire beaucoup duahs. En plisse de sa, Allah fine donne moi sa meme jour là (22 Mai 2011) sa revelation là (en Français): “C’est ene semaine positif ki pé attane toi; to pou capave recevoir bon nouvelle ki vine de la bouche de to Rab. To pou gagne difficulté pou croire là-dans, parski li pou ene kitchose ki to pas pou attane. Mais to bizin garde les pieds sur terre afin ki to pas fer encore bane l’ennemies…” Ki Allah donne nous bane frères et sœurs Musulmans, de tous bane sectes de l’Islam le Tawfiq afin ki zot délaisse zot différences et réuni zot lors le Tawhid et joine moi et ensam la main dans la main nous marche vers la gloire et la victoire finale de l’Islam. Par sa, mo pas veut dire ki victoire là pou vine ene sel coup. Mais sa premier pas là ki ti commencer par bane prophètes (as) et consolider par nous Nabi-Kareem (saws) et continuer par Hazrat Massih Maoud Mirza Ghulam Ahmad (as) et sa humble serviteur d’Allah ki présent parmi zot azordi jour. C’est zis kan tous bane Musulmans pou réuni sous bannière de l’unicité et sous le serment d’allégeance du Khalifatullah ki l’Islam pou gagne la victoire. La-Ghaliba Illallah – Tout victoire pour Allah ! – Insha-Allah, Ameen. Annonce: Le Khalifatullah fine ensuite annonce le décès survenu Mardi soir (le 24 Mai 2011) du petit frère de Dr. Thahir Sahib, Arif Edappakath Sahib (de Kerala, l’Inde) qui ti âgé de 65 ans. Arif Sahib ti prend ene grand l’intérêt dans écoute messages de vérités de la Manifestation Divine, et li ti devant devant pou accepter la véracité du Khalifatullah de sa l’époque là, Hazrat Hazrat Munir Ahmad Azim Sahib. Li fine quitte ene veuve, Zakiyya Beevi Sahiba. Li ti à la retraite. Avant li ti travail comme Dy. Tahsildar/ Magistra Sub-Divisionelle du Gouvernement de Kerala. Ki Allah pardonne li pour so bane manquements et donne li ene place bien haute dans le Jannatul-Firdaus, et ki Allah ouvert pou li bane chemins ki amène vers la Satistaction d’Allah. Ki Allah donne Dr. Thahir Sahib et la veuve de Arif Sahib et zot la famille en entier patience dans sa bane moments de tristesse là. Insha-Allah. Ameen. Ensuite le Khalifatullah fine dirige Namaz Janaza Ghaib (après Salaatul-Jummah) de Arif Edappakath Sahib.