|
بسم الله الرحمن الرحيم
Khutba Jummah
HAZRAT KHALIFATULLAH AL-MASSIH AL-MA’OUD MUNIR AHMAD AZIM
Munir Ahmad Azim
(23 Safar 1432 Hijri)
(Résumé du Khutba Jummah)
Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine dire:
وَاللّهُ أَنزَلَ مِنَ السَّمَاءِ مَاءً فَأَحْيَا بِهِ الأَرْضَ بَعْدَ مَوْتِهَا إِنَّ فِي ذَلِكَ لآيَةً لِّقَوْمٍ يَسْمَعُونَ ﴿66﴾
“Allah faire dessane de l’eau dépi leciel et avec sa Li faire revive la terre après so la mort. La-dans ena ene signe pou dimoune ki écouter.” (16:66)
Allah (swt) fine étende la terre comme ene tapis pour nous et Li fine trace bane chemins là-dans pou nous. Li faire di l’eau dessane depuis lors le ciel. Avec sa de l’eau ki dessane du ciel là Li faire différents qualités plantes pousser, ki capave reproduire. Si vraiment ou ena l’intelligence, ou pou servi ou l’intelligence, ki pena aucaine pouvoir créature pour capave faire de l’eau tombé dépi lors le ciel et avec sa de l’eau ki Allah (swt) faire dessane dépi lors le ciel nous gagne bane légumes, fruits de sa bane plantes là pour manger et aussi pour donne nous bane bétails.
Maurice pé faire face ene de so bane pli pire moment. Couma sa parole là dire, ‘L’eau c’est la vie’ et pour le moment Maurice pé faire face ene de bane pli pire la sècheresse ki li fine faire face pendant 40 ans (et sa malgré ki pendant ene semaine environ, la pluie fine tomber mais pas assez pou rempli à bien bane réservoirs). Tous bane réservoirs fine réduire à moinse ki 35% de so capacité (mo pé cause pou ene semaine de cela). La situation li tellement alarmant ki n’importe ki sanlà ki gaspille de l’eau, si pas pou lave l’auto, et autre grand nettoye (et si arriver trouve zot) alors ena l’amende pou payer. A partir sa semaine ki pé vini là, fine dire ki zis ene fois par semaine pou gagne de l’eau.
Sa amène nous à ene question bien important : ‘Kifer ?’ Zis bane Ulul-al-Baab pou conne la réponse de sa parski le temps, li le temps pou la prière et si nous guette bien, là dans sa situation ki nous pé fer face là, tous la religions pé prier dans so propre façon, culture et avec zot propre croyance et zot pé adore bane ki zot croire ki bondié, et mo pé cause sa surtout pou bane idolâtres. Alors, eski sa la sècheresse ki fine accapare Maurice là pas ene appel pou agir ?
Sa bane tel situations là li pas ene choque parski dans plusieurs de mo bane Khutba mo fine élabore lors le fait ki si bane dimounes (ki li à Maurice ou ailleurs) pas délaisse le Shirk, alors zot conséquences pou grave. Parfois Allah envoye ene telle la pluie ki li transforme en inondations (couma nous pé témoigner dans plusieurs pays du monde) et de l’autre côté, ene situation extrême capave passer kot pas gagne la pluie ditort à tel point ki la sècheresse vine grave. Et c’est alors ki dimounes, kan trouve sa bane situations alarmant là, zot paniquer et zot cherche refuge dans la prière, pour ki la pluie tomber et rempli réservoirs.
Dimanche le 23 Janvier 2011, mo fine fer sa rêve là : « Mo ti pé prié Allah pou envoye la pluie et duah là fine accepter par Allah, et pas zis la pluie fine tomber mais ene cyclone terrible aussi fine former kot sa fine fer le pays paniké et mo fine trouve bane zenfants l’école pé retourne la caze bonheur dépi l’école. » - Alors, mo fine comprend ki malgré ki Allah pou envoye la pluie en réponse à mo bane supplications, mais Allah pou servi sa aussi comme ene moyen pou manifester So colère, pareil couma ti dans le cas de sa la sècheresse grave là. Kan de l’eau ti à l’abondance, zot pas ti conne so valeur et zot ti pé gaspille li, et pareillement zot pas réalise valeur de l’existence d’ene sel Dieu et adore seulement Li.
Hazrat Aisha (ra) fine rapporté: « A chaque fois ki du vent vine fort avec ene nuage épais et sa du vent là li commence soufflé, le Messager d’Allah (nous Nabi Kareem saws) so figure ti pé vine pâle. » (Ki faire ? Li ti pé gagne beaucoup peur, li ti ena la frayeur d’Allah dans so lécoeur. Li pas ti pé capave reste en place, li ti pé agiter.) Hazrat Aisha (ra) demande li : « Ya Rassoollullah (saws), bé ki frayeur ou pé gagner, ki ou pé agiter ? » Hazrat Muhammad (saws) pas dire li nennié. Hazrat Muhammad (saws) faire sa duah là :
« O mo Allah, mo demande Toi du bien ki sorti de sa du vent là, du bien ki ena dans sa du vent là, et du bien dans résultat de sa du vent là. Mo demande protection d’Allah contre le mal ki sorti de sa du vent là, le mal dans sa du vent là, et le mal dans résultat de sa du vent là. » (Ameen)
Maintenant si nous guette bien, c’est du vent ki amène la pluie, mais pas zis la pluie ki li capave apporter, mais li capave amène destruction en formes de cyclones destructifs, bane tempêtes, bane ouragans, typhons etc. bien souvent, dimoune kan zot pé attane la pluie tomber, au lieu de la pluie, zot recevoir ene mauvais surprise kot zot gagne destructions. Sa ti le cas de peuple de Hazrat Hud (as) ki ti réjouir kan zot ti trouve bane nuages (gris) fine former dans le ciel. Zot ti pé attane ki la pluie tomber, mais en fait c’est destruction Allah ki fine maille zot. Alors, pareil couma nous Aka Hazrat Muhammad (saws), nous bizin recherche le bien (par nous duahs à Allah) de tous zaffaires, et cherche protection Allah contre zot mal. C’est avec Allah tousel ki nous bizin demande sa bane la prières là afin ki nous gagne la protection d’Allah contre toutes sortes de calamités, toutes sortes de mauvais situations et privation.
Astaire laisse nous guetter séki nous comprend par la sècheresse. La sècheresse veut dire ki pendant ene période trop lontan pas fine gagne la pluie ki fine tomber pou ravive la terre, bane plantes et alors pas ena assez de l’eau ki disponible pour utilisations domestiques (pour la caze etc.) ou même pour l’agriculture. Ena quatre types la sècheresse : (1) Météorologique, (2) Agricole, (3) Hydrologique & (4) Socio-économique.
(1) La sècheresse météorologique li concerne niveau de sècheresse et duré de sa période kot partout sec là. Bane conditions atmosphérique ki résulter dans bane déficience (manque) dans niveau la pluie li varié d’ene l’endroit à ene l’autre l’endroit.
(2) La sècheresse agricole li plisse affecter production manger et production la ferme. Ki li la sècheresse agricole, ki li ene manque de la pluie, tous les deux contribuer à ene réduction de l’eau dans la terre, dans niveau de l’eau lors la terre et dans niveau de l’eau dans bane réservoirs, etc. Ene manque de l’eau et l’humidité dans la terre capave arrête bane plantes pou germer, et alors sa empêche pou gagne beaucoup fruits et légumes, kot bane piés et plantes pas capave grandi couma bizin (et zot alle sec).
(3) La sècheresse hydrologique li associé avec bane l’effet de réduction dans bane périodes kot pas gagne la pluie et de ce fait pas gagne assez de l’eau pou alimente plusieurs secteurs. De l’eau dans bane systèmes store hydrologique couma réservoirs et bane la rivières zot servi pou plusieurs kitchoses couma par exemple, pou contrôle inondation, pou irrigation, récréation, navigation, hydroélectrique etc. Kan ena la sècheresse, sa bane différent systèmes là zot rode de l’eau et alors ena bane conflits ki soulevé entre bane utilisateurs kot zot rentre en compétition pou gagne de l’eau pou fer sa bane systèmes là fonctionner.
(4) La sècheresse socio-économique li arriver kan demande pou ene marchandise économique li surpasse so disponibilité (ici dans contexte actuel c’est disponibilité de l’eau). Approvisionnement de plusieurs marchandises économique couma de l’eau, forage, la grains, poisson, et hydroélectrique, tous sa là zot dépanne lors le temps. Le fait ki climat li varié, disponibilité de l’eau li suffisant seulement pou détrois l’année mais li pas assez pou satisfaire bane besoins de l’homme et de so l’environnement pou bane les autres l’années. Demande pour bane biens économique pé augmenter à cause ena ene augmentation dans population. Alors approvisionnement pou bizin augmenter à cause bane méthodes production ki pli efficient et ki marche avec technologie.
Malgré la pluie fine tomber au commencement Janvier dans détrois parties du pays (Maurice), mais seulement bizin préciser ki sa pas ti suffit pou rempli bane réservoirs, ki li pou nous propre utilisation, pour l’agriculture et autres. Au contraire li fine créer bane complications kot ena places kot bane drains fine bouché, alors ena l’endroit kot de l’eau fine envahir la caze bane dimounes.
Bien souvent de l’eau la pluie alle dans la mer sans ki ena ene moyen pou canalise sa de l’eau là et servi li. De l’eau pé gaspiller parski gouvernement pas pé prend le devant pou implimente certains mesure pou gagne (conserve) de l’eau. Fine ena bane débâts, bane l’opinions de bane dimounes et du gouvernement pou procède pou prend de l’eau la mer et tire so sel, et fer li vine ene de l’eau ki capave utiliser. Malgré ki sa initiative là li coôte bien cher ($2 dollar par metres cube la mer), mais à la longue li pou bénéfique pou le pays en cas de bane la sècheresse, et sa li pou bénéfique à cause l’île li entourer de l’eau (la mer) !
Azordi tous dimounes dans Maurice, tous religion pé crier ki bizin prier Bondié pour gagne la pluie, réservoir sec, de l’eau pas pé couler, légumes pas pousser et légumes pé vine cher. Si ene dimoune servi de l’eau potable pour lave so l’auto, li paye l’amende, et même ziska prison et lors là Bill de l’eau monté couma flèche – Allah fine donne nous sa gratuitement. Kan pas gagne de l’eau à ce moment ki nous pense Allah. Kan Allah donne nous de l’eau, nous pas remercier Li, nous montrer nous ingrat, nous pas ena reconnaissance envers nous Créateur. Nous kan nous demande Li de l’eau, (dans dimoune so l’esprit) Li oblizé donne nous, mais Li kan Li dire prier Li tousel et pas associer nannié avec Li, ou pas obéir Li, et bane kitchose ki Li fine dire nous pas faire pour nous propre bien-être, nous tourne les dos avec So bane commandements. Kan Li envoye So Messager pour donne ou avertissement et bon nouvelle ou ridiculise So messager et ou tourne ou gros le dos avec Allah et So prophète. Pense bien ki tous pouvoir dans la main d’Allah seul, pas dans la main de l’homme, ni ministres, ni président d’ene pays, ni aucaine chef religieux et Allah (swt) ena tous pouvoir pour envoye lors nous kit calamité depuis lors le ciel, et alors li va vine couma ene la terre glissant, ou bien so di l’eau capave perdi dans profondeur (la terre) et personne pas pou capave retrouve li. Bane récolte ravagé si ena trop beaucoup la pluie et si péna la pluie récolte sec. Allah montrer nous couma la vie lors la terre ressembler di l’eau ki Li faire dessane depuis lors le ciel. Végétation la terre absorbe li et après végétation là vine la paille, et du vent fane li. Ou trouver couma Allah (swt) ena grand pouvoir lors tous kitchose. Alors prier Li tousel dans bane moment de bonheur et de malheur aussi, obéir So bane commandements, prier Li tousel, arrête faire péchés lors la terre avec sa bane zaffaires ki fine prend l’ampleur là ici à Maurice, dans tous coins Club pour jouer l’argent (zougadère). Malgré la boisson alcolisée et cigarette fine vine pli cher, dimounes là pé boire plisse, fume plisse, la drogue pé faire so ravage, la prostitution péna limite, jeune jeune filles de 15 ans ou 16 ans pé vive la vie sans pudeur, péna Haya dans tous coins chemin ; bane jeunes garçon l’habillement couma femme, mette zanon, pik l’ombril, cheveux en pik lors la tête couma tang, jeunes-jeunes pé fumé, péna respect pour grand et ni bane grand aussi pena respect pour bane jeunes.
Azordi jour si papa là péna cigarette pour fumé, li demande avec so garçon, ou garçon demande avec so papa, la boisson alcolique aussi pareil – pourcentage femmes et filles jouer dans bane casinos, club, jouer millionnaire, pé casse paké (péna limite). Bane femmes et filles aussi rentre dans la boisson, bane jeunes filles ki alle l’école ou collège péna haya – sans pudeur avec bane linges indécent et sa aussi tolérer par bane parents. Bane musulmans zot situation dans sa bane domaines là pli grave encore. Bane femmes et filles musulmanes péna haya – l’habillement pas Islamique, bane missiés pé laisse zot bane madames et zenfants habille coumsa – la religion fine disparaite dans la vie de tous sa bane kalités dimounes là, zot fine oublier Allah, et Allah aussi du moment ki zot délaisse Li (Allah), Li aussi oublier zot. Pas zis sa, la colère d’Allah pé menacer et Allah (swt) pé donne ene délai pour ki nous tous repentir sincèrement et tourne seulement vers Li tousel, pour ki nous capave sauver avec la colère Divine. Change zot la vie, change zot la vie – ki langage mo bizin servi pour ki zot capave écoute moi et comprend moi séki mo pé dire zot, pas attache ou avec sa le monde là, pas rode plaisir de sa le monde là, pas obéir dimoune ki so lécoeur pas pense Allah du tout, et zot pé faire zot l’argent, dibiens, pouvoir, zenfants vine zot bane idoles.
Allah fine fixer ene terme pour nous, et lors là pas ena doute, bane ki fine faire du tort persister dans zot infidélité et Allah (swt) fine prépare ene punition bien douloureux, pense bien punition Allah c’est kitchose à redouter. Alle faire appel à bane les autres bondiés ki ou maginer, à part Allah, mais zot pas ena aucaine pouvoir pou enlève malheur ki lors ou, ni pour capave change li.
Tout séki ou posséder pour ena la fin, mais séki avec Allah pour dure pour toujours.
Le fait ki de l’eau li bien précieux, c’est nous devoir pou pas gaspille li, parski nous bizin li pou plusieurs kitchoses. C’est là-dans même ki ena la vie pou bane humains lors la terre. En vérité ena beaucoup bienfaits dans de l’eau et par So grâce et So miséricorde immense, Allah fine révèle moi (So humble serviteur) ene texte lors bienfaits de l’eau (en anglais) kot là-dans fine détaille commié maladies de l’eau guéri. Mo détaille li dans sa Khutba là.
1. Mal de tête, tension, anémie, rheumatist, paralysie, complications poids – kan trop gros, bane palpitations lécoeur, et tombe sans connaissance.
2. Toussé, bronchite, tuberculoze (T.B)
3. Méningite, gastrique, dysenterie, constipation, diabètes.
4. Toutes sortes kalités problèmes lizié.
5. Bane madames zot bane périodes irrégulier, bane décharges blanc (Leucorrhée – ene maladie), cancer l’utérus.
6. Maladies dans néné, zoreilles et la gorge etc.
Lever bonheur le matin et avant lave la bouche et brosse lédent, boire 4 grand verre de l’eau. Pas mange nannié pou à peu près 45 minutes. Après ki ou fine boire de l’eau là, ou capave boire rinse ou la bouche et brosse ou lédent. Après ki ou fine commence sa l’expérience là, boire de l’eau après deux heures temps sak fois pou petit-déjeuner, déjeuner et diner. Et pas mange nannié avant ki ou alle dormi la nuite.
Bane dimounes malades ou bane dimounes avec bane constitution physique ki délicat zot conseiller ki si zot pas capave boire 4 verres de l’eau ene sel coup, zot capave essaye li pour ene première fois avec ene ou deux verre et doucement doucement augmente li ziska quatre verres. Après (ki zot fine habitué) zot bizin boire quatre verres de l’eau régulièrement. En fait, tous dimounes, ki li malade ou en bonne santé bizin expérimente sa méthode là. Bane malades, parski zot pou vine en bonne santé et bane ki en bonne santé – si zot fer sa l’expérience là – pas pou malade jamais. Bane ki pé souffert de rheumatist et gaz/indigestion capave essaye fer sa 3 fois par jour pour premier semaine et après ene fois par jour.
Bane ki pas capave boire 4 verres de l’eau ene sel coup la première fois, capave essaye fer li avec ene ou deux verres, et doucement doucement augmente li et fer li vine 4. Kan ou pou boire 4 verres de l’eau, sa pas pou ena aucaine side-effects. Zis au commencement, pendant à peu près 3 jours, ou pou gagne l’envie pour alle uriner deux ou trois fois après ki ou fine boire de l’eau. Mais seulement après quelques jours, sa l’envie uriner là pou stabiliser. Seulement, couma nous tous conner, de l’eau li ene de bane très grand cado ki Allah fine donne nous dans la nature ; li ene source pour gagne bon la santé. Pena nannié dans mette en pratique sa méthode là et ou même ou pou trouve le resultat (Insha-Allah). Bane ki essaye fer li et gagne bane bienfaits en resultat de sa, alors zot bizin à zot tour informe bane les autres et partage sa bien-être ki zot fine gagner là en essayant sa façon pou maintenir zot en bonne santé (en prenant de l’eau).
De ce fait, de l’eau li pas zis ene élément de la vie dans l’être humain, mais Allah fine fer de telle sorte ki li guéri bane dimounes de zot bane maladies et complications la santé. Alors, arrive séki arrive faudé pas gaspille de l’eau. Bane dimounes et le gouvernement dans so l’ensemble bizin conscient de sa fait là, et zot bizin trouve bane solutions et bane façons pou pas ena gaspillage de l’eau et pou rode bane tel solutions ki pou bénéfique pou tous bane Mauriciens à la longue (pendant longtemps). Sa applique aussi à tous bane pays ki pé face bane telles problèmes de manque d’eau. Zot bizin uni pour la survie de l’humanité, et faire en sorte ki dans sa l’unité là, zot aussi alle reconnaite le tout pouvoir d’Allah, ki Pure, Saint et sans aucaine partenaire. Si tous dimounes arrivé reconnaite sa l’aspé important de zot Maître, alors définitivement sa pou calmer la colère d’Allah, mais si zot pas reconnaite sa, alors Allah ena le pouvoir pou saisir sa bane dimounes là avec même intensité ki Li ti accorde zot So bane faveurs par So générosité avant, et alors, inévitablement, sa inclure le fait ki Allah capave restreindre source de l’eau ki essentiel pour la survie de l’homme, parski sans de l’eau pena la vie, pena végétation. Nannié pena !
Ki Allah aide toute l’humanité pou prend conscience de sa fait là et pas gaspille de l’eau et séki pli important encore, ki zot tourne vers Allah (twa) tousel et prier Li tousel et retire toutes sortes ki idoles visibles et invisibles de zot lécoeur attention sa bane idoles là amène zot vers zot destruction – zot sa bane idoles là fer zot eloigner avec Allah et alors sa bane dimounes là, zot attire la colère d’Allah lors zot-même. Pendant sa semaine là et même avant, nous tous ensam nous fine fer bane duahs spéciales pour la pluie, et par la grâce d’Allah, la pluie fine en effet tombé, mais rappel bien O bane dimounes ki zot bizin reste attacher avec Allah – pas zis pou ene ti létemps – mais pou tous les temps, parski sinon tous zot bane zefforts pou alle dans de l’eau ! |
