|
بسم الله الرحمن الرحيم
Khutba Jummah
HAZRAT KHALIFATULLAH AL-MASSIH AL-MA’OUD
Munir Ahmad Azim
(25 Jumadul Awwal 1432 Hijri)
(Résumé Khutba)
Après Salam, Hazrat Khalifatullah Al-Massih Al-Maoud fine commence so Khutba avec Tashahhud, Ta’uz, Surah Al Fatiha, et ensuite li fine cause lors qualité et nécéssité de la venue d’ene Homme Élu (Messager) de Dieu:
Ene Homme (Messager) de Dieu li représente ene descente de l’esprit en forme humain. Malgré ki tous bane dimounes zot bane être spirituels ki fine encadrer dans bane lécorps ki pou goûte la mort, ene Homme de Dieu li, li décrire la manifestation d’Allah en forme humain. La vie de bane dimounes vine d’ene nature divine, mais bien tiguitte dimounes ki manifester li (c.à.d, sa nature divine là). Ene Homme de Dieu exprime la divinité à travers so Rab (Maître). So mission lors la terre li ene signe de so l’amour ki inspirer par Allah pour tous bane dimounes. Li (l’Homme de Dieu) celui ki réflecter vraiment la nature divine à travers la volonté d’Allah afin ki li capave montrer bane dimounes vrai l’essence de zot l’existence et la Source de zot l’existence (c.à.d, amène zot pou reconnaite Allah comme zot seul Créateur et ki zot tous zot ena sa bane l’essence d’Allah là dans zot.)
Généralement, décrire ene Homme de Dieu comme « descende » d’ene haute statut (léciel) à ene ki pli bas (la terre), mais pas capave servi sa l’expression là pour ene maman ki abaisse li à ene position pli bas pou li prend so zenfant dépi so berceau kan li entende so bébé pé pleurer. Non ! Sa abaissement ki li faire là pou prend so bébé dans so lébras afin ki li capave donne li saki li pé bizin pas capave être décrite comme « descente ».
D’époque en époque, kan bane forces sataniques zot partout dans le monde, Allah envoye li (So Homme) comme So Élu, So Envoyé Spéciale et So Représentant afin ki li protège la droiture pou ki li pas disparaite de la surface de la terre. Li (l’Homme Élu de Dieu) enseigne bane dimoune pou tourne vers Allah et pou reflecter dans zot-même bane attributs d’Allah ki Allah fine depi longtemps metter dans zot (fine purifier zot avec sa), kan zot fine prend naissance lors sa la terre là.
Ene Homme de Dieu li purifié so l’âme à travers la repentance, malgré le fait ki Allah fine créer dans ene tel façon ki li sans péché. Mais faudé garde à l’esprit ki sa pas veut dire ki li sans faiblesses humain, et en tant ki humain, li ena bane faiblesses et alors li capave fer bane erreurs ou fautes. C’est pourquoi, kan li fer bane kitchoses d’après propre l’esprit (au lieu de fer bane kitchoses s’après commandement d’Allah), Allah réprimande li et re-mette li lors rayye. Allah reproche li, mais sa reproche là li prend racine de So l’amour intense ki li ena pour li. Après sa, Li (Allah) parfaire li (So serviteur choisi) par SO l’amour et alors tout naturellement, Allah fer So Élu courber à So volonté après ki li fine bien comprend le décret et le but d’Allah. Nous ena comme example (mo mentionne seulement zis détrois), l’histoire de la vie de bane Prophètes Adam, Yunus, Musa et Dawud,
Ene Homme de Dieu li vini pour ré-établir la justice et l’ordre spirituel. Après ki li fine enseigne bane dimounes couma pou purifier zot à travers la repentance, li faire li ene devoir pou renverse tendance de déclin social (pou ré-amène le progrès social) à travers l’aide de Celui ki fine envoye li et ki Guide li et donne li conseil (Allah ~ Subhana Wa Ta’ala). N’importe kan ena ene manque de guidance et de non-respé à bane devoirs spirituel et à la droiture, l’Homme de Dieu apparaite pou protège structure spirituel de l’univers. La manifestation d’Allah dans So Élu li visible à tout dimounes, parski celui ki Li envoyer prend ene forme humain pareil couma tous dimoune, mais la différence c’est ki So Dimoune (Homme) Choisi li guider par Allah seulement et li prend instructions seulement de Allah afin ki li capave guide bane dimoune ki fine perdi zot chemin pour zot rétrouve zot chemin vers l’adoration d’Allah. A sak fois ki bane forces sataniques menace pou renverse la bonté dans tous so façon, alors l’Homme de Dieu sauve li (bane bons) afin ki zot pas fer défaite, et l’Homme de Dieu li continuer dans so campagne pou ré-amène dimounes sous bannière de l’unicité d’Allah.
O bane dimounes, n’importe kan bane forces sataniques menace pou renverse la droiture et n’importe kan bane vrais serviteurs de Dieu, ki assoiffé de la justice et de la paix, zot prier Allah pour gagne le salut, mo Allah faire revive le chemin de l’enthousiasme spiritual (kot sa bane dimounes là fer zeffort pour agir d’après bane commandement d’Allah). L’appel de sa bane dimounes ki aspire à sa justice et la paix là attire l’attention d’Allah kot Allah manifester Li-même et fer apparaite l’essence de la justice et réaffirmation de So suprémacie comme le Maître (Créateur) à travers l’Homme (le Messager) de Dieu ki prêcher, annonce bane bonnes nouvelles, et averti afin ki sak commandement d’Allah vine clair pour zot (bane dimounes).
C’est ene vérité ki à sak fois dimounes, en particulier bane saints et bane sages zot prier avec ferveur for ki ene Messager de Dieu apparaite, alors après beaucoup létemps d’attente Allah exauce zot duah afin pou fer répare sa grand chemin cassé ki d’ordinaire indique dimounes le chemin vers Allah. Sa bane dimounes là, bane dimounes droites et ki pieux fine prier... et mo fine vini. Mo fine vini pou montrer zot le moyen pour atteindre Allah. C’est zis par envoye ene humain couma tous dimoune ki Allah capave illustrer bane chemin correctes ki bizin prend pour arrive à sa but là. Si li ti envoye bane anges au lieu de bane dimounes lors la terre pou prêche So parole, alors magine ki kalité bane dimounes ti pou gagne peur et senti zot pas en sécurité kan zot ti pou trouve sa bane anges là pé déscende ; surtout si zot alle trouve bane anges ki donne punition pé descende kan dimoune fine prend chemin travers et ki bizin remette zot lors le droit chemin. Si ti arriver ti ena banes ki reste lors la terre, alors définitivement Allah ti pou envoye ene ange même comme Messager vers zot pour ki li cause directement avec bane dimounes et pou ré-amène zot vers le droit chemin. Mais le fait ki c’est bane dimounes ki ena lors la terre, alors d’après bane la loi d’Allah ki Li fine établir pour sa le monde (temporaire) là, Li bizin envoye ene dimoune couma zot-mêmes pou guide zot vers l’adoration d’ene sel Dieu. C’est zis kan mo pé vivre parmi zot ki mo pou capave encourage bane ki aspire zot à l’amour d’Allah pou comprend ki sa l’amour là et pou cultive li dans zot-mêmes.
Mo de l’essence d’Allah pareil couma zot tous (bane humains) zot de l’essence d’Allah, mais arriver sa ki après ene certain létemps lors la terre, kan l’homme li dévier de so chemin droit ki ti destiner pour li, alors Satan prend so l’âme en otage à travers bane actions ki contre saki Allah fine commande li (l’homme) pou fer.
C’est sa séki fine passer dans sa siècle là kan ene soi-disant Amir, de 1998 à Avril 2011 fine manifester so bane kalités sataniques dans ene tels façon ki scandale lors scandale fine ena dans Maurice et Londres et kot sa fine ressenti aussi dans tous coin lémonde, à travers l’injustice ki li (sa soi-disant Amir là) fine fer contre ene Homme de Dieu. Dépi 2001, beaucoup l’injustice, fraudes et corruption ti ene l’actualité à cause de saki so la main et la main de so bane alentours (so bane yes-men) fine amène de l’avant. Zot fine ruine Jamaat Massih Maoud (as), kot fine ena scandale lors scandale , abus de pouvoir, kot sa soi-disant Amir là servi so l’autorité pour créer la haine dans le cœur de bane Ahmadis contre nous, la haine de bane frères et sœurs et même bane zenfants contre nous, là aussi ena beaucoup fine couvert so malpropreté ki li dans Maurice, ki li dans l’Angleterre, malgré fraude lors fraude dans Jamaat Maurice, travail ki fine faire lors bane l’îles avoisinantes, ki fine prend des années et des années pour établir ene Jamaat. Avec le amarat de sa soi-disant Amir là Jamaat Ahmadiyya ki ti établir dans la Réunion, Seychelles et Mayotte ou même Rodrigues fine disparaîte complètement. Li fine guette so l’avantage personnelle au lieu pou guette l’avantage du Jamaat. Li fine bien voyager avec l’argent Jamaat et Pocket Money dans poche, li ti prend li-même comme chef spirituel dans Jamaat, li abuse avec l’auto Jamaat et tous bane les autres privilèges. Li pas ti seulement amuser avec kitchose Jamaat mais li fine dépasse tout limite dans abus.
Dépi sa quelques extraits de révélations et de bane avertissements ki mo fine dire et donner dans mo bane Khutba Jummahs (ki récents) et mo bane livres, en tant ki l’Homme Élu d’Allah, par la grâce d’Allah, mo fine dire :
« Allah dire ki zot pé travaille bien dure pou dévier bane suivants (du Messager d’Allah), spécialement bane ki faibles. Zot penser ki zot possède bane pouvoir de sa le monde là. Kan ene prophète vini, ki sa bane dimounes là dire, zot essaye affaibli so la foi, afin ki zot arrête la propagation de l’unicité d’Allah. Zot ignorer ki Allah fine choisir li et ki li ene Rassool-Allah, ene prophète d’Allah, ene Khalifatullah et ene Massih’ullah. Kan Allah envoye So Rassool, eski zot penser ki li pou marche lors tapis velours? Eski li pou vivre ene la vie comfortable et facile ? Kan li deboute tousel avec fermeté, kot li proclame li-même avec courage ki li le prophète d’Allah, tous dimounes contre li sauf ene poigné ki croire dans li. Allah dire ki n’importe ki stratégies zot servi pou humilier Mo prophète, Allah zamais pou aide zot. Allah challenge bane là ki si zamais zot prend tous bane dimounes de sa la terre là avec zot, et ki tous alle contre Mo prophète, kot zot dire ki zot ena tout pouvoir, Allah dire ki kan Moi Mo avec Mo prophète, pena aucaine dimoune ki pou capave affaibli Mo pouvoir. C’est Allah ki Le Tout-Puissant. C’est Allah ki donne punition. Li capave envoye punition à n’importe ki l’heure. Personne pas pou capave sauve zot, ni zot di bien ni zot zenfant. Personne pas pou capave sauve zot de la colère d’Allah. Zot punition pou doublé parski zot pas ti capave entende bane paroles d’Allah ~ (RÉVÉLATION).” (Extrait de Khutba Jummah 01 Février 2008)
O bane Pharaons de ça l’époque là – l’année 2001 – zot faire zot complot, ribat lors ribat, kimé lors mimbar Hazrat Muhammad (saw). Mo pé adresse ça avec ça so-called Amir là, avec so bane Mullahs et ça bane Zaalims et hypocrites ki travail dans bureau Tabshir dans Londres. Azordi le 1er Janvier 2010, mo pé adresse toi Pharaon pour tous séki to fine faire ; azordi le 1er Janvier, chiffre fine changer – 2001 fine vine 2010. Ça chiffre 1 ti après zéro, mais azordi ça même chiffre 1 là fine vine devant zéro là. Alle rode zot aide avec zot bane idoles, guetter si pas zot pour capave barré séki Allah fine décréter. (Khutba Jummah 01 Janvier 2010)
« Allah (swt) fine informe moi ki kan mo pou prêche so Mission Divine, mo pou gagne beaucoup l’opposition et persécutions, mais aucaine de sa bane l’opposition ou persécutions là pas pou être permis pou mette ene frein or srrête progrès du Jamaat Ul Sahih Al Islam, et ki « bane signes ki prophétise à propos la mort et destruction de bane ki fine rentre au travers chemin de Mo Khalifatullah pou vine de plus en plus manifeste. Le temps de la destruction de bane l’enemies de Hazrat Mirza Ghulam Ahmad (as) et du Muhyi-ud-Din Khalifatullah de sa l’époque là pou reste caché afin ki kan punition Allah attrape zot nek ene coup, zot pou abazourdi et zot pas pou conner ki pou fer. » (RÉVÉLATION 20 Janvier 2010 @ 2.15pm – Sa révélation ti metter lors page d’accueil de nous website, après ki Allah fine révèle moi sa)
« Ameen Jowahir et so bane alentours zot pas réfléchi lors le Quran et zot pas essaye pou comprend et réalise le but réel de bane l’enseignements de l’Islam ; zot fine perdi zot la vue spirituelle et capacité spirituel pou tendé et zot commence trouve fautes avec bane les autres dimounes ki suive bane l’enseignements du Quran. Sa bane kalités dimounes couma zot là zamais envie ki ene bien de côté d’Allah arrive lors bane croyants. Ene hypocrite li ene dimoune tellement rusé pou ki li alle brule so bane bateaux. Li divisé en deux personnalités. Zamais li cause droite et li toujours plongé dans bane discours bien compliquer pou mette confusion dans l’esprit dimounes, dans ene telle façon ki message ki li donné li paraite ene kalité pour ene dimoune, et li paraite ene l’autre kalité pour ene l’autre dimoune. Sa c’est façon de parler zig-zag ki bane hypocrites content adapté et adopté. Insha-Allah, Allah Tabarak Wa Ta’ala pou dans ene proche future expose zot double-visage. » (REVELATION d’Allah, ki fine metter dans Lettre Ouvert à Mons. Ameen Jowahir ~ 04 Avril 2010)
« Ça bane kalité dimounes là, déshonneur tombe lor zot partout kot zot été. Zot fine appelle colère Allah lors zot même, et la misère aussi frappe zot. Tout ça là parceki zot rejette bane signes Allah et ridiculise le prophète d’Allah et par zot mauvais comportement, ni zot l’argent, ni zot zenfant pas pou profite zot et c’est zot même ki faire du tort à zot propre lécorps.” (Extrait de mo livre “Le Vrai visage de bane hypocrites”)
Attende, Mons. le soi-disant Amir, moi aussi mo pé attende avec toi. Allah tardé mais zamais Li pas manque So cible. To fine gagne répit mais pou commié létemps eski to expecte ki to reste à la tête et vole bane membres du Jamaat de l’argent ki zot fine contribué ? Zot fine contribuer li pou bane activités religieux du Jamaat et bane les autres développements important ou bien pou to propre gain personelle ? Pou commié létemps encore sa bane dimounes là pou reste aveuglé et pas démasqué to vrai visage, visage d’ene hypocrite, double-langage, ene comploteur, ene menteur, et celui ki en vérité pé créer fitna (désordre) – spécialement concernant mo expulsion du Nizam-e-Jamaat ensam avec Zafrullah Domun Saheb. Pou commié létemps to penser ki to pou capave fer séki to content? Dimounes couma toi pena la crainte d’Allah dans zot lécoeur. Taqwa na pas ena ! Personnellement mo pas trouver ki to peur to propre calife... “Alors, la fin bane ki ti faire le mal ti tourne bien mal aussi, parski zot ti rejette signes Allah et ti moque de zot.” (Révélation en anglais) » ~ (Extrait de Khutba Jummah 11 Février 2011)
« Sa soi-disant Amir là croire ki li éternelle comme Amir et ki li éternelle lors la terre. Sakaine pé rode couvert li pou ki la vérité capave fer défaite et le mensonge et magouille gagne la victoire, mais laisse mo dire zot, ki arrive séki arrive, sa soi-disant Amir là et so bane protecteurs « mouche-verts » pas pou capave barre sa la main d’Allah ki pou saisi zot très bientôt, et zot pou alle conner ki : Pas alle badiner avec Allah et avec So Prophète, parski plus devant zot pou gagne cogner ! Et kan zot pou tomber, sa pou fer bien dimal, kot zot pas pou même capave alle fer la tôle-la peinture – pas pou ena réparation ! » (Extrait de Khutba Jummah 01 Avril 2011)
En plisse de sa, Allah fine donne moi beaucoup revelation (en forme de bane versets du Quran, bane texts et bane visions) à propos déclin de sa soi-disant Amir là (et so bane alentours) kot Allah fine même dire moi ki beaucoup pou même alle fer prison. Parmi tous sa bane révélations ena ene ki Allah ti donne moi au commencement de la Manifestation Divine, kot li dire : « Mo pou amène zot vers zot destruction petit à petit, sans ki zot réaliser. »
En tant ki ene Homme de Dieu, mo ena le devoir pou demande le 5ème Khalifa du Mouvement Ahmadiyya Internationale sa bane questions là :
Comment se fait-il ki :
1. Ene dimoune ki faire tant di tort pour Jamaat Massih Maoud (as) et fraude encore dans Jamaat ;
2. Dimoune ki recevoir révélation fine dehors, séki fine faire fraude avec l’argent Jamaat encore dans Jamaat.
3. Dimoune ki fine croire dans révélation divine fine mette en dehors Jamaat et magoullière, fraudeur encore dans Jamaat.
4. Bane ki croire dans ene dimoune ki recevoir révélation divine, mette boycott lors zot, pas faire Salaam et gagne l’instruction pour pas invite zot dans aucaine fonction (mariage et les autres choses aussi).
5. Fraudeur, magoullière encore pé prend en considération dans Jamaat Massih Maoud (as) et pas ena boycott lors li !
6. Ene fraude fine arriver, eski li tout seul là-dans, pas ena encore ki complice là-dans avec li ? Eski pas ena l’enquête lors là pli approfondit ?
7. Ene tel situation ki bien grave coumsa, eski le Khalifa pas ti bizin faire dissoudre sa Amila centrale là ?
8. Sa bane dimounes ki fine convert so malpropreté, rembourse l’argent là, le Khalifa pas faire l’enquête pour ki raison zot fine rembourse l’argent ki fraudeur fine prend sans dimander ? Eski coumsa zot ena bel Muhabbat et l’amitié pour zot idole (le soi-disant Amir) ? Li paraite bien louche ! Eski pas ena encore kitchose ki fine traverser sous tapis ?
9. Bane tel fraude arriver dans le Jamaat Massih Maoud (as). Ki trésorier et auditeur pé faire ? Zot dire tous correcte, même ki nannié pas correcte. Zot fine peur Mons. Fraudeur plisse ki Allah (swt).
Rappelle, le Messie Promis (as) ti dire dans so livre « Al-Wassiyat » (pg.28) ki li pas gagne tracas de bane actions héroique de so bane suivants (bien sure ziska ene certain l’époque), mais li gagne tracas couma l’argent Jamaat pou servi.
Kan le 27 Janvier 2006 mo ti envoye ene « Lettre Ouvert » à sa soi-disant Amir là et à so alentours, kot mo ti dénonce li et so bane magouille ki li faire, Mons. Moussa Taujoo dans so Khutba Jummah dire – kan li ti remplace le soi-disant Amir – à tous bane Ahmadis ki si zot recevoir Munir so lettre ouvert, Jamaat fine mette ene boîte cartron pour mette Munir so lettre ouvert là-dans pour ki ensuite retourne li so lettre ki bine vulgaire envers le soi-disant « Amir ».
Azordi mo demande Mons. Moussa Taujoo ki Naïb Amir, et ki pé remplace le soi-disant Amir, mo encore pé attane boître cartron ki li fine mette dans bureau dépi 2006 et nous fine arrive 2011 et séki comique là-dans c’est ki Mons. Moussa Taujoo li-même li pas fine retourne moi so copy lettre ki mo ti envoye li.
L’injustice dans Jamaat Maurice pas pé fini même ! Ena travailleurs pé travail la nuite lizour pé gagne ene salaire bien bas avec la vie difficile couma nous pé vivre azordi jour, parcontre ena pé casse pose, donne l’ordre, amuser li-aussi – li pé gagne Rs.24,000 à Rs.25,000 comme salaire. Eski ou trouve sa juste ou ? Mo laisse ou réfléchi ou-même.
Insha-Allah la semaine prochaine mo pou continuer lors même sujet. Ki Allah protégé la Jamaat Ul Sahih Al Islam dépi bane tel kalités dimounes malpropres, ki li de l’extérieur ou même à l’intérieur du Jamaat dans le future. Insha-Allah. Ameen. |
