|
بسم الله الرحمن الرحيم
Khutba Jummah
HAZRAT KHALIFATULLAH AL-MASSIH AL-MA’OUD
Munir Ahmad Azim
(27 Shabaan 1432 Hijri)
(Résumé Khutba)
Après Salam, Hazrat Khalifatullah fine commence so Khutba avec Tashahhud, Ta’uz, Surah Al Fatiha, et ensuite li fine dire:
قُلْ إِنَّ رَبِّي يَبْسُطُ الرِّزْقَ لِمَن يَشَاءُ مِنْ عِبَادِهِ وَيَقْدِرُ لَهُ وَمَا أَنفَقْتُم مِّن شَيْءٍ فَهُوَ يُخْلِفُهُ وَهُوَ خَيْرُ الرَّازِقِينَ
Qul ‘inna Rabbii yabsutur-Rizqa limayy-yashaaa-‘u min ‘ibaadihii wa yaqdiru lah. Wa maaa ‘anfaqtum-min-shay-‘in fa-Huwa yukhlifuh: wa Huwa khayrur-Raaziqiin. (Saba 34: 40)
Dire: “Mo Seigneur augmente bane provisions pou celui ki Li ouler et Li diminuer et restreindre provisions pou celui ki Li ouler de So bane adorateurs. Saki ou dépenser, Li pou remplace li, et Li le meilleur Fournisseur.”
Par la grâce d’Allah aujourd’hui mo contigne avec mo Khutba lors Sacrifice Financier. Dans Surah Saba Verset 40, Allah dire Hazrat Muhammad (saws) « Dire zot ki mo Seigneur augmente bane provisions pou celui ki Li ouler et Li diminuer et restreindre provisions pou celui ki Li ouler. » C’est pourquoi en connexion avec Allah bizin ena la patience aussi.
Ti ena ene Sahabi de Hazrat Massih Maoud (as) ki ti bien riche et ki so business ti ena ene grand prospérité. C’est ene la famille de businessman même sa. Pendant des générations business fine fleuri. Mais ene coup travail fine commence tomber et situation fine commence détériorer. Li fine écrire Hazrat Massih Maoud (as) pou faire duah pou li. Hazrat Massih Maoud (as) fine gagne sa révélation là, ki Allah Li Puissant, li capave refaire ene travail ki en ruine, kot Li aussi capave ruine ene travail ki fine bien établi aussi ; personne pas capave dire li nannié. Hazrat Massih Maoud (as) ti fine fini comprend ki l’heure Allah envie li capave détruire ene travail bien établi (pou tester So bane serviteurs) et personne pas capave dire li nannié. Et dimoune là aussi fine comprend ki « c’est sa même ki fine décréter pou moi ». Alors sa la peine et sa coup ki ti capave fatale pou ene lotte businessman là, mais pou sa dimoune là, sa fine vine ene source de tranquillité pour li. Sa dimoune là fine comprend ki li capave faire séki li envie, mais « travail là pou alle détériorer même, parski mo Allah fine fini dire moi sa ».
Et effectivement li fine supporte sa. Kan business là fine détruire, après ki li fine contente lors là (li pas plaigner avec Allah – li satisfait avec décision Allah), alors li fine gagne ene tranquillité avec sa. En fait c’est sa même ki pé mentionner dans sa verset là, ki pou celui ki Li (Allah) envie, Li augmente so provisions et pou celui ki Li envie Li diminuer so provisions. Ensuite Allah dire ki magine bien ki tout séki ou dépensé, Allah pou retire la conclusion ki bizin. Ici pas fine mentionne récompense. Façon ki verset là commencer c’est en fonction de sa même, ki sa second partie là baser. Allah pas fine dire, ki dire à bane dimounes ki dépensé dans So chemin ki définitivement zot provisions pou augmenter. Allah pé dire ki c’est li ki pou retire conclusion ki mériter.
Donc li nécessaire ki ou étudier sa verset là, pou ou comprend sujet de sa verset là. En séki concerne bane perte ki capave encourir, finalement Allah dire, dire ki c’est Li ki meilleur Fournisseur – « wa Huwa khayrur-Raaziqiin ».
Donc, ou bizin soumette à Li ; kan de partout ou pé gagne bane difficulté et business pé souffert, ou effort pas pé rapporte nannié, bé maginer ki ou bizin tourne vers Allah parski c’est Li ki meilleur dans donne bane provisions. Kan ou établi lien avec Li et ou tombe en supplication devant Li, bé boucou de fois Li change la situation et lerlà, c’est le décret d’Allah ki marcher – C’est-à-dire, Taqdir ki rentre en fonction suite à ou bane duah. Mo pou cite certaine Hadiths concernant sa sujet là. Hazrat Abu Hurairah (ra) rapporter ki chaque matin ena deux anges ki descende, ene parmi sa deux anges là dire « O Allah donne encore à sa dimoune ki dépensé là, sa dimoune ki ena grand le cœur là et crée bane les autres dimounes ki pou suivre So pas ».
2ème ange là dire ki « O Allah détruire sa dimoune ki faire avare là et fini so di biens nette. » Sa sujet là en fait c’est bane êtres ki roule l’univers Allah. Lors le ciel, sa nous appelle zot bane anges. Kan pé dire ki deux anges pé descende li pas veut dire ki zot pé descende comme deux êtres. Kan nous étudier bane Hadiths de Hazrat Muhammad (saws) et réfléchi bien lors là, nous trouver ki pou chaque travail, pou chaque sujet Allah fine nomme bane anges. Par exemple ena l’organisation kan nous rentre dans le matin. L’obscurité pé aller et maintenant pé faire lizour et ena toute sorte de l’espoir, de désires et ena combien des testes ki pé parer, alors pou sa bane occasions là ena deux sortes de anges ki vine spécialement en action.
Ene c’est celui ki supporte bane dimounes ki dépensé dans le chemin d’Allah et li pé dire Allah augmente di biens de sa qualités dimounes là. Li faire duah pou sa dimoune là. Li dire crée encore bane dimounes ki pou marche lors so pas. Tandis ki lotte là pou dire : « O Allah crée de la peine pou sa dimoune ki avare là, et fini li et détruire tout so di biens. » Sa baddoah là, li en fait ene résultat naturel de action sa dimoune là. C’est sa résultat là ki rentre en action. Et duah là couma dire li ene appel pou ki le résultat naturel rentre en opération. Ange même contre ene dimoune comme sa. Boucou de fois ene bane dimounes dire ki « Nous fine trouve boucou bane avare ki pas fine subir aucun perte ; au contraire zot fine prospérer et développer. » Mais la vérité est ki bane di biens de sa qualité dimoune là fine fini ruiner même si ou pas trouve li. Boucou de fois bane dimoune pas penser ki ena certain dimounes riches ki zot l’argent soi dans bane la banque ou soi dans bane coffre forts. Et zot tellement avare ki zot même pas profite de zot l’argent. Bé ki différence ena entre zot et bane pauvres ? En fait zot l’argent fine fini détruire même. Zot pas gagne aucun profit de sa. C’est neque ene imagination de ou part ki sa bane dimoune là ena bane coffre forts dans zot la mains. En fait c’est pas coffre forts mais c’est bane la clés de bane coffre forts ki ena dans zot la main. Et bane la clés là, dans bane tel la mains ki zot même zot pas capave tire zot propre l’argent.
Donc, zot fine vine bane gardiens, chaque l’heure zot ena sa tracas là ki attention zot l’argent alle détruire, alle fini. En fait sa c’est résultat de sa baddoah là même sa. Sa bane dimounes là zot l’argent même ki zot la clés, mais jamais péna aucaine garantie de zot protection. Tout le temps zot plongé dans bane tracas. Mais bane duah de sa bane anges là certainement faire zot l’effet. Parfois avec sa bane même l’argent ki zot gagner là, kan zot bane enfants hérite de sa bane dimounes là, alors sa bane zenfants là alle détruire dibiens de sa bane qualité dimounes là nette. Et sa aussi li arriver ki ene coup zot business alle subir ene perte subite et kot sa business là arrive à ene point de non retour. Zot alle fini nette. Ena des milliers des malédictions de moffine ki tombe lors zot.
Donc kan ou guette quelque chose extérieurement, pas bizin ou juge tranquillité ene dimoune d’après séki ou pé trouver. Bane sujets ki Quran fine mentionner zot bien profond et c’est sa même ki la vérité. Si ene dimoune Allah fine faire faveur lors li et par la grâce d’Allah, li fine gagne l’argent et li pas dépense dans le chemin d’Allah, jamais sa dimoune là pou gagne la paix et tranquillité d’esprit et li pou trouve so l’argent pé fini dans ene l’autre façon ki li même li pas ti attende, comme-ci dirai sa l’argent là même pé donne li malédiction.
Donc, nous bizin faire boucou duah, ki nous pas tombe dans sa bane situation là, et vine pareil couma sa bane qualité dimoune là. Nous bizin vine couma sa bane dimounes ki, kan anges descende tous le matin, zot dire avec Allah ki augmente di biens de sa qualités dimounes là et zot faire duah pou nous et zot demande duah pou crée bane dimounes ki pou marche lors nous pas. Et pas faire ene manière ki nous gagne baddoah. Alors sakaine parmi nous bizin comprend l’esprit de sacrifice, et dépense dans le chemin d’Allah. Dépense dans le chemin d’Allah ou pas pou vine misère ; au contraire ou pou reste riche jusqu’à Jour du Jugement dernier. Insha-Allah.
Ena beaucoup bénédictions dans dépense dans le chemin d’Allah. Allah augmente sa plus, sans ki ou même ou réaliser. Dans dépense dans le chemin d’Allah, li capave paraite ki ene dimoune pé fini so l’argent, mais en fait li gagne tellement en retour ki péna même aucaine compte de sa (pas capave compter même, sitant récompenses et faveurs ki gagner en retour li grand).
Kan nous dire ‘en retour’, à aucun prix li veut dire ki toute suite, Allah retourne sa dimoune là ene récompense en consequences de so bonne action. Pas couma ou pé penser ki ene cote ou donner et l’autre cote Allah ranne ou sa et augmente li. Quoique ki la majorité de fois li arrive coumsa même, mais en réalité, li ene source de tranquillité pou bane dimoune ki péna sa dans zot l’intention. Zot pas cherche nannié en retour avec Allah. Pou zot, zot dépensé dans ene bon travail seulement pou cherche le plaisir d’Allah. Tranquillité ki sa dépense là donner, péna aucaine l’autre dépense dans le monde ki donne sa qualité tranquillité là. Parfois ou donne ene pauvre à manger, ene nécessiteux, et aussi li ene test pou ou. Parski même si ou péna pou donne li kot ou préfère sacrifier ou droit et ou donne li. Sa c’est ene ti anecdote ki traversé. Mais sa ti anecdote là, li ene source de tranquillité pou toute longue la vie. Kan à l’heure de la mort ou pou penser ki peut être ou fine capave faire ene ti bon action ki capave vine en source de salue pou ou, à ce moment là, c’est sa ti anecdote là ki pou émerger devant ou lizié. Ou pou dire ki mo pas fine capave faire nannié d’autre, bé peut-être sa ti Néki là même va sape moi et évite moi la destruction kot Allah. Donc, li pas nécessaire ki ou trouve récompense de bane Néki physiquement ou soi en matériel. Récompense de Néki ou commence gagner de ki ou faire Néki là. Bane les autres récompense là zot vini et zot aller. Zot vine que des zistoires seulement.
Mais récompense de Néki, li permanent, li eternel li pas fini du tout. Plaisir de Néki, so goût, so tranquillité ki li donné vraiment extraordinaire. Maintenant bane dimounes ki passe zot la vie nette dans sa qualité Néki là, pou zot ena que de plaisir toute longue la vie.
Bane dimoune capave dire ki guetter ki qualité li pé souffert, zot dire ki guette bane prophètes d’Allah couma bizin faire face à tant de difficulté. Mais en fait ou pas concevoir tranquillité d’ene dimoune ki du matin au soir faire la charité. Donc, sa c’est business pou laquelle bane anges faire duah ki « O Allah augmente zot di biens, zot tranquillité et donne zot bane dimounes ki suivre zot et faire pareil couma zot. » Sa duah là fine plisse accepter en faveur de Hazrat Muhammad (saws). Guette ki qualité dimoune ki Li fine créer ki dépenser. Bane dimounes ki ti pé dépensé que pou gagne le plaisir d’Allah.
A part sa zot pas ti ena aucaine attachement avec di biens. Quran tire ene l’image de Hazrat Muhammad (saws) et so bane suivants et dire ki c’est bane dimounes ki pas ti ena aucun désire de sa le monde là. Si zot gagne sa le monde là aussi, zot ti pou gagne sa par Allah même. Zot séki zot cherché, zot cherche faveur Allah même. Et kan nous dire Fazl, c’est bane di biens mondaines aussi (et spirituels aussi). Boucou de fois Quran fine qualifier sa comme la grâce. Donc dans sa aussi zot cherche Allah même et en même temps zot gagne plaisir d’Allah aussi. Ene bane dimounes penser ki zot pé faire duah séparer pou Fazl et séparer pou plaisir d’Allah. Mais en fait bane dimounes ki dépensé dans le chemin d’Allah kan zot gagne la grâce, bé li veut dire ki zot pé gagne plaisir d’Allah même. Pli Allah donne zot li couma dire pé donne plaisir d’Allah même. Parski chaque partie de zot di biens zot dépenser pou la cause Allah même.
Donc, avare là, li, li péna aucaine la vie même li. Pli devant mo pou mette ene lotte image ki Hazrat Muhammad (saws) fine tirer pou bane dimounes ki avare et ki pas dépensé dans le chemin d’Allah et ki avare dans bane affaires mondaines. Pou l’instant mo faire ou tanne ene Hadith de Bukhari rapporter par Hazrat Ibn Massoud (ra) ki dire ki Hazrat Muhammad (saws) fine dire ki faudrait par envier personnes excepter deux qualités dimounes. Si ou ena pou envier, ou bizin envier sa deux dimounes là. Ene c’est ene quelqu’un ki Allah fine accorde li di biens et li dépense sa dans le chemin de la vérité et lotte c’est ene quelqu’un ki fine gagne raisonnement, sagesse, connaissance etc. et li servi sa pou faire jugement de bane dimounes et aussi li servi sa pou aide bane dimounes, li faire zot Tarbiyyat.
En fait bane dimounes ki pas gagne l’occasion de dépenser dans le chemin d’Allah, zot porte zot attention lors propage le bien et éloigne le mal. Pareil couma parfois bane dimounes ki pas trouve claire, bé zot ena bane mémoires bien fort. Bizin ena quique réaction ki définitivement ene insaan (dimoune) montré. Dans sa même contexte là, Hazrat Muhammad (saws) fine tire sa image là. Ki ena deux qualités banda Allah ; si zot péna nannié pou dépensé bé zot servi zot sagesse et zot propage le bien. C’est sa deux dimounes là ki ou bizin envié. Le sujet de dépensé de séki zot fine gagner émerger par li même.
إِنَّ الَّذِينَ يَتْلُونَ كِتَابَ اللَّهِ وَأَقَامُوا الصَّلَاةَ وَأَنفَقُوا مِمَّا رَزَقْنَاهُمْ سِرًّا وَعَلَانِيَةً يَرْجُونَ تِجَارَةً لَّن تَبُورَ
‘Innallaziina yatluuna kitaabal-laahi wa ‘aqaamus-Salaata wa ‘anfaquu mimmaa razaqnaahum sirraww-wa ‘alaa-niyatayy-yarjuuna Tijaaratal-lan-tabuur.
« Bane ki lire livre Allah, ki faire la prière (Namaz) régulièrement et ki dépense ene partie de séki Nous fine fourni zot, soit en secret ou ouvertement, espère faire ene transaction ki jamais pou détruire. » (Surah Fatir 35 :30)
Razaqnaahum ena deux aspé. Ene c’est bane avantages mondaines, bane avantages visibles, bane avantages ki ou gagner avec ou bane capacités ki Allah fine accorde ou.
Dans Hadith Tirmidhi, Hazrat Qurain bin Fati (ra) rapporter ki Hazrat Muhammad (saws) fine dire ki celui ki dépense quelque chose dans chemin d’Allah, Allah donne li des récompenses 700 fois plisse. Mo fine choisir sa Hadith là pou explique ou bien sa chiffre 700 ki fine mentionner là. Parmi bane ki fine collecter Hadith, zot fine mette boucou l’emphase lors bane chiffres. Par sa nous capave comprend ki sa bane Hadiths ki fine collecter ou rapporter bien après là, zot péna bane même poids ki bane Hadiths ki ti rapporter dans bane premiers temps.
Là-bas mentionne des récompenses interminable; fine mentionne bane chiffres arabique ki en fait veut dire plusieurs fois. Par exemple 7 fois, 70 fois tous sa là veut dire boucou même, li infini. Pareil couma Surah Al-Fatiha li ene chapitre dans Livre (Quran) ki so explication interminable. Et dans Surah Al-Fatiha ena seulement 7 versets. Donc, bane après là fine mette tellement l’importance lors bane chiffres ki nous trouver ki li ene affaire contre la nature et caractère de Hazrat Muhammad (saws). Donc soi bane ki fine tender là fine faire erreur dans comprend signification ou soi c’est bane affaires ki fine rapporter bien après. Mais sa Hadith ki mo fine mentionner là, c’est pas ene Hadith de sa l’époque après là. A cause de sa donc bizin réfléchi bien lors so signification.
Mo fine par exprès dire ou sa parski parfois ena bane Hadiths ki mentionne bane chiffres ki faire ki li vine complètement en contradiction avec l’excellent sujet de Hadith là li-même. Et li vine en contradiction avec le Quran aussi. Parfois nous trouver ki pou ene action ki ene dimoune faire fine mentionne récompense ki équivaut 70 fois bénédiction de Hafiz Quran. Ena les autres Hadiths mentionner ki ena certain action ki équivaut récompenses de tous bane bons Ibaadat de toute longue la vie. Si nous comprend bane sujet là en référence avec sa bane chiffre là, bé toute l’organisation de récompense dévire en-bas là-haut. Et sa qualité Hadith là paraitre en contradiction avec bane versets du Quran.
Donc soi bizin cherche ene signification bien profond là-dans ki pas ena contradiction avec bane les autres sujets. Mais ici Hadith ki mo fine mentionner là c’est ene Hadith de Tirmidhi et li dans bane premiers l’époque. Alors nous pas capave nek rejette li lors sa base là. Kan pé mentionne 700 fois plisse, moi mo pas prend li coumsa ; ki mo fine dépense ene roupie et ou fine gagne 700 roupies. Sa li pas correcte ! Parfois sa aussi arriver ki si ene dimoune bien servi ene roupie avec sagesse bé li capave rapporte zot par centaines de milliers roupies aussi dans bane affaires mondaines.
Donc kan pé dire 700 fois li pas en comparaison avec sa roupies ki ou fine dépensé là. En fait li 700 fois plisse de récompenses ki ene dimoune capave gagner avec so zéffort. C’est-à-dire, Allah accorde ou 700 fois plisse ; le meilleur récompense ki ou ti capave gagner à travers ou bane zéfforts. Si ou comprend sa sujet coumsa, bé lerlà li console le cœur.
En fait l’exemple ki Quran donner lors bane chiffres c’est en référence avec sa qualité l’exemple là ki nous bizin comprend sa. Là-bas Allah pé dire ki ou bane dépenses dans le chemin d’Allah li couma dire ou fine plante ene la grain dans la terre et kan sa commence fleuri c’est 7 zépi ki sorti et de chaque zépi ena 100 la grain donc li vine 700 fois plisse. Mais ensemble avec sa fine mentionner ki pou celui ki Allah envie, Li donne li encore plisse. Li pas arrête là même. Donc sa aussi c’est ene moyen pou comprend sa Hadith là.
Ki Allah pou donne ou boucou fois plisse, mais Allah dire pas arrête là même ; Li capave continué donné encore autant ki Li envie. Et sa ena connexion avec sincérité de l’intention.
Donc dans sa verset Quran là, en fait li trouve dans Chapitre 2 Verset 262, Allah pé donne garanti ki nous pou gagne non seulement ene résultat visible, c’est-à-dire plisse l’argent etc. mais aussi nous Imaan pou augmenter et nous pou vine pli proche avec Allah. Dépensé dans le chemin d’Allah fine exister dépi ki Islam fine établi. Kan bane Sahaba ti pé accepter l’Islam, zot ti pé faire promesse: Namaz, Sacrifice financiers, faire Khidmat-é-Khalq.
Sa bane promesses ki zot ti faire là, fine préserve zot dépi difé l’enfer, même si zot pas ti ena nannié, mais zot ti pé donne quelque chose. Dans ene Hadith Hazrat Muhammad (saws) fine dire pas arrête faire sacrifice financier dans chemin Allah, sans quoi Allah pou block zot di bien.
Ene lotte Hadith Hazrat Muhammad (saws) fine dire sa dimoune ki Allah fine donne li di bien, et li pas faire sacrifice financier Jour Qayamat, sa di bien là pou vine couma ene vieux serpent et couma cadena lors so li cou et lors so la mâchoire. Après sa Hazrat Muhammad (saws) ti lire ene Ayat Quran ki dire : « Bane dimoune ki faire crappe avec zot l’argent et pas dépense dans chemin Allah, Jour Qayamat, sa l’argent là pou vine couma ene cadena lors zot li cou. »
Dans Bukhari, bane Sahaba dire ki ti ena Sahaba pas ti ena l’argent, zot ti pé alle dans bazar pou travaille; n’importe ki travaille mais kan zot ti pé gagne sa l’argent là, zot ti pé donne sa comme sacrifice financier. Et sa bane Sahaba là, zot riche jusqu’à azordi. Dans ene lotte Hadith: Hazrat Muhammad (saws) fine dire Allah accepter zot sacrifice financier, et Li prend li dans so la main droite et Li prend soin et élève li. Même si zot donne ene tipti sacrifice, Allah faire li grandi jusqu’à ki li vine couma montagne Uhud.
Dans sa siècle ki nous fine rentrer là, c’est ene tel siècle kot nous pou attane bien vite l’accomplissement de bane sujets de sa bane Hadith là et bane versets Quran là et nous attane ki zot accompli non pas ene fois, mais plusieurs fois, parski vitesse avec laquelle Jamaat pou progresser, bé avec même vitesse pou ena bane demandes pou bane sacrifice financiers. Maintenant nous népli capave reste couma nous été. Kan ene dimoune grandi, bé li nécessaire ki so bane vêtements aussi grandi, li bizin change bane vêtements là. Si ena boucou enfants et ki zot pé grandi, bé bizin grandi la caze. Donc, le Jamaat Ul Sahih Al Islam dans ene telle l’époque kot li pou progresser avec ene bel vitesse, Insha-Allah ; nous bane linges d’hier, maintenant pou paraitre serrer. Nous la caze fine vine tipti. En vérité c’est bane bane sacrifices ki donne la victoire aux peuples ; c’est par bane sacrifices ki attire l’amour du ciel. Le jour kot le Jamaat Ul Sahih Al Islam pour atteindre le sommet des sacrifices, sa jour là-même nous pou couma dire ene zenfant bien gâté et ki assize dans Godi d’Allah et tous nous la peines et tous nous misières pou disparaître. Insha-Allah
Donc c’est pourquoi ki à la lumière de sa bane verset Quran là, le Jamaat bizin progresser dans sacrifices financiers aussi et dire avec full confiance, c’est Allah ki pou donner. Faire duah ki Allah donne nous lors sa Duniya là aussi, « pou ki nous capave donne sa dans To chemin (O Allah), et To plaisir et pou accompli To bane demandes, nous bizin boucou l’argent, bane l’argent ki HALAL mais nous, nous To serviteurs, nous pas pou demande are personne d’autre, nous pou demande are To tout seul. » Nous bizin montrer nous couma bane compagnons du Saint Prophète (saws) ki cherche la grâce avec Allah même et tous grâce ki Allah donne nous li vine aussi bane plaisirs Allah ensemble, ensemble.
Ki Allah aide nous pou comprend sa bien et aide nous pou faire le sacrifice dans So chemin. Insha-Allah. |
