بسم الله الرحمن الرحيم

 

Khutba Jummah

 

HAZRAT KHALIFATULLAH AL-MASSIH AL-MA’OUD

 

Munir Ahmad Azim

 

30 Septembre 2011  ~

 

(02 Dhul-Qaddah 1432 Hijri)

 

(Résumé Khutba)

 

Après Salam, Hazrat Khalifatullah fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

مَثَلُ الَّذِينَ حُمِّلُوا التَّوْرَاةَ ثُمَّ لَمْ يَحْمِلُوهَا كَمَثَلِ الْحِمَارِ يَحْمِلُ أَسْفَارًا بِئْسَ مَثَلُ الْقَوْمِ الَّذِينَ كَذَّبُوا بِآيَاتِ اللَّهِ وَاللَّهُ لَا يَهْدِي الْقَوْمَ الظَّالِمِينَ ۝

 

Masalul-laziina hummilut-Tawraata summa lam yahmiluuhaa kamasalil-himaari yahmilu ‘asfaara. Bi’-sa masalul-qawmil-laziina kazzabuu bi-‘Aayaatillaah. Wallaahu laa yahdil-qawmaz-zaalimiin.

 

“Bane ki fine chargé pou applique Tauraat mais ki ensuite fine néglige faire li, zot pareil couma bourrique ki transporte de gros livres. Couma mauvais l’exemple dimoune ki refuse accepter versets Allah! Et Allah pas guide bane malfaiteurs.” (62: 6)

 

La connaissance pas capave garanti la guidance, kot li veut dire ki la guidance li pas dépanne lors la connaissance, mais c’est dans pouvoir Allah (swt) ki li dépanne. Sa verset Quran ki mo fine fek mentionner condamne sa bane Mullahs ki fine prend chemin l’égarement. 

 

“Si Nous ti oulé, Nous ti capave élève li haute avec Nous signes, mais li fine accroche li à la terre, et li fine suivre so propre désirs. Li pareil couma ene lichien. Si to attaque li, li tire so la langue. Si to quitte li tranquille, li tire so la langue pareil. Sa ene l’exemple dimoune ki rejette Nous signes. Raconte zot sa zistoire là, afin ki zot capave réfléchi.” (7: 177)

 

Ena beaucoup les autres versets et bane Hadiths du Saint Prophète (saws) lors sa sujet là. Sa sujet là li bien important, kot d’après ene Hadith, bane anges de l’enfer pou attrape sa bane mauvais Mullahs (ki devié dimounes du droit chemin) même avant ki zot attrape bane idolâtres. Sa bane soi-disant Mullahs là pou protester, et zot pou rode conner ki fer pé condamne zot avant même bane ki adore idoles. Alors réponse ki zot pou gagner de côté Allah pou:

 

“Eski (li pareil couma) kikaine ki reste en devotion, pendant la nuit, prosterner, déboute, ki faire attention à la vie future, et ki espère miséricorde so Maître? Dire zot: ‘Eski bane ki conné et bane ignorant pareil?’ Seulement bane ki ena l’intelligence réfléchi.” (39: 10)

 

O bane frères et sœurs ! Nous ena respect pou ene Mullah à cause nous considère li comme ene héritier de Nabi-Kareem (saws). Mais mo bizin préciser ici, ki faudé conné ki kalité Mullah nous supposé suive so l’exemple ! Le vrai héritier du prophète li bizin ene dimoune ki marche lors le chemin droit. Celui ki insolent, et ki lors mauvais chemin li ene héritier de Shaytaan au lieu du prophète. Kan nous ena respect pou ene vrai Mullah ki Muttaqi (pieux et ki ena la crainte d’Allah dans so le cœur) li ene forme de respect ki nous ena pou le Saint Prophète (saws) et Hazrat Massih Maoud Mirza Ghulam Ahmad (as) et si nous alle respecter ene Mullah fouteurs désordre (et ki dévier dimounes de bane vrais l’enseignements d’Allah) c’est couma dire nous pé respecter Shaytaan.

 

Ene dimoune ki pas lors le droit chemin pas pou capave dirige bane les autres dimounes vers le droit chemin. Bane chefs de bane non-croyants et infidèles capave être reconnu comme chefs de bane Musulmans. Ene savant ki servi mauvais langage contre Hazrat Muhammad (saws) et pé insulter li couma ene infidèle ou non-croyant. Alors li pas mériter ki l’Ummah ena ene respect pou li (sa kalité mauvais Mullah, fouteur désordre là).

 

O mo bane frères et sœurs ! La connaissance li utile, si seulement li renforci nous la foi, sinon ene savant dans la Chrétienneté capave li aussi être reconnu comme ene grand savant dans so propre communauté. Ibliss aussi ti ene savant bien reconnu et selment aucaine Musulman péna respect pou li. Li ti connu comme professeur de bane anges, kot li ti habituer donne la connaissance à bane anges. Kan li fine refuse obéir le Prophète d’Allah Hazrat Adam (as), alors Allah fine maudit li et fine rejette li. A sa moment là, bane étudiants d’Ibliss (c’est-à-dire, bane anges) fine change zot comportements envers li ; zot fine maudit li, zis à cause zot priorité dans l’obéissance c’est pou obéir Allah et So Prophète.

 

O mo bane frères et sœurs ! Li ene grand regret ki bane Musulmans, au lieu zot ena respect pou Allah (swt) et So prophète (saws), ki zot pé fer zot ? Zot pé montrer plisse respect envers zot professeur (ki lors mauvais chemin). La loi ki fine établi li oulé ki ene Musulman dans sa le monde là faudé pas li content so frère, camarade ou n’importe ki sanlà plisse ki Allah (swt) et So Bien-Aimé Prophète (saws).

 

Allah (swt) fine dire à propos bane ki rejette So signes :

 

“Mais bane ki rejette Nous Signes, Nous pou laisse zot alle vers zot destruction doucement doucement, dans ene façon ki zot pas réaliser. Mo pou donne zot ene délai, vraiment Mo plan solide. ” (7: 183-184)

 

Ki Allah guide nous et aide nous pou vine bane vrais Musulmans par la grâce de So Miséricorde infini et par l’honneur de So Bien-Aimé Hazrat Muhammad (saws). Ameen.

 

O bane Musulmans ! Au nom d’Allah, dire moi saki la foi été ? La foi c’est pou témoigner ki Allah (swt) Li bien grand et Li vrai, Li Al-Haqq. Le contraire de véridique c’est menteur. Si nous arriver dire ki Allah (swt) fine cause menti, sa parole là li cancelle (annule) la foi islamique ki nous dire nous ena. Si la foi reste intacte après ki nous fine attribué ene mensonge à Allah, alors sa capave fer l’homme réfléchi à saki « la foi » veut dire réellement ! En d’autres mots, sa la foi là li ene la foi ki zis la bouche dire, mais en vérité sa dimoune ki attribué ene mensonge à Allah, kot li dire ki Allah fine cause menti, alors sa dimoune là pas capave considère li ene Musulman croyant.

 

Kifer nous appelle bane astrologues, Hindus et bane Chrétiens et Juifs bane non-croyants ? Pourtant zot pas appelle zot bane bondiés menteurs. Zot pas accepter bane paroles du vrai Dieu, Allah (swt) parski zot pas conne Li. Ou pas pou trouve ene incroyant lors sa la terre là ki reconnaite Allah (swt) comme ene sel Allah (Dieu) et accepter So bane paroles comme so propre parole, et ouvertement appelle Allah ene menteur. Bien rare ki ou pou trouve sa.

 

En gros-somodo, aucaine dimoune ki juste (lors le chemin droite) pou capave ena doute dans le fait ki sa kalités dimounes là fine servi bane langages bien insultant et abusifs contre Allah (swt) et So Prophète (saws). Fine maintenant arrive l’heure pou Allah (swt) pou testé nous. Alors gagne la crainte d’Allah (swt), ki So pouvoir li bien illimité et ki Li ene sel Allah. Et agir d’après sa bane verses Quran ki mo fine lire devant zot là.

 

A ce moment là, zot vrai la foi pou rempli zot le cœurs d’ene la haine contre sa bane kalités mauvais dimounes (ki invite vers l’égarement). Li pas pou laisse zot prend part sa bane kalités dimounes (bane Mullahs fouteurs désordres) ki contre Allah (swt) et So bien-aimé prophète (saws). En fait, zot pas haïr sa bane dimounes là personnellement, mais zot ena la haine contre zot bane actions, zot bane mauvais pensées et zot bane mauvais complots ki zot faire (pou dévier dimounes de vrai l’enseignements d’Allah). En réalité, ene vrai Musulman bizin content (ena l’amour) à travers l’amour d’Allah et pour le plaisir d’Allah, et li bizin ena la haine à travers la haine d’Allah pour gagne le plaisir d’Allah. Bane camarades d’Allah zot ou bane camarades, tandis ki bane l’ennemies d’Allah c’est ou bane l’ennemies. Ou pas pou suive zot ni prend zot défense mais au contraire ou pou haïr zot. Faire la justice au nom d’Allah (swt) ! Kan bane anges ti ena pou choisir, zot fine abandonne zot respect ki zot ti ena pou Ibliss et zot fine side de côté d’Allah et de So Prophète. Bane paroles d’Allah li ena plisse poids ki respect ki zot ti ena pou Ibliss (avant li désobéir Allah). Alors, dans (bane anges là) zot lizié, l’ennemi d’Allah li aussi zot l’ennemi et camarade ou prophète d’Allah li aussi zot camarade et bien-aimé.

 

Si ene kikaine zoure ou maman, papa, professeur, ou bien ou guide spirituel, eski zot pou side de côté sa kalité dimoune là et prend so défense en inventant bane arguments sans valeurs ? Si ou ena ene sense de l’honneur comme ene dimoune, si zot ena ene sense de dignité en tant ki humain, et si zot ena l’affection pou zot bane parents, eski ou pou vine l’ennemi de sa dimoune ki pé calomnier zot là ou sois ou pou prend part sa kalité dimoune (l’ennemi) là ?

 

Maintenant mette zot mamans et papas ene côté lors ene balance, et mette ou la foi ki ou ena dans Allah (twa) et So prophète (saws) dans l’autre côté balance. Si ou ene Musulman, ou pou tini ferme l’honneur d’Allah et de So prophète (saws) comme beaucoup beaucoup pli important ki l’affection ki ou ena pou ou bane parents. Ou pou considère ou l’amour ki ou ena pou ou parents comme tiguitte comparer avec l’amour ki ou ena pou Allah (swt) et So Prophète (saws).

 

Alors, li ou devoir, mille fois ou devoir ki ou bizin haïr sa kalité Mullah là ki créer fitna (désordre, rébellion) dans le cœur de bane les autres dimounes, et li ou devoir pou reste bien loin de sa bane Mullahs là et montrer ou colère contre zot, mille fois plisse ki ou montrer colère contre ene dimoune ki fine insulter ou.

 

O bane frères et sœurs ! Sa humble serviteur d’Allah ki oulé ou bien-être là (mo) espérer ki bane versets de nous Allah (twa) – ki ena tout pouvoir et ki Li ene sel Bondié –  et sa bane arguments ki mo fine présenter devant zot li assez pou zot pou comprend saki mo pé dire zot et mo espérer ki zot la foi pou force zot pou dire sa bane mêmes paroles là contre sa bane mauvais Mullahs là. Pense bien saki Allah (twa) fine dire dans Quran Shareef :

 

“Coumsa même Nous fine mette dans sak la ville bane grand dimounes méchants ki comploter. Mais zot complots affecter zot propre nâme même, sans ki zot réaliser.” (6: 125)

 

 Sa même bane versets Quran bizin reste vivant et sa même ki Quran Shareef pé causer, kot Allah même pé dire, kot Li fine cause à propos peuple de Hazrat Ibrahim (as) afin ki Li (Allah) enseigne ou ene leçon morale:

 

Allah (swt) dire: “Ena ene joli exemple pou ou dans Ibrahim et bane ki ti avec li, kan zot ti dire à zot people: ‘Nous pas ena nannié pou faire avec ou et avec séki ou pé adorer, à part Allah. Nous désapprouve ou; l’ennemité et la haine, pou toujours, fine paraite entre nous et ou, à moins ki ou gagne la foi dans Allah seul.’ Excepté pou saki Ibrahim ti dire à so papa: ‘Mo pou demande to pardon, quoique mo pas ena aucaine pouvoir lors Allah pou faire kitchose pou toi.’ – ‘O nous Maître, nous mette nous confiance dans Toi. Nous tourne vers Toi et nous destination c’est vers Toi. O nous Maître, pas faire nous ene cible pou bane non-croyants. Pardonne-nous, O nous Maître, car c’est Toi, le Puissant, le Sage.” (60: 5-7)

 

Allah (swt) dire ki So prophète Hazrat Musa (as) et so bane compagnons fine casse zot relations avec zot nation seulement à cause Allah, pour le plaisir d’Allah et zot fine vine l’ennemis de zot nations afin pou montrer commié en colère zot en colère contre sa bane là (ki ti tourne le dos avec Allah et So prophète, et ridiculise bane messages et le Messager d’Allah). Tous sa là fine arriver à cause pour sa bane là (le prophète et so bane compagnons)zot priorité ti bane l’instructions et bane révélations d’Allah. Si Allah (swt) envie aide n’importe lequel de So bane serviteurs ki lors le droit chemin (ki ena Taqwa), alors Li (Allah) donne li le courage pou faire saki bizin faire (prend le bon décision). Mais ici, nous pou cause à propos deux groupes de dimounes, ki donne bane excuses pou pas obéir sa bane commandements là :

 

Premier groupe : Zot, zot pareil couma bane bourriques ki saryé bane livres (pas moi ki dire sa, mais Quran même ki donne sa similitude là). Bane dimounes ignorant et simple d’esprit zot donne deux types d’excuses. Zot premier excuse c’est ki intel et intel li nous Amir ou nous Mullah ou bien li pli grand ki nous ou bien li nous camarade. Allah (swt) fine répéter commié fois dans Quran Shareef ki si ou oulé être sauver de la punition d’Allah (swt), alors faudé pas sa bane dimounes là vine priorité pou ou dans sa zaffaire là, même si li ou propre papa.

 

Zot deuxième excuse c’est ki sa bane dimounes (Mullahs) insolent là zot bane chefs religieux et ene dimoune pas capave considère bane chefs religieux comme bane infidèles ou mauvais dimounes. La réponse à sa c’est (sa verset Quran là, kot Allah dire): “Eski to fine trouve sa dimoune ki prend comme so bondié so passion? Allah laisse li égarer, parski li bien conner, et scelle so zoreilles et so le coeur et mette ene voile lors so lizié. Alors ki sanlà ki pou guide li, après ki Allah fine traite li coumsa? Eski ou pas réfléchi?” (45: 24)

 

Mo arrête mo Khutba ici même. Insha-Allah, ki Allah donne moi le Tawfiq pou contigne lors sa même sujet là. Ameen.

 

Annonce : Alhamdulillah, Summa Alhamdulillah, Insha-Allah, nous pé accueillir aujourd’hui après Jummah encore bane nouveaux membres du Jamaat dans Kerala en Inde. Ki Allah accepter zot Bai’ats et fer zot Mubarak dans le Jamaat Ul Sahih Al Islam ensam avec le Khalifatullah ziska zot dernier souffle lors sa la terre là. Ki le Jamaat Ul Sahih Al Islam gagne bane membres sincères ki dévoué pour la cause d’Allah. C’est la qualité ki nous oulé, pas la quantité. Ki Allah fer bane membres du Jamaat et bane les autres chercheurs de vérités Mubarak et ki Allah place zot ensam dans le Jamaat Ul Sahih Al Islam, là-même kot Li fine place So lumière. Insha-Allah. Ameen.