|
بسم الله الرحمن الرحيم
Khutba Jummah
HADHRAT AMIR’UL MUMINEEN MUHYI-UD-DIN
Munir Ahmad Azim
(22 Jamad’ul Aakhir 1434 Hijri)
(Résumé Khutba)
Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:
مَنۡ یُّطِعِ الرَّسُوۡلَ فَقَدۡ اَطَاعَ اللّٰہَ ۚ وَ مَنۡ تَوَلّٰی فَمَاۤ اَرۡسَلۡنٰکَ عَلَیۡہِمۡ حَفِیۡظًا ؕ Mayy-yuti-’ir Rasuula fa-qad ‘ataa-’allaah: wa man-tawallaa famaaa ‘arsal-naaka ‘alay-him hafiizaa.
Celui ki obéir le Messager fine obéir Allah, mais bane ki tourne lédos, Nous pas fine envoye toi pou veille zot zaffaire. (An-Nisa 4: 81)
Ki faire li obligatoire pou bane dimounes pou obéir bane prophètes d’Allah, et ki faire li nécéssaire ki bane dimounes zot reconnaite sa bane prophètes ou messagers d’Allah là et attesté de zot véracité ? Sa c’est parski bane créatures pas ena la capacité pou comprend complètement sagesse de sa bane prophètes là. En vérité dimounes pas capave trouve Allah dans So toute puissance, So statut exalté et So visage de lumière avec zot lizié physique, zot lizié temporaire. Saki dimounes pas capave trouver ou toucher, zot pas capave saizir ou comprend complètement, N’importe kan Allah envoye ene message, Li pas dessane personnellement lors la terre pou fer sa travail là. Au lieu de sa, Li choisir bane z’hommes de parmi So bane serviteurs lors la terre même comme Messagers pou donne zot So message, et kan le Messager li vini, alors li nécessaire ki bane dimounes zot écoute saki zot ena pou dire et agir lors bane messages divine et alors, pour sa, l’obéissance envers bane messagers d’Allah li capitale. Allah conné ki si Li pas envoye ene Professeur pou montrer ene nation, ou après l’avènement de Hazrat Muhammad (saws), à toute l’humanité, alors bane dimounes pas pou capave gagne accès à vrai connaissance. Zot manque de capacité pou comprend l’Essence Divine li bien apparent. Alors pas ena aucaine lézot choix excepté ki Allah choisir bane prophètes ou messagers ki vini pou agir comme bane liens entre bane dimounes et Allah. Sa Homme choisi d’Allah là, d’après bane droits divine ki li recevoir, li passe le message d’Allah à bane dimounes, li dire zot saki zot bizin faire et saki zot pas bizin faire. So devoir c’est donne le message clairement. Li pas ena le pouvoir pou change lékaire dimoune. Li bizin aussi garde bane dimounes ferme lors certaines zaffaires ki pou bénéfique pou zot-même (c’est-à-dire, sa bane dimounes là), et ki zot reste loin avec tout saki pou capave représente ene danger pou zot, parski bane dimounes pas capave décide par zot propre intéllecte saki bon pou zot et saki pou cause zot ditort. Allah dire dans le Quran Shareef:
“Et Nous pas fine envoye kit Messager excepté ki dimounes bizin obéir li par permission d’Allah. ” (An-Nisa 4: 65)
Si Allah pas ti fer l’obéissance et reconnaite bane prophètes obligatoire lors bane dimounes, alors li ti pou dans vide pou envoye prophètes à bane dimounes. Saki Allah fer, ena ene but derrière sa, ene tel plan ki Allah même dans So connaissance complète conné couma bane situations pou dérouler. Tandis ki Allah possède tous bane connaissances, l’homme li, so l’intéllecte, so l’intélligence pas permette li pou comprend complètement bane plans d’Allah, bane façon faire d’Allah, excepté bane serviteurs d’Allah ki Allah dévoile bane tels plans. Pareil couma dans le cas du prophète d’Allah, Hazrat Yusuf (as). Li capave ene choque pou tendé ou lire dans Quran ki ene Messager d’Allah fine cause « menti ». En apparence, li paraite ene mensonge, mais dans lizié d’Allah, sa c’est ene tel plan ki Allah fine plannifié pour So prophète afin ki so la victoire vine claire et ki bane ki ti pé souhaite le mal pour li, c’est-à-dire so bane demi-frères capave reconnaite zot péchés et repentir. Hazrat Yusuf (as) ti bien conné ki so propre frère (de même mama et papa) pas fine vole gros coupe léroi, mais li pas ti capave retenir so frère avec li sans ki li dévoile so vrai identité devant so bane demi-frères. Et alors, à travers bane révélations divines, Allah fine guide li, de par bane la loi du pays même, en l’occurrence l’Égypte de sa l’époque là, couma li pou capave garde so frère avec li, et alors Allah fine guide li couma pou plannifié sa fausse accusation de vole, et alors kan le plan fine exécuté, alors Allah fine fer So part d’après So plan et alors par sa Hazrat Yusuf (as) et plus tard so papa, Hazrat Yaqub (as) fine trouve réalization de la promesse d’Allah kan Li fine honore tous les deux pas seulement comme prophètes mais aussi comme bane dimounes honorables dans la cour de léroi (Pharaon) d’Égypte. Et sa fine servi comme ene leçon pour bane frères de Hazrat Yusuf (as) ki fine ensuite confesse zot crime et fine repentir, et en dernier lieu fine soumette à bane façon d’agir d’Allah, à bane volonté d’Allah.
Pas tous dimounes capave comprend bane plans d’Allah. La majorité capave prend sa comme bane mauvais actions, bien détestable, et zot capave même dire : « Ah, li dire ki li ene dimoune pieux, (ou) ene prophète et li fine fer ene tel action, (ou bien) li fine cause menti. » Par example, avant ki li vine prophète, Hazrat Moosa (as) ti touye ene dimoune et quante même sa Allah fine choisir li comme prophète, et sa depuis ki li ti prend naissance même ! Seulement bane Ulul-al-Baab (bane dimoune doué d’intelligence, ene vrai intelligence spirituel) capave comprend sa parski zot conné ki saki Allah décidé bizin réalisé. Le prophète d’Allah li en aucun cas ene pécheur. Li capave fer bane erreurs ou bane fautes couma n’importe ki humain, mais bane péchés ki bien détestable dans lizié d’Allah, sa zamais li capave fer sa. Allah préserve So bane Messagers et Prophètes de bane tels destin, parski c’est Allah ki guide zot lors le droit chemin.
Si nous guette Hazrat Adam (as), Allah pas fine trouve dans li aucaine résolution pou dézobéir Li (Allah) kan Shaytane fine rode dévier li, et Allah Li-même fine enseigne li duah nécessaire pou ki li capave recevoir le pardon. Alors, Hazrat Adam (as) pas seulement représente la faiblesse de l’homme ki li même li ti été, mais li représente sa être, sa l’âme ki connecté avec so Rab, so Allah kot li dépasse bane besoins de so lécorps pou ki li arrive à atteindre Allah afin ki Allah guide li et préserve li afin ki li pas vine parmi bane ki fanne disang lors la terre. Si nous prend l’exemple de Hazrat Ibrahim (as), d’après bane Hadiths, li fine dire bane mensonges dans bane situations kot ena danger, par example, kan li et so madame, Hazrat Sarah (ra) zot la vie ti en danger. Sa en aucaine façon annule so statut de prophète ou so rang bien proche avec Allah, parski pendant sa même situation là, kan le roi fine ena mauvais l’intention lors so madame, kot Hazrat Ibrahim (as) fine bizin passe so madame comme so sœur, alors n’importe kan sa madame là ti pé prié Allah pou sappe so l’honneur et ki sa mauvais dimoune là pas réussi touche li, alors Allah fine réponne à so la prière, et Allah fine sauve l’honneur de Hazrat Ibrahim (as) et de so madame. Le roi là fine tellement gagne peur et aussi impressionné ki li fine donne Hazrat Hajra (ra) à Hazrat Sarah (ra), et nous conné couma le plan d’Allah fine enclenché kot c’est sa même Hazrat Hajra ki fine vine la deuxième épouse de Hazrat Ibrahim (as), et c’est à travers zot zenfant Hazrat Ismail (as) ki nous fine gagne nous bien-aimé prophète ki ene bénédictions pour sa l’univers là, Hazrat Muhammad (saws). Alors nous trouver ki derrière sak acte de bane prophètes d’Allah, ena la main d’Allah ki dirige zot vers la sécurité.
Nous même trouve compassion dans Allah pour So bane prophètes choisi n’importe kan kikaine parmi zot fine arriver dézobéir ou pas fine mette So bane commandements en exécution. Ene exemple bien clair de sa c’est commandement ki Allah ti donne Hazrat Yunus (as). Au lieu li agir d’après commandement ki Allah ti donne li, li fine alle penser ki si li alle ene l’autre place, alors sa bane dimounes là pou accueillir pli bien le message d’Allah. L’intention ici, nous trouver ki so but ti pou gagne maximum dimoune pou accepter le message d’Allah, et sa c’est ene l’intention bien noble, mais dans le cas de Hazrat Yunus (as), kan So Chef, So Patron, c’est-à-dire, Allah fine donne li ene l’ordre, li fine mette sa de côté et li fine mette de l’avant so propre jugement. Mais Allah en aucaine cas pas fine abandonne So prophète. Oui Li fer li passe par beaucoup de bane épreuves afin pou fer li réalise so erreur, parski li après tout ene dimoune de chair et de sang, mais alors so l’essence prophétique prend le dessus pou fer li repentir tellement ki Allah Li-même béni li encore plisse et délivré li de so bane problèmes et donne li la victoire, kot li fer sa bane peuple ki Li (Allah) ti choisir là accepter li en grand nombre.
Et dans cas de Hazrat Muhammad (saws), le plus noble parmi tous bane prophètes d’Allah, kan li ti nek fonce so sourci avec ene vrai croyant ki ti aveugle, alors Allah fine réprimande li, parski le prophète (saws) ti pé agir lors so propre jugement, mais dès ki la volonté divine fine prend le dessus lors li à travers la révélation divine, alors li fine capave distingue clairement ki sanlà ki ti vrai croyant et chercheur de vérité et de la miséricorde d’Allah et ki sanlà ki pas ti sincère. Mais malgré tous sa bane l’exemples là, eski sa veut dire ki faudé pas obéir bane prophètes d’Allah ?
Allah montrer clairement dans Quran Shareef : « Obéir Allah et Obéir le Messager ». Allah montrer clairement ki le vrai chemin ki amène vers le salut li repose lors l’obéissance au Prophète d’Allah, parski Allah envoye So bane commandements, instructions et volonté à travers li. Sa prophète ou messager d’Allah là li vine comme ene lien ki lié l’homme avec Allah. Étant li-même ene dimoune de chair et de sang, li connecter avec bane dimounes, fer zot comprend la nature d’Allah, tandis ki en même li différent de bane lézot dimounes. Comment sa ? C’est parski so l’âme fine créé d’ene qualité supérieur, pli raffiné. Sa qualité là c’est la lumière divine ki briyé dans li, et ki la lumière là reflecté de li, et alors sa donne ene nouvo identité à l’homme comme étant le Khalifa, représentant d’Allah lors la terre. C’est vrai ki sak dimoune à ene certain degré li ene représentant d’Allah lors la terre, parski sakaine ena le devoir pou répanne le message de l’existence et de bane attributs d’Allah autour de li, ki li dans so cercle familiale, dans travail, parmi so bane camarades, etc. Mais le besoin d’ene prophète d’Allah, d’ene messager d’Allah li ressenti kan l’homme retire li du cadre de la spiritualité et kan li fine perdi tous bane sense de directions concernant so propre intégrité religieux et so spiritualité. Kan li fine perdi tous saki fer li ene humain, parski humain dans sa cas là veut dire, kot li dépanne li lors ene force, ene Etre supérieur ki guide li pou perfectionne li-même. Kan l’homme arrête dépanne lors sa pouvoir supérieur là et penser ki li parfait et supérieur, alors so l’humanité disparaite. Pharaon et so bane chefs dans l’époque de Hazrat Moosa (as) ti ene l’exemple de sa, et fine ena avant sa, dans l’époque de Hazrat Ibrahim (as), Nemrod ti ene exemple de sa. Zot bane dimounes fine prend zot comme dieu, et alors zot fine retire de sa bane là zot vêtement d’humanité.
En vérité Allah content ki demande Li pardon. Sa bane Hadiths ki mo pou mentionner là li fer nous comprend plus clairement sa fait là.
Hazrat Abu Huraira (ra) fine rapporté ki parmi bane zaffaire ki le Prophète d’Allah (saws) fine dire ki Allah (swt) fine dire, ena sa bane paroles là : “Ene serviteur (d’Allah) fine commette ene péché et fine dire : ‘O Allah, pardonne moi mo péché.’ Et Li (swt) fine dire : ‘Mo serviteur fine commette ene péché et li fine conné ki li ena ene Maître ki pardonne bane péchés et ki donne punition pour bane péchés aussi.’ Après li (sa dimoune là) fine ré-commette ene péché encore et fine dire : ‘O Allah, pardonne-moi mo péché.’ Et Li (Allah (swt)) fine dire : ‘Mo serviteur fine commette ene péché et fine conné ki li ena ene Maître ki pardonne bane péchés et ki donne punition pou zot (c’est-à-dire, bane péchés) aussi. Après li (sa dimoune là) fine ré-commette ene péché encore et fine dire : ‘O Allah, pardonne-moi mo péché.’ Et Li (Allah (swt)) fine dire : ‘Mo serviteur fine commette ene péché et fine conné ki li ena ene Maître ki pardonne bane péchés et ki donne punition pou zot (c’est-à-dire, bane péchés) aussi. Fer séki to désiré, parski Mo fine pardonne toi.’’” (Muslim & Bukhari)
Abu Huraira (ra) rapporté ki le Messager d’Allah (saws) fine dire : “Par Celui dans Qui Mo l’âme trouve dans So la main, si zot pas ti commette bane péchés, Allah ti pou remplace zot par ene lotte peuple ki ti pou commette péchés et ensuite cherche le pardon d’Allah, et Allah ti pou pardonne zot.” (Muslim).
Allah fine créer l’homme faible afin ki bane dimounes capave réaliser ki ena ene force supérieur, ene Créateur ki là pou zot, pou pardonne zot pour zot bane faiblesses, erreurs, fautes et péchés. Si l’homme pas ti faible et pécheur, alors Allah pas ti pou créer l’homme. Allah ti envie ki l’homme adore Li et Li content kan So bane serviteurs faire appel à Li, suppliyé Li et demande Li pou pardonne zot. Li content spécialement ki So bane serviteurs choisi, So bane prophètes suppliyé Li, parski après sa, bane récompenses ki Li, Allah répanne lors zot, pli doux ki n’importe ki lézot récompense ki zot capave recevoir lors sa la terre là.
Alors, mette en pratique la volonté divine li à travers l’obéissance au prophète kan li donne bane messages d’Allah, parski n’importe kan li causer par la volonté divine, alors c’est pas l’homme de chair et de sang ki pé causer, mais c’est en vérité Allah ki pé donne So bane instructions. Ene tel similitude kot Allah manifesté Li lors So prophète li bien claire dans le Quran Shareef. Allah vine so lipié, la main et la langue par quoi li donne le message et li combatte avec bane infidèles, bane ki téti dans zot nature rébél et ki toujours prêt pou fer di tort à la religion d’Allah et bane croyants. Alors, guidance ki Allah confié à So Messager li garanti pou li la sécurité contre toutes sortes afflictions, difficulté ou danger, et li (le Messager d’Allah) bizin protège li-même afin ki li vine sain et sauf de kit faute, et sa solution là li trouve dans suive à la lettre bane instructions d’Allah arrive séki arrive, même si dimounes pas comprend li ou pas content message ki li pé donné, parski en vérité li seulement là pou passe le message. Dimoune content na pas content, mais li bizin fer so travail et gagne le plaisir et la satisfaction d’Allah. Alors, erreurs pas erreurs, fautes pas fautes, bane prophètes et messagers d’Allah zot sous la surveillance et protection d’Allah. C’est Allah ki veille lors zot. Zot d’ene nature, d’ene l’âme pli raffiné et alors Allah pou délivré zot de toutes sortes kalités difficultés ou bane tourments ki zot pé souffert par bane jugements ki zot faire, et Allah fer zot vine victorieux kan Allah fer zot réalise zot bane fautes, kot Allah fer zot nature prophétique prend le dessus lors faiblesses de zot lécorps temporaire.
Maintenant mo pou cause lors bane évènements ki pé fer l’actualité dans nous ti l’île. Prophecie ti faire le 30 Décembre 2012 et ti mentionne le viol ki pour ena à Maurice et dans le monde entier. Le nombre de cas de viol en hausse, dans plusieurs pays du monde, dans l’Amérique, le soi-disant superpuissance et incroyable le nombre de viol à Maurice début l’année 2013 Janvier à Avril. Le viol c’est ene l’autre crime sexuelle ki commette avec violence. Dans bane pays industrializé dans l’Europe le nombre de viol bien élevé. Sa bane pays ki soi-disant bien civilizé et ki pé lutter pour libère la femme, là-bas même ena pli beaucoup d’immoralité. Incroyable séki pé arrivé dans Maurice. Si azordi nous trouve beaucoup cas de viol à Maurice, séki ena trop beaucoup cas d’indécence. Bane photo indécent ki collé ou affiche cinéma ki collé partou et tous sa là incite vers le mal et bane publicité ki passé lors télévision à Maurice pas seulement bane filme porno ki gagné dans bane vidéo-club, mais aussi filme porno tourné par bane dimounes même et ki zot fer passé par portable. Azordi jour avec sa bane la mode linge ki bane filles et madame pé habillé, bane défilé de mode ki ena, c’est pas défilé de mode sa, mais pluto c’est défilé de l’indécence. Tout défilé de mode c’est pure et simple ene exploitation de bane femmes, pé dézonore la femme, pé enlève la femme zot dignité.
Au cours de l’année 2013 fine ena plusieurs viol avec violence, mais le temps pas permette pou nomme sa qualité viol ki fine ena dans sa ti l’île Mauricie là. Mo pour cite seulement quelques.
1. Samedi le 20 Avril 2013 : Ene femme de 70 ans fine être violé par so neveu Terry Quint ki âgé de 18 ans. Li et so camarade ensam fine prend la victime dans l’auto fine amène li dans buisson à colonel Dean, Rivière Noire. So camarade fine passe à l’action en premier et après neveu là fine abuse so tantine.
2. Dimanche le 21 Avril 2013 : Ene madame de 69 ans, habitant Rose-Hill fine agréssé sexuellement et violé par le locataire de so frère le soir et le suspé li ene dénommé Samuel Guy Perrine âgé de 37 ans.
3. Lundi le 22 Avril 2013 : Ene nommé Sooriadeo Cheentamun, âgé de 25 ans fine viole ene veille maman âgé de 80 ans à Camp Fouquereaux sauvagement et ensuite fine touye li.
A cause faute de temps, mo pou bizin arrête là même, mais Insha-Allah mo pou vine encore lors bane fraudes et corruptions ki pé fer ravage à Maurice. Étonnant, c’est pas bane ti dimounes ki pé fer fraudes, c’est bane grand grand la tête, tel couma avocat, avoué, inspecteur la police et d’autres policiers et prêtres religieux, politiciens et 5 dimounes dans l’ICAC etc.
Aussi bizin mentionne commié crime fine arriver à Maurice, suicide, coût de la vie ki pé monté même et l’essence, diesel, prix pé monté couma fizét.
Et azordi li bien malheureux pou nous tanne la nouvelle triste d’ene grand accident Bus ici à Maurice (CNT, Blueline) ce matin 02 Mai 2013, kot tous bane passagers fine blésser et parmi 10-11 fine morts.
Maurice so situation bien bien critique, et sa c’est ene grâce ki bane Mauriciens fine gagner, ki ena ene Messager d’Allah parmi zot même et fine donne zot plusieurs avertissements et prophécie ki fine faire le 30 Decembre 2013, dans l’espace de 4 mois beaucoup de bane choses fine réaliser le plus vite possible, à cause zot fine tourne le dos avec le message divine et Allah (swt) pas tardé pour faire le peuple mauricien subir sa bane consékances là. Nous ena encore 8 mois pour aller avant ki l’année 2013 terminer, et moi comme ene serviteur d’Allah, mo continuer donne le message ki vine de côté d’Allah par le Ruh-il Qouddouss, ki à Maurice, bane l’îles avoisinants et dans tous pays du monde entier. Mo mission et message continuer, soi ou obéir le message et repentir ou sois ou tourne le dos kot situation pou bien bien grave. Ki Allah (swt) ouvert zot tous zot le cœur pour comprend le message, Insha-Allah.
Et avant mo terminé, mo tenir à donne zot la bonne nouvelle d’ene de nous frère en Inde, ki Allah pé fer li alle de progrès en progrès – et li ena l’obéissance d’Allah et du prophète – ki li de côté spirituel et mondaine aussi. Tous dernièrement, li fine informe moi ki depuis longtemps li ti pense pou vine ene parmi bane officiers ki pou ensuite vine bane ambassadeurs de l’Inde, depuis la Manifestation Divine fine prend ene place bien important dans so la vie, Allah fine fer li arrive dans ene telle grade, ki maintenant li fine être choisi pou lecture bane tels officiers ki demain zot pou vine bane futures ambassadeurs de l’Inde. Mo souhaite li encore plisse de succès. Ki Allah fer li Mubarak dans so la vie de tous les jours, parski li consacré li sans hésitation pou Allah, pour le travail de Deen-é-Islam. Insha-Allah, ki li reste briller couma ene vrai z’étoile, ene vrai disciple du Khalifatullah de sa siècle là, Insha-Allah.
Ki Allah guide tous bane membres du Jamaat Ul Sahih Al Islam pou reste toujours ferme et vrai dans le Jamaat d’Allah et ki zot récolter zot fruits, ki li lors la terre et encore plisse ki sa dans Aakhérat, Insha-Allah. |
