Text Box: بسم الله الرحمن الرحيم Khutba Jummah HAZRAT AMIR’UL MUMINEEN MUHYI-UD-DIN Munir Ahmad Azim 04 Janvier 2013 ~ (21 Safar 1434 Hijri) (Résumé Khutba) Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire: رَبَّنَا ظَلَمۡنَاۤ اَنۡفُسَنَا ٜ وَ اِنۡ لَّمۡ تَغۡفِرۡ لَنَا وَ تَرۡحَمۡنَا لَنَکُوۡنَنَّ مِنَ الۡخٰسِرِیۡنَ ﴿﴾ « Rabbana zalamna anfussana wa illam taghfirlana watarhamna lanakounanna minal khaasiireen. » « O nous Maitre, nous (accepter) nous fine faire du tort à nous-mêmes. Si To pas pardonne nous et donne nous To grâce, surement nous pour alle dans la perte. » (7 : 24) Mo pé continuer sa Khutba Jummah ki mo ti fine faire la semaine passé couma nous bizin pas laisse Satan gagne le moindre espace, et nous bizin faire répentence avec tout nous bane péchés et nous vine sous refuge d’Allah. Nous bizin faire beaucoup Tauba et faire beaucoup Istigfaar et bizin lire sa duah là beaucoup : « Rabbana zalamna anfussana wa illam taghfirlana watarhamna lanakounanna minal khaasiireen. » Sa c’est ene point bien important et sa fine commencer avec Hazrat Adam (as). Tous bane dimounes ki commette bane péchés, ki plonger dans le mal, li très nécéssaire ki li lire sa duah là beaucoup. Parski kan fine dire faire répentence avec toute sortes des péchés et vine sous refuge d’Allah, bé sans sa duah là, li pas possible. Et sa la lutte contre le Satan ki fine commencer là, so remède c’est sa même sa duahs là. Sa c’est ene duah ki au début même de sa la lutte là, Allah Li-même fine enseigne Hazrat Adam (as). Donc, non seulement pé indique le chemin, mais pé aussi montré nous bane moyens couma pour alle lors sa chemin là. C’est sa ki montré ou kan ene serviteur d’Allah vini et Allah même ki envoye li et Allah même guide li pas par pas. Magine bien, ki si sak dimoune faire zéffort dans l’obéissance d’Allah et si ou faire zéffort dans supporte la Religion d’Allah, bé à ce moment là Allah pour éloigne tous bane obstacles. Et ou pour réussi, Insha-Allah. Sa la guerre entre humain et Satan là fine commencer de l’époque de Hazrat Adam (as), et effectivement li coumsa. Et c’est avec sa duah là ki Hazrat Adam (as) fine sorti victorieux. Donc aujourd’hui aussi à l’heure de la lutte avec le Satan, sak dimoune pour bizin vine sous refuge de sa verset là. Et tant ki ene dimoune pas lire sa verset là avec profondeur du cœur, bé li pas pour gagne aide d’Allah pour ki finalement li capave vaincre le Satan. Magine bien, ki pé faire nous comprend ki si ou faire zéffort dans l’obéissance d’Allah et si ou faire zéffort pour la Religion, bé Allah pour éloigne tous bane obstacles. Maintenant pour ou vine ene aide et ene support dans la Religion d’Allah, bé c’est pas ene zaffaire ki ou bizin ena ene purification totale, pour ou vine coumsa. Au contraire, sa c’est ene moyen ki aide ou pour atteindre la purification totale. Donc, n’importe ki dimoune ki aujourd’hui dans so le cœur li ena ene enthousiasme pour aide et supporte la Religion d’Allah et malgré so l’état de situation, malgré ki li ena beaucoup de faiblesses et li plonger dans quelques mal, si vraiment li ena sa l’amour là et si sincèrement li pas tire aucaine prétexte, faudré pas li dire ki, ‘Moi, ene dimoune faible couma moi, kot mo pou capave aide la Religion d’Allah’. Si li faire coumsa, bé zamais Allah pas pour aide li. Si n’importe couma li été et couma li capave présente li, li pour servir la Religion d’Allah, si nek li dire : « O mo Maitre, tout séki mo ena, mo fine confié li à toi, et maintenant c’est Toi ki pour occupe mo bane zaffaires. O mo Maître, moi mo fine faire séki mo capave faire pour service To la Religion. » Bé certainement Allah pour aide sa qualité dimoune là. Li dire ki si ou faire des zéfforts dans l’obéissance d’Allah et si faire zéffort pour supporte la Religion d’Allah, bé Allah pour éloigne tous obstacles. Bane obstacles ki ena dans le chemin et ki ou même fine créé, et ki empêche ou approche Allah, tous sa obstacles là pour enlever par Allah. Et lerlà ou pou réussi. Ki faire li coumsa ? Parski en fait, à ce moment là ou fine vine ene plantation d’Allah. N’importe kan ou faire sa l’intention là ki ou pour servi ou au service de la Religion d’Allah, bé lerlà ou pou vine digne pour vine des plantes pures. Et kan à bane piquant ki ena tout autour ou, zot pé gâte ou, zot pé influence ou la santé, zot vine bane obstacles dans le chemin de ou succès. Bane succès ki aux yeux d’Allah ou bizin gagné, ou mérite gagné, sa bane piquants là vine ene obstacles et li empêche ou gagne sa bane succès là. Mais kan ou vine ene support dans la Religion d’Allah, bé à ce moment là, Allah faire même traitement are ou pareil couma Li faire avec bane bon dimounes. Li éloigne ou bane obstacles. Eski ou pas fine trouver ki pour gagne bane bon plantes, ene planteur li cultive so la terre et li déracinne tous bane mauvais kitchose de sa la terre là li jetter. Maintenant ki ou fine vine ene tel plante ki Allah même pou protéger, et pour ou la cause, Li pou retire bane mauvais plantes et jette en dehors. C’est-à-dire, ki bane mauvais plantes ki ti ena dans ou l’intérieur, bane zaffaires ki ti pé mange et boire disang de ou Néki, maintenant li vine le devoir du Maître pour ki Li choisir sa bane l’herbe sec là et jette zot en dehors. Pareil couma ene planteur en dehors et li faire so jardin vine ene très joli jardin ki pousser et fleuri. Donc, kan Allah faire sa avec ene dimoune, bé li couma dire ene très joli plante ki émerger. Ene plante de Néki. Ene plante ki rapporte de fruits. Et Li protège zot et sape zot de toute sorte de problèmes et ditorts. Maintenant ou capave constater ki sa zaffaire là ti commencer avec ene tipti zaffaire et guette kot sa fine arriver. Et fine faire sa voyage là vine facile. Sa voyage là péna aucaine difficultés dans ene tel voyage. Tout séki ou ena et couma ou été, ou ena pour présente ou. Mais présente li avec l’amour, avec affection, avec humilité et faire sa qualité duah là : « O Allah, nous péna plisse ki sa pour présenter mais certainement nous ena l’amour pour To la Religion. Et sa l’amour ki nous ena pour To Deen là, oblige nous ki nous présente tout séki nous ena », et kan ou pour faire coumsa, ou guetter ki traitement Allah pour faire avec ou. Mais bane pié ki pas rapporte bane fruits, bane piés ki alle sec, bé zot Maître pas prend zot aucaine compte. Maintenant, sa zaffaire pas rapporte bane fruits là et alle sec là, kan pourtant nous conner ki c’est Allah même ki faire gagne fruits, en fait, sa zaffaire là (c’est-à-dire, pas rapporte de fruits et alle sec là) li inclure zot l’intentions. C’est bane dimounes ki pas présente devant Allah pour zot réforme. Zot continuer reste dans l’état ki zot été. Et zot pas présente zot service pour la Religion. Sa c’est bane plantes ki aux yeux d’Allah fine fini décider, fine faire l’intention d’être sec et pas rapporte bane fruits. Couma dire zot fine décider ki ‘Nous, nous pas pou vine couma bane piés ki pousser et fleuri. Nous, nous pou reste coumsa même.’ A ce moment là, zot népli reste ene plante du Maître, zot vine plito ene plante étranger. Zot vine bane tel plante ki digne d’être déraciner et jette en dehors. Bane ki pas rapporter et ki vine sec, bé zot Maître pas prend zot aucaine compte. Sinon, si ene plante, ene dimoune malgré ki li ena certaine bane mauvaise qualités, mais si li prend le Maître compte, bé certainement le Maître aussi pou prend li compte. Mais si ene dimoune ena sa bane mauvais là dans li, et là aussi li pas prend Allah aucaine compte, bé Allah aussi pas prend li compte. Pareil couma le Maître pas prend compte ene tel plante, kante-même bane zanimo vine mange zot, pas faire nannié, kante-même bane bucherons fine coupe zot pour bruler, pas faire nannié. Alors ou aussi magine sa bien, ki si aux yeux d’Allah ou pou ene véridique, bé personne so l’opposition pas pou capave cause ou la peine. Maintenant pour être ene véridique aux yeux d’Allah, bane conditions ki Mo ti mentionner au début là, li nécéssaire. Bizin ki aux yeux d’Allah ou l’objectif vrai, dans profondeur ou le cœur bizin ena la vérité. Kan sa pour coumsa, bé personne so l’opposition pas pou cause ou la peine. Mais si ou pas redresse ou situation et si ou pas faire ene vrai promesse d’obéissance avec Allah, bé Allah pas prend personne compte. Ena des milliers de moutons et de cabris ki tuer tous les jours. Et personne péna aucaine sympathie pour zot. Mais si ene dimoune mort guette ki kalité la peine li causer, mais malheureusement aujourd’hui nous pé traverse bien loin en séki concerne tuer bane moutons et cabris. Dans l’époque aujourd’hui c’est bane dimounes ki pé mort couma bane moutons et cabris et personne pas pé prend compte. Li nécéssaire faire ou comprend sa parski fine confier nous la responsabilité de Dawa et pour réforme le monde en entier. Et kan nous guette situation le monde aujourd’hui, nous trouver ki la situation li beaucoup pli dangereux ki à l’époque de Hazrat Massih Maoud (as). Maintenant la situation li tel ki, kan parfois faire ene mouton ou cabri Zaba, bane dimounes chagrin. Zot dire ‘Guette couma ti ene joli mouton, ki faire ti bizin tuer li ?’ Mais par contre kan bane dimounes pé mort, personne pas concerné are sa. Ki pays Musulman pé concerné séki pé passé dans la Syrie, l’Iran, Palestine et l’Iraq ? Personne ! Dans le monde entier ena des millions de dimounes ki pé mort assassiner pour nannié. Sans aucaine raison pé touye zot et là aussi bane dimounes pas concerner. Alors couma Allah pour prend compte bane dimounes ki pas prend bane Banda Allah compte ? Donc, ou bizin comprend le sujet de prend compte de tout sa bane Banda Allah ki éparpiyé à travers le monde. Si ou pé vivre dans ou confort et ou pas pé prend compte ou bane frères et sœurs et enfants ki pé soufferts de l’injustice et ou pas pé concerné avec sa bane kalités l’injustice et souffrance ki zot pé traversé là, ou pé guette seulement ou confort, bé à ce moment là, sa bane bon nouvelles ki fine mentionner là, bé li pas pour ou sa. C’est pas ou ki pour gagne sa. Et li nécessaire ki nous comprend sa bien, parski à part nous péna personne ki pour change sa destin de sa le monde là. Et si nous, nous pas comprend sa, bé ki sanlà ki pour comprend sa ? Donc, comprend l’urgence de la situation ki mo pé mette devant ou concernant le Dawa ; pas néglige le travail de Dawa, pas discuté seulement mais faire action aussi. Et présente ou au service d’Allah. Et dire Allah ki « La situation li endehors nous limite, li endehors nous contrôle. Premièrement, nous bien faible, nous pas digne pour faire la réforme du monde. En ce ki concerne To bane prophètes et To bane bon serviteurs d’avant, c’est To même ki ti mette bane tel bon qualités dans zot de sorte ki zot conscient de la situation du monde et To ti donne zot aussi la capacité de réforme le monde et To ti éloigne zot bane faiblesses. Mais nous, nous situation li tel ki nous péna même la capacité pour éloigne nous propre faiblesses. Tout le temps nous penser et tout le temps nous faire zéfforts mais nous retrouve nous dans même situation. Ni nous le cœur changer. Ni nous l’environnement changer. Ni nous traitement avec nous bane familles pé changer, ni nous traitement avec bane reyr (anti-Islam) aussi pé changer. Dans ki kalités problèmes nous-mêmes nous été. Et lors là, sa situation de bane dimounes ki nous bizin faire zot réforme, pé continuer empirer aller même. Mais c’est avec To l’aide tousel, O Allah ki kitchose impossible capave vine possible. C’est Toi ki capave donne nous courage et patience nécessaire pou fer zéfforts dans To chemin et pou gagne la victoire. » Li nécessaire ki nous créer sa sentiment là. Malgré ki nous ena sa qualité faiblesses là et nous senti nous péna sa capacité de réforme le monde là et faire le travail de Dawa. Alors nous faire duah avec Celui ki fine donne nous sa responsabilité là, et nous pas rejette sa faveurs ki Allah fine faire lors nous, et attention nous alle perdi sa bane faveurs là, et ene l’autre alle gagne sa faveurs là. Alors ki Allah aide sakaine parmi nous réussi dans sa responsabilité ki fine donne nous là. Insha-Allah. Et Insha-Allah, mo pou continuer le 3ème partie de sa Khutba là. Ameen.