Text Box: بسم الله الرحمن الرحيم Khutba Jummah HADHRAT AMIR’UL MUMINEEN MUHYI-UD-DIN Munir Ahmad Azim 05 Avril 2013 ~ (23 Jamad’ul Awwal 1434 Hijri) (Résumé Khutba) Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire: Maurice fine depuis la semaine dernière (Samedi 30 Mars 2013) vive ziska azordi bane plus pire de jours en forme d’ene type de déluge unique ki fine vini et dévire en bas là-haut la vie de beaucoup de bane habitants, spécialement dans Port-Louis, la Capitale de Maurice. Bane expert météo fine définir sa la pluie ki fine tomber sans arrêt là comme ene « déluge » parski sa de l’eau la pluie ki fine tomber là fine continuer monté, de seconde en seconde, et li pas fine diminuer en aucaine cas. De l’eau fine monté même. Bane la cazes, bâtiments, chemin, underground Caudan fine inondé avec de l’eau ki fine vini avec force et fine entraine dans so passage la vie de 11 dimounes, et ene de sa bane dimounes là ti ene maman ki fine gagne ene arrêt cardiaque kan li fine trouve sa monté subite de dilo là dans so la caze. Bane Mauriciens zamais fine trouve ene tel déluge dans ene l’interval de 2 heures temps sans arrêt, 2 heures temps d’ene la pluie de destruction ki fine accumuler et pour au moin 3 heures temps, sa monté de l’eau intensif là fine inonde la vie de bane habitants de Port-Louis, Pailles, Camp Chapelon, et aussi (un peu moinsse dans) bane l’endroit dans Plateau Centrale et le Sud. Dans Quran Allah dire : « Sa c’est livre ki Nous fine faire dessane. Li sacré et li confirme séki ti vini avant. Servi li pou donne avertissement sa plus grand la ville là et so alentours... » (Al-Anam 6 : 94) En vérité, sa pli grand la ville là dans l’époque de nous Aka Hazrat Muhammad (saws) ti Makkah Sharif et so alentours, mais aussi dans l’époque de sa humble serviteur ki présent devant zot azordi, sa pli grand la ville là, dans contexte de Maurice li réfère à Port-Louis et so alentours ; Port-Louis ki sa même capital, le cœur de Maurice. Le cœur même de Maurice – Port-Louis – et so alentours fine toucher par sa calamité là. Astère penser en coup, ki sa même calamité là ti arriver pendant la semaine kan ena l’école. Ki bane dimounes ti pou fer, couma sa bane zenfants là ti pou être sauver de sa déluge là, ki fine emprizonne plusieurs dimounes, kot bizin fer la chaine humain pou retire zot de bane situations difficile, kot fine même bizin pirogue pou tire zot, tellement niveau de l’eau ti haute, et kot même de l’eau ti arrive hauteur plafond bane la caze. Alors pense gravité de la situation ki arriver sa déluge là ti arriver ene jour la semaine kan bane commerces, bureau, l’école primaire, secondaire et l’université ouvert, ki tout sa bane dimounes là ti pou fer ; commié encore l’auto ti pou fer accidents et vine zis bon pou alle jette dans tas féraille ? Penser, mo bane frères, sœurs et zenfants, parski Allah fine en vérité donne ene ti aperçu de so colère. Penser commié la vie encore ti pou aller! Le Gouvernement de Maurice, en mémoire de sa tragédie là fine fer le 1er Avril ene jour de deuil, ene congé publique. Drapeau Maurice ti en berne. Plusieurs de bane tipti et grand business et bureau fine bizin nettoyé, à cause zot fine bien toucher par sa bane inondations là. Bane Mauriciens fine garde toutefois ene l’esprit de solidarité et plusieurs dimounes de différent parti du pays fine vine vers bane ki fine perdi tout dans sa déluge là pou aide zot pou nettoye zot la caze, et fer en sorte ki zot gagne bane linge chaud et manger pou ki zot capave débrouillé pour quelques jours. Ena beaucoup, à peu près 200 familles ki privé de zot foyers, bane zaffaires ki ti trouve dans zot la caze, et aussi zot bane necéssité de baze couma manger etc. Plusieurs organisations non-gouvernemental fine vine pou donne ene coup de main à sa bane famille là afin ki zot regagne ene la vie décent après ruine ki fine tombe lors zot. Alhamdulillah, le Jamaat Ul Sahih Al Islam fine aussi participe dans sa forme de Khidmat-é-Khalq là, en approchant sa bane dimounes là, sa bane familles là pou aide zot, d’après nous capacité. Sa calamite là li matière à réfléchir pour bane ki vraiment intelligent, bane ki pense avec le cœur de zot l’âme, bane ki vraiment ena la crainte d’Allah, ki ena Taqwa, ki Muttaqi. Sa calamité là li seulement ene ti réclame, ene démonstration de saki vrai calamité là pou été. Nous pas fine témoigne d’ene calamité naturelle mais ene vrai punition divine. Nous fine vive 2 à 3 heures temps de saki le peuple de Hazrat Nuh (as) ti bizin passé. De ce fait, sa li nécessite ki sa humble serviteur là explique zot lors bane signes ki distingue bane punitions divine. 1. Le premier signe pou fer différence entre ene punition divine et ene calamité naturel c’est ki ene punition divine fini prophétizé avant ki li arrivé. En vérité, pas seulement fini prophétizé avant mais nature précis de sa punition là li décrire avec bane détail précis. Ene exemple bien clair de sa li trouve dans l’époque de Hazrat Nuh (as). Li ti averti so peuple ki bientôt zot pou détruire à cause zot bane mauvais actions et le fait ki zot fine continuer rejette so bane proclamations. Li fine prévenir zot dans ene même souffle, dans ene même l’élan ki zot destruction pou vine avec de l’eau, ene telle déluge pou abatte lors zot ki ene telle destruction pareil, zamais aucaine dimoune fine témoigne de sa avant (pareil couma dans Maurice la semaine dernière, zamais bane Mauriciens fine vive ene telle déluge avant) et Hazrat Nuh (as) fine indiqué ki aucaine dimoune ni aucaine zanimo pas pou sapé de sa. Couma Hazrat Nuh (as) fine recevoir sa révélation pou prévenir so peuple de sa destruction là, pou donne zot sa avertissement là, alors Hazrat Nuh (as) sous l’instruction divine pas fine tarder pou construire ene l’arche, ene telle l’Arche ki pou permette bane vrais croyants pou survive sa destruction là. Bane ki fine rejette li ti pé riye li, moque de li, ridiculize li et so bane compagnons, après ki li (Nuh (as)) fine averti zot de sa punition là. Personne pas ti penser, pas ti croire ki bane léciels pou ouvert et ki de l’eau pou tellement accumulé ki li pou couvert l’étendu de zot l’endroit en entier (nous fine trouve ene ti réclame de sa à Maurice, et zot fine trouver dans Télévision et la gazette sa bane massacres ki sa déluge là fine fer). Alors, dans l’époque de Hazrat Nuh (as), li ti fini prévenir so peuple, à ene telle point ki pas pou reste même ene boute la terre en sécurité kot so peuple ti pou capave sauve zot de sa monté de l’eau là, de sa déluge là. Et effectivement, sa jour ki zot fine refuse croire là fine vini, et Quran Shariff dà fine vini, et Quran Shariff décrire sa l’évènement là, sa calamité là coumsa : « Alors Nous fine ouvert bane la portes léciels, avec de l’eau en torrent. » (Al-Qamar 54:12) La pluie fine tellement tombé et aucaine dimoune avant fine trouve ene telle scène de destruction avant kot de l’eau continuer monté même, et pas drainer, aller. Hazrat Nuh (as) et tous bane ki fine croire dans li fine rentre dans l’Arche et zot fine amène avec zot provisions pou ene période limité, et zot fine embarque aussi quelques espèces de zanimo et bane zoiseau. Bane ki pas fine croire dans Hazrat Nuh (as) ti pé guette tous sa va et vient là ki Hazrat Nuh (as) et bane croyants ti pé fer pou assure zot sécurité et provisions par l’ordre d’Allah. Bane ki fine tourne lédos zot, zot ti pé trouve tous sa déboulement là, et zot ti pé boufonne Hazrat Nuh (as) et so bane compagnons. Mais avec la montée des eaux (dézo), l’Arche fine commence flotté, et bane la caze et bane niveaux pli haute fine commence submergé enba de l’eau. Même à la dernière minute, bane non-croyants pas fine rode croire ki zot pas pou sapé. Zot ti pensé ki zot ena encore létemps pou sauve zot la peau, ki zot pas pou noyé. Zot ti penser ki pas zis bane croyants dans l’Arche ki pou sapé, mais zot aussi. Et séki malheureux là-dans garçon Hazrat Nuh (as) aussi fine alle dans camp de bane non-croyants et li aussi ti refuse croire à la réalité de sa destruction là. Li ti croire ki li pou capave saper. Li ti penser ki sa c’est seulement ene caprice de la nature et ki de l’eau pou allé. Li fine capave penser aussi ki c’est bane ki dans l’Arche là ki pou alle noyé, pas li. Alors li fine refuse trouve réalité de sa punition divine là en forme de sa déluge ki fine abatte lors sa peuple là. Li ti croire ki si li alle prend refuge lors ene montagne, abé de l’eau pas pou arrive ziska hauteur montagne et ki li pou réussi sapé. Alors, d’après le Quran Shareef, l’homme so dernier cri dans le vide fine fer par garçon de Hazrat Nuh (as): « Mo pou alle lors ene montagne ki pou sape moi avec di l’eau. » (Hud 11:44) Mais ene grand vague fine vine ene l’Arche de Hazrat Nuh (as) et Hazrat Nuh (as) so garçon ki ti alle lors sa montagne là. De l’eau fine reste monté même et bane sommets de bane montagnes fine commence disparaite enba de l’eau. Aparte de sa l’arche ki ti pé floté là, nannié pas ti resté là-haut niveau de l’eau, près de l’horizon. Tout sa territoire là fine inondé enba de l’eau. En dehors de bane différences dans détails, sa l’évènement là fine reconnu et accepter par tous les trois grand religions du monde, c’est-à-dire, Judaïsme, Christianisme, et l’Islam. Au moin pou bane suivants de sa bane grands religions là, sa l’évènement là li ene argument puissant et zot pas capave pas accepter sa, ki la pluie capave aussi tomber comme ene signe de punition divine. Li suffit ki nous dire alors ki premier signe distinctif de bane punition divine c’est ki punition divine li averti en avance, et parfois nature de sa punition li élaboré (par bane prophètes, messagers d’Allah) en détail. Nous bizin garde à l’esprit ki sa type de punition divine ki nous pé analyser là, c’est sa punition divine ki distingue bane croyants de bane non-croyants et à propos de quoi le prophète de sa l’époque là donne ene avertissement, ene prophécie clair, kot li fer conner ki bane dimounes pieux, bane ki fine croire dans li et ki vraiment sincère, Allah pas pou fer zot souffert de sa bane calamités là, sa bane malheurs là. Alors ena ene grade et l’arrangement dans ene punition divine, et ziska la victoire finale du bien lors le mal, alors bane séries de punitions pou empirer et vine pli sévère encore avec le temps. Si nous désigne ene graphe lors sévérité de punition divine, ou pèse sa lors ene balance, excepté pou bane évènements mineures, alors le poids de sévérité de bane malheurs li pou toujours pèse pli lourd pli létemps aller. Si ene peuple pas accepter l’idéologie d’ene prophète de so l’époque (et pou azordi jours, bane messagers d’Allah ki vini zot universel pareil couma nous Aka Hazrat Muhammad (saws) so mission li universel), et ki destruction vine ene zaffaire ki fine décréter pou zot, alors l’affliction finale de bane punition divine li vine dans ene forme pli grand, pli sévère. Bane telle sévérité de destruction pas existé dans bane calamités naturel, bane dézastre ordinaires. Si Allah donne moi le Tawfiq, mo pou Insha-Allah explique aussi lors bane responsabilité ki imposer lors communauté de bane croyants kan ene peuple li affligé par ene punition divine ou ene prophécie de quelques punition divine ki reste apendant lors sa bane peuple ki mérite punition là. Ki nous code de conduite bizin été dans sa bane cas là ? Sa sujet là li bien important pour l’entrainement spirituel du Jamaat Ul Sahih Al Islam dans sa bane jours et siècle ki nous pé vivre là. Li pas ene qualité d’ene Sahih al Islam ki li suive par l’ignorance ene chemin ki pas marche avec bane noble pratiques et traditions de bane prophètes ki fine vini avant, ou ki li en-dessous de dignité d’ene vrai croyant. Ki Allah préserve nous de sa. Ameen.