بسم الله الرحمن الرحيم
Khutba Jummah
HADHRAT AMIR’UL MUMINEEN MUHYI-UD-DIN
Munir Ahmad Azim
08 Novembre 2013 ~
(04 Muharram 1435 Hijri)
(Résumé Khutba)
Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:
وَ اِذَا سَاَلَکَ عِبَادِیۡ عَنِّیۡ فَاِنِّیۡ قَرِیۡبٌ ؕ اُجِیۡبُ دَعۡوَۃَ الدَّاعِ اِذَا دَعَانِ ۙ فَلۡیَسۡتَجِیۡبُوۡا لِیۡ وَ لۡیُؤۡمِنُوۡا بِیۡ لَعَلَّہُمۡ یَرۡشُدُوۡنَ
Wa ‘izaa sa-’alaka ‘ibaadii ‘ annii fa-’innii Qariib: ‘ujibu da’-watad-daa-‘i ‘izaa da ‘aani fal-yastajiibuu lii wal-yu’ minuu bii la-‘allahum yarshuduun.
« Quand Mo bane serviteur pose toi question lor Moi (dire zot) ki Mo près avec zot. Mo réponde zot l’appel quand zot appel Moi. Mais zot aussi besoin écoute Mo l’appel et gagne la foi en Moi, afin ki zot trouve bon chemin. » (2: 187)
Azordi Vendredi le 04 Muharram 1435 Hijri. Le premier Khutba Jummah de Calendrier Islamique. Li malheureux ki bane musulmans fine oublier zot l’enseignement et le mois important de zot l’année. Pense ene coup ou même commié musulmans fine accueillir le mois sacré, nouvel Année Islamique Muharram ! Lundi le 04 Novembre 2013 la lune fine visible et Allah donne nous ene grâce de par So faveur immense, faire nous trouve nouvel année Islamique. Mais malheureusement mo sûre et certain beaucoup de bane musulmans pas fine prend sa en considération et par contre dans plisse ki ene mois et demi – Nouvel an 2014 pour arrivé. Guette ene coup commié bane frères, sœurs musulmans pour engagé dans accueillir nouvel an 2014 avec bane fêtes, réveillon, sonne pétard le 31 Décembre 2013 à minuit pour accueillir nouvel an 2014.
Parcontre Allah (swt) fine donne zot nouvel an Islamique kot sakaine parmi nous ti capave faire ene analyse de nous-mêmes prend mois Muharram passé vine ziska sa Muharram là pour constater ki progrès nous fine faire dans nous la vie tous les jours et nous la vie spirituel. Eski si arrivé nous fine trouve bane manquements de la spiritualité, que ce soit faire nous Namaz régulièrement, Zikr régulièrement et lire le Quran Shareef avec traduction et commentaire et bane les autres actes d’adorations ki Allah (swt) fine ordonne nous pour mettre en pratique, eski sa fine faire ene l’effet spirituel l’année Islamique passé ou non. Si non, eski nous fine pensé ki le début de Muharram 1435 Hijri nous prend ene résolution pour améliore nous la vie spécialement de côté la spiritualité ?
Le 1er Muharram pas fine demande nous ki nous bizin sonne pétard par boîte, faire réveillon en famille ziska le lendemain matin. Au contraire nous souhaite nous frères, sœurs et zenfants ene Naya Saal Mubarak (Muharram Mubarak) et donne zot bane meilleure vœux en forme de bane duahs pour zot et nous réveillons li différent avec bane réveillons de bane les autres cultures et religion nous passe nous la nuit avec Namaz Tahajjud entre famille et faire beaucoup de duahs, et bane pétards ki les autres cultures et religions sonné le 31 Décembre à minuit, nous, pour le Muharram nous lire le Saint Quran avec traduction et faire beaucoup de duahs ki : Allah (swt) le nouvel an Islamique 1435 Hijri Li retire le Ummah de Nabi (saws) dans l’obscurité, ouvert sakaine zot le cœur avec So la Lumière et apporte l’amour, fraternité et sincérité entre nous tous bane frères de même la foi. Ameen.
Alors li malheureux pour trouve beaucoup musulman pé préparé même dès le mois de Novembre même pour accueillir le 1er et 2ème Janvier de sak l’année, avec bane l’amusement, réservation entre famille dans bane l’hôtel, brûle ene paké l’argent dans pétards, bane l’habillement inutile, passe la nuit dans bane grillade et sans faire Namaz Tahajjud, duahs, Zikr et lire le Quran Shareef. Bane musulmans fine oublier zot l’enseignement et pé mette les autres l’enseignements en pratique. Guette ene coup couma vraie l’enseignement de l’Islam fine baffoué. Eski Allah (swt) pour laisse So religion ki Li fine parfaire reste coumsa même ? Comme le Khalifatullah de sa l’époque là, le plus grand cadeau ki mo capave offert zot mo bane frères et sœurs et zenfants en ce 4ème jour de Muharram, c’est ki mo souhaite zot ene Naya Saal Mubarak et mo faire duahs pour zot et voici le conseil ki trouve dans le Khutba Jummah d’aujourd’hui et si pas terminé aujourd’hui, mais Insha-Allah, Vendredi prochain le 15 Novembre 2013 mo pou contigne li.
Alors au commencement de mo Khutba mo ti lire sa verset Quran ki trouve dans Surah Al-Baqara, Verset 187 kot Allah dire :
« Quand Mo bane serviteur pose toi question lor Moi (dire zot) ki Mo près avec zot. Mo réponde zot l’appel quand zot appel Moi. Mais zot aussi besoin écoute Mo l’appel et gagne la foi en Moi, afin ki zot trouve bon chemin. » (2: 187)
Ena certains kitchoses ki capave paraite initile et seulement ordinaire kan ou guette zot extérieurement. Bane ki pou reste privés de sa bane kitchoses là zot bienfaits, passe devant sa couma bane aveugles, et considère sa bane zaffaires là comme inutile et sans l’importance, mais ki, si zot ti agir lors sa bane zaffaires là, alors sa ti pou produire bane résultats excellents. Nous capave observer ki tous bane dimounes instruits écrire bane lettres, mais pas tout dimounes ena ene joli l’écritire ki attirant et agréable. Zot tous ena bane papiers ki pareils, et aussi plume et l’encre. En plusse de sa, tous dimounes ena la main avec cinq lédoigts lors sak la main, et sa bane la mains là, pareil couma ene calligraphe li recouvert de la chair et les zo. Mais seulement kan calligraphe là li, li écrire, li émerveille bane ki pé guette li, pé guette so l’écritire tandis ki bane les autres (zot l’écritire) pas produire autant de l’effet extraordinaire. Ena ene grand différence entre sa deux l’écritires là (c’est-à-dire, celui d’ene calligraphe et celui d’ene l’autre dimoune). Mo fine remarquer d’après mo l’expérience ki ene bon l’écritire ena ene l’effet. Mo propre l’écritire pas tellement bon, mais dans mo courrier, mo tenir à lire devant bane les autres bane lettres ki fine écrire avec ene bon l’écritire et sa c’est parski mo capave lire sa bane lettre là facilement. Mais eski zamais zot fine pensé kot sa beauté dans l’écritire là sorti?
Si zot pensé ki sa c’est la main ki faire sa, alors tout dimounes ena deux la mains (généralement parlant). Si zot dire ki c’est à cause plume ki servi, mais là aussi alors tout dimounes ena ene plume pareil. Et sa même zaffaire pou l’encre et papier. Tout dimounes ena (accès à) sa bane kitchoses là. Donc, ki rende l’écritire tellement zoli?
Péna nannié de nouveau concernant sa. Il s’agi d’ene simple façon ki ou la main tourné pou écrire. Sa li vraie aussi pour tous bane les autres professions. Guette bane charpentiers. Sak charpentier li ene humain et ena même kalité la scie. Mais bane kitchoses ki ene parmi zot (bane charpentiers) faire, zot tellement joli ki ou pas capave détache ou lizié de sa bane kitchoses là. Mais de lotte côté, ena ene l’autre charpentier li, kan li faire kitchose, sa tellement vilain ki ou pas envie même guetter. Ou capave dire ki zot fine ruine dibois là. Alors ene ti tournement la main produire ene telle grand différence. Kikaine capave surpris ki sa « chef-d’œuvre » là fine faire avec ene simple ti kitchose.
Le cas li pareil pou bane cuisiniers. Ene kikaine capave cuit bane tellement bons plats ki même si ou pas faim, ou envie mange sa bon manger là. Mais ena ene l’autre li, kan li cuit, li cuit bane manger tellement pas bon ki même si ou ti faim, ou pas pou content mange sa bane kalité manger là. Si ou demande sa (bon) cuisinier là couma li fine prépare ene telle bon plat, li pas pou alle écrire deux ou trois pages kot li donne détails de sa recette là. Il pou contente pou dire ki li fine cuit pareil couma les autres cuisiniers cuit, et ki li pas conne l’autre façon cuit.
Sa aussi li pareil pou bane architectes et bane professeurs. Capave ena ene professeur ki pas explique bien et alors bane z’élèves pas suive bane explications ki li donné. Mais ena ene l’autre professeur li, façon ki li donne bane explications, façon ki li enseigner, alors sak z’élève pou bien comprend so bane explications. Li conne ene ti méthode kot li capave explique zot clairement. Si li explique so méthode d’enseignement, bane dimounes pou penser ki c’est kitchose d’ordinaire. Et sa li le cas pou plusieurs de bane les autres kitchoses ki dimounes considéré comme tout à fait ordinaire. Mais sa bane ti kitchoses là capave provoque bane grands résultats. Kifer eski mo fine prend la peine pou donne sa détaille là avant mo vine lors sujet de mo Khutba aujourd’hui ?
C’est parski saki mo ena pou dire zot azordi capave paraite bien ordinaire et sans l’importance pou zot. Saki mo pou dire capave paraite initile et zot capave pas prend en considération saki mo dire pareil couma bane dimounes pas prend compte dans bane l’exemples ki mo fine fek donner, kot zot prend bane kitchoses ki sa bane dimounes là fer comme ordinaire, et ki soi-disant zot déza conné couma pou fer li, ki li pou ene calligraphe, ene dimoune ki fer bane bons produits ou bane cuisiniers. Zot méthode capave paraite simple, mais pas tout dimounes ki mette sa bane ti astuces là en pratique pou gagne même bon résultats ki sa bane dimounes ki fer de zot mieux pou fer zot travails bien, à la hauteur de saki bane dimounes attane de zot.
Pareillement, ena dimounes croire ki bane ki zot duahs/Namaz accepté, zot ena kit duahs ou procédure spéciale ki zot faire pou ki zot duahs accepté. Mais ena beaucoup les autres aussi conne sa bane duahs et procédure là, mais selment zot pas mette sa en pratique, et alors Allah mette zot bane duahs de côté (pas prend sa en considération). Bane ki agir lors sa bane procédure (ki Allah fine établi), alors Allah accepter zot bane duahs. De ce fait, faudé pas ki ou considère sa bane kitchoses là initiles, même si zot capave paraite ene zaffaire simple et facile. Mais zot produire bane extra grands (et bon) résultats. Kan zot pou écoute saki ou oulé dire zot aujourd’hui, zot pou capave penser ki sa bane paroles là bien ordinaire, et ki zot déjà conne tous saki mo pé dire zot. Mais ena ene grand différence entre conné et agir (et mette en pratique sa connaissance ki ou ena là). Ene ene bel différences entre les deux.
Bane Ahmadies et bane non-Ahmadies dire ki dans sa siècle là, mo proclamation en tant ki Muhyiuddin, Khalifatullah péna aucaine sens, et ki le monde fine conne (avec mo venue) seulement la ruine et la destruction. Zot dire ki mo la venue en li-même pas pou capave sauve zot de la ruine et la destruction, mais le fait c’est ki : li bien important pou ena la foi dans moi, kot sa pou permette zot pou sauve zot de la ruine et la destruction. Ena la ruine et destruction pour ene raison, et ena diminution ou ene arrêt dans la ruine et la destruction pour ene raison. Quran li clair lors sa sujet là. Kan ou croire (c’est-à-dire, kan ou fine gagne la foi), Allah pou ouvert zot chemin et facilite pou zot sa chemin là et aussi longtemps ki ou pou maintenir ou la foi dans Allah, dans So bane anges, So bane prophètes, So bane livres, So bane décret, le Jour du Jugement et l’existence de paradis et l’enfer, alors ou ena sa garantie là ki ou pou gagne le salut. Li claire ki le niveau de la foi d’ene dimoune li mesurée par nul autre ki Allah, et donc, saki fois ki Li (Allah) envoye So bane prophètes ou choisi, ki renforcée par le Ruh-il-Qouddouss (le Saint Esprit) et bane les autres anges, alors tous sa là importants pour la protection de l’humanité contre la ruine de zot propres l’âmes si zot arriver continié pou moque de bane façons d’agir de Allah et si zot adopté le chemin de celui ki Allah fine maudit et ki créer la méchanceté kot li été, c’est-à-dire, Shaytane.
Li facile pou ene dimoune dire : « Mo croire dans Allah et dans So messager », mais li en effet très difficile pou li pou adapter li lors sa bane paroles ki li fine dire là et pou applique li, mette li en pratique. L’excellence de Abdullah, connu sous le nom d’Abu Bakr (ra), c’est ki quand li fine dire kitchose pour l’amour d’Allah et de So messager, alors li fine conforme li à saki li fine dire, ziska so dernier souffle, et so confiance en Allah et So prophète ti telle ki, au moment de sacrifice, li fine donne tous pou Allah et So messager, et quand fine demande li ki li fine laissé pour so famille, alors ki réponse merveilleux ki li fine donnée ! Pou li, li fine laisse seulement Allah et So Messager pour so famille ! So confiance en Allah, c’est ki li ti conné ki kan li pou donne tous pou Allah et So Messager, alors Allah pou certainement vine pou li et so famille et Allah pou préserve zot sous So protection. En effet, Allah fine accompli so bane souhaits ki pli profonds. So sincérité fine ouvert so chemin vers ene tel destin ki personne parmi bane croyants à l’époque du Saint Prophète Hazrat Muhammad (saws) fine gagner. So façon unique de croire – so croyance, li ene l’exemple pour bane les autres à suivre. Alors eski zot pas pou suivre so l’exemple juste, O mo chers frères et sœurs?
En conséquent, maintenant dire moi commié d’entre zot fine vraiment croire dans moi. Kan zot pas pou croire vraiment, alors comment eski zot pou capave reste à l’abri de la ruine ?
De ce fait, pou conne kitchose ou pou prononce li zis lors la lèvres (c’est-à-dire, pas mette li en pratique) li initile à moins ki saki ou dire, ou mette li en pratique. Aujourd’hui, mo oulé faire zot comprend deux kitchoses pour ki Allah accorde zot, zot bane supplications/duahs. Ene là-dans c’est ki ou bizin développe la piété dans ou bane actions et obéir à tous bane commandements d’Allah. Kifer ?
C’est parski kan nous content avec kikaine, nous donne sa dimoune là aussi ene récompense. La même chose li vraie avec Allah. Li récompense aussi celui ki donne Li satisfaction. Kan zot pou tende sa, ena certains capave dire ki c’est ene bien grand kitchose et ki zot déza conne sa. Mais la question ici c’est pou conné comment pou rapproche nous d’Allah et pou ouvert le chemin de l’acceptation de bane duahs. Nous effectivement bizin duahs pour répare nous bane actions. Bane duahs/Namaz pou exaucé seulement kan nous bane actions pou bons, kot na pas ena aucaine show-off et ki zot bane telles actions ki nous faire seulement pour l’amour d’Allah, et nous pas pou capave arrive à sa but là kot Allah accepter tous nous bane duahs, à moins ki nous gagne Allah même So l’aide puissant pou arrive à nous but. Nous capave illustré sa dans relation ki ene papa ena envers so zenfant, ki li ene garçon ou tifille. Kan so zenfant encore jeune et ki li pas capave faire bane kitchoses correctement, alors so papa (ou maman) vine à temps, derrière sa zenfant là pou aide li dans sa travail difficile ki li envie faire là. Parent là aide li et li-même li ensuite félicite sa zenfant et li récompense li kot li embrasse li tendrement, avec affection, ou sois li donne li ene récompense matérielle couma ene gato, ene bonbon ou même ene ti zouzou. Le fait ki sa zenfant là li en effet en bas z’âge, li impuissant et pas ti pou faire ene telle grand travail, mais so papa vini et renforci so la main et permette li pou faire sa travail ki li ti envie faire là. Sa zenfant fine capave demande ou na pas demande l’aide de so papa, mais de toute façon sa papa vini pou aide li. So l’amour profond ki li ena pour sa zenfant là li réflécter dans l’aide ki li pé donne sa zenfant là.
Papa là ine faire tout, mais li tenir à félicite sa zenfant là pou encourage li pour fer bane zefforts pou faire le bien dans la vie. De même, nous ene nannié ditout et nous pas pou capave faire nannié sans ki nous Créateur vine à nous l’aide et renforci nous la main par So la main, afin pou guide nous tout au long de sa voyage ki appelle : la vie. Dans So kalité de « Rahman » (le Très Gracieux), Allah donne nous tout séki nous bizin, même sans ki nous bizin demande Li pou donne nous. Li fine donne nous la vie et Li fine faire ene tel plan ki nous voyage dans la vie li confortable et fine fourni nous avec bane nécessités de base. Et en So qualité de « Rahim », Li content ki nous suppliyé Li pour tout saki nous bizin (en plisse de tout saki Li fine déjà accorde nous).
Par conséquent, nous bizin écoute bane kitchoses ki kan nous pou mette li en pratique, Allah pou écoute nous bane duahs en tant ki bane dimounes rempli de péchés, et accorde nous saki nous pé demander. Nous ena sa besoin là plisse ki bane les autres afin ki nous capave améliore nous bane actions avec bane duahs et Namaz et afin ki nous gagne (de Allah) ene la foi complet. Insha-Allah.
Mo termine ici pour le moment. Insha-Allah, mo pou contigner lors le même sujet, vendredi prochain, par la grâce d’Allah (swt).
