Text Box: بسم الله الرحمن الرحيم Khutba Jummah HADHRAT AMIR’UL MUMINEEN MUHYI-UD-DIN Munir Ahmad Azim 10 Mai 2013 ~ (29 Jamad’ul Aakhir 1434 Hijri) (Résumé Khutba) Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire: وَ مَنۡ یُّطِعِ اللّٰہَ وَ رَسُوۡلَہٗ فَقَدۡ فَازَ فَوۡزًا عَظِیۡمًا ۝ Wa mayy-yuti-‘illaaha wa Rasuulahuu faqad faaza fawzan ‘aziimaa. « ... Celui ki obéir Allah et So Messager, li sûr li pou gagne ene grand victoire. » (Al-Ahzab 33 : 72) Allah (swt) fine sans aucaine doute fer Hazrat Muhammad (saws) vine la porte par quoi tous bane dimounes pou capave accède au succès, à la victoire. So Nabuwwat li tellement puissant ki li dépasse grade de bane anciens prophètes et ainsi ki bane prophètes futures, bane tels prophètes ki fine vini et pou vini après li. Allah fine préserve bane prophètes dans ene meilleur dépôt et fine fer zot reste dans sa place exceptionnelle là ziska fine bizin envoye zot à tour de rôle pou zot accomplir zot bane missions lors la terre. Allah fine fer en sorte pou préserve l’essence de zot pureté à travers le choix de zot papa et mama, ki Allah choisir, purifié et fer zot apte pou recevoir So prophète. Et sak fois ki ene prédessésseur mort, alors so suivant remplace li pour la cause de la religion d’Allah. Allah dire ki celui ki obéir Li et So Messager, à sak fois ki Li envoye So représentant, So guide à travers le Ruh’il Qouddouss, alors celui ki suive bane directive de sa Messager là ki li recevoir de Allah, alors sa dimoune là li vine sous protection d’Allah parski kan li gagne ene instruction divine à travers Allah So prophète, bé à sa moment là li pas tourne le dos ou bien li baze li lors so propre conception de la révélation et de la Manifestation Divine. Alors sa dimoune ki suive le Messager d’Allah, ki li bane instructions et guidances ki Hazrat Muhammad (saws) fine laisser en héritage à l’Oummah Musulmane, et ki li bane instructions divine ki sa dimoune là recevoir à travers le Messager d’Allah ki Allah fine envoyer dans so l’époque afin pou fer li mette en pratique bane l’enseignements islamiques couma bizin, alors sa kalité dimoune là pou en vérité recevoir ene grand succès, ene grand victoire ki li dans sa la vie ici-bas là, et ki li dans la vie future. Après ki ene Messager d’Allah aller, li retourne vers So Rab, alors Allah pas laisse so bane zefforts alle dans de l’eau. Li fer bane vrai chercheur de vérité connecter avec sa prophète là so bane l’enseignements et Allah ouvert zot lizié afin ki zot vine accepter en grand nombre sa vérité là. Allah purifié sa bane dimounes là, parski zot représente l’espoir de demain, et Allah choisir bane Messagers de parmi la famille de sa prophète là, c’est-à-dire so bane vrai suivants, afin ki zot aussi à ene moment donné zot jouir de bane faveurs divine, et de la proximité d’Allah, et kot parmi zot Allah même envoye le Ruh’il Qouddouss afin ki celui ki li choisir de parmi sa bane suivants là, li vine ene dimoune ki purifié par Allah même afin ki li prend le relai, le flambeau de sa Messager d’Allah ki fine intékale. Bien souvent, la famille de sa prophète d’Allah là li composé de so bane propre zenfants biologique, et aussi so bane zenfants spirituelles. Allah honore tous les deux catégories de famille de So Messager, et kan après beaucoup des années bane ki fine recevoir bane faveurs divine de la révélation et ki zot mal gère bane dimounes, alors Allah change trajectoire de So la lumière, pareil couma azordi jour nous pé vivre. Mais Allah tini So promesse ki Li ti fer avec So Messager et Li élève ene parmi so bane zenfant spirituelle pou fer so travail, pou honore so mission et so véracité. Allah dire dans Quran Shareef : “Bane ki obéir Allah et le Messager, zot pou parmi bane ki fine gagne les faveurs d’Allah, de parmi bane prophète (Nabi) et bane véridiques (Siddiq) et bane fidèles/martyrs (Shahid) et bane ki fer du bien (Salih). Couma li bon, sa compagnie avec ki zot pou été là!” (An-Nisa 4 : 70) Alors nous trouver couma l’obéissance à Allah et à Hazrat Muhammad (saws) dirige nous vers ene lé monde spirituel bien fourni de bane bénédictions divines, et kan Allah béni ene dimoune, Li content ene dimoune, alors Li fer li passe par toutes kalité testes, toutes sortes kalité épreuves. Bane ki dire ki zot bane suivants de bane prophètes, surtout maintenant, bane suivants de Hazrat Muhammad (saws), alors zot bizin prêt pou passe par toutes sortes d’épreuves. Allah pou tester zot la foi ziska ki li vine claire ki zot sincère, et alors Allah fine fini fer So prophète Hazrat Muhammad (saws) comprend ki pou ena parmi so bane suivants bane ki pou prend so relai, pas en tant ki ene prophète supérieur à li, non, mais ene telle prophète ki pou soutenir à 100% so Nabuwwat. Et alors bane ki Allah choisir de temps à autres de parmi bane suivants de Hazrat Muhammad (saws), Allah fine fini décider ki-ki sanlà Li pou fini envoyer kan Li trouver ki bane dimounes népli pé prend la religion compte, népli pé tourne vers Allah couma bizin. Pas tout kalité dimounes ki Allah envoyé. La connaissance de l’invisible li pas donné à bane dimounes ki péna ene connection solide avec Allah. Zis bane dimoune ki éna ene connection solide et sincère avec Allah capave gagne sa connaissance là. Et malgré le fait ki sa bane kalités dimounes là capave gagne de temps en temps bane vrai rêves et visions, mais pou ki li capave gagne la sainteté, li bizin absolument gagne sa connection avec Allah là et découvert bane secrets de l’invisible ki bane lézots dimounes en temps ordinaire pas gagné; Pou ki nous capave fér sa différence là; ene dimoune pieux et amoureux d’Allah li, li gagne sa connaissance là en abondance et bane lézot pas capave arrive à sa degré là. Nous bizin garde en tête ki à chaque moment ki Allah Ta’ala, de par So Grâce, donne à ene dimoune l’honneur et statut pou vine So camarade et proche avec Li, pou vine ene dimoune saint et choisi, alors Li donne sa dimoune là ene distinction clair de parmi so bane disciples et bane lézot dimounes pieux, et alors sa dimoune choisi là li gagne quatre qualités principale. Si nous trouve sa distinction là dans kikène, alors li vine bien important pou nous ki nous croire dans li avec certitude, et témoigné ki li ene de bane serviteurs parfaits et ene saint d’ene degré bien haute (Auliya) d’Allah, ene camarade (Khalil) d’Allah ki Li-même Li fine choisir et fine entraîné par So guidance spéciale. Sa quatre kitchoses ki distingue bane hommes choisi d’Allah de bane lézot dimounes, c’est quatre qualités ki servi couma bane signes et miracles. Chaque qualité li bien différent de bane lézot; et tellement éna ene distinction clair entre zot ki sa bane accomplissements là arrive à ene stage de bane miracles. Ene dimoune coumsa là (c’est-à-dire, sa dimoune choisi d’Allah là) li pareil couma ene trésor ki Allah fine choisir depuis l’éternité pou ki li aide sa le monde là (c’est-à-dire, bane dimounes) pou capave atteindre sa rang là. En parlant de la sainteté ki sa dimoune là recevoir, dans bane début de la Manifestation Divine pendant ene communication, ene conversation ki mo ti ena avec Allah, Allah fine dire moi (en anglais): « ... O Munir Ahmad Azim, to connu comme le Revivificateur de la foi, to la force de sa la religion là, O Mohyuddin ; Celui ki gagne ene goutte de to l’océan li celui ki pou arrive sain et sauf à so destination O Munir Azim ! ... O Mohyuddin, bane saints (Wali) zot toujours bizin toi ; la sainteté pou toi et to le distributeur, O Mohyuddin... O Mohyuddin ! Mo relation avec toi li au-delà de tous bane les autres relations. To statut li certainement bien grand... » Sa bane quatre qualités ki kalifié ene grand saint (Wali) et maître et chef de bane saints, zot comme suite: Premièrement, sa dimoune là gagne la révélation (secrets de l’invisible) par le moyen de la supplication et autres moyens et sa bane révélations là vini avec ene telle la force et abondance et so bane prophecies zot réalizé avec ene telle clarté, ki personne pas capave rivalizé are li concernant bane critères de la révélation. Clarté et abondances de sa bane révélations là li vini zis lors sa kalité dimoune là et personne pas pou capave gagne ene partie de sa bane qualités là. En d’autres mots, pou ki nous réconnaîte ki ene dimoune li ene saint exceptionnelle, faudé li vine impossible à d’autres pou rivalize avec sa bane qualité exceptionnelles là en termes de bane secrets de l’invisible ki révélé à sa dimoune ki Allah fine choisir là. Sa dimoune ki recevoir la révélation du côté d’Allah, so bane la prières (doahs) accepté et bane signes apparaîte lors la terre et dans lé ciel pou témoigne de so véracité. Et sa dimoune là, bizin gagne, par le moyen de bane miracles et dans ene façon extraordinaire, la Connaissance Divine de L’invisible, bane visions éclairante et l’assistance du ciel, couma dire ene extra grand la rivière pé couler et ene lumière extrêmement extraordinaire pé descende dépi léciel et pé répandre lors la terre; et sa bane signes là zot bizin arrive à ene stage kot zot paraîte miraculeux et incomparable pou zot l’époque. Sa excellence là li appelle l’excellence du degré d’ene prophète (Nabi). Deuxième excellence ki nécessaire pou démontré ki sa dimoune là li le leader de bane pieux et chef de bane dimounes pures, c’est ki li bizin arrive à ene degré supérieur dans la compréhension et connaissance du Qu’ran. Li bon pou nous conné ki éna ene ti l’enseignement du Qu’ran, ene l’enseignement moyen du Qu’ran et ene pli haute degré d’enseignement du Qu’ran. Pou sa pli grand l’enseignement là, li amène vers la lumière de la connaissance, la brillance de la vérité, vrai beauté et la vertu et bane lézot degrés ki emba sa stage là zot pas capave possiblement atteindre sa grandeur de vérité là. Zis bane dimounes ki possède pli grand pureté, et ki par zot êtres illuminés, attire bane lézot lumières vers zot et c’est sa bane dimounes là ki atteindre sa bane vérités là. Alors 1er stage de sidq (la vérité) ki zot atteindre c’est ki zot gagne ene répugnance pou bane z’affaires mondaines et ene mécontentement instinctif pou tout zaffaires séki sans aucaine utilité. Après ki sa condition là fine fermement établi, alors arrive au deuxième stage de “sidq” ki caractérizé par la dévotion, l’enthousiasme et kot zot tourne zot même complètement vers ene sel Allah. Et après ki sa stage là fine complètement établi, ene troisième stage de “sidq” atteindre par sa dimoune exceptionnelle là (ki réussi arrive à sa stage là) et ki capave appelle sa pli grand de bane transformations, kot sa dimoune là coupe tous connections avec sa lé monde là, et li démontré so l’amour personnel pou Allah et le rang ki li atteindre kan li éfface li-même complètement dans Allah. Kan sa fine fermement prend place, l’esprit de la vérité pénétré l’homme, et li percevoir tous bane vérités pures et bane sujets de la connaissance à travers la révélation. So vision vine pli pénétré, li senti ki Allah fine prend possession de li-même. Sa la vérité, prend racine dans so lékaire, et sa bane merveilles là sortie de so la bouche comme étant bane connaissance pli merveilleux du Qu’ran et bane sujets de Shari’ah. Et sa bane secrets et bane éclaircissements lors la religion, c’est zis li ki gagne sa et sa bane connaissances là zot vine inaccessible pou bane intellectuels ki suive bane connaissances conventionnel et ordinaire. La raison c’est ki sa dimoune là li inspiré par Allah, et le Saint Esprit cause are li (par la volonté d’Allah). Li gagne ene répugnance pou fausseté parski li gagne so l’enseignement grâce au Saint Esprit, et li cauze par Allah volonté et c’est par sa l’Esprit là ki li influence bane lézot dimounes. Kan li vine dans sa l’état là, li gagne le titre de “Siddiq” (Véridique) parski li fine débarasse li-même entièrement de fausseté; et li remplace sa noirté là par la pureté et la lumière de la vérité. Kan sa bane vérités et sa bane haute connaissances là manifesté dans li, alors sa li vine ene signe de so véracité. Kan la lumière de la vérité fine pénétré li, alors so bane enseignements sacrés vine couma ene étonnement pour le monde. Dimounes reste ébloui par so bane connaissances pieuses ki sourcé de so l’Union avec Allah et de so connaissance de la vérité. Sa qualité là c’est la qualité de Siddiqiyya (ki veut littéralement dire: la Véracité). Nous bizin garde à l’esprit ki ene Siddiq li ene dimoune ki éna ene connaissance complète de bane vérités divine et li maîtrise sa bane vérités là dans ene façon parfait et instinctive. Par exemple, li conne vrai signification de bane sujets telle que l’unicité divine, l’obéissance à Allah, l’amour pou Allah et li gagne ene maîtrise parfait pou adore seulement Allah et li retire de so lékaire tous bane kitchoses ki pas Allah; li aussi gagne la connaissance lors vrai signification de dévotion à Allah, la sincérité, le répentir; et l’essence de bane vertus morales telle couma la patience, confiance en Allah, soumission complète à So volonté, l’union avec Allah, la vérité, fidélité, le pardon, la modestie (l’humilité), l’honnêteté, et la confiance etc. Et apparte ki li éna sa bane connaissances là, li établir li-même fermement lors tous sa bane vertus là. Troisième excellence ki bane grands saints gagné c’est le rang de “Shaheed - Shahadah”. Par sa rang là, li montré le rang kot l’homme gagné par la force de so la foi, la croyance en Allah et dans le Jour du Jugement exactement couma dire li pé trouve Allah avec so propre lizié. Après, avec bénédiction de sa conviction ki li fine gagné là, tous bane z’éfforts et bane pressions ki en temps ordinaire li gagné kan li faire bane bons actions, disparaîte, et tous bane l’ordres ki vine de côté Allah zot paraîte aussi doux ki di miel dans so lékaire, et chaque épreuve ki li faire face li percevoir sa couma ene récompense. Alors, de sa façon là, “Shaheed” li quelqu’un ki par la force de so la foi, gagne Allah et li prend de bon côté l’aspet amère du destin ki Allah fine ordonné et li trouve sa bane diffikiltés lor so chemin là couma di miel bien doux. C’est pourquoi ki li gagne le rang de “Shaheed”. Sa rang là li ene signe ki sa dimoune là li vraiment ene croyant parfait. Éna aussi ene quatrième qualité ki bane vrais saints et bane dimounes purifiés zot atteindre complètement et en profondeur: c’est le rang de “Salihin” (ki veut littéralement dire: Celui ki droite). Ene dimoune gagne le titre de “Salih” kan li néttoye so l’intérieur complètement et purifié li de tous bane méchanceté; et kan li arrive à sa degré là, li gagne le bonheur sublime de l’adoration divine et so contemplation (ki li fér à travers la méditation) li atteindre so plus haut degré. Par l’exemple, pareille couma le goût de la langue li détérioré avec maladie physique, li aussi pareille pou le côté spirituel kan bane saveurs spirituels zot gâté par bane maladies spirituelles; et de sa façon là ene dimoune ki fine gagne sa maladie là, pas trouve aukaine plaisir dans l’adoration d’Allah et dans la méditation (zikr et contemplation), et ni li éna ene enthousiasme ou ene envie pou fér l’adoration d’Allah. D’ene l’autre côté, l’homme parfait li pas seulement pure de sa bane maladies là mais aussi sa qualité là li développé tellement vite en li ki sa paraîte couma ene signe et ene miracle. En bref, sa c’est bane quatre grades ki l’homme bizin essaye atteindre et c’est le devoir de chaque croyant pou ki li capave gagne sa quatre titres là. Sa dimoune ki péna aukaine sa bane quatre qualités là, li ene dimoune ki manque la foi. C’est pourquoi dans Surah Fatiha, Allah (swt) fine ordonne pour bane Musulmans sa doah là ki zot bizin implore Li pou gagne tous sa bane vertus là. Sa doah là c’est: “Guide nous sur le droit chemin, le chemin de bane ki To fine déverse To faveurs”. Et en vérité, l’explication de sa verset Quran, sa partie de sa duah ki trouve dans Surah Al-Fatiha là, Allah montrer sa clairement dans Surah An-Nisa Chapitre 4, Verset 70, kot Allah montrer le rang ki l’homme capave atteindre kan li pou suive avec ene lékaire pure Allah et So Messager pure, Hazrat Muhammad (saws). Alors, ene vrai prophète d’Allah li atteindre tous bane degrés de sainteté, de martyr, de véridique et li recevoir la capacité ki bizin pou reste lors le droit chemin, pou marche lors sa même chemin et agir correctement couma so modèle parfait, le Saint Prophète Hazrat Muhammad (saws). Ki Allah aide nous tous pou bien comprend sa Khutba là et change nous la vie dans ene telle façon ki nous perfectionne nous-même dans l’Islam (la soumission à Allah) et l’amour d’Allah afin ki nous atteindre à degré de bane élus bien-aimé d’Allah, Insha-Allah, Ameen.