بسم الله الرحمن الرحيم

 

Khutba Jummah

 

HAZRAT AMIR’UL MUMINEEN MUHYI-UD-DIN

 

Munir Ahmad Azim

 

11 Janvier 2013 ~

(28 Safar 1434 Hijri)

 

(Résumé Khutba)

 

Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

رَبَّنَا ظَلَمۡنَاۤ  اَنۡفُسَنَا ٜ وَ  اِنۡ  لَّمۡ تَغۡفِرۡ لَنَا وَ تَرۡحَمۡنَا لَنَکُوۡنَنَّ مِنَ الۡخٰسِرِیۡنَ ﴿﴾

 

« Rabbana zalamna anfussana wa illam taghfirlana watarhamna lanakounanna minal khaasiireen. »

 

« O nous Maitre, nous (accepter) nous fine faire du tort à nous-mêmes. Si To pas pardonne nous et donne nous To grâce, sûrement nous pour alle dans la perte. » (7: 24)

 

Mo pé continue Khutba Jummah ki mo ti faire 2 Vendredi passé, cotte mo ti pé dire ki nous bizin présente nous au service d’Allah, malgré ki nous fine dépasse limite et nous en dehors nous control, nous bien faible et nous pas digne pou faire la reforme du monde, alors sakaine parmi nous, li nécessaire ki nous crée sa sentiment là et nous cherche l’aide Allah même et nous cherche So protection.

 

Donc, li nécessaire ki ou vine parmi bane proches, bane camarades d’Allah, et pou vine bane proches d’Allah, li nécessaires ki ou adopter bane chemins et bane qualités ki ti fine indiquer au commencement. Ou bizin vine bane proches d’Allah afin ki aucaine problème, aucaine obstacles, aucaine la peine et difficultés pas oser mette la main lors ou. Là, c’est ene tel sujet ki quand ou guette la vie et situation de bane dimounes ki bien sincère dans zotte Iman, ou capave comprend ki sa bane dimounes là, nuit et jour zotte engager dans Zikr, dans Ibaadat, dans le service de l’Islam zotte pas prend compte ki pou traverse lors zotte, ki pou traverse lors zotte famille et zenfants, zotte donne seulement nécessités de la religion l’importance.     

 

A ce moment là, Allah prend zotte aussi compte, prend zotte bane famille et zenfants aussi compte. Et sa bane qualités dimounes là, zotte subir toute sorte attaques, toute sortes qualités problèmes et difficultés, mais quand ou guette zotte, comme-ci dirai zotte péna aucaine l’attaque, aucaine problème et difficultés, zotte en bonne santé, ene la joie réflecter lors zotte visage, comme-ci dirai ene visage remplie de Noor d’Allah (la Lumière d’Allah) et jamais ou tanne zotte pé plaigner. Mais c’est Allah tout seul ki conne l’état de zotte le cœur, c’est pas l’homme ki conne l’état du cœur ene l’autre, quand li-même, li pas conne l’état de so lé cœur devant Allah. Mais sa li parfaitement vrai ki bane dimounes ki, pour la cause d’Allah zotte rejette zotte propre le monde et zotte adopter le monde d’Allah, bé sa c’est bane dimounes ki Allah protège zotte le monde.

 

Certes sous la loi de la nature zotte capave faire face à quelques problèmes, pareil couma même bane plantes ki en bonne santé aussi zotte souffert de dégâts, de problèmes. Parfois ena bane tempêtes, bane cyclones et inondations et même bane bon plantations affecter par sa. Bane planteurs là pas capave sappe sa bane plantes là. Mais quand Allah Li, autant ki Li envie, Li capave sappe zotte et effectivement Li sappe zotte. Mais certainement zotte subir ene ti peu de problèmes, juste pou goûte bane difficultés là. Sa c’est ene tel sujet ki le Quran fine mentionné en détails. Donc mo pas pé dire ou ki quand, si ou engager dans bane travail de la religion, bé bane maladies du monde pas pou touche ou. Si ou engager dans le travail de la religion juste avec sa pensée là ki bane maladies mondaines pas pou touche ou, bé à ce moment là zotte pou certainement touche ou. Sa c’est ene point ki bizin comprend. Si en réfléchissant lors sa bane situations là, ou faire ene deal, ene marchandage pou ki ou sapper, ou ek ou famille, alors ena ene seul chemin, c’est ki mo engage moi dans travail de la religion, alors ou dire c’est sa même ki ou pou faire, bé sa qualités l’intention là pas pou servi ou narien.

 

C’est quand ou engager dans le service de la religion, malgré ki ou conner ki pas pou ena personne pou guette ou famille et ou zenfant, bé c’est à ce moment là ki Allah pou surveille ou famille et ou zenfant. Donc tout sa là c’est bane situations lors laquelle bane dimounes péna zotte vues, zotte pas capave conne tout sa bane situations du cœur là, mais Allah Li, Li trouver sa bane situations là. Et si ou envie trouve so applications lors ou, bé ou pou bizin passe par sa bane stage là, et alors ou vine parmi bane proches d’Allah afin ki aucaine problèmes, aucaine la peine pas gagne le courage mette la main lors ou, parceki narien pas arriver lors la terre sans la permission d’Allah. Guette ki qualités sa parole là grand. En fait quand ou vine sous refuge d’Allah, bé ene résultat naturel de sa ki bizin crée dans ou le cœur et li bizin ene zaffaire ki paraitre dans ou, et ou bizin enlève tout bane discussion, bane Josh, bane colère, bane la guerre entre zotte.

 

Maintenant sa zaffaire ki fine mentionner là, sa aussi c’est ene problème très sérieux, parceki tout bane dimounes bizin efface zotte bane discussion, bane passions, et bane la guerre entre zotte. La majorité de bane dimounes ki engager dans bane la guerre entre zotte même ou soi zotte pas pé faire z’éfforts pou calmer et efface zotte bane colère et passion, c’est bane dimounes ki pas capave rentre parmi bane camarade d’Allah. Maintenant le temps fine vini pou délaisse et abandonne bane tipti zaffaires, ki pou faire ou faire colère et perdi ou le temps, engage nous dans bane grand, grand travail ki Allah fine donne nous, bane travail extraordinaire.

 

Donc, chaque coup mo pé faire ou comprend et mo pou continuer faire ou comprend ki li absolument nécessaire ki nous adopter sa bane zaffaires là, et sans sa, nous pas pou capave vine sous l’ombre d’Allah, sous le refuge en paix d’Allah. Mais l’objectif n’est pas seulement pou vine sous le refuge en paix d’Allah, coumsa même là li ene zaffaire ki bizin travail pou gagner. Ene vrai z’homme c’est celui ki saute dans le terrain à ene moment kot apparamment péna aucaine support, mais là aussi li sauter, tout céki li ena et tout céki li capave, li présenter et li pas prend aucaine compte ki arriver par derrière, parceki sa passion, et amour et désire pou servir la Religion là, tellement fort dans so le cœur, ki volontairement li présente li avec tout céki li ena au service de la Religion (l’Islam).

 

Si ou fine fini crée sa qualités désire là dans ou le cœur, bé à ce moment là, c’est ou sa bane dimoune ki pé mentionner là. Mais si jusqu’à l’heure ou pas encore développe ene tel passion ki couma ene la braise, ki à n’importe quel moment capave crée ene bel la flamme; si ou pas encore arrive à sa point là, bé à ce moment là tout sa bane paroles là ki ou pou capave comprend, oui, mais ou pas pou capave tire profit de sa. Donc, li ene grand moment ki sakaine réfléchi et analize so propre être d’ene tel façon en détails de sorte ki aucaine aspé de so propre être pas reste dans l’obscurité.

 

Ensuite magine bien ki tout bane dimounes ki sous l’emprise de zotte colères, ki zotte colères et passion domine zotte, bé li pas possible ki bane paroles de sagesse et de connaissance sorti de zotte la bouche. Quand mo pé dire bane zaffaires de sagesse et de connaissance, bé sa aussi pé faire comprend bane dimounes ki pou reconnaitre le signe et manifestations d’Allah, ki pas pou laisse zot influencer par la colère et bane passions inutiles, et zot pou gagne tellement bane paroles de connaissance et de sagesse ki zotte pou capave ferme la bouche de bane grand, grand connaisseurs. Maintenant si ou laisse ou dominé par ou bane désires et passion et colère, bé li pas possible ki bane paroles de connaissances et de sagesse sorti de ou la bouche. A ce moment là sa zaffaires kot ou pou gagne le dessus lors bane grand, grand savant là li ene affaire bien loin. Donc si ou colères, si ou passion gagne le dessus lors ou, bé li pas possible ki ou accomplir sa désire de vine bane grand, grand dimounes là, c’est-à-dire, bane ki bien-aimé dans lizié Allah.

 

La raison c’est ki zotte pas conner ki sa désires de vine bane grand, grand dimounes là même, pou expose tout zotte intérieur. Au contraire si ou vine bane grand, grand dimounes, bé tout le temps ou bizin adopter humilité. Moi, mo ene narien du tout et c’est duah de mo grand dimoune ki fine faire moi arrive là, c’est avec support de duah ki fine faire moi arrive jusqu’à là. Et jamais ou faire sa Fakar (arrogance) là, ou déclarer ki c’est à cause mo bane propre connaissances ki mo fine gagne tout sa grandeur là.

 

Sa c’est ene ti l’exemple, mais ena bane dimounes, zotte dire mo envie vine pareil couma untel ou sois plisse ki sa dimoune là même, bé sa désire là même reflète zotte désire personnelles, zotte égoïsme. Ki faire nous bizin faire sa bane qualités duah là, ki nous envie vine pareil couma un tel. Au contraire, nous faire sa duah là, « O Allah faire nous vine pou Toi. » Quand ou vine pou Allah, bé à ce moment là, le sujet de duah ki Hazrat Moussa (as) ti faire là, commencer : « Rabbi inni lima anzalta ilayya min khayrin fakir ». (O mo Maitre, mo dans ene grand besoin de tout faveur ki To capave fer moi). Laisse tout lors Allah. Allah pou décider ki-ki capacités dans ou bizin développer, et jusqu’à ki limite li pou arriver, laisse sa lors Li-même.  

 

Et bane plantes ki Allah protéger, la raison ki Li protège zotte c’est ki justement sans Li, bane plantes là pas capave arrive à zotte maximum capacités. C’est la main d’Allah ki sappe zotte de bane Reyr (anti-Islam, non-croyants), de bane zaffaires étrangères et Allah crée ene tel environnement de sorte ki bane plantes là arrive à zotte maximum capacités.

 

Donc si ou envie causer avec l’aide de l’Esprit Saint, parceki vrai connaissance c’est celle ki gagner de l’Esprit Saint. Si ou envie causer par l’Esprit Saint, bé ou bizin retire tout ou bane désires, passions et colère dans ou. Sa c’est bane différent stage ki pé faire nous comprend, mais le premier stage même nous pas encore entamer, c’est-à-dire, bane dimounes ki pas conscient même ki zotte été, zotte pas encore même faire le premier stage. Bane dimounes ki pas encore même ena ene connaissance de zotte même, bé ki connaissance extérieur ki zotte pou gagner ? couma zotte pou capave gagne de profonde connaissance ? Et autant de désordres et la guerre ki ena dans le monde à cause de sa négligence là même. C’est-à-dire ki bane dimoune pas conne zotte propre être, et lors là apparamment zotte envie gagne de profonde connaissance et parfois supposément zotte causer aussi bane paroles de profondes connaissances. Mais bane paroles ki sortie dans zotte la bouche rempli de bane germes ki crée boucou de désordres. Mais pou ena certain bane dimounes, par la grâce d’Allah, zotte péna même sa bane paroles ki rempli de bane germe. Satan pas fine toucher même bane paroles ki sorti de zotte la bouche, Satan pas fine touché aussi zotte bane désires et l’espoir.

 

Donc comprend sa stage haute là et commence le voyage vers sa haute destination là. Et de jours en jours, ou la vie bizin approcher avec nous bien-aimé prophète Hazrat Muhammad (saw). Dès ki ene dimoune faire l’intention pou faire  le voyage vers Allah, bé Allah compte ene tel dimoune parmi So bane serviteurs. Alors retire tout ou bane passion et colère dans ou, c’est à ce moment là ki bane paroles de sagesse et de connaissance pou sorti de ou la bouche et lerlà, lé ciel pou prend ou comme ene dimoune profitable pou le monde. Et ou l’âge pou augmenter.

 

Quand talère là ti pé dire ki bane problème et difficultés pas pou touche ou, bé c’est ene fait ki bane dimounes ki gagner dans le service de la religion, bé zotte l’âge et l’âge de zotte famille augmenter afin ki la religion d’Allah gagne maximum profit de zotte, et bizin pas cause avec l’arrogance et ni bizin ridiculizé, et bizin ki dans ou bane paroles péna aucaine vulgarité et ni bizin dire bane mauvais paroles. Ene zaffaire ki abaisse ene dimoune et faire so le cœur faire mal. Mais par contre ene bon sense de l’humour c’est tout à fait permette, et sa bane zaffaires là et ou pou capave assimile bane beautés de l’Islam. Pou montrer la valeur de l’Islam, sense de l’humour c’est ene très haute qualité.

 

Ki Allah mette nous et fer nous reste ferme sur le droit chemin. Insha-Allah, Ameen.