بسم الله الرحمن الرحيم
Khutba Jummah
HADHRAT AMIR’UL MUMINEEN MUHYI-UD-DIN
Munir Ahmad Azim
15 Novembre 2013 ~
(11 Muharram 1435 Hijri)
(Résumé Khutba)
Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:
وَ اِذَا سَاَلَکَ عِبَادِیۡ عَنِّیۡ فَاِنِّیۡ قَرِیۡبٌ ؕ اُجِیۡبُ دَعۡوَۃَ الدَّاعِ اِذَا دَعَانِ ۙ فَلۡیَسۡتَجِیۡبُوۡا لِیۡ وَ لۡیُؤۡمِنُوۡا بِیۡ لَعَلَّہُمۡ یَرۡشُدُوۡنَ
Wa ‘izaa sa-’alaka ‘ibaadii ‘ annii fa-’innii Qariib: ‘ujibu da’-watad-daa-‘i ‘izaa da ‘aani fal-yastajiibuu lii wal-yu’ minuu bii la-‘allahum yarshuduun.
« Kan Mo bane serviteur pose toi question lor Moi (dire zot) ki Mo près avec zot. Mo réponde zot l’appel kan zot appel Moi. Mais zot aussi besoin écoute Mo l’appel et gagne la foi en Moi, afin ki zot trouve bon chemin. » (2: 187)
Avant ki mo vine lors le sujet de mo Khutba de la semaine dernière, mo envie cause encore ene fois lors le mois sacré islamique de Mouharram. Allah mentionne dans Quran ki ena quatre mois ki sacrés, et bane Hadiths fine donne bane éclaircissements lors bane mois mentionnés, c’est-à-dire: Mouharram, Rajab, Zul-Qi’dah et Zil-Hadj. Fine également convenu ki, en dehors de sa bane grands mois sacrés là, ena aussi le mois sacré de Ramadhan ki so valaire sacré fine détaillée dans Quran Shareef.
De ce fait, Mouharram marque le début de l’année islamique, ene mois rempli de bénédictions et c’est dans sa mois là ki ena Yawmé Achoura, ene jour kot nous rappelle en plisse de bane les autres évènements, de la victoire de Hazrat Musa (as) lors so bane l’ennemis; donc ene jour de victoire pour bane vrais serviteurs d’Allah. Bane Juifs à l’époque du Saint Prophète Muhammad (saws) pas fine manqué pour garde Roza sa jour-là, et kan le Saint Prophète Muhammad (saws) fine pose question lors l’importance de sa jour là, alors bane Juifs fine donne li la raison, kot c’est le jour de la victoire de Hazrat Musa (as) lors Pharaon et so bane l’armées, et donc nous bien-aimé prophète (saws) fine dire à so bane compagnons ki zot (bane musulmans) ena plisse droit lors Hazrat Musa (as) ki bane juifs et bane musulmans fine alors zot aussi commence garde Roza sa jour-là. (Boukhari et Mouslim).
Plus tard, kan Allah fine ordonné pou garde Roza pendant le mois de Ramadhan, Roza de Achoura fine vine optionnel : bane ki oulé garde Roza capave garder sa jour là, mais li pas ti obligatoire pour zot.
Yawmé Achoura (le dixième jour de Mouharram) li aussi le triste rappel et l’évènement de Shahadat de Imam Hussein, ti-zenfant de Nabi Kareem (saws) et garçon de Hazrat Ali et Fatima (ra). Pourtant, dans martyre de Imam Hussein (ra), nous trouve la résolution de bane vrais croyants pou zamais incliner devant bane dictateurs et bane dimounes mal intentionnés ki toujours prêt pou nuire à l’Islam et tout saki li (l’Islam) représenter. Imam Hussein ti ene de bane deux fleurs de Nabi Kareem (saws) lors la terre, l’autre ti so frère aîné, Imam Hassan (ra). (Tirmidhi et Mishkat).
Béni de près de même nature de zot nana bien-aimé (saws), tous les deux Imam Hassan et Hussein fine défende l’Islam avec zot la vie. Zot fine sacrifié zot êtres entiers, bane membres de zot famille et zot bane compagnons et zot bane di biens afin ki le mal dans tous so bane formes capave disparaite de la surface de la terre.
Leçon ki zot fine donné li matière à réflexion pour bane musulmans aujourd’hui. Ena dans le monde beaucoup dimounes ki proclame zot l’amour pour sa deux chefs de bane jeunes du Paradis, sa deux dimounes ki fer nous rappelle affectueusement de Nabi Kareem (saws). Si zot ena vraiment l’amour pour Nabi Kareem (saws) et so deux excellents ti-zenfants, alors sa bane dimounes là bizin soumette zot à commandements de l’Islam couma le Saint Prophète (saws), bane membres de so la famille et zot bane véritables compagnons fine faire. Sa bane dimounes là pas fine seulement dire ki zot bane musulmans, mais zot fine prouve li par zot bane actions, à travers bane grands sacrifices ki zot fine faire pour l’Islam et à la fin, c’est zot ki fine vine véritablement bane vainqueurs parski zot fine gagne l’amour éternel d’Allah pour façon courageuse ki zot fine défende l’Islam avec zot la vie. Islam ti sous zot garde/responsabilité et couma bane véritables gardiens zot fine la guerre pour protège le caractère sacré de l’Islam ziska zot dernier souffle.
Dire ki nous croire dans Allah et dans So bane élus et pou azir lors nous croyance zot deux zaffaires différent. Alors, nous bizin prier Allah beaucoup, avec confiance ki Allah pou tende et exauce nous duah. Les temps ki nous tous pé vivre c’est l’époque de la grande bénédiction divine kot c’est dans zot vivant même ki Allah fine envoye à zot ene représentation de tous So bane Prophètes sous la forme de sa humble serviteur d’Allah là, le Khalifatullah de l’époque. Allah fine choisir zot tous dans sa l’époque et période de temps là afin pou témoigne de l’avènement de So messager choisi afin ki zot agir lors bane directives ki li recevoir d’Allah (twa). Si zot suive Allah et So Khalifatullah, zot pou recevoir félicité dans sa le monde là et dans l’au-delà. Le temps de sacrifice fine vini pour bane ki dire ki zot bane vrais amoureux d’Allah et de so bane élus et béni, couma Nabi Kareem Hazrat Mouhammad (saws) et bane membres de so famille bénie et so bane compagnons bénis, et bane ki ena l’amour pour tous bane prophètes d’Allah et zot bane vrais croyants depuis création de sa l’univers là.
Eski zamais zot fine souhaité retourne en arrière et vivre dans l’époque de sa bane grands prophètes et élus d’Allah là pour la guerre à zot côté contre bane l’ennemis d’Allah, et pour donne tout pour l’amour d’Allah? Allah fine donne zot sa l’opportunité là dans sa l’époque là afin ki zot agir lors sa même l’amour ki zot pé proclamé là. Eski zot pou ena le courage pou présente zot de l’avant et pou brandir l’épée de zot la foi couma ene témoignage de zot volonté véritable pou faire la justice et propage l’unicité d’Allah dans quatre coins du monde? Eski zot prêt pou vine ene ti Imam Hussein ki, ene dixième jour de Mouharram fine donne tout, même so la vie pour l’amour d’Allah et ki fine préserve le dépôt ki so nana (saws) fine confié li depuis so naissance dans sa lémonde temporaire là?
Oh bane amoureux de Hassen et Hussein, fine donne zot l’occasion aujourd’hui pour prouve sa l’amour là, non pas par kit type de moyen kot zot inflige lors zot-mêmes bane douleurs (kot zot fer Gunn), mais l’appel ici c’est pou lutte contre zot propre ego, pou établir zot solidement lors l’unicité d’Allah, pou confier zot bane la peines en Allah seul, et non pas par bane les autres dimounes couma bane saints (morts) et bane édifices artificielles (Darga) ki établi pour demande l’aide de sa bane « saints » là. Allah exige de zot ene l’amour et la foi véritable. Zot dire ki zot ena vrai l’amour et la foi, alors eski zot pas pou vine de l’avant dans sa bataille de la vie là pour rétablir la gloire de l’Islam couma Nabi Kareem (saws) et so bane ti-zenfants fine apprane et montré avec zot la vie et l’honneur?
Ainsi, sa mois sacré là (Mouharram), mo bane chers frères et sœurs, nous bizin réfléchi profondément lors le but de nous la vie et couma nous capave vine bane vrais musulmans et alors zot pou gagne accès à Allah et manière pou accéde à Allah c’est par la prière/duahs/Namaz.
Alhamdoulillah Soumma Alhamdoulillah, Allah fine donne moi encore ene fois le Tawfiq pour continuer lors le même sujet ki mo ti commencé vendredi dernier le 08 Novembre 2013. Mo ti mentionne dans mo Khutba Jummah la semaine passé ki celui ki ena la foi et confiance totale ki zamais li pou déçu après avoir ki li fine prier Allah (twa) et ki Allah zamais pou fer li retourne la mains vide, alors sa dimoune là pou réussi dans so requête envers Allah. Si ene dimounes prier mais ki au fond de so lécœur, li croire ki so la prière zamais pou exaucé, en fait vraiment, sa duah pas pou Qabool.
De ce fait, zot tout bizin prier avec la ferme conviction ki Allah pou sûrement entende so bane supplications et pou accorde li saki li pé demander. Ensuite, séki mo envie mentionner, c’est ki si zot content ene kikaine so bien-aimé ou quelqu’un de cher à sa dimoune là, alors sa dimoune là pou content ou aussi. Par exemple, si kikaine sauve ene zenfant de bane blessures graves, bane parents de sa zenfant là pou sûrement reconnaissants envers li. Zamais zot pou dire ki dimoune là fine sauve zis zenfant là et pas fine sauve zot, bane parents, donc, alors kifaire nous bizin reconnaissants envers li? Zamais zot pou dire sa. Pareillement, l’amour exige ki si ene bienfaiteur rende service ou accorde ene l’aide à l’être aimé ou dire lors li ene bon parole, alors sa dimoune (ki content sa l’autre dimoune ki ou, ou content et apprécié li là), alors li aussi pou ena bane sentiments d’amour pour ou aussi.
Ene dimoune capave employe sa même méthode là dans so bane Ibaadat/duah/Namaz aussi. Allah content Insaan (bane dimounes) beaucoup plisse ki zot ena l’amour entre zot-mêmes. Kifer ? C’est parce ki l’amour li basé lors bane relations mutuelles. L’amour de bane humains li bien temporaire, du point de vue de commencement, ainsi ki la fin (kot ene jour nous même nous pou fini lors sa la terre là). Même si zot l’amour li intense, sa pas pou capave comparé à l’amour ki Allah (twa) ena pour zot. L’amour d’Allah li pou duré pou toujours et li éternel. Fine rapporté ki ene jour le Saint Prophète (saws) ti lors ene champ de bataille avec bane infidèles. L’ennemi fine gagne défaite et bane Sahaba fine encerclé bane prisonniers de guerre et fine ramasse bane butins de la guerre kan li – le Saint Prophète (saws) fine trouve ene madame ki ti pé galoupé avec beaucoup tracas et ti pé rode so zenfant. Sak fois ki li ti pé trouve ene zenfant, li ti pé attrape li, et serre li dans so lébras, embrasse li et contigne pou rode so zenfant.
Après ene grand recherche li fine enfin retrouve so zenfant. Li fine serre li contre so la poitrine et fine assize avec li dans ene coin. Le Saint Prophète (saws) ti pé guette sa et fine dire à so bane compagnons: « Eski zot fine trouver couma sa madame là fine agité et bouleversé pour l’amour pou so zenfant ki fine perdi ? Zot bizin conné ki Allah content So bane serviteurs beaucoup plisse ki sa madame là (ena l’amour pou so zenfant) ». (Boukhari)
De ce fait, l’amour d’Allah li beaucoup plisse ki l’amour de bane dimounes. Si kikaine content ene dimoune, alors li créer l’amour dans le cœur de bien-aimé de sa dimoune là aussi. Alors, sa aussi ene de bane méthodes ki bane supplications zot exaucé, ki sak fois ki ou faire face à ene situation bien difficile et ki ou envie prier pou sa, alors retire/enlève difficulté ou malheur d’ene dimoune.
Même si ou pensé ki ou pas pou capave enlève so difficulté, essayé au moins. Kan kikaine essaye aide bane personnes en difficulté, Allah pou aide li et enlève so malheur en raison de bane aides ki li accorde à bane les autres. Sa ti tout simplement parce ki li fine aide kikaine dan so situation difficile et sa li vine ene moyen très efficace pou faire bane la prières/duahs exaucer. Essaye cherche ene kikaine ki dans ene grand difficulté, et fer en sorte ki dans n’importe ki tracas li été, ki li au niveau physique, financier ou ki ena tré à so l’honneur ou n’importe ki difficulté ki sa dimoune pé fer face, alors ou bizin essaye aide li. Li pas ou responsabilité pou retire sa calamité là, mais ou bizin faire de ou mieux pour rendre service sa dimoune là et aide li. Par sa moyen là, ou bane duahs pou grandement exaucer. Pli ou pou faire attention et enlève douleur de quelqu’un, pli Allah pou envie enlève ou propre douleur et difficulté. Eski ou penser ki kan Allah So l’attention lors ou, ki sa pou reste sans conséquences?
Non, zamais. Li possible ki ou pas réussi élimine douleur de sa dimoune ki ou pé aidé là ; parski en vérité li pas dans puissance d’ene dimoune pou réussi faire tout saki li entreprendre pou faire. Mais c’est dans la puissance d’Allah ki tout saki Li oulé faire li accompli. De ce fait, zamais pensé ki zot bane zefforts pour élimine la peine ou bane difficultés de bane les autres pou reste sans récompenses, et de ce fait, si ou pense dans sa direction là (ki Allah pas pou reconnaitre ou bane zefforts), alors en vérité Allah pas pou accorde ou saki ou pé demander dans ou bane duahs.
Sak fois ki Allah oulé faire quelque chose, sa pou surement réaliser. Li le créateur et Li le maître. Li capave exauce duahs de celui ki Li oulé. Alors, agir en conséquence. Ene l’autre kitchose ki mo envie dire zot, ki bane ki pas fine réussi atteigne bane sommets (zot buts) lors bane directives et interdictions d’Allah concernant certains duahs, alors zot bizin envoye beaucoup Darood lors le Saint Prophète (saws) avant ki zot commence zot duah.
Ene de bane façons pou donne ene récompense c’est pou donne li à travers sa dimoune là so bien-aimé. Allah également utilise sa méthode là pour faire le saint prophète digne de tous bane récompenses et pou gagne statut ki pli haute, de sorte ki bane ki pou supplier Allah après avoir ki zot fine envoye Darood lors le Saint Prophète (saws), alors zot duahs pou exaucé plisse ki bane les autres. Ki parmi bane dimounes, ki pas besoin de la miséricorde d’Allah ? Zot tout en vérité bizin miséricorde Allah. Zot tous pou prier Allah pou ki Li enlève zot malheur. Si li pas ti ena l’habitude envoye Darood, mais pou ki li rassurer ki so duahs pou exaucer, li pou envoye le Darood, ki par sa pou déclenche encore et encore l’amélioration du statut du Saint Prophète (saws) et à cause sa, sa dimoune là pou recevoir également so récompense (kot so bane duahs pou exaucé).
Par conséquent, ene de bane kitchoses ki Allah fine mentionné pour ki nous bane duahs exaucé c’est pou prier après ki nous fine envoye Darood lors le Saint Prophète (saws) et sa aussi c’est pas ene kitchose injuste. Sa veut dire ki celui ki traite bien sa être aimé là, alors li pou vine automatiquement le bien-aimé de l’amoureux (kot ka nous pou ena l’amour pou Nabi Kareem (saws) et envoye Darood lors li, alors nous pou vine bane bien-aimé d’Allah). Insha-Allah, Amine.
