|
بسم الله الرحمن الرحيم
Khutba Jummah
HAZRAT AMIR’UL MUMINEEN MUHYI-UD-DIN
Munir Ahmad Azim
18 Janvier 2013 ~ (05 Rabi’ul Awwal 1434 Hijri)
(Résumé Khutba)
Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:
Le Sceau de tous bane prophètes, Hazrat Muhammad (saws) fine né lors la terre de l’Arabie ene Lundi 12 Rabi’ul Awwal, dans l’année de l’Eléphant. Li ti vini comme ene avertisseur et pou prêche l’unicité d’Allah, pas seulement à bane dimounes dans so pays kot li fine né, mais li fine vini comme ene prophète universelle, c’est-à-dire, pour tous bane nations du monde; en effet, li ene bénédiction pour le monde en entier. Allah ti choisir li comme So prophète ene Lundi, et bien souvent nous bien-aimé Aka Hazrat Muhammad (saws) ti pé garde Roza pendant sa jour là en pensant à sa faveur immense ki Allah fine fer li là kan Li fine choisir li comme le meilleur parmi tous bane dimounes.
Bane Lundis et aussi Jeudi zot bane jours kot bane actions de bane dimounes zot présenté devant Allah, et alors nous bien-aimé prophète, humble et rempli de Taqwa (la crainte d’Allah) couma li été, li fine préfère passe sa bane jours là dans garde Roza. Malgré ki li ti ene dimoune sans péché – excepté pour certaines faiblesses humaines ki li ti ena, pareil couma tous dimounes – mais c’est Allah ki fine guide li pou fer li améliore li lors tous plans à travers bane l’années comme prophète. Alors Hazrat Muhammad (pbuh) li représente le sommet de la pureté, moralité, spiritualité et perfection humaine. Li ti l’homme idéale, le prophète idéale, l’époux idéal, le papa idéale, Nana (grand-père) idéale, le soldat idéal, le commandant idéale, le chef idéal, le serviteur idéale, l’homme ordinaire idéal, l’adorateur d’Allah idéale, le conseiller idéale, l’arbitre idéale, le juge idéale etc. En résumé, li ti le prophète humaine idéale, ene dimoune exemplaire, ene modèle à suivre pour l’humanité dans so l’ensemble.
Bane chapitres de so la vie fine montrer nous ki à sak tournant li fine fer zéffort pou vine le meilleur et pou reste le meilleur ziska so dernier soufflé lors sa la terre là. So qualité de meilleur ti en vérité trouve dans l’humilité. Sans l’humilité, li pas ti capave arrive bien loin dans vine ene représentation de l’homme parfait (le meilleur homme). Dans sak situation li fine montrer li-même humble et patient, mais ti ena bane moments, kot la situation demandé, kot li fine être dure, seulement pou protège bane musulmans sous so responsabilité, et li fine fer sa seulement d’après la volonté et le commandement d’Allah.
Bane périodes de so la vie, prend dépi so bébé, vini même, ki li dans so l’enfance et dans so maturité, montré couma exemplaire li ti été. Allah fine fer moi comprend ki ene Messager d’Allah li protégé avec beaucoup précaution par Allah, même avant so naissance lors la terre. Li ene la lumière ki Allah fine metter, et ki passé de les reins (Salib) de so papa ziska l’utérus (Rahim) de so maman. Alors, Allah purifié so papa et maman – concernant Hazrat Muhammad (saws) – afin ki zot capave accueillir dans sa le monde là le plus parfait parmi tous bane zenfants; le meilleur parmi tous bane dimounes. Fine rapporté dans bane anciens traditions ki Hazrat Muhammad (saws) so maman ti récipiendaire de beaucoup de bane rêves et visions, et c’est dans ene de so bane visions ki li fine conné ki kalité ene grand dimoune, ene garçon spéciale li pou mette au monde. Et li fine même gagne l’instruction pou mette sa zenfant là so nom: Muhammad, ki veut dire, le loué – ene dimoune ki dimounes bizin fer so louanges beaucoup. En fait, c’est ene nom dans ene nom. Allah, nous bien-aimé Créateur fine fer li existé afin ki so la vie capave reflécter la vie de bane ki fine recevoir la bénédiction divine, et Hazrat Muhammad (saws) li le seul prophète et dimoune (humain) ki n’importe kan so nom prononcé ou entende so nom pé prononcé, nous bizin envoye Darood, bénédictions d’Allah lors li. Sa action pou envoye Darood là li forme partie de la foi d’ene Musulman et li obligatoire pou li pou fer sa, c’est-à-dire, envoye Darood lors Hazrat Muhammad (saws), parski si li pas fer sa alors li pou considérer comme ene arrogant dans lizié d’Allah. Hazrat Muhammad (saws) fine alors accomplir la signification de so nom: Muhammad (saws), le loué.
Li chagrinant pou pensé ki so papa fine quitte sa le monde là avant so naissance. So mama li, fine mort kan li ti encore bien tipti. Premier dimoune ki nous vine en contacte au commencement de nous la vie lors la terre c’est nous maman. C’est li ki fine en premier concevoir nous dans li-même, et après fine grandi nous dans so godi, et li fine nourri nous avec so du lait et partage nous bane la joies et la peines. Après vine nous papa ki agir comme ene partenaire pou nous maman dans l’éxécution de tous sa bane obligations là et li prend lors li-même la responsabilité bien lourd de nous l’éducation et pou occupe de tous nous bane besoins essentielles.
Maintenant, li bien impossible pour nous pou retourne nous parents tous bane sacrifices ki zot fine fer pou nous; mais surement, nous sense de gratitude bizin force nous pou respecté et honore zot et fer tous en nous pouvoir pou au moins reconnaite sa bane faveurs et obligations ki zot fine fer pour nous. De ce fait, le Quran Shareef fine dire:
“To Maître fine déclarer: ‘Adore Li tousél, et traite zot parents bien. Si ene de zot, ou bien les deux fine arrive à ene l’âge avancé mot toi, pas cause avec zot avec fierté, pas répousse zot, mais cause avec zot avec respect. Couvert zot avec to les z’ailes, humblement et par pitié, et dire: “O mo Maitre, donne zot To grâce, couma zot ti donne moi des soins kan mo ti petit.” (Bani Israël 17: 24-25)
Nous bien-aimé Prophète (saws) so papa, Abdullah ibn Shaiba ibn Hashim (ra) fine malheureusement quitte sa le monde là avant so naissance, et so maman Amina bint Wahab (ra) fine mort quand li ti encore ene ti zenfant (6 ans). Il pas fine gagne couma bizin l’amour de so bane parents biologiques, mais Allah fine donne li l’amour parental sous la forme de so bane parents adoptifs, bane tels parents, couma Halima Sadiya et so missié Al’-Harith ibn ‘Abdul-’ Uzza. C’était la volonté d’Allah ki le prophète fine bizin subir toutes sortes de souffrances, de douleurs et de privations ki présent dans la vie humaine, afin ki li capave appranne supporte tous sa bane difficultés là avec courage et afin ki Allah élève so statut, ziska la perfection, kot li fine ene exemple parfait pour l’homme.
Malgré la perte de so deux parents à ene l’âge très tendre, mais Allah fine fini prévoir couma Li pou subvenir à so bane besoins, et Li fine faire sa par le moyen d’ene maman adoptif très tendre, ki du moment ki li fine prend li (Hazrat Muhammad (saws)) pou occupé, li fine être témoins de beaucoup de bane miracles. Dans coutume l’Arabie à sa l’époque là, li ti ene pratique courant pour bane mamans donne zot bane zenfants à bane nourrices expérimentés qui vive dans déserts et montagnes afin ki zot z’enfants capave appranne la vie d’ene façon pli bon et kot zot capave gagne bane dispositions et bane connaissances nécessaires jusqu’à séki zot arrive ene certain l’âge. Halima Sadiya au début, pas ti envie occupe ene orphelin, et li ti bizin l’argent. Mais en voyant ki tout so bane camarades fine gagne sakaine ene bébé pou rétourne kot zot pou occupé, alors li pas fine envie retourne la main vide, et alors li fine finalement accepté pou occupe d’ene orphelin, c’est-à-dire, Hazrat Muhammad (saws) et li fine surpris ki tant de miracles fine arrivé dès ki li fine accepté pou occupe de sa nouveau-né là. Dilait fine sorti en abondance pour sa bébé parfait là et ainsi le voyage de bébé Muhammad (saws) fine commencer dans les bras de so maman adoptif, so maman de lait.
Même kan quelques l’années plus tard, sa ti z’enfant là fine retourné à so maman Amina, mais li pas ti loin avant ki so maman Hazrat Amina (ra) mort, et alors li fine placé sous la garde de so Dada Shaiba ibn Hashim, plus connu comme Abdul-Muttallib. Deux ans plus tard, après la mort de so Dada, il fine être confié sous la garde de so Chacha Abu Talib, et en vérité zot aussi, Abu Talib et so madame Fatima bint Asad fine estime sa zenfant là couma zot zenfant et Hazrat Muhammad (saws) aussi fine estime zot couma so parents, et so bane cousins couma so bane frères et sœurs. Mais aussi zamais li fine oublié so maman adoptif, Halima Sadiya.
Le respect et la révérence ki bizin ena envers parents, sa fine bien prend en compte dans la façon ki Hazrat Muhammad (saws) fine traite à la fois so Chacha et so Chachi, et so bane parents de lait aussi. Fine rapporté ki ene fois Halima Sadiya fine vine guette le Prophète. Dès ki li fine trouve li, l’amour fine rempli dans li, et li fine alle vers li et fine crié : « Mo maman, mo maman ! » Et tout de suite, li fine étale so linge et invite so maman adoptif pou assizé.
A propos madame de so Chacha (c’est-à-dire, so Chachi), Hazrat Muhammad (saws) fine li-même dire ki Fatima bint Asad ti so “maman” ki fine laisse so bane propres zenfants attane pendant ki li ti pé fer Hazrat Muhammad (saws) manger, li fine laisse so bane zenfants d’abord dans le froid afin ki li capave habille Hazrat Muhammad (saws) avec bane vêtements chauds en premier, et Hazrat Fatima bint Asad (ra) fine même reste sans manger afin pou nourri so garçon adoptif, Hazrat Muhammad (saws). Li ti parmi bane premier Musulmans ki ti forme partie de la famille du Prophète d’Allah, ki fine accepter so mission comme prophète. Dans ene côté, malgré ki so Chacha Abu Talib fine content et protège so neveu contre toutes sortes kalités persécutions et difficultés, mais Abu Talib pas fine accepter l’unicité d’Allah et l’Islam ; de l’autre côté so maman adoptif, so Chachi Fatima bint Asad ti parmi bane premiers dimounes ki fine croire dans li et fine vine Musulman. Li ti toujours prêt pou aide Hazrat Muhammad (saws) et protège li contre toutes sortes l’attaques et mauvais plans de bane Quraishs. Kan li fine mort, fine rapporté ki Hazrat Muhammad (saws) fine dire : “Mo cher maman, ki Allah garde ou sous So protection. Beaucoup de fois ou fine reste sans manger afin pou nourri moi bien. Ou fine nourri moi, habille moi lors bane bons zaffaires ki ou même ou fine renoncer. Allah pou surement content avec ou bane actions. Et ou l’intentions ti certainement pou recevoir la bonté et le plaisir d’Allah et succès dans Aakhérat.”
Ene l’autre madame ki ti occupe de Hazrat Muhammad (saws) dans so l’enfance c’est Barakah. Li ti servante de Hazrat Amina (ra) et li ti présent pour le prophète d’Allah (saws) depuis so naissance. Kan Halima Sadiya (ra) fine retourne le jeune garçon à so maman, Hazrat Amina bint Wahab (ra) fine gagne ene grand aide avec Barakah pou grandi Hazrat Muhammad (saws). Malheureusement, à cause d’ene la fièvre ki li ti gagner dans Yathrib (Madina) kan li ti alle visite tombe de so missié Abdullah (ra) et aussi pou visite so bane familles ki ti reste dans Madina, en retournant de Madina, en route pour Makkah, Hazrat Amina (ra) fine trouve la mort. Li fine mort dans ene place ki appelle ‘Abwa, et li ti accompagné de so garçon et de Barakah. Alors, à partir de sa jour là, Barakah fine réaliser ki li ena pou occupe de sa zenfant là, et alors li fine amène Hazrat Muhammad (saws) à Makkah, et de ce fait, n’importe kot sa Hazrat Muhammad (saws) ti été, ki li ti avec so Dada Abdul-Muttallib ziska so la mort, ki li ti dans la caze de so Chacha Abu Talib, Barakah zamais ti loin de Hazrat Muhammad (saws). Li et Fatima bint Asad (ra) fine occupe de li couma bane vrais mamans, et le Prophète ti content tous les deux bien beaucoup. Barakah ti bien jeune kan Hazrat Muhammad (saws) ti né, et li ti gagne la bénédiction pou entende bane prophécies de la bouche de bane Juifs de Madina – kan li ti accompagne maman et garçon dans Madina – concernant la venue du Sceau des prophètes parmi bane zenfants de Ismail (as). Li ti témoigne tellement de signes et de manifestations ki li inconcevable pou li, pour pas croire et suivre so garçon “adoptif”, Hazrat Muhammad (saws). Après ki Hazrat Muhammad (saws) fine marié avec Hazrat Khadija (ra), le Prophète d’Allah fine libère li (Barakah). Alors Barakah fine marié avec Ubayd ibn Zayd et zot fine gagne ene garçon ensam ki appelle Ayman. A partir de sa jour là, li fine plus connu comme, Ummé Ayman. Plus tard, so missié et même so garçon fine Shaheed dans bane batailles pour la cause de l’Islam.
Après la mort de so missié, Barakah fine marié avec le fils adoptif de Hazrat Muhammad (saws). Hazrat Zayd bin Harith ti le premier esclave libéré ki fine vine Musulman. Hazrat Muhammad (saws) fine dire ki Barakah li ene parmi bane madame du Paradis, et alors Zayd (avant ki li fer Nikah avec Hazrat Zaynab bint Jahsh) fine marié avec Barakah, et ensam zot fine gagne ene garçon ki appelle Usama bin Zayd. Et sa zenfant là, Hazrat Muhammad (saws) ti ena ene l’amour spéciale pou li.
Alors nous trouver couma Ummé Ayman ti présent depuis la naissance du Prophète d’Allah (saws), et li fine témoigne beaucoup de bane évènements, et aussi la mort de Allah So bien-aimé prophète, ki ti tellement proche de so lékaire. Le Saint Prophète (saws) ti habitué alle fer la sieste dans la caze de Barakah/Umm Ayman et tenir li compagnie. Hazrat Umm Ayman (ra) fine mort dans ene l’âge bien avancé pendant le Khilafat de Hazrat Umar ibn Al-Khattab (ra).
Alors, nous capave clairement concevoir ki kan nous bien-aimé prophète Hazrat Muhammad (saws) fine donne tant d’amour et de respect à sa trois grandes dames exceptionelles là ki fine agir couma so bane mamans adoptifs, alors imagine maintenant ki ki zaffaire li pas ti pou fer pou so propre maman si li ti en vie, si li ti gagne l’opportunité pou profite de so présence pendant so jeune âge, so adolescence et maturité, surtout pendant l’époque ki Allah fine choisir so garçon comme prophète !
Fine rapporté aussi ki ene fois ene madame fine vine vers Hazrat Muhammad (saws) suivi d’ene missié et d’ene jeunesse ; li (saws) fine offert à sa madame là là ene coin de so vêtement ou tapis pou assizé et li fine demande missié là pou assize dans l’autre coin de so vêtement ou tapis. Et kan so lizié fine alle lors sa jeune homme là, li fine deboute et dire : “O mo frère, O mo frère !” et fine fer Musaaffa avec li. Sa bane dimounes là ti en effet Halima Sadiya (ra), so missié et so garçon. Li claire ki Hazrat Muhammad (saws) ti accorde zot le même respect et l’honneur, et le même amour et affection ki ene dimoune ena pou so propre parents et frère. Sa même l’amour fraternel là, li fine accorde sa aussi à bane garçons et filles de so Chacha Abu Talib. Et kan Hazrat Muhammad (saws) ti vine assez grand, c’est Hazrat Muhammad (saws) même ki ti prend la responsabilité de so plus jeune cousin, Ali bin Abu Talib. Alors, depuis ene jeune âge même, Hazrat Muhammad (saws) fine développe ene sentiment pou occupe de bane zenfants et traite zot bien. Li fine fer tout en so pouvoir afin pou véyé à séki bane zenfants zot bien traité, bien nourri et respecté.
L’attachement et l’affection pou nous zenfant li déjà encré dans nous, dans la nature humaine, et le lien de sang attache nous à zot (c’est-à-dire, bane zenfants), après nous lien avec nous bane parents, et sa bane liens là pas capave coupé, à moins ki sa bane créatures d’Allah là zot renié Allah et zot vine bane l’ennemies d’Allah et de So Messager. C’est à ce moment là ki d’après le Quran Shareef, nous priorité avant tout c’est Allah, So Religion et So Messager, mais sa bane dimounes là, nous bizin traite zot dans ene façon cordiale, sans toutefois vine intime avec zot, en donne zot nous l’affection. Le Quran Shareef en vérité dire :
“Vraiment bane ki résister Allah et So Messager, c’est zot ki pou pli dégradé. Allah fine noté : ‘Moi et Mo Messager, c’est nous ki vraiment pou triomphé’, parski Allah fort et puissant. o pas pou trouve dimounes ki ena la foi en Allah et le Jour Dernier prend comme camarade bane ki oppose Allah et so Messager, même si sa bane là zot papa, zot garçons, zot frères, ou bien zot famille. Li (Allah) fine marque la foi dans zot lékaire, et raffermi zot avec ene souffle de Li-même. Li faire zot entre dans bane jardins avec bane la rivière ki couler au milieu. Zot pou reste là-dans toujours. Allah pou satisfait avec zot, et zot pou content Li. Zot formes membres parties Allah. Eski c’est pas membres parties Allah ki pou réussi ?” (Al-Mujadala 58: 21-23).
Le Saint Prophète (saws) et so bane compagnons fine donne nous ene l’exemple bien clair concernant sa. Hazrat Muhammad (saws) ti aussi ene protecteur bien solide de bane droits de bane madames, zenfants et orphelins. Li fine condamne touye bane tifilles, et à travers la volonté d’Allah, li fine la guerre contre sa l’injustice là, sa crime là depuis so jeunesse même. Sa bane dimounes là ti pé prend zot bane tifilles couma bane porte malheurs, bane fardeau et déshonneur. Zot ti penser ki sa pou abaisse zot dignité si zot embrasse so bane jeunes zenfants, zot ti bane dimounes vraiment péna l’intelligence, et dézorienté. Dans l’époque de l’Islam, sa bane commandements d’Allah là fine frappe zot en plein figure couma ene grand calotte :
“Pas touye ou zenfant par peur de la pauvreté. Nous pou donne zot, zot provisions pareil couma Nous donne ou. Touye zot, sa ene grand péché.” (Bani Israël 17: 32).
Sa verset là applique à bane parmi bane Arabes barbares ki sans aucaine pitié ti pé touye bane sa bane zenfants (tifilles) innocents là à cause zot ti honteux de zot naissance, et le fait ki zot fine né filles. Le Saint Prophète Hazrat Muhammad (saws) ti vine comme le libérateur de bane madames et de bane filles et pou ré-établi pou zot, zot bane droits, dès ki zot prend naissance lors sa la terre là.
Li fine dire:
Kan li fine marié avec so premier madame (ki fine plus tard vine so premier disciple) Hazrat Khadija (ra), à l’âge de 25 ans, et fine gagne bane zenfant de li, et là-dans 4 ti bane filles, alors nous bien-aimé prophète Hazrat Muhammad (saws) fine tellement donne zot l’amour paternel et donne zot, zot nécéssité dans bane meilleures façon. So premier zenfant ti so tifille Fatima Zahra, et bien souvent li ti pé réfère à Hazrat Fatima (ra) comme so “lékaire et l’âme”, et li ti traite Hazrat Fatima (ra) so bane garçon, Hassan et Hussein couma so bane propres garçons. Li ti habitué maille zot et embrasse zot lors zot fronts et addresse zot par bane paroles doux, bien-aimé. Ene fois, fine arrivé ki zot (Hassan et Hussein kan zot ti encore zenfant) fine rentre dans Masjid kan li ti pé fer ene Khutba. Du moment ki li fine trouve zot, li fine déssane de Mimbar, fine approche zot, fine prend zot dans so lébras et fine fer zot assize à côté de li. Alors, Hazrat Muhammad (saws) fine démontré au monde ki l’amour pour bane zenfants et pour ou propre zenfants li pas vine au travers de nous dévotion et Ibaadat d’Allah.
Allahummah salli ala Muhammadiw wa ala aali Muhammadin bi adadi kulli zarratim maa’ata alfin alfa marratiw wabaarik wa sallim.
Mo arrête là-même pou mo Khutba azordi lors la vie de nous bien-aimé maître et prophète Hazrat Muhammad (saws). Ki Allah donne sakaine d’ene nous le Tawfiq pou fer pareil couma li et suive so pas afin pou réflecter le vrai Islam dans nous, et tout autour de nous. Insha-Allah, Ameen. |
