Text Box: بسم الله الرحمن الرحيم Khutba Jummah HAZRAT AMIR’UL MUMINEEN MUHYI-UD-DIN Munir Ahmad Azim 25 Janvier 2013 ~ (12 Rabi’ul Awwal 1434 Hijri) (Résumé Khutba) Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire: A travers bane siècles, l’Islam fine recevoir beaucoup éloges et aussi bane critiques concernant bane droits de bane madames dans la société. Bane Européens et l’Ouest en général, surtout azordi jours zot pé fer toutes sortes kalités déclaration ki soi-disant c’est zot ki fine donne bane madames dans le monde zot liberté, ene soi-disant liberté. Zot pé flatte zot-mêmes, et dans zot l’ignorance zot fer bane allégations fausses ki l’Islam réserve ene place inférieur pour la femme et ki li (la femme) li seulement ene esclave au lieu ki li ene égale à l’homme (dans l’Islam). Tandi ki le monde avant l’avènement de l’Islam fine considère bane madames couma ene moin que rien, ene créature ki na pas ena aucaine l’importance, mais avec l’avènement de l’Islam, la femme fine régagne so vrai identité comme ene excellent serviteur d’Allah, et comme ene grand trésor, aide à l’homme et aussi li l’homme so égale. Le Quran dire : « Bane femmes ena les mêmes droits ki (zot mari) ena lors zot, dans ene façon raisonnable. » (Al-Baqara 2: 229). Quran Shareef fine alors donne ene égalité légale à bane madames, bane créatures ki fragile (dans les yeux d’Allah) et le Prophète fine travaille dure pour donne li (la femme) encore plisse l’honneur et dignité, parski li fine dire : « Ene madame li gardien de so (mari so) la caze. » (Bukhari). Allah (twa) dire plus devant dans Quran Shareef : « Parmi So signes : Li fine créer, pou ou, des femmes de ou qualités, pou ki ou vive en tranquillité avec zot, et Li fine mette entre ou l’affection et la bonté. Ena vraiment là-dans des signes pou dimounes ki réfléchi. » (Ar-Rum 30: 22)  Et le Prophète (saws) dire nous dans so propre mots à propos respect ki li ena pour so bane madames : « Le meilleur parmi zot c’est celui ki ena beaucoup respect pour so madame, et moi mo meilleur ki zot tous envers mo bane madames. » Mais le monde Non-Musulman fine toujours persister pou continué calomnié nous Aka, le Saint Prophète de l’Islam, Hazrat Muhammad (saws). Bane pli pire blâmes ki zot fine métté lors li c’est so « désires insatiable » pour bane madames, ki li content et désires bane madames trop beaucoup. Sa étiquette de Séducteur fine tassé lors so lédos, tandi ki en vérité tous so bane mariages fine célébrer d’après bane la lois d’Allah. Insha-Allah, mo espérer réussi dans prouve zot so l’innocence pour sa blâme femmes ki zot fine mette lors li. Insha-Allah, avec l’aide d’Allah, mo mette quelques arguments devant zot ki mo espérer sa pou capave agir comme ene avenue vers la vérité, pou capave fer bane ignorant réalise zot erreur, et ki sa agir comme ene guidance pour bane chercheurs de vérité. La vie du Prophète d’Allah (saws) avant so l’apostolat ti ene la vie ki fine vivre dans le plus grand respect à l’institution du mariage. Malgré ki à sa l’époque là, la fornication et l’adultère ti répanne partout parmi ene l’Arabie barbare, mais malgré sa, le prophète pas fine prend part ditout dans sa bane activités dégoûtant là. Li ti fermement croire dans l’institution du mariage. C’est seulement kan li ti ena 25 ans ki li fine accepter marié avec ene madame, du nom de Khadija (ra) après ki madame là fine propose li le mariage. A sa l’époque là, Hazrat Muhammad (saws) ti pé travaille pour Hazrat Khadija (ra). Hazrat Khadija (ra) ti ene madame d’ene descendance noble et de grand rang, et deux fois li fine vine veuve. Li ti ena approximativement 40 ans au moment de so mariage avec le Prophète d’Allah (saws). A sa l’époque là, Hazrat Muhammad (saws) pas ti encore recevoir de la part d’Allah so mission comme prophète. A sa l’époque là li ti pé travaille pour Hazrat Khadija (ra) parski Hazrat Khadija (ra) ti entende parler couma Hazrat Muhammad (saws) ti ene jeune homme bien honnête. Li fine alors propose li tout d’abord pou vine gérant et en-charge de tous so bane caravanes de commerces, et Hazrat Muhammad (saws) ti accepter avec humilité pou fer sa travail là pou li. A sa l’époque là, bane madames en générale pas ti ena ene grand statut dans la société excepté bane grandes dames de la haute société. Tandis ki bane madames normales pas ti ena droits pou gagne ene bon traitement, l’éducation et bane droits pou hériter, bane parents de bane familles riches et noble zot, zot ti pé élève zot bane tifilles dans le luxe. Hazrat Khadija (ra) ti ene parmi sa bane madames là. Mais seulement, malgré ki li sorti depuis ene famille riche de Quraish, mais seulement li fine conserve ene lékaire pure, et li ti ene aide à tous bane madames et jeunes filles ki ti pé vine vers li pou demande so l’aide. Tandis ki bane les autres madames riches ti pé jouir de zot liberté et grand rang, Hazrat Khadija (ra) li, li ti bien humble et ti pé aide bane les autres. Après la mort de so bane missiés, li ti libre pou dirige li-même so bane propre commerces et tous bane les autres aspects de so la vie, et li ti pé gère tous sa bane responsabilités par li tousél. Li ti bien riche, bien populaire et li ti ena ene très grand commerce. En plisse de sa li ti bien jolie et li ti possède ene nature pure, et c’est pourquoi li ti gagne le titre : « La femme pure » (Tahira). Hazrat Khadija (ra) ti reconnaite en Hazrat Muhammad (saws) la représentation de la bonté, l’honnêteté, la politesse, la justice et source de faveurs divine. C’est Hazrat Khadija (ra) li-même – par l’intermédiaire d’ene l’autre dimoune, so camarade – ki fine envoye ene demande en mariage à Hazrat Muhammad (saws). Si nous guette bien nous trouver ki li, li ti âgé de 40 ans, Hazrat Muhammad (saws) ti ena 25 ans et deux fois li fine vine veuve, et en plus de sa, ena 15 ans différence d’âge entre li et Hazrat Muhammad (saws). Li ti pli grand ki Hazrat Muhammad (saws). Malgré sa grand différence d’âge là, le jeune Hazrat Muhammad (saws) fine accepté sa demande en mariage là et fine marié avec li. Hazrat Muhammad (saws) dès so jeune âge même ti ene époux/mari idéale pou so madame. Li ti prend lors li-même la responsabilité de so la caze et li ti pé prend so madame compte et donne li tous saki li ti pé bizin d’après zot moyens. Kan Hazrat Khadija (ra) so missié, c’est-à-dire, Hazrat Muhammad (saws) ti recevoir l’appel divine pou vine le Prophète d’Allah, Hazrat Khadija (ra) fine gagne la faveur et bénédiction extraordinaire pou vine le premier disciple, support de Hazrat Muhammad (saws) et croyant ferme dans l’unicité d’Allah. Hazrat Muhammad (saws) fine reste avec li ziska so la mort, après 25 ans de mariage. Li ti ene mari rempli de compassion, ki ti facilement comprend so madame et dévoué à li. Hazrat Muhammad (saws) fine gagne avec so mariage avec Hazrat Khadija 6 zenfants, 2 garçons et 4 filles. D’après le décret d’Allah, so bane garçons fine mort en bas âge même. Plus tard, après la mort de Hazrat Khadija (ra), Hazrat Muhammad (saws) fine marié avec d’autres femmes, et envers zot tous li ti montrer même attitude de respect, d’amour et de compassion et zot, en retour ti content li complètement. Maintenant laisse nous analyse bane mariages ki le Saint Prophète (saws) fine fer et kifer li fine bizin fer la polygamie. Durant so la vie mariage avec Hazrat Khadija (ra), Hazrat Muhammad (saws) pas fine marié avec bane les autres madames. C’est seulement après la mort de Hazrat Khadija (ra) ki li fine propose pou marier avec Sawda bint Zama (ra), ene madame dans so 50 ans. Alors, après la mort de Hazrat Khadija (ra), ene madame ki appelle Khawla fine vine au Prophète (saws) et fine suggère li deux noms, kot li capave marié avec zot : Ene ti Sawda bint Zama, et deuxième ti Aisha, la fille de so grand camarade Abu Bakr. Khawla fine penser ki le Saint Prophète (saws) ti bizin ene madame pou ki li capave occupe de so bane zenfants. C’est pourquoi li fine suggère le nom de Sawda, ki li-même ti ene madame veuve et fine bizin retourne dans la caze so parents. Après beaucoup de réflexion et de duahs, le Prophète fine accepter pou permette Khawla pou alle demande la main de Sawda en mariage en son nom. Hazrat Sawda (ra) ti bien content avec sa proposition de mariage là et alors li fine accepter pou marié avec le Saint Prophète (saws). Kan à Aisha, ena plusieurs raison kifer Hazrat Muhammad (saws), kot li ti vine ene grand confort pour le prophète (saws). En premier lieu, bien avant ki Hazrat Khawla propose le nom de Hazrat Aisha au prophète, Hazrat Muhammad (saws) ti fini trouve deux fois dans so rêves ki ene ange (Hazrat Jibrail (as)) fine vine vers li et li ti ena ene mouchoir dans so la main, et li fine ordonne Hazrat Muhammad (saws) pou découvert saki ena dans sa mouchoir là. Alors, après ki li fine soulève sa mouchoir là, le Prophète (saws) fine trouve l’image de Aisha, et ene deuxième fois, ange là ti dire li kan li trouve Hazrat Aisha ki Aisha li so madame, lors sa la terre là et dans Aakhérat. Alors, le prophète (saws) fine comprend ki sa c’est ene commandement divine ki pé dicté li pou marié avec sa jeune vierge là. En plisse de sa, Hazrat Aisha (ra) ti la fille de so grand camarade, Abu Bakr. En mariant avec Aisha (ra), Hazrat Muhammad (saws) fine renforci sa lien de camaraderie là en entrant dans la famille de so grand camarade, et Abu Bakr fine privilégié pou vine le beau-père du Prophète d’Allah (saws). Hazrat Aisha (ra) avant so mariage avec Hazrat Muhammad (saws) ti fiancé avec ene l’autre missié. Sa missié là (et so la famille) fine casse sa fiançailles là parski zot ti peur ki garçon là après so mariage avec Hazrat Aisha (ra) li alle influencer par so madame et vine musulman. Alors après ki sa missié là fine casse sa fiançailles là, alors Hazrat Abu Bakr (ra) fine capave marié so tifille avec le Prophète (saws). Alors nous trouver ki bane jeunes filles, même dans ene l’âge bien tendre ti pé fini fiancé, et ki zot jeune âge pas ti ene obstacle pour le mariage dans la société Arabe de sa l’époque là, parski zot ti précoce pou zot l’âge. De ce fait, le Nikah ti prononcé entre Hazrat Aisha et le prophète (saws), dans même période ki le prophète (saws) fine marié avec Sawda. Mais Aisha (ra) pas fine alle reste avec le prophète (saws) tout de suite. C’est seulement après ans ki zot fine consomme zot mariage (dans Madina). Hazrat Aisha (ra) ti ene tifille bien intelligente. Kan li fine marié avec li, le prophète (saws) fine amène dans so la caze l’éducatrice par excellence de l’Oummah Muhammadiyya (saws). Hazrat Aisha (ra) ti appranne tous bane l’enseignements islamiques directement de so bien-aimé époux, Hazrat Muhammad (saws). Li ti ena la faculté pou retenir tous bane leçons afin ki plus tard li capave enseigne bane dimounes ki vine cherche la guidance vers la droiture et couma pou vive zot la vie. En plisse de sa, kan li fine marié avec ene vierge à ene l’âge mûre : 54 ans, Hazrat Muhammad (saws) fine démontré ki Hazrat Aisha (ra) li pas ti seulement ene épouse de nom seulement, mais li ti le bien-aimé de bien-aimé d’Allah et sa fine fer Hazrat Aisha (ra) réalisé ki li pas fine seulement gagne ene mari dans le Saint Prophète (saws), mais ene quelqu’un ki li capave content et honoré de tout cœur. Couma mo fine dire, au moment de so mariage avec Hazrat Aisha (ra), Hazrat Muhammad (saws) ti fini dépasse la cinquantaine. Après so mariage avec Aisha et Sawda, le prophète (saws) fine fer Nikah avec bane les autres madames, surtout en période de guerre, kot beaucoup de bane madames ti vine veuves, et bane les autres ti vine captives. En mariant avec bane veuves, le prophète (saws) fine capave donne zot ene toit pou rester, pou zot et zot zenfants. En mariant avec bane captives, spécialement bane tifilles de bane chefs de tribus, le prophète (saws) fine capave ré-donne à sa bane madames là zot dignité ki zot ti habitué jouir en tant ki bane familles respectables de zot communautés. Kan Hazrat Muhammad (saws) fine offert zot le mariage et fine invite zot vers l’Islam en même temps, alors li fine capave renforci bane liens avec bane tribus de so bane épouses et par la grâce d’Allah, li fine réussi amène zot pou reconnaite la véracité de l’Islam et accepter sa la religion de vérité là, ene religion ki pas force personne pou accepter li, mais ki dimoune intégrer li par zot propre volonté. Allah dire dans Quran : « Pena aucaine contrainte dans la religion ... » (2: 257). Sa veut dire ki, kan Hazrat Muhammad (saws) fine invite sa bane madames captives là vers l’Islam, alors zot fine accepter de zot propre volonté, et zot fine donne zot consentement pou vine bane madames du Saint Prophète de l’Islam (saws). En mariant avec ene esclave, dans sa cas là, ene Juive du nom de Maria (ra), le Prophète (saws) fine capave rédonne zot dignité à bane madames esclaves. Sa madame là fine même donne li ene ti garçon ki appelle Ibrahim, mais ki malheureusement, et Allah conne mieux, li fine mort quelques mois après so naissance. En mariant avec sa bane madames là, le prophète (saws) fine fer justice à la femme musulmane, ki li aussi ena ene droit dans la société, ene dignité pou li-même. A sa l’époque là, même bane l’ennemies de l’Islam pas ti pointe zot lédoigts lors bane mariages ki le prophète (sas) fine fer avec plusieurs bane madames, parski ti la coutume dans l’Arabie pou pratique la polygamie, mais seulement tandis ki bane Arabes barbares ti pé pratique li dans ene façon ki pas bizin, Hazrat Muhammad (saws) fine enseigne zot, et le monde en générale couma pou vivre dans bane mariages polygame. Et tous so bane mariages aussi ti d’après bane l’enseignements de l’Islam, et après ki Allah fine donne So prophète (saws) la permission pou marié avec sa bane madames – plisse ki quatres à la fois (pour le prophète). Ene faveur et instruction d’Allah Ta’ala ! Allah dire dans Quran Shareef : « O Prophète! Nous fine rende légale pou toi to bane femmes à ki to fine donne zot Mahr, to bane esclaves ki Allah fine donne toi comme butins la guerre, tifilles to chacha to mamou to calou to poupa ki ti exile zot ensam avec toi, aussi bien ki tout femme croyant ki offert li-même au Prophète, si le Prophète accepter marier li. Sa, ene privilège spéciale pou toi, pas pou les autres croyants – Nous surement conner ki la loi Nous fine faire pou zot, à propos zot épouses et zot esclaves – afin ki pas ena aucaine reproche lors toi. Allah pardonner et gracier. » (Al-Ahzab 33: 51) Bane prophètes avant l’avènement de Hazrat Muhammad (saws) aussi ti ena plusieurs madames. Ene exemple c’est Hazrat Ibrahim (as) ki ti marié avec Sara et ensuite Hajra (ra) par instruction divine. Eski tout sa bane prophètes là ti bane z’hommes ki attirer par zot bane passions charnel ? Ou eski zot fine marié avec bane madames seulement pou donne zot refuge à zot et aussi à zot bane zenfants, et afin ki sa bane madames là zot vine bane grand aides pou zot afin ki zot capave entraîne bane madames – dans sakaine zot l’époques – surtout concernant la religion d’Allah ? La vérité fine fer surface à travers bane l’enseignements du Quran Shareef ki fine continuer efface bane blâmes ki bane dimounes fine metté lors le Saint Prophète Hazrat Muhammad (saws), spécialement concernant so mariage avec ene jeune vierge Hazrat Aisha (ra) et Hazrat Zainab (ra), ki li la femme divorcé de so fils adoptif. Hazrat Zaid (ra) ti divorce avec li, à cause incompabilité ki ti ena entre zot, kot Hazrat Zaid (ra) ti ene esclave libéré, tandis ki Hazrat Zainab (ra) ti ene femme libre. Zot mariage pas fine marché. Allah dire dans Quran Shareef : « Rapplez. To ti dire à quelqu’un (Zaid), à ki Allah ti fine faire des faveurs, et toi aussi to ti fine fer li du bien : ‘Garde to femme et suive chemin Allah’. To ti cassiette en toi-même séki Allah pou divulguer. To ti peur dimoune, mais Allah pli mérite to la peur. Kan Zaid ti fine décide arrête tout relation avec li, Nous ti marier li avec toi, afin ki bane croyants pas trouve aucaine empêchement pou marier femmes zot beau-fils, après ki zot arrête gagne relations. Commandement Allah bizin exécuté. » (Al-Ahzab 33: 39) De ce fait, li clair ki le Prophète Hazrat Muhammad (saws) fine marié avec plusieurs épouses, sois à cause l’instruction divine et ou sois miséricorde pou zot, afin pou donne zot ene statut et l’honneur dans la société. Tous bane madames du Saint Prophète (saws) fine être adresser dans Quran Shareef comme bane mamans de bane croyants – le pli grand rang ki très peu de femmes capave gagner dans l’estimation de l’Islam ! « Le prophète mérite plus considération bane croyants ki entre zot-mêmes, et so bane femmes, (c’est) zot mamans... » (Al-Ahzab 33: 7) Bane l’ennemies de l’Islam, sois par la haine ou en baze zot jugement lors zot bane propre nature pervers, zot capave colle sa étiquette de content femmes là lors Hazrat Muhammad (saws) zis à cause li ti ena plusieurs madames, et ki li fine marié avec ene fille vierge à ene l’âge avancé. Mais, mo mette sa devant zot, ki Nawzobillah, si ti ena le moindre vérité dans sa bane accusations dégoûtant là, alors kifer Hazrat Muhammad (saws) ti pé passe so bane la nuits lors so Mussalla ki bien dure, en recherchant communication avec so Rab, au lieu dormi en compagnie de so bane épouses dans so confort ? – Sa li ene fait établi, sans aucaine doute ki Hazrat Muhammad (saws) ti pé passe la plupart de so bane la nuites dans Ibaadat. Mo arrête là-même pou astère là. Insha-Allah, mo pou continuer cause lors bane l’aspé de la vie de nous bien-aimé prophète Muhammad (saws) tout à l’heure dans nous programme spéciale « Seerat-un-Nabi ». Insha-Allah. Ki la paix et la bénédictions d’Allah lors le plus noble de bane prophètes, Hazrat Muhammad (saws), la Lumière parmi tous bane les autres la lumières, parmi bane serviteurs et messagers fortuné d’Allah. Ameen ! Annonce : Hazrat Khalifatullah (atba) fine cause lors le Leader de l’Opposition, L’Honorable Paul Raymond Bérenger, ene vrai politicien très respectable ki fine lutter depuis so jeune âge pour le progrès de Maurice. Azordi, tandis ki bane les autres dimounes cachiette zot bane maladies, L’honorable Paul Bérenger fine mette so maladie au clair devant le public Mauricien et li pou bizin alle fer ene l’opération bientôt. Hazrat Khalifatullah (atba), fine dire ki tout trouve dans la main d’Allah. La vie et la mort trouve dans So la main, mais seulement nous bizin fer duah pou ene humble serviteur d’Allah, ki Allah fer ene miracle concernant so maladie. Mais n’importe ki situation arriver, nous bizin fer louanges d’Allah Insha-Allah, Ameen.