Text Box: بسم الله الرحمن الرحيم Khutba Jummah HADHRAT AMIR’UL MUMINEEN MUHYI-UD-DIN Munir Ahmad Azim 26 Avril 2013 ~ (15 Jamad’ul Aakhir 1434 Hijri) (Résumé Khutba) Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire: وَلَقَدْجَاءَهُمْ رَسُولٌ مِنْهُمْ فَكَذَّبُوهُ فَأَخَذَهُمُ الْعَذَابُ وَهُمْ ظَالِمُونَ Wa laqad jaaa’-ahum Rasuulum-minhum fa-kazzabuuhu fa-’akhazahumul-’azaa-bu wa hum zaalimuun. « Ene messager, ene de zot banne même, ti arrive parmi zot mais zot ti repousse li. Alor punition fine maille zot pendant ki zot ti pé fer ditort. » (16: 114) Allah zamais laisse So création sans ene Prophète ou ene Messager ki Li choisir, ou ene Livre ki Li envoyer ou n’importe ki volonté ki Li envie envoye lors la terre comme ene signe pou fer so puissance ressenti et respecté. Allah envoye bane prophètes de temps en temps, et zot gagne bane épreuves et aussi bane récompenses. Et zot accompagner de zot groupes de bane croyants, mais d’après Hadith ki mo pou cité devant zot, pas tout prophètes fine gagne même kantité de bane croyants, de bane disciples. Ibn Abbas rapporté ki Hazrat Muhammad (saws) fine dire : « Fine montrer moi plusieurs peuples. Mo fine trouve ene prophète ki ti ena seulement ene ti groupe (de croyants) avec li, ena prophètes ki ti ena seulement ene ou deux dimounes avec zot et ena ki pas ti ena même ene sel ! (zéro disciple)... » (Bukhari & Muslim) Alors, d’après sa Hadith là, c’est pas vraiment le nombre de bane croyants ki établir la véracité d’ene prophète ou messager d’Allah. Dimounes croire na pas croire, mais bane prophètes et messagers d’Allah zot ena seulement pou répanne le message de l’unicité d’Allah et donne bon nouvelle si bane dimounes zot gagne la foi et réforme zot la vie en accord avec bane guidances ki fine établir par Allah, ou sois zot bizin donne avertissement à sa bane dimounes là ki zot tourne les dos avec bane signes et messagers d’Allah. Bane messagers zot ene tel kalité ki zot pas senti zot tipti ou rabaissé à cause ti nombre de bane croyants ki entoure li ou sois li pas laisse li abatte à cause grand masse de zot bane opposants ki fer la tête-lipié pou traite li et so message comme ene mensonge dans lizié dimounes. Parmi bane messagers avant l’avènement du Saint Prophète Hazrat Muhammad (saws) ti ena ene prédéssésseur, ene prophète avant li (sa prophète là) ki ti habitué fini dire, annonce la bonne nouvelle d’ene lotte messager ki pou vini après li, ou ti ena ene suivant de celui ki fine vini avant li là ki fine fini annonce so venue, kot ene prophète suive lotte prophète et zot pas en désaccord avec saki Allah fine donne zot pour donne zot bane peuples. Bane dimounes fine depuis des années analyze signification du mot « Nabi » et « Rassool » et zot fine fer plusieurs déba lor là. Ki différence de baze ena entre ene Prophète (Nabi) et ene Messager (Rasool) d’Allah ? Malgré ki tous les deux statuts zot profondémment encré dans faveurs d’Allah et So volonté, alors ene prophète (Nabi) li celui ki Allah envoyer à so nation, so pays ou ene pays avoisinnant avec le but pou donne le message d’Allah à sa bane dimounes là. Li ena le devoir pou donne bane messages d’Allah afin ki bane dimounes capave averti avant ki prophécie ki li prononcé au nom d’Allah abatte lors zot. Li recevoir bane révélations dans plusieurs façons : rêve, visions, li entende ene la voix et li trouve bane anges d’Allah dans ene l’état éveillé. En d’autres mots, tous sa kalité là, li partage sa avec ene Messager (Rassool) d’Allah, avec la différence ki so message ki limité à seulement ene nombre de bane dimounes, par example, so peuple, vers ki Allah fine envoye li. Toutefois, ene Messager d’Allah li celui au nom de qui Allah fer So message passer dans le monde, même si sa prend lé temps, kot sa prend même des siècles et des siècles. Beaucoup prophètes fine mentionner dans Quran Shareef comme étant tous les deux, prophète et messager d’Allah. Si nous prend Hazrat Issa (as) par exemple, nous trouver ki li ti ene Messie, ene Prophète et ene Messager, et malgré sa Allah fine envoye li seulement à bane zenfants d’Israël. Mais seulement, en même temps, Allah mentionné dans le Quran dans Surah Al-Anbiya ki Li fine faire Hazrat Issa (as) et so maman vine ene signe pou tout l’univers (Ayatal’lil-Aalameen). Si nous analyse l’étendu de message de sa messie ki fine vine complète la loi de Hazrat Moosa (as) là, alors nous trouver ki azordi jour, après des siècles, la Chrétienneté fine ena ene l’impacte globale, mais malheureusement, avec le temps, sa message pure ki Hazrat Issa (as) ti amener là fine perdi. La trinité fine prend place parmi bane Chrétiens au lieu de la foi de Jésus (as) dans l’unicité d’Allah. Alors nous trouver couma message de Hazrat Issa (as) ti réserver seulement pour bane Juifs, et non pour le monde. Par contre, so renommé comme étant ene signe exceptionelle d’Allah kot li fine né sans l’intermédiaire d’ene papa, c’est sa ki Allah fine garde profondémment encré dans l’esprit et le cœur de bane vrai croyant afin ki bane dimounes pas tourne les dos avec Allah So bane décret, et c’est sa même prophète là, c’est-à-dire, Hazrat Issa (as) ki ti le dernier Messager d’Allah avant la venue de Hazrat Muhammad (saws). C’est li en tant que Messager d’Allah ki fine annonce la venue de « Ahmad ». Si nous guette Rissalat (mission de messager) de Hazrat Ibrahim (as) et de so garçon Hazrat Ismail (as) couma mentionner dans Quran, alors nous trouver couma zot Rissalat fine porte so fruit dans la venue de Hazrat Muhammad (saws) beaucoup plus tard. Le vrai message ki Allah fine donne au commencement à Hazrat Ibrahim (as) et Ismail (as) alors fine accomplir dans ene sense globale à travers l’aspé universelle de message ki Hazrat Muhammad (saws) fine amené. Dans sa façon là, plusieurs l’années fine passé, et tandis ki bane papa fine mort, zot bane garçons fine prend le relai ziska Allah fine choisir Hazrat Muhammad (saws) comme So prophète et messager (Nabi & Rasul) en accomplissement de So promesse et comme ene marque de la perfection ki le stage de Nabuwwat capave arriver en so personne. Dans le Quran Shareef Allah mentionner : « Rapplez, Allah ti fer bane prophètes (Nabi) prend sa l’engagement là : N’importe ki livre et sagesse ki Mo donne ou, et ensuite ene Messager (Rasul) arrive parmi ou pour confirme message ki ou posséder déjà, ou bizin croire en li et aide li. » Allah fine demander : « Eski ou confirme sa et prend charge avec Moi pou faire sa ? » Zot fine dire alors : « Nous accepter. » Allah dire alors : « Ou diboute témoins, et Moi aussi Mo vine témoin ensam avec ou. » (Al-Imran 3 : 82) Alors nous trouver couma bane prophètes fine fer sa l’engagement là, et nous remarquer ki Allah fine mentionne Rasul comme étant bane ki pou confirme l’un à l’autre. Sa bane prophètes et messagers là, bane ki ena tous les deux grades zot fine prend l’engagements pou reconnaite pas seulement bane ki pou vini juste après zot, mais zot tous fine prend l’engagement pou fer zot bane peuples attane , reconnaite et croire dans Hazrat Muhammad (saws), dans traits de so caractère excellent et dans so naissance ki ti pou ene naissance bien honorable. Dans so l’époque bane dimounes dans le monde ti divisé en plusieurs différents groupes, zot bane buts, zot bane missions ti séparer et sakaine ti prend ene chemin différent. Zot fine sans aucaine hésitation prend bane créations d’Allah dans même grade ki Allah et zot fine tourne enba là-haut So bane attributs et fer sa vine plusieurs dieux, ou sois zot ti pé prend bane les autres kalité idoles pou adorer au lieu d’Allah. A travers Hazrat Muhammad (saws), Allah fine guide zot pou sorti de bane mauvais chemins et avec so zéfforts, fine tire zot de l’ignorance. Alors, Hazrat Muhammad (saws) ti vine pas seulement pour l’Arabie, so propre nation, mais aussi pour toute l’humanité, parski so message li addressé à tous dimounes, pas zis dans l’Arabie, pas zis dans le monde dans l’époque ki li ti pé vivre, mais so message li ene message pour tous bane dimounes, pour tous bane l’époques ziska le jour du jugement. Li fine complète l’essence de la prophécie (Nabuwwat) et l’apostola (Rissalat), et alors tous bane prophètes ki pou vini après li pou vine de li-même, de so Ummah, zot pou ena sa tré là aussi, kot zot aussi zot pou de caractère universelle et zot message aussi pou universelle. Le message de Jésus ti seulement pour bane zenfants d’Israël, et sa message là ti ena pou reste vivant ziska ki celui ki so la venue li (c’est-à-dire, Jésus) fine prophétizé (c’est-à-dire, la venue de Ahmad, Hazrat Muhammad (saws)) li réalisé. Juifs et Chrétiens dans l’époque avant la proclamation de Hazrat Muhammad (saws) ti à la recherche de sa prophète sanctifié là, sa prophète promis là ki pou en même temps le sceau de tous bane prophètes, ki so l’avènement pour ene bénédictions pour toute l’humanité. Même le dernier livre porteur de loi, le Quran Shareef li addresse l’humanité directement, comparé avec les autres livres sacrés ki ti vini seulement pour bane dimounes de sa bane l’époques kot zot ti révélé là. La religion de bane messagers d’Allah fine survivre en Islam, le dernier religion ki universelle, et c’est dans ventre de l’Islam même ki bane future prophètes et messagers d’Allah pou né pour la réforme de bane dimounes kot zot pou servi bane la lois du Quran Shareef même pou amène sa réforme là. Alors nous capave conclure ki tous bane prophètes (Nabi) ki ti envoyé par Allah comme messagers (Rassool) aussi c’est sa bane là ki fine clairement fer bane prophécie et informe zot bane peuples à propos de la venue de sa prophète et messager d’Allah parfait là, au nom de qui Allah pou sauve l’humanité. En plisse de fer bane dimounes tourne vers ene sel Dieu, sa bane prophètes et messagers d’Allah là ti ena le devoir pou informé ki à certain l’époque, ene tel dimoune pou vini dans manteau de tous bane prophètes, et li pou vini avec dignité et pureté de la volonté d’Allah. Et zot fine informer ki sa dimoune là li pou aussi ene messager, kot, kan dimounes pou ferme la porte de bane prophètes et de bane messagers d’Allah, alors pou ena parmi so bane suivants bane ki Allah pou élévé pou confirme so véracité et pou témoigne de so perfection ziska le Jour Qayamat. C’est pour sa ki li nécessaire ki tous bane prophètes d’Allah ki vini après li zot bane Rasool aussi, parski zot bane croyants et confirmateurs de so véracité, tandis ki bane prophètes ki fine vini avant li, ti bane ki fine apporte la bonne nouvelle de so l’arrivée et fine croire dans li même si li pas ti même parmi zot. Fine rapporté ki le Saint Prophète Hazrat Muhammad (saws) fine dire : « Si Moosa ou Issa ti vivant, zot ti pou bizin suive moi. » (Al-Yawaqit wal-Jawahir, p.24; Fath al-Bayan, Vol. 2, p. 246; Tafsir Ibn Kathir, sous Verset 81 de Al-Imran) Sa montrer couma le statut de messager de Hazrat Muhammad (saws) li dépasse statut de bane prophètes avant li, et alors li également vrai aussi pour tous bane prophètes ki pou vine après li, après so la mort. Sa bane prophètes pou bane garants de so Nabuwwat et zot pou bane gardiens de l’Islam et protecteurs de so l’honneur. En plisse de sa, dans même Hadith ki mo ti explique zot au commencement de mo Khutba, le Saint Prophète Hazrat Muhammad (saws) fine trouve so bane suivants comme ene bien grand nombres – pli beaucoup ki même pou Hazrat Moosa (as) – et parmi sa grand nombre là, pou ena 70,000 ki pou rentre dans Paradis sans rende compte pour zot bane actions. Ki sa bane dimounes là alors ? Kifer zot pou rentre dans Paradis sans rende compte ou sans souffrances ? Surah Al-Wakia, Chapitre 56 du Quran Shareef donne nous ene l’idée de kifer sa été. Allah classifié bane dimounes dans trois catégories différents : bane ki dans la main droite, bane ki dans la main gauche et bane rapproché avec Allah. Bane degrés de rapprochement avec Allah li inclure Nabuwwat et alors parmi sa 70,000 dimounes ki pou rentre dans Paradis sans rende aucaine compte pou ena parmi, bane premiers disciples sincères de bane prophètes ki pou vini dans l’Oummah de Hazrat Muhammad (saws), bane ki pou reste fidèle à zot l’engagement avec Allah, So prophète Hazrat Muhammad (saws) et sa prophète ki Allah pou envoyer parmi zot dans zot siècle ki pou ene suivant de Hazrat Muhammad (saws), bane ki reste sincère arrive séki arrive avec pacte ki zot fine fer avec Allah, bane ki accepter passe par toute sortes kalités difé, toutes sorte kalité épreuves afin ki zot valaire, zot courage li reconnu parmi bane dimounes honorable et pli proche d’Allah. Dans l’époque de Hazrat Muhammad (saws), ti ena ene so disciple, Ukasha ibn Muhsin ki ti le premier de bane disciples ki fine demande le prophète d’Allah (saws) pou prier pou li afin ki li vine ene parmi sa 70000 dimounes exceptionnelles là, et alors le prophète d’Allah (saws) fine annonce li ki li pou parmi sa bane dimounes là. Sa montrer nous ki de parmi sakaine de bane groupes Musulmans dans sak l’époque, n’importe kan Allah pou choisir pou envoye ene prophète, Li pou fer li en prenant en considération le Nabuwwat de Hazrat Muhammad (saws), parski sa en vérité li ene pacte éternelle entre l’homme (la race humaine) et Allah, c’est-à-dire, l’Islam. Sans l’Islam, et sans croyance dans le Saint Prophète Hazrat Muhammad (saws), personne pas pou capave vine ene prophète d’Allah, et pareillement maintenant, sak prophète bizin confirme so camarade sous bannière de l’Islam. Mo fine vini de Allah, ki li en tant ki ene suivant de Hazrat Muhammad (saws) et comme ene croyant dans le Messie Promis Hazrat Mirza Ghulam Ahmad (as). Li ti aussi ene prophète d’Allah ki ti en même temps ene suivant de Hazrat Muhammad (saws), et moi mo fine vini dans manteau de sa bane grand dimounes ki fine marque l’histoire de l’humanité là avec le sceau de l’amour divine. De parmi bane zenfants de Adam, Allah fine choisir bane prophètes et bane messagers et pareil couma mo fine dire zot talère là, Allah fine prend de zot ene l’engagement pou fer passe So révélation et pou passe So message et sa c’est ene dépôt ki zot ti recevoir de côté d’Allah. Avec létemps bane dimounes fine détourne dépôts ki Allah ti confié zot et zot fine ignore So position et zot fine associé bane partenaires avec Li dans So l’adoration, ou zot fine carrément délaisse Li pou adore les autres. Couma li fine promette Allah et par permission ki Allah fine donne li, Shaytane fine détourne sa bane dimounes là de Allah, pou zot pas conne Allah et Shaytane fine fer zot vine indifférent à l’adoration d’Allah, excepté quelques-uns. Ensuite Allah envoye So bane messagers et plusieurs de So bane prophètes à zot pou encourage zot pou rempli zot l’engagement, et pou fer zot mazine faveurs ki Allah fine fer lors zot, et pou donne zot le message en prêchant, afin pou découvert devant zot bane vertu caché de la sagesse et montré zot bane signes de So toute puissance, en l’occurrence, sa léciel ki Allah fine élévé là-haut zot la tête là, sa la terre ki Allah fine placé sous zot lipié là, bane moyens de subsistance ki Allah accorde zot, bane la morts ki Allah fer zot goûter, bane maladies ki fer zot vine vieux et bane incidents ki arrive zot dans zot la vie de tous les jours. Li fine aussi envoye So bane prophètes pou donne bane bon nouvelles ki zot pou gagne le salut ou sois pou averti zot contre So punition afin ki bane ki mort dans dézobéissance zot alle mort en réalizant zot bane erreurs et ki zot pas capave gagne aucaine arguments après ki zot gagne défaite dans zot zéffort pou réduire la vérité en poussière et fer li vine inservable. Alors, l’état lé monde azordi jour li bien déplorable. Sak jour apporte nouvelle de bane nouvo catastrophes ki pé fini sa le monde là. Dans bane premiers jour d’Avril (1-3 Avril), fine ena plusieurs innondations bien catastrophiques à cause gros la pluie ki fine tombé dans l’Argentine, et sa l’innondation là fine fer plisse ki 60 morts, plus particulièrement dans Buéno z’aires. Là-bas, plisse ki 250,000 dimounes ti privé de courant et fine ena bane grand étendus ki ti couvert enba de l’eau. Tout dernièrement, la semaine dernière pendant week-end 20 Avril 2013, ene tremblement de terre de Magnitude 7 fine frappe Sud-Ouest la Chine, kot même l’endroit ki ene lotte tremblement de terre ti frappé 5 ans de cela et ki ti fer approximativement 70,000 morts. Cette fois-ci, le taux de bane morts fine arrive 193, avec des milliers de bane dimounes bléssé et bane les autres fine bizin quitte zot l’endroit à cause sa tremblement de terre là fine détruire bane bâtiments et plusieurs la caze. Zot ti privé d’électricité aussi. Après sa tremblement de terre là, fine ena plusieurs lézot ti-tremblement de terre, ene après lotte, et fine ena bane glissement de terrain. Le 24 Avril 2013, ene bâtiment de huit l’étages kot ena plusieurs l’usines textiles et ene centre commercial fine effondrés à la périphérie dans bord capitale de Bangladesh, dans l’Inde, kot plisse ki 70 dimounes fine mort. Sa z’image de sa destruction là ti ressemblé destruction après ene tremblement de terre. Beaucoup de bane dimounes fine tassé dans bane bâtiments et ti nécissite sauvetaze. Sa c’est seulement en bref quelques-uns de bane calamités ki pé frappe le monde presque tous les jours. Kan ene malheur frappé quelque part, alors le lendemain, li abatte lors ene l’autre l’endroit ou pays, et sa continuer aller même coumsa. Si bane dimounes pas rende zot compte de zot erreur et d’analyse sa manquement ki ena dans zot la foi là et si zot pas tourne vers l’adoration d’ene sel Dieu, Allah (swt), alors pou ena encore plisse calamité ki pou frappé. Allah oulé ene ene nouvo monde pour So bane serviteurs dévoué. Si li oulé, li capave fer plusieurs mort et remplace zot par bane ki pou sincères envers Li. Bane plans d’Allah toujours parfait, mais c’est nous l’homme, avec so connaissance bien limité, et avec voile dans nous lizié, ki refuse comprend bane pouvoirs de sa Créateur, à Qui nous tout appartenir. Ki Allah enlève de bane dimounes bane voiles de l’ignorance, donne zot perspicacité spirituelle et ki Allah montrer le chemin à bane chercheurs de vérité, réforme bane ki ena ene Imaan faible et ki Allah béni pleinement bane excellents croyants ki fine dévoués zot corps et âme pour la cause d’Allah de sorte ki bane signes d’Allah, et la véracité du Saint Prophète Muhammad (saws) reconnu et accepté par tout dimounes. Insha-Allah, Ameen.