بسم الله الرحمن الرحيم

 

 

Khutba Eid-ul-Adha

 

HADHRAT AMIR’UL MUMINEEN MUHYI-UD-DIN

 

Munir Ahmad Azim

 

05 Octobre 2014

(10 Dhul-Hijjah 1435 Hijri)

 

 

(Résumé Khutba Eid)

 

 

Eid Mubarak !

 

 

Après ki li fine souhaite « Assalamoualaikum Warahmatullah Wabarakaatouhou » et EID MUBARAK à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Khalifatullah (atba) fine commence so Khutba Eid avec Tashahhud, Ta’uz, Surah Al Fatiha, Surah Al-Imran (Ch.3) Verset 96 ; et ensuite li fine dire:

 

 

 

 

 

 

 

قُلْ صَدَقَ اللّهُ فَاتَّبِعُواْ مِلَّةَ إِبْرَاهِيمَ حَنِيفًا وَمَا كَانَ مِنَ الْمُشْرِكِينَ ۝

Qul sadaqallaah: fattabi-‘uu Millata ‘Ibrahiima haniifaa; wa maa kaana minal-mushrikiin.

« Dire zot : ‘Allah fine dire la vérité ; suive la religion d’Ibrahim, ki ti toujours pencher vers Allah, li pas ti parmi bane ki associer bane faux dieux à Allah.’ ». (Al-Imran 3: 96)

 

Le Khutba Eid ki mo pou faire azordi kot, mo espérer ki chaque membres du Jamaat Ul Sahih Al Islam gagne l’occasion réfléchi ene tiguitte lors sa soumission et sacrifices ki Hazrat Ibrahim (as) fine montrer là. Et guette aussi couma Allah fine accepter sa et fine récompense li. De la même façon chaque madame bizin réfléchi lors sa qualités soumission et sacrifice ki Hazrat Hajra fine montrer. Tous sa là ti juste pou la cause d’Allah et Allah pas fine laisse li perdi. Bane z’enfants aussi bizin mazine sa soumission totale de Hazrat Ismael (as) là et aussi Allah fine honore li pou tout le temps. Donc, bane sacrifices ki faire sincèrement dans le chemin d’Allah zamais pas pou perdi. Azordi quand même ou pé faire Qurbani, ou bizin maziné ki Allah pas pé guette la viande ou di sang seulement mais aussi qualité de ou bane sacrifices; c’est ki Allah guetter c’est ou le cœur, ou l’intention et ou sincérité. Sa même tout.

 

Mo faire duah à Allah ki Li accorde moi aussi et nous tous ensemble sa vrai l’esprit de sacrifice là et ki quand nous faire quique sacrifice, ki Allah accepter li. Donc, couma zot fine tender après Surah Al-Fatiha mo fine récite ene verset dans Surah Al-Imran, Verset 96 kot Allah dire :

 

« Dire zot : ‘Allah fine dire la vérité ; suive la religion d’Ibrahim, ki ti toujours pencher vers Allah, li pas ti parmi bane ki associer bane faux dieux à Allah.’ ». (Al-Imran 3: 96)

 

L’attribut fondamental de Hazrat Ibrahim c’était Ibrahim le Hanif, c'est-à-dire toujours penché vers Allah. Li ti pou tombe devant Celui ki li ti pé toujours pencher là même (c’est-à-dire, devant Allah tousél). Donc même, si jamais li ti pou faire erreur aussi, bé li ti pé penche toujours vers Allah même. Li pas ti penche vers personne d’autre ki Allah. Donc l’attribut central pou li c’était Ibrahim le Hanif.

 

Fine dire faire sa place Ibrahim là vine ene ‘Mussalla’ (place pour faire Namaz). Sa c’est so traduction littérale; par erreur bane dimounes croire ki kot Hazrat Ibrahim (as) ti pé faire Namaz là, bizin faire Namaz dans sa place là même. Et là-bas comme ene symbole fine faire deux marques li pieds lors ene roche. Et sa pas capave le pas de Hazrat Ibrahim (as) du tout, parcequi premièrement li bien grand, et deuxièmement pou ou déboute lors ene roche d’ene tel façon ki ou enfonce ou marque li pied la dans li pas ene zaffaire ki arriver coumsa. Li pas acceptable.

 

Ene lotte vérité c’est ki sa place pou lequel pé dire ki Hazrat Ibrahim (as) fine faire sa vine ene ‘Mussalla’, en fait pé dire fer sa vine ou stage. Allah fine dire ‘Makaam’ et pas ‘Mukaam’ ; ‘Mukaam’ veut dire sa place là, et ‘Makaam’ veut dire ‘Martabah’, stage, grade.

 

Donc faire Ibrahim (as) so grade, so stage vine le stage dans ou Namaz. C’est ki Hazrat Ibrahim fine gagner, sa qualité là ki Hazrat Ibrahim (as) fine établi connexion avec Allah. En résultat de sa connexion là ki li ti ena avec Allah, aussi li pas ti capave gagne ‘la fermeté’ sans duah. Hazrat Muhammad (saws) ti celui ki ena plisse fermeté et persévérance et li aussi ti pé cherche l’aide d’Allah avec duahs même, et li ti pé cherche guide, c’est-à-dire droit chemin, intelligence et perspicacité. Appelle sa ‘Rusht’ (capacité pou conne le bien et le mal).

 

Personne pas fine gagne le cœur pur plisse ki Hazrat Muhammad (saws) et pas fine ena plisse véridique ki li lors la terre. Li ti correcte dans sa façon là ki c’est Allah ki donne ‘Qawlé Sadid’ (paroles bien claire), ‘Qawlé Salim’ (paroles pure) et ‘Rusht’ (capacité pou conne le bien et le mal), sinon pas gagner sa !

 

Maintenant sa qualité ki Hazrat Ibrahim (as) fine établi connexion avec Allah, bé en résultat de sa connexion là, Allah (swt) ti appelle li Khalillullah, c’est-à-dire, Allah fine faire li vine So camarade. Donc, Makamé Ibrahim veut dire ene haute qualité morale kot ou faire tout pour le plaisir d’Allah. Bane qualités ki Allah bien content et Muamla billah veut dire connexion avec Allah. Alors sa kalité Hazrat Ibrahim (as) ti établi so connexion avec Allah là, de la même façon établi ou connexion avec Allah. Donc, l’amour d’Allah, le plaisir d’Allah et fidélité c’est sa même le stage de Ibrahim (as). Allah So l’amour, so soumission complète à Allah, So plaisir et so fidélité, c’est sa même le stage de Ibrahim (as) ki le Ummah de Hazrat Muhammad (saws) fine gagner comme Tarbiyyat, comme héritage. C’est-à-dire, sa stage de Ibrahim (as) là, le Ummah de Hazrat Muhammad (saws) fine gagne sa naturellement, et li ti couma dire ene héritage de Ibrahim (as). Et celui ki suivant de Ibrahim (as), bé so stage li trouve là-dans même. Celui ki so lé cœur pareil couma le cœur de Hazrat Ibrahim (as) pour lui aussi ena la paix pour li là-dans, là-dans même ena so délivrance ki li suive sa le cœur de Hazrat Ibrahim (as) là. Li pareil couma « Raziiyatam-Marziyya », kot li fine satisfait avec So Rab (Allah) et Allah aussi fine satisfait avec li.

 

A propos de la vérité, tant ki ene dimoune li pas vine ene créature d’Allah avec sincérité, et propreté et pureté, à ce moment là li difficile pour li gagne ene stage. Quand en connexion avec Ibrahim (as) Allah ti donne li Shahaadat, Ibrahim (as) c’est celui ki fine accompli tout droit de fidélité, li fine complète so action. Coumsa pour purifier ou le cœur dépi ‘Ghairullah’ (tout saki na pas Allah) et rempli li avec l’amour d’Allah et alle d’après volonté d’Allah et pareil couma soumette complètement, de la même façon, bizin ki ou volonté et volonté d’Allah vine ene seul, péna aucaine différence, sa c’est bane zaffaires ki gagne seulement avec duahs.

 

Alors sa bane zaffaires là pas facile, bizin faire beaucoup duahs et avec sincérité. Et gagne fermeté lors sa bane duahs là, doucement doucement Allah donne sa bane zaffaires là. Hazrat Ibrahim (as) fine faire sa persévérance là, sa fermeté là dans sa façon là, ki dans ene rêve li fine trouver ki li ti pé sacrifier so garçon. Alors ki li ti capave alle cherche bane les autres interprétation aussi, mais li fine ena ene telle Imaan (la foi) et la fermeté pour Allah ki li fine prêt tout de suite pour sa. Et li fine commence sacrifié so jeune garçon are so la main.

 

Pense ene coup azordi jour si ene dimoune so zenfant mort à cause quique maladie, bé li gagne beaucoup bane doutes lors Allah So Être, et li ouvert so la bouche pour fer des milliers de bane complaintes et objections contre Allah. Mais fine ena ene Ibrahim (as) ki fine écrase sa l’amour pour so garçon là et fine prêt pour sacrifier même so garçon. Sa bane qualité dimounes là, Allah pas laisse zot récompense perdi et gaspiller. Hazrat Ibrahim (as) ti pé recevoir beaucoup révélations et Allah mentionner dans Quran Shariff ki Li fine envoye Ibrahim (as) aussi avec ene Livre, bane révélations, bane commandements.

 

Par exemple, Allah affirmer dans Quran : « Ibrahimallazi Waffa »  - C’est Ibrahim ki fine montrer ene l’exemple totale de fidélité. (An-Najm 53: 38).

 

Ou bien : « Ya Ibrahimallazi Qad-sadaqtar-Ru’yaa Inna Ka-zaalika Najz-zil Muhsinine » - Ô Ibrahim ! To fine ena foi dans to vision, et Nous récompense bane ki faire du bien coumsa. (As-Swaffat 37 : 105-106)

 

Sa ti révéler à Ibrahim (as). C’est sa zaffaire là ki ene dimoune bizin gagné. Si péna même sa zaffaire là, ki profit et ki l’avantage de rêve et révélation ? Regard d’ene croyant li toujours lors bane bon actions. Hazrat Ibrahim (as) ti gagne sa titre là - « Ibrahimallazi Waffa » pas coumsa même li fine gagne sa ! Toute longue so la vie li fine reste sincère, fidèle et en résultat de sa li fine gagne sa titre là.

 

Pour gagne bénédictions et bénéfices d’Allah, propreté du cœur li bien nécessaire. Péna nannié tanque ki ou lé cœur pas propre. Faudé ki kan Allah jette ene regard lors ou lé cœur, pas bizin ena aucaine tâche et aucun aspé d’hypocrisie dans aucaine coin ou lé cœur. Quand ena ene tel situation, lerlà ou gagne manifestation d’Allah et tout bane zaffaires vine claire.

 

Concernant sa, mo envie averti ou ki c’est ene travail très difficile vers lequel mo pé faire ene l’appel avec le Jamaat Ul Sahih Al Islam. Et si ou guette lors so réalité même, bé ena beaucoup bane dimounes capave perdi courage dans sa chemin de la manifestation divine là même, kot zot bizin fer beaucoup de sacrifices, stage par stage même. Li veut dire ki c’est ene tel stage kot dans lé cœur péna aucaine aspé de ‘Ghairullah’ (péna Jésus, Ram, Shiv, (pour certains bane musulmans) bane pirs et (pour bane Ahmadi) péna Khalifatul-Massih dans le cœur). Bizin ena juste Allah, c’est-à-dire, si sak dimoune guette zot lé cœur, bé dans plusieurs bane coins zot pour trouve bane ‘Ghairullah’. Alors faudé pas peur avec sa et quitte le chemin, non. Remède là c’est ki bizin faire beaucoup duahs. Allah conné dans ki sanlà so lé cœur, kot kot ena bane idoles, et quand Li envie, Li pou retire sa bane idoles là.

 

Donc, pour sa ou bizin ena ene tel sincérité et véracité pareil couma Hazrat Ibrahim (as) fine montrer so sincérité, et pareil couma Hazrat Muhammad (saws) fine montrer l’exemple. Kan ene dimoune suive sa l’exemple là, li vine ene dimoune bien béni, après li pas gagne aucaine humiliation dans so la vie mondaine, et ni li gagne bane problèmes et difficultés dans provisions. Allah ouvert la porte de So la grâce et faveurs lors li, et li vine ene héritier de bane bénédictions d’Allah et Allah pas donne li ene la vie d’humiliation mais Li faire li gagne ene stage de bane biens.

 

Quand ou faire sacrifice financière dans chemin Allah, là-dans en fait ena bon nouvelle kan ou faire sacrifice financière dans le chemin d’Allah ; ou pas pou gagne aucaine difficulté. Ou bane difficultés pour éloigner avec bane sacrifices financières, et Allah pour donne ene tel dimoune le meilleur de bane récompenses dans sa le monde là aussi et dans l’au-delà. Insha-Allah.

 

Ki Allah compte nous parmi sa bane dimounes exceptionnellement bienheureux là, Insha-Allah, Ameen. Eid Mubarak.

Écoute le Khutba Bakr Eid du Khalifatullah Munir A. Azim en intégralité (Audio)