|
بسم الله الرحمن الرحيم
Khutba Jummah
HADHRAT AMIR’UL MUMINEEN MUHYI-UD-DIN
Munir Ahmad Azim
(08 Dhul-Hijjah 1435 Hijri)
(Résumé Khutba)
Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane z’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:
Insha-Allah, dimanche le 05 Octobre 2014, nous pou célébrer le Eid-ul-Adha. Alors dans mo Khutba azordi, mo pour mette quelques Hadiths devant ou ki ena connexion avec Eid-ul-Adha.
De Musnad Ahmad bin Hanbal, Abdullah bin Abdur Rahman bin Abza rapporté de so papa ki kan Hazrat Muhammad (saws) ti pé lever le matin, li ti pé dire sa : « Ki nous lever le matin lors la nature de l’Islam et lors le Kalima Ikhlaas et lors Deen de Muhammad (saws) et lors Millat de zot papa Ibrahim (as) ki pas ti ene idolâtre. »
De Bukhari et Musnad Ahmad, Hazrat Ibn Umar (ra) rapporté ki Hazrat Muhammad (saws) fine dire kan li ti pé crier : « Labbaik Allahumma Labbaik, Labbaik Laa Sharika Laka Labbaik, Innal Hamda wan-Ni’mata Laka wal Mulk, Laa Sharika Laka » – (Traduction) Mo présent O Allah, Mo présent devant Toi, péna personne pour adorer apart Toi. Mo présent devant Toi, certainement tous bane louanges appartenir à Toi et la souveraineté. Péna personne pour adorer apart Toi. – Alors li ti lire sa Kalima là, sa même tout.
Ene Hadith de Sunan Nasaï et Ahmad, Hazrat Shadad bin Aws (ra) fine rapporter ki Hazrat Muhammad (saws) ti habituer faire sa duah là dans so Namaz : « O Allah, mo demande Toi la fermeté et persévérance dans bane zaffaires concernant Toi. Et aussi dans bon zaffaires, bane zaffaires de guidance (direction)... ». Donc, pour bane bon kitchose aussi pas capave gagne ‘la fermeté’ sans duahs.
Hazrat Muhammad (saws) ti celui ki ena plisse fermeté et persévérance et li aussi ti pé cherche l’aide d’Allah avec duahs même, et li ti pé cherche guide, c’est-à-dire droit chemin, intelligence et perspicacité. Appelle sa ‘Rusht’ (capacité pou conne le bien et le mal).
« ... Mo cherche la force pour remercier Toi pour To bane faveurs et l’occasion pour faire To Ibaadat. Et mo cherche le ‘Qalbé Saleem’ (ene le cœur pur et en paix) avec Toi et ene la langue véridique... »
Maintenant personne pas fine gagne le cœur pur plisse ki Hazrat Muhammad (saws) et pas fine ena plisse véridique ki li lors la terre. Li ti correcte dans sa façon là ki c’est Allah ki donne ‘Qawlé Sadid’ (paroles bien claire), ‘Qawlé Salim’ (paroles pure) et ‘Rusht’ (capacité pou conne le bien et le mal), sinon pas gagner sa !
Après Hazrat Muhammad (saws) fine dire :
« ... Mo cherche tous bane bon zaffaires ki cachiette ki dans To connaissance, et mo cherche refuge contre tous bane mal ki dans To connaissance. Et mo cherche délivrance de tous bane zaffaires ki dans To connaissance... »
Maintenant bane mal ki dimounes trouvé, sa zot déjà chercher même refuge contre sa. Ena des fois kan zot enfonce dans bane mal, bé bane athées aussi commence prend nom Allah. Mais Hazrat Muhammad (saws) fine montrer nous sa façon là, ki demande refuge avant même ki mal là arriver. Kan ou dans bien, en paix, c’est là ki bizin demande Allah protection contre sa mal ki ou pas conné là, mais ki dans connaissance Allah. Allah conné. « Après mo cherche délivrance de tous bane zaffaires ki dans To connaissance ».
Donc, bane dimounes continuellement zot faire bane péchés et ena beaucoup bane péchés ki pas dans zot connaissance, zot pas conné même ! Alors « tous bane zaffaires de mal ki dans Allah So connaissance, mo cherche délivrance avec sa ». Sa ti duah de Hazrat Muhammad (saws).
De Tirmidhi, Hazrat Sufyan bin Abdullah (ra) rapporté ki, « Mo fine demandé : ‘O Prophète d’Allah, dire moi ene tel zaffaire ki mo pour attraper avec force.’ Hazrat Muhammad (saws) fine dire ‘Qur-Rabbi Allahu Summastakim’ (Dire Allah Li-même mo Maître) après gagne la fermeté, persévérance (Istiqamah)... »
Là-dans pé indique vers ene verset du Quran Shareef :
« Innallaziina Kaaluu Rabbunallaahu summastakaamu... » – En vérité, bane ki dire « Nous Maître c’est Allah » et ensuite reste ferme dans chemin droit... (Fussilat 41: 31)
En fait pour dire Maître avec ou la bouche, li pas ene zaffaire difficile. Tous bane dimounes dire même « Mo Maître, mo Rab ». En résultat de dire Rab là, sa li prend tout so l’importance kan ena ene épreuve lors bane provisions ou bien kan ene dimoune li alle conne vrai valeur So Maître, So Créateur et li penser ki tant ki mo pas pour courber devant Allah, mo pas pou gagne nannié. Li alle apprane aussi ki faudé pas li courber devant bane dimounes et ki Allah suffit pour li et ki c’est Allah même ki pour ouvert so bane la portes, et envoye bane dimounes et So bane les autres créatures pour aide li. C’est à ce moment là ki so déclaration « Mo Maître c’est Allah » gagne tout so valeur et crédibilité dans lizié Allah et so propre lizié. Zot tous bizin conné ki pour dire avec la bouche « Mo Maître », li pas suffit. Après ki ou fine dire sa, ena l’objectif de persévérance. Si ena bane épreuves ki vini, celui ki reste ferme c’est li même ki ena « Istiqamah » (persévérance), et c’est li-même ki so déclaration li ene vrai déclaration ki « Mo Rab c’est Allah ».
Dans Sunan Nasaï, Hazrat Abu Umama (ra) rapporté ki ene dimoune fine vine kot Hazrat Muhammad (saws) et fine dire : « O Prophète d’Allah, celui ki prend part dans la guerre en espérant récompense, ki ou penser lors là ? » Hazrat Muhammad (saws) fine dire ki sa dimoune là pas pour gagne nannié. Sa dimoune ki fine pose question là fine demande même zaffaire 3 fois, et Hazrat Muhammad (saws) fine donne li même réponse continuellement ki li pas pou gagne nannié. Après li fine dire li ki Allah accepter seulement action ki fine faire pour Li, c’est-à-dire, pour Allah avec sincérité et à travers sa li gagne le plaisir d’Allah.
Alors tous sa bane Hadiths ki mo fine mette devant zot là azordi c’est pour faire nous réfléchi lors fermeté et persévérance extraordinaire ki Hazrat Ibrahim (as) ti ena lors so Rab, so Allah et couma aussi so garçon unique à l’époque Hazrat Ismail (as) aussi fine montrer sa l’exemple là, et aussi couma zot garçon, zot descendant le Saint Prophète Hazrat Muhammad (saws) fine démontrer ene tel l’exemple, kot Allah même fine qualifié li de modèle parfait pour toute l’humanité.
Dans le cadre de Eid-ul-Adha, kan nous étudié en profondeur l’exemple de soumission, de fermeté et de persévérance de Hazrat Ibrahim (as), nous pou alle réaliser kifer Allah fine fer li vine So camarade intime, et Allah dire dans Quran en honorant le nom et l’exemple de So prophète Hazrat Ibrahim (as) ki li ti ene Hanif et ene tel dimoune ki représente ene nation. Eski sa ene parole ordinaire sa ? Ici, c’est Allah Li-même ki qualifié Hazrat Ibrahim (as) ki li représente en li-même ene sel nation, et ki li ti ene quelqu’un ki pas ti adore aucaine les autres bondié apart Allah. So l’adoration, dévotion, soumission et confiance en Allah fine fer ki Allah fine accorde li sa proximité là avec Li (Allah).
Mais pas fini. Allah continué tester li, aller même. Allah tester so sincérité, pas à cause Allah ena kit doute dans so sincérité, mais afin ki li vine ene l’exemple pour la postérité, afin ki demain à travers so dévotion et après ki li fine passe avec distinction tous so bane l’examens spirituel, Allah capave accorde li so désir pour gagne sa messager d’Allah exceptionnel là dans so descendance. Et de sa façon là kot li capave reste vivant dans duah de bane dimounes pour li et so garçon Ismail (as) et sa grand sacrifice ki li fine fer là, pas à cause li ti oulé grandeur, mais pour li gagne sa place spécial dans le cœur d’Allah. C’est sa travail là ki ti li pé fer, pour fer de so l’âme gagne sa connexion spécial avec Allah, et Allah conné dans So connaissance saki Ibrahim (as) pou représenter demain pour la postérité (bane générations futures). Allah fine choisir pour béni li aussi à travers so garçon Ismail (as), kot sa garçon là fine imbibe dans li bane même qualité de soumission couma so papa, kot li aussi pareil couma so papa li ti ena sa « Qalbé Salim » là. Faudé li ti ena ene tel le cœur pur même pour Allah fer zot marche vers le sacrifice de sang, pour ensuite arrête zot pou pas fer sa action là, et fine accepter sa l’intention extraordinaire ki zot tous les deux papa-garçon ti ena pour soumette à la volonté d’Allah. Allah pas ti bizin zot sacrifice, mais Li fine tester zot dans ene vision ki Hazrat Ibrahim (as) fine trouver. Hazrat Ibrahim (as) ti capave pense vision là dans ene lotte forme et interprétation mais li pas fine fer li. Li pas fine tire bane excuses. Li fine oulé remplir vision là tel kél couma li fine trouve li. Et saki extraordinaire là-dans c’est ki ene garçon d’ene tel ti l’âge fine raisonner couma le plus sage de bane savants et excellent serviteurs d’Allah et fine conforme li à la volonté d’Allah, tel kél couma so papa fine trouver dans so vision.
Azordi jour, zot l’exemple de fermeté et de persévérance fine traverse des siècles et des siècles et azordi jours nous pé contigner cause sa, et Allah fine fer ene tel façon ki sa jour de sacrifice ki sa papa et garçon exceptionnels là fine fer li graver dans l’histoire et forme parti tous les ans dans le HAJJ, kot le Hajj terminer par sa plus grand Eid, ki Eid-ul-Adha été, parski sa représente vrai l’esprit de soumission, de confiance et de fermeté et persévérance dans la foi ki chaque dimoune ki dire zot musulman bizin ena.
Insha-Allah, mo pou contigne lors sa même sujet vaste et intéressant là dans mo Khutba de Eid-ul-Adha, parski zamais nous pou fini cause lors grandeur sa sacrifice et la foi ki sa deux grands patriarches et prophètes là fine fer et démontrer là.
Ki Allah aide sakaine d’entre nous pou ena même l’esprit de sacrifice et fermeté dans la foi ki Hazrat Ibrahim (as), so garçon Hazrat Ismail (as) et aussi nous maître Hazrat Muhammad (saws) ti ena. Zot bane tel excellent l’exemples ki pou amène nous pou trouve le vrai succès, vrai la clé pour ouvert le trésor spirituelle. Et sa trésor là c’est inévitablement, Allah (twa). Insha-Allah. Ameen. |
|
|
|
Écoute le Khutba Jummah du Khalifatullah Munir A. Azim en intégralité (Audio) |
