بسم الله الرحمن الرحيم
Khutba Jummah
HADHRAT AMIR’UL MUMINEEN MUHYI-UD-DIN
Munir Ahmad Azim
04 Avril 2014 ~
(03 Jamad’ul Akhir 1435 Hijri)
(Résumé Khutba)
Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:
Alhamdulillah, Allah (swt) fine donne moi encore ene fois le Tawfiq aujourd’hui pour contigner lors le sujet de mo Khutba Jummah de la semaine dernière lors bane réfutations à bane Mullahs (ki mo ti zoine dans Triolet) et bane les autres anti-Ahmadiyya lors le thème de la renaissance de l’Islam, la nécessité d’ene Messager d’Allah, bane tél réfutations ki bane Mullahs azordi bizin accepter afin pou réussi parvenir pou fer ene grand transformation, ene grand réforme dans l’Islam.
La semaine dernière, mo ti arrête le sujet centrale de mo Khutba en disant: Alors ki réponses ki Quran Shareef et Sunnah donne nous lors sa sujet là?
Zot bizin conné ki sak fois ki ene communauté religieuse vine corrompue (que ce soit dans le passé, présent et future), alors c’est sûre ki ene dimoune bizin vini de la part d’Allah, qui ré-donne le même message et commence ene mouvement de bane grands sacrifices pour le bien de la religion. Bane tél dimounes pas vini pour prend la vie de bane les autres dimounes, mais zot vini pou offert zot propre la vie. Zot pas vini pou détruire propriété de personne, mais zot vine zot-même dans bane situations bien risqué kot bane dimounes détruire et kokain zot bane dibiens. Alors en suivant sa chemin de sacrifice bien dure là, la religion fine revive kot sa phénomène là répété, ene après l’autre (après ki la religion li bafoué par bane grands prêtres ou bane Mullahs stupides qui détruire l’essence de la religion). Nous Saint Prophète Hazrat Muhammad (saws) li alors source de lumière ki pli fiabe pour nous (bane musulmans).
En fait, après ki sak prophète et so religion fine vine ene kitchose du passé, ki dimoune fine oublié ou bien fine falsifié, alors c’est Hazrat Muhammad (saws) ki sél source de lumière ki disponible pour nous. Couma eski li fine fer revive bane valeurs de la religion? C’est avec beaucoup zéffort ki li fine réussi fer sa, kot li fine marché dans bane la ri (chemins) de Makkah et kot li fine accepter subir ki bane dimounes maltraite li et lapide li avec coup de roches, kot li fine accepter toutes sorte kalité maltraitance, même bane pli pire ki ena, et sa travail de revive l’Islam là aussi fine fer par bane sacrifices de so bane suivants ki fine accepter ki traine zot dans bane chemins roches dure de Makkah, kot bane Mecquois non-croyants ti pé batte zot presqué à mort, et même ziska ki zot trouve la mort. Ki fer zot fine fer sa sacrifice là ? Zis à cause vrai la foi ki zot fine ena et ki zot fine tini ferme lors là ziska ki sois zot trouve la mort, ou sois ziska ki kan zot fine trouve la victoire de l’Islam.
Bane atrocités ki fine commette contre zot ti énormes et malgré ki zot ti bizin passe par sa chemin kot zot fine bizin fanne zot disang, avec beaucoup de peur et de zéffort et la peine, en même temps zot fine purifié, et au lieu ki zot nombre diminuer, au contraire zot nombre fine augmenter. Zot pas fine vine perdant, mais au contraire en réalité c’est zot ki fine remporte la victoire parski zot ti réussi attire bane lékaire (de bane les autres dimounes), bane les autres l’âmes, kot bane les autres fine zoine zot rang, kot zot aussi fine accepter fer bane sacrifices couma zot, et alors en même temps, sa bane les autres dimounes là aussi, kan zot fine zoine l’Islam et fer bane sacrifices énormes, alors zot aussi par la même occasion fine purifié. L’Islam li conssu de sa façon là. Péna aucaine raccourci vers la gloire et la victoire et sa bane la gloire et victoire là, c’est toujours bane messagers d’Allah ki apporte sa. Si zot ti vini dans le passé, et sa humble serviteur là mo présent dans sa siècle là, alors coumsa, bane les autres messagers pou contigner vini ziska le Jour du Jugement dernier, et zot pou vine dans lumière de perfection du Saint Prophète Muhammad (saws). Kan dans la religion bane ki à la tête vine corrompu, alors c’est Allah ki prend le commandement dans So la mains, et alors Li fer sa manifester par le phénomène ki nous appelle : « Nabuwwah ».
Si ene la loi reste intact mais sans ki Allah envoye kikaine de Li, sans ki Li-même Li donne li (sa dimoune/messager là) So support, sans ki Li fer sa messager là change caractère de bane dimounes à travers bane sacrifices constant, alors aucaine religion zamais fine regagne so vigueur sans sa coup de pouce ki Allah donner à travers So bane messagers, et surtout, sa réforme là dans aucaine façon li pas fer par bane Uléma. En fait, c’est sa bane Uléma là-même ki la cause de sa destruction et détérioration là. Ena ene dicton en créole ki dire: « Si ou mette ene chatte en charge pou veille dilait, alors ou conné ki pou arrive ou dilait ! »
Ainsi, bane valeurs ki fine détruire, fine détruire par sa bane l’autorités réligié là-mêmes. La masses de bane dimounes pauvres zot, zot aveugles, zot pas conné en fait saki pé passé ; certains dimounes suive sa bane chefs religieux corrompu là aveuglément. C’est tous les temps bane ki à la tête ki responsable de détérioration ki arriver à cause zot.
Et maintenant ou (la masse de bane dimounes) pé cherche en sa bane kalités fouteurs désordres là l’espoir ki zot pou dirige zot dans le droit chemin. Si sa zot point de vue, et si sa li bazé lors Hadith (et Sunnah) ki zot fine mentionné au commencement (de sa discussion (et Khutba) là), alors mo ena ene l’autre Hadith pou fer réssortir, et sa Hadith par le Saint Prophète (saws) là li comme suite, ki : « Ene l’époque pou vini kan bane dimounes de mo Oummah pou commence ena bane divergences et pou ena bane très grands différences d’opinions et bane dimounes ordinaires pou alle vers sa bane Uléma pour gagne guidance, et voilà ki au lieu ki zot trouve bane Uléma, zot pou trouve zako et cochons. »
Sa c’est bane paroles de Hazrat Muhammad (saws) ki cause d’ene l’époque beaucoup plus tard ki so l’époque, et ki décrire ene situation kot pou ena bane différences majeures pou fer surface et li dire ki kan sa bane tel différences là pou apparaite, alors bane dimounes ordinaires pou naturellement alle cherche guidance avec bane Uléma de zot l’époque mais ki au lieu ki zot trouve bane Uléma (ki ti sensé guide zot dans le droit chemin), alors zot pou trouve bane zako et bane cochons. Ki sa veut dire ?
Bizin précizé aussi ki sa Hadith là zamais fine contesté par qui que ce soit, sinon bane Uléma de bane l’époque d’avant ti pou rejette sa, par peur à cause sa Hadith là pé cause directement contre bane Uléma d’ene certain l’époque. Alors zot pas fine prend sa pour zot, parski zot ti pieux et zot ti conné ki sa pas applique pou zot, et alors zot fine accepter sa comme ene kitchose, ene réalité ki pou arriver dans le future, kot sa pou réalizé.
Encore ene fois, dans ene l’autre Hadith, Hazrat Muhammad (saws) cause à propos d’ene l’époque « kot bane musulmans pou dégradé (dans la spiritualité) et l’islam pou vine que de nom (couma nous trouver azordi zour), et le Quran pou bon zis pou écrire, li pas pou envahir zot lékaire ou zot disang. »
En apparence, zot bane masjids pou plein mais pou totalement vide de la vérité et de la justice. Allah (swt) fine dire Hazrat Muhammad (saws) ki, dans sa bane jours là, bane dimounes pou couma dire (en apparence) pé fer Namaz dans masjid, et sa bane masjids là pou paraite ki zot rempli avec bane fidèles, mais dans lizié d’Allah zot pou privé de la vérité, sans aucaine piété (Taqwa), et zot pou complètement vide de kit du bien. Alors maintenant, dimoune tourne vers bane Ulémas dans l’espoir ki peut-être zot capave trouve la guidance et sorti sain et sauf de sa bane situations là. Bien sûr, c’est le devoir de sa bane Ulémas là pou aide sa bane dimounes là, mais seulement dernier partie de sa Hadith là informe nous ki : « Zot bane savants pou bane pli pire créatures sous le toit du ciel. » Sous le toit du ciel ena beaucoup zaffaire, ena tout types de zanimo, zanimo sauvages, tout types de créatures, plantes et bane les autres kitchoses.
De ce fait, le Saint Prophète (saws) pas fine dire ki zot pou bane pli pires sous le toit du ciel. Le mot « dimoune » applique à la vie, à l’être conscient. « Dimoune » li pas applicable pou la vie plante. Donc sa hadith là li en accord parfait avec le groupe de bane zanimo, et l’homme, dimoune forme partie de groupe de bane z’animaux. Bane dimounes pou alle cherche l’aide de bane Ulémas, et zot pou alors trouve sa deux zanimo là (c’est-à-dire, zako et cochons), et sa bane là pou bane pli pires dimounes ki ena, kot zot pou montrer ki zot bane pli pire l’exemples ki ena et ki pas capave tire kit bon l’exemples et leçons de zot. Sa Hadith ki cause ki bane Ulémas pou transformé en bane zako et cochons li bazé en fait lors Quran, parski d’après Quran, kan l’Ummah précédent, c’est-à-dire, Juifs et Chrétiens fine vine corrompu, alors Allah fine en dernier lieu retire So la lumière de zot, et zot bane Ulémas fine également transformé en sa deux créatures là, d’après Quran Shareef.
De ce fait, le Saint Prophète (saws) fine cause d’ene l’époque bien malchanceux kot apparamen so bane suivants pas pou so bane vrai suivants ; zot pou suive traces de bane Juifs et Chrétiens ki ti vine avant zot, et alors bane Uléma de l’Islam (en d’autres mots, bane ki pas vraiment musulmans) zot pou vine pareil couma sa bane Juifs et Chrétiens là. Et d’après le Quran Shareef, sa ti consékances de sa bane Ulémas de bane Juifs et Chrétiens kot zot ti vine couma zako et cochons dans zot comportements. Sa pas veut dire ki pé appelle kikaine par ene mauvais nom parski bane prophètes pas fer sa. Mais la vérité c’est ki kan bane prophètes dire kitchose, alors sa bane paroles là zot poids bien lourd et rempli de signification ; sa bane paroles là zot bane messages avec tout so l’importance.
Maintenant, pour expliquer saki sa bane Ulémas là dévini, pour expliquer ki fer fine dire ki zot pou pareil couma zako et cochons ; alors nous prend par exemple, zako. Bane zako ena l’habitude imite bane les autres, même imite bane dimounes. Sa li réaction de bane zako entier le monde, dans sak pays, et ou fine même capave trouve bane zako dans ou l’enfance, que ce soit dans bane zoo ou bien dans la forêt.
De ce fait, ene zako li comporte parfois tellement couma ene dimoune, avec so ti sapo et tous bane costumes pareil couma dimounes, et male et femelle zako capave habillé couma bane dimounes en doula-douline tellement zot ena ene ressemblance avec dimounes, mais selment à l’intérieur, zot tout à fait bane zanimo – et zot pas humains. Sa l’humanité ki zot (bane zako) rode reproduire là li seulement à l’extérieur, et imitation ki zot fer, pou fer couma dimoune li seulement saki li été : ene imitation, ene show. Alors kan bane savants de la religion imite ene prophète, c’est-à-dire, fondateur d’ene religion, alors zot fer sa seulement en apparence, seulement à l’extérieur, pas à l’intérieur. Pas ena ene transformation intérieur. En-dans zot, zot pas touché par imitation ki zot fer de sa prophète là, et alors coumsa même zot ressemblé bane zako en comportement.
Donc c’est sa le message ki fine donné : zot bane Salwaars, Qameez, Jouba, turbans et bane les les autres kitchoses zot seulement bane moyens pou fer zot paraite réligié ; li seulement ene show. Zot pou (Nawzobillah) donne le message ki zot pé soi-disant comporte zot pareil nous Hazrat Muhammad (saws), mais ena ene différence d’intégrité entre zot bane personnages et le personnage de Hazrat Muhammad (saws). So la barbe ti ene source de lumière, alors ki zot la barbe li la source de la haine, corruption et noirté complet. Nous Aka, le Saint Prophète (saws) ti ene source d’attraction, li ti ena bane kalité humain, li ti content sacrifié tout saki li ena pour bane les autres dimounes. Sa bane Ulémas là zot, zot tout à fait le contraire de saki Hazrat Muhammad (saws) ti été. Zot créer la haine, répanne le message de la haine, et zot ti à content ki bane dimounes brûler vifs, et alors zot ti pou riyé et moqué : « Astaire nous fine gagne nous vengeance ! », zot ti pou ordonne bane dimounes pou détruire bane les autres dimounes zot bane dibiens et kokain de bane dimounes innocents et touye bane zenfants et madames innocents et insulté zot. Sa c’est la différence entre ene dimoune ki en apparence li pieux et ene vrai dimoune ki effectivement vraiment pieux. Bane vrais dimounes pieux zot bane prophètes, bane saints prophètes d’Allah. Et zot religion li complètement différent de bane ki pou alle suive beaucoup plus tard la religion à travers sa bane kalité savants de la religion ki corrompu là. Zot l’attitude à l’égard de bane valeurs humaines, envers Allah, envers tout, alors l’apparence li pareil, mais en essence li entièrement corrompu. C’est la situation ki nous trouver apparaite kan dernier partie de la religion (so déclin) commence vine visible.
Sa c’est la situation ki nous trouver fine depuis longtemps prédire dans ene façon étonnant par Hazrat Muhammad (saws), surtout concernant dernier partie, dernier phase de so Ummah. C’est la situation ki nous trouve bane musulmans et les savants (de la religion) azordi zour. Pourtant, certains dimounes attane à séki, nek ene sel coup, coumsa même, nek ene révolution déclenché et ki tout bane corruption réglé automatiquement et ki dimoune commence attache zot avec Quran Shareef et Hadith et vine ene sel Ummah. Si sa pas définition de paradis de bane insensés, alors ki li été d’autres ? Mo pas conné. Sel phénomène ki actif, ki ena valeur azordi zour, pareil couma li ti ena valeur dans le passé, c’est ki Allah envoye So bane Messagers, et comme l’histoire démontrer, bane dimounes tourne contre li, oppose li, et fer li passe par bane même épreuves ki bane peuples avant fine fer zot bane prophètes passé, et de ce fait, sa fer sa bane prophètes là arrive à bane tel degrés de sacrifices kot sa vine ene source de purification pour zot l’âmes et conduites et même pou zot l’attitudes dans la vie.
Donc ene nouvo Oummah émerger d’ene Oummah qui entoure li et li commence répande comme ene poussée yaourt dans di lait et li contigner propager et répandre la lumière avec li. C’est sa phénomène là tousél ki mo conné. Alors l’Imam Mahdi et le Messie, le concept de sa deux là zot en accord avec sa concept, sa philosophie là, pareil couma Quran Shareef même indiqué et prouvé.
Ki Allah donne nous, bane musulmans du monde entier la capacité pou réfléchi lors l’état de l’Islam de nos jours et pou prend bane dispositions pou pas refuse reconnaître l’Elu d’Allah ki fine vini parmi zot pou guide zot vers Allah, pou fer zot réforme zot la vie dans meilleure façon ki ena, de sorte ki sa transformation là capave refléter positivement dans zot, zot bane familles, l’environnement, dans l’Islam et le monde dans so l’ensemble. Insha-Allah, Ameen. Et ki Allah protège zot contre bane Mullahs fanatiques, ki represente bane zako et cochons de l’Ummah de Hazrat Muhammad (saws) couma fine prophétisé par le bien-aimé d’Allah, Hazrat Muhammad (saws) li-même. Ameen.
