بسم الله الرحمن الرحيم

 

 

Khutba Jummah

 

HADHRAT AMIR’UL MUMINEEN MUHYI-UD-DIN

 

Munir Ahmad Azim

05 Décembre 2014 ~

(12 Safar 1436 Hijri)

 

 

~ JALSA SALANA ~

 

 

(Résumé Khutba)

 

Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane z’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

 

 

 

Tout d’abord mo remercié Allah (swt) ki fine donne moi l’occasion pour vine lors sujet de Khutba Jummah de la semaine passé. Couma nous tous conné ki reste quelques jours pour l’élection générale à Maurice, à Rodrigues, et Agaléga, ce mercredi 10 décembre 2014.

 

Pou tous le peuple Mauricien, sa Élection Générale ki pou ena le 10 Décembre 2014 là, kot pou faire Maurice vine, ene 2^ème Réplique et kot le ex-leader l’opposition pou vine le Premier Ministre de l’île Maurice pendant 5 ans, Insha-Allah, après ki li fine amène ene la lutte sans merci pou le bien-être de tous bane mauriciens, un homme ki mérite avec so l’intelligence, compétence, capacité comme ene chef d’état, franc parler, ena bane grand vision pour le pays, 47 ans de lutte dans la politique, fine sape dans la mort, dès so jeune l’âge, li fine jette li dans politique et lutter pou faire bane travailleurs gagne zot dignité et si zordi bane travailleurs fine gagne zot dignité et pas fine laisse zot crazé par bane patrons, c’est par so bane combats ki li fine améné. C’est ene dimoune ki fine faire boucou pour le peuple de l’ile Maurice, mais le peuple de Maurice pas fine conne so valeur, so compétence, so capacité et tous les temps bane dimounes de différent religions et bane politiciens ki péna aucaine compétence et bane socioculturelle fine craze ene tél homme de calibre, ki honnête, ki personne pas capave dire li soif pouvoir et li fine coquin, faire fraude avec l’argent le peuple ou ki li fine protège bane ti copains ou ti copines, c’est bien li Honorable Paul Raymond Bérenger le leader Historique. Tous les temps c’est bane dimounes fanatique fine crée tous sorte qualité causer communale pour empêche li vine le Premier Ministre.

 

Sa montré ou ki bane dimounes sincères, honnêtes et dévoué, tous le temps zot ena bane grand grand l’ennemies et opposants pou crée toutes sortes qualités problèmes et cause ene causé communale pour empêche li (Paul Raymond Bérenger) vine le Premier Ministre de l’île Maurice.

 

Mo capave dire ou ki ‘Labour party’ (PTR) avec so 10 ans au pouvoir fine amène l’ile Maurice vers la ruine et boucou de corruptions, vols, viols, crimes, gambling, la vie bien dur, ti dimounes souffère beaucoup, tous kitchose de base monté couma flèche, alors pour bane saki entouré avec PTR/‘Labour Party’, c’est ene ti groupe dimounes ki pé bien jouir et ena pé gagne terrain crown-land, zot bane protégés du chef d’état de Maurice et si ou pas d’accord séki zot pé faire, et ou lève la voix, alors ou gagne crazé et persécution.

 

Alors, il est grand temps ki nous donne ene grand coude balyé à sa politique travailliste là, ki pé agir seulement pour ene clique et c’est sa le but du leader Paul Raymond Bérenger ; pou mette ene bon coup de l’ordre dans le système de gestion de nous pays et pou retire bane ki pas bon ou bien pou réforme zot couma bizin.

 

Alors pou sa Élection Générale là, franchement dire, si le Premier Ministre Navin Ramgoolam pas jette li dans les bras de Leader MMM Paul Raymond Bérenger pou faire ene l’alliance, parski le Premier Ministre et so Gouvernement entier fine conné ki, si pas faire ene l’alliance avec le MMM et Paul Raymond Bérenger, bé avec sa élection générale là zot tous pou alle dans caro-canne. Le Premier Ministre fine bien réfléchi et servi so stratégie pou faire l’alliance avec le MMM et Leader Paul Raymond Bérenger et donne li le poste futur Premier Ministre pou 5 ans et li, li alle comme Président et faire ene reforme électorale et faire Maurice  vine ene deuxième république kot li le président avec le pouvoir plisse ki le futur Premier Ministre Paul Raymond Bérenger et l’accord fine signé.

 

Après ki zot fine concrétize zot l’alliance, d’après zot, l’alliance PTR-MMM pou ene gouvernement beaucoup plus inclusif. Bane dirigeants PTR/MMM fine déclaré : « Nous fine mette en place ene comité ki prépare ene programme étoffé. Sa demande ene travail en profondeur. Nous ena ene programme complet qui reflète l’unité et la modernité et ki place bane valeurs de la jeunesse au centre du développement. Au fil des jours bane dimounes pé compran nous message d’unité et de modernité lors de bane réunions ki nous pé tenir ; sa concerne aussi pou tenir bane débats et bane échanges. Bane dimounes pé pose bane questions pertinents et nous pé réponde zot. L’accès à l’information li ene droit, pas ene privilège. »

 

Là séki ou trouver, ou pou trouve beaucoup hypocrites ki soi-disant zot pas d’accord avec deuxième république mais en fait zot pas pé content ki Paul Bérenger vine Premier Ministre. Li semblé ki dimounes pas fine tire bane leçons de saki fine déjà passé avant... et alors moindre étincelle ki pou capave ena, pou capave provoque bane dégâts irréparables.

 

Eski ou fine trouve socioculturelles descende lors terrains faire politiques ? La religion zot pas pé occuper, zot gagne tracas attention Paul Bérenger vine Premier Ministre et alors zot dhall pas pour cuit. Bane Voice of Hindu (VOH) pé faire l’appelle pour vote uniquement pour bane candidats de la communauté majoritaire. Le leader de PTR, pour bane raisons purement électorales et dans ene bassesse terrible, pas pé arrête caresse poils de bane groupes socioreligieux ki ti bizin carrément, exclus de bane débats politiques. Sa faire moi mazine ene rêve ki mo ti faire en Septembre 2014, après ki l’alliance PTR/MMM fine tombe d’accord, date élection pas ti encore conné. Mo ti faire ene rêve ki Navin Ramgoolam pé dire Paul Bérenger ki ‘Mo partie PTR ine tire pli beaucoup candidats élue ki toi paul ; alors mo pli majorité ki toi’ et figure Paul Bérenger changer, chagrin l’alliance ki li fine faire avec PTR et li pas fine vine Premier Ministre. Et dans rêve la mo pé dire : « Sa même campagne ki PTR fine faire, ‘Vote Nous, Nous ki la communauté majoritaire’ »; c’est-à-dire vote zis bane candidats Hindu ki li dans PTR, MSM etc. Sa c’est ene rêve. Attendons voir après élections ki pour arriver.

 

Alors la communauté majoritaire pas peur 2^ème République et ki Navin Ramgoolam vine président avec bane pouvoir plisse ki le futur Premier Ministre Paul Raymond Bérenger mais pou zot, zot cible c’est Honorable Paul Raymond Bérenger. Si sa l’alliance PTR-MMM remporte ene victoire, alors ki ene blanc en l’occurrence Paul Raymond Bérenger vine futur Premier Ministre pou 5 ans – et bel et bien li très mérité – mais malheureusement la communauté majoritaire, le VOH et Sanatan Dharma Temples’ Fédération (avec so président Somduth Dulthumun) pé donne zot mot d’ordre. Travail religion zot pas pé occupé, mais zot pé donne mot d’ordre pou vote seulement bane Hindu dans PTR et Hindu dans MSM et évite pour vote bane candidats MMM. Porte-à-porte zot pé faire. Malheureux sa pour trouve ene communale ki si sa pas faire attention, bizin prié Allah (swt) beaucoup sinon sa capave déclenche ene bagarre raciale. Mo conné ici à Maurice la plupart de bane mauriciens écoute mo Khutba en langue créole, mo sûr et certains ki zot pou sorte contre moi, mais comme ene messager d’Allah mo pas peur zot et pas peur pour dire la vérité séki pé passé.

 

Ouvertement ‘Voice of Hindu’ (VOH) et Sanatan Dharma pé dire ki bizin vote bane candidats Hindu, zot pé amène zot campagne communale lors terrain. Eski sa pas capave provoque ene tension communale ? L’Ile Maurice en entier pé trouvé ki zot pé jouer avec du feu. Vu ki nous tissu sociale bien fragile, mais nous bizin évite sa qualité campagne là. Mais saki malheureux, sa bane dimounes là gagne bane protections occulte dépi l’état. Couma dire zot gagne carte blanche avec l’autorité pour faire saki zot envie. Mais ki sanlà responsable la sécurité nous pays ? Péna doute, sa responsabilité là tombe lors le Premier Ministre actuel. Ki faire le Premier Ministre laisse zot sa bane communauté soi-disant majoritaire là faire saki zot oulé ? Ene question, si demain bane musulmans levé et dire ki l’Ile Maurice pas appartenir à Hindu seulement, mais à tous communautés ki pé vivre ici, et de l’autre côté, la voix Chrétiens, zot aussi zot lévé. A ce moment-là kot pays-là pour allé ? Si ene Premier Ministre tolère sa qualité socioculturelle là pou fer saki zot envie, eski bane minorités senti zot en sécurité dans sa pays là ?

 

Eski le Premier Ministre actuel et so Gouvernement PTR pas pé servi ene stratégie  et servi Paul Raymond Bérenger et le MMM comme béquiye pour gagne élection générale et après ki zot fine travail zot communale et zot élu majorité et le parti MMM tombe en minorité, zot pas pou casse l’alliance et mette Leader MMM et so partie dehors, faire zot alle dans l’opposition ? C’est sa bane crainte ki ena, la façon ki sa pé dérouler le Premier Ministre actuel et so Gouvernement pas pé prend aucaine sanction contre sa bane qualité campagne communale là.

 

Alors eski sa qualité gouvernement là mérite continuer reste au pouvoir ? Nous bizin faire beaucoup de duah si ena sa qualité maladie dans zot lé cœur, alors pour le bien-être population de Maurice, Allah (swt) détruire sa bane kalité dimounes ki ena sa bane qualité maladie là dans zot lécoeur, Insha-Allah.

 

Si nous guetter, la séance parlementaire fine coute nous cinq fois plus cher ki ordinaire, l’auguste assemblée de la république de Maurice siège six mois par an avec ene moyenne de 35 séances. Sa l’année là, li fine siégé seulement durant 2 mois (8 séances). Du coup, ene séance en 2014 fine coûte à bane contribuables Rs. 25 millions contre Rs. 5 millions en temps normal. Zot fine être payé de bane fonds publics pour tourne zot pouces pendant quatre mois. D’habitude, parlement siège pendant six mois – de mars à juillet et de octobre à décembre. Sa l’année là li fine siégé seulement deux mois, avril et juillet. Vu ki l’état fine dépense quelques Rs. 175 millions par an avec le système parlementaire, ene séance fine coûte environ Rs 5 millions en temps normal. Mais en 2014, sa dépense là fine gonflé à Rs 25 millions, compte tenu d’ene budget de plus de Rs. 200 millions et 8 séances durant l’année. Quelques 60% de sa l’enveloppe là fine englouti par salaires de Speaker, de bane parlementaires à l’exception de bane membres cabinet et bane 50 fonctionnaires affecté à l’Assemblée. 

 

L’Alliance Lepep pé réjouir de la campagne pour gagne sa élection là avec so leader Sir Anerood Jugnauth. D’après la déclaration de L’Alliance Lepep l’enjeu c’est donne ene premier vrai booste à la campagne électoral. Zotte dire ki zot claires dans zot l’objectif pou rallier tous bane couches sociales du pays. Et zotte dire ki tous pé passe très bien au sein de la population et ki partout zotte pé gagne bane  bél-bél encouragement de la part de bane dimounes. Zot fine aussi déclaré : « Nous fine détermine bane grand axes de nous programmes et comparativement à l’Alliance PTR/MMM  ki avant tout là pour satisfaire certains (de sa bane programmes là), mais nous, nous place le Mauricien, la Mauricienne et bane jeunes aux centres de nous programme. »

 

Maintenant le peuple de Maurice pé pose beaucoup questions concernant bane projets de deuxième république. Sa pou change la nature démocratique du pays. L’article 47 de la Constitution clair. Avant amende l’article 1 de la Constitution, bizin ene référendum kot 75 % de bane électeurs prononce zot-même pour ene changement. Ensuite, ene projet de loi bizin présenté et bizin aussi gagne l’unanimité totale dans l’Assemblée nationale. L’article 1 évoque la souveraineté de Maurice et implique bane droits fondamentales de bane Mauriciens.

 

Nous démocratie li basé lors le système de Westminster, couma dans l’Angleterre et dans l’Inde. Sa système là donne ene pouvoir absolu au Premier Ministre et à l’Assemblée Nationale. Kan nous adopte ene système demi-présidentiel et ki nous compte accorde certains pouvoirs à ene Président élu, sa amène ene changement à nous l’état démocratique.

 

Actuellement, nous, le peuple Mauricien, nous pé éli bane membres Parlement pou ki zot gouverne nous. Si demain ene président oulé dissoude Parlement après six mois, ki pou arriver ? Eski sa pas implique ene changement profond de la nature même de nous démocratie ?

 

C’est la nature du système politique ki bizin changé et non pas la nature démocratique. C’est pas la même chose. Nous dans ene système de Westminster, ki calqué lors système britannique. En d’autres mots, ene démocratie parlementaire ! La proposition c’est pou bouger vers ene système demi-présidentiel. Nous pas pé invente nannié. Ce système là exister dans pas mal de pays et ena bane différents formules pou applique li. Alors nous bizin la bonne formule pour ki sa projet là réussi sans aucaine problèmes et disputes.

 

Après ki nous fine écoute saki la loi de l’homme dire, anou écoute saki la loi d’Allah dire.

 

La loi islamique signifie l’intégration de la société et la réforme par voie de la persuasion au lieu de la force; li reste donc satisfait avec la prescription de bane telles punitions ki bien nécessaires pou mettre ene frein à bane crimes graves et pou créer ainsi ene société ordonné. C’est pour sa raison là ki Allah fine prescrire bane punitions exemplaires pour bane crimes couma bane meurtres, bane blessures physiques, la fornication, l’adultère, vol, fausse accusation contre chasteté d’ene dimoune et boire du vin, etc., tandis que l’usure (l’intérêt), le jeu du hasard et bane les autres crimes semblables fine laissé pou ki Allah deal avec sa dans Aakhirat, parski à cause zot incidence lors transaction plutôt ki lors l’établissement de la paix et de l’ordre. La réforme par la persuasion et l’exhortation étant l’objectif principal de l’Islam, li donne le temps ki bizin pour donne ene pénitence et pour apporte bane modifications dans la vie d’ene dimoune.

 

La loi islamique ena ene double objectif, bénéfice spirituel et bien social. Sa politique là li, par conséquent, pou encourage l’obéissance par offert bane récompenses, et pou décourage la désobéissance par l’imposition de bane sanctions. Bane sanctions capave être imposé dans sa le monde ici-bas là ou dans l’au-delà ou dans les deux, mais la récompense (thawab) li accordé seulement dans la vie après la mort (ene telle récompense ki pou éternel ; ki pou dure pou toujours).

 

L’évaluation de tous bane actions et transactions de l’homme selon so bane propres préceptes du bien et du mal, c’est sa principale caractéristique de la loi islamique qui garanti so unité et aussi l’uniformité de la société.

 

Maintenant, nous faire ene ti mathématique. Ena 137,616 musulmans pour alle voté dans sa élection générale là. Si divise la communauté Hindu en Vaish, Ravived, Tamoul, Rajput, Maraz, Télugu et Marathi, c’est la population générale ki en majorité avec 260,406 votants suivi de la communauté Vaish avec 199,688 votants et puis bane musulmans. Mathématique parlant, si la population générale (Kréol) et musulmane joinde ensam, bane Hindu vine en minorité. Et pourtant guette ki bane pé tappe plein dans sa pays là !

 

Donc, la communauté musulmane avec 137,616 votants dans sa pays là, li péna so propre parti. Li bizin attane les autres décide pou li et impose candidats ki zot envie lors la communauté musulmane. C’est zot ki faire choix pour 137,616 votants musulmans. C’est ene la honte pour sa communauté là. Juska kan la communauté musulmane pour contigné subir l’humiliation et le dictat des autres lors li ? A cause sa jamais nous pour capave révendique nous droits. Nous péna nous propre la voix. La voix ki pas pour nous jamais pou capave vine pour nous. Kan ti ena nous la voix dans parlement ? Bane musulmans azordi fine gagne seulement l’heure Jummah dans Vendredi, et après ene seul congé dans ene l’année, le Eid-ul-Fitr. Péna congé pour Eid-ul-Adha et guette ki zot fine fer avec MPL (Muslim Personal Law). Alors refléchi, juska kan nous pour contigner laisse les autres usurpe nous la voix pour l’intérêt de zot la voix ? Pas fine arrive l’heure, nous, bane musulmans oublié nous bane divergences, nous différence, nous uni comme bane vrais frères et sœurs dans l’Ummah de Hazrat Muhammad (saws), nous diboute lors nous propre lipié et nous faire revivre la lois d’Allah, la loi divine couma mo ti expliqué la semaine dernière et ki mo fine fek mentionner azordi ?

 

Si bane musulmans écoute mo conseil, Insha-Allah, bane musulmans de l’Ile Maurice et bane musulmans dans les autres pays du monde pour bizin prend zot destin dans zot la main tôt ou tard. Ki bane z’hommes de bonne volonté de l’Ummah mette la tête ensam et tire sa communauté (musulmane) là kot li fine tombé et arrête subir humiliation lors humiliation.

 

Mo Khutba Jummah pé vine trop longue. Mo capave dire seul Jamaat ki zot tous reconnaite sa ici à Maurice ki nous le Jamaat Ul Sahih Al Islam ki le Premier Ministre et so gouvernement pas capave manipulé, car nous pas ene vendeur pour nous communauté et nous pas prend aucaine subside avec le gouvernement. Et pas zis sa, dans la banque, nous refuse pou prend l’intérêt ki la banque donné kan nous place nous l’argent personnel et l’argent Jamaat. Nous pas bizin aucaine subside malgré nous peu ici à Maurice, mais nous bane membres faire sacrifice l’argent dans zot salaire, la paye ki zot gagner, la sueur de zot travail et pas zis à Maurice, dans les autres pays du monde kot ena mo bane disciples du Jamaat Ul Sahih Al Islam ; malgré zot misère, mais zot faire sacrifice financière avec l’amour et plaisir dans le chemin d’Allah, et par la grâce d’Allah, Allah mette beaucoup Barakat dans zot l’argent ; ene Jamaat ki pas mort pou gagne grandeur, subside (l’argent) avec créatures ou tombe dans lipié de bane politiciens couma dire zot fine trouve zot bane idoles. Alors nous, c’est pas bane faux dieux ki nous rechercher, c’est le seul vrai Dieu ki nous rechercher et So l’aide tout-puissant.

 

Donc, l’honneur et Rizzaq (provisions – manger et boire) trouve dans la main Allah. Alors bane frères et sœurs musulmans, pas perdi le temps. Nous uni ensam. L’Union faire la force par la grâce d’Allah et définitivement Allah (swt) pour aide nous pour bane bonnes causes et pour ki la lois divine triomphé dans 4 coins la terre, Insha-Allah ; pas la loi de l’homme.

 

Par la grâce d’Allah, nous ena la loi d’Allah avec nous, nous trésor. Alors nous tous nous joine ensam pour ki tous créatures d’Allah vive sous la lois d’Allah, Insha-Allah.

Écoute le Khutba Jummah du Khalifatullah Munir A. Azim en intégralité (Audio)