بسم الله الرحمن الرحيم

 

 

Khutba Jummah

 

HADHRAT AMIR’UL MUMINEEN MUHYI-UD-DIN

 

Munir Ahmad Azim

05 Septembre 2014 ~

(09 Dhul-Qaddah 1435 Hijri)

 

 

(Résumé Khutba)

 

Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane z’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

 

 

 

Alhamdulillah, mo continuer aujourd’hui lors sujet de la venue de bane prophètes ki mo ti mentionné dans mo Khutba la semaine dernière. Alors saki nous constater c’est ki condition lémonde demande la venue d’ene prophète. Parski, azordi kot sa nous capave gagne la lumière et la foi ki nous fine lire concernant bane prophètes ? Ki sanlà capave montrer bane tels signes et miracles ki bane dimounes ti envie témoigner de la main de bane prophètes et de zot companions ? Nous trouver ki ena beaucoup de bane écrits ki contenir dans bane livres de sak religion, mais kot sa-sa eski nous capave trouve la preuve pratique de sa ? Kot cadeau de la prophécie ki bane companions de Hazrat Musa (as) ti ena fine aller ? A kot bane signes ki bane disciples de Hazrat Issa (as) ti envie ki montrer zot ? Bane livres de tous bane religions cause à propos d’ene Bondié vivant, mais la question est, eski sa Bondié vivant là encore vivant azordi jours ? Eski Li encore maintenir avec So bane serviteurs sa relation ki Jehovah ti ena pou maintenir avec bane suivants de Hazrat Moussa (as) ou relation ki le Père au ciel ti ena pou garder avec bane disciples de Jésus (as), ou Allah avec bane Musulmans ?

 

Si non, alors ki raison capave ena coumsa pou ena ene telle changement? Et, eski fine ena ene telle changement ki fine passé dans Bondié, ou l’homme ? Nous trouver ki, afin pou évite pou faire face sa question là et pou dire ki sa changement fine arriver, bane dimounes fine rode explique bane contenu de bane livres révélés de bane différents religions ; zot fine rode explique certains passages de sa bane livres là mais selment zot fine donne bane lotte significations à bane mots ki veut dire autre choses.

 

Li capave permette pour nous pou dire ki Bondié fine cause à So bane serviteurs dans tel ou tel mannière, ou tel et tel façon, ou ki So bane relations avec So bane serviteurs ti de tel et tel façon, mais selment nous pas ena droit pou affirmer ki Bondié zamais fine cause avec l’homme dans ene façon ki exclure tous possibilité de doute ou d’erreurs, et non plus li permette pou nous pou dire ki Bondié zamais fine montrer kit miracles pou démontrer concrètement la véracité d’ene religion particulier ou d’ene prophète particulier. Nous capave dans ene certaine manière certifié ki relation ki exister entre Bondié et So bane serviteurs dans le passé ti d’ene nature différent ki saki nous ordinairement comprend ou accepter, mais après ene analyse de bane Livres de bane différent religions nous pas capave honnêtement certifié ki Bondié zamais fine deal avec So bane serviteurs dans ene manière kot le monde capave jugé ki ene Bondié vivant existé, ki montrer So puissance et So miséricorde à bane ki Li content. Nous pas capave laisse le monde juge sa. C’est seulement Bondié ki conne degré de miséricorde et puissance ki Li montrer envers bane ki Li content.

 

Et si nous ti ena pou ouvert la porte de bane interprétations grand ouvert, et si nous ti ena pou explique non seulement pas mots, mais aussi l’esprit dans quoi bane anciens Livres fine enregistré bane évènements de la vie de bane prophètes et aussi celui de bane companions et suivants, alors nous ti pou très vite forcer pou admette ki Celui ki fine révèle sa bane livres là pas fine Li-même capave exprime message ki Li ti envie passer. Mais le fait rester ki nous pas capave attribué aucaine faute ou faiblesse à Bondié, alors nous bizin admette ki bane l’écritures de tous bane religions zot unanime (tous ensam affirmé) ki Bondié fine fer bane tels miracles à travers So bane prophètes et zot bane suivants, et ki Li (Bondié) fine deal avec zot dans ene façon apparent/visible, kot non seulement la foi de sa bane là fine renforci et perfectionné, mais ki sa aussi fine revivre la foi de bane les autres, et l’existence d’ene Dieu ki vivant et tout-puissant fine vine apparent dans lizié lémonde. C’est-à-dire, ki bane miracles ki sa bane prophètes fine fer par la volonté d’Allah, sa fine permette pou renforci la foi de bane dimounes , kot sa bane miracles fine vine visible au monde.

 

C’est vrai ki sa fine passé bien longtemps de cela, et certainement, péna aucaine doute dans véracité de sa bane zaffaires là, sinon li ti pou permette (Halal) pou nous pou questionner, ki faire tous sa  là népli arriver maintenant ? Si Bondié ti habitué cause avec So bane serviteurs dans le passé, ki faire Li pas cause avec zot azordi ? Si Li pas fine hésité pou déssane So guidance dans bane l’époques de trouble, de doute et d’égarement, kifer Li pas ouvert la porte de So guidance à bane dimounes azordi ? Eski sa veut dire ki tous bane religions fine vine corrompu, et ki pas capave découvert kit vérité dans zot, kot pas capave tire aucaine résultat de n’importe lequel de sa bane religions là ; ou eski li possible ki la vraie religion encore exister dans sa le monde là, mais ki bane dimounes pas pé agir d’après li, et de ce fait pas capave kit fer progrès dans le domaine spirituel ?

 

N’importe ki l’opinion ki nous capave accepter, mais sa question là li soulever : Kifer Bondié pas fine révèle ene nouvo religion si Li penser ti ena besoin de sa, et si Li fine fini donne So guidance pou agir et suive et ki bane dimounes pas fine fer saki fine ordonne zot pou fer, alors kifer Li pas fine élève ene réformateur pou guide zot lors le droit chemin afin ki zot capave vine près avec Li et alors réalise l’objectif de zot création ?

 

Li pou incroyable pou croire ki ene Bondié rempli de pitié et d’amour fine capave reste insensible à la vue de l’humanité kan li alle à la dérive, vers so l’égarement et kot zot attacher avec bane zaffaires mondaine, et li incroyable ki ene tel Bondié fine capave reste insensible devant ene telle situation. Pas capave penser même ki ene telle Bondié pas fine prend bane mesures pour la guidance de l’humanité, pou montrer zot le droit chemin. Dieu bizin ene Étre bien pli bon et pli miséricordieux ki même ene papa ou sois ene maman, parski ene papa, et ene maman zot seulement ene moyen pour la procréation d’ene zenfant mais Bondié Li, Li pas seulement le créateur, mais Li aussi le but finale et l’objectif de l’existence de l’homme. La relation entre ene zenfant et so bane parents li temporaire, mais la relation entre l’homme et Dieu pou durer tous les temps. Bane facultés et bane ressources de bane parents zot limité et pou ena ene la fin, tandi ki pouvoir Bondié et So bane trésors zot pas souffert d’aucaine diminution. Li ene telle Dieu ki ena sa kalité relation là avec So bane créatures et Li le maître, possésseur de bane tels pouvoirs, et de ce fait Li (Bondié) pas capave oublier So bane créatures et reste indifférent à zot bane souffrances. Li sa Dieu ki instruire So bane créatures rempli de faiblesses pou montré zot miséricordieux envers bane les autres, et alors ene tel Dieu Li-même Li pas capave sans pitié au point pou laisse l’humanité sans aucaine moyens pour zot guidance et l’avancement spirituel, et pou aller dans le noir, sans aucaine moyen pou trouver kan zot pé fer zéffort pou recherche la lumière.

 

Comme sa sujet là li bien vaste, Insha-Allah, mo pou contigner sa Khutba là vendredi prochain. Ki Allah (twt) donne moi le Tawfiq pou explique zot la beauté de bane moyens ki Allah tout-puissant servi kan li choisir So bane prophètes comme ene bénédiction pou revivre So bane créatures spirituellement, spécialement l’humanité, afin pou fer tous dimounes, dans quatre coins du monde comprend. Insha-Allah. Ki Allah (twt) fer zot tous bien comprend le sujet de sa Khutba là. Ameen.

Écoute le Khutba Jummah du Khalifatullah Munir A. Azim en intégralité (Audio)