بسم الله الرحمن الرحيم

 

 

Khutba Jummah

 

HADHRAT AMIR’UL MUMINEEN MUHYI-UD-DIN

 

Munir Ahmad Azim

 

~ A Rodrigues ~

 

 

07 Novembre 2014 ~

(13 Muharram 1436 Hijri)

 

 

Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

 

 

 

وَ اِذَا تُتۡلٰی عَلَیۡہِمۡ اٰیٰتُنَا بَیِّنٰتٍ قَالَ الَّذِیۡنَ کَفَرُوۡا لِلَّذِیۡنَ اٰمَنُوۡۤا ۙ اَیُّ الۡفَرِیۡقَیۡنِ خَیۡرٌ  مَّقَامًا وَّ اَحۡسَنُ نَدِیًّا ۝ وَ کَمۡ اَہۡلَکۡنَا قَبۡلَہُمۡ مِّنۡ قَرۡنٍ ہُمۡ اَحۡسَنُ  اَثَاثًا  وَّ رِءۡیًا ۝ قُلۡ مَنۡ کَانَ فِی الضَّلٰلَۃِ  فَلۡیَمۡدُدۡ لَہُ الرَّحۡمٰنُ مَدًّا ۬ۚ حَتّٰۤی  اِذَا رَاَوۡا مَا یُوۡعَدُوۡنَ  اِمَّا  الۡعَذَابَ وَ اِمَّا السَّاعَۃَ ؕ فَسَیَعۡلَمُوۡنَ مَنۡ ہُوَ شَرٌّ مَّکَانًا  وَّ  اَضۡعَفُ  جُنۡدًا ۝ وَ یَزِیۡدُ اللّٰہُ  الَّذِیۡنَ اہۡتَدَوۡا ہُدًی ؕ وَ الۡبٰقِیٰتُ الصّٰلِحٰتُ خَیۡرٌ عِنۡدَ رَبِّکَ ثَوَابًا وَّ  خَیۡرٌ  مَّرَدًّا ۝ اَفَرَءَیۡتَ الَّذِیۡ کَفَرَ بِاٰیٰتِنَا وَ قَالَ لَاُوۡتَیَنَّ  مَالًا  وَّ  وَلَدًا ۝ اَطَّلَعَ  الۡغَیۡبَ اَمِ  اتَّخَذَ عِنۡدَ الرَّحۡمٰنِ  عَہۡدًا ۝ کَلَّا ؕ سَنَکۡتُبُ مَا یَقُوۡلُ وَ نَمُدُّ  لَہٗ  مِنَ الۡعَذَابِ  مَدًّا ۝

 

Wa ‘izaa tutlaa ‘alayhim ‘Aayaatu naa bayyinaatin-qaalallaziina kafaruu lillaziina ‘aamanuu ‘ayyu-fariiqayni khayrum-Muqaamaww-wa ‘ahsanu Nadiyyaa? Wa kam ‘ahlaknaa qablahum min qarnin hum ‘ahsanu asaasaww-wa riyaa? Qul man-kaana fiddalaalati fal-yamdud lahur-Rahmaanu maddaa. Hataaa ‘izaa ra-‘aw maa yuu-‘aduuna ‘immal-‘azaaba wa ‘immas-Saa-‘ah. Fasaya lamuuna man huwa sharrum-makaanaww-wa ‘ad-‘afu jundaa. Wa yaziidul-laahul-lazii-nahtadaw Hudaa; wal-Baaqi-yaatus-Saalihaatu khayrun ‘inda Rabbika sawabaww-wa khayrum maraddaa. ‘Afara ‘aytallazii kafara biyaatinaa wa qaala la-‘uutayama maalaww-wa waladaa? ‘Attala-‘al-Ghayba ‘amitta khaza ‘idnar-Rahmaani ‘ahdaa? kalla! Sanaktubu maa yaquulu wa namuddu lahuu minal-‘azaabi maddaa.

 

« Kan récite avec zot Nous versets ki bien clair, bane ki pas ena la foi dire à bane ki ena la foi: ‘Lékel de nous deux parties ena ene meilleure position et ene pli zoli société ?’ (Allah dire) Combien de générations Nous fine détruire avant sa ki ti dépasse zot en dibiens et en apparence. Dire zot : ‘Bane ki dans l’erreur, (Allah) Le Miséricordieux pou file zot la corde ziska séki zot trouve séki fine promette zot, sois punition là ou bien dernier moment là. Alors zot va réaliser ki sanlà ena plus mauvais situation et ki sanlà so l’armée pli faible.’ Allah augmente guidance bane ki suive bon chemin. Séki duré c’est bane bons actions ki meilleures auprès de To Maitre pou zot récompense et meilleure pou retour ki zot gagner. Eski to fine trouve celui ki fine rejette Nous signes et ki dire malgré sa : ‘Mo pou surement gagne beaucoup dibiens et zenfants.’ ? Eski li au courant bane secrets ou sois eski li fine fer ene engagement avec (Allah) Le Miséricordieux ? Mais non ! Nous pou enregistré séki li dire et Nous pou allonge so punition. » (Maryam 19: 74-80).

 

Tous nous bane frères et sœurs Rodriguais ki là, ki présent, Assalamoualaikum Warahmatullah Wabarakaatuhu. Tout d’abord mo remercier zot pour zot présence, et aujourd’hui c’est ene date historique: le 07 Novembre 2014. Nous pé fer le Khutba Jummah à Baie aux Huîtres, à Rodrigues. Et couma zot tout conné, mo séjour ici à Rodrigues c’est pour nous trouve ene place et aussi la construction de nous Masjeed.

 

Et par la grâce d’Allah, place fine trouvé, construction Masjeed pé fer, mais malgré sa nous ena nous bane opposants de différents religions et même de différents sectes dans l’Islam ki pé oppose nous, kot fine mette ene obstacle, kot fine créer bane problèmes pour ki le travail de construction de nous Masjeed du Jamaat Ul Sahih Al Islam ici à Rodrigues arrêté.

 

Li malheureux ki bane autorité fine occupe tout sa là, mais (ensuite) zot fine agir différemment. Li malheureux ki malgré nous venue ici à Rodrigues, avec tout bane démarches ki fine fer auprès de bane autorité pour nous capave alle pli de l’avant avec sa projet de construction de Masjeed, et nous Mission House ici et pour ki nous Jamaat fonctionner, et kot nous ena nous centre, et kot nous bane frères et sœurs pou ena ene bon place pou zot capave fer zot Jummah, tous zot bane programmes et aussi zot Namaz tous les jours, régulièrement.

 

Et aussi séki mo fine capave constaté, kan mo ti vini la dernière fois, c’est-à-dire, quelques mois de cela, mo ti constate sa l’enthousiaste ki ti ena la dernière fois avec bane nouvo membres tous sa là. Et cet fois-ci, avec l’arrivée ici à Rodrigues (de sa humble serviteur), enfin mo fini comprend ki nous bane opposants ti pé amène bane rôle bien bien mauvais pour empêche propage l’unicité d’Allah ici, pou empêche nous progrès. Zot fer tout pou tout pou empêche sa. Alors bane nouvo venue ki zot la foi ti encore faible, pas ti encore renforci bien – c’est sa ki nous ti bizin ene centre, pou ki ene dimoune li renforci sa travail là, li renforci l’éducation spirituelle de nous bane membres – mais zot fine saizi de sa bane l’occasions là; malheureusement ena sa bane dimounes là fine délaisse le Jamaat Ul Sahih Al Islam. Nous bizin être franc. Bane ki fine délaisse le Jamaat Ul Sahih Al Islam fine allé, et par le rapport ki nous fine gagner, ki bane mauvais travail ki bane les autres fine fer. C’est-à-dire, mo pas pé dire ene sel groupe, mais ena plusieurs avec travail ki zot fine fer pou retire sa bane dimounes là dans le Jamaat Ul Sahih Al Islam, et même nous capave dire, de l’Islam.

 

Donc, tout sa bane zaffaires là kan nous guetté, et kan mo analyse la situation de Rodrigues, kan mo ti vine travail au commencement à Rodrigues – mo conne Rodrigues bien ; bane dimounes très gentille, très sympa, content écoute la religion – premier fois ki mo ti vine travail ici c’est en 1993, et sa fine continuer même jusqu’à (l’an) 2000. Rodrigues ti ene place très tranquille. Pas ti ena aucaine crainte pou vivre à Rodrigues. Ou capave pé quitte ou la caze (tranquille) ou aller, laisse la porte ouvert, et zamais personne pas pou cokain, ni ti pé entende bane crimes et violence. Mais aujourd’hui avec bane mauvais travail ki bane les autres pé fer, si ou guette ou Journal même, Journal « Les Plus », fine mentionné selon le rapport « Crime, Justice and Security Statistics », fine publier en Août 2014, ki pour l’année de 2012 à 2013, le taux de délits criminelles li en hausse à Rodrigues. En 2012, la police de Rodrigues fine enregistré 6,352 cas (pas contraventions) et en l’année 2013, 8408 cas fine gagner. Et là si ou guette saki fine passé Mardi le 28 Octobre dans Terre-Rouge, ene madame veuve de 65 ans ki reste seule, alias Rita baignant dans ene marre de sang et so visage complètement défiguré et à moitié nue et so neveu même ki fine commette sa. Li appelle Alender Edouard, 17 ans habitant de Terre-Rouge. Ene policier même ki parmi bane dimounes avec ki mo ti pé prêche la spiritualité, l’unicité de Dieu dépi mo ti dans Rodrigues (au commencement), alors li fine dire moi lors sa crime là ki deux jours avant sa, dans Rodrigues, bane là ti interview sa madame là, et li ti ena pou gagne casse Dalle, et alors so neveu kan fine entende sa, li fine rentre kot li pou cokain et madame-là fine surprendre li. Alors sa garçon là pas fine même respecter ene matante et fine batte, viole et touye li.

 

Sa montrer dans ki décadence Rodrigues fine arriver; la jeunesse couma fine gâté (pé amène mauvais la vie), dans ene population ki apparemment pas encore arrive so 100,000 dimounes. Maintenant dans ene ti Rodrigues, difficile astaire pou kit la caze tout seul. Madames, filles pas capave marche tousél. La vie même na pas bon; l’indécence fine rentré.

 

Mais astaire la question se pose: Si Jamaat Ul Sahih Al Islam ti arrange ene maison de jeux, ene boîte (disco) – bane là vini chanter, danser, séga, eski ti pou ena l’opposition ? Kit-fois permi ti pou fini gagner! Kit-fois beaucoup travail ti pou fini fer! Kit-fois zot ti pou accueille sa parski beaucoup de jeunes ti pou gagne l’amusement. Mais kot ena la spiritualité, ou trouve zot ferme la porte de bâtiment, ene maison kot bane jeunes ti capave vini gagne la spiritualité, gagne l’éducation de la spiritualité, kot sa ti pou empêche zot fer bane kitchose atroce et rentre dans l’immoralité. Li bien chagrinant, nous trouve beaucoup bane frères et sœurs pé guette moi avec bane yeux d’étonnement et pé réfléchi. Zot même zot pé étonné avec sa, sa ki pé arriver dans Rodrigues.

 

Ou trouver, zot zot pé refuse ene zaffaire kot nous nous envie fer travail dans Rodrigues et nous pas pé prend ene sous avec personne. Nous nous envie mette ene maison de Dieu là pour ki zot tout zot tourne vers ene sel Dieu. Du moment ki ou pou tourne vers ene sel Dieu, ou pou lire bane commandements de Dieu pou explique bane jeunes, alors bane là pou gagne ene lotte l’éducation. Pas pensé ki ena ene sel type l’éducation, alle zis l’école! Ou pé trouver même bane jeunes ki pé alle l’école ki zot pé fer... lors là mo pas pé causé même, et dans Rodrigues kot fine arriver lors là (situation de bane jeunes filles et garçons dans l’école et lors bus-stop, couma pé saryé bane la boissons/bane cans... tout sa là fine rentrer dans l’école, dans bane collègues parmi bane jeunes). Le monde fine rentre dans noireté! Le monde fine rentre dans ene ténèbres bane frères et sœurs!

 

C’est pour sa ki aujourd’hui après quelques mois, ou trouve moi à Rodrigues encore pou contigne sa travail là, pou ki nous ena ene maison de Dieu et en même temps enseigne nous bane jeunes amène bane les autres dimounes vers la spiritualité. Alors kan ou pé fer bane bon travails, ou pé envie amène beaucoup bane dimounes vers ene Dieu Unique, ou pé cause bane bon paroles, voilà ki bane les autres ki zot pé fer, pé barre la route! Zot alle cause avec sa bane dimounes là, pé alle cause toute sorte kalité causé et pou retire sa bane dimounes là dans la religion de Dieu et (zot raconte) beaucoup de mensonges.

 

Voilà pour aujourd’hui même, ene jour de Jummah, malgré sa nombre de gens ki nous conné là, ki mo fine conné dépi mo travail là dépi 1993, mo capave dire, Oui ena ene présence mais pour moi présence là li faible pou sa kantité dimounes ki la dernière fois et aussi dans bane l’années avant – bane travails ki nous fine fer – fine ena. C’est vrai aujourd’hui pas ene jour Congé Public, mais zot conné ki aujourd’hui Vendredi c’est ene jour Jummah, fine rencontre bane les autres! Mais seulement nous bizin satisfait ki kante même sa, ena nous bane frères et sœurs ici à Rodrigues ki présent. Alhamdulillah, parski kan nous guette bane les autres, dépi commié banané zot là, zot ena mosquées, zot ena tout, tout bane facilités, mais seulement aujourd’hui kan nous pé guette commié dimounes pé alle Jummah, commié dimounes pé fer Namaz en congrégation, bé li malheureux. Parfois Masjeed là reste vide. Kan ou passé l’heure Namaz, dans sa bane kalité Masjeed là, ou trouve seulement ene la fenêtre ki ouvert – ou pensé ki ena dimounes là-dans mais seulement pas ena personne ; Masjeed là vide ! Dans ene centre pas ena dimounes pou fer Namaz aussi. Deux Masjeed ena pour la communauté ki mo ti travail avant, et na pas ena bane Namazi. Forcé le soir, ou trouve 1 ou 2 pé fer Namaz en congrégation. Si astaire là ou alle guetter commié dimounes pé fer Namaz, ena bien peu (1 ou 2) ; la plupart c’est bane musulmans ki d’origine mauriciens même ki fine établi (et travaille) zot dans Rodrigues.

 

Bé ici, nous envie fer ene travail avec nous bane frères, sœurs et zenfants Rodriguais. Nous envie donne zot l’éducation de la spiritualité, pou amène zot vers la spiritualité, pour fer tous les zeffore possible (dans sa direction là), et pou rassembler sa bane jeunes là. Du moment ki zot gagne sa l’éducation de la spiritualité là, abé beaucoup de bane mauvais zot pas pou approché. Mais kan ou pas gagne l’éducation de la spiritualité, ou pas tourne vers Bondié, ou pas fer la prière, et laisse Satan provoke ou, lerlà même ou alle fer beaucoup de bane kitchoses ki pas bizin. Là-même couma mo fine expliqué, couma bane dimounes à cause l’argent alle commette bane zaffaires ki pas bizin couma vole etc. Kot ena l’argent, ena problèmes ki déroulé. Bane propres frères, sœurs, parents tout vine l’ennemies, à cause l’argent, à cause dibiens, lotte pé cokain so camarades. Dans la famille même existé sa ; lotte envie gagne plisse ki so camarade. Ena ki rode fer tout pou fer pareil couma so camarade, li capave prend loan lors loan, fer dette lors dette pou li ouvert ene travail, mais Allah conne mieux, dans sa lékaire là ki ena là-dans.

 

Actuellement, zot capave alle lors mo Website, écoute mo bane Khutba Jummah en créole... mo pas conné même si pas zot pé contigne écouté. Actuellement pé fer ene série Khutba lors lékaire. Si lékaire là même ena ene la grain moutarde pé commence malade, dans ene ti coin même, ena ene ti jalousie là-dans, ou sois doute ou mécontentement li enflammé, pareil couma sa souffle z’allumette là. Li tipti sa, li pas gros sa souffle z’allumettes là... mais kan li rapé, li flambé, li capave brûle par arpents et arpents. Li capave fer beaucoup de dégât. Avec seulement ene ti souffle!

 

Alors pensé si ou ena ene ti souffle de doute dans ou lékaire, ou ena ene ti souffle de jalousie, ou ena ene ti souffle de mal-pensé ou sois dans ou lékaire ou fini conné ki ou bizin gagne telle ou telle zaffaire, ena bane zaffaire bizin magouillé pou gagne l’argent. Tout sa bane zaffaires là commence dépi dans lékaire même. Et si sa bane zaffaire là commence implanté dans lékaire (couma bane planteurs ici à Rodrigues kan mo fine vini et fine gagne la pluie, alors vite vite zot commence plante la grain dans la terre), alors si ou commence plante sa bane kalité la grain là, la grain de jalousie, mauvais pensée, péna confiance dans ene dimoune et ou envie gagne plus. Kan ou, ou fer ene travaille ou envie gagne tant, mais les autres fer ene travail, pé réclame ou tant, ou ou discuté – ou conne zis ou souffrance, ou pas conne pou les autres. Ala dans ki façon nous lémonde pé aller! Dimounes pé galoupe derrière le monde. Dimoune pas pé cherche Bondié, dimounes pas cherche la spiritualité.

 

Nous trouve beaucoup beaucoup l’église pé monté – au cours de nous mission nous fine trouve ene l’église ki fine fek construire, ki coûteux en forme de bateau mais mo demande moi commié dimounes vine prier là-dans ! Ou sois zis li joli, dimounes tire photos. Au commencement kan mo ti fek vine dans Rodrigues pas ti ena beaucoup de bane mosquées, l’églises et temples, mais astaire là ena beaucoup, mais seulement commié de fidèles vraiment alle là-dans! Si zot tous ti pé attaché avec zot temples, l’églises, mosquées, et pas ti ena la haine pour personne, ou guette de séki bon, ki bon travail pé fer, abé zordi sa bane mauvais kitchoses là pas ti pou arrivé. Li malheureux kot (bane dimounes de Rodrigues) pé allé (dans ki direction zot pé prend). Et vraiment lékaire fermal kan ou guette bane zaffaires séki zot fer à cause la spiritualité. Zot fer bloque ene projet. Et du moment ki le serviteur de Dieu pé causé, là dans Rodrigues, à cause bloque ene projet, pou empêche bane missions là propager, pou empêche le mosquée grandi, continuer, fine arrête li là-même. Abé Just too bad saki pou arrivé! Sa même mo capave dire. Mo encore pé fer bane démarches, mo encore en contacte avec bane dimounes concerné, bane l’autorité, pé fer tout le mieux, mais mo trouvé astaire ena certains l’arrogance fine pousser dans zot lékaire. Et ena même ena ki fine manifester certains la haine pour nous. Ena bane dimounes ki fine alle plante sa bane la haine là dans zot lékaire. Bane ki fine planté, et bane ki pé manifesté, bé zot pou récolté (le mal saki zot fine semer!). Zot pas pou récolter bane fruits en tous les cas. Zot pou récolté piquant loulou couma zot dire ici.

 

Donc, c’est sa zot pou trouvé au commencement de mo Sermon du Vendredi, mo fine lire certains bane versets ki trouve dans le Coran, et sa li trouve dans Chapitre « Marie ». Nous nous appelle li Maryam, Hazrat Maryam, et ici zot appelle li Marie, la Vierge Marie. Ou trouver couma nous honore même la maman de Jésus ki ti ene Messie, li pas ti garçon Bondié. Et sa Chapitre « Marie » là, c’est Chapitre 19, Versets 74-80. Là-dans Bondié pé dire (mo pou lire so traduction, réfléchi lors là):

 

« Kan récite avec zot Nous versets ki bien clair, bane ki pas ena la foi dire à bane ki ena la foi: ‘Lékel de nous deux parties ena ene meilleure position et ene pli zoli société ?’ (Bondié dire) Combien de générations Nous fine détruire avant sa ki ti dépasse zot en dibiens et en apparence. » (19 : 74-75).

 

Pas ou dibiens, pas ou l’apparence ki compte, pas ou nombre/quantité ki compté devant liyeux Bondié, c’est la qualité. Bondié guette la qualité et Li guette ou lékaire, sipa ou lékaire pé tourne vers Li. Bane versets ki mo fine récité contigné dire dans Verset 76 (Bondié dire le Prophète (pssl)):

 

« Dire zot : ‘Bane ki dans l’erreur, (Allah) Le Miséricordieux pou file zot la corde ziska séki zot trouve séki fine promette zot, sois punition là ou bien dernier moment là. Alors zot va réaliser ki sanlà ena plus mauvais situation et ki sanlà so l’armée pli faible.’ » (19 : 76).

 

Ki sanlà bon? Nous pou guette ene coup! Nous fine mette nous lipié dans Rodrigues et moi mo dire haut et fort ki Bondié avec nous malgré nous très peu. Zot zot ene l’armée et zot croire nous ene ti poignée dimounes, ki nous pou capave alle fer ? Mais seulement Bondié dire : « Allé right, Nous pou guette ene coup. Zot dire sa bane là zot l’armée faible, bon, bé Nous pou guette ene coup.  Alors zot va réaliser ki sanlà ena plus mauvais situation et ki sanlà vraiment zot l’armée pli faible. »

 

« Allah augmente guidance bane ki suive bon chemin. Séki duré c’est bane bons actions ki meilleures auprès de To Maitre pou zot récompense et meilleure pou retour ki zot gagner. Eski to fine trouve celui ki fine rejette Nous signes et ki dire malgré sa : ‘Mo pou surement gagne beaucoup dibiens et zenfants.’ ? Eski li au courant bane secrets ou sois eski li fine fer ene engagement avec (Allah) Le Miséricordieux ? » (19 : 77-79).

 

Ou sois ou pé sauté lors ou dibiens, ou bane zenfants ou sois ou pé respecté ou l’engagement? Arrive séki arrive l’engagement ki ou fine fer avec Bondié, sa bizin passe primordiale ki ou bane zenfants, ki ou dibiens, ki ou propre disang parski c’est le Créateur ki fine envoye ou là lors la terre. Et c’est le Créateur ki fine donne ou parents. Et aujourd’hui ou fine vine parents, ou ena zenfants. Alors ena dimounes ki sauté lors zot bane zenfants. Zot guette défauts de bane les autres dimounes zot zenfants, mais pou zot zot bane zenfants zot défauts zot pas guetté! Kan zot pé trouve zot bane zenfants couma pé agir, zot ferme liyeux lors là, zot guette pour les autres. Sa même dire, sakaine bizin guette li-même avant tout. Sa même Bondié fine donne nous lors la terre ene la glace (miroir), ki avant nous sorti, guette nous-même dans la glace avant nous sorti. La glace là pou dire nous ki défaut nous ena, sipa nous fine peigne nous la tête bien, si pas nous linge bien lors nous. Avant nous sorti, nous linge pas bien lors nous et nous guette nous camarade sipa so linge bien lors li, sipa so la tête fine bien peigné, sipa (pour bane madames) li fine bien mette so la poudre, so di-rouge, avant ki nous guette les autres. Tous sa là c’est ene façon pou analyse ou la foi.

 

Donc, Bondié dire dans sa verset là :

 

« Mais non ! Nous pou enregistré séki li dire et Nous pou allonge so punition (sa bane dimounes, sa bane malfaiteurs là). » (19: 80).

 

Donc, li très très important mo bane frères et sœurs ki nous attaché avec bane commandements divines, avec l’unicité de Dieu, nous reste sincère avec Dieu, tourne vers Dieu, nous ena ene bon l’entente entre nous-même – faudé pas sakaine jaloux so camarade – et kan ene dimoune vine raconte ou ene kitchose, premier zaffaire nous guetter sipa saki li pé dire nous là li vrai, sipa li fausse, sipa li pé amène nous dans ene bon chemin, sipa li pé amène nous dans ene mauvais chemin.

 

Alors pas pou nannié ki Bondié pé dirige So serviteur choisi de sa siècle là lors bane Khutba, lors bane Sermons du Vendredi concernant « Lékaire ». Commié dimounes pé prend sa bane Khutba là compte? Couma bizin nettoye zot lékaire, couma bizin purifier zot lékaire. Si sakaine réussi comprend sa Khutba Jummah là, zot réussi comprend saki pé dire dans sa bane Khutba là, abé zot pou bane dimounes ki vraiment humbles – ki ena beaucoup de humilité. Zot pou ena respect pou bane grands, bane grands pou ena respect pour bane tipti et bane tipti pou ena respect pou bane grands. Et zot pou ena beaucoup de l’amour pour le Dieu Unique, pour le Créateur ki fine créer ou. Et en même temps kan ou pou ena l’amour pou Dieu, ou pou ena l’amour et sympathie et l’amitié pour So serviteur ki Li fine envoyé. Et ou pou reste toujours attaché avec la spiritualité.

 

Donc, pour fer sa bane travails de la spiritualité là, beaucoup dimounes pensé ki c’est bane travails facile; li pas facile. Pareil couma dans Coran (Al-Hujurat), Bondié dire coumsa : « Dire ki zot fine accepter l’Islam, mais pas dire ki zot fine gagne la foi. » Zot pas encore gagne la foi. Ou conner ki kantité dimoune bizin lutter kan bane difficulté vini. Allah fer bane testes avec li pou ki li gagne la foi? Pour li gagne saki nous appelle « Iman » ? Pour ki so la foi attacher avec Bondié? Ou conner ki kantité li bizin lutter ! Et pli ene dimoune oulé rapproche li avec Bondié, plisse sa dimoune là Bondié pou envoye bane épreuves, bane testes lors li.

 

Aujourd’hui le 07 Novembre 2014 – ene date important – beaucoup bane zenfants gagne congé (l’école). Mais avant sa, lors troisième terme (scolaire) zot ti bizin fer ene grand l’examen. Zot fine passe par plusieurs testes sa 1 l’année là. Finalement zot fine arrive lors ene grand l’examen, pour ki après zot gagne ene vacances. Mais bane ki pé aller avec zot certificat dans zot la main, ena ki ou pé trouve en sourire, zot pé montrer zot bane parents, zot bane frères, sœurs et camarades tous sa là, et zot content. Kifer? Parski zot fine travail bien et zot fine passé. Ene contentement manifesté, mais par contre bane zenfants ki pas fine travail bien, figure pas bon ditout. Et ena pé pleuré, astaire pé chagrin, parski 1 an fine fer teste mais kan fine arrive l’examen tout (résultat pas bon). Ou capave fine fer bane testes et passer mais c’est l’examen finale là ki important. Si ou fine fail dans ou l’examen finale, fini! Ou pou alle gagne ene classe katare, ou pas pou gagne ene bon classe kot ena tous bane zenfants malins. Si ou ti dans ene bon classe, bé demain ou ti pou gagne ene bon collège.

 

Donc, nous la vie li déroule coumsa aussi. Kan ene messager vini, li vine donne ou sa message là, sa message là kan li dessane du ciel li dessane couma sa la pluie ki tombé là. Tous sa bane pié et fleurs gagne sa la pluie là et même sa l’herbe là aussi gagne sa. Piquant loulou ki ou pas capave supporter, li aussi li gagne sa. Et ki ou trouve manifester plisse kan ene la pluie tomber? Pié fruit, légumes sorti, ou trouve bane courpa attaque li, mais saki manifester plisse li ki pas pou attaque li, c’est sa bane mauvais l’herbes là. Mauvais l’herbe là ou pou trouve li filé pli beaucoup et ni courpa ni mauvais bébéte, lipou blancs pour attaque li. Par contre sa pié fruit là, sa légumes là, ou pou fini commence trouve bébéte attaque li.

 

Alors essaye comprend, kan ene bon messager, le messager de Dieu li vini, li donne ou la parole de Dieu, abé maziné pou ena ene paké lipou blancs, courpa et scorpions pou attaque li, et pou ena toutes sortes kalité mauvais l’herbes pou sorti pou vine rode attaque ou Iman pou fer ou reste kot ou été. Zot pou préfère trouve ou ine tombé sou derrière la rue pluto ki trouve ou dans mosquée, pé fer la prière, pé prier ene sel Bondié.

 

Alle réfléchi séki mo pé dire et nous donne rendez-vous demain dans nous bane programmes ki nous pou fer. Insha-Allah. Et mo termine mo Khutba Jummah le 07 Novembre 2014 ici même, Insha-Allah.

Écoute le Khutba Jummah du Khalifatullah Munir A. Azim en intégralité (Audio)