بسم الله الرحمن الرحيم

 

 

Khutba Jummah

 

HADHRAT AMIR’UL MUMINEEN MUHYI-UD-DIN

 

Munir Ahmad Azim

08 Août 2014 ~

(11 Shawwal 1435 Hijri)

 

 

(Résumé Khutba)

 

Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane z’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

 

 

 

Taqwa c’est ene qualité ou ene caractère ki faire ene dimoune vivre d’après Shariah. Li réglé so la vie entier d’après commandement d’Allah Ta’ala en suivant le comportement et bane pratiques béni de nous bien-aimé prophète Nabi Kareem Hazrat Muhammad (saw). Celui qui inculquer sa qualité là dans li lors ene base permanent appelle li Muttaqi (ki ena la crainte d’Allah dans li, ki pieux et lors le droit chemin). Sa même nous appelle li Deendar (dévoué et rélizié) ou bien ene dimoune sérieux dans Deen (c’est-à-dire, la religion, en l’occurrence l’Islam).

 

Ene dimoune dans Deen li ena toujours la chance reste bien dans duniya aussi. Allah Ta’ala dire dans Quran-e-Kareem:

 

« Celui qui faire bon travails, ki li ene missié ou ene madame dans ene l’état ki li ene croyant, alors sans doute Nous pour accorde li ene la vie agréable... » (An-Nahl 16: 98).

 

Quant à bane difficultés ki li capave gagné, c’est bane difficultés ki faciles à surmonter et réglé parceki li conné ki la vie lors duniya li pour ene durée limité. Donc li conné ki bane problèmes aussi c’est bane problèmes temporaires. Le fait ki ene problème li temporaire li déjà ene grand soulagement. En tant ki ene Mousalmane li conner ki tout céki arriver li arriver par céki Allah Ta’ala fine décréter.

 

Être satisfait de céki Allah Ta’ala fine décréter li obligatoire. C’est ene l’état d’esprit ki faire grand problème paraite simple et facile, ki capave paraitre couma montagne lors le cœur et l’esprit de bane ki péna li. Ou capave trouve ene dimoune ki pé mange ene Kebab bien pimenté, so lizié même pé couler. Sa capave donne l’impression à bane ki pas conné ki li dans la peine. Mais dimoune ki conné, li conne très bien ki li pé jouir ene satisfaction extraordinaire dans so l’intérieur, c’est-à-dire, ene difficulté externe li pas nécessairement ene signe de ene souffrance interne. Li capave le contraire aussi surtout pou bane ki fine accède à ene degré bien avancé de Taqwa. Taqwa ou bien vive d’après Deen c’est la seule solution de tous bane problèmes. C’est le seul moyen pou attire grâce d’Allah. Péna aucaine chemin pour gagne la réussite apart vive d’après Deen !

 

Taqwa li ouvert la porte de bane bienfaits et li ene protection divine. Allah Ta’ala dire dans Quran Shareef :

 

« ... Et celui ki vive dans l’obéissance Allah, Li (Allah) faire ene chemin sorti pour li et Li (Allah) accorde li So provision dans ene façon ki li pas attane... » (At-Talaq 65 : 3-4)

 

Donc, péna personne ki pli dans bien ki ene Muttaqi. Pli ene dimoune li Muttaqi, pli li dans bien. Péna sortir de là. Bane Auliya-e-Kiraam dire ki si bane léroi ti conne sa richesse et sa fortune ki bane Auliya ti possédé dans zot lécoeur, zot ti pou rode attaque sa bane Auliya Allah là. C’est ene richesse et so fortune paraite fade et insignifiant dans lizié bane ignorants, parceki vraiment le monde (ban richesses mondaines) vine ene kitchose ki agace ene Wali-Allah dans so bien-être. Li senti li comme ene fardeau ki li envi débarrassé avec sa le pli vite possible.

 

Hazrat Aisha (ra) ti pé recevoir bane gros-gros somme couma 10,000 dirhams mais li pas ti faire l’argent là reste dans la caze ziska tanto. Kan tanto arriver, pas ti reste presque nannié même à cause li ti pé fini partage sa, à tel point ki dans Ramadan li pas ti pé ena ene ti casse aussi ki li capave acheté kitchose pour faire Iftaar.  

 

Ene fois Hazrat Talha bin Ubaidullah (ra) fine rentre la case avec ene figure triste et tracasser. So madame fine demande li ki faire li triste. Li dire dibien ki mo ena li trop boucou et sa pé bouleverse moi. Alors so madame dire li, bé partage céki to ena. Donc, li fine partage tout céki li ti ena à tel point ki li pas fine reste ene dirham aussi. Sa jour là, Hazrat Talha (ra) ti dépense 400,000 dirhams. Coumsa même ene fois Hazrat Talha (ra) ti vende ene terrain pour 700,000 dirhams. Ene nuit li pas fine dormi à cause sa dibien là. Arrive gramatin li fine partage tout.

 

Donc, vrai noblesse et dignité trouve amène la vie dans l’obéissance Allah Ta’ala. Li ranne dimoune là digne et noble. Pli ene dimoune li sérieux dans Deen, pli li noble et honorable dans lizié Allah Ta’ala.

 

Allah Ta’ala dire dans Quran-e-Kareem :

 

« ... Certainement le plus noble parmi ou auprès d’Allah c’est celui ki pli Muttaqi... » (Al-Hujurat 49 : 14)

 

Péna doute vrai Izzat et l’honneur li trouve dans vive la vie dans la vie temporaire lors la terre (dunya) d’après commandement Allah Ta’ala et d’après Sounnah de Nabi Kareem Hazrat Muhammad (saw). Sa c’est le verdict de côté d’Allah ki fine créé sak atome de l’univers. Jamais kit la force capave détrône ene ki Allah Ta’ala fine mette couronne lors so la tête. Ene personne honoré par Allah Ta’ala pas capave être déshonorer par aucaine force. Marche dans Deen li ranne ene dimoune honorable pour toujours. Allah Li-même dessane ene Sakina (tranquillité) dans so lécoeur kot alors personne pas capave touche li.

 

Vrai l’honneur li trouve alors dans Deen. Le bien-être réel et éternel li trouve dans Deen. Tout séki bon ki ene dimoune bizin li trouve dans Deen. Pour terminé, mo dire ou ki vrai l’amour pour Allah Ta’ala li faire ene dimoune sacrifié so désir personnel pour le plaisir d’Allah Ta’ala.

 

Alors, sakaine d’entre nous, ki li dans Jamaat Ul Sahih Al Islam et dans l’Islam dans so l’ensemble, nous bizin renforce nous l’âme, et nous lécoeur spirituelle afin ki nous réussi atteigne sa stage kot Allah amplement satisfait avec nous. Par la grâce d’Allah, plusieurs de mo bane disciples pé fer bane zéffor énorme pou arrive à sa stage là, et alors mo faire duah avec Allah Ta’ala pou accepter zot zéffor et accompli zot désire pou Allah amplement satisfait avec zot, pas zis pou ene ti moment, mais tout au long de zot la vie ici-bas et dans Aakhérat. Insha-Allah, Ameen.

Écoute le Khutba Jummah du Khalifatullah Munir A. Azim en intégralité (Audio)