بسم الله الرحمن الرحيم

 

 

Khutba Jummah

 

HADHRAT AMIR’UL MUMINEEN MUHYI-UD-DIN

 

Munir Ahmad Azim

11 Avril 2014 ~

(10 Jamad’ul Akhir 1435 Hijri)

 

 

(Résumé Khutba)

 

Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

 

 

 

Dans ene tel moment critique dans sa siècle là, Allah (swt) fine élève ene de bane croyants et suivants de Hazrat Muhammad (saws) et de Hazrat Massih Maoud (as) avec ene telle Jamaat – Jamaat Ul Sahih Al Islam – ki ena mission pou défendre l’Islam, la guerre contre l’injustice et pou donne bane réponses satisfezan à bane questions de bane non-Musulmans ki mo rencontrer, concernant mo proclamation Muhyiuddin, Khalifatullah etc. Mo bane l’ennemies et bane hypocrites, kan à zot, zot fine sauté avec colère et dans zot la rage, ki ti dépasse tout limites et bien exazéré, zot fine appelle moi drogué, sorcier, fouteurs dézordre, lichien, menteur et bane les autres mauvais noms encore. Mo bane l’enemies fine même prépare ene fatwa pou déclare moi Kafir et fausse prophète. Alhamdulillah, Summa Alhamdulillah.

 

Mo pas trouve nannié étrange là-dans parski sa c’est traitement ki tous les temps bane dimounes pieux et bane messagers d’Allah fine bizin subir. C’est seulement après ene lapse de temps ki zot vrai position, zot véracité li reconnu. Mo pas gagne tracas à propos bane fatwas de Kufr et tous bane les autres noms vulgaires ki zot fer et dire contre moi, parski à travers tous sa bane kalités difficultés ki sa bane dimounes là pé fer moi passer, en vrai dire, sa bane dimounes là pé fer ditort à zot propre nâmes, pas l’élu d’Allah. Pli zot essaye afflige moi avec zot bane mauvais l’intentions et actions, pli Allah (swt) servi moi pou servi So Deen et à travers sa humble serviteur là, Li (Allah) réussi établi l’excellence du Saint Prophète (saws), et aussi du Messie Promis (as), et ainsi ki le Quran Shareef. Bien entendu, mo seulement couma ene récipient dans la mains d’Allah. Li fer saki Li oulé avec sa humble serviteur là, parski kan Allah choisir ene kikaine pour So mission, alors sa dimoune là vine complètement pour Allah, et agir d’après la volonté d’Allah et tout saki sa élu d’Allah fer c’est à travers la permission et l’instruction d’Allah. Tout kitchose ena so mesure avec Allah. Sak dimoune et sak créatures d’Allah ena bane travails spécifiques ki zot bizin accompli lors la terre, et bane messagers d’Allah aussi ena zot bane missions à accomplir, ki li concerne bane messagers d’Allah de parmi bane dimounes, ainsi ki bane anges ki zot aussi zot bane messagers d’Allah.

 

Alhamdulillah, dans mo Khutba Jummah aujourd’hui et aussi Insha-Allah, vendredi prochain, mo pou explique zot lors l’excellence de l’Islam, bane révélations prophétiques, bane anges et zot bane fonctions.

 

Mo donne ene réponse à bane ki plongé dans la philosophie moderne et lève zot sourcils lors bane l’enseignements de l’Islam. Donc, O bane dimounes, nous bizin réfléchi lors façon couma pou vine bane bons musulmans et ki ene z’homme (ou ene femme) capave faire pou atteindre sa position là. L’iIlam li ene religion vivant et li assure à bane musulmans ki bane jours de la victoire de l’Islam zot à portée de la main.

 

Ena beaucoup chercheurs de vérité ki répande dans le monde, et du moment ki zot accepté l’Islam, zot vine récipiendaires de bane bénédictions d’Allah. Zot la vies changé pour le mieux surtout concernant zot la vie matérielle et spirituelle. Au début, sa difficile et dur pou atteindre – c’est-à-dire, sa l’idéal ki l’Islam favorizé et invite dimounes pou atteindre – mais nannié pas acqui sans z’efforts et sacrifices, nannié pas acqui sans ene bon l’intention pour l’accomplissement de bane devoirs couma Allah oulé ki tous bane musulmans accompli, surtout bane tel musulmans ki déclarer ki zot croire et ena la foi dans Allah, bane commandements d’Allah et tous bane principes et piliers de l’Islam.

 

Mo fine chargé par Allah pou faire appel à tous bane Maulvis et Muftis et bane les autres l’ennemis et bane hypocrites ki fine appelle moi par toutes sortes de noms, à cause de zot bane différence partielle, parski zot rempli de la haine à mo l’égard ou parski zot pas en mesure pou comprendre mo proclamation ; alors saki mo capave dire, prié Allah (swt) avec beaucoup de dévouement et de sincérité afin pou conné, ki sanlà lors le chemin droit et ki sanlà pas lors le droit chemin. Mo capave assure tous bane ki fine croire dans moi, ki pé étudié et pé envisage pou croire en la véracité de sa humble serviteur là, ou bane ki pou croire dans moi à l’avenir ki zot la fin pour ene la fin bienheureux et zamais zot pou perdants. Sa le monde là li limité et temporaire alors ki gain réel, vrai dividende, vrai récolte, vrai récompense c’est celui ki éternel et ki Allah pé offert zot, non seulement dans sa le monde, mais aussi dans l’au-delà. Sa bane faveurs là na pas ena la fin, et c’est avec sa bane faveurs là-même dans Aakhirat ki zot pou capave vive en paix, harmonie et avec ene l’attachement profond pou Allah, le Rab de tous bane les mondes (Rab’oul Aalameen), et c’est Li (Allah) ki vraiment le but réel d’ene vrai chercheur de vérité, ene vrai serviteur d’Allah.

 

Tout dimoune ki croire en kit religion révélée, bizin également croire ki Allah fine, à plusieurs reprises, envoye plusieurs prophètes dans lé monde, et ki aucaine nation pas fine manqué pou gagne ene messager d’Allah ki fine vine parmi zot, kot même ici dans sa ti l’île là, l’île Maurice, ki également ene pays africain (malgré ki li séparé de continent l’Afrique couma ene l’île) kot la population ici li environ 1 million 300 cent milles. Allah (swt) fine béni sa ti l’île là avec So Khalifatullah, ene calife, et messager choisi par Allah, parski, après ki l’Inde fine accepté et établir mission du Messie Promis (as), après c’est dans Angleterre ki mission du Messie fine établie, et ensuite deuxième pays ki fine accepté l’avènement du Messie Promis (as) et kot mission fine établie, c’est Maurice, en 1915 et l’île Maurice li ene pays multi-culturel kot ena beaucoup représentations de bane religions principales du monde ki vive là-dans.

 

L’évolution spirituelle de l’humanité li entièrement attribuable à sa catégorie de dimounes là, et sans zot, ti pou ena zis noireté dans le monde. Sa ti pou l’état du monde si Allah pas ti envoye aucaine de So bane élus parmi zot. Dans Quran Shareef, Allah (swt) dire: « Pas ena aucaine nation ki pas fine gagne ene avertisseur. »

 

Si nous essaye découvert le but ki faire bane prophètes fine envoyé de la part d’Allah, alors nous pou constater ki la cause de zot l’apparition fine toujours être la corruption spirituelle de zot peuples et de l’humanité et kot tous bane relations directes avec Allah fine coupé. Sa bane prophètes là touzour apparaite couma bane nuages ​​chargé avec la pluie ki rafraîchi et révive le terre après ene longue période la sécheresse. Nous ena sa croyance là ki succession de bane prophètes pou même dans l’avenir pareil couma sa ti le cas dans le passé, parski la raison réjette ene arrêt définitif de sa Sunnat (pratique) Allah là. La porte de la révélation fine toujours reste ouvert et pou contigné reste ouvert, et l’époque actuelle li ene témoignage catégorique lors la nécessité d’ene prophète d’Allah, de parmi bane réformateurs promis et bane ki tini et réhausse la foi ki Allah fine promette pour bane derniers jours (Aakhireen). Mais nous pas fonde nous conviction lors le témoignage de l’âge (l’époque) seulement, nous soutenu également par témoignage de bane prophètes ki fine vini avant. Mission ki Allah fine élève moi, c’est ki mo bizin rétablir dans les cœurs de bane dimounes l’amour et la dévotion pour Allah, et sa humble serviteur là bizin familiarize l’humanité avec bane vérités spirituelles ki li fine oublié, et surtout ki mo bizin rétablir d’ene façon permanent sa l’unité briyan et pure d’Allah et ki purifié de kit l’idées polythéistes, ki fine entièrement dispaître de lé cœur de bane dimounes. Allah fine envoye moi pou réforme sa l’état triste de l’humanité là et pou guide li (l’humanité) vers so l’unité pure. Bane dimounes cause Allah et spiritualité, mais zot les cœurs remplis de l’amour de sa le monde là.

 

Sakaine d’entre zot pou d’accord avec moi ki le monde ces jours-ci ena grand besoin d’ene guide doté avec perception et secours d’Allah ki pou bizin dirige l’humanité, pou sorti de bane doute et de défiance, et conduire zot vers vrai croyance et certitude (dans la foi). Si ena ene moment ki l’humanité bizin ene prophète, alors c’est azordi jours ki li ena ene grand besoin d’ene prophète, quand la religion fine vine couma un mot ki vide, ene mot ki pas ena so utilité et ki la vérité li couma li été, dans certains régions du monde dans coma et dans les autres parties du monde, li (la vérité) fine fini mort.

 

Le monde bizin ene Messager d’Allah ki vine de côté d’Allah, ki confirme bane vrais l’enseignements, messagers et réformateurs d’Allah du passé et ki établi li fermement pou protège l’honneur de bane envoyés et élus d’Allah et aussi pou préserve bane l’enseignements d’Allah et pou donne clairement le message. Mo pas fine vini pou démenti mo bane prédécesseurs et pou établi mo propre proclamation lors zot bane révendications. Mo fine au contraire vini pou confirme zot véracité et pou renforci la chaîne solide de bane élus d’Allah ki so bane perles pou continuer ajouté même, encore et encore, et sa pou aller ziska le Jour du Jugement, kot sakaine pou bizin confirme so camarade, et pas vine l’ennemi de l’autre. C’est aussi ene de bane moyens pour identifier de nos jours la véracité d’ene récipiendaire de révélations divines et so mission. Mo arrête ici-même  pour aujourd’hui. Insha-Allah, mo pou contigné sa Khutba là vendredi prochain.

 

Ki Allah sauve l’humanité et permette à bane dimounes pou percevoir la lumière de la vérité de So bane prophètes et messagers, sa bane tel réformateurs au sein de l’Oummah de son bien-aimé prophète Hazrat Muhammad (saws) ki prouve le statut élevé de sa dimoune et prophète rempli de gloire là, c’est-à-dire, nous bien-aimé prophète Hazrat Muhammad (saws) aux yeux du monde, et ce, jusqu’au jour du Jugement. Et ki Allah préserver So l’engagement ki Li fine faire avec So bane prophètes et permette à bane peuples du monde pou rassembler zot comme ene seule lécorps pour So l’adoration. Insha-Allah, Ameen.

Écoute le Khutba Jummah du Khalifatullah Munir A. Azim en intégralité (Audio)