Text Box: بسم الله الرحمن الرحيم Khutba Jummah HADHRAT AMIR’UL MUMINEEN MUHYI-UD-DIN Munir Ahmad Azim 12 Septembre 2014 ~ (16 Dhul-Qaddah 1435 Hijri) (Résumé Khutba) Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane z’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire: Alhamdulillah Summa Alhamdulillah, Allah (swt) fine donne moi l’occasion pou continuer le sujet de mo Khutba Jummah de la semaine dernière lors la nécessité de l’avènement d’ene prophète de Dieu, et la réalité de bane miracles et de la foi ki réuni ensam pour la réalisation de bane plans d’Allah. En effet Dieu Tout-Puissant, Allah (twt) fine causé dans le passé, et cause encore aujourd’hui avec So bane humbles serviteurs et messagers. Li incroyable pou pensé ki ene Bondié miséricordieux et aimant capave reste insensible à la vue de l’humanité ki pé alle à la dérive, dans l’erreur et attaché avec bane zaffaires mondaines et ki Li (Allah) pas pou prend aucaine mesure, aucaine action pour zot guidance et zot direction. Donc, mo bane chers frères et sœurs, si Bondié exister, zamais Li pas pou permette ene telle kitchose pou arriver! Si Li (Bondié) ressenti ene kit douleur pour So bane serviteurs dans zot bane épreuves ki zot passé, mais seulement Li (Bondié) pas prévoir nannié pour zot, alors nous bizin conclure ki soit Li pas ena le pouvoir pou guide l’humanité vers la vérité, ou ki atteindre la communion/communication avec Allah li pas l’objectif de l’existence de l’homme, et ki l’homme fine créé seulement pour manger, boire, et pou amène ene l’existence purement mondaine et animale. Mais sakaine de bane alternatives ki mo ti mentionné avant dans mo Khutba vendredi dernier li insupportable (pas pou capave même pensé). Pou imaginer ki Celui ki fine créé l’univers pas ena le pouvoir pou fourni bane moyens pour la direction spirituelle de l’humanité li ene l’idée bien ridicule. Le Créateur de l’ensemble bizin ena le pouvoir pou créer ene partie (de parmi sa l’ensemble là). Si nous admette l’existence d’ene Créateur, nous bizin admette ki Li ena le pouvoir absolu et ki nannié pas impossible pour Li, et ki Li capave accomplir tout sauf saki incompatible avec So sainteté et So perfection, et nous pas capave imaginer non plus ki l’homme fine créé simplement dans le but d’ene l’existence lors la terre parski, dans ce cas, nous pou obligé admette ki ene Créateur Sage et Omniscient (ki conne tout) fine créer sa l’univers énorme là en vain (pour nannié). Aucaine machine zamais créer dans le but pou simplement travail sans arrêt et sans aucaine but. Sak machine fine créer pour ene but et ene objectif défini. Si le but de l’existence de l’homme li seulement pou manger, boire et dormi, sa pou veut dire ki l’homme fine créé seulement dans le but pou garde li dans son confort. Si l’homme pas ena kit but dans so création, alors l’aide mutuelle (kot bane dimounes aide sakaine so camarade) pas pou capave être considéré comme le but de la vie. En plusse de sa, pou bizin suppozé aussi ki tous bane dimounes justes et pieux (surtout bane prophètes et réformateurs d’Allah) dans n’importe ki pays zot fine apparaite, que ce soit dans – la Syrie, l’Arabie, l’Inde, Israël ou bane les autres pays encore ti, Nawzobillah – Ki Allah préserve nous contre bane tels pensées, bane menteurs et bane imposteurs. Zot tous fine enseigner ki zot fine gagne bane directives d’Allah pour la guidance spirituelle de l’humanité, et pourtant, zot pas ti pou capave gagne sa travail/mission là (si arriver nous accepter sa fausse l’idée là ki soi-disant Allah fine arrête causer et fine arrête envoye So bane prophètes), soit parski Bondié (Allah) pas ena le pouvoir pou fourni ene guidance pour l’humanité, ou parski l’homme pas fine être créé avec l’objectif pou réalise l’exploit pou rentre en communication avec Li (Allah). Mais alors, eski nous la raison permette nous pou entretenir l’idée ki bane ki ti à l’origine de tout saki bon et juste et pur, ki ti bane spécimens parfaits de la vérité et de la sainteté, ki fine faire bane révolutions morales dans le monde et fine implante l’amour de la justice et la pureté dans le cœur de l’homme, alors eski nous capave ozé pensé ki sa bane dimounes là ti bane plus grands menteurs et bane imposteurs ki le monde fine produire, et ki zot fine appelle bane dimounes vers zot propres impostures? Ou, eski nous capave ozé croire ki bane hommes ki nous bizin reconnaite zot mérite pour l’ensemble de développement intellectuel, moral et spirituel de l’humanité, et ki fine laisse ene l’impression lors l’esprit de bane dimounes, et ki le passage de bane siècles pas fine réussi effacer, eski nous capave ena sa pensée là ki sa bane là ti perdi la tête et fine croire dans création de zot propres imaginations et fantaisies comme étant bane kitchoses ki ti ena ene la vie et l’existence dans l’univers? Si sa pas le cas – et, très certainement, sa pas le cas – alors pas ena les autres chemins excepté pou conclure ki bizin exister kitpar dans le monde ene religion ki capave conduire l’homme vers Bondié (Allah). Si tous bane religions existants fine vine corrompus, ene nouveau religion ti bizin être révélé pour guide l’humanité, et si existé encore dans le monde ene religion ki capave conduire l’homme vers Allah, mais ki pas capave rempli so fonction couma bizin, à cause dimoune népli prend compte la religion, alors ene réformateur bizin être élever pour dirige l’attention de l’homme vers la religion d’Allah et sa réformateur là ena sa mission pour attire l’humanité et pou dirige li vers li. Mo pensé et mo sûre ki sa aussi li le point de vue de tous bane dimounes doué d’intelligence, ki refléchi, ki pas ena différence entre la disparition totale de la vérité et le fait ki li tellement enveloppé dans le doute ki li fine initile pour servi de guide pour l’humanité. Sa dernier éventualité là li aussi catastrophique pour le bien-être spirituel de l’homme pareil couma premier éventualité là. Sa religion spéciale là, mo bane chers frères, sœurs et zenfants ki exister dans le seul but pour la réforme de la vie physique, moral et spirituel de bane dimounes c’est l’Islam. En effet l’Islam dans le passé ti la religion de tous bane prophètes et bane dimounes pieux et spirituellement éclairés, bane ki possède vraie connaissance, alors l’Islam pas seulement ti la religion du passé, mais li aussi la religion actuelle et future aussi pour sa bane kalité dimounes là. Quand l’Islam exister depuis la création du temps, alors li bizin être aussi dernier la religion ki pou exister ziska la fin des temps. Seulement, cette fois, Allah (twt) fine choisir, avec l’avènement du sceau de tous bane prophètes pou officialize sa la religion là et pou maintenir li dans so l’état pur et inchangé, en restant l’Islam (ene nom et mode de vie définitif) jusqu’à la fin des temps. Sa c’est pour indiquer ki bane suivants du sceau de tous bane prophètes, nous bien-aimé prophète Hazrat Muhammad (saws) zot aussi ena pou transmettre le même message et pou attache zot fermement à Quran-e-Kareem pour guide l’humanité vers Allah, parski le Quran et l’Islam, ainsi ki so prophète parfait Hazrat Muhammad (saws) représente la beauté de la religion, la beauté de l’humanité et la beauté de l’essence divine. Donc Bondié Tout-Puissant, Allah (twt), le Roi des Rois zamais pou arrête envoye So bane envoyés, So bane élu, bane réformateurs et prophètes Islamiques de parmi l’intérieur même de So religion choisie et de la descendance spirituelle du roi parfait et humain de So choix (c’est-à-dire, le Saint Prophète Muhammad (saws)) pour gouverne lors So bane sujets (serviteurs) et pou guide zot lors le droit chemin. En vérité, couma Allah (twt) dire dans Quran Shareef: « Et Nous fine envoye toi seulement en tant ki ene annonceur de bonnes nouvelles et comme ene avertisseur pour toute l’humanité. Mais la plupart de bane dimounes pas conné. » (Saba 34: 29) Comme Allah Le Tout-Puissant fine établi le libre-arbitre pour So bane serviteurs humains, donc So bane ambassadeurs, bane prophètes pas capave force ki que ce soit pou intégrer la religion d’Allah et pou purifier zot. C’est pourquoi, dans Quran Allah dire ki le prophète li seulement ene annonciateur de bonnes nouvelles (ki sa bon nouvel là sa ?), c’est-à-dire, l’appel d’Allah pour retourne à Allah dans la soumission et dans ene l’adoration sincère, et Allah aussi envoye li comme ene Avertisseur et Allah manifester So attribut de Celui ki Puni si zamais bane dimounes choizir le chemin de la déviation de bane Satans et de zot bane passions ki rende zot aveugles à la fois dans sa lémonde ici-bas là et dans Aakhirat (l’autre le monde). Alors ki lémonde et bane êtres humains pas capave reste pur et bien guidés pendant longtemps sans ene bon guidance, donc Bondié, ene Dieu ki Bon, Allah (twt) bizin toujours envoye So bane représentants, bane prophètes pour enseigne la beauté de So l’existence à tout dimounes de sorte ki zot capave recevoir la direction divine et zot être admi dans la miséricorde d’Allah, le Tout-Puissant, que ce soit dans sa monde ici-bas là et dans l’autre lémonde aussi. Sans aucaine doute, pas ena aucaine contrainte dans (matière de) la religion. (Al-Baqara 2: 257) Heureux bane ki fini par joinde rangs du Messager ki Allah fine élu, le Prophète d’Allah de zot l’époque et ki consacrer zot totalement pour la cause d’Allah sous la guidance d’Allah, zot Protecteur, Sauveur et Source de tous bane plaisirs: physique, moral et spirituel, dans tous les deux lémondes, et sous l’obéissance du prophète d’Allah, avec le dépôt de la direction divine tout au long de zot la vie. Insha-Allah. Ki Allah béni sakaine de zot dans Jamaat Ul Sahih Al Islam ki, jour et nuit sous directive de sa humble serviteur ki ici présent faire bane efforts extraordinaires pour ki la religion d’Allah, l’Islam triompher dans quatre coins du monde. Ki Allah vine zot récompense. Ameen. Et ki Allah guide tous bane lécœurs purs ki désire la réforme vers So royaume ki Li fine choisir dans sa l’époque présent là, c’est-à-dire – Jamaat Ul Sahih Al Islam – pour la victoire finale de l’Islam, Insha-Allah. Ki Allah gagne pitié de nous tous. Ameen.

Écoute le Khutba Jummah du Khalifatullah Munir A. Azim en intégralité (Audio)