بسم الله الرحمن الرحيم

 

 

Khutba Jummah

 

HADHRAT AMIR’UL MUMINEEN MUHYI-UD-DIN

 

Munir Ahmad Azim

17 Octobre 2014 ~

(22 Dhul Hijjah 1435 Hijri)

 

 

(Résumé Khutba)

 

Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane z’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

 

 

 

Alhamdulillah Summa Alhamdulillah, Allah (swt) fine donne moi de nouveau le Tawfiq et aussi le Ilm (la connaissance) pou contigne 4^ème partie de mo Khutba Jummah lors le sujet de  « Lé Cœur ».

 

Le cœur li la caze de la foi (Iman). Si kikaine croire dans Allah et dans So Rassool (saws) et li pas ena ene atome de Kufr (incroyance) et Nifaaq (hypocrisie) dans so lé cœur, zamais ene telle dimoune pou capave vine ene non-croyant. Aucaine non-croyant capave vine pieux, vertueux ou ene suivant du Quran et Sunnah de Rassoollullah (saws). Allah dire: « Allah pas fine mette deux les cœurs dans lécorps dimounes. » (Al-Ahzab 33: 5).

 

Nous apprane de sa verset là ki pas ena deux idéologies opposé ki capave être fondé lors ene même plate-forme pareil couma deux les cœurs pas capave former dans ene même lécorps. Ene vrai musulman li rentre camarade avec bane camarades d’Allah et li reste loin de bane l’ennemies d’Allah. A cause lé cœur occupe ene place important, alors c’est seulement saki li contenir ki pou être pris en considération. Fine rapporté dans ene Hadith ki Rassoollullah (saws) fine dire: « Allah pas guette ni zot apparence ni zot richesse, mais Li guette zot les cœurs et zot actions. »

 

Le cœur li le sanctuaire de Iman. Bane ki prétende ki zot bane croyants et ki pas ena Iman dans zot les cœurs, alors Allah fine averti zot dans sa façon là : «  Bane Arabes désert dire: « Nous ena la foi. Dire zot : « Ou pas encore ena la foi. Mais dire pluto : « Nous fine accepter l’Islam (nous fine soumette). La foi pas fine encore rentre dans ou lé cœur. » (Al-Hujurat 49: 15).

 

Allah fine dire aussi: « Celui ki rejette so la foi en Allah, après ki li fine accepter, excepté si pression fine faire lors li tandis ki so lé cœur même fine reste sûr dans so la foi... » (An-Nahl 16: 107).

 

Dureté lé cœur li ene type spécial d’entêtement (téti). Zot rézette bane versets d’Allah et zot les cœurs pas accepté bane conseils vertueux. Allah dire au sujet de bane Bani Israël: « Après sa, ou lé cœur ti vine dure, li ti vine comme ene roche ou même pli dure encore. » (Al-Baqara 2: 75).

 

La douceur du cœur de l’autre côté li ene moyen pou gagne la proximité d’Allah tandis ki dureté du cœur li ene moyen pou éloigné d’Allah.  Le Messager d’Allah (saws) fine dire: « Allah fine place So récipient dans lé cœur de bane dimounes ki habite dans sa l’univers là. Le récipient de zot Seigneur li trouve dans lé cœur de l’homme vertueux. Allah pli content bane les cœurs ki doux de nature. »

 

Punition pli sévère ki ene dimoune recevoir c’est durcissement de so lé cœur. Kan Allah li pas content avec ene nation, Li enlève de zot le moyen pou ena la miséricorde (pitié) dans zot lé cœur.

 

Allah fine dire ki Li fine scelle les cœurs de bane mécréants. « Tandis ki bane ki pas croire ki pas accepter tout sa là, li pareil ki to averti zot ou ki to na pas averti zot. Zot pas pou gagne la foi. Allah fine mette scellé lors zot lé cœur et zot z’oreille, et lors zot lizié ena ene voile. Pou ena ene grand punition pou zot. » (Al-Baqara 2: 7-8).

 

Lé cœur li ene la fontaine et source de bane l’intentions. Récompense accordé lors base de sa bane l’intentions là. Et c’est lors base de sa bane l’intentions là ki pou pose ou questions demain. Allah (swt) dire: « Allah pas pou attrape ou pou kit imbécilité dans ou serments, mais Li pou attrape ou pou l’intention dans ou lé cœur. Allah pardonner et gracier. » (Al-Baqara 2: 226).

 

Kan ene dimoune ena pou rende compte, tout pou dépanne lors so bane l’intentions, et en fait c’est lé cœur ki récipient de sa bane l’intentions là. Bane l’intentions là sorti du cœur même. Allah dire: « Ou pas faire péché si ou faire kit faute là-dans, mais (li ene péché) si ou lé cœur faire sa par exprès. Allah gagne pitié pou ou, et pardonne ou. » (Al-Ahzab 33: 6)

 

Ene lé cœur reconnaissant et ene la langue ki trempé dans Zikr (rappel) d’Allah c’est sa le don le plus meilleur et le plus précieux ki vine d’Allah. Le Messager d’Allah (saws) fine dire: « Ene lé cœur reconnaissant, ene la langue ki trempé dans Zikr (rappel) d’Allah et ene épouse vertueuse ki pou aide zot dans sa le monde là et aussi dans l’au-delà c’est ene trésor ki pli précieux. »

 

Allah (swt) Li au courant de tous bane secrets ki cachiette dans tous bane les cœurs. Li (Allah) conseille bane croyants dans sa façon là :

 

« Et gagne la crainte d’Allah. Vraiment Allah conner séki ena dans ou lé cœur. » (Al-Maida 5: 8).

 

« Allah conner saki ena dans ou lé cœurs. Allah conne tout et Li Clément. » (Al-Ahzab 33: 52)

 

En ce qui concerne bane Munafiqeen (hypocrites), Allah dire:

 

« Sa bane là, Allah conner séki ena dans zot les cœurs. Alors évite zot, mais donne zot bane conseils, et dire zot bane paroles ki capave touche zot lécoeurs. » (An-Nisa 4: 64).

 

Le cœur li aussi le récipient de bane avertissements, conseils et réprimandes. Allah dire :

 

« Parmi zot, ena ki faire semblant écoute toi. Nous fine mette ene voile lors zot lé cœur, de sorte ki zot comprend, et dans zot z’oreilles Nous fine créer ene vide. Même si zot ti trouve tout bane signes, zot pas ti pou accepter. So résultat, c’est ki kan zot joinde toi, zot dispute avec toi. Et bane ki rejette la foi dire : « Tout sa, c’est z’histoire vieux dimounes. » (Al-Anam 6: 26).

 

Ena tellement bane voiles lors zot les cœurs ki zot pas capave accepter bane conseils ou bane avertissements.

 

« Nous fine mette beaucoup dimounes et Jinns de côté pou l’enfer. Zot ena lé cœur, mais zot pas servi li pou comprend. Fine donne zot lizié, mais zot pas servi li pou observer. Fine donne zot z’oreille mais zot pas servi li pou écouter. Zot couma bétaaye (zanimo), pli égaré ki zanimo encore. Zot bane insouciants. » (Al-Araf 7: 180).

 

Sa bane dimounes là pas accepter et pas comprend la réalité de la guidance, et ni zot médite lors là avec zot les cœurs. Allah (swt) dire:

 

« Eski zot pas voyagé lors la terre ? Sa ti va donne zot ene lé cœur pou comprend et zoreille pou tender. C’est pas zot lizié ki aveugle, mais c’est zot lé cœur dans zot poitrine ki aveugle. » (Al-Hajj 22: 47).

 

Mo termine mo Khutba Jummah ici aujourd’hui et mo fer duah avec mo Rab ki Li donne moi le Tawfiq pou contigne lors le même sujet de mo Khutba vendredi prochain, Insha-Allah.

 

Mo termine avec sa duah là: Ô mo Rab, place-moi parmi bane ki cherche le pardon, place moi parmi To bane serviteurs droit et obéissant et place moi parmi To bane camarades proches par To bonté, Ô le plus Miséricordieux des miséricordieux. Ameen.

Écoute le Khutba Jummah du Khalifatullah Munir A. Azim en intégralité (Audio)