|
بسم الله الرحمن الرحيم
Khutba Jummah
HADHRAT AMIR’UL MUMINEEN MUHYI-UD-DIN
Munir Ahmad Azim
(20 Rabi’ul Aakhir 1435 Hijri)
(Résumé Khutba)
Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:
Couma zot tout astaire conné, Hazrat Mirza Bashiruddin Mahmud Ahmad (ra) ti le deuxième successeur du Messie Promis (as) depuis so propre semence. So travail comme Khalifatul-Massih et Musleh Ma’ud tous les deux fine bénéfique pour l’Islam et fine donne so fruits durant so la vie en entier.
Li ti ene Khalifa exceptionnel parski so naissance ti fini prédire par beaucoup de bane les autres prophètes ki ti vini dans le passé, ainsi ki bane saints. En plisse de sa, le Messie Promis (as), pareil couma mo fine dire hier, fine recevoir ene signe divine en faveur de la véracité de l’Islam comme ene résultat de so 40 jours de duahs en retraite à Hoshiarpur, dans l’Inde. Allah (twa) fine dire li ki li pou recevoir ene garçon pure (Zaki Ghulam) ki li fine appelle “Musleh Ma’ud” ki ti pou bizin né dans ene période de neuf ans. Li ti fini publiye prophécie concernant sa Musleh Ma’oud là le 20 Février 1886.
En accord avec sa prophécie divine là et dans limite de période ki fine spécifié, sa garçon promis là, garçon de Hazrat Massih Maoud (as) fine né, le 12 Janvier 1889 à Qadian, malgré ki so papa pas ti trop sûre si pas c’est sa garçon là-même ki pou vine Musleh Maoud (ra) ou sois ene l’autre de so bane garçons biologique. Au fait, c’est so garçon premier-né (non pas né et ensuite mort) ki fine reste vivant, et de parmi tous so bane garçon, c’est sa premier garçon vivant là ki fine représente sa l’espoir spéciale pour le future de l’Islam Ahmadiyyat. Fine mette so nom Bashiruddin Mahmud Ahmad (as). Sa prophécie à propos Mousleh Ma’oud ti aussi spécifié bane qualité spécial ki sa garçon promis là pour ena. Par exemple, fine prophétizé ki li pou extrêmement intelligent et pou bien savant. So popularité pou étendre jusqu’au bout de la terre et bane nations pou béni à travers li.
Nous conné ki li fine recevoir so l’éducation primaire dans ene l’école à Qadian, et ensuite li fine alle à collège Taleemul Islam kan li fine commence opéré en 1898. Hazrat Mirza Bashiruddin Mahmud Ahmad (ra) pas ti capave fer bien dans so bane l’étude à cause li ti pé tombe malade bien souvent. So carrière académique fine vine à ene fin en Mars 1905, kan li fine fail dans so l’examens finale. A peu près, deux ans avant sa, en Octobre 1903, li fine marié avec Sayyida Mahmooda Begum Saheba (aussi connu couma, Hazrat Umm-e-Nasir).
Li fine commence étudié traduction de Quran Shareef et bane Hadiths de Hazrat Moulvi Nooruddin (ra). En plisse de sa, li fine commence ene l’étude de la religion, l’histoire, la littérature et bane les autre sujets par li-même. Li fine transformer en ene grand savant et fine gagne ene grand connaissance de plusieurs sujet ki li ti capave facilement comprend et expliqué. De ce fait, sa prophécie de Hazrat Massih Maoud (as) là ki ti dire concernant le Musleh Maoud fine bel et bien remplie en so propre personne, kot dans sa prophécie là ti dire :
« ...Li pou extrêmement intelligent et compréhensible et li pou ena ene lékaire humble/doux et li pou rempli avec bane connaissance séculaire (mondaine/académique) et spirituel... »
Li fine recevoir so premier révélation divine en 1905, kan li ti ena seulement 16 ans : « Mo pou place bane ki suive toi là-haut bane ki pas croire ziska le Jour du Jugement. »
En 1907, ene ange fine enseigne le commentaire du Surah Al-Fatiha, le premier chapitre du Quran Shareef. Depuis sa moment là encore, et encore, li fine recevoir en cadeau de la part d’Allah commentaire du Quran Shareef.
Kan le Messie Promis (as) ti mort, Hazrat Mirza Bashiruddin Mahmud Ahmad (ra) ti ena seulement 19 ans, mais selment malgré so jeûne âge, dans sa moment critique là kot tous bane l’ennemi de Hazrat Massih Maoud (as) ti pé réjouir, alors sa garçon là fine deboute à côté lécorps de so papa et fine fer sa grand serment là : « Même si tout dimounes abandonne toi (le MessiePromis), mais moi mo pou déboute tousel contre le monde entier, et sa pas pou fer moi nannié sa, sipa ena kit l’opposition ou l’ennemi. »
En Février 1911, Hazrat Musleh Maoud (ra) fine fonde le Anjuman Ansarullah. En Septembre 1912, li ti alle fer le Hajj dans Makkah et en 1913, li fine commence publication d’ene journal ki appelle Al-Fazl.
Le 14 Mars 1914, kan Hazrat Khalifatul-Massih I (ra) fine mort, la majorité de bane Ahmadi fine élire Hazrat Mirza Bashiruddin Mahmud Ahmad (ra) comme deuxième succésseur de Hazrat Massih Maoud (as). Li ti ena seulement 25 ans. Ti ena à peu près 2000 Ahmadis ki ti présent pour sa l’occasion là, et zot ti prend le Bai’at dans so la main.
Ti ena ene ti groupe de bane Ahmadi ki ti ena, mais ki ti assez influent ki ti oppose Hazrat Mirza Bashiruddin Mahmud Ahmad (ra) et zot pas ti prend le Bai’at dans so la main. Au commencement, zot fine fer tout en zot pouvoir pou pas accepter li comme Khalifa, ensuite zot fine décidé pou quitte Qadian et alle établir dans Lahore. Zot ti certain ki Hazrat Mirza Bashiruddin Mahmud Ahmad (ra) pas ti pou capave survivre sans zot support et ki li pou dégringolé. Alors, saki zot ti pé espéré là pas fine arriver ditout.
Pour sa raison là, ziska azordi dans sa siècle là, sa bane kalité opposants de Musleh Maoud (ra) encore existé et zot fer de zot mieux pou mette bane fausses accusations lors li, et moi comme le Khalifatullah de sa siècle là et aussi le Musleh de sa siècle là, moi et mo Jamaat, Jamaat Ul Sahih Al Islam, nous fine challenge sa bane dimounes là et fine fer zot comprend à propos la véracité de sa garçon béni du Messie Promis (as) là et nous fine mette plusieurs bane arguments devant zot afin ki zot capave comprend et reste loin avec punition divine, mais malheureusement pour zot, zot fine persister dans zot imbécillité, kot alors moi et mo Jamaat nous fine lance zot ene Mubahila.
Mubahila fine lancer pas à cause zot pas croire dans moi, ni dans Manifestation Divine de sa siècle là, ni à cause zot fine traite moi menteur, Non! Parceki zot fine attaque l’honneur et dignité de Hazrat Musleh Maoud (ra) et mo pas capave reste le bras croiser, c’est à ce moment là ki mo fine lance zot Mubahila ; Mubahila concernant seulement le Musleh Maoud Hazrat Mirza Bashiruddin Mahmud Ahmad (ra), pou protège so l’honneur.
Alors, le Musleh Maoud, même avant li accepter et proclamé ouvertement ki li sa Musleh Maoud ki bane dimounes ti pé attane là, li ti fini commence accompli beaucoup travails. So la vie ki li fine consacré pour le Deen-é-Islam li apparent depuis so bane travails et so dédication pou implémente bane solutions à bane problèmes ki ti pé soulevé dans l’Islam et la communauté de bane croyants dans le Messie Promis (as), et sa fine fer li vine ene grand leader reconnu parmi bane dimounes.
C’est le 12 Avril 1914, kan li ti ena seulement 25 ans ki le premier Majlis-e-Shura de so Khilafat fine ena lieu, kot ti bizin fer ene plan de Tabligh au niveau international. En Décembre 1915, ene partie de commentaire Quran Shareef ti publié.
Le 01 Janvier 1919, plusieurs bane départements fine formé pou distribué bane travails pour le Sadr Anjuman Ahmadiyya. Le 15 Avril 1922, le Majlis-e-Shura ti établir pour la première fois, comme ene panel consultatif permanent.
Le 23 Septembre 1924, Hazrat Mirza Bashiruddin Mahmud Ahmad (ra) ti alle pour ene conférence à Wembley, dans l’Angleterre, kot so l’article : ‘Ahmadiyyat – le Vrai Islam’ ti lire à haute voix. Le 20 Mai 1928, li ti inaugure Jamiah Ahmadiyya, ene institution ki ti ena le but pou forme et produire bane missionnaires musulmans qualifié.
En Décembre 1930, so demi-frère Hazrat Mirza Sultan Ahmad (ra), ki pli grand ki li et ki ti né de premier mariage de Hazrat Massih Maoud (as), alors sa demi-frère là fine vini et fine prend le Bai’at avec li, et de sa façon là, dans ene certain manière, kan 3 garçons croyants de Hazrat Massih Maoud (as) fine arrive au nombre de 4 avec le Bai’at de Hazrat Mirza Sultan Ahmad, alors sa partie de la prophécie là fine accompli, kot fine dire ki le Musleh Maoud (ra) pou converti 3 et fer sa vine 4.
Le 25 Juillet 1931, li ti élu comme président pour le ‘All-India Kashmir Committee’, et li ti lutter bien dure pou ki bane dimounes de Kashmir ré-gagne zot droits. Plus tard, en Juin 1948, li ti envoye ene battayon de bane volontaires Ahmadi ki appelle ‘Furqaan Force’ pou alle la guerre dans l’armée Pakistanais pour la libération de Kashmir.
Couma mo fine dire hier, c’est le 28 Janvier 1944, pendant so Khutba Jummah ki Hazrat Khalifatul-Massih II fine proclamé ki li le ‘garçon promis’ couma fine mentionné dans prophécie concernant Musleh Maoud. Après sa, dans plusieurs de bane réunions publiques, li fine dire le Jamaat ki so proclamation li basé lors plusieurs bane révélations divines et bane rêves.
Sa bane réunions là ti ena lieu dans : Hoshiapur le 20 Février 1944, Lahore le 12 Mars 1944, Ludhiana le 23 Mars 1944, et Delhi le 16 Avril 1944. En Août 1947, kan Pakistan fine créer et fonctionner, Hazrat Musleh Maoud (ra) ensam avec bane membres du Jamaat fine sorti de Qadian pour alle dans Pakistan. Ena quelques 313 Ahmadis, ki appelle zot Darveshaan fine reste en arrière pou occupe Qadian.
Dans Pakistan, Hazrat Mirza Bashiruddin Mahmud Ahmad (ra) fine fonde ene nouveau centre du Jamaat dans Rabwah, ki ti ene boute la terre pas fertile, mais ki fine transformer dans ene façon extraordinaire en ene la ville, avec tous so bane institutions religieux, éducationnel et social. Le 10 Mars 1954, Hazrat Musleh Ma’ud (ra) fine survive ene l’attaque lors so la vie, mais selment li ti sérieusement bléssé dans so licou. Sa ti passé dans Masjid Mubarak, dans Rabwah, à l’heure de Namaz Asr.
Couma li ti pé lever pou aller après Namaz, ene de so l’ennemi, ki ti vine dans Masjid avec l’intention pou touye li fine vine de l’avant, depuis par derrière et porte ene coup de couteau lors ene côté de so licou. Sa blessure là ti bien profond, mais Allah (twa) fine sape so la vie. Plus tard, li ti ena pou alle dans l’Europe le 05 Avril 1955 pou bane soins médicale, En Europe aussi, li fine contigner occupe li avec so bane travails Jamaat, et li fine aussi inspecté bane missions à l’étranger. So la santé fine rétablir partiellement. Li fine révine Rabwah le 25 Septembre 1955.
A cause de bane grands responsabilité ki li ti ena, et bane l’effets de sa grand blessure dans so licou là, alors so la santé fine graduellement détérioré pendant ene période de 7 ans. En dernier lieu, le 08 Novembre 1965, vers à peu près 2 heures du matin, Hazrat Musleh Ma’ud (ra), fine intékale, à l’âge de 77 ans.
So Namaz Janaza ti dirigé par Hazrat Mirza Nasir Ahmad (ra) et li ti entérré dans Bahisti-Maqbara à côté de so mama, Hazrat Sayyida Nusrat Jahan Begum (ra).
Hazrat Mirza Bashiruddin Mahmud Ahmad (ra) ti possède ene combinaizon de bane qualités de leadership unique, li ti ene génie couma pou organise le Jamaat, et couma pou mette confiance dans Allah, et so courage ti exemplaire, ainsi ki niveau de connaissance ki li fine recevoir, et même so personnalité même ti ena ene sorte de Karisme. Péna aucaine doute, so 52 ans Khilafat représente ene période d’or dans l’histoire de l’Islam et l’Ahmadiyyat. Et, en so personne sa prophécie Musleh Maoud là fine accompli avec grand perfection. Alhamdulillah, Summa Alhamdulillah.
Ki Allah béni li et accorde li ene place bien haute parmi bane élites de parmi So bane serviteurs, dans le jardin de félicité. Et ki Allah contigné prouve so innocence et so véracité face à bane l’attaque et bane adversités lors li. Insha-Allah, Ameen. |
|
Écoute le Khutba Jummah du Khalifatullah Munir A. Azim en intégralité (Audio) |
