بسم الله الرحمن الرحيم

 

 

Khutba Jummah

 

HADHRAT AMIR’UL MUMINEEN MUHYI-UD-DIN

 

Munir Ahmad Azim

22 Août 2014 ~

(25 Shawwal 1435 Hijri)

 

 

(Résumé Khutba)

 

Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane z’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

 

 

 

... Mo fine choisir aujourd’hui ene sujet ki zamais pou capave fini expliquer. Couma mo capave dire, si tous la mer ti l’encre, et tous bane pié de sa lémonde là et de l’univers ti plumes, et léciels et la terre ti papier, alors tout ti pou épuizé mais commentaire du Surah Al-Fatiha zamais ti pou terminé. Tellement li ene chapitre très très important dans la vie d’ene croyant, et li trouve dans premier chapitre dans le Quran Shareef. Tellement li important ki kan ou commence le Namaz, bizin ena le Surah Al-Fatiha. Kan ou fer ene duah, bizin ena le Surah Al-Fatiha. Tellement li ene grand chapitre et aussi ene duah. Même ene dimoune li dans difficulté, même li malade, li pé souffert ; dans n’importe ki problème li été li lire Surah Al-Fatiha.

 

Par la grâce d’Allah, aujourd’hui le 22 Août 2014, mo fine pense pou cause ene ti peu encore ene fois lors sa chapitre très très important, le Chapitre - Surah Al-Fatiha. Mo conné ki zamais pou capave termine explique sa Surah là. Des siècles et des siècles, après moi pou vini, pou ena bane Mujaddids encore après moi, pou ena bane Khalifatullahs pou vini, pou ena bane Hommes de Dieu pou vini, zot pou contigner cause lors sa chapitre, lors sa Surah ki appelle Surah Al-Fatiha.

 

Le mot « Fatiha » vine de verbe « fataha » ki signifie « ouvert » dans le contexte présent. « Al » li ene l’article défini et Fatiha (au féminin ici parski li réfère au mot Surah ki féminin en Arabe) signifie sa Surah ki ouvert, ki commence le Quran parski li premier Surah du Quran, c’est-à-dire, couma ou ouvert le Quran, c’est sa même sa la clé important là; bizin ena sa la clé là pou capave ouvert le Quran et sa la clé là c’est Surah Al-Fatiha. Et aussi pou ouvert ou lékaire avec ou Créateur, pou montrer ki ou ena beaucoup l’amour pou ou Créateur et ou reconnaite ki ou Maître (Allah) Le Maître du Jour du Jugement Dernier, et c’est Li-même ki nous adorer et c’est avec Li-même ki nous demande pardon... Le Surah Al-Fatiha, avec sa même aussi nous ouvert nous Namaz. Kan ou fine réussi comprend le Surah Al-Fatiha, ki ou pé dire dans ou Salât, et kan ou fine ouvert le Quran Shareef, et ou trouve le Surah Al-Fatiha comme le premier chapitre. En plusse de sa, couma mo fine dire ou, li premier Surah ki nous réciter dans Salât (la prière, Namaz). Fatiha pas veut dire lève deux la mains... – Nous conné ki nous bane les autres frères musulmans, kan zot lève la main, zot dire « Fateha ». Péna nannié pou riyé là-dans. Nous pas ena pou moque bane là. Peut-être, kan fine lève la main, ou fer tous bane dimounes reconnaite, comprend « Fateha », c’est-à-dire, ou fer bane dimoune comprend pou commence avec Surah Al-Fatiha ; sa-même la clé là sa ! Ou duah commence par Surah Al-Fatiha. Mais bien souvent ena bane dimounes pas comprend ; sakaine ena so façon de exprime zot, mais dans exprimer aussi, ena so bane significations ki bien au profondeur. Bien souvent nous tende nous bane frères de l’Islam – pas bane Ahmadis – zot fer duahs, zot lève zot deux la mains là-haut et zot dire : « Fateha! ». Ena certain dimounes ti pé fer bane jokes lors là. Zot dire bane là fer « Fateha » pou gagne casse. Nous mette sa bane jokes là ene côté. Mais du moment fine dire/fer « Fateha », sa fer sak dimoune, sak croyant ki présent là conné ki zot duah bizin commencer avec Surah Al-Fatiha. Nous, nous dire « duahs ! ». Peut-être ena beaucoup dimounes pas conné ki kan dire « Fer duahs », bizin commence par Surah Al-Fatiha. Attention kan dire dimounes fer duah, li croire bizin dire « Assalamoualaikum ». Donc, le Surah Al-Fatiha, kan dire li (sa croyant là) : « Fer duah », li lève so la main, li faire duahs, et li lire le Surah Al-Fatiha. – Couma mo fine dire ou, « Fatiha » pas seulement veut dire lève deux la mains, malgré ki li recommandé pou lève la mains pour demande bane duahs (requêtes) à Allah et pou récite le Surah Al-Fatiha.

 

Le Surah Al-Fatiha ena plusieurs autres noms, tels ki : Maman du Quran Shareef. Ou conné été ene maman ? Ene maman, c’est à travers li-même ki ena ene génération, ene famille. Li (capave) ena plusieurs zenfants, commencé par l’aîné. Lotte là là li grand, après vine second, aller même d’après commié zenfant li ena. Et en plusse de sa, kan sa maman là pou ena ene zenfant, li regroupe tous so bane zenfants. Pareil couma Allah fine donne nous ene l’exemple, d’ene Mère Poule. Mouillé couma li mouillé, li mette tous so bane ti poussins enba so les ailes, la pluie, soleil, le soir kan fine arriver, li protège so bane poussins. Ene maman li protège so bane zenfants, n’importe zenfant là ki kalité li été ; mais li pou protège so zenfant. De l’autre côté, saki très très important là-dans, Surah Al-Fatiha li Maman du Quran. Et suivi de Surah Al-Fatiha, ena le Surah Al-Baqara, Chapitre « La Vache ». Vache ki li donné ? Du lait ! Ene maman kan li mette ene zenfant au monde, ki premier zaffaire li donne so zenfant ? Li donne li du lait, so du lait pou boire ! – L’allaitement maternel, du lait maman. (Zot pou trouve sa lors le Website ; ti ena ene ti conférence lors là). Du lait maman li tellement important pou sa zenfant ki fine prend naissance là, pou développement de sa zenfant là, ki commié boîtes du lait ki pé vendé ailleurs. Sans ki ou bizin dépense ene sous. Et sa du lait ki maman donne so zenfant là, ena (beaucoup bienfaits). Et Surah Al-Fatiha li Maman du Quran. Et li aussi, après li, ena sa du lait là. Après Surah Al-Fatiha, ena « La Vache » ki donne du lait. Et nous conné du lait li guéri beaucoup kitchose – beaucoup maladies. Et Surah Al-Fatiha nous dire li Surah La Guérison aussi, La Louange, Ce ki suffizan, Racine du Quran et d’autres noms encore.

 

Ena guérison dans sa Surah là. Ene fois, quelques compagnons (Sahaba) du prophète Hazrat Muhammad (saws) ti en voyage. Zot fine arrive à ene l’endroit et fine demande l’hospitalité à bane habitants, mais sa bane là fine refuse pou accueillir zot. Alors sa bane Sahaba là fine alle installe zot dans ene l’autre place. Mais fine arrivé ki le chef de bane habitants fine tombe malade. Zot fine essaye tout d’après zot connaissance, et zot fine fer tout saki zot capave essayer pou guéri li, mais zot pas fine réussi. Finalement zot fine alle cherche l’aide de bane musulmans là pour soigne zot  chef.

 

Alors bane Sahaba là fine vini et ene d’entre zot fine récite Surah Al-Fatiha lors malade là et alors li fine guéri par la volonté d’Allah. Bane habitants fine offert ene (ou plusieurs) mouton en cadeau à bane musulmans. Zot fine accepter cadeau là mais avant zot mange li, zot fine penser ki li préférable pou zot pou demande au prophète (saws) si sa permette pou zot pou manger. Le prophète (saws) fine réponde zot l’affirmatif et fine même dire zot pou réserve ene ti morceau pou li. Naturellement le prophète (saws) pas ti ena aucaine besoin d’ene morceau de mouton mais li ti envie montrer ki sa cadeau là ti Halal (licite) et ki li ti permette pou zot pou mange sa la viande là. (Bukhari, Muslim & Abu Dawood).

 

Dans signification d’ene hadith authentique (Hadith-e-Qoudsi), le prophète Hazrat Muhammad (saws) dire ki Surah Al-Fatiha Maman du Quran. Li composé de sept versets ki souvent répété (c’est-à-dire, ki récité dans Salât, dans chaque Rakah) et li le Cœur Quran-e-Majeed. (Ahmad)

 

Sayyidina Oubâdah ibn As-Samit (ra) fine rapporté ki le prophète (saws) fine dire: « Péna aucaine Salât pour kikaine ki pas récite Surah Al-Fatiha, le chapitre d’ouverture du Quran. » (Bukhari, Muslim).

 

C’est sa ki mo dire. Mo fine trouve sa auparavant. Mo pas conné si pas li encore exister dans Jamaat Ahmadiyya. Si ene dimoune fine vine en retard dans Namaz en congrégation, alors li fine arrive dans (posture) Ruku, dimoune là fine rate le Surah Al-Fatiha, fine fini rentre dans Ruku, ou sois dans « Sami ‘Allah Hu Liman Hamida » (Allah entende celui ki faire So louanges), pou li (li croire ki), so 1 Rakah là fine fini compter, malgré ki li pas fine gagne Surah Al-Fatiha. Par exemple, si Imam pé fer ene Namaz de 4-Rakaat, et dimoune là fine arrive dans premier Rakah même, li fine rate le Surah Al-Fatiha et Imam fine (fini) alle dans Ruku ou sois « Sami ‘Allah Hu Liman Hamida » et, alors kan Imam termine so Namaz, li aussi li terminé. C’est-à-dire, saki pé fer ou comprend ki dans 3 Rakaat li fine capave lire le Surah Al-Fatiha, mais quatrième Rakah là - premier là - péna Surah Al-Fatiha. Li fine manqué. Kan analyse sa Hadith là bien, saki pé fer ou comprend, si dans ene Rakah pas ena le Surah Al-Fatiha, péna Namaz. C’est-à-dire, Namaz pas compté. Donc, si arriver ou fine rate le Surah Al-Fatiha, Imam fine fini alle dans Ruku, alors ou bizin réfaire ou Namaz, c’est-à-dire, ou remplace sa Rakah ki ou fine manqué là, parski tellement le Surah Al-Fatiha li important, tellement important.

 

A noter (Bane les autres explications du Khalifatullah (atba) lors sa sujet là) : (1) Tanque ki Imam pas encore alle dans Ruku, si dimoune là fine réussi rentre dans le Salat à temps, et li fine réussi lire Surah Al-Fatiha pendant ki Imam là pé récite ene lotte verset du Quran après ki li fine lire Surah Al-Fatiha, alors sa Mussalli là so Rakaat dans Namaz li compté et so Namaz complète. (2) Kan Imam pé lire Surah Al-Fatiha à haute voix, bane Mussalli à l’arrière, zot aussi zot bizin lire le Surah Al-Fatiha dans ene la voix basse ou bien dans zot lékaire, et kan li termine le Surah Al-Fatiha, li pé lire ene l’autre Surah/Verset du Quran Shareef, alors bane Mussali reste tranquille et écouter).

 

Signification de Surah Al-Fatiha :

 

« Al-Hamdu » signifie : Louange. Louange li plus grand ki remerciements. Dire bane remerciements à Allah c’est bien, mais « Louanges à Allah » li meilleur.

 

« Lillaahi », signifie : À Allah. À Allah seulement parski Allah Li le Créateur de tout.

 

« Rabbil » signifie : Seigneur/Maître (de). Le Seigneur/Maître ki crée. Ki donne la vie. Ki nourri. Ki donne la mort. Ki donne la vie après la mort. Ki juge So bane créatures et ki récompense ou puni.

 

« Aalameen » signifie : Bane les mondes. « Al-Aalamine » li dérivé du mot « Al-Alamoune » ki le pluriel du mot « Al-Alam » ki signifie le monde. Donc « Al-Aalamine » signifie bane les mondes et « Rabbil-Aalameen » signifie Seigneur/Maître de bane les mondes. Les mondes de bane humains, celui de bane anges, celui de bane jinns. Les mondes animal, végétal, et minéral. Allah Li le Maître de tous créatures, en tout lieu et pour tout les temps. Toute la création en entier pas ena ene l’autre maître aparte Allah. Li (Allah) le Maître de bane vivants et de bane morts. Li ena pouvoir lors tous bane kitchoses.

 

« Ar-Rahman-Ir-Rahim » signifie : Le Très Clément, Le Très Miséricordieux. Allah Le Tout Puissant Li rempli avec clémence, grâces et pitié. Mais nous bizin aussi rappeler également ki Allah Li aussi très vif pou demande bane comptes et Li sévère en punition.

 

Le prophète (saws) dans ene hadith authentique (Hadith-e-Qoudsi), dire: « Si ene croyant ti conne ki genres de punitions Allah ena, li pas ti pou gagne le moindre espoir pou rentre dans paradis. Et à l’inverse, si ene croyant ti conne commié la clémence (miséricorde/pitié) d’Allah li vaste, zamais li pas ti pou perdi l’espoir pou gagne le pardon d’Allah. » (Muslim)

 

« Malik » signifie : Maître.

 

« Yawmid-Deen » signifie : Le Jour du Jugement Dernier. Allah Li le Maître du Jour du Jugement Dernier. Li pardonne à ki Il veut. Li récompense celui ki Li oulé et Li puni celui ki Li oulé. So rang li plus élevé ki celui d’ene juge ; Li capave pardonne à ene pécheur, mais sa li toutefois vine avec ene condition, c’est-à-dire, à condition ki sa pécheur là pas fine commette le Shirk (ki li pas fine associé bane fausses divinités à Allah, à condition ki li pas fine adore ene l’autre ki Allah).

 

Le Jour du Jugement Dernier li le jour kot nous pou ena pou paraitre devant Allah pour réponde pour sakaine de nous bane actions lors la terre.

 

« Iyaakanabudu Wa Iyyaka Nasta’ine » signifie : Toi (Allah) tousél ki nous adorer et avec Toi (Allah) tousél ki nous demande secours. Allah, dans So sagesse infinie fine envoye beaucoup de bane prophètes à travers bane siècles. Ena ki Li fine envoyé avec bane livres pareil couma : Le prophète Ibrahim – Abraham (as) ki ti vini avec le Suhuf. Le prophète Dawood – David (as) fine recevoir kan à li Zabour, tandis ki le prophète Moussa – Moïse (as) fine recevoir Tawrat. Bien après, le prophète Isa – Jésus fils de Marie (as) fine vini avec Injeel et finalement le prophète Muhammad (saws) fine recevoir Quran.

 

Le message commun de tous bane prophètes li renfermé dans bane Livres d’Allah. Bane messages de tous bane Livres d’Allah li renfermé dans le Quran. Message du Quran li renfermé dans Surah Al-Baqara. Message de Surah Al-Baqara li renfermé dans Surah Al-Fatiha. Et message de Al-Fatiha li renfermé dans verset « Iyaakanabudu Wa Iyyaka Nasta’ine ». Sa verset là renferme l’essence de l’unicité d’Allah. Allah Li unique dans So bane noms et attributs. Li unique comme Maître et Li unique dans So divinité. Péna aucaine les autres divinités aparte Allah.

 

Le fait ki quelqu’un ena la foi dans l’unicité d’Allah, dans So bane noms et So bane attributs li pas suffisant pour faire de li ene musulman. Le fait ki li ena également la foi dans l’unicité d’Allah, dans So toute puissance comme Maître li toujours pas suffisant pour faire de li ene musulman. Li bizin obligatoirement ena la foi dans l’unicité d’Allah comme divinité (kot li réaliser ki c’est Allah tousél ki mérite nous adoration).

 

Li essentiel de pas dépendre d’ene l’autre ki d’Allah, couma li essential pou toujours adresse nous bane requêtes et supplications à Allah tousel et directement (sans aucaine intermédiaire) pareil couma le sceau de bane prophètes d’Allah, Hazrat Muhammad (saws) fine toujours faire.

 

Ena beaucoup dimounes ki ena croyance ki Allah Li Unique comme Seigneur mais kante même sa, zot attribuer bane partenaires à Allah et, de ce fait, zot adore bane les autres, autre ki Allah. Par conséquent, sa disqualifié zot comme musulmans et zot tombe dans catégorie de bane ki commette le Shirk parski zot adore l’autre ki Allah ; et le Shirk ena pour résultat l’enfer si celui ki commette Shirk là pas répenti, pas implore le pardon d’Allah et pas gagne sa pardon divine là.

 

Insha-Allah, faute de temps, mo pou continué sa sujet là dans mo Khutba Jummah vendredi prochain. Ki Allah préserve nous du Shirk et façonne nous en musulmans sincères tout au long de nous la vie, avec l’objectif So l’adoration seul, et ki nous accomplir nous devoir pour invite le monde vers l’Islam, et à bane bienfaits sublimes du Quran et de Surah Al-Fatiha. Ameen.

Écoute le Khutba Jummah du Khalifatullah Munir A. Azim en intégralité (Audio)