بسم الله الرحمن الرحيم

 

 

Khutba Jummah

 

HADHRAT AMIR’UL MUMINEEN MUHYI-UD-DIN

 

Munir Ahmad Azim

 

24 Janvier 2014 ~

(21 Rabi’ul Awwal 1435 Hijri)

 

 

(Résumé Khutba)

 

 

Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

 

 

Abdullah ibn Mughaffal fine rapporté: Ene missié fine dire le Saint Prophète (saws): “Oh Messager d’Allah, mo content ou.” Li (saws) fine dire: “Fer attention de saki ou pé dire!” Sa dimoune là fine dire: “En vérité, mo content ou.”; et fine répète sa parole là trois fois. Le Saint Prophète (saws) fine dire: “Si ou vraiment content moi, alors prépare ou pou fer face la pauvreté, parski la pauvreté avance pli rapidement vers celui ki content moi ki de l’eau inondation vers so l’objectif.” (Tirmidhi)

 

Si ti ena ene l’amour ki ti exister au temps du Saint Prophète (saws) c’etait l’amour ki lié ene croyant à ene l’autre croyant seulement pour le plaisir d’Allah. Et ene l’amour ki ti pli grand ki sa, c’est l’amour ki ene croyant ena pou le prophète d’Allah (saws) et ene l’autre l’amour encore pli grand ki sa c’est l’amour  ki le prophète ti ena pou bane croyants et ene l’amour pli grand encore ki tout sa c’est l’amour ki le Saint Prophète ena pou Allah ; mais l’amour, le vrai c’est l’amour ki Allah ena pou So prophète. Et ensuite vine l’amour d’Allah pou so bane créatures ; surtout pou So bane serviteurs sincères.

 

Alors, li ene l’amour tellement grand et beau ki le prophète li perdi li-meme dans Allah ; et Allah accorde li So bane faveurs et faire lé cœurs de bane dimounes sincères, et bane chercheurs de vérité attacher à li.

 

Alors, c’est sa l’amour là : « Inni Uhibbu fil-laahi » (mo content toi/ou pou l’amour d’Allah) ki prend l’importance, surtout dans la vie d’ene croyant et pour le prophète d’Allah c’est sa l’amour pou Allah et pou l’humanité là ki fine faire li sacrifier tout so bane le temps et reste éveiller la nuit pou ki Allah sauve bane dimounes de bane calamités et pou pardonne zot.

 

Comment sa hadith là dire, l’amour du prophète, si ene croyant ena sa dans li, alors li bizin attane à passe par toutes sortes kalités épreuves, parski c’est à travers sa pauvreté et épreuves bien dure là ki Allah capave tester sincérité d’ene croyant pou conner si vraiment li ti dire sa seulement lors so la lèvre ou vraiment li ti pense saki li pé dire. Sa même dans sa hadith là, le Saint Prophète (saws) fine dire sa dimoune là, faire bien attention à séki ou pé dire. Si ou dire ki ou content moi (le prophète), alors ou bizin prêt pou passe par la pauvreté parski sa permette ene croyant pou arrive à so destination pli vite ki tout bane les zot dimounes, pareil couma ene inondation avec so la force, so pression de l’eau coule vers so destination.

 

Alors nous trouver couma le Saint Prophète (saws) fine attache li-même à la pauvreté, kot li même li fine préfère pou vivre ene la vie humble, rempli de difficulté et de famine afin ki so l’âme vine riche de l’amour divine, afin ki Allah ouvert pour li la porte de so salut et de so l’amour infini. Alors celui ki suive le pas de Hazrat Muhammad (saw) alors définitivement li pou bénéficier de la proximité d’Allah ; kot pou l’amour pou Allah et So prophète (saws), li lutte avec so propre lé corps, richesse et li sacrifier li pour la cause d’Allah. Alors définitivement Allah pou accorde li bane bienfaits spirituelle ki so l’âme recherché. Le corps physique de sa le monde là li bien temporaire. Allah pou continuer tester so bane banda ziska ki zot vrai l’essence et Niyyat (l’intention) vine claire. Alors quand zot fine prend ene l’engagement pou content Allah et So Rassool, alors zot bizin prêt pou vine bane soldats exalté de l’Islam kot zot accepter passe par toutes sortes qualités difficultés afin ki zot récolter la satisfaction et l’amour d’Allah lors zot et aussi la satisfaction et l’amour du prophète lors zot. C’est sa vrai richesse d’ene croyant kot so Iman nourri li de sa l’amour ki promouvoir par Allah là afin ki sa croyant là li vine pou Allah même, par so l’amour, ene vrai l’amour ki li ena pou Allah ; So bane prophète, So bane livres, So bane anges etc., alors, le chemin de sa croyant là pou ouvert kot li pou facilement trouve le chemin de so l’âme éclairé quand li ena pou retourne vers Allah et alors tout bane difficultés ki li fine passer dans sa le monde temporaire là pou paraitre couma ene nannié di tout.

 

Alors dire et faire, li deux zaffaire différent. Ou dire ene kitchose, surtout de côté spirituelle, alors ou bizin attane ki Allah tester ou lors bane paroles ki ou dire. Si ou dire par exemple, pas faire boycott et ou faire Khutba lors Khutba pou ki les autres arrête fer boycott, alors ou-même ou pou bizin montrer l’exemple pou pas faire boycott, et fer en sorte ki avec ou bane actions, ou montrer vrai l’enseignement de l’Islam. Astaire si ou dire ou content Allah et So bane prophètes, ki li Nabi Kareem Hazrat Muhammad (saws) et messager ki Allah envoyé pour ou l’époque, alors ou bizin attane ki Allah pou tester ou ziska ki li vine claire si pas ou vraiment sincère avec Allah et So messager ou sois c’est nek ene parole dans l’air ki ou dire pou embête ou même en premier et embête l’entourage de bane croyants. Alors sak croyant musulman, et surtout dans la Manifestation Divine de nous l’époque li bizin fer bien attention à séki li préserve so Iman et so l’amour pour Allah et le prophète ki li dire li ena. Penser épreuves lors épreuves pou vine lors zot mais si ou reste ferme et sincère pareil couma Hazrat Muhammad (saws) et so bane vrai compagnons, alors penser ki ou chemin vers Allah pou ouvert facilement et ki kan le moment pou vini ki Allah prend ou l’âme en So possession, alors ou pou ena ene sourire lors ou la lèvres, ou l’âme pou gai et ou pou rode retourne vers ou Créateur en attente de sa l’amour et la lumière divine ki pou enveloppe avec ou. Pas oublier, ou temporaire lors sa la terre là. Ou vrai bonheur c’est Allah.

 

Alors ki sakaine parmi nous réalise sa, et fer de so quotidien dédié pou Allah et pou travail pour la cause d’Allah, parski arrive séki arrive, ou content ou pas content, mais si ou dire ou croire, ou ena la foi et ki ou content Allah et So messager, alors ou pou bizin passe par bane épreuves énormes, et pense bien aussi, si ou réussi passe ou bane l’examens ki Allah fer avec ou, alors ou pou dans ou bien-être éternellement, Insha-Allah. Ki Allah fer zot tout réalise sa vérité là. Vine pour Allah. Allah pas demande ou grand-chose Li. Ou vivre lors sa la terre là, mais na pas oublier Li. Sak fois ki l’homme oublier Li, alors Allah envoye So représentant lors la terre pou fer bane dimounes rappelle Li, prier Li et demande et suppliyer Li tousel et non pas bane fausses dieux.

 

Ki Allah fer nous tous Mubarak dans sa chemin ki nous fine prend pour gagne Allah comme nous récompense. En vérité nous victoire et nous bonheur vine de Allah seul ; c’est Li ki renforci nous et faire nous marche vers la victoire, avec So la lumière lors nous et c’est Li ki fer ki bane épreuves vine couma ene nannié ditout dans le parcours ki nous fine prend pour accède à So plaisir, Insha-Allah, Ameen.

Écoute le Khutba Jummah du Khalifatullah Munir A. Azim en intégralité (Audio)