بسم الله الرحمن الرحيم

 

 

Khutba Jummah

 

HADHRAT AMIR’UL MUMINEEN MUHYI-UD-DIN

 

Munir Ahmad Azim

25 Avril 2014 ~

(24 Jamad’ul Akhir 1435 Hijri)

 

 

(Résumé Khutba)

 

Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

 

 

Azordi jour le gambling fine prend ene l’ampleur extraordinaire. Et li détruire tout lors so passage. Li pas guette ki nation et religion ou été. Azordi bane ki dire ki zot musulmans aussi pas épargner avec sa fléau, sa attraction satanique là. Arrêter avec le gambling avant ki Allah so calamite dessane lors ou.

 

L’islam c’est ene religion ki envie ki ou suivre bane commandements ki Allah fine établir non seulement  pour bane croyants mais aussi pour toute l’humanité.  Allah fine établir ki ou cherche ou la vie, ki ou gagne l’argent par bane moyens licites. Tandis ki bane jeux de hasards comme loterie, jeux lé cours, corbeille ménagères, jouer carte, casinos, lotos etc. faire bane dimounes dépanne lors la chance, et fausse l’espoir pour zotte gagne l’argent sans faire zeffore, sans moyen Halaal et sans respecter bane principes ki Allah fine établir pour gagne l’argent. L’islam c’est ene religion, ene Deen ki travaille en beauté. Li fine établir sak kitchose dans so place, et donc li fine faire richesse de bane les autres Haraam pour nous.

 

Li pas permettre pour prend quelque chose excepté par ene moyen légale et prend propriétaire là so consentement. Le gambling c’est prendre l’argent de bane les autres par bane faussetés, par bane moyens malhonnête. Allah interdit sa dans So livre béni (le Quran Shareef):

 

« Et pas dévore entre zotte et illégalement zotte du bien et pas servi li pou corrompe bane juges pour ki permette zotte pour dévore ene partie du bien des autres injustement, alors ki zotte conné. » (Al-Baqara 2: 189).

 

Et dans deux les autre versets ki trouve dans Surah Al-Maida, Allah dire :

 

« Ô bane croyants ! Di Vin, jeu du hasard, bane pierres dressé, banes flèches pour divination pas nannié excepté ene travail malpropre Shaytane ; écarte zotte (de sa) afin ki ou réussi. En vérité, diable pé envie jette parmi zotte à travers di Vin et jeu de hasard l’ennemité et la haine et détourne zotte pour na pas rappelle Allah et pour pas accomplir Salat (Namaz). Est-ce ki zotte pas pou arrêter ? » (Al-Maida 5 : 91-92)

 

Et dans Hadith, fine rapporté ki le prophète fine dire ki Allah fine interdit di Vin, le jeu de hasard et bane les autres intoxicants. (Ahmad)

 

Péna aucaine doute, le jeu de hasard pé faire beaucoup du tort. Ki li soit coté Deen ou coté Dunya.

 

Quand à so du tort ki li faire dans le Deen:

 

1. Li ene grand péché ki appelle la colère d’Allah et So punition.

2. Li tellement grave ki Allah fine place li à coté du Shirk dans Chapitre 5 Verset 91.

3. Li ene grand malpropreté et impureté. Allah fine qualifié li comme (Rijs).

4. Le jeu de hasard c’est une action de démon, le maudit. Péna doute satan c’est l’ennemi déterminé pour Insaan. Li fine promettre ki li pour égare zotte tous. Et Satan so action amène vers difé l’enfer.

5. Gambling empêche ene dimoune faire progrès dans so la vie car Allah So colère et So malédiction tombe lors li matin et soir.

6. Gambling détourne ene serviteur de la pensée d’Allah et de Salat. De même ki bane travail.

7. Li faire dimoune là mette difé  dans so ventre et li faire les autres mange difé aussi.

 

Et quand à so du tort dans Dunya:

 

1. Li amène vers la haine, la jalousie et l’ennemité.

2. Li faire dimounes la guerre, verse di sang, faire crime etc.

3. Li faire dimounes vine paresse. Li faire zotte décourager pour faire ene travail Halaal et faire zéffore. Li faire zotte penser ki dans gambling, zotte pou gagne l’argent facilement. Nec joué, gagner coup sec.

4. Li faire dimounes désespérer dans la vie et ensuite zotte alle suicider.

5. Li faire dimounes vine voleur. Quand zotte péna pour alle jouer, zotte coquin.

6. Li appauvri dimounes de jour en jour en jour, et empire zotte situation.

7. Li faire dimounes accumule dette.

 

Musulmans et musulmanes, jeux de hasard pé fini nous communauté, nous pays et le monde dans so l’ensemble. C’est ene grand la honte sa, ki nous trouver ki nous dans ene pays, kot  ena l’encouragement pour jouer lé courses, tote, loto, loterie, games, lé courses etc. li montré ene vilain l’image de nous société et de nous pays et surtout quand ene musulman pé tombe dans ene piège de Shaytane et de so bane l’armées. Cote li (sa musulman là) ti bizin ene modèle pour les autres, li même divan dans mauvais travails. Ene bon musulman bizin suivre l’enseignement Quran. Et Allah fine ordonne bane croyants pou suivre l’ordre ki banes prophète fine gagné :

 

« Ô bane Messagers, mange séki permette et agréable et faire du bien » (Al-Mu’minine 23: 52).

 

Partout cote ou aller, dans sak coin la rue, ena facilité pou ou jette ou l’argent dans Haraam. Mille fois ou faire ene travail Halaal et ou gagne tiguitte casse ki ou jouer et ou gagne ene grand fortune. Allah dire :

 

« Dire : Saki mauvais (impure) et saki bon,  zotte pas égale même si beaucoup impure vine séduire ou. Peur Allah, Ô bane ki ena l’intelligence afin ki zotte réussi. » (Al Maida 5: 101).

 

Bane responsables de bane pays du monde et aussi à Maurice pé contribué pou fini dimounes. Cote zot ti bizin mette bane stratégies déboute pour créer l’emploie, zotte pé faire dimounes vine pli pauvre et misérables. Et zotte pas honteux pour prend sa l’argent Haraam pou donne dans bane projets sociales pour aide bane pauvres. Et éna certains musulmans pour tombe dans sa piège là et pou bénéficier de sa bane facilités là. Pas hésiter pour dire NON à bane jeux de loterie, games. Pas hésiter pour dire la vérité et tire ou prochain dans mauvais chemin. Li pas trop tard pour ou faire tawba mo bane frères et sœurs. Retourne vers chemin ki  Allah fine tracé pou ou du bien. Ou pou heureux dans dunya et dans Aakhirat. Peur Allah et pas vine ene combustible pour di feu l’enfer.

 

Ki Allah aide nous pour nous lutter conte le mal et ki Allah aide nous pour faire la vérité triompher lors fausseté. Insha-Allah, Ameen.

Écoute le Khutba Jummah du Khalifatullah Munir A. Azim en intégralité (Audio)